1. ¿Kʼãrẽta ũdubi zebʉda Jeowa kãgapanʉrabara nawedaiduba?

 ¿BɄARA kãgaka Jeowara? Mawũã, ẽbẽrarã nããbemarasida, mawũã senti zebʉda bʉ kĩrãkʼa (Sal. 104:​33, 34). Mejãchaʉba idubʉsida ãya nebia erbadata, mawũã Jeowaba kãgabʉ oita, Israel dera nazareorabara mawũã opanasi. ¿Kʼairabasi ãyira akʉza kʼãrẽta kʼawuapanʉ ãyideba?

2. (1) ¿Kʼairabasi nazareorãra? (Números 6:​1, 2). (2) ¿Kʼãrẽa ʉ̃kʉrʉ israelitarabara jidasida nazareo bʼaita?

² Bedʼea «nazareora» ebreo bedʼeadera jarakĩrãbʉ ẽbẽra aba nekʼãrẽ bia oita jidadapeadata. Naʉ̃ba biʼia ũdubibʉ israelitara kʼẽrẽpapanʉraba kʼãrẽaba zarea opanasita mawũã Jeowaba kãgabʉta biʼia oũdubita. Ley Moisésʼa diadaba iduaribibasi ʉ̃kʉrʉ yumakẽrãraba, mawũã ẽ bʉrʉ yuwẽrãraba jidadamarẽã nazareo bʼaita ãyi bebʉ Jeowaʼa diabʉde a (akʉra Números 6:​1, 2). Israelita abaʉba iyi nazareo bʼaita jarabasidera, oibarabasi nekʼãrẽ iya omarẽã zokʼapanʉta, mamina yi wuabemara israelitarabara oẽ baibarasi maʉ̃ra. ¿Kʼãrẽa ʉ̃kʉrʉ israelitarabara jidasida nazareo bʼaita? Naʉ̃ israelita maʉ̃ mawũã obʉbara Jeowata mejãcha kãgabasi baera mawũã obasi akʉza biga diakĩrãbasi baera iya nebia erbʉ kʼarea (Deut. 6:5; 16:17).

3. ¿Kʼãrẽne abarikabʉ Jeowa pʉwʉrʉ idibemara nazareoraʉ̃me?

³ Ley Moisésʼa diadabari Kristo leyta bʉesidadera Daizeze  pʉwʉrʉdebemara wua nazareo babe ẽ basi (Gál. 6:2; Rom. 10:4). Mawũãsidu idi ewaridera Daizeze pʉwʉrʉbara nazareoraba obada kĩrãkʼa opanʉ, ãyi soiduba, krĩchaiduba akʉza zarea jõmainʉba opanʉne Daizezeba zokʼabʉta (Mar. 12:30). Dayirãba oyi adata aripe oira, Jeowaba zokʼabʉta oũdubibara akʉza zarea oibara iya kãgabʉde bʼaita. Dayirãba akʉbʉdade nazareoraba sãwũã aripe oũdubisidata ãya oyi adara, naʉ̃neba kʼawuapanʉ dayirãbida kʼãrẽta oibarata, mawũã aripe oũdubita dayirãba Jeowaʼa oyi adata b (Mat. 16:24). Akʉdaya ʉ̃kʉrʉ yizarata.

NEKʼÃRẼ ORA JEOWA KʼAREA

4. Números 6:​3, 4​ba jarabʉdebara, ¿nazareorabara kʼãrẽta idubʉibarabasi?

⁴ (Akʉra Números 6:​3, 4). Nazareorabara ituara do ẽ baibarabasi akʉza ko ẽ baibarabasi nekʼãrẽ ubadeba zebʉra. Mamina yi wuabemara israelitarabara ituara doseabasi akʉza nekʼãrẽ ubadeba zebʉsida, naʉ̃ doira akʉza koira kayirua ẽ basi baera. Daizeze Bedʼeabara jarabʉ binora Daizezeba nebia bari diadata akʉza jarabʉ binobara «ẽbẽrarã so sobiabibʉta» (Sal. 104:​14, 15). Mawũãsidu nazareorabara ãyi biadeba jidapanasi naʉ̃ra nekʼãrẽra do ẽ baita akʉza ko ẽ baita. c

