1. Nolitengan tahanini, midokoay ci Yihofaan a tamdaw iraay ko masamaanay ngaˈayay a waywayan?

 MAOLAHAY kiso ci Yihofaan han? Maedeng saan ko sowal iso: “Maolahay kako ci Yihofaan.” Mikitini nolitengan tahanini, ˈalomanay tamdaw mahecaday tisowanan tangongolay ko olah ci Yihofaan. (ˈOlic 104:​33, 34) ˈAlomanay tamdaw pakayniay pidoko ci Yihofaan a kinafalah, nolitengan Israil Micidekay a tamdaw o mahaenay. O cima ko Micidekay a tamdaw hani? Mikitini cangranan mamananam ita ko maanan?

2. (1) Cima ko Micidekay a tamdaw hananay? (Saˈosi 6:​1, 2) (2) O romaroma Israil tamdaw hano miketon to sowal malo Micidekay a tamdaw hani?

² Mihongyakan to ‘Micidekay a tamdaw’ a Hipray sowal tatodong i, ‘Mipiliˈan a tamdaw’ ‘Pafafidaˈan a tamdaw’ ‘Patafangay a tamdaw.’ Fanekfekay ko falocoˈ no Micidekay a tamdaw midoko ci Yihofaan, midemakay cangra to pina kinafalahay a demak, tano mikiriwiˈay a pakayraan matayal saki Yihofaan. Mikitini saˈosi no Rikec ni Mosi, ano faˈinayanto fafahiyanto wa ngaˈay pasayra ci Yihofaan miketon to sowal, malo Micidekay a tamdaw to cecay a liyad. a (ˈOsien ko Saˈosi 6:​1, 2.) O cecay tamdaw mikifalocoˈ a miketon to sowal mamalo Micidekay a tamdaw ko niyah ikor, mamidofdof to cowa ko dadofdofen no kalo a Israil tamdaw a misaˈosian. Mihaenay, o romaroma Israil tamdaw hano makahi malo Micidekay a tamdaw hani? O lalangian i, pakayniay noka olah ci Yihofaan, hanaca miakoˈid to kadofahay sapalemed ni Yihofa cangranan.​​—⁠Limoˈot 6:5; 16:⁠17.

3. Aniniay a finawlan no Kawas ato Micidekay a tamdaw iraay ko maanan kalalecadan han?

 ³ Anini awaayto ko Micidekay a tamdaw a limasmas, samanen o ‘rikec ni Kristo’ mikotayayto to Rikec ni Mosi. (Kalatiya 6:2; Loma 10:⁠4) Kawra o makapahay a harateng no Micidekay a tamdaw padadotocay a materek. Anini, o finawlan ni Yihofa makalimay misarocod to falocoˈ, harateng, ˈicel, tano polong a ˈorip matayal saki Yihofaan, mansa makahi pasayra ci Yighofaan miketon to sowal patafang to tireng. (Marko 12:30) Sapidofdofaw kita tonini a miketonan a sowal, o mamitoor to araaw ni Yihofa maˈorip, makahiho midemak to kinafalahay a demak. Mihaenay, nengnengen ita samaanay ko Micidekay a tamdaw midoedo to miketonan nangra a sowal, tataˈangay ko sapadama kitanan. b (Matay 16:24) Nengnengen ko pina tinakoan.

MAKAHI MIDEMAK TO KINAFALAHAY

4. Mikitini Saˈosi 6:​3, 4, Micidekay a tamdaw mamikinafalah to maanan hani?

⁴ ˈOsien ko Saˈosi 6:​3, 4. Micidekay a tamdaw cowa ka ngaˈay komaen to epah, cowa ka ngaˈay komaen to heci no fadisosoˈ a kilang, mahawpay ko faelohay fadisosoˈ ato maˈicangay a fadisosoˈ. Italiyokay nangra a tamdaw ngaˈayay mararid komaen to hatiniay a kakaenen, ngaˈayayho komaen to epah, samanen mihaen to demak cowa ko mararaway. Soˈlinay haw i, sowal no Fangcalay Cudad, o epah o sapatelong no Kawas, ngaˈayay ‘palipahak to falocoˈ.’ (ˈOlic 104:​14, 15) Nikawrira, hayi sanay ko Micidekay a tamdaw a kinafalah, eca ka komaen to mahaenay a dafong. c

5. Makahiay ci Mitien aci Masayla kinafalah to maanan? Misamaanay?

⁵ Malecad o Micidekay a tamdaw, makalimay kita sapitongalaw to tayal saki Yihofaan, mansa hayi sa a kinafalah. Nengnengen ko tinakoan no mararamoday ci Mitien aci Masayla. d Iraay ko adihayay ko lifon a tayal ni Mitien, itiniay cangra i makapahay a lomaˈ mikilomaˈ, sinowayay ko kaˈorip. Kawra, makalimay cangra adihay ko tayal saki Yihofaan, oranto i, misaˈosiay mifalic to kaˈorip. Sanay cangra: “Misatapangay kami milowan to mapalakay a payci, malinahayho tayra i kaemingay a lomaˈ, pacakayanho ko paliding niyam.” Ci Mitien aci Masayla na ngangaˈay eca ka pihaen a kinafalah, kawra mipiliˈay cangra mihaen to demak, pakayniay sakaadihayaw ko tayal saki Yihofaan. Mihaen to demak pairaay to karenec no falocoˈ ato kalipahak nangra.

