1-2. Ginipai rengbe ka undo rani ani ini pa wai Yekova adu ho i ape ziree ni ti rimoko?

 MO BERẼNGA kurii gipai re: Boro mo naima kpinyemuni gbe pe gupai du ni gbegberẽhe tipa ro. Na mo ima ino gupai nga ziree du nga gupai re; na kurigure, gu kura aboro ima ida gu ziree re. Na gu gbere agbera gbe nga agi aboro re tona ka pe gi ziree re kumbatayo, na gu kura aboro ima ida kutini a. Waigu rengbe mo kadu? Ka si du nga mo naaberãpa aboro aberã na kini berãpa rimoro si du ni wenehe, gi ziree re ima rengba ka sa ro mo du na bakere gberãrago.​—Snz. 22:1.

² Gi kpiapai re ima rengba ka undo rani ani bi wai Yekova adu ho i agbarasi rimoko ni. Wiriko sa ngbangbaturũ yo ape ziree tipa ko fu bambata dee nangia Eva. Ri aidi kuti gu ziree re. Gu ziree re asa gupai nga bambata avungurani samungu kuti Yekova. Ni sangbana gipai re, aboro dunduko na ingipai na ni yangada ha i ki kpi. (Bam. P. 3:1-6; Rom. 5:12) Agu akpakarapai ani abihe rogo zegino areme dunduko​—kpio aboro, avura, na arungo​—aye bambiko gu ziree Satana atona ka gbaragaha ati Edene yo. Ya mo rago nagberã ti Yekova bambiko gu ziree na agu asangbanaha si naye na ni? Zanga kapa, si naimisa ko aimisa. Wa vura duhe wo, Yekova azinganga te, watadu ko akpingo pai te. Kuba gure, ko nye kindi nga “betedi Mbori.”​—1 Tim. 1:11.

3. Gini momu du berani?

³ Ani na gu momu berani nga ga fubee kuti ziasi rimo Yekova ni manga ani pai kuti gu zinahe nga: “Oni támbua rimo Yekova!” (Tam. 113:1) Ani natambua rimo Yekova ho ani afura ni tipa gu wene apai du tipa Yekova. Ya mo mo atambua rimo Yekova? Ani furanga tipa apai biata nga gu nikaa undo rani ani ni tambua rimo gaani Mbori na ngbadurani yo dunduko.

 ANI NASA NGBARAGO TI YEKOVA HO ANI ATAMBUA RIMOKO NI

4. Tipagine gaani tambuahe asa ngbarago ti ni ti Yekova? Oni funga kpiapai. (Oni bi sura a.)

⁴ Ani nasa ngbarago ti gu Barani du ngbangbaturũ yo ho ani atambua rimoko ni. (Tam. 119:108) Ya mo gipai re nayugo gupai nga gu Mbori du na tandu apai dunduko wakina agu awiri aboro nga aboro zangarengba nga aguyo naida i naatambua yo bambiko i naida na ngarasaro? Oó. Oni bingo gi kpiapai re. Oni berẽnga pa tooni degude zubo na ki dungo bari na ki pe gupai fuko nga, “Mo nga bawene baagude rogo zegino dunduko!” Gu bagude re momu na ko na bakere ngbarago. Tipagine? Anga si wo bambiko gupai nga ko naida na ngarasa ro, watadu tambuahe be wiriko te. Oó. Kuba gure, si wo bambiko gupai nga ko ima kpinyemu wiriko na ko na ngbarago nga ri nayugo gari nyemuse na tambuahe. Ko ima ino gupai nga ri nika du na ngbarago bambiko ri nga boro nyemuse na tambuahe. Tipa nduapai wakina gure a, Yekova nga bakere Baagude, na ngbarago ho ani atambua ko ni.

