1-2. Mang e rayog ni nge ayuwegdad ni ngad nanged rogon laniyan’ Jehovah ko pi n’en nde riyul’ ni kan weliy u murung’agen?

 MU SUSUNNAG ni bay be’ nib t’uf rom ni ke yog boch ban’en nib kireb u murung’agem. Ga manang nde riyul’ e pi n’em ni be weliy, machane bay boch e girdi’ ni ke mich u wan’rad. Ma n’en nri kub gel e kireb riy e fapi cha’ ni ke mich fapi ban u wan’rad e kur weliyed ngak boor e girdi’ miki mich u wan’rad. Uw rogon e re n’ey u wan’um? Faanra ga ma lemnag e girdi’ ma dabum ni nge kireb thim, ma gathi ra kireban’um ko n’en nde riyul’ ni yibe weliy u murung’agem?​—Prov. 22:1.

² Re n’ey e be ayuwegdad ni ngad nanged rogon laniyan’ Jehovah u nap’an nni weliy boch ban’en u murung’agen nde riyul’. I chel reb e engel rok u tharmiy nge weliy boch ban’en nde riyul’ u murung’agen ngak Efa ni ir e bin som’on e ppin ni immoy, me mich e pi n’em u wan’. Pi n’ey nde riyul’ ni weliy u murung’agen Jehovah e k’aring Adam nge Efa ni ngar togopuluwgow ngak. Bochan e re n’ey, ma aram me af e denen nge yam’ ngak urngin e girdi’. (Gen. 3:​1-6; Rom. 5:12) Gubin e magawon ni gad be guy u fayleng nib muun ngay e yam’, nge mahl, nge gafgow e gubin ni be buch ni bochan e ban ni yog Satan u lan fare milay’ nu Eden. Gur, be kireban’ Jehovah ni bochan gubin ban’en nde riyul’ ni kan weliy u murung’agen nge wenegan e pi ban nem? Arrogon. Yugu aram rogon ma der par Jehovah nib damumuw ni bochan e re n’ey, ya be par ni ir “fare Got nib felfelan’.”​—1 Tim. 1:​11, NW.

3. Mang e rayog ni ngad rin’ed?

³ Rayog ni ngad thothupnaged fithingan Jehovah ni aram e ngad folgad ko fare thin ni kan tay chilen ni be gaar: “Mu pininged e sorok nga fithingan [Jehovah]!” (Ps. 113:​1, BT) Rogon ni gad ma rin’ e re n’ey e aram e gad ma weliy e tin nib fel’ u murung’agen e En be fek e re ngachal nem nib thothup. Me gur, ga ra pining e sorok nga fithingan Jehovah, fa? Ngad weliyed dalip  ban’en nra k’aringdad ni ngad pininged e sorok nga fithingan Got u polo’ i gum’ircha’dad.

GAD MA FELFELAN’NAG JEHOVAH U NAP’AN NI GAD RA PINING E SOROK NGA FITHINGAN

4. Mang fan ni ma felfelan’ Jehovah u nap’an ni gad ra pining e sorok ngak? Mu susunnag. (Kum guy e sasing.)

⁴ Ma felfelan’ e Chitamangidad ni bay u tharmiy u nap’an ni gad ra pining e sorok nga fithingan. (Ps. 119:108) Machane gur, Got ni gubin ma rayog rok e bod e girdi’ ndawor ra flontgad ni yad baadag ni ngaun pining e sorok ngorad ya nge yib e athamgil nga lanin’rad? Danga’. Rayog ni ngan susunnag ngak bochi buliyel ni ke yan i gumuchmuch ngak e chitamangin me gaar ngak, “Gur e bin th’abi fel’ e papa’!” Kari felfelan’ fare matam ni bochan e re n’ey. Mang fan? Gur, ba puluw ni ngad lemnaged ni fare matam e ri be yim’ ni bochan ni nga i pining fak e sorok ngak? Danga’. Ya ke felfelan’ ni bochan e ba t’uf fak rok ma ke felfelan’ ngay ni be dag ngak nib t’uf rok mab ga’ fan u wan’. Ku manang ni gali n’ey e ra ayuweg fak ni nga i par nib felfelan’ u nap’an ni be ilal i yan. Ere ku arrogon Jehovah ni ir e bin th’abi fel’ e Matam ni ma felfelan’ u nap’an ni gad ra pining e sorok ngak.

