1. Иегованыҥ ишчилери алдынаҥ ла бери кандый кӱӱн-санаалу јӱрет?

 СЛЕР Иеговала колбулараарды баалап турганаар ба? Эйе деп, бис алаҥзыбай јадыс! Кӧп ака-эјелер Иеговала колбуларын баалап јадылар (Сар. 104:33, 34). Иегованы акту јӱрегинеҥ сӱӱген улус туку алдынаҥ бери болгон. Олор Иеговага иштеерге болуп, нени-нени артыргызып салатан. Темдектезе, јебрен Израильде назорейлер керегинде куучындажып ийектер. Олор кандый улус болгон? Бис олордоҥ неге ӱренер аргалу?

2. а) Назорейлер кандый улус болгон? (Тоолор 6:1, 2). б) Нениҥ учун кезик израильтяндар назорей болорго сӧзин берген?

² «Назорей» деген сӧс «башкалалганын; учурлалганын» кӧргӱзип турган еврей сӧстӧҥ келген. Бу сӧслӧ Иеговага коркышту тыҥ јӱткӱп, аҥылу иш бӱдӱрген улусты адайт. Моисейдиҥ јасагында айдылганыла, эр де, ӱй де кижи канча да ӧйдиҥ туркунына Иеговага мынайда иштеерге сӧзин берер аргалу болгон a. (Тоолор 6:1, 2 кычырыгар.) Олордыҥ бӱдӱрген ижи тегин израильтяндардаҥ некелбеген. Андый болзо, нениҥ учун кезик улус назорей болорго кӱӱнзеген? Нениҥ учун дезе олор, байла, Иеговага коркышту јаан сӱӱжин ле быйанын кӧргӱзерге кӱӱнзеген болор (Тоол. 6:5; 16:17).

3. Кудайдыҥ бӱгӱнги ишчилери назорейлерге незиле тӱҥей?

³ Назорей болотон арга Моисейдиҥ јасагыныҥ ордына «Христостыҥ Јасагы» иштеп баштаарда токтоп калган (Гал. 6:2; Рим. 10:4). Је бӱгӱнги кӱнде Иегованыҥ ишчилери јебрен ӧйдӧги назорейлер ле чилеп,  ого бастыра јӱрегинеҥ, анайда ок бастыра санаазын, бастыра кӱчин ле бастыра бойын берип, иштеерге кӱӱнзейт (Марк 12:30). Бис мынайып иштеерис деп, Иеговага учурланып јаткан тужыста сӧзисти бередис. Мынайып, Иеговага багынарга ла ого иштеерге, нени-нени артыргызарга белен болгонысты кӧргӱзедис. Назорейлердиҥ темин шиҥдеп, учурланганыс аайынча канайып јӱрери јанынаҥ тузалу ӱредӱ аларыс (Матф. 16:24) b. Кезик темдер кӧрӱп ийектер.

НЕНИ-НЕНИ АРТЫРГЫЗАРГА БЕЛЕН БОЛЫГАР

4. Тоолор 6:3, 4-лӧ болзо, назорейлер нени этпеске белен болгон?

⁴ Тоолор 6:3, 4 кычырыгар. Назорейлер кандый ла аракыдаҥ, виноградтаҥ эдилген курсактаҥ, изюмнеҥ јибес учурлу болгон. Је бу аш-курсактаҥ назорей эмес израильтяндар јиир, ичер аргалу болгон. Нениҥ учун дезе кызыл аракы Кудайдыҥ улуска берген сыйларына кирет. Керек дезе Агару Бичикте аракы «кижиниҥ јӱрегине сӱӱнчи берип турган» деп айдылат (Сар. 104:14, 15). Бу аш-курсакты јииринде јаман неме јок то болзо, назорейлер оны ӧнӧтийин јибейтен c.

5. Мадиан ла Марсела кандый солынталар эткен ле нениҥ учун?

