1. Finshi ababomfi ba kwa Yehova baipeelesha ukucita ukutula fye na kale?

 BUSHE mwalitemwa sana Yehova? Ukwabula no kutwishika mwalimutemwa sana! Kabili te imwe mweka mwamutemwa. Ukutula na kale, abantu abengi sana nabo balitemwa Yehova. (Amalu. 104:​33, 34) Abantu abengi bali-ipeelesha pa kuti balepepa Yehova. Ifi fine e fyo na bena Israele ba ku kale abo baleita ukuti abaNasiri baleipeelesha. Bushe abaNasiri bali ni bani, kabili finshi twingasambilila kuli bena?

2. (a) Bushe abaNasiri bali ni bani? (Impendwa 6:​1, 2) (b) Mulandu nshi abena Israele bamo balesalilapo ukulapa umulapo wa buNasiri?

² Ishiwi lya kuti “umuNasiri,” lyafuma kwi shiwi lya ciHebere ilipilibula ukuti “Uo Bapaatulako” nelyo “Uwaipeela.” Ili ishiwi lilondolola abena Israele bamo abali abacincila abaleipusulako fimo pa kuti balebombela Yehova mu nshila yaibela. Amafunde ya kwa Mose yalesuminisha umwaume nelyo umwanakashi ukulapa umulapo kuli Yehova uwa kusalapo ukuba umuNasiri pa nshita imo. a (Belengeni Impendwa 6:​1, 2.) Uyu mulapo walepilibula ukuti umwina Israele ali no kulakonka amafunde yamo ayo abena Israele banankwe bashalekonka. Nomba mulandu nshi umwina Israele alefwaila ukulapa umulapo wa kuba umuNasiri? Ico umwina Israele alesalilapo ukulapa uyu umulapo nalimo ni co alitemenwe sana Yehova, kabili alefwaya ukumutasha pa fyo amupaalile.—Amala. 6:5; 16:17.

3. Bushe abantu ba kwa Lesa muno nshiku baba shani nga abaNasiri?

 ³ Ilyo “ifunde lya kwa Kristu” lyapyene Amafunde ya kwa Mose, abantu ba kwa Yehova balilekele ukulapa umulapo wa kuba abaNasiri. (Gal. 6:2; Rom. 10:4) Na lyo line nga filya fine abaNasiri bali, abantu ba kwa Yehova muno nshiku nabo bene, balafwaisha ukubombela Yehova no mutima wabo onse, no mweo wabo onse, no kutontonkanya kwabo konse, na maka yabo yonse. (Marko 12:30) Tulalapa umulapo kuli Yehova nga twaipeela kuli ena. Tulanga ukuti tulesunga uyu mulapo nga tuleipeelesha ukucita ifyo Yehova afwaya, kabili nga tuleipeelesha ukumubombela. Nga twaishiba ifyo abaNasiri balecita pa kuti basunge umulapo wabo, na ifwe kuti twasambililako ifyo twingacita pa kuti tulesunga umulapo wesu. b (Mat. 16:24) Natulandeko pali fimo ifyo abaNasiri balecita ifyo twingasambililako.

MULEITEMENWA UKUIPUSULAKO FIMO

4. Ukulingana na Impendwa 6:​3, 4, finshi nalimo fyali no kulenga cakosela umuNasiri ukusunga umulapo wakwe?

⁴ Belengeni Impendwa 6:​3, 4. AbaNasiri tabalingile ukunwa ubwalwa, nelyo ifili fyonse ifyalefuma ku mwangashi, pamo nga ifisabo fya myangashi ifibishi nelyo ifyayanikwa. Abantu abo baleikala nabo balelya no kunwa ifya musango uyu pantu cali fye bwino. Baibo ilanda ukuti “umwangashi uulenga umutima wa muntunse umwina kufwa ukusekelela,” bupe ubo Lesa apeela abantu. (Amalu. 104:​14, 15) Lelo abaNasiri bali-itemenwe ukuipusula ifintu fya musango uyu. c

5. Finshi ba Madián na ba Marcela baitemenwe ukuipusula, kabili cinshi calengele?

⁵ Na ifwe bene tulaipeelesha pa kuti tulebombela sana Yehova nga filya fine abaNasiri balecita. Natulandeko pe lyashi lya ba Madián na ba Marcela. Aba Bena Kristu abaupana, baleikala fye bwino. Ba Madián balebomba incito iisuma sana iyalengele baleikala mu ng’anda iisuma sana. Lelo balefwaya ukulabombesha mu mulimo wa kwa Yehova. Pa kuti batendeke ukulabombesha, balyalwileko fimo. Batile: “Twalilekele ukulabomfya indalama ishingi, twakuukile mu ng’anda iinono, kabili twalishitishe motoka yesu.” Ifi bacitile takwali nangu bamo ababapatikishe, lelo baitemenwe fye abene pa kuti balebombesha mu mulimo wa kwa Lesa. Ba Madián na ba Marcela baliba ne nsansa pa fyo basalilepo ukucita.