5. Madiánba Marcelaʉ̃mebara, ¿kʼãrẽta osida Jeowa kʼarea akʉza kʼãrẽa?

⁵ Nazareora kĩrãkʼa dayirãbida nekʼãrẽ oibara mawũã Jeowaba kãgabʉ oita, akʉdaya Madián akʉza Marcela yizata. d Ãyira bia panasi, Madiánba trajo biata erbasi, maʉ̃ba ãyira de biʼiakirude panasi, ãyara Jeowa kʼarea nekʼãrẽ audre okĩrãpanasi, maʉ̃itara ãyara nei oibarabasi. Maʉ̃itara ãya platara nãã gastabada kĩrãkʼa gastada ẽ basi, ãya jarapanʉ: «Daira de audre wikakiruma wãsida akʉza dai karrusida nẽdo bʉesida». Madiánba Marcelaʉ̃mebara ãya mawũã nekʼãrẽ odara oibarabasi ẽ, awuarabʉrʉ ãyara mawũã oita jidasida nekʼãrẽta audre okĩrãbasi baera Jeowa kʼarea. Ãyira sobiapanʉ ãya mawũã oita jidada kʼarea.

6. ¿Kristianora idi ewadebemabara kʼãrẽa nekʼãrẽ idubʉebʉ Jeowa kʼarea? (Akʉra potota).

 ⁶ Kristianorãra mejãcha sobiapanʉ nekʼãrẽ opanʉne Jeowa kʼarea mawũã audre oita Jeowa organizasionbari (1 Cor. 9:​3-6). Jeowabara dayirã jara ẽ nekʼãrẽ idubʉibarata iyi kʼarea, maʉ̃rãra kayirua ẽ baera. Bari jaraita, ʉ̃kʉrʉba jidapanʉ idubʉita trajo ãya kãgabadata, ãyi deta, mawũã ẽ bʉrʉ ãyi nedʉwʉrʉta, adewara ʉ̃kʉrʉbara krĩchapanʉ juwa jida ẽ baita, mawũã ẽ bʉrʉ wũãwũã bara ẽ baita. Ʉ̃kʉrʉbara krĩchapanʉ kongregasion kʼareba nesidabʉma wãita, maʉ̃ oira ãyi mebẽrãneba jĩga wãibaramina. Dayirãnebema mejãchaʉba naʉ̃ta opanʉ dayirãba diaseabʉta diaita Jeowaʼa, kʼawuabara Jeowabara biʼia akʉbʉta bʉa iya kãgabʉta audre oita nekʼãrẽ idubʉebʉra (Heb. 6:10).

WUABEMARANEBA AWUARA BAKĨRÃBARA

7. ¿Kʼãrẽ bedʼea zromata ũduseabasi nazareobara mawũã iya Jeowaba oya ada aripe oẽ baita? (Números 6:5 akʉza akʉra potota).

⁷ (Akʉra Números 6:5). Nazareorabara ãyi bʉdara tʉ ẽ basi, maʉ̃ba ũdubikĩrãbasi ãyara soiduba okĩrãbasita Jeowaba zokʼabʉra. Israelita abaʉta iyi nazareo obʉta ewari bio berabaribasibʉrʉ, iyi bʉdara drazoa waribasi akʉza wuabemarabida ũduseabasi maʉ̃ra. Nazareoitara audre zare ẽ bakasi iya oya ada aripe oira wuabemaraba kʼarebapanasibʉrʉ, mamina edaʉde ʉ̃kʉrʉ israelitarabara wawia ũdubida ẽ basi akʉza kʼareba ẽ basi nazareorãra. Propeta Amós ewaribasidera, ʉ̃kʉrʉ israelitara apostatarabara ituata dawuapanasi nazareora, mawũã ãya aripe oda ẽ marẽã ãya oya adata (Amós 2:12). Edaʉde nazareorabara zowaĩnĩgʉabʉta ũdubibarabasi mawũã ãya Jeowaʼa oya ada aripe oita akʉza wuabemaraneba awuara bʼaita.

