1. Ki leta lespri bann serviter Zeova in annan tou dilon listwar?

 ESKI ou apresye ou lanmitye avek Zeova? Byensir. I annan lezot ki santi parey. Tou dilon listwar en kantite dimoun in santi parey avek ou. (Ps. 104:33, 34) En kantite dimoun in fer bann sakrifis pour ador Zeova. I sanmenm ki bann Nazireen dan letan ansyen Izrael ti fer. Lekel bann Nazireen e ki nou kapab aprann avek zot legzanp?

2. (a) Lekel bann Nazireen? (Nonm 6:1, 2) (b) Akoz serten Izraelit ti swazir pour vin en Nazireen?

² Sa mo “Nazireen” i sorti dan sa term Ebre ki vedir sa enn ki’n ganny met apar, separe oubyen dedye. Bann Nazireen ti bann Izraelit ki ti fer serten sakrifis pour servi Zeova dan en fason spesyal. Dapre Lalwa Moiz, en zonm oubyen en madanm ti kapab fer en ve spesyal avek Zeova pour viv konman en Nazireen pour en peryod letan. a (Lir Nonm 6:1, 2.) Ler en Izraelit ti fer sa ve pour viv konman en Nazireen, i ti swiv bann lenstriksyon ki larestan bann Izraelit pa ti bezwen swiv. Alor akoz en Izraelit ti pou swazir pour vin en Nazireen? I tre probab ki en Izraelit ti fer sa ve parski i kontan Zeova en kantite e i ti rekonesan pour bann bon keksoz ki Zeova i fer.—Det. 6:5; 16:17.

3. Ki mannyer pep Zeova ozordi i parey bann Nazireen?

³ Pep Bondye ti nepli kapab vin bann Nazireen ler Lalwa Moiz ti ganny ranplase par “lalwa Kris.” (Gal. 6:2; Rom. 10:4) Me parey bann Nazireen, ozordi pep Zeova i kontinyen montre ki zot anvi servi Zeova avek tou zot leker, nanm, lespri ek lafors. (Mark 12:30) Nou volonterman  fer en ve pour servi Zeova ler nou dedye nou lavi avek li. Pour viv an armoni avek sa ve ki nou’n fer, nou bezwen fer lavolonte Zeova e fer bann sakrifis pour nou kapab servi li. Anmezir nou vwar lafason ki bann Nazireen ti viv an armoni avek zot ve, nou kapab aprann bann leson enportan lo ki mannyer nou osi nou kapab viv an armoni avek nou ve. b (Mat. 16:24) Annou vwar serten legzanp.

PARE POUR FER BANN SAKRIFIS

4. Dapre Nonm 6:3, 4, ki sakrifis bann Nazireen ti fer?

⁴ Lir Nonm 6:3, 4. Bann Nazireen ti napa drwa bwar lalkol e manz bann keksoz parey rezen fre oubyen sek. Bann dimoun otour zot ti kontan manz sa bann keksoz e zot ti annan drwa fer li vi ki i ti napa nanryen mal avek sa bann keksoz. Anfet, Labib i dekri diven konman en kado sorti kot Bondye e i dir ki diven i “fer dimoun zwaye.” (Ps. 104:14, 15) Menm si sa bann keksoz ti kapab fer lavi en dimoun pli gou, bann Nazireen ti pare pour pa servi sa bann keksoz. c

5. Ki serten sakrifis Madián ek Marcela ti fer e akoz?

⁵ Parey bann Nazireen, nou osi nou fer bann sakrifis pour nou kapab fer plis pour Zeova. Annou vwar legzanp en koup ki apel Madián ek Marcela. d Zot ti annan en lavi konfortab. Madián ti annan en travay ki pey byen e zot ti reste dan en zoli apartman. Me zot ti anvi fer plis dan zot servis pour Zeova. Pour arive fer sa zot ti deside pour fer serten sanzman. Zot dir: “Nou ti konmans depans mwens larzan. Nou ti al reste dan en pli pti apartman e nou ti vann nou transpor.” Madián ek Marcela pa ti oblize fer sa bann sakrifis. Me zot ti swazir pour fer sa parski sa ti pou permet zot fer plis dan zot servis pour Zeova. Zot kontant zot avek sa ki zot annan e zot kontan ki zot in fer sa bann desizyon.

6. Akoz bann Kretyen ozordi i fer bann sakrifis? (Vwar portre.)

⁶ Ozordi pep Zeova i kontan pour fer  bann sakrifis pour zot annan plis letan pour servi Zeova. (1 Kor. 9:3-6) Zeova pa pe demann nou pour fer sa bann sakrifis e bann keksoz ki nou swazir pour kit deryer pa bann move keksoz. Par egzanp, serten i swazir pour pa annan zot prop lakaz, en zannimo oubyen en travay ki zot ti vreman anvi. En kantite frer ek ser in deside pour reste selibater pour plis letan oubyen pour pa fer zanfan deswit apre ki zot in marye. Lezot in swazir pour al servi dan bann landrwa kot i annan bezwen pour plis proklanmater menm si sa i vedir ki zot pou reste lwen avek zot bann fanmir ek zanmi. En kantite parmi nou i pare pour fer bann sakrifis koumsa parski nou anvi donn Zeova nou meyer. Nou kapab asire ki Zeova i vreman apresye nenport sakrifis ki swa pti oubyen gran, ki nou swazir pour fer pour nou servi li.—Ebr. 6:10.

