1. Lanen maber ango ma luwor Jehovah guwekiwa nicakke wa con?

 TIKA itero watti ki Jehovah calo gin ma pire tek? Wangeyo ni itero! Dok pe itye keni. Nicakke wa i kare macon, jo mapol bene guwinyo kit ma iwinyo kwede. (Jab. 104:​33, 34) Dano mapol dong gujalo jami mapol wek giti pi Jehovah. Meno aye gin ma Ajula pa Lubanga ma onongo gikwo i lobo Icrael macon onongo gitimo. Ajula pa Lubanga onongo gubedo angagi, dok pwony ango ma watwero nongo ki i lanengi?

2. (a) Ajula pa Lubanga onongo gubedo angagi? (Wel 6:​1, 2) (b) Pingo onongo Luicrael mukene gikwonge me bedo Ajula pa Lubanga?

² Lok man ni Ajula pa Lubanga kigonyo ki i nyig lok me leb Ibru ni “Najir” ma tyen lokke tye ni “Ngat ma Okone Kene,” “Ngat ma Opokke Woko,” nyo “Ngat ma Odyerre.” Ajula pa Lubanga onongo gubedo dano ma komgi mit ma gujalle kengi me tic pi Jehovah i yo ma kite dok pat. Cik pa Moses onongo ye ki laco nyo dako me kwongo kwong ma kite dok pat bot Jehovah kun yero me kwo macalo Ajula pa Lubanga pi kare mo. a (Kwan Wel 6:​1, 2.) Ka Laicrael mo okwonge me tic macalo Ajula pa Lubanga, onongo mitte ni en olub cik mogo ma Luicrael mukene-ni pe gilubo. Dong pingo onongo ngat moni yero me doko Ajula pa Lubanga? Twero bedo pi mar matut ma en tye kwede pi Jehovah kacel ki pwoc pi mot ducu ma En miyo.—Nwo. 6:5; 16:17.

3. I yo ma nining ma jo pa Lubanga i kare-ni girom aroma ki Ajula pa Lubanga?

 ³ I kare ma “cik pa Kricito” oleyo kaka Cik pa Moses, yub me tic macalo Ajula pa Lubanga ogik woko. (Gal. 6:2; Rom. 10:4) Ento, calo Ajula pa Lubanga, jo pa Lubanga i kare-ni gimedde ki nyuto miti matek me tic pire ki cwinygi, kwogi, tamgi, ki tekogi ducu. (Mar. 12:30) Wakwonge piwa kenwa me tic pi Jehovah i kare ma wadyero kwowa bote. Cobo kwongewa meno kwako mine me timo miti pa Jehovah kacel ki jalo jami mogo me tic pire. Ka wawoto ki nyamo kit ma Ajula pa Lubanga onongo gicobo kwede kwongegi, watwero nongo pwony mapol i kom kit ma wan bene watwero cobo kwede kwongewa. b (Mat. 16:24) Kong dong wanyamu labol mogo.

BED ATERA ME JALLE

4. Ma lubbe ki Wel 6:​3, 4, jami mene ma onongo mitte ni Ajula pa Lubanga ojalgi?

⁴ Kwan Wel 6:​3, 4. Onongo pe kiye ni Ajula pa Lubanga omat kongo nyo ocam jami calo nyig olok madyak nyo tuga olok mutwone. Luicrael mukene-ni onongo gimato kongo dok gicamo nyig olok madyak ki tuga olok mutwo. Jami magi onongo pe gubedo jami maraco. Ki lok ada, Baibul waco ni kongo vino obedo mic mua ki bot Lubanga dok kongo vino “yomo cwiny dano.” (Jab. 104:​14, 15) Kadi bed jami magi onongo gikelo yomcwiny i kwo pa dano, Ajula pa Lubanga onongo gitye atera me jalone. c

