1. ¿Chuqui jiñi am bʌ i meleyob jiñi i wiñicob Dios cʼʌlʌl ti wajali?

 ¿MUʼ baʼ wen cʼuxbin Jehová yicʼot maʼ qʼuel ti ñuc cheʼ a wamigo? Mach jatet jach cheʼ maʼ wubin bajcheʼ jiñi. Cʼʌlʌl ti wajali, yonlel lac piʼʌlob cheʼʌch an i yubiyob i bʌ jaʼel (Sal. 104:33, 34). Cabʌlob an chuqui an i meleyob chaʼan miʼ ñumen melbeñob i yeʼtel (troñel) Jehová, bajcheʼ jiñi nazareojob ti wajali. Laʼ laj qʼuel majquiyob yicʼot chuqui mi laj cʌn tiʼ tojlelob.

2. a) ¿Majquiyob jiñi nazareojob? (Números 6:1, 2). b) ¿Chucoch an israelitajob muʼ bʌ i sujtelob ti nazareo?

² Jiñi tʼan nazareo tilem ti hebreo, yom i yʌl, juntiquil «tsaʼ bʌ i yʌcʼʌ i bʌ» o juntiquil «yajcʌbil bʌ». Ili tʼan wen miʼ taj i bʌ yicʼot jiñi israelitajob am bʌ bajcheʼ yomob i ñumen melbeñob i yeʼtel Jehová. Jiñi Mandar miʼ yʌl chaʼan juntiquil wiñic o juntiquil xʼixic miʼ mejlel ti ajñel bajcheʼ nazareo (pejcan Números 6:1, 2). a Cheʼ bʌ juntiquil miʼ yochel bajcheʼ nazareo an tacʌch chuqui yom miʼ jacʼ, mach bʌ yomic miʼ jacʼob jiñi yambʌ israelitajob, ¿i chucoch miʼ melob iliyi? Miʼ mejlel la cʌl chaʼan jiñʌch i cʼuxbiyajob ti Jehová  muʼ bʌ i ñijcañob yicʼot come miʼ qʼuelob ti ñuc jiñi bendición tac (Dt. 6:5; 16:17).

3. ¿Chucoch mi la cʌl chaʼan lajalonla bajcheʼ jiñi nazareojob?

³ Jiñi «i mandar Cristo» tsaʼ ochi tiʼ qʼuexol jiñi i Mandar Moisés, ti jimbʌ ora maʼañix majqui tsaʼ mejli ti ochel bajcheʼ nazareo (Gál. 6:2; Rom. 10:4). Pero cheʼ bajcheʼ jiñi nazareojob, joñonla jaʼel la com lac melben i yeʼtel Jehová tiʼ pejtelel lac pusicʼal, laj cuxtʌlel, lac ñaʼtʌbal yicʼot lac pʼʌtʌlel (Mar. 12:30). I jiñʌch muʼ bʌ lac mel cheʼ bʌ mi la cʌcʼ lac bʌ ti Jehová. Chaʼan mi lac tsʼʌctesan lac tʼan yomʌch mi lac mel chuqui miʼ mulan Jehová yicʼot an tacʌch chuqui yom mi laj cʌy lac mel. Jin chaʼan, mi caj laj qʼuel bajcheʼ tiʼ tsʼʌctesayob i tʼan jiñi nazareojob yicʼot bajcheʼ miʼ coltañonla chaʼan cheʼʌch mi lac mel jaʼel (Mat. 16:24). b

CHAʼAN MI LAC MELBEN I YEʼTEL JEHOVÁ AN TACɅCH CHUQUI YOM MI LAJ CɅY

4. Cheʼ bajcheʼ miʼ yʌl Números 6:3, 4, ¿chuqui muʼ bʌ i cʌyob i mel jiñi nazareojob ti jumpʼejlob i pusicʼal?

⁴ (Pejcan Números 6:3, 4). Jiñi nazareojob maʼañic miʼ mejlel i japob vino yicʼot i cʼuxob uva yicʼot pasa, anquese iliyi mach mulilic come jiñi yambʌ israelitajob mucʼʌch i mejlel i cʼuxob. Jiñi Biblia miʼ yʌl chaʼan jiñi vino jiñʌch jumpʼejl lac majtan tsaʼ bʌ i yʌcʼʌ Dios muʼ bʌ i tijicñesan lac pusicʼal (Sal. 104:14, 15). Jiñi nazareojob ti jumpʼejl i pusicʼal miʼ cʌyob iliyi chaʼan miʼ mejlel i tsʼʌctesañob i tʼan. c

5. ¿Chuqui tsiʼ meleyob Madián yicʼot Marcela, i chucoch?

