1. ˈÖ bhɔ ˈˈdhʋ̈ ˗kwɛŋzü, ˈwɔn yö ˗kɔ ˗së ˗mɛɛn ˈö Zoova ˗dhɔkëmɛn ˗nu ˗gɔ?

 ZOOVA ˗dhɔ ˗yö ka kë ꞊dedewo ˗ee? ˈYaa ˗za ˈgü ꞊dhɛ ˗a ˗dhɔ ˗yö ka ˗kë. Ka do ˈyaa ˈnën ˗kë ka ˈka ˈˈdhʋ̈. ˈÖ bhɔ ˈˈdhʋ̈ ˗kwɛŋzü ˗yö ˗kë ˈˈdhʋ̈ ˈpö mɛn ꞊va ꞊dede ˈka. (Ps. 104:​33, 34) ˗A mɛn ˈbha ˗nu ˗wo ˈˈsaa˗ ꞊va ˗bho kë ˈˈdhʋ̈ kö ˈwo Zoova ˗dhɔkë. Pë ˈö nazidheɛn ˗nu ˈwo kun Izraɛdhö ˗kwɛŋzü ˈwo˗ ˗kë, ˈyö bhë. De ˗nu ˗mü? ˈYö ˗gleŋ ˗mɛɛn ˈkwa ꞊mɔɔn˗ ˗bha ˈkwa˗ ˈsü ˗an ˗bha?

2. (1) De ˗nu ˈwo kun nazidheɛn ˗nu ˈka? (Nombres 6:​1, 2) (2) ˈMën ˗kë ˈö Izraɛdhömɛn ˈbha ˗nu ˗wo ˗wɩ ˗a ˗kë ˈˈdhʋ̈ ˗sü ˗bha?

² Eblö ˗wo ˈö ˗kë «nazidheɛn» ˈka bhë ˗a ˗gɛn ˈnën ˗tɔ «꞊kɛgbɔɔ ɛɛnˈˈ ˈmɛn ˈyaa ꞊gwaan˗ ˗bha,» «mɛn ˈwo˗ ˗ya ö ˗de ˗ta» ɛɛnˈˈ «mɛn ˈö ö ˗de nu.» Nazidheɛn ˗nu ˗kun mɛn ˗nu ˈwo Zoova ˗dhɔkë ꞊dedewo wo ꞊faan ˈka, ˗an ˈka. ˗Ya ˈgo mü, ˗wo wo ˗de ˗kë ˈˈsaa˗ ˈka kö ˈwo Zoova ˗bha yö kë. ˗Zlan ˗bha ˈtɔŋ˗ ˈö Moizö ˗ya ˗bɛnzë, ˗ya ˗pö ꞊dhɛ gɔɔn˗ ɛɛnˈˈ dhebɔ ꞊mɔɔn˗ ˗bha ˈö ö ˗de nu Zoova ˗dhɛ kö ˈö kë nazidheɛn ˈka ˈˈtʋ̈ŋ ˈbha ˈˈpiʋ̈. a (Nombres 6:​1, 2 ˗wo pö.) Mɛn ˈö ˗ya ö ˗de nu ˗Zlan ˗dhɛ ꞊dhɛ ˗kɔ ˈö bhë ˗a ˈdhö, ˗a dua ˗mü kö ˈtɔŋ˗ ˈbha ˗nu ˈö Izraɛdhömɛn ˗nu ˈwo to ˈwaa ˈkun, ˗ya ˗ya ꞊bhlëë ˈgü. ˈDhɛ ˈˈdhʋ̈, ˈmën ˗kë ˈö˗ mɛn ˈbha ˗nu ˗wo ˗wɩ ˗kë nazidheɛn ˈka ˗sü ˗bha? Zoova ˗dhɔ ꞊dede ˈö kun ˗an ˈgü waa ˈwɔn ˗së ˗nu ˈö ˗an ˗kë ˗an ˗dhɛ ˈnën ˗an ˗blü ˗a ˗bha.—Deut. 6:5; 16:17.

3. ˗Zlan ˗dhɔkëmɛn ˗nu ˈwo ꞊dɛɛ ˗wo kë ˗sü ˈka ꞊dhɛ nazidheɛn ˗nu ˈdhö ˗kɔ ˗kë ꞊dhɛ?

