1. Ifa ewe mettóch chón fel ngeni Jiowa seni lóóm tori iei ra pwáári?

 KA AÚCHEANI óm riri ngeni Jiowa? Ewer, ka fókkun aúcheani! Me esap chék en ka meefi ena. Seni fansoun lóóm, a wor chómmóng aramas ra pwal ina ussun. (Kölf. 104:​33, 34) Chómmóng ra pennúkúóló ekkóch mettóch pwe repwe fel ngeni Jiowa. Ina met ekkewe Nasir ra féri lón fansoun Israel lóóm. Ié ekkena Nasir, me met sia tongeni káé seni ar leenien áppirú?

2. (a) Ié ekkewe Nasir? (Numperis 6:​1, 2) (b) Pwata ekkóch chón Israel ra filaatá ar repwe Nasir?

² Ewe kapas “Nasir” a feito seni ewe kapasen Ipru mi wewe ngeni “Emén mi Kefililó,” “Emén mi Káimuuló,” are “Emén mi Kefilitá fán Iten Eú Angang mi Aúchea.” Ekkewe Nasir, iir chón Israel mi tinikken mi pennúkúóló ekkóch mettóch lón pwisin manawer pwe repwe angang ngeni Jiowa lón eú napanap mi kkóló aúchean. Ewe Allúkún Moses a mut ngeni emén mwán are fefin an epwe eáni eú pwon ngeni Jiowa ren an filaatá an epwe emén Nasir ren úkúúkún och fansoun. a (Álleani Numperis 6:​1, 2.) Lupwen emén chón Israel a pwon pwe epwe emén Nasir, a lamot epwe fiti ekkóch emmwen ese lamot án meinisin chón Israel repwe pwal álleasochisi. Iwe, pwata ekkóch chón Israel ra filaatá ar repwe wiliiti Nasir? Ese mwáál, pokiten a fókkun péchékkúl ar tongei Jiowa me mochen pwáári ar enletin kilisou ren an awora chómmóng liffang mi múrinné.—Tut. 6:5; 16:17.

3. Ifa ussun néún Kot kewe aramas lón ei fansoun ra ussun ekkewe Nasir?

³ Ewe kókkótun Nasir a kamwóló atun “ewe allúkún Kraist” a siwili ewe Allúkún Moses. (Kal. 6:2; Rom 10:4) Iwe nge, néún  Jiowa kewe aramas lón ei fansoun ra ussun ekkewe Nasir le sópweeló le pwáári ar enletin mochen angang ngeni i seni unusen letiper, manawer, ekiekiir, me péchékkúler. (Mark 12:30) Atun sia fangoló manawach ngeni Jiowa, sia pwon pwe sipwe angang ngeni. Ren ach sipwe etipeeúfengeni manawach ngeni ach na pwon, a lamot sipwe apwénúetá letipen Jiowa me pennúkú ekkóch mettóch pwe sipwe angang ngeni. Atun ach etittina ifa ussun ekkewe Nasir ra apwénúetá met ra eáni pwon, sia tongeni káé ekkewe lesen mi aúchea ren ifa ussun sipwe apwénúetá met sia eáni pwon. b (Mat. 16:24) Iei sipwele ppii ekkóch ar kewe leenien áppirú.

TIPEMECHERES LE PENNÚKÚÓLÓ EKKÓCH METTÓCH

4. Me ren Numperis 6:​3, 4, met ekkewe Nasir ra pennúkúóló?

⁴ Álleani Numperis 6:​3, 4. Ese mumu ngeni ekkewe Nasir ar repwe ún sakaw are wain, me ochooch choweán grape me raisin. Ekkóch ekkewe chón Israel, ra kan ún sakaw are wain me ochooch grape me raisin pún ese pwal wor ngawen ekkena mettóch. Ren enletin, ewe Paipel a áiti ngenikich pwe wain ina eú liffang me ren Kot me apasa pwe a “apwapwai letipen aramas.” (Kölf. 104:​14, 15) Iwe nge, ekkewe Nasir ra tipemecheres le pennúkúóló ar mochen pwapwaiti ekkena esin mettóch. c