8. ¿Benjamin nebʉraba sãwũã so zarea diasi bʉaʼa?

⁸ Jeowa kʼarebadeba dayirãbara zowaĩnĩgʉata erbaseabʉ, mawũã ũdubita wuabemaraira awuarapanʉta. Maʉ̃ta ũdubiseapanʉ dayirã peramiamina. Akʉdaya Benjamin yizata iyira Noruegadebema akʉza 10 poagabʉ. Wũãwũãrabara trãibarabasi trãbi Ucrania pʉwʉrʉdebemata akʉza jʉ̃ĩbarabasi wua Ucrania bandera kolorʼʉ̃me abarikabʉta. Benjaminbara krĩchasi maʉ̃ obarabʉmaeba jĩga wãita, mawũã maʉ̃rane eda ba ẽ baita, mamina iyi nejaradiabariba ũdu kʼãrãpe iyaʼa jarasi: «Zera,  daiba jʉ̃ãnʉmʉ bʉra», Benjaminʼra zowaĩnĩgʉa kʼãrãpe iyi nejaradiabaria naʉ̃ta jarasi: «Mʉ̃ra kʼaiarebʉ ẽ akʉza politikaranera eda wã ẽ, mamina Jeowa ʉ̃rʉ Kʼawuabipanʉrã mejãchaʉta karselde edapanʉ yõena wã ẽ baera». Iyi nejaradiabaribara ĩjãsi Benjamin bedʼeara akʉza jarasi oẽ baibarata ãya obʉra. Mamina iyiʉ̃me estudiapanʉrabara iyaʼa widisida kʼãrẽa oẽãta nekʼãrẽ ãya obʉra. Benjaminʼra maʉ̃ kʼarea mejãcha perasi akʉza bera jẽgasi, mawũãsidu iya iyiʉ̃me estudiapanʉra jara ũrĩbisi iyara kʼãrẽa oẽãta maʉ̃ra, tẽã Benjaminbara iyi yibarira jara ũrĩbisi Jeowaba iyi sãwũã kʼarebasita, mawũã wuabemara jara ũrĩbita iya ĩjãbʉ ʉ̃rʉ.

9. ¿Dayirãbara sãwũã sobiabibʉ Jeowara?

⁹ Dayirãbara Jeowaba zokʼabʉde opanʉ baera wuabemaraira awuarapanʉ. Dayirãbara zowaĩnĩgʉa erbaita nesidapanʉ trajode mawũã ẽ bʉrʉ eskuelade, wuabemara jara ũrĩbita dayirãra Jeowa ʉ̃rʉ Kʼawuabipanʉrãta. Idi ewade naʉ̃ drʉadera kayiruara wuabʉrʉ wã baera, dayirãitara zarea baseabʉ Daizeze Bedʼeaba jarabʉde bʼaita akʉza wuabemara bedʼea bia jara ũrĩbita (2 Tim. 1:8; 3:13). Kĩrãbedaibara, zowaĩnĩgʉa kʼãrãpe ũdubidara dayirãra wuabemaraira awuarabʉta, mawũãra Jeowa sota sobiabidaita (Prov. 27:11; Mal. 3:18).

NEKʼÃRẼ JEOWADETA NÃÃRA BɄERA

10. Números 6:​6, 7​ba jarabʉ aripe oira, ¿kʼãrẽa zareabasibaibara nazareoraitara?

¹⁰ (Akʉra Números 6:​6, 7). Nazareorabara orrabe ẽ basi ẽbẽra beimara. Dayima naʉ̃ oira zare ẽ basi kĩrãkʼabʉ. Mamina nazareoraitara naʉ̃ oira zareabasibaibara, ãyi ewaridera ãyi mebẽrã beidata jou eda edebʉrʉdera kʼaidu wãibarabasi baera (Juan 19:​39, 40; Hech. 9:​36-40). Nazareoraba obe ẽ basi wuabemara israelitarane kĩrãkʼa, mawũãsidu opanasi ãya oya ada aripe oũdubita. Jeowaba so zarea diasi naʉ̃ra nazareora kʼẽrẽpapanʉra, mawũã ãya bedʼea zroma ũdubʉrʉde awuantadamarẽã.