5. Ho ani atambua Yekova ni, gini ziree ani akusaha ku yangura?

⁵ Ho ani atambua gu Barani ni du ngbangbaturũ yo, ani naundo ka yugo na ni nga ziree du Satana apehe tipa rani wadu ani nibasasa. Satana nape gupai nga boro ho rengbe ka songodapai ku bara rimo Mbori yo niruru ni te. Ko nape gupai nga boro ho rengbe ka nye niruru ni fu Mbori ho ni agbia ti ni na asada te. Ko nape gupai nga ani dunduko naima rengba ka mbu irisombori ka ani bihe nga si ni wenepai ka mangaha wo. (Eyo. 1:9-11; 2:4) Ono Eyobo anye ni ruru ko koyo du Mbori ni na ki sa Satana ni iraziree. Ya mo mo anye niruru ro fu Mbori? Ani dunduko ni basasa na gu momu berani nga ka sia ka songodapai kubara Barani yo na ki sa ko ko du na ngbarago ni iriso ani ko, na kidu niruru rani fuko. (Snz. 27:11) Gipai re nga pa irisa ka mangaha wo.

6. Waigu rengbe ani ka wirika Bakindo Davide na aRevi? (Nemaya 9:5)

⁶ Agu aboro nakpinyemu Yekova naida ka taasarimo ko na ngbaduyo yo dunduko. Bakindo Davide ake gupai nga: “Ako mbisimore, mo sámbua Yekova; agu apare du rogo re yo dunduko, si sámbua kparakpara ziazia rimoko!” (Tam. 103:1) Davide aima rugatiko na gupai nga ho ani atambua rimo Yekova ni, gure a nga ani natambua Yekova. Ho ani agia rimo Yekova ni, ani naberãpa gu wene sino boro nga ko na gu weneapai ko amangaha. Davide aaida si du ni ziaziaha na kini tambuaha. Ko aaida ka manga gipai re na ‘abarapa ko dunduko’​—du rogoyo nga na ngbadukoyo dunduko. Wakina gure a, aRevi  nanaangbembatayo rogo tambua Yekova yo. I aima ida kuti gupai nga fugo ho rengbe yo ka mangasunge na ni tipa ka peka gu weneapai du tipa Yekova na ziazia rimoko te. (Oni gedi Nemaya 9:5.) Zanga kapa, ngbatunga gi umbasitise na tambuahe re aye na ngbarago ku kpoto Yekova yo.

7. Waigu rengbe ani ka taasarimo Yekova gene tungusapai yo na rogo gaani raka yo?

⁷ Areme, ani rengbe ka sa ngbarago ti Yekova ni fura ani tipa ko ngba gu gene nayugo gupai nga ani na tambuahe na kini yugu wai ani nakpinyemu ko. Ho ani atungusapai ni, gaani bangua sásá nga ka undo kura aboro i mbedi na Yekova na kidu kina wai ani nidu tipa gu Barani nga boro nyemuse. (Yak. 4:8) Ani na bakere ngbarago ka yugo wai fu aboro Baibiri asakapai tipa Yekova, kini yugupa gako nyemuse, gako rurupai, gako tatamana, gako ome na gu kura wene asinoko. Ani natambua Yekova a na kini sa ngbarago tiko ni asada ani ka mangapai wa gu ko amangaha. (Ef. 5:1) Ho ani amangaha ni wo, ani nadu kia rogo gi zegino du ni ba gbegberẽhe re. Aboro ima rengba ka bi gupai nga ani kia na i ima rengba ka bakabangiriyo tipa ndu gupai du ani ti ni kia. (Mt. 5:14-16) Wa ani kaa mangapai na yo rogo auru nibasasa, ani nika du na rengba ka sakapai fuyo tipa ndu gupai ani amangapai ti ni wa gure. Ni sangbana gipai re, agu aboro du na wene ngbaduyo yo nadu mbembedi na gaani Mbori. Ho ani ataasarimo Yekova ni ngba agi agene re, ani nasa ngbarago kpotoko yo.​—1 Tim. 2:3, 4.