5. Jami mene ma Madián ki Marcela guyero me jalone, dok pingo?

⁵ Calo Ajula pa Lubanga, wan bene i kare-ni wajalo jami mogo wek wamed ticwa pi Jehovah. Nen kong labol pa omego Madián gin ki dakone Marcela. d Luot man onongo gitye ki kwo mayot adada. Madián onongo tye ki dog tic ma culle bup ma onongo weko gibedo i ot madit dok mamwonya. Ento, onongo gimito medo ticgi pi Jehovah. Me cobo yubgi meno, gumoko tamgi me timo alokaloka mogo. Guwaco ni, “Wacako dwoko piny wel cente ma watiyo kwede. Wakobo i ot matidi dok wacato mutokawa woko.” Onongo pe  mitte ni Madián ki Marcela gujal jami magi—ento guyero me timone pien onongo gimito medo ticgi pi Jehovah. Cwinygi yom dok guyeng pi tam ma gumoko-ni.

6. Pingo Lukricitayo mogo i kare-ni gijalle? (Nen bene cal.)

⁶ Jo pa Jehovah i kare-ni cwinygi yom me jalo jami mogo wek gibed ki kare me medo ticgi pi Jehovah. (1 Kor. 9:​3-6) Jehovah pe diyowa me jalo jami magi, dok jami ma wajalogi-ni nongo pe gubedo jami maraco. Me labolle, jo mogo gijalo dog tic ma gimaro nyo bedo ki ot ma meggi. Jo mapol gumoko tamgi me bedo ma wigi nono pi kare mo, nyo pe me nywalo lutino cutcut i nge nyomme. Jo mukene guyero me kobo ka ma can lutit kwena tye iye, kadi bed meno weko gibedo ka mabor ki bot luremgi ki lupacogi. Pol pa wan wajalo jami magi pien wamito miyo ki Jehovah gin maber loyo ma watye kwede. Bed ki gen ni Jehovah cwinye bedo yom adada pi gin mo keken ma ijalo, kadi tidi nyo dit, wek imed ticci pire.—Ibru 6:10.

PE ILWOR BEDO PAT

7. Pingo onongo twero bedo tek pi Ajula me gwoko kwongene? (Wel 6:5) (Nen bene cal.)

⁷ Kwan Wel 6:5. Ajula pa Lubanga onongo gikwonge pe me lyelo yer wigi. Meno onongo obedo yo me nyuto ni gimine i te twero pa Jehovah ki cwinygi ducu. Ka Laicrael mo onongo obedo Ajula pa Lubanga pi kare malac, yer wiye onongo lot mabor dok jo mukene onongo gitwero nenone woko oyotoyot. Ka jo ma gitye cok kwede onongo giworo tamme dok gicuko cwinye me cobo kwongene, ci onongo bedo yot pire me bedo pat. Ento, tye me cwercwiny ni i kare mogo i tekwaro pa jo Icrael, onongo pe kiworo nyo kicwako Ajula pa Lubanga. I kare pa lanebi Amoc, Luicrael ma gungak “gubedo ka miyo Ajula kongo vino ni gumati” ki miti me neno ni guturo kwongegi pe me mato kongo. (Amoc 2:12) I kare mogo, onongo mitte ni Ajula pa Lubanga gubed ki tekcwiny madwong me gwoko kwongegi ki me bedo pat ki jo mukene.

8. Gin mutimme i kom Benjamin ocuko cwinyi nining?

⁸ Ki kony pa Jehovah, wan bene watwero bedo pat kadi bed wabedo lulewic, nyo walwor. Nen kong labol pa Benjamin, Lacaden me mwaka apar ma bedo i lobo Norway. Pi lweny ma tye ka timme i lobo Ukraine, cukulgi oketo yub me nyuto cwak pi jo me Ukraine. Kiwaco ni lutino ducu myero guwer wer kun nongo guruko bongo ma kalane rwatte ki bandera me lobo Ukraine. Me weyo nywako i yub man, Benjamin ocung ka mabor ki kabedo ma kwer man bitimme  iye. Ento lapwony mo onene ci odange ki dwan malongo ni: “Bin iribbe kacel kwedwa kombeddi. Wan ducu watye ka kuri!” Ki tekcwiny, Benjamin ocito bot lapwony ci owaco ni: “An pe acwako tung ka mo dok pe anywako i kwer me wibye. Ki lok ada, Lucaden pa Jehovah mapol gitye i buc pien gukwero donyo i mony.” Lapwony oye lokke ci owaco ni pe mitte ni Benjamin onywak i kwer kwedgi. Ento, lutino kwan luwote gucako penye pingo en pe onywako kwedgi i kwer man. Lworo omako Benjamin matek mumiyo en onongo cok koko; ento ki tekcwiny, en onwoyo i nyim kilaci gin ma owaco bot lapwonye. Lacen, Benjamin owaco bot lunywalle ni ewinyo calo Jehovah aye okonye me cung matek pi niyene.