⁵ Јебрен ӧйдиҥ назорейлери чилеп, Иеговага кӧптӧдӧ иштеерге бис те та нени де солыыр аргалу. Мадиа́н ла Марсе́ла d деп эш-нӧкӧрлӧрдиҥ учуралын кӧрӱп ийектер. Олор арга-чакту јаткан. Мадиан јакшы иште иштеген, олор јараш, јакшы квартирада јаткан. Је олор Иеговага кӧптӧдӧ иштеерге кӱӱнзеген. Олор куучындайт: «Бис акчабысты јаан ӱребей барганыс. Оноҥ кичинек квартирадӧӧн кӧчӱп алганыс, анайда ок машинабысты садып ийгенис». Канайып сананадаар, Мадиан ла Марсела мындый солынталарды эдер учурлу болгон бо? Јок. Је мындый арга олорго Иеговага кӧптӧдӧ иштеерге болушкан. Мынаҥ олор сӱреен јаан сӱӱнчи алган.

6. Христиандар нениҥ учун солынталар эдет? (Јурукты база кӧрӱгер.)

⁶ Бӱгӱнги кӱнде христиандар кӧгӱс  ишке кӧптӧдӧ туружарга, нени-нени солыырга белен болгылайт (1 Кор. 9:3—6). Је Иегова мыны олордоҥ некебей јат. Ака-эјелердиҥ Иеговага иштеерге болуп артыргызып турган немелеринде јаман ла неме јок. Темдектезе, кезик ака-эјелер сӱӱген иштӱ, јакшы туралу ла айылында тынду азыраар арганы тузаланбаган. А кезиги дезе кандый да ӧйгӧ биле тӧзӧбӧскӧ лӧ бала азырабаска сананып алгандар. Кезиги дезе, узак ӧйгӧ јууктарыла кӧрӱшпес те болзо, јарчылар јетпей турган јердӧӧн кӧчӧ бергендер. Бис мындый солынталарды Иеговага эҥ артыгын берерге турганыс учун эдедис. Ундыбагар, Иегова слердиҥ эткен солынталараарды јаан да, кичинек те болзын, сӱреен баалап јат (Евр. 6:10).

УЛУСТАҤ БАШКА БОЛОРГО БЕЛЕН БОЛЫГАР

7. Назорейде кандый кӱчтер болордоҥ айабас болгон? (Тоолор 6:5). (Јурукты база кӧрӱгер.)

⁷ Тоолор 6:5 кычырыгар. Назорейлер бойыныҥ чачын кайчылабаска сӧзин беретен. Анайып, олор Кудайга бӱткӱл багынып турганын кӧргӱскен. Олордыҥ назорей болгоны удай берзе, чачы узап калатан. Айландыра улус олорды тооп турза, олорго назорей болорго јеҥил болгон. Је Израильдиҥ тӱӱкизин кӧрзӧ, кезикте израильтяндар олорды тообой туратан. Судурчы Амостыҥ ӧйинде Кудайдаҥ јана баскан израильтяндар андый улуска, Кудайга берген сӧзине туруп болбозын деп, кызыл аракы ичиртерге туратан (Ам. 2:12). Оныҥ учун кезикте назорейлерге берген сӧзине турарга, јалтанбас болор керек болгон.

8. Беньяминниҥ учуралы кӱӱнеерди канайып кӧдӱрди?

⁸ Иегованыҥ болужыла уйалчаҥ да кижи улустаҥ башка болорго коркыбас аргалу. Норвегияда јадып турган 10 јашту Бе́ньямин деп карындаштыҥ учуралын кӧрӱп ийектер. Оныҥ школында Украинадагы јуу-согушты јӧмӧжӧтӧн мероприятие ӧткӧн. Ол кӱнде школдо ӱренип турган балдар Украинаныҥ флагында бар ӧҥдӧрлӱ кийим кийеле, кожоҥ кожоҥдоор учурлу болгон. Бистиҥ карындаш ол церемония ӧдӧтӧн јерге јууктабас деп сананып алган. Је ӱредӱчи оны кӧрӱп ийеле, мынайда кыйгырып ийген: «Кел бери! Бисле кожо кожоҥдо! Бис ончобыс сени сакып јадыс» Беньямин дезе ӱредӱчиге јууктап келеле: «Бу политикала колбулу церемония, мен ого турушпазым. Иегованыҥ кӧп Керечилери јуулашпаска  турганы учун тӱрмеде отурат» — деген. Ӱредӱчи Беньяминниҥ айтканыла јӧпсинип, оны божодып ийген. Је оноҥ оныла кожо ӱренип турган балдар нениҥ учун ол олорло кожо кожоҥдобогон деп сурап баштагандар. Оноҥ улам бистиҥ карындаш тыҥ ӧкпӧӧрип, арай ла болзо, ыйлай бербеген. Андый да болзо, ол јалтанбай, ӱредӱчиге нени айтканын бастыра класска ойто катап айдып берген. Кийнинде Беньямин ада-энезине Иегова ого бӱдӱмјизин корулаарга канайып болужып бергенин куучындап берген.