ANI NASA NGBARAGO TI YESU HO ANI ATAMBUA RIMO YEKOVA NI

8. Waigu du Yesu ni wene kpiapai nga ga tambua rimo Yekova?

⁸ Boro ho ngbangbaturũ yo watadu auru kpotosende ini Yekova wa Yesu te. (Mt. 11:27) Yesu ima kpinyemu Bako, na ko nangbembatayo rogo tambua rimo Yekova yo. (Yo. 14:31) Rogo gu kparakpee ko amangihe fu Bako rogo gu yuru naadu mbata fu ko kpi, ko asakipai tipa gu nyanyakipa pai ko amangihe rogo gako sunge ho ko adu ni auru kpotosende ane, ko aya: “Mi yugu rimoro fu yo.” (Yo. 17:26) Ginipai ko aaida ka pehe?

9. Gini sanza Yesu amangisunge na ni ka sakapai tipa Bako ngba gu gene aboro arengbe ka giatiyo na ni wenengai?

⁹ Yesu aagumbanga kina gupai gbua nga rimo Mbori nga Yekova te. Agu aYudo Yesu ayugupai fuyo aima ino rimo Mbori. Ono Yesu angbembatayo ni ‘gu boro na gumba pa ko.’ (Yo. 1:17, 18) Ni kpiapai, Kuru Ndika nayugo gupai nga Yekova nga boro inapai na nunga. (Gate 34:5-7) Yesu ayugu gu rengo re ziazia ho ko ape gu sanza ni nga ga ingiingi paranga na bako. Ho ani agedapai ni tipa gu bagude nabi gu wiriko ni nga gu ko nasa berãko “wa ko adu tuturũ,” ko aoro ka ndu ka gbiako na ki dungo ko, na ki mbupai fuko kina boro kpotoko yo, ani nabi wai ane nzunzu du Yekova na inapai na nunga tiko. (Rk. 15:11-32) Yesu aundo kura aboro tipa i ini wai nzunzu du Yekova.

10. (a) Waigu ani aino gupai nga Yesu aima mangasunge na rimo Bako na ko naida ani mangi kina gu bangisa pai re a? (Marako 5:19) (Oni bi sura a.) (b) Ginipai Yesu aida ani mangihe areme?

¹⁰ Ya mo Yesu aaida gupai a nga kura boro naamangasunge na rimo Bako? Ii. Kura agbia pambori ti gu regbo re aidi kuti gupai nga si nipa zanga irisa ka yamba rimo Mbori, ono tie, Yesu aaidanga gipai mburuhe aadunga rii Ziazia Kekeapai re ya ká na ko ti iriso rimo Bako te. Oni berẽnga pa gu regbo Yesu ahusi gu kumba naadu na adaimona tiko rogo gu dagbarago nangia ga aGerasa. Aboro adu na bakere gunde na ki zungodi Yesu tipa ko guari kusayo rogo gayo dagbarago, sidu, ko aarakanga  rogo gu rago re te. (Mk. 5:16, 17) Wa si avura du wo, Yesu aaida aboro ini rimo Yekova rogo gu dagbarago re. Sidu, Yesu ape gupai fu gu kumba ko ahusi ko re nga ko pe gupai fu gu kura aboro nga gu Yekova amangihe angianga Yesu ya. (Oni gedi Marako 5:19.) a Yesu naida ani mangi kina gu bangisapai re areme a​—ka yugo rimo Bako fu aboro rogo zegino dunduko! (Mt. 24:14; 28:19, 20) Ho ani amanga gipai ni re, ani nasa ngbarago ti gaani Bakindo nga Yesu.