³ ˗Dhɛ ˈö «Klisi ˗bha ˈtɔng˗» ˗yö yö Moizö ˗bha ꞊ʒiaan ˈgü, ˈyö nazidheɛn ˗dhɛ ˗yö go ˈˈshia˗. (Ga. 6:2; Wlɔ. 10:4) ˈKö ˗kë ˈˈdhʋ̈ ꞊dhɛ nazidheɛn ˗nu ˈdhö, Zoova ˗dhɔkëmɛn ˗nu ˈwo ꞊dɛɛ ˗wa ˗dhɔkë wo zuʋ̈ˈˈ ꞊gban, wo ˗zotakɔ ꞊gban waa wo ꞊faan ꞊gban  ˈka. (Mak. 12:30) Kwa zuʋ̈ˈˈ ˗yö ˗wɩ ˗a ˗bha kö ˈkwa˗ kë ˈˈdhʋ̈ ˈˈtʋ̈ŋ ˈkwa kwa ˗de ˗nu ˗a ˈka Zoova ˗dhɛ bhë, ˗a ˈka. Kwa˗ pö ˈkwa kwa ˗bha ˗tosɛta ˗bɛ ˗a ˗bha kwa dua ˗mü kö kwa Zoova dhɔɔbhaawɔn kë, ˈkwa ˈˈsaa˗ ꞊va bho kö ˈkwa˗ ˗dhɔkë. Pë ˗nu ˈö nazidheɛn ˗nu ˗wa ˗kë kö ˈwo ˈto wo ˗wo ˈwo˗ ˗bhö Zoova ˗dhɛ bhë ˗a ˗ta ˈkwa ˗an ˗ga ˗së ˈka, kwa ˗dho ˗gleŋ ˗së ˗nu ˈwo ˗dho kwa ˗takun kö ˈkwa ˈto kwa ˗wo kwa˗ ˗bhö ˗a ˗ta, ˗an yö ˈpö. b (Mat. 16:24) ˗Kwaa ˈwɔnzuan ˈbha ˗nu ˗ga.

˗KWA ˈˈWƖ ˈˈSAA˗ ˗NU BHO ˗SÜ ˗BHA

4. ˈKwa ˗dhɛ ˗ga Nombres 6:​3, 4 ˈgü, ˈˈsaa˗ ˗mɛɛn ˈö nazidheɛn ˗nu ˗wa bho?

⁴ ˗Bhö Nombres 6:​3, 4 ˗wo pö. Nazidheɛn ˗nu dua ˈyaa ˗mü kö ˗wo we mü ɛɛnˈˈ kö ˗wo ˗drɔɔn ga ˗nu ˗bhö. Mɛn ˗nu ˈwo kun ˗an ˗züzü ˗wo ˗kun pë ˗nu ˈwo bhë ˗an ˗bhö ˗ni ˈgü ˗kplawo, ˈyö sü ꞊dhɛ ˗a ˗kë ˈˈdhʋ̈ ˗sü ˈyaa ˈya˗ ˗an ˗bha ˈka. Biblö ˗ya ˗pö ꞊dhɛ we ˈö ˗kë ˗Zlan ˗bha gbɔɔdhe ˈka bhë ˗yö mɛn zuʋ̈ˈˈ ꞊nii ˗da. (Ps. 104:​14, 15) ˈKö ˗kë ˈˈdhʋ̈, nazidheɛn ˗nu ˗wo ˗wɩ ˗kan ˗we ˗bha ˗sü ˗bha. c

5. ˈˈSaa˗ suu ˗mɛɛn ˈö Madian waa Masedha ˈwo˗ bho? ˈYö ˈmën ˗kë?

⁵ ꞊Dhɛ nazidheɛn ˗nu ˈdhö, kwa ˗de ˈpö kwa ˈˈsaa˗ ˗bho kë ˈˈdhʋ̈ kö ˈkwa yö ꞊va kë Zoova ˗dhɛ. Madian waa Masedha ˗kwa ˗an ˗bha ˈwɔnzuan ˗ga. d Dhe waa ö ꞊gɔɔn ˈwo bhë, ˗an ˗bha ˗tosɛta ˗kun ˗së. Yö ˗tiaandhö ˗kun Madian ˗gɔ, ˈwo kun ˈkɔ ˗së ˈgü. ˈˈKɛɛ ˗wo ˗kun ˗a ˈˈpiʋ̈ kö ˈwo yö ꞊va kë Zoova ˗dhɛ. ˗A ˗wɔn ˈgü, ˗wo ˗wɩ ˈwɔn ˈbha ˗nu ˗bho ˈˈgblʋʋ ˗sü ˗bha. ˗Wa ˗pö: «Yi ˗kan pë ꞊va ˈdhɔ ˗sü ˗bha ˈö ˈyi dho ˈkɔ ˈˈtɩtɩ do ˈgü, ˈyi yi ˗bha gɔ ˈˈdhoodɔ.» ˗A ˗dhɛ ˈyaa kun ˗a ˗bha ˗be kö Madian waa ö ˗bha dhebɔ ˗wo ˈwɔn ˗nu kë ꞊dhɛ ˗kɔ ˈö bhë ˗a ˈdhö. ˈˈKɛɛ ˗wa ˗kë ˈˈdhʋ̈ kö ˈˈtʋ̈ŋ ˗yö kë ˈwo ˗gɔ ˈwo wo ˗bha ˗zlanwopösü ˗dadhiʋ̈. ˗Wo ˗kë ˈwo ˗de ˈgü ˗së, ˈö˗ ˗an zuʋ̈ˈˈ ˈˈgblü ˗yö dhi ˈwɔn ˈwo ˗da ˗a ˗ʒian ˗ta ˈˈdhʋ̈ ˗a ˗wɔn ˈgü.

