1. Ka lubuidun igaburi arufuda hamaalibei lubúeingu Heowá lau lásügürün dan?

 GEBEGITI san humadagua luma Heowá hun? Chóuruti gebegi lan hun! Mámarügüñadün huguya. Lidan burí dan le sügühalibei, añaheinhaña saragu míñunu gürigia ha sandí hamagili ligiaméme (Sal. 104:​33, 34). Gíbeeña adügaña sákürifisiu luagu Heowá, kéiburi nasaréugu ha lánina binadu Ísüraeli. Kátaña meha san nasaréugu, ani ka wafurendeirubei lídangiñe hani hénpulu?

2. a) Kátaña meha nasaréubaña? (1 Lúrudu 6:​1, 2). b) Ka meha ínchahabaliña fiu ísüraelina lun heseriwidun kei nasaréu?

² Dimurei nasaréu lídangiñeti aban dimurei ebüréu ani mini lan “anuadirúaali” o “deregeguñu”. Kei meha adüga habéi ísüraelina úaraguatiña ha sákürifisiu lun heseriwidun lun Heowá lidan aban igaburi espechaliti, úarati dimurei le luma le hadügübei. Ígirati meha lilurudun Moisesi lun füramase lan aban wügüri o aban würi heseriwidun lun Heowá lidan aban igaburi espechaliti lun heseriwidun kei nasaréu luagu fiu dan (aliiha huméi 1 Lúrudu 6:​1, 2). a Dan meha le ladügün aban gürigia aban füramasei kei le, mosu meha hafalarun fiu lúrudu le mama mosu hafalaruni ha híbiri ísüraelina. Ka meha ínchahabalin aban gürigia lun leseriwidun kei nasaréu? Másiñati ladüga lan ínsiñeni le hasandirubei luagu Heowá luma lun heteingiruni luagu sun abinirúni le ru laalibei houn (2 Lur. 6:5; 16:17).

3. Ida liña genegegua lan le wadügübei luma le hadügübei nasaréugu?

³ Dan le lagidarunbei lilurudun Moisesi luagu “lilurudun Kristu”, aba mámaali lan mosu heseriwidun lubúeingu Bungiu kei nasaréugu (Gal. 6:2; Rom. 10:4). Lau sun lira, ítara kei nasaréugu busentiwa giñe weseriwidun lun Heowá tau sun wanigi,  tau sun wawani, lau sun wasaminan ani lau sun were (Mar. 12:30). Anihán katei le füramase wabéi lun Heowá dan le wederegerunbalin wabagari lun. Lun gayaraabei lan wagunfulirun lau le füramase wabéi, lunti wadügüni lugundan Heowá, adüga wagíame sákürifisiu. Wakutihaba ida liña meha hagunfulirun nasaréuna lau le füramase habéi luma giñe ida luba lan líderaguniwa hani hénpulu lun wagunfulirun lau le füramase wabéi (Mat. 16:24). b

ARANSEÑU WAMÁ LUN WADÜGÜN SÁKÜRIFISIU

4. Según 1 Lúrudu 6:​3, 4, ka meha sákürifisiu lunbei hadügüni nasaréugu?

⁴ (Aliiha huméi 1 Lúrudu 6:​3, 4). Siñabei meha hatun nasaréugu diwéin ni heigin ni kata le adügǘti tídangiñe beibei, kéiburi in to gíriboun pasa. Yusu hamuti meha ha híbiri gürigia katei le lidan heigin, lugundun mama meha aban katei wuribati lira. Le linarün katei, ariñagatu Bíbülia aban lan idewesei lúmagiñeti Bungiu diwéin “to agundaaragüdübalin libagari” gürigia (Sal. 104:​14, 15). Lau sun lira, aranseruhaña meha nasaréuna lau sun hagundan lun meigin hamá, matun hagía ni kata le gaganati diwéin.

5. Ka burí sákürifisiu ladügübei Madián tuma Marcela, ani ka uagu?

⁵ Kei meha hadüga nasaréugu, adügatiwa giñe sákürifisiu lun weseriwidun lun Heowá sunsuinagubei. Ariha waméi lani Madián tuma Marcela hénpulu. c Buiti meha dan houn feru maríeitiña Kolonbiana ha. Gáñeiti meha Madián saragu seinsu, ani wínwantiña tidan aban tubuidun muna. Lau sun lira, busentiña meha haganwoundagüdüni heseriwidun lun Heowá, ábati hadügün asansiruni lidan habagari. Ariñagatiña: “Aba magastarunhadiwa lan saragu, águya wagía awinwanda tidan aban tiraüraü muna, aba giñe walugurunu wakarün”. Mama meha mosu ladügüni Madián tuma Marcela sákürifisiu le; lau sun lira adüga hamuti lun gayaraabei lan hásügürün saragu dan apurichiha. Gúndaatiña maríeitiña ha lau le hanúadirubei hadügün.