5. Nap’an ni gad ra pining e sorok nga fithingan Got, ma mang reb e ban nrayog ni ngad micheged nde riyul’?

⁵ Nap’an ni gad ra pining e sorok ngak e Chitamangidad ni bay u tharmiy, ma aram e ku gad be micheg nde riyul’ reb e ban ni kan weliy u murung’agdad. Be yog Satan ndariy be’ nra micheg u fithik’ e yul’yul’ nde riyul’ e pi n’en yibe yog nib togopuluw nga fithingan Got. Be yog ndariy bagadad nrayog ni nge par nib yul’yul’ ngak Got. Ku be yog ni gad gubin ni gad ra tal ndab kud pigpiggad ngak Got ni faanra gad be lemnag nra yib fel’ngin ngodad. (Job 1:​9-11; 2:4) Machane Job ni ir be’ nib yul’yul’ e micheg ni Satan e ir be’ nib malulfith l’igin. Me gur, rayog ni ngam par ni gab yul’yul’ ngak Got, fa? Gad gubin nrayog ni ngad micheg nde riyul’ e pi n’en yibe yog nib togopuluw nga fithingan e Chitamangidad ma gad felfelan’nag ni aram e ngad pigpiggad ngak u fithik’ e yul’yul’. (Prov. 27:11) Ri gad ba tow’ath nrayog ni ngad rin’ed e re n’ey.

6. Uw rogon nrayog ni ngad folwokgad rok David ni Pilung nge pi Levite? (Nehemiah 9:5)

⁶ Piin nib t’uf Jehovah rorad e yad baadag ni ngar pininged e sorok nga fithingan u polo’ i gum’ircha’rad. I yoloy David ni Pilung ni gaar: “Lanin’ug, mpining e sorok ngak Somol! Polo’ i gag, mpining e sorok nga fithingan nib thothup!” (Ps. 103:1) Manang David nra ngan pining e sorok nga fithingan Jehovah, ma aram e be yip’ fan ni ngan pining e sorok ngak. Nap’an ni gad ra rung’ag fithingan Jehovah, ma ma k’aringdad ni ngad lemnaged rarogon, nge pi fel’ngin, nge urngin ban’en nib manigil ni ke rin’. Ere baadag David ni nge thothupnag me n’uf fithingan e Chitamangin. Baadag ni nge rin’ e re n’ey u “polo’” i gum’irchaen. Ku arrogon e pi Levite ni ur pininged e sorok ngak Jehovah.  Rogned ndabiyog ni ngar pininged e sorok nga fithingan Jehovah nib thothup nge yan i aw nga rogon nsusun e ngan rin’. (Mu beeg e Nehemiah 9:5.) Ere dariy e maruwar riy nri felfelan’ Jehovah ko n’en nrin’ed u fithik’ e sobut’an’.

7. Uw rogon nrayog ni ngad pininged e sorok ngak Jehovah u nap’an e machib ngu nap’an ni gad be rin’ boch ban’en u reb e rran ngu reb?

⁷ Ngiyal’ ney e rayog ni ngad felfelan’naged Jehovah ni aram e ngaud weliyed murung’agen u reb e kanawo’ nra m’ug riy nib ga’ fan u wan’dad ma kub t’uf rodad. Nap’an ni gad be machib ma dab da paged talin ni n’en gad be nameg e aram e ngad pow’iyed e girdi’ ngak Jehovah, ma gad ayuwegrad ni nge ga’ fan e Chitamangidad u wan’rad ni bod gadad. (Jas. 4:8) Gad ba felfelan’ ni ngad daged ko girdi’ e n’en be yog e Bible u murung’agen Jehovah nge pi fel’ngin ni bod e t’ufeg, nge feni mat’aw, nge gonop rok, nge gelngin, nge ku boch i fel’ngin nib manigil. Ku gad ma guy rogon ni ngad folwokgad rok Jehovah ya nge yag nda pininged e sorok ngak ma gad felfelan’nag. (Efe. 5:1) Nap’an ni gad ra rin’ e re n’ey, ma aram e gad ra gagiyel u fithik’ e girdi’ ko re fayleng nib kireb ney. Rayog ni nge guy e girdi’ ni gad ba thil mar lemnaged ko mang fan ni aram rogodad. (Matt. 5:​14-16) Ma nap’an ni gad be mada’ e pi girdi’ ney u reb e rran ngu reb, ma rayog ni ngad weliyed ngorad fan ni aram rogodad. Angin nra yib riy e ra adag e piin nriyul’ ni yad baadag ni ngar nanged e tin riyul’ ni ngar chugurgad ngak e Got rodad. Nap’an ni gad ra pining e sorok ngak Jehovah ni aray rogon, ma aram e gad be felfelan’nag.​—1 Tim. 2:​3, 4.

