1. Mɛni su kpakpa ko nɛ Yehowa sɔmɔli je kpo blema?

 ANƐ o bua jɔ huɛ bɔmi gbagbanii nɛ ngɛ o kɛ Yehowa nyɛ kpɛti ɔ he lo? E ngɛ heii kaa o bua jɔ he! Pi mo pɛ nɛ o nuɔ he jã. Kɛ je blema tɔɔ ɔ, nihi fuu a bua jɔ huɛ bɔmi kpakpa nɛ ngɛ a kɛ Yehowa a kpɛti ɔ he. (La 104:​33, 34) Nihi fuu ngɔ níhi kɛ sã afɔle konɛ a nyɛ nɛ a sɔmɔ Yehowa. Jã nɔuu kɛ̃ nɛ e ji ngɛ nihi nɛ a ngɔ a he kɛ ha nɛ a sɔmɔ kaa Nazir bi ngɛ blema Israel ɔ a blɔ fa mi ɔ nɛ. Mɛnɔmɛ ji Nazir bi nɛ ɔmɛ ɔ, nɛ mɛni wa ma nyɛ maa kase ngɛ a nɔ hyɛmi nɔ́ ɔ mi?

2. (a) Mɛnɔmɛ ji Nazir bi ɔmɛ? (4 Mose 6:​1, 2) (b) Mɛni he je nɛ Israel bi komɛ hla kaa a ma sɔmɔ kaa Nazir bi ɔ?

² A je munyungu nɛ ji “Nazir No” ɔ kɛ je Hebri gbi ɔ mi, nɛ e ma nyɛ maa tsɔɔ “Nɔ Nɛ A Je Lɛ Ngɔ To,” “Nɔ Ko Nɛ A Hla Lɛ,” loo “Nɔ Ko Nɛ E Jɔɔ E He Nɔ Kɛ Ha Ní Tsumi Klɛdɛɛ Ko.” Nazir bi ɔmɛ ji Israel bi nɛ a ngɛ kã nɛ a ngɔ níhi kɛ sã afɔle konɛ a nyɛ nɛ a sɔmɔ Yehowa ngɛ blɔ klɛdɛɛ nɔ. Ngɛ Mose Mlaa a nya a, ke nyumu loo yo ko suɔ nɛ e kã Yehowa kita klɛdɛɛ ko konɛ e sɔmɔ lɛ kaa Nazir no kɛ ya si be ko ɔ, e ma nyɛ maa pee jã. a (Kane 4 Mose 6:​1, 2.) Ke Israel no ko kã kita kaa e ma sɔmɔ kaa Nazir no ɔ, e he hia nɛ e kɛ blɔ tsɔɔmi komɛ nɛ tsu ní, be mi nɛ Israel bi kpa amɛ lɛɛ a be jã pee. Mɛni he je nɛ Israel no ko maa hla kaa e ma sɔmɔ kaa Nazir no ɔ? Ke Israel no ko ná suɔmi nɛ e mi wa kɛ ha Yehowa nɛ e hɛ sa ní kpakpahi nɛ Yehowa pee ha lɛ ɔ, lɔ ɔ ma nyɛ maa wo lɛ he wami konɛ e pee jã.—5 Mose 6:5; 16:17.

