1, 2. მუ მოხვარუნა თიშ ინონჭაფას, მუს გინაფლენს იეჰოვა?

 ᲬᲔᲠᲛᲘᲓᲒᲘᲜᲘᲗ, ნამდა მიდგარენ ტყურას ეგკაწამენა დო ბრელ იჯერენს თეს. ხვალე თენა ვარინ, შხვეფწკუმა ხოლო გილარაგადანა დო თე ტყურას ირიათო უმოს დო უმოს ადამიან იჯერს. მუჭო იგინანდით დუდის? ხალხიშ თოლს მუნერ სახელ გაღვენუნან თენა არძაართ ვა გაფუნან-და, იმწკუმა გურ მანგარო დორჭყორდუდეს (იგავ. 22:1).

² თეშ წარმოდგენა მიმეხვარებუნა, ქენვანჭათ, მუს გინაფლენდჷ იეჰოვა, მუჟამსით მუშ ართ-ართ ანგელოზიქ თის ტყურა ქეკაწამ. მუჭოთ მიჩქუნა, პირველ ოსურკოჩიქ, ევაქ, დეჯერ თე ტყურა, მუდგაშ გურშენ თიქ დო მუშ ქომონჯიქ ოჭიშ ქურთინუეს იეჰოვას. თევრეშე მოჸუნაფილ ცოდა დო ღურაქ მთელ კაცობრიობას მადვჷ (დაბ. 3:1—6; რომ. 5:12). თაშ ნამდა, არძა უბედრობა, მუთ ამდღა მსოფლიოს ხვადუ, ღურა, ომეფ დო ტანჯება, თი ტყურაშ შედეგ რე, მუთ სატანაქ ედემიშ ბაღის იეჰოვას ეკაწამ. მუჭო ფიქრენთ, გურს ვა უჭუანსო იეჰოვას თე ტყურა დო თი ირფელ, მუდგაქ თის მაჸუნ? მუშო ოკო რაგად, თაშ რე. მარა თეშ უმკუჯინუო, იეჰოვა გაჟღამებულ ვა რე დო გურ ვა გორგილაფ. პირიქით, ბიბლიას ჭარჷ, ნამდა თინა „ბედნერ ღორონთ“ რე (1 ტიმ. 1:11).

3. მუ პატი მიღუნა?

³ ჩქი მიღუნა პატი, მონაწილება მიბღათ ღორონთიშ სახელიშ განწმენდას, მუჟამსით მივაჸუნუთ თე მარტივ მითითებას: „განადიდით იეჰოვაშ სახელ“ (ფსალმ. 113:1). თეს გუაკეთენთ, მუჟამსით შხვეფს სიმართლეს ქივეჩიებუთ იეჰოვაშ წმინდა სახელიშ გურშენ. მუს თქუანთ, მიღენთო მონაწილებას თე საქმეს? მორთ ასე გუარჩუათ სუმ მხარე, ნამუთ მიმეხვარებუნა, შურ დო გურით განვადიდათ ჩქინ ღორონთიშ სახელ.

 ᲛᲣᲟᲐᲛᲡᲘᲗ ᲒᲐᲜᲕᲐᲓᲘᲓᲔᲜᲗ ᲘᲔᲰᲝᲕᲐᲨ ᲡᲐᲮᲔᲚᲡ, ᲒᲣᲠᲡ ᲣᲮᲐᲠᲔᲜᲗ ᲗᲘᲡ

4. მუშენ ოხიოლ იეჰოვას, მუჟამსით განვადიდენთ? ქიმიჸუნით მაგალით (ქოძირით სურათ).

