1. ?Wanem gudfala fasin we ol man blong Jehova oli soemaot bifo finis i kam?

 ?YU YU tinghae long fasin fren blong yu wetem Jehova? !I sua se yes! Mo i no yu wan nomo. Long taem bifo, plante man oli gat sem tingting olsem yu. (Sam 104:​33, 34) Plante oli lego sam samting blong oli save wosipim Jehova. Hemia nao samting we ol Nasiraet long taem blong ol man Isrel bifo oli mekem. ?Olgeta ya oli hu? Mo, ?yumi save lanem wanem long eksampol blong olgeta?

2. (1) ?Hu ya ol Nasiraet? (Namba 6:​1, 2) (2) ?Wanem i pusum wan man Isrel blong mekem promes blong kam wan Nasiraet?

² Tok ya “Nasiraet” i kamaot long wan Hibru tok we i minim “Man We Oli Jusumaot,” “Man We i Seraot Long Ol Narafala,” o “Man We i Dediketem Laef Blong Hem.” Oli yusum tok ya blong tokbaot ol man Isrel we oli gat strong tingting blong lego sam samting blong mekem wok blong Jehova long wan spesel fasin. Loa Blong Moses i letem wan man o woman blong i mekem wan spesel promes long Jehova, taem i jusum blong stap olsem wan Nasiraet blong sam taem. a (Ridim Namba 6:​1, 2.) Taem wan man Isrel i mekem promes blong kam wan Nasiraet, hem i mas folem sam rul we ol narafala man Isrel oli no nid blong folem. Be, ?wanem i pusum wan man Isrel blong mekem promes blong kam wan Nasiraet? Maet hemia from we hem i lavem Jehova tumas mo i tinghae long ol blesing we Jehova i givim.—Dut. 6:5; 16:17.

3. ?Olsem wanem ol man blong God tede oli sem mak long ol Nasiraet?

³ Taem “loa blong Kraes” i tekem ples blong Loa blong Moses,  ol man blong God oli no moa nid blong kam ol Nasiraet. (Gal. 6:2; Rom 10:4) Nating se i olsem, ol man blong Jehova tede oli gat sem tingting olsem ol Nasiraet. Oli wantem tumas blong mekem wok blong Jehova long olgeta hat, sol, tingting, mo paoa blong olgeta. (Mak 12:30) Yumi glad nomo blong mekem wan promes olsem, hemia taem yumi givim laef blong yumi i go long Jehova. Blong folem promes we yumi mekem, yumi mas mekem samting we Jehova i wantem, mo lego sam samting blong wosipim hem. Naoia bambae yumi tokbaot sam eksampol mo luk olsem wanem ol Nasiraet oli wok folem promes blong olgeta, mo olsem yumi save folem eksampol blong olgeta. b (Mat. 16:24)

RERE BLONG LEGO SAM SAMTING

4. Folem Namba 6:​3, 4, ?ol Nasiraet oli glad nomo blong lego wanem?

⁴ Ridim Namba 6:​3, 4. Ol Nasiraet oli no mas dring alkol, kakae grep mo grep we oli draemap. Ol man raonabaot long olgeta oli haremgud blong kakae ol kakae ya, mo hemia i stret nomo from we i no gat wan samting i rong long ol kakae ya. Baebol i tokbaot ‘waen we i mekem hat blong man i glad’ se i olsem wan presen we i kam long God. (Sam 104:​14, 15) Nating se i olsem, ol Nasiraet oli glad nomo blong lego ol samting ya we i save mekem olgeta oli glad. c

5. ?Madián mo Marcela i mekem wanem mo from wanem?