3. Ngɛ mɛni blɔ nɔ nɛ Mawu we bi nɛ a ngɛ mwɔnɛ ɔ ngɛ kaa Nazir bi ɔmɛ?

 ³ Kɛ je benɛ a ngɔ “Kristo ɔ mlaa a” kɛ ba da Mose Mlaa a nane mi ɔ, Nazir no peemi he blɔ nya tomi ɔ ba nyagbe. (Gal. 6:2; Rom. 10:4) Se kaa bɔ nɛ Nazir bi ɔmɛ pee ɔ, Yehowa we bi nɛ a ngɛ mwɔnɛ ɔ yaa nɔ nɛ a sɔmɔɔ Yehowa kɛ a tsui tsuo, kɛ a susuma tsuo kɛ a juɛmi tsuo kɛ a he wami tsuo. (Maak. 12:30) Ke wa jɔɔ wa he nɔ kɛ ha Yehowa a, e tsɔɔ kaa wa kã kita kaa wa ma sɔmɔ Yehowa. Bɔ nɛ pee nɛ waa ye jamɛ a kita a nɔ ɔ, e ma bi nɛ waa pee Yehowa suɔmi nya ní, nɛ waa ngɔ níhi kɛ sã afɔle ngɛ e sɔmɔmi mi. Wa ma susu nɔ́ nɛ Nazir bi ɔmɛ pee kɛ ye a kita a nɔ, nɛ wa maa kase ní komɛ kɛ je a ngɔ nɛ maa ye bua wɔ konɛ wa nyɛ nɛ waa ye wa kita amɛ a nɔ. b—Mat. 16:24.

MOO NGƆ NÍHI KƐ SÃ AFƆLE

4. Ngɛ 4 Mose 6:​3, 4 ɔ nya a, mɛni níhi nɛ Nazir no ko kɛ sãa afɔle?

⁴ Kane 4 Mose 6:​3, 4. Nihi tsuo nɛ a sɔmɔɔ kaa Nazir bi ɔ nui dã, nɛ a yi nɔ́ ko nɛ a kɛ wai tso he nɔ́ ko pee. Se ni kpahi nɛ a bɔle mɛ ɔ yeɔ niye ní nɛ ɔmɛ be fɛɛ be, nɛ a ngɛ he blɔ kaa a peeɔ jã ejakaa tɔmi ko be he. Baiblo ɔ tsɔɔ kaa ‘dã haa nɔ bua jɔmi,’ nɛ e ji nike ní nɛ je Mawu ngɔ. (La 104:​14, 15) Se ke nɔ ko ba pee Nazir no ɔ, e ngɔɔ he blɔ nɛ e ngɛ kaa e nuɔ dã nɛ e yeɔ niye ní komɛ ɔ kɛ sãa afɔle. c

5. Mɛni nɛ Madián kɛ Marcela hla kaa a kɛ maa sã afɔle, nɛ mɛni he je?

⁵ Kaa bɔ nɛ Nazir bi ɔmɛ pee ɔ, wɔ hu wa ma nyɛ maa ngɔ níhi kɛ sã afɔle konɛ wa sɔmɔ Yehowa kɛ pi si. Mo susu Madián kɛ Marcela a nɔ hyɛmi nɔ́ ɔ he nɛ o hyɛ. d Nyɛminyumu nɛ ɔ kɛ e yo ɔ a si himi ngɛ gbɔjɔɔ. Madián ngɛ ní tsumi kpakpa nɛ e hiɔwo ɔ hu hi, enɛ ɔ ha nɛ a ngɛ we kpakpa nɛ ngɛ fɛu mi. Se kɛ̃ ɔ, a suɔ nɛ a pee babauu ngɛ Yehowa sɔmɔmi mi. Bɔ nɛ pee nɛ a nyɛ nɛ a su oti nɛ ɔ he ɔ, a ma nya si kaa a maa pee tsakemi komɛ. A de ke: “Wa bɔni sika nɛ waa kɛ heɔ níhi ɔ nɔ gbɔmi, wa hia kɛ ya je we nyafii ko mi nɛ wa jua wa lɔle ɔ.” Jinɛ e he hia we nɛ Madián kɛ Marcela nɛ a ngɔ ní nɛ ɔmɛ kɛ sã afɔle, se akɛnɛ a suɔ nɛ a bli a sɔmɔmi ní tsumi ɔ mi he je ɔ, a ma a juɛmi nya si kaa a maa pee jã. Ngɛ anɔkuale mi ɔ, a bua jɔ wawɛɛ kaa a nyɛ nɛ a mwɔ yi mi kpɔ nɛ ɔ.

