1. Unsang nindot nga hiyas ang gipakita sa mga magsisimba ni Jehova sukad pa sa una?

 IMO bang gipabilhan ang imong relasyon kang Jehova? Siyempre! Ug mao pod nay gibati sa uban. Sukad pa sa una, daghang tawo ang nagpabili sa ilang relasyon kang Jehova. (Sal. 104:​33, 34) Mihimo silag mga sakripisyo sa pagsimba kaniya. Kanay gihimo sa mga Nazareo sa karaang Israel. Kinsa sila, ug unsay atong makat-onan sa ilang ehemplo?

2. (a) Kinsa ang mga Nazareo? (Numeros 6:​1, 2) (b) Nganong ang pipila ka Israelinhon midesisyon nga mahimong Nazareo?

² Ang pulong nga “Nazareo” gikuha gikan sa Hebreohanong termino nga nagkahulogang “Usa nga Gipili,” “Usa nga Gilain,” o “Usa nga Gipahinungod.” Haom ni nga deskripsiyon sa madasigong mga Israelinhon kinsa mihimog personal nga mga sakripisyo aron alagaron si Jehova sa espesyal nga paagi. Gitugot sa Moisesnong Balaod nga ang usa ka tawo mohimog espesyal nga panaad kang Jehova pinaagi sa pagkinabuhi ingong Nazareo sulod sa pipila ka panahon. a (Basaha ang Numeros 6:​1, 2.) Apil niana nga seryosong panaad ang pagsunod sa pipila ka balaod nga dili kinahanglang sundon sa ubang Israelinhon. Busa nganong modesisyon ang usa ka Israelinhon nga mahimong Nazareo? Posible nga napalihok siya sa iyang dakong gugma kang Jehova ug kinasingkasing nga apresasyon sa mga panalangin nga iyang nadawat.—Deut. 6:5; 16:17.

3. Sa unsang paagi ang mga alagad sa Diyos karon parehas sa mga Nazareo?

³ Ang kahikayan sa pagka-Nazareo natapos dihang ang Moisesnong Balaod gipulihan sa “balaod sa Kristo.” (Gal. 6:2; Roma  10:4) Pero sama sa mga Nazareo, padayong gipakita sa mga alagad ni Jehova karon nga gusto kaayo nilang alagaron siya sa tibuok kasingkasing, kalag, hunahuna, ug kusog. (Mar. 12:30) Dihang nagpahinungod ta kang Jehova, kinabubut-on tang nanaad nga moalagad kaniya. Ang pagtuman ana nga panaad nagpasabot nga sundon nato ang kabubut-on ni Jehova ug mohimog mga sakripisyo. Karon, atong susihon kon giunsa pagtuman sa mga Nazareo ang ilang panaad. Dayon susihon nato ang importanteng mga leksiyon nga atong makat-onan aron matuman pod nato ang atong panaad. b—Mat. 16:24.

ANDAM MOSAKRIPISYO

4. Sumala sa Numeros 6:​3, 4, unsay gisakripisyo sa mga Nazareo?

⁴ Basaha ang Numeros 6:​3, 4. Ang mga Nazareo dili puwedeng moinom ug bino ug bisan unsang ilimnon nga gikan sa ubas. Dili pod sila puwedeng mokaon ug ubas ug raisin. Ang mga tawo sa ilang palibot puwede rang mokaon sa maong mga pagkaon kay wala ray sayop niini. Ang Bibliya nag-ingon nga ang “bino nga makapalipay sa kasingkasing sa tawo” maoy regalo gikan sa Diyos. (Sal. 104:​14, 15) Pero kinabubut-ong gisakripisyo sa mga Nazareo ang ilang katungod nga i-enjoy kining mga butanga. c

5. Unsang mga sakripisyo ang gihimo ni Madián ug Marcela, ug ngano?

⁵ Sama sa mga Nazareo, mihimo pod tag mga sakripisyo aron makaalagad kang Jehova nga mas bug-os pa. Konsideraha ang pananglitan ni Madián ug Marcela. d Komportable ang kinabuhi niining Kristohanong magtiayon. Si Madián naay maayong trabaho maong nagpuyo sila sa nindot nga apartment. Pero gusto silang mohimog dugang sa ilang pag-alagad kang Jehova. Aron makab-ot na nga tumong, mihimo silag mga kausaban. “Gimenosan namo ang among gasto,” sila miingon. “Mibalhin mi sa mas gamayng apartment ug gibaligya namo ang among sakyanan.” Dili kinahanglang himoon ni Madián ug Marcela ang maong mga sakripisyo, pero gihimo to nila aron mas bug-os silang makaalagad kang Jehova. Sila kontento ug mibatig kalipay sa mga desisyon nga ilang gihimo.