6. Ka uagu wadüga sákürifisiu wagía kristiánugu uguñe weyu? (Ariha huméi giñe dibuhu).

⁶ Hínsiñeti woun wagía kristiánugu wadügün sákürifisiu lun gayaraabei lan wásügürün saragu dan lidan katei le lánina weseriwidun  lun Bungiu (1 Ko. 9:​3-6). Madügüdarunti Heowá wawagu lun wadügün sákürifisiu, ani katei burí le wígirubei wadügün mama burí katei wuribati. Kei hénpulu, añahein íbirigu aranseñu haña lun maban hamá, lun hígirun aban yabu le fáyeiti o lun málügün hamá animaalugu. Añahein íbirigu anúadiraaña herederun mamarieidunga luagu fiu dan o masaanigu hamá lárigiñe hamarieidun. Añahein amu anúadiraaña houdin eseriwida lidan aban fulasu le ñein lubéi mégeiwa hamá apurichihatiña, íbini mosu lan háguyun dise hawéi haduheñu luma dise hawéi hamadagu. Saragu wádangiñe aranseñu waña lun wadügüni sákürifisiu le, ladüga busén wamá wíchuguni le buídutimabei wámagiñegua lun Heowá. Chouru waméi gebegi lan furumiñeguarügü sákürifisiu le wadügübei lun Heowá, weiri lan yebe o ñüraü lan (Ebü. 6:10).

GANIGI WAMÁ LUN MÍTARAN WAMÁ KEI HIIBE-AGEI GÜRIGIA

7. Ka meha uagu gayara lubéi hénrengu lan lun aban nasaréu lagunfulirun lau le füramase lubéi? (1 Lúrudu 6:5; ariha huméi giñe dibuhu).

⁷ (Aliiha huméi 1 Lúrudu 6:5). Lun hagunfulirun nasaréuna lau le füramase habéi, siñabei meha hásaruni hádiburi. Lau hadügüni lira harufuduña meha inebe lan lilurudun Heowá houn sunsuinagubei. Anhein meha leseriwiduña lubéi aban ísüraelina kei nasaréu luagu saragu dan, ladügüba meha lira lun láhüchün lídiburi saragu ani láchawahabei meha katei le harihin saragu gürigia. Anhein meha ru habalin ha geyegubaña lau hídehan lun, mámabei meha aban turobuli lira lun. Ma lirun, anihein lan meha aban dan Ísüraeli le ídanbei mineben hamá ani mebegi hagía nasaréugu houn. Kei hénpulu, lidan meha lidaani profeta Amosu, añahein meha ísüraelina ha agarabaagubaña houngua luagu Bungiu, ariñagatu Bíbülia hawagu: “Fosu humutiña nasaréugu lun hatun diwéin”, háfuga lun hadügün lun magunfulirun hamá nasaréugu lau le füramase habéi (Amos. 2:12). Anihein meha dan, hénrengu lan lun mítaran lan aban gürigia kei ha híbiri ani mosu meha giñe ganigi lan.

8. Ka hínsiñebei hun lídangiñe le asuseredubei lun Benjamin?

⁸ Lau lídehan Heowá, gayaraati giñe ganigi wamá lun mítaran wamá kei ha híbiri gürigia íbini anhein haburi wabéi. Ariha waméi le asuseredubei lun Benjamin, aban gefenti luagu Heowá Noruegana le díisibei irumu lau. Tidan lileskuelan, adügǘwati aban adamurini lun harufuduni luéigiñeñanu lan lóubadina Ukrania lidan wuribu. Mosu meha hasansiragun irahüñü lau likolorun lufanidiran Ukrania ani eremuha hagía aban uremu. Lun mádaragun lan Benjamin lungua lidoun adamurini ligía, aba lerederun rara dise. Gama lumoun, aba tarihini  aban máistara ani aba tariñagun lun: “Yarafabá ñahoun! Furesebá, wagurabahañadibu!”. Lau ganigi, aba layarafadun Benjamin tun máistara aba lariñagun tun: “Mádaraguntina nungua lidoun polítika. Ani gíbetiña gefentiña luagu Heowá furisunrugu ladüga maha hamá houdin lidoun wuribu”. Ánhatu lun le lariñagun ani aba tígiruni lungua. Ábati hagumeserun lánigu paaná leskuelarugu álügüdaguei ka lan uagu meremuhan lubéi úara hama. Aba ladadagarun Benjamin ani aba labusenrun layahun. Íbini ítara, ganigiti Benjamin ani aba lariñaguni le buga lariñagubei tun máistara houn. Lárigiñe, aba labahüdaguni Benjamin houn lagübürigu luagu íderagua lani Heowá lun lóunabun luagu lafiñen.