6. Mɛni he je nɛ Kristofohi ngɔɔ níhi kɛ sãa afɔle mwɔnɛ ɔ? (Hyɛ foni ɔ hulɔ.)

 ⁶ Kristofohi nɛ a ngɛ mwɔnɛ ɔ bua jɔɔ wawɛɛ kaa a maa ngɔ níhi kɛ sã afɔle konɛ a nyɛ nɛ a pee babauu ngɛ Yehowa sɔmɔmi mi. (1 Kor. 9:​3-6) Yehowa nyɛ we wa nɔ kaa waa ngɔ níhi kɛ sã afɔle. Se ke waa kɛ níhi sã afɔle ɔ, lɔ ɔ tsɔɔ we kaa tɔmi ngɛ jamɛ a ní ɔmɛ a he. Kaa nɔ hyɛmi nɔ́ ɔ, ni komɛ be mɛ nitsɛmɛ a we, loo a ngmɛɛ ní tsumi nɛ a bua jɔ he ɔ he. Ni komɛ hu ma a juɛmi nya si kaa a be gba si himi mi sɛe mla, aloo ke a sɛ gba si himi mi po ɔ, a be fɔe mla. Ni komɛ hu ma a juɛmi nya si kaa a ma ya sɔmɔ ngɛ he nɛ fiɛɛli fuu a he hia ngɛ. E ngɛ mi kaa lɔ ɔ ma ha nɛ a je a huɛmɛ kɛ a weku li a he mohu lɛɛ, se loloolo ɔ, a peeɔ jã. Wa kpɛti nihi fuu ngɔɔ níhi kaa jã a kɛ sãa afɔle ejakaa wa suɔ nɛ waa ngɔ wa níhi nɛ hi pe kulaa a kɛ ha Yehowa. Mo ná nɔ mi mami kaa ke o ngɔ nɔ́ ngua ko loo nɔ́ nyafii ko kɛ sã afɔle konɛ o nyɛ nɛ o sɔmɔ Yehowa a, e bua jɔɔ he.—Heb. 6:10.

MOO PEE KLAALO KAA O MAA JE EKPA

7. Mɛni he je nɛ e he ma nyɛ maa wa ha Nazir no ko kaa e maa ye si nɛ e wo Yehowa a nɔ ɔ? (4 Mose 6:5) (Hyɛ foni ɔ hulɔ.)

⁷ Kane 4 Mose 6:5. Nazir bi ɔmɛ wo Yehowa si kaa a be a yi sɛe. A peeɔ jã kɛ tsɔɔ kaa a baa a he si ha Yehowa wawɛɛ. Ke Israel no ko pee Nazir no be kɛkɛɛ ɔ, e yi bwɔmi kaa gagaaga nɛ ni kpahi naa. Ke nihi je bumi kpo kɛ tsɔɔ lɛ nɛ a wo lɛ he wami konɛ e ye e si womi ɔ nɔ ɔ, e be yee ha lɛ kaa e maa pee jã. Aywilɛho sane ji kaa ngɛ blema Israel ɔ, be komɛ ɔ, nihi bui Nazir bi ɔmɛ nɛ a wui mɛ he wami hulɔ. Ngɛ gbalɔ Amos be ɔ mi ɔ, Israel bi nɛ a ji hemi kɛ yemi kuali ɔ ‘ya nɔ nɛ a ha nɛ Nazir bi ɔmɛ nu wai.’ E ngɛ heii kaa a pee jã konɛ Nazir bi ɔmɛ nɛ a ko ye si nɛ a wo Yehowa kaa a be wai nue ɔ nɔ. (Amos 2:12) Be komɛ ɔ, e he hia nɛ Nazir bi ɔmɛ nɛ a pee kã wawɛɛ konɛ a nyɛ nɛ a ye si nɛ a wo ɔ nɔ, konɛ a je ekpa ngɛ ni kpahi a he.