⁴ მუჟამსით ჩქინ ზეციერ მუმაშ სახელს განვადიდენთ, თის თენა მანგარო ოხიოლ (ფსალმ. 69:30, 31). ნიშნენსო თენა, ნამდა ირფელიშშემალებე ღორონთის ხოლო არასრულყოფილ ადამიანცალო ოსაჭირ ცქვაფა დო ჯგირ სიტყვეფ, ნამდა ღირსებაშ გრძნობა უღუდას დო მუშ დუდშა დარწმუნებულ რდასჷ? შუროთ ვარ! ქიმიპჸუნათ თეცალ მაგალით: წერმიდგინით ჭიჭე ძღაბ, ნამუთ მუამუშშა მირულე, გითაკირუ კისერს დო ურაგად: „ჩქიმცალ მამიკო მითინს ვა ჸუნსჷ!“. მუმას გურ უტიბუ დო ხიოლით აფშაფუ. მუშენ ოხიოლ მუმას თეცალო სქუაშ საქციელ? თიშენიო, ნამდა ოსაჭირ მუშ ძღაბშე ცქვაფა დო ჯგირ სიტყვეფიშ მორჩქილაფა, ნამდა დუდიშ რწმენა უღუდას? ვარ, თის ოხიოლ, ნამდა მუშ საჸოროფო სქუა მარდულობას დო ჸოროფას გიმოხანტუნს თიშ მიმართ. თეს გეძინელ, თინა ხოლო ოხიოლ, ნამდა მუშ ძღაბის თეცალ ჯგირ თვისებეფ უღჷ, მუთ ხეს შეუნწყუნს თიშ ბედნერობას, მუჟამსით მირდუ. ზუსტას თე მიზეზეფიშ გურშენ ოხიოლ ჩქინ ზეციერ მუმას ხოლო, მუჟამსით განვადიდენთ თის.

5. მუს ვამტკიცენთ, მუჟამსით ღორონთიშ სახელს ვადიდენთ?

⁵ მუჟამსით განვადიდენთ იეჰოვას, ვამტკიცენთ, ნამდა სატანა მეტყურე რე. თიქ ჩქი ხოლო ეკმაწამეს ტყურა დო თქუ, ნამდა ნამთინ ადამიან ვეჸუაფ ბოლოშა ღორონთიშ ართგურ, მუჟამსით გეგმიცადებ. სატანაშ ნარაგადით, იეჰოვაშ მსახურებას მუთუნ სამოგებოს ვა ბძირუნთ-და, ხეთეშე ქურთინუანთ თის ოჭიშის (იობ. 1:9—11; 2:4). ღორონთიშ მსახურ იობიქ, მუშ ართგურობათ დამტკიც, ნამდა სატანა ტყურას იჩიებუდ. თითოულს მიღუნა საშვალება, ქიგებდირთათ იეჰოვაშ მხარეს დო ჩქინ ართგურ მსახურებათ გურ გუხარათ თის (იგავ. 27:11). თენა მართალო დიდ პატი რე!

6. მუჭო შემლებუნა მივაჸუნათ მეფე დავითიშ დო ლევიანეფიშ მაგალითის? (ნეემ. 9:5).

⁶ ღორონთიშ ჸოროფა გინაჭყვიდირაფუანს მუშ მსახურეფს, განადიდან ზეციერ მუმაშ სახელ. მეფე დავითიქ ჭარჷ: „ვადიდენქ იეჰოვას! მთელ შურ დო გურით განვადიდენქ თიშ სახელს!“ (ფსალმ. 103:1). დავითის არჩქილედ, ნამდა იეჰოვაშ სახელიშ განდიდება თიშ განდიდებას ნიშნენდჷ. მუჟამსით სახელ იეჰოვას გებგონენთ, ჩქინ გონებაშა მოურს პიროვნება, მით თე სახელიშ უკახალე გერე, თიშ ძვირფას თვისებეფ დო დიდებულ საქმეეფ. დავითშო ზეციერ მუმა წმინდა რდჷ დო ოკოდ, შურ დო გურით განადიდუკო თინა. ლევიანეფ ხოლო, მიდგას ცხოვრება იეჰოვაშ განდიდებაშა აფუდეს მეძღვინელ, თანდაბლურო აღიარენდეს, ნამდა სიტყვეფ  ვა უბაღუდეს, იეჰოვაშ სახელ თეშ განადიდესკო, მუჭოთ იმსახურენდჷ (წეკითხით ნეემიაშ 9:5). დარწმუნებულ ვორეთ, თეცალ თანდაბლურო დო შურ დო გურით რაგადებულ განსადიდებელ სიტყვეფ გურს უხარენდჷ იეჰოვას.