GAD MA FELFELAN’NAG JESUS U NAP’AN NI GAD RA PINING E SOROK NGA FITHINGAN JEHOVAH

8. Uw rogon ni ke dag Jesus ngodad rogon ni ngaun pining e sorok nga fithingan Jehovah?

⁸ Dariy reb e engel u tharmiy ara reb e girdi’ u fayleng ni manang e en Chitamangiy nib fel’ rogon ni bod e en Fak. (Matt. 11:27) Jesus e ba t’uf e Chitamangin rok ma ir e ke dag ngodad rogon ni ngaun pining e sorok nga fithingan Jehovah. (John 14:31) Nap’an ni be meybil ngak e Chitamangin ko fare nep’ u m’on ni nge yim’, me yog e n’en th’abi ga’ fan ni ke rin’ u nap’an e machib ni ke tay u fayleng ni gaar: “Kug weliy murung’agem [“fithingam,” NW] ngorad kar nanged.” (John 17:26) Uw rogon ni rin’ Jesus e re n’ey?

9. Uw rogon ni fanay Jesus ba fanathin ni nge tamilangnag e bin riyul’ i rarogon e Chitamangin?

⁹ Gathi kemus ni i yog Jesus ko girdi’ ni Jehovah fithingan Got. Pi Jew ni i machibnagrad e yad manang fithingan Got. Machane ir e ‘weliy murung’agen . . . ngan nang.’ (John 1:​17, 18) Bod ni be yog e Pi Babyor ko Bible nni Yoloy Nsom’on ni Thin ni Hebrew ni Jehovah e ir reb e Got ni ma runguy e girdi’ ma ma kireban’ ngorad. (Ex. 34:​5-7) I tamilangnag Jesus e re n’ey u daken fare fanathin ni weliy ni murung’agen fare matam nge fare pagel ni fak ni malog. Nap’an ni gad ra beeg murung’agen e re matam nem ni faani guy e re pagel nem ni fak ni ke kalngan’ ni “kab orel ko tabinaw” me mil i yan ngak, nge yan i gumuchmuch ngak, me n’ag fan e kireb rok, ma gad ra guy riy gelngin nri ma runguy Jehovah e girdi’ ma ma kireban’ ngorad. (Luke 15:​11-32) I ayuweg Jesus e girdi’ ni ngar nanged e bin riyul’ i rarogon Jehovah.

10. (a) Uw rogon ni kad nanged ni i yog Jesus fithingan e Chitamangin maku baadag ni nge rin’ e girdi’ e re n’ey? (Mark 5:19) (Kum guy e sasing.) (b) Mang e baadag Jesus ni ngad rin’ed e ngiyal’ ney?

¹⁰ Gur, ku baadag Jesus ni nga i yog e girdi’ fithingan e Chitamangin, fa? Arrogon. Sana immoy boch e tayugang’ ko teliw e ngiyal’ nem ni ur lemnaged ni kaygi thothup fithingan Got ni nga unog, machane de pag Jesus e tiney e yalen nde puluw ko Bible ni nge taleg ndabi tayfan fithingan e Chitamangin. Am lemnag fa ngiyal’ nem ni tuluf e moonyan’ ni ke yib i ying ngak be’ nib moon ni ma par ko nug nu Gerasa. Ere rus e girdi’ mar weniggad ngak ni nge chuw ko nug rorad, ma aram e daki par u rom. (Mark 5: 16, 17) Machane ka baadag Jesus ni nge nang e girdi’ u rom fithingan Jehovah. Ere yog ko fare moon ni ke tuluf e moonyan’ rok ni nge yan i weliy ko girdi’ e n’en ke rin’ Jehovah ni fan ngak, ma gathi n’en ke rin’ Jesus ni fan ngak. (Mu beeg e Mark 5:19.) a Ku aray e n’en baadag ni ngad rin’ed e ngiyal’ ney. Baadag ni ngad weliyed fithingan e Chitamangin u ga’ngin yang e fayleng! (Matt. 24:14; 28:​19, 20) Nap’an ni gad ra rin’ e re n’ey, ma aram e gad be felfelan’nag ni ir e Pilung rodad.