⁵ Olsem ol Nasiraet, yumi tu yumi lego sam samting blong mekem moa long wok blong Jehova. Tingbaot eksampol blong wan Kristin kapol, hemia Madián mo Marcela d we tufala i gat wan gudfala laef. Madián i gat wan gudfala wok we i mekem se tufala i save laef long wan gudfala haos. Nating se i olsem, tufala i wantem mekem moa long wok blong Jehova. Be blong kasem mak ya, tufala i plan blong mekem sam jenis. Tufala i se: “Mitufala i stat blong no yusum tumas mani, mitufala i muv i go long wan smol haos mo mitufala i salemaot trak blong mitufala.” Madián mo Marcela i no nid blong mekem ol jenis ya, be from we tufala i wantem mekem moa long wok blong Jehova, tufala i jusum blong mekem olsem, mo tufala i haremgud mo glad long desisen blong tufala.

6. ?From wanem ol Kristin tede oli glad nomo blong lego sam samting? (Mo tu, yu luk pija.)

 ⁶ Ol Kristin tede oli glad nomo blong lego sam samting, blong oli save mekem moa long wok blong Jehova. (1 Kor. 9:​3-6). Eksampol, sam oli lego gudfala wok, haos, mo animol blong olgeta. Plante oli jusum blong no mared fastaem o gat pikinini. Samfala oli jusum blong go long ples we i gat moa nid, nating se oli mas stap longwe long ol famle blong olgeta. Jehova i no askem yumi blong mekem olsem, mo ol samting we yumi lego oli no rong. Be plante long yumi oli rere nomo blong lego ol samting ya, from we oli wantem mekem moa long wok blong Jehova. Tingbaot se Jehova i tinghae long eni samting we yu lego blong mekem moa long wok blong hem nating se i bigwan o i smol.—Hib. 6:10.

YU MAS GLAD BLONG STAP DEFREN

7. ?From wanem maet i had blong wan Nasiraet i holemtaet promes blong hem? (Namba 6:5) (Mo tu, yu luk pija.)

⁷ Ridim Namba 6:5. Ol Nasiraet oli no mas katem hea blong olgeta. Hemia i wan rod blong soemaot se oli obei fulwan long Jehova. Sipos wan man Isrel i mekem wok blong Nasiraet blong longtaem, hea blong hem bambae i longfala mo bambae i isi blong ol man oli luksave samting ya. Sipos ol man raonabaot long hem oli respektem hem mo oli leftemap tingting blong hem blong i gohed blong holemtaet promes blong hem, bambae i isi long hem blong i stap defren long ol narafala. Be sore tumas, long Isrel i gat sam taem we ol man oli no respektem ol Nasiraet. Long taem blong profet Amos, ol man Isrel we oli tanem baksaed long Jehova oli “gohed blong givim waen long ol Nasiraet blong oli dring.” Maet hemia from we oli wantem mekem olgeta oli brekem promes blong olgeta blong no dring alkol. (Amos 2:12) Long taem olsem, ol Nasiraet oli nidim strong tingting blong gohed blong holemtaet promes we oli mekem blong stap defren long ol narafala.

8. ?Olsem wanem ekspiriens blong Benjamin i leftemap tingting blong yu?

⁸ Jehova bambae i halpem yumi blong yumi gat strong tingting blong stap defren long ol narafala, nating sipos yumi man blong sem. Traem tingbaot eksampol blong Benjamin, wan Witnes long Nowei we i gat ten yia. Taem i gat faet long Yukren, skul blong hem i oganaesem wan samting blong soemaot se oli sapotem ol man Yukren. Oli askem ol pikinini blong sing long wan singsing mo werem ol klos we i gat kala blong flag blong Yukren long hem. Benjamin i no wantem joen, taswe hem i stanap longwe nomo. Be wan tija i luk hem mo i singaot bigwan long hem se: “!Yu mas kam joenem mifala. Mifala i evriwan i stap wet long yu!” Ale Benjamin i wokbaot i go luk  tija ya, mo wetem strong tingting hem i se: “Mi mi stap nutrol, mo mi no joen long ol samting blong politik. Hemia nao from wanem plante Witnes blong Jehova oli go long kalabus from we oli no wantem go long wo.” Tija ya i agri long tingting blong hem mo hem i talem se Benjamin i no nid blong joenem olgeta. Be ol fren blong hem oli stap askem se from wanem hem i no wantem joenem olgeta. Benjamin i fraet tumas mo klosap i krae. Be yet hem i gat strong tingting blong ripitim long ful klas blong hem sem tok we hem i bin talem long tija ya. Biaen, Benjamin i talem long perens blong hem se hem i haremsave we Jehova i halpem hem blong difendem bilif blong hem.