9. Ida luba wagundaaragüdünu lanigi Heowá?

⁹ Dan le gaganbadi wamá lun Heowá, aba híchugun gürigia ha geyegubaña wau fe luagu amu wamá. Mégeitiwa ganigi lun warufudagun woungua keisi gefentiña luagu Heowá lidan wadagimanu o leskuelarugu. Ani kei aribadeina liña lan ligaburi hóuserun gürigia ubouagu, lunti wagurabun luagu hénrengutimabei lan wawinwandun úara luma adundehani le tídanbei Bíbülia luma lun wapurichihani uganu lúmagiñeti Larúeihan Bungiu houn amu gürigia (2 Tim. 1:8; 3:13). Ligíati, mabulieida waméi gúndaagüda wamanu lanigi Heowá dan le ganigi wamá lun amu wamá hawéi gürigia ha meseriwidunbaña lun (Ari. 27:11; Mal. 3:18).

RU WAMÉI HEOWÁ FURUMIÑE

10. Ka meha uagu hénrengu lubéi houn nasaréu gaganbadi hamá lun adundehani le lídanbei 1 Lúrudu 6:​6, 7?

¹⁰ (Aliiha huméi 1 Lúrudu 6:​6, 7). Siñati meha hayarafadun nasaréu lun aban hilaali. Gayaraati meha genege lan mama lan aban óunwenbu sákürifisiu le. Ánheinti lun aban nasaréu, gayaraati hénrengu lan katei le dántima le aban lan liduhe le hínsiñeti lun óunwebei. Ka uagu? Ladüga, lun meha hafalaruni échuni le lánina ábunahani lidan dan ligía, mosu meha hayarafadun lun hilaali (Huan 19:​39, 40; Adü. 9:​36-40). Siñati méhati hafalaruni nasaréu saragu lídangiñe échuni burí le. Chóuruti lau lan harufudun úaraguni lun füramasei le hadügübei lidan kesi hénrenguti le, arufudatiña here lan hafiñen. Ani mama meha hábuguarügüñanu; gayaraati wachoururuni luagu súnwandan lan líchuguni Heowá erei le hemegeirubei houn.

11. Dan le anihein lan katei lunti waranseruni hadan waduheñu, ka lunbei wadügüni? (Ariha huméi giñe dibuhu).

¹¹ Keisi gefentiña luagu Heowá marihin wamuti füramasei le wadügübei lun Heowá dan le wederegeragun woungua lun keisi aban  huraraü. Ani arihúati le lidan katei le wadügübei luma ida liña lan wagagibudagun lun burí katei le asuseredubei hadan waduheñu. Adüga wamuti sun wayaraati lun wetenirun lun wani buligasion hama waduheñu, íbini ítara, míchugun wamuti le habusenrubei waduheñu wadügün furumiñe lubaragiñe le labusenrubei Heowá (Mat. 10:​35-37; 1 Tim. 5:8). Anihein dan aba lan leferidirun lubuidun wanaagun woungua hamá waduheñu ladüga hagañidun wama lugundun busén wamá wagundaaragüdüni Heowá.

12. Dan le lagagibudagunbei Alexandru luma aban sügǘ hénrenguti, ka ladügübei ani ka madügün lubéi?

¹² Ariha waméi le asuseredubei lun Alexandru luma tun Dorina to lani weiriou. Aban irumu lárigiñe hagumeserun aturiahoun Bíbülia, aba tígiruni Dorina taturiahan ani busentu meha giñe lun lígiruni Alexandru. Ábati lafuranguagüdüni tun lau darangilaü luagu mabusenrun lan lígiruni laturiahan. Mínsiñeti meha katei le tun Dorina ani aba tálugun tafosuruni lun lígiruni laturiahan. Íbini meha áfaagua lan lun gunfurandalanu, hénrengu mémeti lun. Anihein dan, dan le tachuraguni Dorina ani ouseratei wuriba, aba burí ladagarun luagu lun lígiruni aturiahani. Íbini ítara, rumeme lumuti Heowá lidan furumiñeti lúgaaru ani óuseraloun lani weiriou lau ínsiñeni luma inebesei. Lau lásügürün dan, adügati ligaburi lóuserun lunya tánharun lani weiriou taturiahanu Bíbülia ani lun tánharun lun inarüni. (Ariha huméi bidéu Alexandru tuma Dorina Văcar: “Le hínsiñehabubei gaguraasunti, areidati”, le lídanbei fánreinti “Sansi lumuti inarüni habagari”, lidan jw.org).