11. Mang e fil Jesus ngak pi gachalpen ni ngaur yibilayed, ma mang nib ga’ fan e re n’ey? (Ezekiel 36:23)

¹¹ Manang Jesus ni n’en nib m’agan’ Jehovah ngay e aram e nge thothupnag fithingan me micheg nde riyul’ e pi ban ni kan weliy u murung’agen. Aram fan ni fil e Masta rodad ngak pi gachalpen ni ngaur meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup.” (Matt. 6:9) Manang Jesus ni ireray e bin th’abi ga’ fan e deer nib t’uf ni nge gagiyelnag urngin e tin kan sunmiy e fulweg riy. (Mu beeg e Ezekiel 36:23.) Dariy reb e engel ara reb e girdi’ u ga’ngin e palpalth’ib ni boor ban’en ni ke rin’ ni nge thothupnag fithingan Jehovah nge migid Jesus. Yugu aram rogon, ma nap’an nni kol Jesus ma mang e yog e pi toogor rok? Rogned ni ke darifannag e Chitamangin! Manang Jesus ni faan yira darifannag fithingan e Chitamangin, ma aram e kan rin’ e bin th’abi ubchiya’ e denen. Ri magafan’ nri chey ma ireray e n’en yira yog ni ke rin’. Ere rayog ni aram fan ni thamiy ni “gowa kan chuchuy nga but’” u lan e pi awa u m’on ni ngan kol.​—Luke 22:​41-44.

12. Mang e bin th’abi fel’ e kanawo’ ni thothupnag Jesus fithingan e Chitamangin riy?

¹² I athamgiliy Jesus urngin mit e gafgow, nge thin nib kireb, nge thin nde riyul’ ni un weliy nib togopuluw ngak ni bochan e nge thothupnag fithingan e Chitamangin. Manang ni ke fol u gubin ban’en ni ke yog e Chitamangin ngak ni nge rin’, ma dariy ban’en ni nge tamra’ ngay. (Heb. 12:2) Ku manang ni be cham Satan ngak e ngiyal’ nem nib gel e gafgow ni be yan u fithik’. (Luke 22:​2-4; 23:​33, 34) Ri lemnag Satan ni nge k’aring Jesus ni nge dabki yul’yul’, machane de yag rok! Ri micheg Jesus ni Satan e ba malulfith l’igin ma bay e pi tapigpig rok Jehovah ni yad ba yul’yul’ ni yad ra par ni yad ba yul’yul’ ngak ngki mada’ ko ngiyal’ ni kar mada’naged e tin th’abi mo’maw’ e skeng!

13. Uw rogon nrayog ni ngam felfelan’nag e Pilung rom ni ir e be gagiyeg e chiney?

 ¹³ Ga baadag ni ngam felfelan’nag e Pilung rom ni ir e be gagiyeg e chiney, fa? Um pining e sorok nga fithingan Jehovah ma ga be ayuweg e girdi’ ni ngar nanged e bin riyul’ i rarogon e Got rodad. Nap’an ni ga ra rin’ e re n’ey, ma aram e ga be folwok rok Jesus. (1 Pet. 2:21) Ga be felfelan’nag Jehovah, ma ga be micheg nib malulfith l’igin Satan ni toogor rok ni bod e n’en ni rin’ Jesus!

GAD RA PINING E SOROK NGA FITHINGAN JEHOVAH, MA ARAM E GAD BE UN I AYUWEG E YAFOS KO GIRDI’

14-15. Mang boch ban’en nib manigil nrayog ni nge buch u nap’an ni gad ra fil murung’agen Jehovah ko girdi’?

¹⁴ Nap’an ni gad ra pining e sorok nga fithingan Jehovah, ma aram e gad be un i ayuweg e yafos ko girdi’. Ni uw rogon? Ke tay Satan laniyan’ e girdi’ “u fithik’ e lumor.” (2 Kor. 4:4) Bochan e re n’ey ma ke mich u wan’rad boch e ban ni ma wereg Satan ni bod fapi ban ni: Dariy e Got, ma Got e ba mal’af rodad nga orel ma der ma lemnag e girdi’, ma ir be’ nib kireb ni ma gafgownag e girdi’ ni kar rin’ed e kireb ndariy n’umngin nap’an. Ma wereg Satan e pi ban ney ni bochan e nge kirebnag fithingan Jehovah miki kirebnag thin ya nge dabki adag e girdi’ ni ngar chugurgad ngak. Machane maruwel ni gad be rin’ e be taleg Satan nder yag ni nge rin’ e n’en be lemnag. Gad be fil e tin riyul’ u murung’agen e Chitamangidad ko girdi’, ma gad be pining e sorok nga fithingan e Got rodad nib thothup. Ere mang angin ni be yib riy?