11. Ginipai Yesu aya apefuoko naakpara tipaha, na tipagine du gipai re ti ni na nyanyakipaha? (Yezekere 36:23)

¹¹ Yesu aima ino gupai nga ga Yekova ringbisapai nga ka ziasi Rimoko ka dia agu aziree ti ni kusayo dunduko aboro apehe kutini. Sidu gaani Bayugupai ape gupai ti ni fu apefuoko nga i nikpari nga: “Barani du ngbangbaturũ yo, Ani írisi rimoro airisa.” (Mt. 6:9) Yesu aima ino gupai nga gere nangia gu kpakarapai aboro dunduko agbiatiyo na ni. (Oni gedi Yezekere 36:23.) Boro ho rogo zegino namangipai wa gu Yesu amangihe tipa ka ziasi rimo Yekova te. Ono tie, i azi Yesu, gini ingapai avurako akitingbangako na ni? Gberãngbayo! Nirengo, Yesu aima bi gupai nga gure angia kere sengahe watadu kere ziree kuti ziazia rimo Bako na si angia kere ingapai. Gipai re aima fuda ko ni kerehe nga i nika sarangbanga ko tipa gi kere gbegberẽpai re. Si ima rengba kadu nga gere nangia gu ndupai Yesu adu ti ni rogo kere “imisiripai” yo rogo agu asa yo naandu kuti gu regbo i aandu ka zioko.​—Rk. 22:41-44.

12. Waigu Yesu aziasi rimo Bako ngba iiriwo gene?

¹² Tipa ka ziasi rimo Bako, Yesu ahi arungosiro, asengahe na gu akitangbangase i aye na ni kutiko. Ko aima ino gupai nga ko aima giasangba Bako rogo apai yo dunduko; pai ho ka sa ko ko du na zee te. (Eb. 12:2) Ko aima ino gupai a nga Satana du naazubo ko ti gu kere regbo re. (Rk. 22:2-4; 23:33, 34) Satana aima du na gu maabangirise nga si aaidanga Yesu du ni ruruko te; ono tie, Satana aadunga na rengba ka manga gipai re te! Yesu aima yugoho nirengo nga Satana nga kere iraziree na Yekova na kina ruru amoyambu beko nga aguyo nabanda pa gayo du niruruse zavura ho du yo ni rogo kere asada!

13. Waigu rengbe mo ka sa ngbarago ti gamo Bakindo?

 ¹³ Ya mo mo naida ka sa ngbarago ti gamo Bakindo? Mo naandu kumbatayo kindi kaa taasarimo Yekova, kini undo kura aboro tipa i ini wene asino gaani Mbori. Ho mo amangaha ni wo, gure nga mo na pekafuo ga Yesu kpiapai. (1 Pet. 2:21) Wakina Yesu, mo nasa ngbarago ti Yekova, na mo nayugoho nga gu vura Ko nga Satana nga kere iraziree!

ANI NAUNDO KA BATASA ABORO HO ANI ATAASARIMO YEKOVA NI

14-15. Gini wene apai rengbe ka manga ho ani ayugopai ni fu aboro tipa Yekova?

¹⁴ Ho ani ataasarimo Yekova ni, ani naundo ka batasa aboro. Ngba gini gene? Sidu, Satana ‘kisi berã agu aboro zanga idapase.’ (2 Kor. 4:4) Ni sangbana gipai re, i ima ye ka ida kuti agu aziree nga ga Satana du re nga: Mbori ti ni te, ko ima turã tirani na ko aberãnga pa aboro te, Mbori nga gbegberẽ sino boro na ko nafu mbusa fu agu aboro namanga gbegberẽpai nyeanye kindi. Satana nape agi aziree re dunduko bambiko ko naida ka gbarasarimo Yekova na ki sa aboro i mbu kadu na nyemu ka mbeda na ko. Ono ho ani tungusapai ni, ani nasa Satana ka ko da nga ti gako sásá ya. Ani nayugo rengo fu aboro tipa Barani, na kini taasi ziazia rimoko. Sangbanaha nga gine?