7. მუჭო შემლებუნა განვადიდათ იეჰოვა მსახურებაშ დროს დო ირდღაშიან ცხოვრებას?

⁷ იეჰოვაშ გურს ვახარენთ, მუჟამსით თიშ გურშენ ჩიებაშ დროს ჩქინ სიტყვეფშე ჸოროფა დო მარდულობა იძირე. მსახურებაშ დროს ირიათო ფშუნა ჩქინ მთავარ მიზან — ქიმვეხვარათ ადამიანეფს, დეახლოვან იეჰოვას დო მოჸოროფე ზეციერ მუმას ჩქინ თოლით უჯინან (იაკ. 4:8). ხიოლით ვეჩიებუთ ადამიანეფს, მუნერ პიროვნებათ მოჩინებაფუანა ბიბლია იეჰოვას, მუჭო მოძირანა თიშ ჸოროფას, სამართლიანობას, სიბრძნეს, ძალას დო შხვა ბრელ სქვამ თვისებას. იეჰოვაშ განდიდებაშ დო თიშ გურიშ გახარებაშ ხოლო ართ საშვალება რე, ირნერო ვეცადათ თიცალ თვისებეფიშ გიმორჩქინას, მუნერით თის უღჷ (ეფეს. 5:1). ზუსტას თე ჯგირ თვისებეფით ვორეთ გიშართილ თე უბადო ქვეყნიერებაშე, მუდგას ხალხ ორწყე დო მინშა უკვენა, მუშენ ვორეთ თეცალეფ (მათ. 5:14—16). ირდღას, შხვადოშხვა სიტუაციას, საშვალება მერზიებუნა, გეუნწყათ ადამიანეფს, მუშენ იფქციებუთ თაშ. შედეგო, ალალ გურიშ ადამიანეფს ვოხვარუთ ღორონთწკუმა დაახლოებას. მუჟამსით თეშნერო განვადიდენთ იეჰოვას, გურს უხარენთ თის (1 ტიმ. 2:3, 4).

ᲘᲔᲡᲝᲡ ᲛᲐᲜᲒᲐᲠᲝ ᲝᲮᲘᲝᲚ, ᲛᲣᲟᲐᲛᲡᲘᲗ ᲘᲔᲰᲝᲕᲐᲨ ᲡᲐᲮᲔᲚᲡ ᲒᲐᲜᲕᲐᲓᲘᲓᲔᲜᲗ

8. მუშენ შემლებუნა ფთქუათ, ნამდა იესო იეჰოვაშ განდიდებაშ არძაშ უჯგუშ მაგალითის მარზენა?

⁸ ვართ ზეცას დო ვართ დედამიწას, იეჰოვას მითინ ვეჩინენს თეშ, მუჭოთ იესო (მათ. 11:27). თის მანგარო უჸორს მუმა, ათეშენ ირფელს ორთჷ, ნამდა განადიდას იეჰოვაშ სახელ (იოან. 14:31). ღურაშ წოხოლენ სერს რაგადებულ ლოცვას იესოქ მუმას უწუ, მუ მიზანს მიოჭირინუ თიშ დედამიწას მსახურებაქ. თიქ თქუ: „სქან სახელ გაუცხად თინეფს“ (იოან. 17:26). მუშ რაგად ოკოდ იესოს თეთ?