6. ˈMën ˗kë ˈö kletiɛn ˗nu ˗wo ˈˈsaa˗ ˗nu bho ꞊dɛɛ? (Kpɔɔˈˈ ˈzü pë ˈˈbin ˗bha.)

⁶ Zoova ˗dhɔkëmɛn ˗nu ˈwo ꞊dɛɛ ˗wo ˈˈsaa˗ ꞊va ˗bho wo ˗bha pë ˈbha ˗nu ˈka zuʋ̈gblüdhi ˈka, kë ˈˈdhʋ̈ kö ˈˈtʋ̈ŋ ˗yö kë ˈwo ˗gɔ ˈwo Zoova ˗bha yö kë. (1 Ko. 9:​3-6) Zoova ˈyaa ˈˈgbɩɩdhɛ wɔ kwa ˗ta kö ˈˈsaa˗ suu ˈö ˈˈdhʋ̈ ˈkwa˗ bho ɛɛnˈˈ pë ˗nu ˈö ˈkwa dho kwa ˗kɔ bho ˗an ˈgü ˈˈdhʋ̈, ˈwaa ˈya˗. ˗A ˈwɔnzuan ˈnën ˗tɔ mɛn ˈbha ˗nu ˗wo ˗kan yö ˈö ˗an ˗dhɛ ˗së waa wo ˗bha ˈkɔ ˗nu ˗bha. Mɛn ꞊vadhɛ ˗wa ˗pö wo ˈti ˗dho ꞊gwaan ˈkpɔ ɛɛnˈˈ wo ˈti ˗dho dhe ˈsü, ɛɛnˈˈ ˈzü wo ˈti  ˗dho ˈnën ˈkpɔ. ˗A mɛn ˈbha ˗nu ˗wo ˗dho ˗dhɛ ˈö ˗zlanwopömɛn ˗nu ˈwaa mü ꞊va ˗a ˈgü, ˈkö ˗kë ꞊dhɛ ˗an dhɔɔbhaamɛn ˗nu ˈwaa ˗an ˈka ꞊klöö˗. Mɛn ꞊vadhɛ kwa ˗wɩ ˈˈsaa˗ suu ˗nu ˈwo bhë ˗an bho ˗sü ˗bha, ˈyö ˗sü ꞊dhɛ ˈkwa˗ ˈˈpiʋ̈ kö kwa ˗kɔ ˗yö kë Zoova ˗bha yö ꞊va ˈgü. ˗Yö ga kwa ˈgü ꞊dhɛ ˈˈsaa˗ ˈˈpɛpɛ ˈö ˈkwa˗ bho kë ˈˈdhʋ̈ kö kwa Zoova ˗bha yö kë bhë, ˈkö ˗kë ꞊dhɛ ˗yö ˈˈtɩtɩ ɛɛnˈˈ ˗yö ˈkpii˗, ˗yö Zoova ˗dhɛ ˗së ꞊dedewo.—Ebl. 6:10.

˗KWA ˈˈWƖ ˗YA ˗DETASÜ ˗BHA

7. ˈMën ˗kë ˈö ˗towotasü kun nazidheɛn ˗nu ˗kɔa ˈˈgbɩɩ˗? (Nombres 6:5) (Kpɔɔˈˈ ˈzü pë ˈˈbin ˗bha.)