13. Ida luba warufuduni hínsiñe lan Heowá woun ani hínsiñe hamá giñe waduheñu woun?

¹³ Heowá adügübaliña iduheñu ani busenti lun gunda hamá (Efe. 3:​14, 15). Anhein busén wabéi lun gunda wamá le tímatimaati, mosu wadügüni katei kei lariñaguni Heowá. Gebegiti sákürifisiu le wadügübei lun Heowá lidan awanha lan etenira houn waduheñu ani óusera wamaña lau inebesei luma ínsiñeni (Rom. 12:10).

RU WAMÁ DÜGÜDAGUAÜ WÓUNIWAGUA LUN ÍTARA WAMÁ KEI NASARÉU

14. Kátima san gürigia lúnbaña wíchugun dǘgüdaguaü houn?

¹⁴ Sun ha busenbaña heseriwidun lun Heowá uguñe weyu mosu aranseñu wamá lun wadügün sákürifisiu lau ínsiñeni. Anihein dan hénrengubei lan. Ida luba san wíchugun dǘgüdaguaü wóuniwagua lun wadügün sákürifisiu luagu Heowá? Lau le wariñagubei (Hob. 16:5). Anihein san somu íbiri lidan damuriguaü le ñein hubéi le áfaagubei lun sensiyutima lan  libagari lun laganwoundagüdüni leseriwidun? Subuditi san somu nibureinti hun le arufudubei ganigi lun mítaran lan kei lánigu paaná leskuelarugu íbini hénrengu lan? Subuditi san somu íbiri hun o somu aturiahati Bíbülia le féridi láalibei hafulesein liduheñu ladüga úaragua lan lun Heowá? Yusu waméi sun chansi le wadarirun lun wíchugun dǘgüdaguaü houn luma lun wariñaguni houn weiri lan hebegi woun luagu ganigi le harufudubei luma luagu sákürifisiu le hadügübei luagu Heowá (Fil. 4, 5, 7).

15. Ka katei adüga hamaalibei fiu íbirigu lun híderaguniña ha eseriwidubaña lidan dan dayarüti?

¹⁵ Anihein dan gayara lan wíderaguniña wíbirigu ha eseriwidubaña lidan dan dayarüti lidan le hemegeirubei (Ari. 19:17; Ebü. 13:16). Ligía tadügübei aban íbiri derebuguharu to awinwanduboun Siri Lanka. Kei meha aba lan líchuguniwa lanwoun seinsu tun luagu dan le taubei awadigimarida, aba tíderaguniña biama íbirigu würiña ha nibureingiña ha meha lóuguabei haseinsun lun hasigirun eseriwida kei prekursorugu. Ligíati, sagü meha hati díreitu murusun seinsu lun tíderaguniña afayeirei lebegi hani gágamuru. Ma lubuidun katei le tadügübei íbiri úaraguatu to!

16. Ka larufudahabei hani nasaréugu hénpulu woun?

¹⁶ Furendeihadiwa saragu katei lídangiñe lubuidun hani nasaréugu hénpulu! Furendeitiwa giñe aban katei luagu Wáguchi le siélubei, Heowá. Subudi lumuti busén wamá tídangiñe sun wanigi wagundaaragüdüni ani aranseñu waña lan lun wadügün sákürifisiu lun wagunfulirun lau le füramase wabéi lun dan le wederegerubei woungua lun. Lanwoun lira, ruti aban lubuidun chansi woun lun warufuduni hínsiñe lan woun (Ari. 23:​15, 16; Mar. 10:​28-30; 1 Huan 4:19). Arufudati hani nasaréugu hénpulu woun, teni lan Heowá lun sákürifisiu le wadügübei lun weseriwidun lun ani weiri lan giñe lebegi lun. Ligíati, sigí wamá eseriwida lun Heowá luma lun wíchuguni le buítimabei wámagiñegua lun tídangiñe sun wanigi.