1. A yi nensaaleba zemmo zaa poɔŋ, bo ewuli soŋ la ka Jehoova puorebiiri maŋ wulo?

 HO NƆŊ la Jehoova yaga zaa bee? Nɔkpeɛne zaa kyebe ka ho nɔmooŋ! Ho yoŋ meŋ naane. Takoreŋ saŋa na noba yaga meŋ da taa la a lɛ nɔmmo ŋa tɔ ko Jehoova. (Yiem. 104:33, 34) Noba yaga de la yɛlɛ yaga iri sareka kyɛ na toɔ̃ puore Jehoova. Lɛ ka noba na naŋ da maŋ e Naazariti na meŋ da maŋ e. Nembobo da la ba, ka boŋ teŋ na baŋ zanne yi ba ewuluu na poɔŋ?

2. (a) Nembobo da la Naazariti noba? (Soribu 6:1, 2) (b) Ananso la wala ka a Izerayɛl biiri mine da maŋ sage ka ba wa leɛ Naazariti?

² A yelbiri “Naazariti” e la Hiburu yelbiri naŋ wuli ka “Neɛ Kaŋa Ba Naŋ Kaa Iri,” “Neɛ Kaŋa Ba Naŋ Iri Biŋ,” bee “A Iri Tere” ka o tonɔ toma mine naŋ e a yoŋ. A yelbie ŋa sereŋ kyaarɛɛ a Izerayɛl biiri na naŋ da taa eŋnyagroŋ yaga zaa Jehoova puoruu poɔŋ, a da maŋ de yɛlɛ mine iri sareka ka lɛ na vɛŋ ka ba toɔ̃ puoro Jehoova sori naŋ e o yoŋ poɔŋ. Bege na Naaŋmen naŋ da de ko Moosis na da terɛɛ sori ka dɔbɔ ane pɔgeba zaa na baŋ eŋɛɛ noɔre naŋ e o yoŋ ko Jehoova a wa leɛ Naazariti wagre kaŋa poɔŋ. a (Kanne Soribu 6:1, 2.) A lɛ nɔ-eŋ na da wuleeŋ ka aseŋ ka o soba tuuro sowuli mine a Izerayɛl biiri naŋ da ba seŋ ka ba tuuro. Azuŋ ananso la wala ka a Izerayɛl bie kaŋa na boɔrɔ ka o wa leɛ Naazariti? Aminekaŋaŋ oŋ nɔŋ Jehoova yaga zaa a taa nimipa meŋ koo ane maaloo na zaa O naŋ koo na zuŋ.​—Dut. 6:5; 16:17.

3. Sobuo ka Naaŋmen puorebiiri naŋ bebe zenɛ ŋa neŋ a Naazariti noba yɛlɛ yitaa?

³ A yi saŋa na “a Krista bege” naŋ wa leɛre a Bege na Naaŋmen naŋ da de ko Moosis voɔreŋ na, Naaŋmen puorebiiri koŋ  baŋ lɛ e Naazariti. (Gal. 6:2; Uro. 10:4) Kyɛ aŋa a Naazariti noba na, zenɛ ŋa meŋ, Jehoova puorebiiri maŋ moɔ̃ la niŋe a puoro Jehoova ane ba sukyie zaa, ba nyɔvore zaa, ane ba yɛŋ zaa, ane ba faŋa zaa. (Mak. 12:30) Te maŋ yi la te poɔ zaa a eŋ-noɔre ko Jehoova ka te na eɛ lɛ ka teneeŋ wa de te menne zaa ko Jehoova. Ka teneeŋ na toɔ̃ paale a lɛ nɔ-eŋ ŋa, aseŋ ka te erɛ Jehoova boɔbo a kyɛ de yɛlɛ mine meŋ iri sareka kyɛ na toɔ̃ puore Jehoova. Te na zanne nyɛɛ lɛ a Naazariti noba naŋ da maŋ paale ba nɔ-eŋ na, a nyɛ yɛlɛ teŋ na baŋ zanne yi be a kyaare lɛ teŋ meŋ na baŋ paale te nɔ-eŋ na. b (Mat. 16:24) Yɛ vɛŋ ka te nyɛ yelmannee mine ane yɛlɛ teŋ na baŋ zanne yi be.