5. Met sókkun siwil Madián me Marcela ra filaatá le féri, me pwata?

⁵ Kich sia pwal ussun ekkewe Nasir le pennúkúóló chómmóng mettóch pwe sipwe alapaaló ach angang ngeni Jiowa. Ekieki pwóróusen Madián me Marcela. d A nónnóméch manawen ei pean pwúpwúlú Chón Kraist. Madián a eáni eú angang mi múrinné ina popun ra tongeni nóm lón eú apartment mi fókkun ling. Iwe nge, ra mochen alapaaló ar angang ngeni Jiowa. Ren ar repwe féri ena, ra filaatá ar repwe féri ekkóch siwil. Iei met ra apasa: “Áúa poputá le akúkkúnaló ám moni towu.” Ra pwal erá: “Áúa mwékút ngeni eú kúkkún apartment me améméló wáám we tarakú.” Ese pwal lamot án Madián me Marcela repwe féri ekkena siwil, nge ra filaatá le féri pokiten ra mochen alapaaló ar fiti ewe angangen afalafal. Ra menemenéch me pwapwa ren ar féri ena kefil.

6. Pwata Chón Kraist lón ei fansoun ra pennúkúóló ekkóch mettóch? (Pwal ppii ewe sasing.)

 ⁶ Néún Jiowa aramas lón ei fansoun ra pwapwa le pennúkúóló ekkóch mettóch pwe epwe lapóló ar fansoun lón ar angang ngeni. (1 Kor. 9:​3-6) Jiowa ese erenikich ach sipwe pennúkúóló ekkena mettóch, me ese erenikich pwe mi ngaw ekkena mettóch sia pennúkúóló. Áwewe chék, ekkóch ra filaatá ar resap kaú imwer, néúnéú man, ren choweán kolak are káttu, are eáni eú angangen moni ra fókkun sani. Chómmóng ra filaatá ar repwe chék mwo lipich, are resap mwo néúnéú mwirin ar pwúpwúlú. Ekkóch ra filaatá ar repwe álillis ikewe mi osupwangen chón afalafal ie inaamwo iká repwe towaw seni chón ar kewe famili. Chómmóng me leich sia tipemecheres le pennúkúóló ekkena mettóch pokiten sia mochen angang ngeni Jiowa úkúúkún ach tongeni. Kopwe lúkúlúk pwe Jiowa a fókkun aúcheani ese lifilifil met, kúkkún are watte, ka filaatá le pennúkúóló pwe kopwe alapaaló óm angang ngeni.—Ipru 6:10.

KOPWE TIPEMECHERES LE ASÓKKAKÓLÓ SENI EKKEWE EKKÓCH

7. Met sókkun sóssót a tongeni áweiresi emén Nasir an epwe apwénúetá an pwonen Nasir? (Numperis 6:5) (Pwal ppii ewe sasing.)

⁷ Álleani Numperis 6:5. Ekkewe Nasir ra pwon ar resap fichi mékúrer. Ina eú alen ar pwáári pwe ra nóm fán án Jiowa emmwen. Iká emén chón Israel a Nasir ren fansoun langattam, iwe epwe ttamoló mékúran me neman epwe mecheres án ekkewe ekkóch repwe esilla ena. Iká ekkewe ekkóch repwe súféliti me pesei ngeni an epwe apwénúetá an we pwonen Nasir, iwe epwe mecheres ngeni an epwe sókkóló seniir. Iwe nge, a eletipechou pwe a wor ekkóch atun lón uruwoon chón Israel atun aramas ra ésúfélúngawa ekkewe Nasir me rese mochen álisiir. Atun fansoun ewe soufós Amos, ekkewe chón Israel iir chón rikiló ra kan “aünü ngeni ekewe Nasir wain,” pún eli ra mochen atai ar we pwon ar resap ún wain. (Am. 2:12) Fán ekkóch, a lamot ngeni emén Nasir an epwe tipepwora pwe epwe tongeni apwénúetá an pwon me asokkaaló seni ekkewe ekkóch.