8. Mɛni blɔ nɔ nɛ Benjamin níhi a si kpami ɔ woɔ mo he wami?

⁸ Ke wa gboɔ zo po ɔ, Yehowa ma nyɛ maa ye bua wɔ konɛ wa nyɛ nɛ waa pee kã nɛ waa je ekpa kulaa. Mo susu nyɛminyumu wayoo ko nɛ a tsɛɛ lɛ ke Benjamin nɛ e je Norway nɛ e ye jeha nyɔngma a níhi a si kpami ɔ he nɛ o hyɛ. Akɛnɛ ta ngɛ nɔ yae ngɛ Ukraine he je ɔ, e sukuu bi ɔmɛ pee ní peemi ko kɛ fĩ nihi nɛ a ngɛ Ukraine ɔ a se. A de sukuu bi ɔmɛ kaa a la la ko be mi nɛ a wo tade ko nɛ Ukraine ma a kɔla ngɛ mi ɔ. Akɛnɛ Benjamin sume nɛ e ngɔ e he kɛ wo ma he suɔmi ní peemi nɛ ɔ mi he je ɔ, e je he nɛ a ngɛ nɔ́ ɔ pee ngɛ ɔ kɛ ya he tsitsaa. Se tsɔɔlɔ ko na lɛ nɛ e kpa ngmla kɛ de ke: “Wɔ  tsuo wa ngɛ mo mlɛe, lɔ ɔ he ɔ, ba piɛɛ wa he!” Benjamin pee kã nɛ e hɛ kɛ su tsɔɔlɔ ɔ he nɛ e de lɛ ke: “I be nyɛe ma piɛɛ nyɛ he ejakaa i kɛ ye wui ma kudɔmi sanehi a mi. Ngɛ anɔkuale mi ɔ, a wo Yehowa Odasefohi fuu tsu akɛnɛ a kɛ a he wui ta hwumi mi ɔ he je.” Tsɔɔlɔ ɔ kplɛɛ nɔ, nɛ e de Benjamin kaa e he be hiae nɛ e kɛ e he nɛ wo ní peemi ɔ mi. Se kɛ̃ ɔ, e sukuu bi ɔmɛ ekomɛ bɔni si bimi ke, mɛni he je nɛ e ba piɛɛ we wa he ɔ? Enɛ ɔ ha nɛ Benjamin ye gbeye wawɛɛ nɛ e bɔni ya fomi, se e pee kã nɛ e tĩ nɔ́ nɛ e de e tsɔɔlɔ ɔ mi kɛ ha e sukuu bi ɔmɛ tsuo ekohu. Lɔ ɔ se ɔ, Benjamin de e fɔli ɔmɛ ke e na kaa Yehowa lɛ ye bua lɛ nɛ e nyɛ nɛ e fã e hemi kɛ yemi ɔ he.

9. Mɛni wa ma nyɛ maa pee kɛ ha nɛ Yehowa bua nɛ jɔ?

⁹ Akɛnɛ wa suɔ nɛ waa pee Yehowa suɔmi nya ní he je ɔ, nihi nɛ a bɔle wɔ ɔ naa kaa wa je ekpa kulaa ngɛ a he. Ja wa pee kã loko wa ma nyɛ ma je wa he kpo ngɛ sukuu loo ní tsumi he kaa Yehowa Odasefohi ji wɔ. Jehanɛ hu ɔ, akɛnɛ nihi nɛ a sɔmɔ we Yehowa a, a je mi bami ngɛ puɛe wawɛɛ he je ɔ, e he ma nyɛ maa wa ha wɔ kaa waa kɛ Baiblo sisi tomi mlaahi ma tsu ní, nɛ waa fiɛɛ sane kpakpa a kɛ tsɔɔ ni kpahi. (2 Tim. 1:8; 3:13) Se kɛ̃ ɔ, mo kai kaa be fɛɛ be nɛ o maa pee kã nɛ o maa je ekpa ngɛ nihi nɛ a sɔmɔ we Yehowa a he ɔ, lɔ ɔ ma ha nɛ ‘Yehowa bua maa jɔ.’—Abɛ 27:11; Mal. 3:18.