6. Cinshi cilenga Abena Kristu muno nshiku baleipusula fimo? (Moneni ne cikope.)

 ⁶ Abena Kristu muno nshiku balasekelela nga ca kuti baitemenwa ukuipusulako fimo, pa kuti balekwata inshita iikalamba iya kubombela Yehova. (1 Kor. 9:​3-6) Yehova tatupatikisha ukuipusulako fimo, kabili ifi ifyo tuipusulako tafyabipa. Ku ca kumwenako, bamo balaitemenwa ukuleka incito, e lyo no kusha ing’anda. Abengi balasalapo ukulolelako ukuupa nelyo ukuupwa, nelyo ukukwata abana. Bambi balasalapo ukuya uko aba kubila imbila nsuma bacepa, nangu ca kuti uko baya kulaba ukutali sana ukufuma ukwaba balupwa lwabo. Fwe bengi icilenga tuleitemenwa ukuipusula fimo, ni co tufwaya ukubombela sana Yehova. Mulecetekela ukuti Yehova alatasha sana pa fyo muipeelesha ukuipusula fimo, nampo nga fikalamba nelyo finono pa kuti fye mulemubombela.—Heb. 6:10.

MULEITEMENWA UKUPUSANAKO NA BANTU BAMBI

7. Cinshi nalimo calelenga cakosela umuNasiri ukusunga umulapo wakwe? (Impendwa 6:5) (Moneni ne cikope.)

⁷ Belengeni Impendwa 6:5. AbaNasiri balelapa ukukanabeya umushishi wabo. Iyi yali ni nshila ya kulangilamo ukuti balenakila Yehova muli fyonse. Nga ca kuti umwina Israele abomba ubuNasiri pa nshita iitali, umushishi wakwe waleeleepa sana ica kuti na bena Israele bambi balemumona. Nga ca kuti abantu baletungilila umuNasiri, tacali no kumukosela ukusunga umulapo wakwe uwa buNasiri. Ku ca bulanda, kwali inshita imo ilyo abena Israele bashalecindika nelyo ukutungilila abaNasiri. Mu nshiku sha kwa Amose, abena Israele bacipondoka ‘balenwesha abaNasiri umwangashi.’ (Amose 2:12) Ico balecitila ifi nalimo ni co balefwaya abaNasiri besunga umulapo wabo uwa kukananwa umwangashi. Inshita shimo umuNasiri alingile ukuba uwashipa pa kuti asunge umulapo wakwe na pa kuti apusaneko na bantu.

8. Finshi mwatemwapo pe lyashi lya kwa Benjamin?

⁸ Na ifwe bene Yehova nga atwafwa kuti twaba abashipa pa kuti tupusaneko na bantu, nangu ca kuti mu cifyalilwa fye tuli ba nsoni nelyo tuli ba mwenso. Natulandeko pe lyashi lya kwa Benjamin, Inte ya kwa Yehova uuli ne myaka 10 uwikala ku Norway. Pa mulandu ne nkondo iili ku Ukraine, aba pa sukulu apo asambilila balilongene pa kuti balange ukuti baletungilila abena Ukraine. Abana be sukulu balibebele ukwimba ulwimbo, ninshi nabafwala ifya kufwala umwali amalangi ayaba muli fulagi ya ku Ukraine. Benjamin talefwaya ukucitako ifi. E ico aileiminina akatalamukila ilyo abana be sukulu banankwe balecita  ifi. Lelo bakafundisha bakwe balimumwene e lyo bamubilikisha abati: “Benjamin isa uleimbako na iwe. Bonse niwe tulelolela.” Benjamin alishipile, aya kuli bakafundisha no kubeba ati: “Ine nshi-itumpa mu fikansa fya calo. Na kuba Inte sha kwa Yehova abengi balibabika mu fifungo pantu balakaana ukuya ku nkondo.” Bakafundisha balyumfwile ifyo abebele kabili tabamupatikishe ukucitako ifyo balecita. Na lyo line, abo asambilila nabo balemwipusha ico ashaimbiileko. Benjamin ali sana no mwenso ni cikanga fye alile, lelo alilondolwelele abo asambilila nabo ifyo alondolwelele bakafundisha. Pa numa Benjamin aebele abafyashi bakwe ukuti aumfwile ukuti Yehova e walengele ashipe, pa kuti alande ifyo asuminamo.