11. ¿Kʼãrẽta oseabʉ kristianorabara nekʼãrẽ ãyi mebẽrã ʉ̃rʉ jidaibaradera? (Akʉra potota).

¹¹ Dayirã Jeowa odepanʉrabara nekʼãrẽ opanʉ mawũã aripe oũdubita dayirãba Jeowa oya adata, maʉ̃ kʼarea nekʼãrẽ dayirãba jidaibarata, mawũã ẽ bʉrʉ  dayirã mebẽrãʉ̃me sãwũãbʉra awuara baseabʉ. Dayirãbara zarea opanʉ dayirã mebẽrãba nesidabʉ diaita, mamina dayirã mebẽrãba nekʼãrẽ omarẽã jarabʉta nããra bʉepanʉ ẽ Jeowaba jarabʉ oira (Mat. 10:​35-37; 1 Tim. 5:8). Edaʉde dayirãba kʼãrẽ oita jidaseabʉ, mamina dayirã mebẽrãra maʉ̃ kʼareara sobia ba ẽ bayi, mawũãsidu Jeowara sobiabayi.

12. ¿Yi kimaʉ̃me bedʼea zroma erbasidera kʼãrẽta osi Alexandrubara akʉza kʼãrẽta oẽ basi?

¹² Akʉdaya Alexandru akʉza yi kima Dorina nebʉrata. Ãyi poaga ababayeda Daizeze Bedʼea kʼawuada tẽã, Dorinabara idubʉsi Daizeze Bedʼea kʼawuabʉra akʉza kãgabasi yi kima Alexandrubida idubʉmarẽã. Mawũãsidu iyara ibiade jara ũrĩbisi yi kimaʼa, idubʉ ẽ baita Daizeze Bedʼea kʼawuabʉra. Dorinara maʉ̃ kʼareara sobia ẽ basi akʉza jarasi Daizeze Bedʼea kʼawuabʉra idubʉmarẽã. Alexandruba jarabʉ iyara zarea obasita kʼawuaita yi kima kʼãrẽa mawũã sentibʉta, mamina maʉ̃ oira iyitara zareabasi. Edaʉde Dorinaba iyi ʉ̃rʉ imitia bedʼeabaside akʉza iya kĩrʉ panʉbasidera Alexandrubara Daizeze Bedʼea kʼawuabʉra idubʉkĩrãbasi. Mamina Alexandrubara nekʼãrẽ Jeowaba zokʼabʉta nããra obasi, adewara wawiata akʉza kãgata ũdubibasi yi kimaʼa. Alexandru yiza biadeba yi kimabara Daizeze Bedʼeara jẽda kʼawua jʉ̃drʉsi akʉza tẽã buru kʼoesi (jw.org de «Wãrĩnubara bebʉra awuarababibʉ» abʉmae akʉra naʉ̃ bideo Alexandru akʉza Dorina Văcar: «Kãgara zʉbʉriabʉ akʉza krĩchabʉ awuru bia oita»).

13. ¿Sãwũã ũdubiseapanʉ kãgata Jeowaʼa akʉza dayirã mebẽrãʼa?

¹³ Jeowaba parãsi mebẽrãra akʉza iya kãgabʉ mebẽrãra sobiapanamarẽã (Efes. 3:​14, 15). Dayirãta wãrĩnu sobia bakĩrãpanʉbʉrʉ nekʼãrẽ jõma obʉra Jeowaba kãgabʉde oibara. Kĩrãdua ẽ baibara Jeowabara biʼia akʉbʉta, dayirãba iya kãgabʉ oi kʼarea nekʼãrẽ opanʉra akʉza dayirã mebẽrã akʉpanʉra, adewara ãyaʼa kãgata akʉza wawiata ũdubipanʉra (Rom. 12:10).