PARE POUR DIFERAN AVEK LEZOT

7. Akoz parfwa i ti kapab difisil pour en Nazireen gard son ve? (Nonm 6:5) (Vwar portre.)

⁷ Lir Nonm 6:5. Bann Nazireen ti fer en ve pour pa koup zot seve. Sa ti en fason pour montre zot lobeisans anver Zeova. Si en Izraelit ti en Nazireen pour en kantite letan, son seve ti pou vin gran e lezot ti pou fasilman remarke. Si lezot ti respekte e ankouraz li pour gard son ve, i ti pou pli fasil pour en Nazireen fer sa. Malerezman, parfwa lezot pa ti apresye bann Nazireen oubyen donn zot sipor. Dan letan profet Amos, bann Izraelit ki ti bann aposta “ti kontinyen donn bann Nazireen diven pour bwar.” I tre probab ki sa bann aposta ti fer sa pour fer bann Nazireen kas sa ve ki zot ti’n fer pour pa bwar diven. (Amos 2:12) Parfwa en Nazireen ti bezwen annan bokou kouraz pour gard son ve e pour diferan avek lezot.

8. Kwa ki’n ankouraz ou avek leksperyans Benjamin?

⁸ Avek led Zeova, nou osi nou kapab ganny kouraz pour vin diferan avek lezot menm si nou en dimoun ki kanmi. Annou vwar legzanp Benjamin, en frer ki annan di-z-an e ki reste Norway. Son lekol ti organiz en levennman pour montre zot sipor pour bann dimoun ki reste Likrenn ki en landrwa kot i annan lager. Bann zanfan ti ganny demande pour abiy dan kouler paviyon Likrenn e pour sant en sanson. Benjamin ti reste lwen avek kot zot ti ete pour li pa partisip dan sa levennman. Me en ansenyan  ti vwar li e i ti koz for avek li. I ti dir li: “Ou bezwen vin zwenn ansanm avek nou aprezan. Nou tou nou pe esper ou!” Avek kouraz, Benjamin ti apros sa ansenyan e i ti dir: “Mon pa pran kote e mon pa partisip dan bann zafer politik. Anfet en kantite Temwen Zeova i dan prizon akoz zot refize pour al lager.” Sa ansenyan ti aksepte lopinyon Benjamin e i ti dir li ki i pa bezwen partisip dan sa levennman. Me son bann kanmarad lekol ti konmans demann li akoz ki i pa pe zwenn ansanm avek zot. Benjamin ti telman per ki i ti pros pour plere me kantmenm sa, i ti dir son bann kanmarad lekol sa menm parol ki i ti’n dir son ansenyan. Pli tar, Benjamin ti dir son paran ki i ti’n santi ki Zeova ti’n ed li pour defann son krwayans.

9. Ki mannyer nou kapab fer Zeova plezir?

⁹ Vi ki nou swazir pour obei Zeova, lezot i remarke ki nou diferan avek zot. Nou bezwen annan kouraz pour dir avek lezot ki swa kot lekol oubyen dan travay ki nou en Temwen Zeova. Anmezir ki latitid ek konportman bann dimoun dan sa lemonn i vin pli move, i tre probab ki nou pou vwar li pli difisil pour viv dapre bann prensip Labib e pour anons sa bon nouvel avek lezot. (2 Tim. 1:8; 3:13) Me toultan gard antet ki ler nou demontre kouraz e nou diferan avek bann ki pa servi Zeova, nou “fer [Zeova] plezir.”—Prov. 27:11; Mal. 3:18.

KONTINYEN MET ZEOVA PREMYE DAN OU LAVI

10. Akoz i ti’n kapab difisil pour bann Nazireen swiv sa lord dan Nonm 6:6, 7?

¹⁰ Lir Nonm 6:6, 7. Bann Nazireen pa ti kapab al o bor en lekor mor. Petet nou kapab mazinen ki sa pa ti en gro sakrifis. Me dan letan Labib, i ti pou vreman difisil pour en Nazireen fer sa ler en manm son fanmir i mor. Souvandfwa, dan bann koutim lanterman sa letan, dimoun ti bezwen vin o bor en lekor mor. (Zan 19:39, 40; Akt 9:36-40) Me en Nazireen pa ti kapab swiv sa koutim. Menm ler bann Nazireen ti dan gran latristes, zot ti reste fidel. Nou kapab asire ki Zeova ti donn sa bann serviter fidel lafors pour zot kapab andire.