⁷ ˗Bhö Nombres 6:5 ˗wo pö. Nazidheɛn ˗nu ˗wo wo ˗wo ˗bhö ꞊dhɛ wo ˈti ˗dho wo ˗bha wun ˈˈkan. ˗Kɔ ˈwo˗ ˗zɔn ˗a ˈka ꞊dhɛ wo wo ˗gɔ ˗dho Zoova ˗dhɛ ˈˈshia ꞊dedewo, ˈyö bhë. Izraɛdhömɛn ˈbha ˗ya ꞊gwëë nazidheɛn ˗dhɛ ˈgü, ˗a ˗bha wun ˗yö ˗kë ꞊gblɛɛn ˈö mɛn ˈˈpɛpɛ ˈˈɲan ˗yö ˗da ˗a ˈgü. Mɛn ˈˈwɛɛ ˗nu ꞊waa˗ ꞊bhlëë ˗ya, ꞊waa˗ ꞊faanmën nazidheɛn ˗dhɛ ˗bha, ˗towotasü ˗kë ˗a ˗kɔa ˈˈplëëplë. ˈˈKɛɛ ˈwɔn yaa ˈö kun mü ˈyö ˗tɔ ꞊dhɛ ˈˈtʋ̈ŋ ˈbha ˈgü, Izraɛdhömɛn ˗nu ˈwaa kun nazidheɛn ˗nu ꞊bhlëë ˗ya ˗ni ˈgü ɛɛnˈˈ ˈwaa kun ˗an ˗takun ˗ni ˈgü. ˗Zlan ˗wodhiʋ̈lomɛn Amɔsö ˗bha ˈˈtʋ̈ŋ ˈgü, ˗ta ˗yö ˗Zlan ˗bha ˗mɛn ˗nu ˈwo kun Izraɛdhö bhë ˗wo we nu nazidheɛn ˗nu ˗dhɛ kë ˈˈdhʋ̈ kö wo ˈgo ˗wo ˗ta. (Amos 2:12) ˈDhɛ ˈˈtʋ̈ŋ ˗nu ˗wo ˗ʒiö, nazidheɛn ˗nu ˗bhawɔn ˗kun ˈgüdɔgbɩɩsü ꞊dede ˗bha kö ˗wo ˈto wo ˗wo ˗ta, kö waa mɛn ˈˈwɛɛ ˗nu ˈwa ˗dho kë do.

8. Bɛnʒamɛn ˗bha ˈwɔnzuan ˗yö ü ˗takun ˗kɔ ˗kë ꞊dhɛ?

⁸ Zoova ˗bha ˗takundhe ˈsaa˗ ˈgü ˈkö ˗kë ꞊dhɛ ˈkwaa ˗mɔn ˈˈwɩ ˗sü ˗bha, ꞊faan ꞊mɔɔn˗ ˗bha ˈö ˗kë kwa ˗gɔ ˈkwa go mɛn ˈˈwɛɛ ˗nu ˈˈpiʋ̈. Bɛnʒamɛn ˈö˗ ˗kwɛ ˈdhö ˗kɔŋ do ˈö Zoova ˗dhɔkëmɛn ˈka Nɔɔvɛʒö, ˗kwaa ˗bha ˈwɔnzuan ˗ga. ˗Gblü ˈö ˗da Üklɛnö bhë ˗a ˗wɔn ˈgü, ˗wo ˈwɔn ˈbha ˗nu ˗kë ˗an ˗bha ꞊klaŋplöö kö ˗wo Üklɛnömɛn ˗nu ˗zogban. ˗Wa ˗pö ˈnën ˗nu ˗wo sɔ ˈö˗ ˈˈɲan ˈdhö Üklɛnö ˗bha drapo ˈka ˗wa ˗da wo ˗bha kö ˗wo ˈˈtan bho. Bɛnʒamɛn ˗dɔ ˗an ˈka ꞊gblɛɛn kö ö ˗kɔ ˈya ˗dho kë ˗a ˈgü. ˈˈKɛɛ ˈdhɛ ꞊klaŋgɔmɛn do ˗yö ˗kpan ˗a ˗bha ˗yö ˗gbla ˗a ˗ta, ˈö˗ pö: «Ü dua ˗mü kö ˈü nu yi ˈˈpiʋ̈. Mɛn ˈˈpɛpɛ yi ü ˈˈdhiʋ̈ ˈˈgan ˗ni ˈgü.» Bɛnʒamɛn ˗yö ꞊ɲɔɔn ö ˗bha ꞊klaŋgɔmɛn ˗bha ˗zogbandhe ˈka, ˈö˗ pö: «N ˗bɔa ˈyaa ˈdhö. ˈMaan ꞊mɔɔn˗ ˗bha kö ˈa n ˗kɔ ˗da ˈˈsɛkɔɔwɔn ˈgü. Zoova ˗bha ꞊Gbɛkiö ˗nu ꞊vadhɛ ˗wo ˗kaso ˈgü, ˈyö sü ꞊dhɛ ˈwaa ˈˈpiʋ̈ kö ˈwo ˗gblü gɔn.» ꞊Klaŋgɔmɛn ˗ya ˈgüman ˗a ˗gɔ ˈö ö ˗kwaa ˗zü. ˈˈKɛɛ Bɛnʒamɛn ˈˈtɛɛbɔ ˗nu ˈwo ꞊klaŋkɔɔdhö ˗wa dhɛɛˈˈ ˗kpɔ ꞊dhɛ ˗mën ˈö ˗kë ˈö ˗yö ˈti nu ˗wo ˈˈpiʋ̈? ˈˈSuʋ̈ ˗ya ˗kë ˈö ˈˈgbʋ ˗yö ˗da ˗a ˈka. ˈˈKɛɛ ˈkö ˗kë ˈˈdhʋ̈, ˗yö ö ˈgü ˗dɔ ˈˈgbɩɩ˗ ˈö ˗wo do ˈö˗ pö ꞊klaŋgɔmɛn ˗dhɛ bhë, ˗a pö ˗an ˗dhɛ ˈpö. ꞊Taabha, Bɛnʒamɛn ˗ya ˗pö ö ˗mɛn  ˗nu ˗dhɛ ꞊dhɛ Zoova ˈnën ö ˗takun ˈö ö ˗bha ˗zoyödhe ˗wɔn ˗blɛɛ.

