1. Mbarenda nari, kai si ilakoken umat Jahwe guna ngelayani Ia?

 MEHERGA nge akapndu hubungenndu ras Jahwe? Pasti! Mbarenda nari enterem kalak pe bage perasanna. (Ms. 104:​33, 34) Enterem arah kalak e enggo erkorban guna ngelayani Jahwe. Contohna eme kalak Nasir bas jaman Israel mbarenda. Ise kin kalak e, janah kai si banci sipelajari arah usihen kalak e?

2. (a) Kai kin ertina kalak Nasir? (Bilangen 6:​1, 2) (b) Engkai maka piga-piga kalak Israel nggit jadi kalak Nasir?

² Istilah ‘kalak Nasir’ ibuat arah kata Heber si ertina “Kalak si Ipisahken” ntah pe “Kalak si Ikhususken.” Istilah enda cocok kel nggambarken kalak Israel si nggit erkorban guna ngelayani Jahwe alu cara si istimewa. Menurut Undang-Undang Musa, sekalak dilaki ntah pe diberu banci erban janji khusus man Jahwe guna jadi kalak Nasir bas piga-piga waktu. a (Baca Bilangen 6:​1, 2.) Sanga sekalak jelma erban janji si bage, arus ikutkenna peraturen tertentu si la perlu iikutken kalak Israel si debanna. Engkai maka lit kalak si nggit erjanji jadi kalak Nasir? Si pasti perban tuhu-tuhu keleng kel atena Jahwe, janah ngata bujur ia perban melala pasu-pasu si enggo alokenna arah Jahwe.—Ul. 6:5; 16:17.

3. Uga umat Dibata bas jaman gundari seri ras kalak Nasir mbarenda?

³ Pengaturen kerna kalak Nasir lanai lit kenca Undang-Undang Musa iganti alu “undang-undang Kristus.” (Gal. 6:2; Rom. 10:4) Tapi, bali bagi kalak Nasir, umat Jahwe  si gundari pe merhat kel ngelayani Ia alu kerina pusuhna, kegeluhenna, perukurenna, ras gegehna. (Mrk. 12:30) Erjanji kita ngelakoken si e sanga sibaktiken geluhta man Jahwe. Guna nepati janji e, perlu terus silakoken sura-sura Jahwe janah siban pengorbanen. Mari sibahas uga kalak Nasir nepati janjina janah uga kita ngusih kalak e gelah banci sitepati janjita. b—Mat. 16:24.

NGGIT ERKORBAN

4. Menurut Bilangen 6:​3, 4, pengorbanen kai si arus iban kalak Nasir?

⁴ Baca Bilangen 6:​3, 4. Kalak Nasir la banci inemna anggur ntah pe inemen si lit alkoholna. La ka banci pan kalak e kai pe arah sinuan-sinuan anggur bagi buah anggur ras kismis. Kalak si deban si lit i sekeliling kalak e pasti rusur inemna ntah pe panna si e kerina, janah si e labo salah. Bas Pustaka pe, ikataken anggur e pemere arah Dibata, janah ‘anggur banci erban manusia ermeriah ukur.’ (Ms. 104:​14, 15) Tapi, kalak Nasir nggit erkorban janah la panna ras inemna si e ndai kerina. c

5. Pengorbanen kai nge si iban Madián ras Marcela, janah engkai?

⁵ Bali bagi kalak Nasir, kita pe perlu erban pengorbanen guna ngelakoken terbuen man Jahwe. Perdiateken pengalamen sekalak perbulangen ras ndeharana, Madián ras Marcela. d Duana kalak e entabeh pergeluhna. Mejile pendahin Madián janah si e erban banci mejile ingan kalak e tading. Tapi merhat kalak e ngelakoken terbuen man Jahwe. Gelah banci seh sura-sura kalak e, iban kalak e piga-piga penyesuaien. Nina kalak e, “Mulai uraki kami biaya pengeluaren kami. Pindah kami ku ingan tading si terkitiken, janah dayaken kami motor kami.” Situhuna, labo arus iban Madián ras Marcela pengorbanen enda. Tapi, nggit kalak e ngelakoken si e gelah banci ngelakoken terbuen bas ngelayani Jahwe. Puas kel akap kalak e janah meriah ukurna perban enggo erban keputusen e.

6. Engkai maka enterem kalak Kristen nggit erkorban? (Nen ka gambar.)

 ⁶ Enterem kalak Kristen nggit erkorban guna mereken terbuen waktu bas ngelayani Jahwe janah si e erban meriah ukur kalak e. (1 Kor. 9:​3-6) Contohna, la lit rumahna sendiri, la lit asuh-asuhenna, ntah pe pendahin si bagi ukurna. Enterem ka si la erjabu ntah pe la lit anakna bas piga-piga waktu dekahna. Si debanna, nggit ngelayani bas ingan si merluken terbuen perberita, amin pe arus kalak e ndauh arah keluargana. Situhuna, labo salah si korbanken kalak e janah Jahwe pe labo paksaNa kita erban pengorbanen si bage. Tapi, enterem arah kita nggit ngelakoken si e perban sibereken ateta si mehulina man Jahwe. Teklah kam maka ergai Jahwe kel pengorbanen kai pe si ilakokenndu bas ngelayani Ia, la soal e galang ntah pe kitik.—Heb. 6:10.