11. Ki en Kretyen i bezwen determinen pour fer ler i pe fer desizyon konsernan son fanmir? (Vwar portre.)

 ¹¹ Konman bann Kretyen, nou pran o serye nou ve ki nou’n fer avek Zeova. Sa i annan en lefe lo nou bann desizyon ek bann keksoz ki nou fer ki konsern lafanmir. Nou fer nou mye pour pran swen avek nou fanmir me nou pa zanmen met sa ki nou fanmir i anvi avan sa ki Zeova i demann nou pour fer. (Mat. 10:35-37; 1 Tim. 5:8) Parfwa, i kapab ki nou bezwen fer bann desizyon ki nou fanmir pa kontan pour nou fer Zeova plezir.

12. Ki Alexandru ti fer e ki i pa ti fer ler sityasyon dan son fanmir ti difisil?

¹² Annou vwar leksperyans Alexandru ek son madanm, Dorina. Apre ki sa koup ti’n etidye Labib pour enn an, Dorina ti deside pour aret etidye Labib e i ti anvi ki Alexandru osi i arete. Me Alexandru ti reste kalm e avek respe i ti dir Dorina ki i pou kontinyen etidye. Dorina pa ti kontan e i ti esey fors li pour aret etidye. Alexandru i dir ki i ti esey konpran akoz Dorina ti santi koumsa me sa sityasyon pa ti fasil pour li. Parfwa ler Dorina ti kritik li e reponn li dan en move fason, i ti zis anvi aret etidye Labib. Me Alexandru ti kontinyen met Zeova premye e i ti kontinyen montre son madanm ki i kontan li e i annan respe pour li. Son bon legzanp ti fer ki Dorina ti rekonmans etidye Labib ankor e pli tar i ti batize.—Vwar sa video Alexandru and Dorina Văcar: “Love Is Patient and Kind” dan sa seri “Truth Transforms Lives” lo jw.org an Angle.

13. Ki mannyer nou kapab demontre lanmour pour Zeova e pour nou fanmir?

¹³ Zeova i Loter lafanmir e i anvi ki nou annan en lavi fanmir ki ere. (Efe. 3:14, 15) Pour nou vreman ere, nou bezwen fer sa ki Zeova i demann nou pour fer. Ou kapab asire ki Zeova i apresye bann sakrifis ki ou fer pour servi li anmezir ki ou pran swen avek ou fanmir e ou tret zot avek lanmour ek respe.—Rom. 12:10.

ANKOURAZ KANMARAD POUR VIN PAREY BANN NAZIREEN

14. Sirtou lekel ki nou devret fer zefor pour ankouraze?

¹⁴ Ozordi, tou sa ki swazir pour ador Zeova, zot bezwen pare pour fer bann sakrifis akoz zot kontan Zeova. Parfwa i pa fasil pour fer sa. Ki mannyer nou kapab ed lezot pour fer bann sakrifis? Nou fer sa ler nou dir lezot bann parol  ankourazan. (Zob 16:5) Eski i annan serten frer ek ser dan ou kongregasyon ki pe esey senplifye zot lavi pour zot fer plis pour Zeova? Eski ou konn bann zenn ki pe demontre kouraz e pe montre ki zot diferan avek lezot kot lekol menm si i difisil pour zot fer sa? Eski i annan bann etidyan Labib ek bann frer ek ser ki petet pe vwar li difisil pour reste fidel parski zot fanmir pe opoz zot? Annou servi tou loportinite pour ankouraz zot e dir zot ki nou apresye zot kouraz e sa ki zot pe fer pour Zeova.—Filem. 4, 5, 7.

15. Ki mannyer serten in ed bann ki dan servis a plen tan?

¹⁵ Parfwa, nou kapab donn nou bann frer ek ser ki dan servis a plen tan en led ki zot bezwen. (Prov. 19:17; Ebr. 13:16) I sanmenm ki en ser aze ki reste Sri Lanka ti anvi fer. Ler son larzan pansyon ti ogmante, i ti anvi ed de zenn ser pionye pour kontinyen zot servis menm si i ti annan bann problenm ekonomik. Alor i ti deside ki sak mwan i ti pou ed zot pour pey zot bil telefonn. Sa ki sa ser ti fer ti montre ki i ti annan en bon leta lespri!

16. Ki nou kapab aprann avek bann Nazireen dan letan bann Izraelit?

¹⁶ Nou kapab aprann en kantite avek bon legzanp ki bann Nazireen in kite. Me sa ve ki bann Nazireen ti fer i osi ansenny nou en keksoz lo nou Papa ki dan lesyel. Zeova i asire ki nou anvi fer li plezir e ki nou pare pour fer bann sakrifis pour viv an armoni avek sa ve ki nou’n fer pour servi li. I onor nou par donn nou sa loportinite pour montre li ki nou kontan li. (Prov. 23:15, 16; Mark 10:28-30; 1 Zan 4:19) Sa laranzman ki Zeova ti etabli pour en Izraelit vin en Nazireen, i montre ki Zeova i vwar e apresye bann sakrifis ki nou fer pour servi li. Alor annou determinen pour kontinyen servi Zeova par volonterman donn li nou meyer.