6. Aniniay a Krisciyang hano makahiay a mikinafalah? (Nengnengen ko coka.)

 ⁶ Anini, ˈalomanay a salikaka sapitongalaw to toki a matayal saki Yihofaan, makahiay a kinafalah to niyah, mihaenay i, tada lipahakay ko falocoˈ nangra. (1 Korinto 9:​3-6) O roma tamdaw misawaday to adihayay ko lifon a tayal, o roma tamdaw pacakayay to lomaˈ, o roma tamdaw misawaday pakaen to kaolahan a pinaˈorip no lomaˈ, ˈalomanay tamdaw cowa ka kaliki ciraramod anca ciwawa. Iraayho ko roma salikaka malinahay tayra i misaaliay to mitosilay a kitiraan a matayal, telocto cowa ka rarid malacafay to paro no lomaˈ ato widang. Soˈlin misawadan no salikaka cowa ko tatiihay a dafong, cowa pasowal ci Yihofa kitanan to mamihaen a kinafalah ko Krisciyang. Makahi kita mihaen to demak, pakayniay i sapipatafangaw to sangaˈayay no niyah ci Yihofaan. Haratengen, o kinafalah iso pakayni ci Yihofaan ano o taˈangayay anca mimingay, tada misalimlaan ni Yihofa maemin.​​—⁠Hipray 6:​10.

TIMOLO A CAKA LECAD TO ˈALOMANAY

7. O Micidekay a tamdaw mitoor to miketonan a sowal i, mamisiˈayaw to maanan a pasangar alatek? (Saˈosi 6:⁠5) (Nengnengen ko coka.)

⁷ ˈOsien ko Saˈosi 6:⁠5. O Micidekay a tamdaw maharek miketon to sowal cowato ka ngaˈay mikalatim to fokes, sakoˈedaw han ko fokes. Tahapinangan konini misarocoday cangra midofdof ci Yihofaan. Halafinto cangra malo Micidekay a tamdaw, mamangalef ko koˈedaw no fokes, maˈaraw no tao tangsol mahapinang o Micidekay a tamdaw cangra. Itatihiay a tamdaw ano midamaay cangranan midofdof to miketonan a sowal, sakaecaaw ka lecad to ˈalomanay mamadoloto. Kaadayayan i, itini pina laliyadan no likisi, ˈalomanay a Israil tamdaw cowa pidama cowa pikangodo to ilalomaˈay nangra a Micidekay a tamdaw. Tinakoen itini lintad no pairasolay ci Amosan, mitowakangay a Israil tamdaw ‘padadotocay miala to epah pananom to Micidekay a tamdaw,’ miowing cangranan misafelit to miketonan a sowal. (Amos 2:​12) Sapidofdofaw ko Micidekay a tamdaw to miketonan a sowal, eca ka lecad to ˈalomanay, nolatekay misaaliay to timoloay a falocoˈ.

8. Mikitini nalifetan ni Pencimin macadaay iso ko maanan a sapakalalok?

⁸ Pakayni pitiˈer to sapadama ni Yihofa, soˈlin halingodoay ko pinangan ita, wa ngaˈay timolo eca ka lecad ko pidemak to ˈalomanay. Nengnengen ko tinakoan ni Pencimin. O 10 mihecaan kaemangay faˈinayan salikaka cingra, itiniay i Nowi ko kitiraan. Kinacecayay misikayay ko picudadan to cecay demak, parikoˈan ko kaemangay to mahecaday to kodong no tatafing no Okeran a rikoˈ, malacafay a romadiw, midama to malalooday a Okeran. Ci Pencimin cowa ka kahi mirienang to midamaay tono kitakit a demak, oranto i, ira:ayay cingra a tomireng. Maˈaraway no cecay singsi cingra, celiˈ sanay a somowal:  “Kalikien tayni, tatala sanay kami tisowanan!” Tayra i kaˈayaw no singsi ci Pencimin, timoloay a mitadtad: “Misatenokay ko saaroˈan no mako, cowa ko mamirienang to mirikecay a demak. ˈAlomanay Misawacayay Tamdaw ni Yihofa pakayni noka eca pirienang to milooday a mapalit.” Mihaiay ko singsi eca ka pirienang ci Pencimin. Kawra, misatapangay ko cafay micudad milicay cingranan, hano caka mikihatiya cangranan a midemak. Sakatomangicaw sanay ci Pencimin a marawraw, kawra kamayan timolo cingra mihadak to nano sowal ningra to singsi i cafacafay micudad. Ikor pasowalan ni Pencimin ko wama wina, o ci Yihofa ko mipadamaay cingranan timolo a mitadtad to pihakelongan no niyah sanay ko piharateng ningra.