9. ˗Kɔ ˗mɛɛn ˈkwa dho Zoova zuʋ̈ˈˈ ˈˈgblü dhi ˗a ˈka?

⁹ Zoova dhɔɔbhaawɔn kë ˗sü ˈö ˈkwa kwa ˗kɔ ˗yɛ ˗a ˗bha bhë, ˗ya ˗kë ˈö kwaa mɛn ˗nu ˈwo kwa ˗züzü ˈkwaa do. Kwa ˗bhawɔn ˗yö yö ˈgüdɔgbɩɩsü ˗bha kö ˈkwa˗ ˗zɔn ꞊dhɛ Zoova ˗bha ꞊Gbɛkiö ˗nu ˗mü kwa ˈka kwa ˗bha yö ˈˈdhiʋ̈ ɛɛnˈˈ ꞊klaŋplöö. ˗Dhɛ ˈö ˗kë ꞊dhɛ ˈˈkpɔnŋtaamɛn ˗nu ˈˈtakɔ ˗nu waa ˗an ˗zotakɔ ˗nu ˗wa kë ˈya ꞊dedewo bhë, Biblö ˗bha ˈtɔŋ˗ ˗gɛngbandhɛ ˗ya ꞊bhlëë ˈgü ˗sü waa nɔɔn˗ ˗së pö ˗sü ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. (2 Tim. 1:8; 3:13) ˈˈKɛɛ kwa ˗zo ˈya ˗dho bhɔ ꞊dhɛ ˈkwa kwa ˈgü dɔ ˈˈgbɩɩ˗ ˈkwa ˈgo mɛn ˈˈwɛɛ ˗nu ˈˈpiʋ̈ Zoova ˗dhɔkë ˗sü ˈka, «˗a ˈˈyi ˗yö ˗kan [Zoova] ˗dhɛ ꞊dedewo.»—Prov. 27:11; Mal. 3:18.

˗KWA ZOOVA ˗WƆN BƆ ˈˈDHIƲ̈ KWA ˗BHA ˗TOSƐTA ˈGÜ

10. ˈTɔŋ˗ ˈö ˗ya ˗sü ˈka Nombres 6:​6, 7 ˈgü bhë, ˈmën ˗kë ˈö˗ ˗ya ꞊bhlëë ˈgü ˗sü ꞊mɔɔn˗ ˗bha ˈö ˗kë nazidheɛn ˗nu ˗gɔ ˈˈgbɩɩ˗?

¹⁰ ˗Bhö Nombres 6:​6, 7 ˗wo pö. Nazidheɛn ˗nu dua ˈyaa ˗mü kö ˗wo kë mɛn ꞊gee ˈˈsuee. ˗A ˈbha ˗ya kë kwa ꞊mɔɔn˗ ˗bha ˈö ˈkwa˗ pö ꞊dhɛ ˈwɔn ˈˈgbɩɩ˗ ˈyaa ˗mü. ˈˈKɛɛ Biblö ˗ya ˈˈtʋ̈ŋ ˈgü, nazidheɛn ˗bha ˈkɔdhigümɛn ˈbha ˗wɔn ˗ya kë, ˈtɔŋ˗ ˈö bhë ˗a ˗ya ꞊bhlëë ˈgü ˗sü ˗kë ˗a ˗kɔa ˈˈgbɩɩ˗. ˈˈTʋ̈ŋ ˈö ˈˈdhʋ̈ ˗a ˈka, ga ˗wɔ ˈˈɲaan kë ˗sü ˈnën ˗tɔ ˗kë mɛn ꞊gee ˈˈsuee ˗sü. (Zan 19:​39, 40; Këw. 9:​36-40) Wɔkɔ ˈö bhë ˗a ˗wɔn ˈgü, nazidheɛn ˗bha ˗towotasü ꞊mɔɔn˗ ˗bha ˈö ˗kë ˈˈgbɩɩ˗. ˈˈTʋ̈ŋ ˈö ˗wëë kun bhɔ ˗ni ˈgü ˗an ˗bha ˈkɔdhigümɛn ˗nu ˗ta ꞊dedewo bhë ˗a ˈgü, nazidheɛn ˗nu ˗wa ˗zɔn ꞊dhɛ ˗zoyödhe ˗yö wo ˗gɔ ˈwo to wo ˗wo ˗ta. ˈYaa za ˈgü ꞊dhɛ Zoova ˗yö ö dhɔɔbhaamɛn ˗nu ˈwo ˗klu ˗a ˗bha ˗an ˈgü ˗kë ˈˈgbɩɩ˗ ˈö ˈwo bɔ wo ˗bha ˈgüdandhe ˗nu ˈgü.