⁵ Joñonla jaʼel miʼ mejlel lac ñumen melben i yeʼtel Jehová, pero añʌch chuqui yom mi lac mel yicʼot an tacʌch chuqui yom mi laj cʌy. Jiñʌch tsaʼ bʌ ujti tiʼ tojlel Madián yicʼot Marcela, chʼoyoloʼ bʌ ti Colombia. d Ili xñujpuñel wen bajcheʼ chumulob, Madián an wem bʌ i yeʼtel i añob utsʼatax bʌ i yotot. Pero come yomob i ñumen melbeñob i yeʼtel Jehová añʌch chuqui tsiʼ ñaxan meleyob. Tsiʼ yʌlʌyob: «Maʼañix tsaʼ lon c wen jisa taqʼuin, tsaʼ majliyon lon ti chumtʌl ti jumpʼejl otot chʼoʼchʼoc bʌ yicʼot tsaʼ lon c choño jiñi lon j carro». Mach xicʼbilobic chaʼan miʼ melob pejtelel iliyi, pero tsiʼ  meleyob come yomob i ñumen chaʼleñob subtʼan. Ili ora wen tijicñayob chaʼan jiñi tsaʼ bʌ i meleyob.

6. ¿Chuqui tac mi lac mel ili ora chaʼan mi lac ñumen melben i yeʼtel Jehová? (Qʼuele jaʼel jiñi dibujo).

⁶ Chaʼan mi lac ñumen melben i yeʼtel Jehová an tacʌch chuqui yom mi laj cʌy, i mi lac mel ti jumpʼejl lac pusicʼal (1 Cor. 9:3-6). Jehová maʼañic miʼ wersa xicʼonla chaʼan mi lac mel pejtelel iliyi. Cheʼ jaʼel, mach chaʼañic mach weñic jiñi muʼ tac bʌ laj cʌy. An hermanojob muʼ bʌ i cʌyob i yotot, i yeʼtel yicʼot i yʌlacʼob. An maʼañic bʌ miʼ yʌcʼob i yalobil yicʼot an maʼañic bʌ miʼ ñujpuñelob. I an muʼ bʌ i majlelob ti coltaya baqui yomto xsubtʼañob, miʼ cʌyob i familia yicʼot i yamigojob. Miʼ melob iliyi come yomob i ñumen melbeñob i yeʼtel Jehová. Miʼ mejlel lac ñop chaʼan Jehová mucʼʌch i wen qʼuel ti ñuc muʼ bʌ lac mel tiʼ tojlel anquese mach wen ñuquic (Heb. 6:10).

YOM AN LAC CHʼEJLEL CHAʼAN QʼUEXELONLA BAJCHEʼ YAMBɅYOB

7. ¿Chucoch an i tajol wocol miʼ yubin jiñi nazareo chaʼan miʼ tsʼʌctesan i tʼan? (Números 6:5; qʼuele jaʼel jiñi dibujo).