NGƆƆ YEHOWA KƐ YE KEKLEEKLE BLƆ HE NGƐ O SI HIMI MI

10. Mɛni blɔ nɔ nɛ e he ma nyɛ maa wa ha Nazir no ko kaa e kɛ mlaa nɛ ngɛ 4 Mose 6:​6, 7 ɔ ma tsu ní?

¹⁰ Kane 4 Mose 6:​6, 7. Nazir no ko be nyɛe maa hɛ kɛ su gbogboe ko he. Eko ɔ, o be susue kaa enɛ ɔ ji afɔle ngua ko nɛ e sã. Ngɛ Baiblo ɔ mi ɔ, e he ma nyɛ maa wa ha Nazir no ko kaa e maa ye mlaa nɛ ɔ nɔ ke e weku no ko nɛ e hɛ kɛ su e he wawɛɛ ɔ gbo. Ngɛ jamɛ a be ɔ mi ɔ, behi fuu ɔ, ya kusumi biɔ nɛ nihi nɛ a hi gbogboe ɔ he. (Yoh. 19:​39, 40; Níts. 9:​36-40) Se ke nɔ ko ba pee Nazir no ɔ, e be nyɛe nɛ e kɛ e he nɛ wo kusumi nɛ ɔ mi. Ke Nazir no ko weku no gbo ɔ, e biɔ nɛ e ná hemi kɛ yemi nɛ mi wa wawɛɛ konɛ e nyɛ nɛ e ye kita nɛ e kã Yehowa a nɔ. Ngɛ anɔkuale mi ɔ, Yehowa wo nihi nɛ a ngɔ a he kɛ ha kaa a ma sɔmɔ kaa Nazir bi ɔ he wami konɛ a nyɛ nɛ a fĩ si ke a kɛ si fɔfɔɛ ko kaa jã a kpe.

11. Ke Kristofo no ko ngɛ yi mi kpɔ mwɔe ngɛ e weku mi bimɛ a hiami níhi a he ɔ, mɛni nɛ e sa nɛ e hi e juɛmi mi? (Hyɛ foni ɔ hulɔ.)

¹¹ Akɛnɛ wa ji Kristofohi he je ɔ, wa buɔ wa he nɔ nɛ wa jɔɔ kɛ ha Yehowa a kaa hɛdɔ nɔ́.  Enɛ ɔ saa yi mi kpɔhi nɛ wa mwɔɔ kɛ kɔɔ weku sanehi kɛ wa ní peepeehi hu a he. Wa bɔɔ mɔde saminya kaa wa ma ha wa weku mi bimɛ ɔmɛ a hiami níhi, se kɛ̃ ɔ, wa ngɔɛ wa weku ɔ hiami níhi kɛ ye kekle blɔ he pe Yehowa suɔmi nya ní nɛ wa maa pee ɔ. (Mat. 10:​35-37; 1 Tim. 5:8) Be komɛ ɔ, enɛ ɔ peemi ma bi nɛ waa mwɔ yi mi kpɔhi nɛ wa weku li a bua be he jɔe, se jã peemi ma ha nɛ waa sa Yehowa hɛ mi.

12. Benɛ Alexandru kɛ si fɔfɔɛ ko nɛ mi wa kpe ngɛ e weku ɔ mi ɔ, mɛni e pee, nɛ mɛni e pee we?

¹² Mo susu nyɛminyumu Alexandru kɛ e yo Dorina níhi a si kpami ɔ he nɛ o hyɛ. Benɛ a kɛ jeha kake kase Baiblo ɔ, Dorina ma e juɛmi nya si kaa e ma kpa Baiblo ɔ kasemi, nɛ e ngɛ hlae nɛ Alexandru hu nɛ e kpa. Se kɛ̃ ɔ, Alexandru kɛ hɛ si kami kɛ nile tsu ní nɛ e de e yo ɔ kaa e maa ya nɔ nɛ e maa kase Baiblo ɔ. Dorina bua jɔɛ he kulaa, nɛ e bɔ mɔde kaa e maa nyɛ e nɔ konɛ e kpa Baiblo ɔ kasemi. Alexandru tsɔɔ kaa e bɔ mɔde kaa e maa nu e yo ɔ sisi, se e nɛ lɛ gbɔjɔɔ kulaa. Be komɛ ɔ, Dorina tuɔ e hɛ mi munyu, nɛ e haa lɛ munyuhi a heto kpeikpei. Enɛ ɔ ha nɛ e nu he kaa e kpa Baiblo ɔ kasemi. Se Alexandru ya nɔ nɛ e ngɔ Yehowa kɛ ye kekleekle blɔ he, nɛ ngɛ jamɛ a be ɔ mi nɔuu hu ɔ, e je suɔmi kɛ bumi nɛ e mi kuɔ kpo kɛ tsɔɔ e yo ɔ. Ngɛ anɔkuale mi ɔ, e nɔ hyɛmi nɔ́ kpakpa a wo e yo ɔ he wami nɛ e bɔni Baiblo ɔ kasemi ekohu, nɛ nyagbenyagbe ɔ, e ba pɛtɛ anɔkuale ɔ he nɛ e ha nɛ a baptisi lɛ.—Hyɛ video nɛ ji Alexandru Kɛ Dorina Văcar: “Suɔmi Toɔ E Tsui Si, Nɛ E Mi Mi Hi,” nɛ ngɛ munyuyi nɛ ji “Truth Transforms Lives” ɔ sisi ngɛ jw.org ɔ nɔ.