9. Sasamaan ko pidemak ita a pakahemek to falocoˈ ni Yihofa?

⁹ Mipiliˈay kita midofdof ci Yihofaan, mansa cowa ka lecad to italiyokay a tamdaw. Ano itiniay i picudadan anca katayalan, misaaliay kita to timolo ngaˈ ngaˈay pasowal to tao o Misawacayay Tamdaw ni Yihofa ko niyah. O roma i, mapelalay ko waywayan no tamdaw, tatiih tatiihay ko pakayraan, sapikiemelaw kita mitoor to safalod no Fangcalay Cudad a maˈorip hanaca mitenak to ngaˈayay lihaf, malingaday ko pasangar alatek. (2 Timoti 1:8; 3:​13) Kawra aka mapawan, misaˈicel kita misiwatik to cowa pidoko to Kawas a tamdaw, timolo a caka lecad to ˈalomanay, wa ngaˈay palipahak to falocoˈ ni Yihofa.​​—⁠Taneng 27:11; Malaki 3:​18.

PAISALAKATEN CI YIHOFA

10. O Micidekay a tamdaw mamitoor to sowal itini Saˈosi 6:​6, 7 a midemak, hano cowa ko madoloay alatek?

¹⁰ ˈOsien ko Saˈosi 6:​6, 7. Micidekay a tamdaw cowa ka ngaˈay miingid to mapatayay a tamdaw. Hato cowa ko pasangaray a demak tengilen, kawra ano o salawina no niyah ko mapatayay i, midofdof toniya sarikec cowato ko madoloay. Itini i lintad no Fangcalay Cudad, adihayay mitademay nanaman milingatay to miingiday to tireng no mapatayay, kawra o Micidekay a tamdaw cowa ka ngaˈay mitoor toniya nanaman a midemak. (Yohani 19:​39, 40; Dmak 9:​36-​40) Soˈlin mapatayay ko salawina tada mararomayto, kawra kamayan kiemel ko Micidekay a tamdaw mitoor to miketonan a sowal no niyah, paihkal to tanektekay a pakasoˈlinay a falocoˈ. Maedeng midamaan ni Yihofa koniya madimadiay midoko Cingranan a tamdaw, padama cangranan ira ko ˈicel miremo to hatiniay a sapalifet.

11. Itini pisaˈosi to demak no paro no lomaˈ, o Krisciyang mamisamaan misetek to falocoˈ hani? (Nengnengen ko coka.)

¹¹ Malo Krisciyang, mamisaˈicel kita mitoor to sapalimoˈot no Fangcalay Cudad midimokos to saali no paro no lomaˈ, kawra o mamisakareteng  kita minengneng to mipatafangay to tireng a miketonan a sowal. O tatodong i, ano misaˈosi to demak i, cowa ko papaisalakaten ko saali no paro no lomaˈ to saali ni Yihofa. (Matay 10:​35-​37; 1 Timoti 5:⁠8) Mihaenay haw i, sapakahemekaw ci Yihofaan, o midemakan anca misaˈosian ita cowa ka hemek ko paro no lomaˈ alatek, mihaen to demak malecaday o kinafalahay konini.

12. Misiˈayaw to pisafelit no fafahi i, midemakay ci Alisantero to maanan? Cowa pisamaan ko demak ningra?

¹² Nengnengen ko tinakoan ni Alisantero ato fafahi ningra ci Tolina. Minanam cangra mararamod to Fangcalay Cudad cecay miheca ikor, misawaday ci Tolina minanam to Fangcalay Cudad, harateng ningra misawad ci Alisantero minanam sanay. Kawra cowa ka sapisawadaw ci Alisantero, damsayay cingra pasowal to fafahi papadotoc cingra minanam to Fangcalay Cudad. Tada maketeray ci Tolina, pacieciayho to faˈinay misawad minanam to Fangcalay Cudad. Sanay ko sowal ni Alisantero, sakacipinangaw cingra hano mahaen ko harateng no fafahi, kawra pasangaray cingra cipinang. Cecay liyad, kakapoˈi hananay ni Tolina cingra, milikaf cingranan. Miharatengay to sapisawadaw cingra, kawra padotocay cingra kiemel, paisalakat ci Yihofaan i nokaˈorip. Hanaca, padotocay cingra paihkal to olah ato pikangodo to fafahi. Salikor o ngaˈayay taˈarawan ningra mitemeray to falocoˈ no fafahi. Miliyaway misatapang ci Tolina minanam to Fangcalay Cudad, ikor micadaay cingra to paputisem.​​—⁠Nengnengen ko jw.org wangcan “Mifalicay to Kaˈorip ko Soˈlinay Kimad” a lalakaw Alisantero aci Tolina: “Olah, O Mihadidiay O Siniˈadaay” kamotoˈay a ika.