⁷ (Pejcan Números 6:5). Jiñi nazareojob maʼañic miʼ setʼob i jol, cheʼ bajcheʼ jiñi miʼ pʌsob chaʼan miʼ qʼuelob ti ñuc Jehová. Mi juntiquil jal miʼ yajñel bajcheʼ nazareo, tajol wen tam mi caj i colel i jol i jiñi yambʌyob mi caj i qʼuelob. Mi jiñi yambʌ israelitajob miʼ qʼuelob ti ñuc jiñi añoʼ bʌ bajcheʼ nazareo, mach wocolic mi caj i yubiñob chaʼan miʼ tsʼʌctesañob i tʼan. Pero añʌch israelitajob mach bʌ añic tsiʼ qʼueleyob ti ñuc. Jumpʼejl ejemplo, cheʼ tiʼ yorajlel jiñi xʼaltʼan Amós an israelitajob apóstatajoʼ bʌ tsaʼ bʌ i yʌqʼueyob i jap vino jiñi nazareojob chaʼan maʼañic miʼ tsʼʌctesañob i tʼan (Am. 2:12). An i tajol, yomʌch miʼ pʌsob i chʼejlel come mach lajalobic bajcheʼ jiñi yañoʼ bʌ.

8. ¿Bajcheʼ miʼ coltañet jiñi tsaʼ bʌ ujti tiʼ tojlel Benjamin?

⁸ Anquese la cujil quisin, tiʼ coltaya Jehová mucʼʌch i mejlel lac pʌs chaʼan qʼuexelonla bajcheʼ yambʌlob. Jiñʌch tsaʼ bʌ ujti tiʼ tojlel Benjamin, juntiquil Testigo an jaxto bʌ 10 i jabilel, chʼoyol bʌ ti Noruega. Yaʼ ti escuela tsaʼ ajli chaʼan yom miʼ coltañob Ucrania ti jiñi guerra woli (choncol) bʌ ti ujtel. Jin chaʼan, tsaʼ subentiyob jiñi alumnojob chaʼan yom miʼ lʌpob i pislel cheʼ bʌ i colorlel bajcheʼ i bandera jiñi país i chaʼan miʼ luʼ chaʼleñob cʼay. Pero Benjamin ñajt jach tsaʼ cʌyle, cheʼ bʌ jiñi  i maestra tsiʼ qʼuele tsiʼ wersa pʌyʌ. Benjamin tsaʼʌch i jacʼʌ, pero yicʼot i chʼejlel tiʼ sube jiñi i maestra: «Joñon maʼañic mij coltan mi jumpʼejlic país. Cabʌl Testigojob añob ti cárcel come maʼañic miʼ majlelob ti guerra». Jiñi i maestra cheʼ jach tsiʼ ñʌchʼta i maʼañic chuqui tsiʼ bej alʌ. Pero jiñi i piʼʌlob ti escuela tsaʼ caji i cʼajtibeñob chucoch maʼañic miʼ chaʼlen cʼay yicʼotob. Benjamin tsaʼ caji ti bʌqʼuen i yomix uqʼuel tsiʼ yubi, pero tsiʼ pʌsʌ i chʼejlel i tsiʼ chaʼ subeyob jiñi tsaʼ bʌ i sube jiñi i maestra. Ti wiʼil, tiʼ sube i papá i mamá chaʼan Jehová tsiʼ yʌqʼue i chʼejlel chaʼan miʼ coltan chuqui ñopol bʌ i chaʼan.

9. ¿Bajcheʼ miʼ mejlel lac tijicñesʌben i pusicʼal Jehová?

⁹ Jiñi lac piʼʌlob mi caj i qʼuelob chaʼan mach lajaloñicla yicʼotob come mi lac jacʼben i tʼan Jehová. Pero yomʌch mi lac pʌs lac chʼejlel chaʼan mi lac sub yaʼ ti la queʼtel o ti escuela chaʼan i testigojonla Jehová. Cheʼ jaʼel, come jiñi lac piʼʌlob mach weñic i melbalob (chaʼlibalob), wocol mi caj la cubin chaʼan mi lac jacʼ jiñi principio tac yicʼot chaʼan mi lac sub jiñi wen tʼan (2 Tim. 1:8; 3:13). Pero yom mi laj cʼajtesan iliyi: Mi lac tijicñesan Jehová cheʼ mi lac pʌs lac chʼejlel, chaʼan mach lajaloñicla bajcheʼ yambʌ lac piʼʌlob (Pr. 27:11; Mal. 3:18).

LAʼ LA CɅCʼ TI ÑAXAN JEHOVÁ

10. ¿Chucoch an i tajol wocolʌch tsiʼ yubiyob jiñi nazareojob chaʼan miʼ jacʼob muʼ bʌ i yʌl Números 6:6, 7?