9. Бис Иегованы канайып сӱӱндирер аргалу?

⁹ Бис Иегованыҥ табыла јӱрерге кӱӱнзеп турганыстаҥ улам бу телекейдиҥ улузынаҥ башка болуп јадыс. Оныҥ учун Иегованыҥ Керечизи болуп турганысты школдо до, иште де коркыбай айдып турарга албаданадыс. Је телекейдеги улустыҥ кӧрӱм-санаазы там ла јаман болуп барадарда биске библиялык принциптерле јӱрерге ле сӱӱнчилӱ јарды јарлаарга оноҥ кӱч болордоҥ айабас (2 Тим. 1:8; 3:13). Оныҥ учун Иеговага иштебей турган улустаҥ башка болорго коркыбай турзаас, Иегова Кудайысты сӱӱндирерис деп ундыбай јӱректер (Укаа 27:11; Мал. 3:18).

ИЕГОВАНЫ БАШТАПКЫ ЈЕРГЕ ТУРГУЗЫГАР

10. Тоолор 6:6, 7-де бичилген некелте назорейлерге нениҥ учун јаан ченелте болгон болор?

¹⁰ Тоолор 6:6, 7 кычырыгар. Божоп калган кижиге назорей јууктабас учурлу болгон. Бу некелтени бӱдӱрерге бир јанынаҥ кӱч ле эмес ошкош, је библиялык ӧйлӧрдӧ назорейге, анчада ла јуук кижизи божозо, бу јаан ченелте болгон. Кижини јууйтан чӱм-јаҥла болзо, улус божогон кижиниҥ јанында болор учурлу (Иоанн 19:39, 40; Ап. ижи 9:36—40). Је назорейлер бу чӱм-јаҥды бӱдӱрбеген. Олорго ачу да болгон болзо, олор Иеговага берген сӧзинеҥ тудунып, бек бӱдӱмјизин кӧргӱскен. А Иегова дезе бойыныҥ чындык ишчилерине бу коркышту кӱч ченелтени ӧдӧргӧ болушкан.

11. Христиан кижиге биледеги молјуларын бӱдӱрип тура, нени ундыбас керек? (Јурукты база кӧрӱгер.)

¹¹ Бис Иеговага учурланганысты сӱреен баалап јадыс. Оныҥ учун билегистеги кандый бир сурактардыҥ аайына чыгып јатсаас, мыны ундыбаска  албаданадыс. Биледеги молјуларысты бӱдӱрип тура, улузыстыҥ кӧрӱм-санаазы Кудайдыҥ некелтелеринеҥ ажа конбозын деп кӧрӱп турар керек (Матф. 10:35—37; 1 Тим. 5:8). Је кезикте кандый бир керекти Иегованыҥ кӧрӱмиле этсеес, тӧрӧӧндӧриске јарабай калат.

12. Александру билезинде јеҥил эмес айалга боло берерде нени эткен?

¹² Эмди дезе Алекса́ндру ла оныҥ ӱйиниҥ Дори́наныҥ учуралын кӧрӱп ийектер. Олор Агару Бичикти бир јыл кире ӱренгилеген. Је оноҥ Дорина Агару Бичикти ӱренбезим деген, ӧбӧӧнин де токтотсын деп айткан. Је ӧбӧӧни ого јымжак эдип, оноҥ ло ары ӱренерим деп айдарда, Доринага бу јарабаган. Оноҥ улам ол ӧбӧӧнине кандый ла буудактар эдип баштаган. Александру ӱйи ого нениҥ учун мынайда баштанып турганын оҥдоорго албаданган. Је бу јеҥил болбогон. Дорина ого кату ла јаман баштанып турза, оныҥ Агару Бичикти ӱренетен кӱӱни ӧчӧ беретен. Је Александру Иегованы јӱрӱминде оноҥ ло ары баштапкы јерге тургузып, ӱйин сӱӱрге ле ого тоомјылу баштанарга албаданган. Дорина мыны кӧрӱп, учы-учында Агару Бичикти ойто ӱренип баштаган, а кийнинде сууга чӧҥӱрилген. (jw.org сайтта «Чындык јӱрӱмди солыйт» деген рубриканаҥ «Александру и Дорина Вэкар. „Любовь долготерпелива и добра“» деген видеоны кӧрӱгер.)