PANG BEDA RAS KALAK SI DEBAN

7. Engkai maka mon-mon mesera akap kalak Nasir nepati janjina? (Bilangen 6:5) (Nen ka gambar.)

⁷ Baca Bilangen 6:5. Kalak Nasir erjanji guna la motong bukna. Si e jadi tanda maka tuhu-tuhu patuh kalak e man Jahwe. Adi sekalak jelma enggo ndekah jadi kalak Nasir, banci saja enggo gedang kel bukna janah si e erban beda kel ia ras kalak Israel si debanna. Adi kalak si lit i sekelilingna ngergai ia janah ndukung ia guna nepati janjina, pasti reh nukahna akap kalak Nasir guna beda ras kalak si deban. Tapi sayang kel, lit kalak Israel si la ngergai ntah pe ndukung kalak Nasir. Misalna, bas jaman Nabi Amos, kalak Israel si murtad ‘terus mereken anggur man kalak Nasir gelah inemna,’ banci saja gelah ilanggar kalak e janjina. (Amos 2:12) Emaka mon-mon, arus pang kel kalak Nasir nepati janjina janah tetap beda ras kalak si deban.

8. Kai si mpegegehi kam arah pengalamen Benjamin?

⁸ Alu penampat Jahwe, kita pe banci perpang guna beda ras kalak si deban amin pe kita permela kalakna. Cuba ukuri pengalamen Benjamin si tading i Norwegia, ia sekalak Saksi si umurna sepuluh tahun. Perban perang bas Ukraina, iban sekolahna acara guna ndukung kalak Ukraina. Murid-murid isuruh make baju si warnana seri ras bendera Ukraina janah ngendeken sada lagu. Perban la nggit Benjamin ikut bas acara e, cinder ia ndauh arah ingan e. Tapi idah guruna  ia janah megang lebuhna Benjamin, nina, “Mari ku jenda, arus kam ikut. Kam nari ngenca man timan e.” Pang Benjamin ndeheri guruna e, janah nina, “Aku netral Buk, janah la aku ikut bas politik. Situhuna, enterem Saksi Jahwe si pangen kapna ipenjaraken asangken ikut erperang.” Dungna, ijinken guruna Benjamin la ikut bas acara e. Tapi mulai isungkun teman-teman sada kelasna ia engkai maka la ia ikut bas acara e. Gugup kel Benjamin janah menam ia ngandung. Tapi pang ia ngulihi kai si ikatakenna man guruna ndai i lebe-lebe teman-temanna. Kenca si e, ikataken Benjamin man orang tuana maka igejapkenna sampati Jahwe ia gelah pang mbela kinitekenna.

9. Uga carana erban meriah ukur Jahwe?

⁹ Perban sipilih guna ngelakoken peraten Jahwe, beda kita ras kalak si deban. Arus kita perpang ngataken maka kita Saksi Jahwe bas ingan erdahin ntah pe bas sekolah. Erkiteken perbahanen kalak bas doni enda reh jahatna, banci saja reh serana siakap nggeluh sesuai ras prinsip-prinsip Pustaka bage pe erberita si meriah. (2 Tim. 1:8; 3:13) Tapi, tetaplah siinget maka banci ‘siban meriah ukur Jahwe’ adi pang kita beda ras kalak si la ngelayani Ia.—Kua. 27:11; Mal. 3:18.

TERUSLAH PELEBE JAHWE BAS GELUHNDU

10. Banci saja engkai maka mesera akap kalak Nasir ngikutken peraturen si lit bas Bilangen 6:​6, 7?

¹⁰ Baca Bilangen 6:​6, 7. Kalak Nasir la banci ndeheri mayat. Peraturen e tempa-tempa la mesera, tapi sanga lit anggota keluarga kalak e si mate banci mesera kel ndalanken peraturen e. Bas jaman Pustaka, arus kalak ndeher ku mayat sanga lit acara penguburen. (Joh. 19:​39, 40; Perb. 9:​36-40) Tapi kalak Nasir la banci ngikutken kebiasan e. Amin pe sedih kel kalak e perban mate keluargana, tetap tepati kalak e janjina perban erkiniteken kel ia man Jahwe. Pasti ipegegehi Jahwe kalak Nasir si setia e gelah ngasup kalak e ngadapi tentangen si mberat e.