9. ?Olsem wanem yumi save mekem hat blong Jehova i glad?

⁹ Taem yumi jusum blong obei fulwan long Jehova, ol man raonabaot long yumi oli luksave se yumi defren. Yumi nidim strong tingting blong talemaot long ol narafala long wok o long skul se yumi ol witnes blong Jehova. Mo naoia we fasin blong wol ya i stap kam mowas, maet bambae i had moa blong folem ol rul blong Baebol mo talemaot gud nius long ol narafala. (2 Tim. 1:8; 3:13) Be i gud blong tingbaot oltaem se, yumi “mekem hat blong [Jehova] i glad” taem yumi gat strong tingting blong stap defren long ol man we oli no wosipim Jehova.—Prov. 27:11; Mal. 3:18.

GOHED BLONG PUTUM JEHOVA FASPLES

10. ?From wanem maet i had blong ol Nasiraet oli folem tok we i stap long Namba 6:​6, 7?

¹⁰ Ridim Namba 6:​6, 7. Ol Nasiraet oli no mas go klosap long wan dedbodi. Maet yu ting se hemia i no wan bigfala samting. Be long taem bifo, taem wan famle blong wan Nasiraet i ded, hemia i wan bigfala traem long olgeta. Folem kastom blong taem bifo, plante taem oli mas stap klosap long ded bodi ya. (Jon 19:​39, 40; Wok 9:​36-40) Be wan Nasiraet i no save folem kastom ya. Mo nating se hemia wan taem we oli harem nogud tumas, be oli soemaot strong bilif taem oli gohed blong holem promes blong olgeta. I sua se Jehova i givim paoa long ol gudfala man ya blong hem blong dil wetem hadtaem ya.

11. ?Wan Kristin i mas mekem wanem taem i gat wan samting i hapen insaed long famle? (Mo tu, yu luk pija.)

¹¹ Yumi ol Kristin, yumi tinghae long promes ya we yumi mekem blong givim laef blong yumi i go long Jehova. Mo hemia i save gat paoa long ol aksen mo ol desisen we yumi mekem taem i gat wan samting i hapen insaed long famle. Yumi wok had blong givim  samting we famle i nidim long saed blong spirit, be yumi no mas letem ol samting we famle i wantem tumas i stap fasples long wanem we Jehova i askem yumi blong mekem. (Mat. 10:​35-37; 1 Tim. 5:8) Mo hemia i min se samtaem, ol famle bambae oli no glad long ol desisen we yumi tekem blong mekem Jehova i glad.

12. ?Taem Alexandru i fesem wan problem long famle, hem i mekem wanem mo i no mekem wanem?

¹² Tingbaot ekspiriens blong Alexandru mo waef blong hem Dorina. Afta we kapol ya i stadi Baebol blong wan yia, Dorina i stop blong stadi. Mo hem i wantem Alexandru tu blong i stop stadi. Nating se i olsem, Alexandru i toktok kwaet mo i talem stret long hem se bambae hem i gohed nomo. Dorina i no glad nating mo i traehad blong fosem hem blong i stop stadi. Alexandru i talem se, hem i traem blong kasemsave from wanem Dorina i mekem olsem, be i no isi. Sam taem, taem Dorina i jikim mo i tok strong long hem, hem i harem olsem se i wantem stop stadi nomo. Be Alexandru i gohed blong putum Jehova fasples, mo long semtaem hem i gohed blong soem lav mo i respektem waef blong hem. Gudfala eksampol blong hem i mekem se Dorina i stat blong stadi Baebol bakegen, mo biaen hem i baptaes.—Yu go long jw.org mo luk video ya Alexandru Mo Dorina Vacar: “Man We i Gat Lav, Hem i Gat Longfala Tingting Mo i Kaen” long haf ya “Trutok i Jenisim Laef.”