9. I yo ma nining ma watwero yomo kwede cwiny Jehovah?

⁹ Pien wamoko tamwa me bedo luwiny bot Jehovah, jo mukene gineno ni wan wapat kwedgi. Mitte ni wabed ki tekcwiny me nyutte ni wan wabedo Lucaden pa Jehovah i gang ticwa nyo i cukul. Ka tam kacel ki kit pa dano ma i lobo-ni medde ki doko rac, wabinongo ni tek adada me medde ki kwo ma lubbe ki cik ma igi lac me Baibul ki me nywako kwena maber ki jo mukene. (2 Tem. 1:8; 3:13) Kare ducu wi myero opo ni ‘wayomo cwiny Jehovah’ ka wabedo pat ki jo ma pe gitiyo pire.—Car. 27:11; Mal. 3:18.

KET JEHOVAH MUKWONGO I KWONI

10. Pingo lubo cik ma tye i Wel 6:​6, 7 onongo twero temo niye pa Ajula pa Lubanga?

¹⁰ Kwan Wel 6:​6, 7. Ajula pa Lubanga onongo pe gitwero cito cok ki kom dano muto. I kare me Baibul, man onongo obedo ariya madit adada bot Ajula pa Lubanga ka watte mo macok oto. Kwer me yik i kare me Baibul onongo kwako bedo cok ki kom lato. (Jon 19:​39, 40; Tic 9:​36-40) Ento Ajula pa Lubanga onongo pe twero lubo kwer ma kit meno. Kadi bed en orwenyo watte macok, Ajula onongo ginyuto niye matek ki gwoko kwongegi. Labongo akalakala mo, Jehovah onongo miyo teko bot luticce ma lugen magi me kanyo peko malit kit meno.

11. Gin ango ma Lakricitayo myero otim ka tye ka moko tam ma gudo lupacone? (Nen bene cal.)

¹¹ Macalo Lukricitayo, watero kwonge ma wakwongo i kare ma wadyere bot Jehovah calo gin ma pire tek adada. Man gudo tam ma wamoko ki jami ma watimo pi lupacowa. Watiyo matek me miyo jami ma mitte pi lupacowa,  ento pe waketo miti pa lupacowa mukwongo makato gin ma Jehovah mito ki botwa. (Mat. 10:​35-37; 1 Tem. 5:8) I kare mukene, twero mitte ni wamok tam ma pe yomo cwiny wadiwa wek wayom cwiny Jehovah.

12. I kare ma en okemme ki ariya madit i ode, gin ango ma Alexandru otimo dok ngo ma en pe otimo?

¹² Nen kong gin mutimme i kom Alexandru ki dakone, Dorina. I nge luot man kwano Baibul pi mwaka acel, Dorina omoko tamme me juko kwanne woko, dok onongo mito ni Alexandru bene ogik kwanne woko. Ento ki mwolo, dok i yo me diro, Alexandru owacce ni ebimedde ki kwanne. Cwiny Dorina pe obedo yom dok otemo tic ki gero me juko cware ki kwano Baibul. Alexandru owaco ni etute matek me niang kit ma dakone winyo kwede, ento pe obedo yot. I kare mukene, ka Dorina ocaye dok oloko kwede ki gero, en onongo winyo calo myero ejuk kwano Baibul woko. Ento, Alexandru omedde ki keto Jehovah mukwongo, kun bene nyuto mar kacel ki woro matut pi dakone. Pi lanen maber ma en onyuto, dakone omoko tamme me cako kwano Baibul odoco, dok lacen onongo batija.—Nen ki i jw.org vidio ma wiye tye ni Alexandru ki Dorina Vacar: “Mar Diyo Cwinye, Dok Lakica Bene.”