13. Mɛni wa ma nyɛ maa pee kɛ je suɔmi kpo kɛ tsɔɔ Yehowa kɛ wa weku mi bimɛ ɔmɛ?

¹³ Yehowa ji nɔ nɛ to weku sisi nɛ e suɔ nɛ wa ná bua jɔmi ngɛ weku ɔ mi. (Efe. 3:​14, 15) Ke wa suɔ nɛ wa ná bua jɔmi nitsɛnitsɛ ɔ, lɛɛ e sa nɛ waa pee níhi nɛ Yehowa suɔ. Be mi nɛ o ngɛ mɔde bɔe kaa o maa hyɛ o weku ɔ nɔ nɛ o je suɔmi kɛ bumi kpo kɛ tsɔɔ o weku mi bimɛ ɔmɛ ɔ, o ma nyɛ ma ná nɔ mi mami kaa Yehowa bua jɔ níhi nɛ o kɛ ngɛ afɔle sãe konɛ o nyɛ nɛ o sɔmɔ lɛ ɔ he.—Rom. 12:10.

MOO WO NI KPAHI HE WAMI KONƐ A NGƆ A HE KƐ HA KAA BƆ NƐ NAZIR BI ƆMƐ PEE Ɔ

14. Mɛnɔmɛ titli nɛ e sa nɛ waa bɔ mɔde kaa wa maa tu bua womi munyuhi kɛ tsɔɔ mɛ?

¹⁴ E sa nɛ nihi tsuo nɛ a suɔ kaa a ma sɔmɔ Yehowa mwɔnɛ ɔ, nɛ a pee klaalo kaa a maa ngɔ níhi kɛ sã afɔle ngɛ suɔmi nɛ a ngɛ ha Yehowa a he je. Ngɛ anɔkuale mi ɔ, jã peemi be gbɔjɔɔ be komɛ. Mɛni wa ma nyɛ maa pee kɛ ye bua wa sibi konɛ wa nyɛ nɛ wa je he kɛ afɔle sami su nɛ ɔ kpo? Lɔ ɔ ji nɛ wa maa ngɔ wa  munyu tutui kɛ wo wa sibi he wami. (Hiob 16:5) Anɛ ni komɛ ngɛ nyɛ we asafo ɔ mi nɛ a ngɛ mɔde bɔe kaa a maa pee a si himi kpokploo konɛ a nyɛ nɛ a pee babauu ngɛ Yehowa sɔmɔmi mi lo? Anɛ o le nihewi kɛ yihewi komɛ nɛ a ngɛ kã pee konɛ a nyɛ nɛ a je ekpa ngɛ nihi nɛ a sɔmɔ we Yehowa a he ngɛ sukuu, be mi nɛ a nɛ lɛ gbɔjɔɔ po lo? Anɛ o le Baiblo kaseli komɛ kɛ nyɛmimɛ kpahi nɛ a weku li ngɛ si tee kɛ ngɛ mɛ woe, se a ngɛ mɔde bɔe kaa a maa ya nɔ maa ye Yehowa anɔkuale lo? Ke jã a, lɛɛ nyɛ ha nɛ wɔ tsuo waa ngɔ he blɔ fɛɛ he blɔ nɛ wa ma ná a kɛ tu bua womi munyuhi nɛ maa wo nɔ he wami kɛ tsɔɔ mɛ. E sa nɛ wa ha nɛ a le kaa wa bua jɔ kaa a ngɔ a he kɛ sã afɔle nɛ a ngɛ kã pee.—Filem. 4, 5, 7.