6. Nganong ang mga Kristohanon karon mihimog mga sakripisyo? (Tan-awa sab ang hulagway.)

 ⁶ Ang mga Kristohanon karon nalipay sa paghimog mga sakripisyo aron makagahin ug dugang panahon sa pag-alagad kang Jehova. (1 Cor. 9:​3-6) Si Jehova wala magsugo nga atong himoon kini nga mga sakripisyo, ug wala poy sayop niining mga butanga. Pananglitan, ang uban mibiya sa ilang ganahan nga trabaho, sa ilang balay, o sa ilang pinanggang hayop. Daghan ang midesisyon nga dili una magminyo o manganak. Ang uban midesisyon nga moalagad sa lugar nga mas dakog panginahanglan, bisag nagpasabot na nga mapalayo sila sa ilang mga minahal sa kinabuhi. Daghan nato ang kinabubut-ong mihimo niana nga mga sakripisyo kay gusto natong ihatag kang Jehova ang atong pinakamaayo. Makaseguro ka nga gipabilhan pag-ayo ni Jehova ang bisan unsang sakripisyo nga imong gihimo sa pag-alagad kaniya, gamay man kini o dako.—Heb. 6:10.

ANDAM NGA MAHIMONG LAHI

7. Ngano tingaling dili sayon para sa usa ka Nazareo nga tumanon ang iyang panaad? (Numeros 6:5) (Tan-awa sab ang hulagway.)

⁷ Basaha ang Numeros 6:5. Ang mga Nazareo nanaad nga dili magpaputol sa ilang buhok. Kana maoy usa ka paagi nga mapakita nila ang ilang bug-os nga pagpasakop kang Jehova. Depende sa gidugayon sa panaad sa usa ka Nazareo, ang iyang wala maputli nga buhok posibleng mamatikdan sa uban. Kon ang uban misuportar sa iyang desisyon nga mahimong Nazareo, dili tingali siya malisdan nga mahimong lahi. Pero makapaguol kay sa karaang Israel, dihay mga panahon nga ang mga Nazareo wala gipabilhan o gisuportahan. Sa panahon ni propetang Amos, ang apostatang mga Israelinhon ‘nagsigeg painom ug bino sa mga Nazareo,’ tingali kay gusto nila nga malapas sa mga Nazareo ang ilang panaad nga dili moinom ug bino. (Amos 2:12) Seguradong nagkinahanglan gyod ug kaisog ang usa ka Nazareo aron matuman niya ang iyang panaad ug mahimong lahi sa uban.

8. Nganong makapadasig ang eksperyensiya sa bata nga si Benjamin?

⁸ Sa tabang ni Jehova, makabaton pod tag kaisog nga mahimong lahi sa uban bisan pag maulawon ta. Konsideraha ang pananglitan ni Benjamin, 10 anyos nga Saksi sa Norway. Tungod sa gubat sa Ukraine, ang ilang eskuwelahan naghimog programa aron ipakita ang ilang suporta sa mga taga-Ukraine. Ang mga bata gisugo nga mokanta samtang nagsul-ob ug sinina nga parehas ug kolor sa flag sa Ukraine. Aron dili makaapil nianang nasyonalistikong programa, midesisyon si Benjamin nga mopalayog gamay. Pero nakit-an siya sa maestra ug gisinggitan siya: “Ali diri! Gahulat mi nimo.” Si  Benjamin miduol sa maestra ug miingon: “Neyutral ko, ug dili ko moapil sa mga kalihokan nga konektado sa politika. Gani, daghang Saksi ni Jehova ang napriso kay dili sila moapil sa gubat.” Gidawat sa maestra ang iyang eksplinasyon ug wala na siya paapila. Pero gipangutana siya sa iyang mga classmate kon nganong wala siya moapil. Puwerteng kulbaa ni Benjamin ug kahilakon na siya, pero maisogon niyang gisulti sa tibuok klase kon unsay iyang giingon sa maestra. Human ana, gisultihan ni Benjamin ang iyang mga ginikanan nga gibati niya nga gitabangan siya ni Jehova nga madepensahan ang iyang pagtuo.