9. Bushe kuti twalenga shani umutima wa kwa Yehova ukusekelela?

⁹ Pa mulandu wa kuti twalisalapo ukulacita ukufwaya kwa kwa Yehova, abantu bambi balamona ukuti tatwaba nge fyo baba. Tulingile ukuba abashipa pa kuti twebe abo tubomba nabo, nelyo abo tusambilila nabo ukuti tuli Nte sha kwa Yehova. E lyo pa mulandu wa kuti imibele ya bantu e lyo ne fyo bacita file filebipilako fye, cakulatukosela ukukonka amashinte ya mafunde ayaba mu Baibo, e lyo cakulatukosela no kulabila imbila nsuma. (2 Tim. 1:8; 3:13) Lelo lyonse muleibukisha ukuti pa kuti tulenge umutima wa kwa Yehova ukusekelela, tulingile ukuba abashipa no kupusanako na bantu abashimubombela.—Amapi. 27:11; Mal. 3:18.

MULEBIKA YEHOVA PA NTANSHI

10. Mulandu nshi nalimo calekosela abaNasiri ukukonka ifunde ilyalembwa pa Impendwa 6:​6, 7?

¹⁰ Belengeni Impendwa 6:​6, 7. AbaNasiri tabalepalama ku citumbi ca muntu. Nalimo ifwe kuti twamona kwati ici te cintu icikalamba. Mu nshita balelemba Baibo, ici calekosela abaNasiri lupwa wabo nga afwa. Pali ilya nshita ukulingana ne ntambi balekonka pa fililo, umuntu alingile ukuba mupepi ne citumbi. (Yoh. 19:​39, 40; Imil. 9:​36-40) Lelo umulapo uo abaNasiri balelapa tawalebasuminisha ukukonka intambi sha musango uyu. Na lintu lupwa wa muNasiri afwa, abaNasiri balelanga ukuti bali ne citetekelo icakosa pa kuti basungilile umulapo wabo. Ukwabula no kutwishika Yehova alekosha bakapepa bakwe abaipeeleshe ukumubombela, nangu bakwata amafya ya musango uyu.

11. Cinshi ico Umwina Kristu alingile ukucita ilyo alesalapo fimo ifikumine ulupwa? (Moneni ne cikope.)

 ¹¹ Apo tuli Bena Kristu, twalicindika sana umulapo wesu uwa kuipeela kuli Yehova. Umulapo twalapa ulakuma sana ifyo tusalapo ukucita, e lyo ne fyo tucita mu ndupwa. Tulabombesha pa kuti tulepeela aba mu lupwa lwesu ifyo bakabila. Na lyo line, tatuleka ifyo aba mu lupwa lwesu bafwaya fyalenga twafilwa ukukonka ifyo Yehova afwaya. (Mat. 10:​35-37; 1 Tim. 5:8) Inshita shimo ukucita ifi kulalenga twaleka ukumfwana na balupwa lwesu pa kuti fye tulenge Yehova alesekelela.