9. მუ მაგალით გიმირინუ იესოქ, ნამდა უჯგუშო გუმოჩინებაფუესკო მუმა?

⁹ იესო ხვალე თის ვა ურაგადუდ ადამიანეფს, ღორონთის იეჰოვა ჯოხონია; ებრაელეფს თეშით უჩქუდეს ღორონთიშ სახელ. იესოქ არძაშ უჯგუშო ეუნწყჷ ადამიანეფს, მუნერ პიროვნება რდჷ იეჰოვა (იოან. 1:17, 18). მაგალთო, ებრაულ წერილეფს ჭარუდ, ნამდა იეჰოვა მოჭყოლოფე დო გაჭირებაშ გურშა მიმაღალარ ღორონთ რე (გამ. 34:5—7). მარა იეჰოვაშ თე თვისებეფქ ხოლო უმოს არგამათ ქიძირ იესოშ მოჸუნაფილ იგავშე შარას ეჩილათირ სქუაშ გურშენ. მუჭოთ თე იგავშე ბგებულენთ, მუჟამსით მუმაქ შორშე თოლ ქუმუკინდუ ჸუდეშა დორთელ სქუას, ნამუთ ნარღენდჷ მუშ საქციელს, ირულ, გურშა ქიხუტოლუ, გოჯუნ დო მთელ გურით ქაპატუ თის. მუმაშ საქციელ მოხვარუნა, უჯგუშო ქენვანჭათ, მუნერ მოჭყოლოფე რე იეჰოვა დო მუნერო შეულებ მიშართას შხვაშ მდგომარეობაშა (ლუკ. 15:11—32). არგამა რე, იესოქ ქიმეხვარ შხვეფს თიშ ძირაფას, მუნერ პიროვნება რე იეჰოვა.

10. ა) სოვრეშე იძირე, ნამდა იესო ირინუანდჷ ღორონთიშ სახელ იეჰოვას დო ოკოდ, შხვეფქ ხოლო თაშ მიქცუესკო? (მარ. 5:19; ქოძირით სურათ). ბ) მუს ელჷ იესო ჩქინდე?

¹⁰ ქაკონო იესოს, შხვეფ ხოლო შინანდან მუამუშიშ სახელ იეჰოვას? არგამა რე, ქო. იესოშ დროს ნამთინე რელიგიურ ლიდერ შილებე ფიქრენდუკო, ნამდა ღორონთიშ სახელ თიცალ წმინდა რდჷ, მუთუნით ვეშილებედ თიშ ხონარმაღალო რაგად. მარა იესო თეცალ ტრადიციეფს, ნამუთ ვემურდჷ წმინდა წერილეფს, საშვალებას ვარზენდჷ, ეცილუკო ზეციერ მუმაშ სახელიშ განდიდებას. მაგალთო, ართშა იესოქ გერასელეფიშ დიხას დასქილიდუ კოჩ, ნამდგას დემონეფ  მიშუხედ. ხალხის აშქურინ დო იესოს ეხვეწეს, თევრეშე მიდართუკო (მარ. 5:16, 17). მარა იესოს მანგარო ოკოდ, თექიანეფქ იეჰოვაშ სახელ ქიგეგესკო. ათეშენ კოჩის, ნამუთ ოსქილიდუ, უწუ, არძაშა ქუთქუალუდუკო, ნამდა თე სიკეთე იესოქ ვარინ, იეჰოვაქ უკეთ (წეკითხით მარკოზიშ 5:19). თის ოკო, ჩქი ხოლო თაშ მიფქცუათ დო ზეციერ მუმაშ სახელ მთელ მსოფლიოს ქუგვოგებაფუათ (მათ. 24:14; 28:19, 20). მუჟამსით თეს ვორთუთ, ჩქინ მეფე, იესო, გახარებულ რე.