8. Ifa ussun pwóróusen Benjamin a apéchékkúlok?

⁸ Ren án Jiowa álillis, kich sia pwal tongeni tipepwora ren ach asókkakicheló seni ekkewe ekkóch inaamwo iká kich mi nisássáw. Ekieki pwóróusen Benjamin, emén Chón Pwáraatá lón Norway engol ierin. An we sukul a féri och mettóch mi pwáári ar penaatá Ukraine lón maun. Ekkewe chón sukul ra eáni eché kél me úféúf úf anúwen ewe filáiken Ukraine. Benjamin a akkóta an esap fiti ena kókkót ren an nóm towaw seni ikewe ia epwe fis ie. Iwe nge,  emén sense a kúna me a léúwommóng le apasa: “Kopwe feito me fitikem iei. Ám meinisin áúa chék wituk!” Fán pwora, Benjamin a feiló ren ewe sense me ereni: “Ngang úse kan peni eú pekin me úse angolong lón mwékútúkútún mwúún fénúfan. Ren enletin, chómmóng Chón Pwáraatá Jiowa ra kalapus pokiten rese mochen fiti maun.” Ewe sense a tipeeú ngeni met Benjamin a áweweei ngeni me a ereni pwe esap fitiir. Iwe nge, chienan kewe chón sukul ra poputá le eisini iká pwata ese fitiir. Benjamin a fókkun niwokkus ina popun chippú epwe kechiw. Iwe nge, a ereni chón an we class met ewe e pwal ereni ewe sense. Mwirin ena, Benjamin a ereni seman kewe me inan pwe a meefi pwe Jiowa a álisi le penaatá met a eáni lúkú.

9. Ifa ussun sia tongeni apwapwaai letipen Jiowa?

⁹ Pokiten sia filaatá ach sipwe álleasochisi Jiowa, ekkóch ra esilla pwe sia sókkóló seniir. A lamot ngenikich tipepwora pwe sipwe ereni chienach kewe chón angang are chón sukul pwe kich Chón Pwáraatá Jiowa. Pokiten a lallapoló ngawen ekiekin me napanapen chón ei fénúfan, iwe eli epwe weiresiló ach sipwe etipeeú manawach ngeni án Paipel kapasen emmwen me áiti ngeni aramas ewe kapas allim. (2 Tim. 1:8; 3:13) Iwe nge, fansoun meinisin sipwe chemeni pwe sia ‘apwapwai leluken’ Jiowa atun sia tipepwora le asókkakicheló seni chókkewe rese angang ngeni.—SalF. 27:11; Mal. 3:18.

AKKOMWA JIOWA LÓN MANAWOM

10. Ifa ussun án ekkewe Nasir fiti ewe allúk lón Numperis 6:​6, 7 a eú sóssót ngeniir?

¹⁰ Álleani Numperis 6:​6, 7. Ekkewe Nasir rese tongeni nóm únúkkún emén somá. Iwe nge, lón fansoun lóóm, a eú watteen sóssót ngeni emén Nasir atun emén chón an famili a máló. Lón ena fansoun, eú éérenien wóón mi má, ina án aramasen ewe mi má repwe nóm únúkkún. (Jon 19:​39, 40; Féf. 9:​36-40) Iwe nge, emén Nasir ese kan fiti ena esin ééreni. Pwal mwo nge atun án ekkewe Nasir nóm lón fansoun watteen weires, iir ra pwáári watteen ar lúkú ren ar fitipachei minne ra eáni pwon. Ese wor tipemwárámwár pwe Jiowa a apéchékkúla ekkena chón angang ngeni mi túppwél pwe repwe likiitú fán ekkena esin osukosuk mi toriir.

11. Met a lamot emén Chón Kraist epwe tipeppós le féri atun a féri kefil mi weneiti an famili? (Pwal ppii ewe sasing.)

¹¹ Kich Chón Kraist, sia fókkun aúcheani ach pwonen fangoló manawach ngeni Jiowa.  Ena, a kkúú ach féffér me minne sia eáni kefil mi weneiti ach famili. Sia angang weires le awora met mi lamot ngeni ach kewe famili, iwe nge sise fókkun akkomwa mochenin chón ach famili lap seni met Jiowa a tipeni senikich. (Mat. 10:​35-37; 1 Tim. 5:8) Fán ekkóch, neman sipwe féri kefil epwe eletipengawa aramasach kewe nge a fen apwapwaai Jiowa.

12. Atun a ppiitá eú osukosuk lón án Alexandru we famili, met a féri me met ese féri?

¹² Ekieki pwóróusen Alexandru me pwúlúwan ei itan Dorina. Mwirin ar káé ewe Paipel ren úkúúkún eú ier, Dorina a filaatá an epwele kaúló le káé, me a mochen án Alexandru epwe pwal kaúló. Iwe nge, fán mosonoson me kinamwe Alexandru a ereni pwe epwe chék sópwósópwoló le káé. Dorina ese sani met a apasa, me a echchimwa an epwe úkútiw. Alexandru a erá pwe a achocho le weweiti popun an ina ussun, nge ese mecheres ngeni. Fán ekkóch, atun Dorina a ákkápii me pélúweni fán arochongaw, a meefi pwe a mochen fangetá lón an káé ewe Paipel. Nge Alexandru a sópweeló le akkomwa Jiowa, me a pwal pwáári an fókkun tongei pwúlúwan na me súféliti. Ló, ló, ló, an leenien áppirú mi múrinné a amwékútú Dorina an epwe poputásefál le káé ewe Paipel, iwe mwirin och fansoun neminna a papatais.—Tétá wóón jw.org me katol ewe video Alexandru and Dorina Văcar: “Love Is Patient and Kind” fán ewe kinikin itelapan “Truth Transforms Lives.”