9. Sa unsang paagi mapalipay nato ang kasingkasing ni Jehova?

⁹ Kay midesisyon ta nga sundon ang kabubut-on ni Jehova, lahi ta sa mga tawo sa atong palibot. Sa trabahoan o eskuwelahan, nagkinahanglag kaisog ang pagpaila nga mga Saksi ni Jehova ta. Ug samtang nagkagrabe ang kinaiya ug binuhatan sa mga tawo sa kalibotan, mas malisdan tingali ta sa pagkinabuhi uyon sa mga prinsipyo sa Bibliya ug sa pagsangyaw sa maayong balita ngadto sa uban. (2 Tim. 1:8; 3:13) Pero hinumdomi kanunay nga atong ‘mapalipay ang kasingkasing’ ni Jehova kon mobarog tang lig-on bisag malahi ta sa uban nga wala mag-alagad kaniya.—Prov. 27:11; Mal. 3:18.

UNAHA SI JEHOVA SA IMONG KINABUHI

10. Nganong dili tingali sayon para sa mga Nazareo nga sundon ang sugo sa Numeros 6:​6, 7?

¹⁰ Basaha ang Numeros 6:​6, 7. Ang mga Nazareo dili puwedeng moduol sa patayng lawas. Makaingon tingali ta nga sayon ra nang sundon. Pero sa panahon sa Bibliya, lisod gyod tingali para sa mga Nazareo nga sundon ni nga sugo kon suod nga membro sa pamilya ang namatay. Niadtong panahona, andamon sa pamilya ug mga higala ang lawas una kini ilubong, busa kinahanglan gyong moduol sa patayng lawas. (Juan 19:​39, 40; Buh. 9:​36-40) Pero kay nanaad man ang mga Nazareo, dili nila ni puwedeng himoon. Makapaguol kaayo ni nga panahon para sa ilang pamilya, pero ang mga Nazareo nagpakitag lig-ong pagtuo pinaagi sa pagtuman sa ilang panaad. Seguradong gipalig-on ni Jehova kining maunongong mga magsisimba sa pag-atubang sa ilang mga kalisdanan.

11. Dihang mohimog mga desisyon maylabot sa pamilya, unsay kinahanglang determinadong himoon sa usa ka Kristohanon? (Tan-awa sab ang hulagway.)

¹¹ Ingong mga Kristohanon, seryoso para nato ang atong panaad nga alagaron si Jehova. Makaapektar ni sa mga desisyon nga atong  himoon maylabot sa atong pamilya. Naningkamot ta nga atimanon ang atong mga responsibilidad sa pamilya, pero angay natong unahon ang pagtuman sa mga sugo ni Jehova imbes ang pagsunod sa gusto sa atong pamilya. (Mat. 10:​35-37; 1 Tim. 5:8) Usahay, nagpasabot na nga mohimo tingali tag mga desisyon nga dili makapalipay sa atong pamilya pero makapalipay kang Jehova.

12. Sa lisod nga situwasyon nga giatubang ni Alexandru, unsay iyang gihimo ug wala himoa?

¹² Konsideraha ang eksperyensiya ni Alexandru ug sa iyang asawa nga si Dorina. Nagpa-Bible study sila, pero paglabayg usa ka tuig, miundang si Dorina ug gusto niya nga moundang pod si Alexandru. Pero kalmado ug matinahorong giingnan ni Alexandru ang iyang asawa nga mopadayon siya. Wala malipay si Dorina, ug gilisodlisod niya ang iyang bana aron mohunong sa pag-study. Si Alexandru miingon nga naningkamot siya nga sabton ang reaksiyon sa iyang asawa, pero dili to sayon. Naay mga higayon nga insultohon ug sultihan siya ni Dorina ug sakit nga mga pulong, maong usahay makahunahuna siya nga moundang na lang sa pag-Bible study. Pero padayong giuna ni Alexandru si Jehova, samtang nagpakitag dakong gugma ug pagtahod sa iyang asawa. Sa ulahi, ang iyang maayong ehemplo nakadasig sa iyang asawa nga magpa-Bible study pag-usab, ug sa ngadtongadto, gidawat niya ang kamatuoran.—Tan-awa sa jw.org ang video nga Alexandru ug Dorina Văcar: “Ang Gugma Taas ug Pailob ug Maayo” sa serye nga “Ang Kamatuoran Makausab sa Kinabuhi.”