13. Sasamaan kita paihkal to maolahay ko niyah ci Yihofaan ato paro no lomaˈ?

¹³ O paro no lomaˈ ci Yihofa ko patirengay, maedeng makalimay Cingra lipahak ko paro no lomaˈ ita. (Ifiso 3:​14, 15) Ano sapilifokaw kita to soˈliˈlinay a lipahak, o mamitoor to pakayraan ni Yihofa a maˈorip. Sayaren iso ko falocoˈ, ano mikinafalah kiso matayal saki Yihofa, hanaca misongilaˈ a midimokos to paro no lomaˈ, tano ciolahay falocoˈ ato mikangodoay a waywayan micada cangranan, o papaifalocoˈen ni Yihofa konini demak.​​—⁠Loma 12:⁠10.

MASASIPAKALALOK, MALACAFAY MINANAM TO MICIDEKAY A TAMDAW

14. Cima ko kakiriwiˈen ita a pakalalok hani?

¹⁴ Anini, polong midokoay ci Yihofaan a tamdaw sahtoay o maolahay Cingranan, aitini i maanan a demakan mikinafalah, kawra mihaen to demak cowa ko madoloay nolatekay. Sasamaan kita madadama, ho ngaˈay maremo no ˈalomanay konini hani? O pakayraan i, somowal to pakalalokay a sowal. (Yopu 16:⁠5) Itini kasakopang iso, iraay ko papina sapitongalaw to tayal saki Yihofaan misaˈicelay mikantang to kaˈorip han? Iraay ko papina kaemangay taˈangayay ko macadaay a  saroero i picudadan, kawra kamayan makahi eca ka lecad to ˈalomanay, timolo a patalahkal to saaroˈan no Krisciyang han? Iraay ko papina salikaka anca pakingkiwan mihadidiay to pisafelit no paro no lomaˈ, misaˈicelay madimadi ci Yihofaan han? Nanay sakadademaken ita ko kahacecay toki pakalalok tonini a kanonoˈan a widang, pasowal cangranan, tada masemeray kita to katimolo nangra, masemerayho cangranan makahi pakayni ci Yihofaan mikinafalah.​​—⁠Filimon 4, 5, 7.

15. O roma tamdaw samaanay midama to mieminay to toki matayal saki Kawas a salikaka?

¹⁵ Latekay, wa ngaˈay kita ciepoc ko pipadama to mieminay to toki matayal saki Kawas a salikaka. (Taneng 19:17; Hipray 13:16) Itini Solilanka, cecay madimadiay matoˈasay fafahiyan salikaka makalimay mihaen to demak. Mafanaˈ cingra to matongalay ko sapafeli no sifo tono malitengay a payci i, maharatengay ningra i kasakopang iraay ko tatosa kaemangay misakafah a fafahiyan salikaka cangoˈotay ko sakaˈorip. Sapidamaaw cingra cangranan padadotoc misakafah, misaˈosiay to folafolad pafeli cangranan to mamang a payci sapateli tono tingwa. Paihkalay konini a fafahiyan salikaka to fangcalay a harateng!

16. Ngaˈayay kita mikitini nolitengan Micidekay a tamdaw a limasmas minanam to maanan?

¹⁶ Nolitengan makahiay malo Micidekay a tamdaw a Israil tamdaw patirengay to ngaˈayay taˈarawan, o ngangaˈay kita minanam cangranan. Roma i, o Micidekay a tamdaw a limasmas padamaay kitanan matongal ko kafanaˈ to kakarayan Wama ci Yihofaan. Mafanaˈay Cingra makalimay kita pakahemek Cingranan, pakasoˈlinay to makalimay kita a mikinafalah, midofdof to miketonan a sowal patafang to tireng. Mikangodoay Cingra kitanan, paira to hatoki ita mipiliˈ to sasamaan paihkal to olah no niyah Cingranan. (Taneng 23:​15, 16; Marko 10:​28-​30; 1 Yohani 4:​19) Mahapinangay no mita, o mamisinanot ci Yihofa to pikinafalah ita pakayra Cingranan, hanaca misalimlaay a minengneng. Nanay kita maemin misetek to falocoˈ padadotoc midoko ci Yihofaan, mikifalocoˈay makahi patafang i Cingranan to sangaˈayay no niyah.