13. ?Olsem wanem yumi soemaot lav long Jehova mo famle blong yumi?

¹³ Jehova nao i stanemap famle mo hem i wantem we yumi gat wan hapi famle. (Efes. 3:​14, 15) Sipos yumi wantem kasem trufala glad, yumi mas mekem samting folem tingting blong Jehova. I gud yu tingbaot se Jehova i tinghae long yu taem yu lego sam samting blong mekem wok blong hem mo semtaem yu lukaot gud long famle blong yu, taem yu lavem olgeta mo yu respektem olgeta.—Rom 12:10.

GIVHAN LONG NARAFALA BLONG OLI KAM OLSEM OL NASIRAET

14. ?Yumi mas traehad blong talem ol gudfala tok blong leftemap tingting long hu?

¹⁴ Evri man we oli jusum blong wosipim Jehova tede oli mas rere blong lego sam samting, mo oli mekem olsem from oli lavem hem. Be samtaem i no isi. ?Olsem wanem yumi save halpem ol narafala blong oli lego sam samting blong mekem moa long wok blong Jehova? Hemia taem yumi talem ol tok blong leftemap tingting long olgeta. (Job 16:5) ?I gat sam long kongregesen blong yu we oli stap traehad blong mekem laef blong olgeta i kam simpol,  blong oli save joen moa long ol tiokratik wok? ?Yu save sam yangfala we oli gat strong tingting blong stap defren long ol narafala long skul, nating se i no isi long olgeta? ?I gat sam Baebol studen mo ol brata mo sista we oli stap traehad blong holemstrong long Jehova, nating se famle i agens? I gud yumi tekem evri janis blong talem ol gudfala toktok long olgeta from strong tingting blong olgeta mo samting we oli mekem blong Jehova.—Filimon 4, 5,7.

15. ?Olsem wanem samfala oli sapotem olgeta we oli mekem wok blong Jehova fultaem?

¹⁵ Maet sam taem yumi save mekem sam samting blong halpem olgeta we oli mekem wok blong Jehova fultaem. (Prov. 19:17; Hib. 13:16) Hemia nao samting we wan olfala sista long Sri Lanka i wantem tumas blong mekem. Gavman i leftemap amaon blong mane we hem i stap kasem evri manis. Mo hem i wantem halpem tu yangfala paenia sista blong tufala i gohed long wok blong prij, nating se i gat problem blong ekonomi. Taswe, hem i mekem desisen blong givim wan stret amaon blong mane evri manis blong pem bil blong telefon blong tufala. !Hemia i wan gudfala fasin we sista ya i soemaot!

16. ?Yumi lanem wanem long eksampol blong ol Nasiraet?

¹⁶ !Yumi save lanem plante samting long gudfala eksampol we ol Nasiraet oli soemaot! Mo eksampol blong olgeta i tijim yumi wan narafala samting long saed blong Papa blong yumi long heven, Jehova. Hem i save se yumi wantem mekem hem i glad mo yumi glad nomo blong lego sam samting blong holem promes ya we yumi mekem blong givim laef blong yumi i go long hem. Jehova i tinghae long yumi, taem i givim janis long yumi blong soemaot se yumi lavem hem. (Prov. 23:​15, 16; Mak 10:​28-30; 1 Jon 4:19) Eksampol blong ol Nasiraet i soemaot se Jehova i luk mo i tinghae long yumi from ol samting we yumi lego blong mekem wok blong hem. I gud yumi gat strong tingting blong gohed blong mekem wok blong Jehova, mo glad nomo blong mekem bes blong yumi long wok blong hem.