11. Kai si arus iinget kalak Kristen sanga erban keputusen bas keluarga? (Nen ka gambar.)

¹¹ Selaku kalak Kristen, serius kel siakap janji pembaktinta man Jahwe.  Si e mpengaruhi keputusenta bage pe perbahanenta nandangi keluargata. Siusahaken kel ncukupi keperlun keluargata. Tapi, lalap siutamaken peraten Jahwe, labo sura-sura keluargata. (Mat. 10:​35-37; 1 Tim. 5:8) Emaka, perban siban ateta meriah ukur Jahwe, banci saja arus siban keputusen si erban keluargata la senang.

12. Sanga dat tentangen arah diberuna, kai si ilakoken Alexandru, ras kai si la ilakokenna?

¹² Cuba perdiateken pengalamen Alexandru ras diberuna Dorina. Kenca setahun kalak e erlajar Pustaka, lanai nggit Dorina erlajar janah atena Alexandru pe ngadi erlajar. Tapi, alu manjar-anjar janah lembut ikataken Alexandru maka terus atena erlajar. La senang Dorina janah ipaksana ia ngadi erlajar Pustaka. Ikataken Alexandru maka usahakenna ngangkai perasan Dorina, tapi si e la nukah. Mon-mon nyerah saja atena sanga ipandangi Dorina ia ras kasar rananna. Amin pe bage, tetap utamaken Alexandru kepentingen Jahwe. Selain si e, ibuktikenna ka maka keleng kel atena diberuna janah ergaina ia. Dungna, usihen Alexandru erban Dorina nggit erlajar Pustaka mulihi janah bas pudi wari iperidiken ia.—Nen video Alexandru ras Dorina Văcar: “Kekelengen e Sabar ras Mehuli” bas bagin “Kebenaren Ngubah Kegeluhen” i jw.org.

13. Uga carata mbuktiken kekelengenta man Jahwe ras keluargata?

¹³ Jahwe me si erban pengaturen keluarga janah ateNa ermeriah ukur min kita ras keluargata. (Ep. 3:​14, 15) Emaka, gelah tuhu-tuhu meriah ukurta arus lalap sipatuhi Jahwe. Banci saja la kapndu nukah ngelayani Jahwe janah ndalanken tanggung jawap keluarga ras ngergai bage pe engkelengi keluargandu. Tapi, teklah kam ergai Jahwe kerina pengorbanenndu.—Rom. 12:10.

NAMPATI KALAK SI DEBAN NGUSIH KALAK NASIR

14. Ise nge si utamana perlu sipegegehi alu rananta?

¹⁴ Kerina kita si milih guna nembah Jahwe nggit erban pengorbanen perban keleng ateta Ia. Mon-mon, la nukah ngelakoken si e. Kai si banci silakoken guna nampati kalak si sangana erban pengorbanen si bage? Banci sipegegehi kalak e alu rananta. (Jop 16:5) Lit nge bas runggunndu si usahakenna erban geluhna sederhana gelah banci lakokenna terbuen  man Jahwe? Lit nge anak muda si itehndu pang ia beda ras teman sekolahna amin pe mesera kapna ngelakoken si e. Lit nge kalak si erlajar Pustaka ntah pe turang senina si itentang keluargana janah erjuang gelah tetap setia? Teruslah sidarami tiap kesempaten guna mpegegehi kalak e alu rananta. Buktikenlah maka siergai pengorbanen ras sipat kalak e si megenggeng.—Plm. 4, 5, 7.

15. Uga piga-piga kalak nampati turang senina si ngelayani sepenuh waktu?

¹⁵ Mon-mon, banci saja merhat kita nampati turang seninata si ngelayani bas dinas sepenuh waktu. (Kua. 19:17; Heb. 13:16) Bage me sura-sura sekalak turang seninata si enggo metua si tading i Sri Lanka. Naik uang pensiunna, janah merhat ia nampati dua singuda-nguda si tetap merintis amin pe kalak e sangana ngadapi masalah ekonomi. Emaka, iberekenna senna tiap bulan guna nutupi biaya telepon kalak e. Tuhu-tuhu luar biasa kel pengorbanenna e!

16. Kai si banci sipelajari arah Pustaka kerna kalak Nasir?

¹⁶ Melala si banci sipelajari arah usihen kalak Nasir si nggit erkorban. Tapi, lit ka si banci sipelajari kerna Jahwe, Bapakta si i surga. Tek Jahwe maka merhat kita erban meriah ukurNa janah nggit kita erkorban guna nepati pembaktinta. BereNa ka kesempaten man banta guna mbuktiken kekelengenta man baNa. (Kua. 23:​15, 16; Mrk. 10:​28-30; 1 Joh. 4:19) Cataten Pustaka kerna kalak Nasir ncidahken maka iperdiateken Jahwe ras ergaiNa pengorbanenta guna ngelayani Ia. Mbera-mbera terus silayani Jahwe janah nggit kita mereken si mehulina man baNa.