15. Mɛni blɔ nɔ nɛ nyɛmimɛ komɛ fĩ nihi nɛ a ngɛ be tsuo sɔmɔmi ní tsumi ɔ tsue ɔ a se?

¹⁵ Be komɛ ɔ, wa ma nyɛ maa pee ní pɔtɛɛ komɛ kɛ ha wa nyɛmimɛ Kristofohi nɛ a ngɛ be tsuo sɔmɔmi ní tsumi ɔ tsue ɔ. (Abɛ 19:17; Heb. 13:16) Enɛ ɔ ji nɔ́ nɛ nyɛmiyo ko nɛ e wa ngɛ jeha mi nɛ e kɛ anɔkuale yemi ngɛ Yehowa sɔmɔe ngɛ Sri Lanka a suɔ nɛ e pee. Benɛ e tsu ní nɛ e ba he jɔɔmi ɔ, a fɔ e pension hiɔwo ɔ nɔ, enɛ ɔ he ɔ, e suɔ nɛ e ye bua yihewi enyɔ komɛ nɛ a kɛ sika he nyagba ngɛ kpee ɔ konɛ a ya nɔ nɛ a tsu blɔ gbami ní tsumi ɔ. Lɔ ɔ he ɔ, e ma e juɛmi nya si kaa e maa ngɔ sika pɔtɛɛ ko kɛ mane mɛ daa nyɔhiɔ konɛ a nyɛ a wo tɛlifoo call nɛ a peeɔ ɔ he hiɔ. Enɛ ɔ ji he kɛ afɔle sami su ko nɛ se be nɛ nyɛmiyo ɔ je kpo.

16. Mɛni wa ma nyɛ maa kase ngɛ Nazir bi ɔmɛ a blɔ nya tomi ɔ mi?

¹⁶ Ngɛ anɔkuale mi ɔ, wa ma nyɛ maa kase níhi fuu ngɛ nɔ hyɛmi nɔ́ kpakpa nɛ Nazir bi ɔmɛ pee ɔ mi! Se kɛ̃ ɔ, blɔ nya tomi nɛ ɔ hu tsɔɔ wɔ nɔ́ ko nɛ sa kadimi wawɛɛ ngɛ wa hiɔwe Tsɛ nɛ ji Yehowa a he. E le kaa wa suɔ nɛ waa je wa tsui mi nɛ waa pee e suɔmi nya ní. Jehanɛ hu ɔ, e le kaa wa pee klaalo kaa wa maa ngɔ níhi kɛ sã afɔle konɛ wa nyɛ nɛ waa ye wa he nɔ jɔɔmi kita nɛ wa kã lɛ ɔ nɔ. Yehowa ha wɔ he blɔ kaa wɔ nitsɛmɛ waa je wa tsui mi kɛ tsɔɔ kaa wa suɔ lɛ. Enɛ ɔ tsɔɔ kaa e woɔ wa hɛ mi nyami. (Abɛ 23:​15, 16; Maak. 10:​28-30; 1 Yoh. 4:19) Nazir bi ɔmɛ a blɔ nya tomi ɔ ha nɛ wa na kaa Yehowa naa níhi nɛ waa kɛ sãa afɔle konɛ wa nyɛ nɛ wa sɔmɔ lɛ ɔ, nɛ e bua jɔɔ he wawɛɛ. Enɛ ɔ he ɔ, nyɛ ha nɛ wɔ tsuo waa fia wa pɛɛ si kaa wa maa ya nɔ ma sɔmɔ Yehowa, nɛ waa ngɔ wa níhi nɛ hi pe kulaa a kɛ ha Yehowa.