13. Бис Иегованы да, билегисти де канайып сӱӱр аргалу?

¹³ Билени Иегова тӧзӧгӧн (Эф. 3:14, 15). Оныҥ кӱӱнзегениле, биле сӱӱнчи экелер учурлу. Оныҥ учун чыннаҥ ла ырысту болорго, Иегованыҥ берген јакылтазын бӱдӱрип туругар. Биледеги јуук улузаарды кичееп ле олорды сӱӱп, тоомјылу баштанып туругар (Рим. 12:10). Иегованы сӱӱндирерге албаданып турганаарды ол баалап турган деп бир де алаҥзыбагар.

БОЙ-БОЙООРГО НАЗОРЕЙЛЕРДИЙ БОЛОРГО БОЛУЖЫГАР

14. Кемдерди анчада ла мактап турар керек?

¹⁴ Иеговага јаҥы иштеп баштаган ака-эјелер Кудайды сӱӱп турганынаҥ улам нени-нени артыргызарга белен болгылайт. Је бу кезикте јеҥил эмес болот. Бой-бойыска оноҥ ло ары мындый кӱӱн-санаалу болорго, бис канай болужарыс? Кӱӱнисти кӧдӱрер сӧстӧр айдып турарыс (Иов 16:5). Слердиҥ јуунда Иеговага кӧптӧдӧ иштеерге, јӱрӱмин јеҥилткен ака-эјелер бар ба? Эмезе  школдо јеҥил эмес те болзо, балдардаҥ башка болорго коркыбай турган јииттерди билереер бе? Анайда ок билезинде удурлажулар да болуп турган болзо, Иеговага чындык артып турган ака-эјелер эмезе Агару Бичикти ӱренип турган улус бар ба? Олорды ончозын јалтанбазы учун ла Иеговага иштеерге болуп јӱрӱмин солыганы учун мактап туругар (Флм. 4, 5, 7). Олордыҥ кӱӱнин кӧдӱрер арганы качан да божотпой турактар.

15. Кезик ака-эјелер ӧйин толо берип иштеп тургандарга канайып болужадылар?

¹⁵ Бис кезикте Иеговага ӧйин толо берип иштеп турган ака-эјелерге болужып турар аргалу (Укаа 19:17; Евр. 13:16). Андый болушты Шри-Ланкада јадып турган јажы јаанап калган бир эје эткен. Оныҥ пенсиязы кӧптӧй берерде, ол пионер болуп турган эки сыйынга ай сайын акчала болушкан. Нениҥ учун дезе олордо акчала кӱчтер болгон. А бу эје дезе ол сыйындарды оноҥ ло ары пионер болуп иштезин деп кӱӱнзеген. Кандый јакшы тем дезеер!

16. Назорейлердеҥ бис неге ӱренип алдыс?

¹⁶ Назорейлердиҥ Иеговага акту кӱӱнинеҥ иштеерге, та нени де артыргызарга белен болгоны биске сӱреен јаан тем болот! Бого ло коштой олор керегинде тереҥжиде шӱӱжеле, Иегованы оноҥ јакшы билип алдыс. Иегова бисти, Кудайысты акту кӱӱнистеҥ сӱӱндирерис деп ле учурланганыс аайынча јӱрерге, нени-нени артыргызарга белен болорыс деп, бир де алаҥзыбай јат (Укаа 23:15, 16; Марк 10:28—30; 1 Иоанн 4:19). Кажы ла кижи Иеговага сӱӱжин канайып кӧргӱзерин бойы кӧрӧт. Мынайып, Иегова биске јаан кӱндӱ эткен. Ого болуп эткен керектеристи Иегова кӧрӱп јат ла баалап јат. Оныҥ учун Иеговага эҥ артыгын берип, ого оноҥ ло ары иштенерге албаданактар!