11. Kletiɛn ꞊yaa˗ pö ˈö pë ˈbha kë ö ˗bha ˈkɔdhigümɛn ˗nu ˗dhɛ, ˗mën ˈö˗ ˗zo ˈti ˗dho bhɔ ˗a ˈka? (Kpɔɔˈˈ ˈzü pë ˈˈbin ˗bha.)

¹¹ Kletiɛn ˗nu kwa ˗wo ˈkwa˗ ˗bhö Zoova ˗dhɛ bhë ˈkwaa ˈsü ˗bhaasü. ˗Yö ˗gban ˈwɔn ˗nu ˈkwa ˗da ˗an ˗ʒian ˗ta ɛɛnˈˈ ˈkwa ˗an ˗kë kwa ˗bha ˈkɔdhigümɛn ˗nu ˗dhɛ ˗an ˗bha. ˗Kwa yökë kwa ꞊faan ˈka kö ˈkwa kwa ˗bha ˈkɔdhigümɛn ˗nu ˗bhawɔnyëëpë ˗nu ˈˈɲan bhɔ. ˈˈKɛɛ pë ˗nu ˈwo bhë ˈkwaa ˗an ˗wɔn bɔ ˈˈdhiʋ̈ ˗a ˗dhɛ ˗nu ˈö Zoova ˗ya pö ˈkwa ˗an kë, ˗an ˗ta. (Mat. 10:​35-37; 1 Tim. 5:8) ˗A ˗wɔn ˈgü ˈˈtʋ̈ŋ ˈbha ˗nu ˈka, kwa ꞊mɔɔn˗ ˗bha ˈkwa ˗da ˈwɔn ˗nu ˈö ˈwaa kwa ˗bha ˈkɔdhigümɛn ˗nu ˗dhɛ ˗së ˗an ˗ʒian ˗ta kë ˈˈdhʋ̈ kö ˈkwa Zoova zuʋ̈ˈˈ ˈˈgblü dhi.

12. ˈDhɛ Dhɛzandrö kun bɔ ˗ni ˈgü ˈwɔn ˈˈgbɩɩ˗ ˈgü ö ˗bha ˈkɔdhi ˈgü, ˗mën ˈö ˗kë? ˈYö ˗mën ˈö yö ˈti˗ kë?

 ¹² Dhɛzandrö waa ö ˗bha dhebɔ Dorinö, ˗kwa ˗an ˗bha ˈwɔnzuan ˗ga. ˈDhɛ ˈwo Biblö ꞊draan ˗kwɛ do ˈˈpiʋ̈, Dorinö ˗yö ö ˗bha ˈduannu ˈö kun ˗a ˈˈpiʋ̈ ˈpö kö ö ꞊gɔɔn ˗ya kë ˈˈdhʋ̈. ˈˈKɛɛ Dhɛzandrö ˗yö ö zuʋ̈ˈˈ ˗kë ˗saa ˈö˗ pö ˗a ˗dhɛ ˗dhɔŋsü ˈka ꞊dhɛ ö ˗dho ˗a draanˈˈ ˗kplawo. ˈYaa kun Dorinö ˗dhɛ ˗së. -A -wɔn ˈgü, ˗yö ˈˈgbɩɩdhɛ ˗wɔ ö ꞊gɔɔn ˗ta kö ˗yö ˈˈkan ˗a ˗bha. Dhɛzandrö ˗ya ˗pö ꞊dhɛ ö pë ˈˈpɛpɛ ˗kë kö pë ˈö ö ˗bha dhebɔ ˗blü ˗a ˗kë ˈˈdhʋ̈ ˗sü ˗bha ˈö˗ dɔ, ˈˈkɛɛ ˈyaa kun ˈˈplëëplë ˗a ˗bha ˈka. ˈˈTʋ̈ŋ ˈbha ˗nu ˈka, Dorinö ˗yö ˈwɔn yaa ˗blɛɛ ˗a ˗gɔ, ˈö ˗wɔn to ˈˈtɩtɩ kö Dhɛzandrö ˗yö ˗kan Biblö draansü ˗bha. ˈˈKɛɛ ˗yö Zoova ˗wɔn ˗bɔ ˈˈdhiʋ̈, ˈö go mü ˈö ˗dhɔ ꞊dede ˗zɔn ö ˗bha dhebɔ ˗dhɛ ˈö˗ ꞊bhlëë ˗ya. ˗A ˗bha ˈwɔnzuan ˗së ˗ya ˗kë ˈö˗ ˗bha dhebɔ ˗yö ˗ya Biblö draansü ˗bha ˈzü, ˈö bɔ ˈˈyi ꞊bhaa. Kpɔɔˈˈ video Dhɛzandrö waa Dorinö Vakaa: «˗Dhɔ bha ꞊në ꞊ya kë mɛ ˈgü ˈyö mɛ zuëˈˈ ˗yö ˗kë ˗sɛa ˈwɔn ꞊gban ˈgü, ˈyö mɛ ˈˈklʋ ˗yö ˗dhi» ˈö video ˗nu ˈwo yö ˈko ˈˈpiʋ̈ «Gagade ˗yö mɛn ˗bha ˗tosɛta ˗bho ˈˈgblʋʋ» jw.org ˈgü bhë, ˗a ˗bha.