12. Finshi ifyo ba Alexandru balecita ne fyo bashalecita ilyo bakwete ubwafya mu lupwa lwabo?

¹² Natulandeko pe lyashi lya ba Alexandru na bena mwabo ba Dorina. Ilyo papitile umwaka umo ukutula apo aba abaupana batendekele ukusambilila Baibo, ba Dorina basalilepo ukuleka ukusambilila Baibo kabili balefwaya na ba Alexandru nabo baleke. Ba Alexandru balitekenye pa kweba abena mwabo ukuti tabali no kuleka, kabili tababakalifye. Ba Dorina tabatemenwe kabili balepatikisha abena mwabo ukuleka ukusambilila Baibo. Ba Alexandru batile balefwaya ukwishiba ico abena mwabo tabalefwaila ukuti balesambilila Baibo, lelo calibakosele. Inshita shimo ba Alexandru balefwaya ukuleka ukusambilila Baibo nga ca kuti abena mwabo babalengulula nelyo babasasukila. Na lyo line, ba Alexandru balitwalilile ukubika Yehova pa ntanshi, uku ninshi balelanga abena mwabo ukuti balibatemwa sana kabili balibacindika. Ifi ba Alexandru balecita fyalengele abena mwabo batendeka na kabili ukusambilila Baibo, kabili mu kupita kwa nshita balishilebatishiwa.—Tambeni vidio pa jw.org iitila, Ba Alexandru na ba Dorina Văcar: “Mu Kutemwa Mwaba Ukushishimisha ne Cikuuku” mu cipande citila “Icine Cilaalula Abantu.”

13. Kuti twalanga shani ukuti twalitemwa Yehova e lyo no lupwa lwesu?

¹³ Yehova e watendeke ulupwa kabili afwaya ukuti indupwa shileba ne nsansa. (Efes. 3:​14, 15) Nga tulefwaya ukulaba ne nsansa sha cine cine, tufwile ukulacita ifyo Yehova afwaya. Mulecetekela ukuti Yehova alatemwa ifyo muipeelesha ukumubombela ilyo mulesakamana ulupwa lwenu, no kulabalanga ukuti mwalibatemwa kabili mwalibacindika.—Rom. 12:10.

TULEBA NGA BANASIRI

14. Ni bani maka maka abo tulingile ukulakoselesha mu fyo tulanda?

¹⁴ Bonse abasalapo ukubombela Yehova muno nshiku balingile ukuitemenwa ukuipusula fimo pantu balimutemwa. Inshita shimo  ukucita ifi takwa-anguka. Finshi twingacita pa kuti tuleitemenwa ukubombela Yehova? Tufwile ukulakoseleshanya mu fyo tulanda. (Yobo 16:5) Bushe mu cilonganino mwaba mwaliba abalefwaya ukwangusha imikalile pa kuti balebombesha mu mulimo wa kwa Lesa? Bushe mwalishibako abaice abashipa pa kuti bapusaneko ilyo bali ku sukulu, nangu ca kuti calikosa ukucita ifi? Bushe kwaliba abasambi ba Baibo nelyo aba bwananyina banenu abo cikosela ukutwalilila ukuba aba cishinka pantu aba mu lupwa lwabo balabacusha? Natutwalilile ukukoselesha aba musango uyu no kubeba ifyo twabatemwa pa fyo baba abashipa, na pa fyo bacita pa kuti balebombela Yehova.—File. 4, 5, 7.

15. Finshi bamo bacita pa kutungilila ababomba umulimo wa nshita yonse?

¹⁵ Inshita shimo kuti twa-afwilisha Abena Kristu banensu ababomba umulimo wa nshita yonse mu fyo balekabila. (Amapi. 19:17; Heb. 13:16) Ifi e fyo nkashi umo umukalamba uwikala ku Sri Lanka alefwaisha ukucita. Ilyo bamulundileko indalama sha penshoni isho alepoka, alefwaya ukwafwilishako abakashana bapainiya babili pa kuti batwalilile ukubomba umulimo wabo nangu ca kuti balebulisha indalama balekabila. E ico asalilepo ukulabapeelako indalama cila mweshi isha kubomfya pa kutuma foni. Ala uyu nkashi alicitile bwino sana!

16. Finshi twingasambilila ku fyo abaNasiri baleipeelesha?

¹⁶ Ukwabula no kutwishika fingi twingasambilila ku baNasiri abaipeeleshe ukubombela Lesa! Na lyo line, umulapo wa kuba umuNasiri ulatusambilisha fimo pali Shifwe wa ku muulu Yehova. Alishiba ukuti tulafwaisha ukulacita fimo ifingalenga asekelela, no kuti tulaipeelesha pa kuti tulecita ifintu nge fyo twalapile ilyo twaipeele kuli ena. Alitucindamika ifi atuleka tuleisalilapo fwe bene ukulanga ukuti twalimutemwa. (Amapi. 23:​15, 16; Marko 10:​28-30; 1 Yoh. 4:19) Umulapo wa kuba umuNasiri ulanga ukuti Yehova alamona kabili alatasha pa fyo tuipeelesha pa kuti tulemubombela. E ico natutwalilile ukuitemenwa ukubombela Yehova, kabili tulemubombela apapela amaka yesu.