11. მუშ გურშენ ოკო ილოცესკო იესოშ მიმაჸუნალეფქ დო მუჭოთ ეზეკიელიშ 36:23-შე იძირე, მუშენ რე თენა მნიშვნელოვან?

¹¹ იესოს ჯგირო უჩქუდ, ნამდა იეჰოვაშ განზრახვა რდჷ, განწმინდუკო მუშ სახელ ეკოწამებულ ტყურეფშე. ათეშენ უწუ მუშ მიმაჸუნალეფს, თაშ ილოცესკო: „ჩქინ ზეციერ მუმა, წმინდა ჸოფედას სქან სახელ“ (მათ. 6:9). იესოს არჩქილედ, ნამდა თენა რე არძაშე უმოს მნიშვნელოვან საკითხ, ნამდგაშ გინოჭკირუას მონაწილებას ბღებულენთ არძა, ზეცას დოვარ დედამიწას (წეკითხით ეზეკიელიშ 36:23). მთელ სამყაროს მითინს ვა უკეთებ ღორონთიშ სახელიშ განწმენდაშო თისხი, მუსხით იესოქ აკეთ. თქვა წერმიდგინით, თეცალ კოჩ ოჭოფეს დო ქეკაწამეს, ღორონთის შეურაცხყოფას მიორინუანსია. ვარინ იესოშო ღორონთიშ წმინდა სახელშა შეურაცხყოფაშ მერინაფაშე უმოს დიდ ცოდა ვა არსებენდჷ. თის გურს უსოფუნდჷ, ნამდა იშენდოიშენ თენა ქეკაბრალეს. ზუსტას თენა შილებე ჸოფედუკო მთავარ მიზეზ, მუდგაშ გურშენ იესო მანგარო იტანჯებუდ ჭოფუაშ სერს (ლუკ. 22:41—44).

12. მუ აკეთ იესოქ, ნამდა განწმინდუკო იეჰოვაშ სახელ?

¹² მუამუშიშ სახელიშ განწმენდაშ გურშენ იესოს ქიანაშიქ აჸუ გინაღალარქ — გაურზჷ წამებას, შეურაცხყოფას დო ეკაწამეს ტყურეფ. იესოს უჩქუდ, ნამდა ირფელ თეშ გაკეთ, მუჭოთ მუამუშის ოკოდ დო საონჯღორო მუთუნ ვა უღუდ (ებრ. 12:2). თინა ხოლო უჩქუდ, ნამდა თე არძაშ უმოს რთულ წუთეფს პირდაპირ სატანა ობრძოლუდ (ლუკ. 22:2—4; 23:33, 34). სატანაშ აზრით, თი ზომაშა ქიმიჸონანდჷ იესოს, ნამდა გოტახუნდჷ, მარა თიქ საონჯღოროთ წაგჷ. იესოქ საბოლათ დამტკიც, ნამდა სატანა მეტყურე რე დო იეჰოვაშ ართგურ მსახურეფ თიმწკუმა ხოლო ვართინუანა იეჰოვას ოჭიშის, მუჟამსით უკანასკნელშა რენა მიკოჭირებულ.

13. მუჭო შემლებუნა გურ გაუხარათ ჩქინ მეფეს, იესოს?

¹³ მუჭო შემლებუნა გურ გაუხარათ ჩქინ მეფეს, იესოს? განადიდით იეჰოვაშ სახელ  დო ქიმეხვარით ადამიანეფს, გეჩინებაფუან თინა. თეშნერო ქიმიაჸუნუთ იესოშ ნაკვალუს (1 პეტ. 2:21). იესოცალო, თქვა ხოლო გაუხარენთ გურს იეჰოვას დო დამტკიცენთ, ნამდა თიშ ნტერ, სატანა, მეტყურე რე!