WUABEMARASI KʼAREBAIDUA NAZAREORA KĨRÃKʼA BAMARẼÃ

14. ¿Kʼaira so zarea diaita zarea odaibara?

¹⁴ Daizeze odepanʉra jõmaʉ̃ba soiduba okĩrãbaibara nekʼãrẽ Jeowaba kãgabʉra. Edaʉde maʉ̃ oira zarea baseabʉ, mamina dayirãi bedʼea bia jarabʉba kʼarebayi  jõmaʉ̃ba sobiade odaita Jeowaba kãgabʉta (Job 16:5). ¿Bʉ kongregasione bʉka mebẽrã ãya nekʼãrẽ bia erbada idubʉebʉta, mawũã audre Jeowaita trajaita? ¿Bʉara ũdukʼawuabʉka warrara aba bedʼea zroma ũdubʉta wuabemara iyi kolegiodebemaraira awuarabʉ baera? Mawũã ẽ bʉrʉ, ¿bʉka Daizeze Bedʼea ʉ̃rabʉrʉ kʼawuapanʉrata akʉza ʉ̃kʉrʉ mebẽrã bʉ kongregasionebemara zarea opanʉta Jeoware kʼẽrẽpa bʼaita ãyi mebẽrãba kãga ẽ mina? Zarea ora naʉ̃ra mebẽrã so zarea diaita akʉza ãyaʼa jara ũrĩbita bʉara biʼia akʉbʉta ãya kʼãwũã zowaĩnĩgʉa ũdubibʉra, adewara ãya Jeowa kʼarea kʼãwũã nekʼãrẽ obʉra (Filem. 4, 5, 7).

15. ¿Ʉ̃kʉrʉ mebẽrãba sãwũã kʼarebapanʉ mebẽrã Jeowaita ewariza trajapanʉra?

¹⁵ Edaʉde dayirãbara kʼarebaseapanʉ mebẽrã Jeowaita ewariza trajapanʉrata (Prov. 19:17; Heb. 13:16). Mebẽã wẽrã yõdrakiruba maʉ̃ta okĩrãbasi, iyira Sri Lankadebʉ. Iyira yõdrakiru baera iyaʼa diasida platata, maʉ̃ plataba iya kʼarebakĩrãbasi wẽrãra yi nãã edebarira ũme. Ãyara bedʼea zromata erpanasi baera plata neẽ kʼarea, maʉ̃ kʼarea iya krĩchasi jedekoza platata diaita, mawũã naʉ̃ra mebẽrãba ãya nesidabʉta erbamarẽã. Naʉ̃ mebẽã wẽrãba odara jipade yibiabasi.

16. ¿Kʼãrẽta kʼawuaseapanʉ nazareoraneba?

¹⁶ Dayirãbara nemejãcha kʼawuaseapanʉ nazareoraneba. Kʼarebabʉ kʼawuaita Jeowabara wãrĩnu ĩjãbʉta dayirãbara soiduba okĩrãpanʉta iya kãgabʉta akʉza nekʼãrẽ jõma okĩrãpanʉta mawũã aripe oũdubidaita iyaʼa oya adata. Jeowaba iduaribibʉ dayirã kãgata iyaʼa ũdubimarẽã, maʉ̃ oira dayirãitara jipade yibia (Prov. 23:​15, 16; Mar. 10:​28-30; 1 Juan 4:19). Nazareoraba obadadeba kʼawuapanʉ Jeowabara dayirãba iyi kʼarea nekʼãrẽ obʉra bia akʉbʉta akʉza iyara dayirãra kãgata iyi kʼarea nekʼãrẽ obʉ baera. Zarea odadrʉ iya kãgabʉta obʼaita akʉza dayirã biadeba odadrʉ dayirãba oseabʉta iyi kʼarea.