¹⁰ (Pejcan Números 6:6, 7). Jiñi nazareojob mach yomic miʼ lʌcʼtesañob i bʌ baʼan juntiquil chʌmen bʌ. Tajol iliyi mach wocolic ti jacʼol yilal, pero wen wocolʌch cheʼ bʌ juntiquil nazareo miʼ chʌmel juntiquil tiʼ familia, ¿chucoch? Come ti wajali, jiñi israelitajob ñʌmʌlob chaʼan cheʼ bʌ an majqui miʼ chʌmel yaʼʌch an yicʼotob ti chuqui tac yom miʼ mejlel (Juan 19:39, 40; Hech. 9:36-40). Pero juntiquil nazareo mach yomic miʼ yotsan i bʌ anquese tajol wen chʼijyemʌch miʼ yubin, yomʌch wen xucʼulob i pusicʼal ti Jehová chaʼan miʼ tsʼʌctesañob i tʼan. Pero Jehová tsaʼʌch i coltayob yicʼot tsiʼ yʌqʼueyob i pʼʌtʌlel.

11. ¿Chuqui mi caj lac mel mi jiñi lac familia mach lajalic miʼ ñaʼtañob bajcheʼ joñonla? (Qʼuele jaʼel jiñi dibujo).

¹¹ Jiñi xñoptʼañonbʌla mi lac wen qʼuel ti  ñuc cheʼ tsaʼ la cʌcʼʌ lac bʌ ti Jehová, i mi lac pʌs ti chuqui mi lac mel yicʼot bajcheʼ yilal mi laj qʼuel jiñi lac familia. Mi lac chaʼlen wersa laj cʌntan ti wen jiñi lac familia, pero mach jiñic ñaxan mi caj lac mel chuqui miʼ subeñoñobla, jiñʌch muʼ bʌ i yʌl Jehová (Mat. 10:35-37; 1 Tim. 5:8). Tajol jiñi lac familia mach weñic mi caj i qʼuel jiñi muʼ bʌ lac yajcan lac mel, pero la com lac tijicñesan Jehová.

12. ¿Chuqui tsiʼ mele Alexandru cheʼ bʌ tsiʼ taja wocol tiʼ familia, i chuqui maʼañic bʌ tsiʼ mele?

¹² Jiñʌch tsaʼ bʌ ujti tiʼ tojlel Alexandru yicʼot i yijñam, Dorina. Cheʼ bʌ añix jumpʼejl jab i cajelob ti estudio, Dorina tsiʼ cʌyʌ estudio i yom chaʼan Alexandru miʼ cʌy jaʼel. Pero ti wen jach bʌ tʼan tiʼ sube chaʼan maʼañic mi caj i cʌy estudio. Dorina maʼañic tsiʼ mulaj i tsiʼ ñopo i wersa suben chaʼan miʼ cʌy jiñi estudio. Alexandru tsiʼ ñopo i chʼʌmben i sujm pero wocolʌch tsiʼ yubi. An i tajol, cheʼ bʌ Dorina miʼ wajlen i miʼ suben mach tac bʌ weñic, tsiʼ ñaʼta i cʌy jiñi estudio, pero tsaʼʌch i bej acʼʌ ti ñaxan Jehová. Tsiʼ chʌn pʌsʌ i yutslel yicʼot tsiʼ qʼuele ti ñuc jiñi i yijñam. Ti wiʼil, jiñi i yijñam tsaʼ chaʼ caji ti estudio i tsiʼ cʌñʌ i sujmlel (qʼuele jiñi video Alexandru yicʼot Dorina Văcar: «Jiñi am bʌ i cʼuxbiya yujil pijt yicʼot an i yutslel», am bʌ yaʼ ti sección «Jiñi i sujmlel miʼ qʼuextʌben i melbal jiñi quixtañujob», ti jw.org).

13. ¿Bajcheʼ mi lac pʌs chaʼan mi laj cʼuxbin Jehová yicʼot lac familia?