ᲘᲔᲰᲝᲕᲐᲨ ᲡᲐᲮᲔᲚᲘᲨ ᲒᲐᲜᲓᲘᲓᲔᲑᲐᲗ ᲐᲓᲐᲛᲘᲐᲜᲔᲤᲡ ᲒᲘᲜᲕᲝᲡᲥᲘᲚᲘᲓᲣᲐᲜᲗ

14, 15. მუ სასწაულ შედეგეფ მოჸუნს, მუჟამსით ადამიანეფს იეჰოვას ვოჩინებაფუანთ?

¹⁴ მუჟამსით იეჰოვაშ სახელს განვადიდენთ, ადამიანეფიშ გინოსქილადას უნწყუნთ ხეს. მუჭო ხვადუ თენა? სატანაქ „გონება დუკილუ ადამიანეფს“ დო თეცალ ტყურეფ ქუდაჯერუ: ითამ ღორონთ ვა არსებენს, არძა ართ აფჷ ადამიანეფიშ მდგომარეობა, უდუნდებელ რე დო გლახაშ მაკეთებელს მარადიულო ატანჯენს (2 კორ. 4:4). სატანა თე ტყურეფს თიშენ ოსიმუანს, ნამდა ღორონთიშ სახელს შეურაცხყოფა ქიმიორინუას დო ადამიანეფს თიწკუმა დაახლოებაშ სურვილქ მეუდინან. მარა ჩქინ ქადაგებათ ვოცილუთ სატანას თე მიზანიშ მენჭირნაფას, მუშენდა სიმართლეს ვოგურუანთ ადამიანეფს ჩქინ ზეციერ მუმაშ გურშენ დო განვადიდენთ თიშ წმინდა სახელს. მუ მოჸუნს თეს შედეგო?

¹⁵ ღორონთიშ სიტყვას ინოჭარილ ჭეშმარიტებას სასწაულ ძალა უღჷ. მუჟამსით სატანაშე გონებაკილერ ადამიანეფს ზეციერ მუმას ვოჩინებაფუანთ, თინეფ ჭიე-ჭიეთ აზრშა მოულა დო ორწყენა, სინამდვილეს მუნერ პიროვნება რე იეჰოვა. თინეფს გურ ემშვიდებუნა, მუჟამსით გებულენა, ნამდა ღორონთ ჸოროფა რე (1 იოან. 4:8), ნდობა ურჩქინდუნა თიშ მიმართ, მუშენდა თიშ სრულყოფილ სამართლიანობას ორწყენა (კან. 32:4), იეჰოვაშ უზომე ძალაშ ძირაფა მოწიწებას ურჩქინანს თიშ მიმართ (ეს. 40:26) დო თიშ ულიებ სიბრძნე თინეფს ხოლო ბრძენეფო გინაშქვანს (ეს. 55:9; რომ. 11:33). შედეგო, მუთ უმოსო ეახლოებუნა იეჰოვას, თით უმოს რეალურო გინირთუ თინეფშო მარადიულ ცხოვრებაშ იმენდ, ნამდგას ზეციერ მუმა არზენს. მართალო, მუშმაშხვა პატი რე, მივეხვარათ ადამიანეფს იეჰოვაწკუმა დაახლოებას. მუჟამსით თე საქმეს ბმონაწილენთ, იეჰოვაწკუმა ართო ფხანდენთ (1 კორ. 3:5, 9).

16. მუჭო მოქმედენს ადამიანეფშა ღორონთიშ სახელიშ გაგება? ქიმიჸუნით მაგალითეფ.