13. Kwa ˗dho ˗dhɔ ˗zɔn Zoova waa kwa ˗bha ˈkɔdhigümɛn ˗nu ˗an ˗dhɛ ˗kɔ ˗kë ꞊dhɛ?

¹³ Zoova ˈö ˈkɔdhi ˗damɛn ˈka bhë ˗ya ˈˈpiʋ̈ kö ˗a ˈgümɛn ˗nu zuʋ̈ˈˈ ˈˈgblü ˗yö dhi. (Efɛ. 3:​14, 15) ˈDhɛ ˈˈdhʋ̈ ˈkwa˗ pö kwa zuʋ̈ˈˈ ˈˈgblü ˗yö dhi, pë ˈö Zoova ˈdhö˗ ˈˈpiʋ̈ kwa dua ˗mü kö ˈkwa˗ kë. ˈKwa kwa ˗zokë kwa ˗bha ˈkɔdhigümɛn ˗nu ˈˈpiʋ̈, ˗an ˗dhɔ ˗ya kwa kë ˈkwa ˗an ꞊bhlëë ˗ya, ˗yö ga kwa ˈgü ꞊dhɛ kwa ˗bha ˈgüdɔgbɩɩsü kö kwa Zoova ˗dhɔkë bhë ˗yö ˗dho kë ˗a ˗dhɛ ˗së ꞊dedewo.—Wlɔ. 12:10.

˗KWA KWA ˈKO ˗NU ꞊FAAN DƆ ꞊DHƐ NAZIDHEƐN ˗NU ˈDHÖ

14. De ˗nu ˈö kwa dua ˈdhö ˗mü kö ˈkwa ˗an ꞊faanmën kwa ˈˈdhiwo ˗nu ˈgü?

¹⁴ Mɛn ˈˈpɛpɛ ˈwo wo ˗kɔ ˗yɛ Zoova ˗dhɔkësü ˗bha ꞊dɛɛ, ˗dhɔ dua ˗mü kö ˗yö ˗an ˗blü ˈˈsaa˗ ˗nu bho ˗sü ˗bha. ˈˈKɛɛ ˈˈtʋ̈ŋ ˈbha ˗nu ˈka, ˈyaa kë ˈˈplëëplë. Kwa ˗dho kwa ˈko ˗nu ˗takun ˗kɔ ˗kë ꞊dhɛ kö ˈˈsaa˗ ˗nu ˈwo ˈˈdhʋ̈ ˈkwa˗ bho? Kwa ꞊mɔɔn˗ ˗bha ˈkwa˗ kë ˈˈdhʋ̈ kwa ˈko ˗nu ꞊faan dɔ ˗sü ˈka kwa ˈˈdhiwo ˗nu ˈgü. (Job 16:5) Mɛn ˈbha ˗nu ˗wo ˈka ˗bha ˗zlanwokɔdhi ˈgü ˈwo pë ˈˈpɛpɛ kë ˗ni ˈgü kö ˈwo wo ˗bha ˗tosɛta kë ˗bhaasü kë ˈˈdhʋ̈ kö ˈwo Zoova ˗bha yö ꞊va kë ˗ee? Wlüünën ˗nu ˈwo wo ˈgü dɔ ˗ni ˈgü ˈˈgbɩɩ˗ kö ˈwa ˗dho kë ꞊dhɛ wo ˈˈtɛɛdo ˗nu ˈdhö ꞊klaŋplöö ˈkö ˗kë ꞊dhɛ ˗a ˗kë ˈˈdhʋ̈ ˗sü ˈyaa ˈˈplëëplë, ka ˗an ˗dɔ ˗ee? Biblö ꞊klaŋnën ɛɛnˈˈ kwa ꞊dhegblü ˈbha ˗nu ˈö ˗an ˗bha ˈkɔdhigümɛn ˗nu ˗wo ꞊gban ˗an ˗gɔ, ˈˈkɛɛ ˈwo pë ˈˈpɛpɛ ˗kë kö ˈwo ˈto ˗wo wo  ˗ta, ka ˗an ˗dɔ ˗ee? ˗Kwa ˗an ꞊faanmën, ˈkwa˗ pö ˗an ˗dhɛ ꞊dhɛ ˗an ˗bha wo ˈgüdɔgbɩɩsü ˗yö kwa ˗dhɛ ˗së. ˗Kwa ˗an ˈˈnuɛ bho pë ˈwo˗ kë ˗ni ˈgü Zoova ˗dhɛ ˗a ˗wɔn ˈgü.—Fi. 4, 5, 7.