13. Watwero nyuto mar pi Jehovah ki pi lupacowa nining?

¹³ Jehovah aye ocako te yub me ot dok mito ni wabed ki yomcwiny iye. (Ep. 3:​14, 15) Ka wamito ni wabed ki yomcwiny me ada, omyero watim jami i yo pa Jehovah. Bed ki gen ni Jehovah pwoyo jalleni me tic pire ka iwoto ki gwoko jo me paconi kun iterogi ki mar kacel ki woro.—Rom. 12:10.

CUK CWINY JO MUKENE ME BEDO CALO AJULA PA LUBANGA

14. Angagi tutwalle ma omyero watute matek me cuko cwinygi ki lokwa?

¹⁴ Jo ducu ma giyero me woro Jehovah i kare-ni myero gubed atera me jalo jami mogo pi margi pi Jehovah. I kare mogo, timo meno pe yot. Watwero konyo jo mukene nining me nyuto cwiny me jalle ma kit meno? Watimo man ka wacuko cwinygi ki lokwa. (Yubu 16:5) Tika wutye ki jo mogo i kacokkewu ma gitye ka tute me dwoko rwom me kwogi piny wek gimed ticgi pi Jehovah? Tika ingeyo jo matino mogo ma gitye ka nyuto tekcwiny kun gibedo pat ki jo mukene ma i cukulgi, kadi bed timo meno pe yot? Tika ingeyo lutino kwan mogo me Baibul nyo Lucaden luwoti mogo ma gitye ka yelle me gwoko gennegi pien gitye ka nongo  aunauna ki bot wadigi? Mok tammi me timo gin mo keken ma itwero me cuko cwiny jo magi kun iwaccigi kit ma imarogi kwede pi tekcwiny ma ginyuto ki ticgi pi Jehovah.—Pile. 4, 5, 7.

15. Jo mogo gukonyo omegiwa ki lumegiwa ma gitye i tic pi kare malac nining?

¹⁵ I kine mukene, watwero bedo ki kare me miyo kony bot Lukricitayo ma gitye i tic pi kare malac. (Car. 19:17; Ibru 13:16) Man aye onongo obedo miti pa laminwa mo muteggi ma bedo i lobo Sri Lanka. I kare ma kimedo cente ma en nongo macalo pencion, en obedo ki miti me konyo lumege aryo ma gitye lupainia me medde ki ticgi pien lumege magi onongo gitye ki peko me can lim. Pi man, en omoko tamme me miyogi cente mo dwe ki dwe wek okonygi ki wilo airtime. Laminwa-ni pud dong onyuto cwiny maber ya!

16. Pwony ango ma wanongo ki bot Ajula pa Lubanga ma i kare macon?

¹⁶ Pud dong wanongo pwony mapol ki i lanen maber ma Ajula pa Lubanga guwekiwa ya! Ento, kwano lok i kom Ajula pa Lubanga bene pwonyowa gin mo i kom Wonwa me polo, Jehovah. En tye ki gen ni wamito yomo cwinye dok ni watye atera me jalo jami mogo wek wagwok kwongewa me dyere. En miniwa deyo ki miyo botwa kare me yero kit me nyuto marwa Pire. (Car. 23:​15, 16; Mar. 10:​28-30; 1 Jon 4:19) Yub me bedo Ajula pa Lubanga nyuto ni Jehovah neno jami ma wajalo me tic pire dok marowa pi meno. Dong walego ni wan ducu wamoku tamwa me medde ki tic pi Jehovah, kun wamine gin maber loyo ma watye kwede ki cwinywa ducu.