¹⁵ Rib gel gelngin e tin riyul’ ko Thin rok Got. Gad ra fil murung’agen Jehovah nge bin riyul’ i rarogon ko girdi’, ma bay ban’en nib manigil ni gad ra guy. Gad ra guy ni ke chuw e girdi’ u tan e pi ban rok Satan ney, ma kar tababgad ni ngar guyed e bin riyul’ i rarogon e Chitamangidad ni bod rogon ni gad ma guy. Yad ra ngat nga gelngin ndariy e gin nra mus riy. (Isa. 40:26) Yad ra fil rogon ni nge pagan’rad ngak ni bochan e rib mat’aw gubin ban’en ni ma rin’. (Deut. 32:4) Ku boor ban’en ni yad ra fil u murung’agen e gonop rok. (Isa. 55:9; Rom. 11:33) Ku ra fel’ lanin’rad u nap’an ni yad ra nang ni ir e t’ufeg. (1 John 4:16) Nap’an ni yad ra chugur ngak Jehovah, ma aram e ra riyul’ e athap rorad ni ngar pared ndariy n’umngin nap’an ni yad boch pi fak. Ri gad ba tow’ath ni gad be un i ayuweg e girdi’ ni ngar chugurgad ngak e Chitamangirad! Nap’an  ni gad ra rin’ e re n’ey, ma aram e ra taydad Jehovah ni gadad e piin gad be ‘maruwel rok u taabang.’​—1 Kor. 3:​5, 9.

16. Mang angin ni yib ngak boch e girdi’ u nap’an nra nanged fithingan Got? Mu weliy l’agruw ban’en ni ke buch.

¹⁶ Som’on e rayog ni kemus ni ngad filed ko girdi’ ni fithingan Got e Jehovah. Re n’ey e ra thilyeg e par rok e piin nriyul’ ni yad baadag ni ngar nanged e tin riyul’. Bod ni bay reb e rugod ni ka nog Aaliyah b ngak nni chuguliy u reb e tabinaw ni yad ma un nga barba’ e teliw ndaru rogned ni yad e Kristiano. Machane de fel’ u wan’ e re raba’ i teliw nem ni ma un ngay, maku der lemnag nib chugur thilrow Got. I thil e lem rok u tomuren nra tababgad e Pi Mich ko fol Bible. I tabab ni nge guy ni Got e ir reb e Fager rok. Ki ngat u nap’an ni fil ni kan chuweg fithingan Got u boor ken e Bible, ma kan tay boch e liw nga lon ni bod e Somol. Nap’an ni nang fithingan Jehovah mi ri thil e par rok. I yog ni gaar: “Bay fithingan e bin th’abi fel’ e Fager rog!” Ere mang angin ni yib riy? I gaar: “Kari gapas lanin’ug, ma ri gub tow’ath.” Ku bay reb e pumoon ni ka nog Steve ngak ni ir be’ ni ma musik ni ilal u reb e tabinaw nri yad ba m’ing ko teliw ni Jew. I dabuy ni nge un nga barba’ e teliw ni bochan e ma guy nder ma puluw e ngongol ko girdi’ pi teliw nem ko n’en yad ma machibnag. Machane tomuren ni yim’ e chitiningin ma aram me m’agan’ ngay ni nge un ko motoyil u nap’an ni be fil reb e Pi Mich Rok Jehovah e Bible ngak be’ ni manang. Ri taw nga gum’irchaen e n’en ni fil u murung’agen fithingan Got. I yog ni gaar: “Dawor gu fil ko mini’ fithingan Got.” Ki ulul ngay ni gaar: “Fin aram e som’on nug nang nriyul’ ni bay Got mi ri riyul’ u wan’ug! Ku aram e ngiyal’ nug nang ni kug pirieg be’ nrayog ni nge mang Fager rog.”

17. Mang fan ni kam dugliy u wan’um ni ngaum pining e sorok nga fithingan Jehovah? (Kum guy e sasing.)

¹⁷ Ga ma weliy fithingan Jehovah nib thothup ko girdi’ u nap’an ni ga be machib ma ga be fil ban’en ko girdi’, fa? Ga ma ayuwegrad ni ngar nanged e bin riyul’ i rarogon e Got rodad, fa? Ga ra rin’ e re n’ey, ma aram e ga be pining e sorok nga fithingan Got. Manga yu gum ulul i pining e sorok nga fithingan Jehovah nib thothup ni aram e ngam ayuweg e girdi’ ni ngar nanged e En be fek e re ngachal nem. Faan ga ra rin’ e re n’ey, ma aram e ga ra ayuweg e yafos ko girdi’. Ka ga ra lek Kristus Jesus ni Pilung rom. Ma bin th’abi ga’ fan riy e ga ra felfelan’nag Jehovah ni Chitamam. Ere manga yu gum pining e sorok nga fithingan “ndariy n’umngin nap’an”!​—Ps. 145:2.