15. Mɛn ˈbha ˗nu ˗wo kwa ꞊dhegblü ˗nu ˈwo ˗Zlan ˗bha ˈˈtʋ̈ŋ ꞊gban ˈgü ˗yö ˈgü ˗an ˗takun ˗kɔ ˗kë ꞊dhɛ?

¹⁵ ˈˈTʋ̈ŋ ˈbha ˗nu ˈka, kwa ꞊mɔɔn˗ ˗bha ˈkwa pë nu kwa ꞊dhegblü ˗nu ˈwo ˈˈtʋ̈ŋ ꞊gban ˈgü ˗yö ˈgü, ˗an ˗dhɛ. (Prov. 19:17; Ebl. 13:16) Kwa ꞊dhegblüdhe do ˈö Siri Lanka ˈö ˗ya kë zii, pë ˈö kun ˗a ˈˈpiʋ̈ kö ˈö˗ kë ˈyö bhë. ˈDhɛ ˈwo˗ saan ˗dadhiʋ̈, ˈkö ˗kë ꞊dhɛ ꞊nɔɔn ˗wɔn ˗yö ˗kun ˈˈgbɩɩ˗ ˈˈsɛ ˈö bhë ˗a ˈgü, ˗yö ˗kun ˗a ˈˈpiʋ̈ kö ˈö wlüünëndhe ˗nu ꞊plɛ ˈwo ˗yödhiʋ̈ ˈka ˗an ˗takun ˗wo ˗zlanwopö ˗kplawo. ˗A ˗wɔn ˈgü, ˗ya ˗pö ö ˗dho ˗an ˗bha mɛn ˗dhɛ telefɔnö ˈka ˗sü ꞊sɔnŋ nu ˈˈsu ˈˈpɛpɛ ˈka. ˈWɔn yö ˗kɔ ˗së ꞊dede ˗mü kwa ꞊dhegblüdhe ˗bha ˈka.

16. ˈMën ˈkwa ꞊mɔɔn˗ ˗bha ˈkwa˗ ꞊draan ˈö ˗gban nazidheɛn ˗nu ˗bha?

¹⁶ Kwa ꞊mɔɔn˗ ˗bha ˈkwa ˈwɔnzuan ˗së ꞊va sü nazidheɛn ˗nu ˗bha wo ˗de nu ˗sü ˗bha. ˗Wo pë ˈˈwɛɛ ˈbha ˈö ˗gban kwa Dë Zoova ˈö dhaŋ˗ ˈgü bhë ˗a ˗bha ˗a ˗zɔn kwa ˗dhɛ. Zoova ˗ya ˈwɔn ˗dɔ ꞊dhɛ kwa˗ ˈˈpiʋ̈ kö ˈkwa kë ö ˗dhɛ ˗së, ˈö go mü ˈö˗ yö ꞊dhɛ kwa zuʋ̈ˈˈ ˗yö ˈˈwɩ ˗sü ˈka ˗a ˗bha kö ˈkwa ˈˈsaa˗ ꞊va bho kë ˈˈdhʋ̈ kö ˈkwa ˈto kwa ˗wo ˗ta. ˗Yö ˗go mü ˈzü ˈö ꞊bhlëë ˗ya kwa ˗bha, ˈö ö ꞊kwaa kwa ˗zü kö ˈkwa˗ ˗zɔn ö ˗dhɛ ꞊dhɛ ö ˗dhɔ ˗yö kwa ˗kë. (Prov. 23:​15, 16; Mak. 10:​28-30; 1 Zn. 4:19) Nazidheɛn ˗nu ˗bha ˈwɔnzuan ˗ya ˗zɔn ˈpö ꞊dhɛ ˈˈsaa˗ ˈˈpɛpɛ kwa˗ bho kë ˈˈdhʋ̈ kö ˈkwa Zoova ˗dhɔkë bhë, ˗ya ˗yö ˈö˗ ˗dhɛ ˗së ꞊dedewo. ˈDhɛ ˈˈdhʋ̈ ˗kwa pë ˈˈpɛpɛ kë kö ˈkwa Zoova ˗dhɔkë ˗kplawo, kö kwa zuʋ̈ˈˈ ˗yö ˈˈwɩ ˗a ˗bha ˈkwa˗ ˗bha yö kë kwa ꞊faan ˈka.