¹⁵ Agu arengo du rogo Fugo Mbori yo na bakere ome ti ni. Ni yugo ani pai fu aboro tipa Yekova na gu rengo du tipa ko, ani naye ka bi gupai du ni bawenehe. Aboro nambu ida kuti agu aziree nga ga Satana, na i natona ka bi gu wene asino du ti Barani. Kina iriworago nati tiyo ka bi pa gako ome nga gu adu nga digidoho ti ni ya. (Yes. 40:26) I nawirika ka kido kutiko bambiko pa gako ruru sarangbanga. (Pa Rug. 32:4) I nawirikapai ti gako bakere tatamana. (Yes. 55:9; Rom. 11:33) Na i nagbia wasa ka ino gupai nga Yekova nga nyemuse. (1 Yo. 4:8) Wa i nikaa mbeda na Yekova, gayo maabangirise tipa ka raka nyeanye kindi ni awiriko nada nirengo. Si ni bakerepa momu furani ka undo kura aboro i mbedi na Bayo! Ho ani amangaha ni wo, Yekova nabi rani nga gako “abadiasunge.”​—1 Kor. 3:5, 9.

16. Gini sangbanapai du kurii aboro ho i aino rimo Mbori ni? Oni funga akpiapai.

 ¹⁶ Ti tonatonaha, ani ima rengba ka yugo gupai gbua fu aboro nga rimo Mbori nga Yekova. Gipai re ni tihe ima rengba kadu na bakere maapai kurii agu aboro du na wene ngbaduyo yo. Ni kpiapai, i asonosi paranga dee du rimori nga Aaliyah b rogo gu pambori mburuhe aadunga rii Baibiri ya. Ono ri aagbianga ngbarago be gari pambori te, na ri abi tiri nga ri ambeda nga na Mbori te. Gipai re aye ka ariatihe ti gu regbo ri atona wirika Baibiri na aDezire Yekova. Ri atona ka bi Mbori ni Bakureari. Kina ngbari nazere ka wirika gupai nga i aima dia rimo Mbori rogo dungu aBaibiri yo kusayo na ki moi agu afugo kubaha nga Gbia. Wirika rimo Yekova asa ri ri mangi ariapai rogo gari raka yo. Ri ata ngbari nga: “Bawene bakureami na kina rimoko ti ni!” Sangbanaha angia gine? Ri aya: “Mi na bakere zereda awere ngbadure yo. Mi nabi tire na bakere irisa.” Kumba du rimoko nga Steve angia batabia na ko adu rogo gu ngbadimokporo nga ga aYudo naadu na nyanyaki andiko rogoho. Ko aidanga kadu ni papara pambori te, bambiko ko aima bi bakere biriki. Ono tie, tingbafuo kpio nako, ko aidi ka sungo pati gu wisigo Ziazia Kekeapai nga gu kura Dezire Yekova sa aanungusaha. Pa wirika ko rimo Mbori aima zio kpotoko yo ni bakerehe. Ko aya: “Mi aainongo rimo Mbori te.” Ko agbia gu kura pai kutini nga: “Ti bambata regbo, mi aye ka ino gupai nga Mbori kina ti ni nzunzu! Mi abiko ni boro. Mi aini gupai nga mi ima gbia Bakure.”

17. Tipagine mo nadiberã ti ni kaa ndu kumbatayo kindi kaa tambua rimo Yekova? (Oni bi sura a.)

¹⁷ Ho mo naatungusapai ni na kini yugupai, ya mo mo naayugo ziazia rimo Yekova fu aboro? Ya mo mo naaundo yo tipa i ini wai du gaani Mbori nzunzu? Ho mo amangaha ni wo, mo nataasa rimo Mbori. Mo naandunga andu kindi kumbatayo kaa taasarimo Yekova ni undo mo kura aboro i ini gu boro nzunzu nga Ko. Ngba gi gene re, mo nika batasa aboro. Mo nika pekafuo gamo Bakindo nga Kristo Yesu. Na kurigure, mo nika sa ngbarago ti gu Bamo nga Yekova. Mo ‘naatambua [rimoko] nye anye kindi’!​—Tam. 145:2.