13. Unsaon nato pagpakitag gugma kang Jehova ug sa atong pamilya?

¹³ Si Jehova ang naghimo sa kahikayan sa pamilya, ug gusto niya nga magmalipayon ang atong pamilya. (Efe. 3:​14, 15) Aron tinuod tang magmalipayon, kinahanglang sundon nato si Jehova. Makasalig gyod ka nga gipabilhan pag-ayo ni Jehova ang mga sakripisyo nga imong gihimo sa pag-alagad kaniya samtang naningkamot ka nga atimanon ang imong pamilya ug pakitaan silag gugma ug pagtahod.—Roma 12:10.

DASIGA ANG UBAN NGA SUNDOGON ANG MGA NAZAREO

14. Kinsay ilabinang angay natong dasigon?

¹⁴ Ang tanan nga mipili sa pagsimba kang Jehova karon kinahanglang andam mohimog mga sakripisyo tungod sa gugma. Usahay, lisod nang himoon. Busa unsaon nato pagtabang ang uban nga mohimog mga sakripisyo para kang Jehova? Pinaagi sa atong makapadasig nga mga pulong. (Job 16:5) Naa bay pipila diha sa inyong kongregasyon nga naningkamot nga magpasimple sa ilang kinabuhi  aron mas daghan silag mahimo sa pag-alagad kang Jehova? Naa ba kay nailhang mga batan-on nga naningkamot nga mahimong lahi sa uban diha sa eskuwelahan, bisan pag lisod nang himoon? Komosta ang mga Bible study ug mga igsoon nga naningkamot nga magpabiling matinumanon bisag gisupak sa ilang pamilya? Pahimuslan nato ang tanang kahigayonan nga dasigon ang maong minahal nga mga igsoon ug sultihan sila nga naapresyar nato ang ilang kaisog ug mga sakripisyo.—Filem. 4, 5, 7.

15. Giunsa pagtabang sa uban kadtong naa sa bug-os panahong pag-alagad?

¹⁵ Usahay, makahatag tingali tag praktikal nga tabang sa atong mga igsoon nga naa sa bug-os panahong pag-alagad. (Prov. 19:17; Heb. 13:16) Mao nay gusto kaayong himoon sa matinumanong edaran nga sister nga taga-Sri Lanka. Nadugangan ang iyang pension, ug gusto niyang tabangan ang duha ka batan-ong sister aron makapadayon sila sa ilang pagpayunir bisag naglisod sa pinansiyal. Busa midesisyon siya nga maggahin ug kuwarta kada bulan aron tabangan sila sa ilang mga bayronon sa telepono. Pagkanindot sa ginahimo niini nga sister!

16. Unsay atong makat-onan sa kahikayan sa pagka-Nazareo?

¹⁶ Daghan gyod tag makat-onan sa maayong ehemplo sa mga Nazareo! Pero kini nga kahikayan naa poy gipakita bahin sa atong langitnong Amahan, si Jehova. May pagsalig siya nga gusto gyod nato siyang mapalipay ug nga andam tang mohimog mga sakripisyo aron matuman nato ang atong panaad sa pagpahinungod. Gipasidunggan ta niya pinaagi sa paghatag natog kahigayonan nga ipakita ang atong gugma kaniya sa personal nga paagi. (Prov. 23:​15, 16; Mar. 10:​28-30; 1 Juan 4:19) Ang kahikayan sa pagka-Nazareo nagpakita nga nahibalo si Jehova sa mga sakripisyo nga atong gihimo sa pag-alagad kaniya ug nga iya gyod nang gipabilhan. Busa hinaot nga magmadeterminado ta nga padayong alagaron si Jehova ug kinabubut-ong ihatag kaniya ang atong kinamaayohan.