¹⁶ დუდშე შილებე პიროვნებაქ ღორონთიშ გურშენ ხვალე თინა გეგას, ნამდა თის იეჰოვა ჯოხო. მარა თეშ გაგებაქ შილებე ნამთინე  ალალგურიშ ადამიანიშ ცხოვრება დუდშე ბოლოშა დოთირუას. მაგალთო, ქიმიპჸუნათ ართ ახალგაზრდაშ, ალიაშ, a შემთხვევა. თიქ ირდჷ ოჯახის, ნამუთ თიცალ რელიგიაშ მიმაჸუნალ რდჷ, სოდეთ ვა წანა ქრისტეშ დო ბიბლიაშ. თის ვაკმაყოფილენდჷ მუშ რელიგია დო ღორონთწკუმა ხოლოს ვა გინაფლენდჷ დუდის. მუჟამსით ალიაქ იეჰოვაშ მოწმეეფწკუმა ბიბლიაშ გურაფა ქიდიჭყჷ, გვალო შხვა თოლით ქუდუჭყჷ ჯინა ღორონთის დო თინა მუშ მეგობარო მირჩქინ. თინა მანგარო გაკვირ თიშ გაგებაქ, ნამდა ბიბლიაშ ბრელ თარგმანშე ეშაღალირ რდჷ ღორონთიშ სახელ დო თიშ მანგიორო შხვადოშხვა წოდებეფ ჭარუდ, მაგალთო, მუნერით რე უფალ. ალიაშა მანგარო იმოქმედ თიშ გაგებაქ, ნამდა მუშ მეგობარს სახელ ნოღვე დო თის იეჰოვა ჯოხო. დეკვირით, მუს იჩიებ თინა: „მანგარ სიმშვიდე ქიბგინ. ჩქიმო დიდ პატი რე, ნამდა ღორონთიშ სახელ ქიგებგჷ“. დეფიფქრათ ხოლო ართ პიროვნებაშ, სტივიშ, შემთხვევაშე, ნამუთ მუსიკოს რდჷ დო თიცალ გარემოს ირდჷ, სოდეთ მანგარ მკაცრას იცვენდეს იუდაიზმის. თის გურ აფუდ ელაფირ არძა რელიგიაშა, მუშენდა ორწყედ, ნამდა ართის ოგურუანდეს დო მაჟიას ორთუდეს. მარა, მუჟამსით დიდაქ დუღურ, მუშ მეგობარქ, ნამუთ ბიბლიას გურაფლენდჷ, ქუდაპატიჟ ართ-ართ გურაფაშა დო სტივქ ხოლო დეთანხმჷ. თიშა მანგარო იმოქმედ ღორონთიშ სახელიშ გაგებაქ. დეკვირით, მუს იჩიებ სტივ თი მომენტიშ გურშენ, მუჟამსით პირველო გეგჷ ღორონთიშ სახელ: „აიშახ დღას ვა მაფუდ გუნაგებ ღორონთიშ სახელ დო ვა მიჩქუდ, ნამდა თინა რეალურ პიროვნება რდჷ. თე დროს მეფხვად, ნამდა თინა ჩქიმ მეგობარ რე“.

17. მუშენ გაფუნა გინოჭყვიდილ, გაგრძელათ ღორონთიშ სახელიშ განდიდება? (ქოძირით სურათ).

¹⁷ მუჟამსით ქადაგება დო გურაფაშ საქმეს მონაწილებაშ მეღებაშ დროს ადამიანეფს ღორონთიშ სახელს ვოგებაფუანთ დო ვოძირანთ, სინამდვილეს, მუნერ პიროვნება რე იეჰოვა, განვადიდენთ ღორონთიშ სახელს. მორთით, გუაგრძელათ ღორონთიშ წმინდა სახელიშ განდიდება დო ქიმვეხვარათ შხვეფს თიშ გაჩინებაფას. თეშნერო, იფრსხენთ ადამიანეფიშ სიცოცხლეს, მივაჸუნუთ ჩქინ მეფეშ, იესოშ, ნაკვალუს დო, მუთ არძაშ უმოს მთავარ რე, გურს გუხარენთ ჩქინ მოჸოროფე ზეციერ მუმას, იეჰოვას. თაშ ნამდა, მორთჷ, განვადიდათ იეჰოვაშ სახელ „სადღამუშოთ, მარადიულო“! (ფსალმ. 145:2).