13. Ifa ussun sia tongeni pwáári ach tongei Jiowa me chón ach famili?

¹³ Jiowa a féraatá ewe kókkótun famili me a mochen ach famili epwe pwapwa. (Efi. 3:​14, 15) Iká sia mochen enletin pwapwa, a lamot sipwe féri ekkewe mettóch Jiowa a mochen sipwe féri. Kopwe lúkúlúk pwe Jiowa a aúcheani minne ka achocho le pennúkúóló pwe kopwe fel ngeni atun óm túmúnú óm famili me pwáári óm tongeer me súfélitiir.—Rom 12:10.

APÉCHÉKKÚLAFENGENIKICH PWE SIPWE USSUN EKKEWE NASIR

14. Ié kewe a ákkáeúin lamot ach sipwe achocho le apéchékkúler lón ach kapas?

¹⁴ Lón ei fansoun, a lamot ngeni meinisin chókkewe mi filaatá ar repwe angang ngeni Jiowa ar repwe tipemecheres le pennúkúóló mocheniir pokiten ar tongei i. Fán ekkóch, ese mecheres ar féri ena. Ifa ussun sia tongeni álillisfengen le pennúkúóló mochenich fán iten Jiowa? Ina ren ach apéchékkúlafengenikich lón ach kapas. (Hiop 16:5) Mi wor ekkóch lón óm we mwichefel iir mi achocho le ámecheresaaló nónnómur pwe repwe tongeni alapaaló ar angang ngeni Jiowa? Ka  silei ekkewe chón sukul mi pwáári ar pwora lón sukul ren ar resap ussun chiener kewe, inaamwo iká a weires ngeniir? Nge ifa ussun ren ekkewe chón káé me chienach kewe lón ewe mwichefel iir mi kúna sóssótun ar túppwél seni chón ar famili? Sipwe achocho le kútta alen ach sipwe apéchékkúla chienach kana mi áchengicheng me ereniir pwe sia aúcheani ar tipepwora me met ra féri fán iten Jiowa.—Filim. 4, 5, 7.

15. Ifa ussun ekkóch ra álisi chókkewe mi angang ngeni Jiowa full-time?

¹⁵ Fán ekkóch, neman sia tufichin awora álillis ngeni chienach kewe Chón Kraist mi angang ngeni Jiowa full-time. (SalF. 19:17; Ipru 13:16) Ina met emén chienach chinnap fefin mi túppwél lón Sri Lanka a fókkun mochen féri. A ekis watteeló an peioffun social me a mochen álisi rúúemén fépwúl pioneer pwe repwe sópweeló ar angangen afalafal inaamwo iká mi áweires ar atufichi manawer. Ina minne, a filaatá an epwe awora ngeniir ekis moni iteiten maram pwe epwe álisiir le méénatiw liwinin néúr we phone. A ifa me múrinnéén féfférún neminna!

16. Met sia tongeni káé seni ekkewe Nasir lóóm?

¹⁶ A chómmóng met sia tongeni káé seni ekkewe mettóch mi múrinné ekkewe Nasir lóóm ra féri! Iwe nge, ach káé pwóróusen ekkewe Nasir, a pwal áiti ngenikich och mettóch ussun Semach we lón láng, Jiowa. I a silei pwe sia fókkun mochen apwapwaai letipan me tipemecheres le pennúkú ekkóch mettóch pwe sipwe apwénúetá ach pwonen fangoló manawach ngeni. A aúcheanikich ren an mut ngenikich ach sipwe filaatá ifa ussun sipwe pwáári ach tongei. (SalF. 23:​15, 16; Mark 10:​28-30; 1 Jon 4:19) Ewe kókkótun Nasir a pwáári pwe Jiowa a kúna me aúcheani met sia pennúkúóló pwe sipwe angang ngeni. Iwe, amwo sipwe tipeppós le sópweeló ach angang ngeni Jiowa me tipemecheres le angang ngeni úkúúkún ach tongeni.