¹³ Jehová jiñʌch tsaʼ bʌ i mele jiñi familia i yom chaʼan tijicñayonla (Efes. 3:14, 15). Mi la com chaʼan tijicñayonla yom mi lac mel muʼ bʌ i yʌl Jehová. Miʼ wen qʼuel ti ñuc cheʼ mi lac chaʼlen wersa lac melben i yeʼtel yicʼot cheʼ mi laj cʌntan lac familia (Rom. 12:10).

LAʼ LAJ COLTAN YAÑOʼ BɅ CHAʼAN MIʼ LAJIÑOB JIÑI NAZAREOJOB

14. ¿Majqui yom mi laj coltañob?

¹⁴ La cujil chaʼan wocolʌch tiʼ melol i yeʼtel Jehová come an tacʌch chuqui yom bʌ mi laj cʌy, pero mi lac mel come mi laj cʼuxbin. ¿Bajcheʼ miʼ mejlel laj coltan juntiquil yom bʌ i ñumen melben i yeʼtel Jehová? Ti lac tʼan (Job 16:5). ¿Am ba juntiquil yaʼ ti a congregación woli (yʌquel) bʌ i chaʼlen wersa chaʼan miʼ ñumen melben i yeʼtel Jehová? ¿A cʌñʌ ba juntiquil xcolel woli bʌ i pʌs i chʼejlel yaʼ ti escuela anquese wocolʌch miʼ yubin? ¿Muʼ ba i tilel ti  a jol juntiquil hermano o juntiquil estudiante muʼ bʌ i tsʼaʼlentel tiʼ familia chaʼan xucʼul ti Jehová? Mi cheʼʌchi, laʼ lac chaʼlen wersa chaʼan mi lac subeñob chaʼan mi lac wen qʼuel ti ñuc jiñi chʼejlel woli bʌ i pʌsob yicʼot pejtelel muʼ bʌ i melob tiʼ tojlel Jehová (Filem. 4, 5, 7).

15. ¿Chuqui an i mele chaʼtiqui uxtiquil hermanojob chaʼan miʼ coltañob jiñi woli bʌ i melbeñob i yeʼtel Jehová tiʼ pejtelel ora? Alʌ jumpʼejl ejemplo.

¹⁵ Tajol añʌch chuqui miʼ mejlel lac mel chaʼan mi laj coltan jiñi hermanojob woli bʌ i melbeñob i yeʼtel Jehová tiʼ pejtelel ora (Pr. 19:17; Heb. 13:16). Jiñʌch tsaʼ bʌ i mele ili hermana chumul bʌ ti Sri Lanka. Cheʼ bʌ tsiʼ letsʌbeyob i pensión tsiʼ ñaʼta i coltan chaʼtiquil hermanajob mach bʌ wen añobic i taqʼuin i precursorajob. Ti jujumpʼejl uw miʼ tsʼitaʼ tʼox i taqʼuin chaʼan miʼ coltañob tiʼ gasto. ¡Wen utsʼatax tsaʼ bʌ i mele ili hermana!

16. ¿Chuqui mi laj cʌn tiʼ tojlel jiñi nazareojob?

¹⁶ An cabʌl chuqui tsaʼ laj cʌñʌ tiʼ tojlel jiñi nazareojob, pero añʌch chuqui mi laj cʌn tiʼ tojlel Jehová jaʼel. Yujil chaʼan la com lac melben i yeʼtel yicʼot chaʼan ti jumpʼejl lac pusicʼal la com lac tsʼʌctesan jiñi lac tʼan. Cheʼ jaʼel, miʼ yʌcʼ chaʼan mi lac pʌsben bajcheʼ cʼamel mi laj cʼuxbin (Pr. 23:15, 16; Mar. 10:28-30; 1 Juan 4:19). Tiʼ tojlel jiñi nazareojob, mi laj cʌn chaʼan Jehová mucʼʌch i qʼuel pejtelel chuqui mi lac mel tiʼ tojlel yicʼot miʼ qʼuel ti ñuc. Jin chaʼan, laʼ lac bej melben i yeʼtel Jehová ti jumpʼejl lac pusicʼal.