MAŊ DE YƐLƐ MINE IRI SAREKA

4. Aŋa lɛ na Soribu 6:3, 4 naŋ yel na, bo yɛlɛ mine la ka noba naŋ da maŋ e Naazariti na da maŋ de iri sareka?

⁴ Kanne Soribu 6:3, 4. Neɛ naŋ e Naazariti da ba seŋ ka o nyu dããkpeɛne boorɔ zaa, a da ba seŋ ka ba dire boma mine meŋ aŋa zeŋbereŋaa ane aŋseŋnee. A Izerayɛl biiri mine da maŋ dire la a boma ŋa, bonso a da ba e yelfaa zaa ka ba naŋ e lɛ. A Baabole gba yeleeŋ ka dãã eɛ kyɔɔtaa naŋ yi Naaŋmen zie naŋ “maŋ vɛŋ ka nensaalaa sukyiri taa popeɛloŋ.” (Yiem. 104:14, 15) Aneazaa ka ana boma ŋa na baŋ vɛŋeŋ ka nensaalaa taa popeɛloŋ o zemmo poɔŋ, kyɛ noba naŋ da e Naazariti na da maŋ iree sareka ka ba koŋ di a. c

5. Bo yɛlɛ mine la ka Madián ane Marcela da de iri sareka? Ka ananso la wala baŋ da e lɛ?

⁵ Aŋa a Naazariti noba na, te meŋ na baŋ de la yɛlɛ mine iri sareka ka lɛ vɛŋ ka te baŋ toŋ toma yaga ko Jehoova. Te nyɛ Madián ane Marcela zemmo yɛlɛ. d Ba eɛ Kristabiiri naŋ e kultaa deme ka ba zemmo da soma yaga zaa. Madián toma na oŋ da tonɔ na saŋyɔɔ da somaŋ yaga zaa, azuŋ ba da kpeɛrɛɛ die naŋ da veɛlɛ yaga zaa poɔŋ. Kyɛ ba da boɔrɔŋ ka ba toɔ̃ toŋ toma yaga Jehoova puoruu poɔŋ. Azuŋ ba da eɛ leɛroo mine ka lɛ na soŋ ba ka ba toɔ̃ ta yɛlɛ na baŋ de biŋ ba nimitɔɔreŋ na. Ba yeleeŋ ka, “te da piili ŋmaarɛɛ te libi di bara. Te da leɛ yi te kpeɛrɛɛ die naŋ ba e kpoŋ seŋ die na teŋ da kpeɛrɛ na, a da koɔre te lɔɔre meŋ.” A da ba e ferebo ka Madián ane Marcela de a yɛlɛ ŋa zaa iri sareka, ba meŋɛ la da de a gbɛre ka ba e lɛ ka lɛ na vɛŋ ka ba toɔ̃ toŋ a naaŋ moɔloo toma yaga. Ba zemmo yɛlɛ seŋ  baŋ kyɛ baŋ taa popeɛloŋ meŋ ba zemmo poɔŋ.

6. Ananso la wala ka Kristabiiri maŋ de yɛlɛ mine iri sareka zenɛ ŋa? (Kaa a foto meŋ.)

⁶ Zenɛ ŋa Jehoova puorebiiri poɔ maŋ pɛleŋ ka ba de yɛlɛ mine iri sareka, ka lɛ na vɛŋ ka ba toɔ̃ de ba wagre kpoŋ zie zaa a puoruu. (1 Kor. 9:3-6) Jehoova ba ko te bege zaa a yelka te iri a lɛ sareka na koo; boma na meŋ teŋ maŋ de iri sareka na, ka teneeŋ taa ana boma na a ba e yelfaa zaa. Aŋa mannoo poɔŋ, noba mine maŋ de la toma ba naŋ nɔŋ ane ba menne deri iri sareka. Ba mine meŋ maŋ de la gbɛre ka ba koŋ kpɛ kultaa poɔ wieoŋ bee a dɔge bie ba kultaa puoriŋ. Ba mine meŋ maŋ gaa la zie ba naŋ boɔrɔ naaŋ moɔleba yaga ka ba te soŋ ba. Aneazaa ka zie na ba naŋ gɛrɛ na eɛ tɔɔre ka lɛ na vɛŋ ka ba koŋ peɛle ba zɔmenne ane ba yideme. Te yaga zie zaa maŋ de la a yɛlɛ ŋa zaa iri sareka, bonso te boɔrɔŋ ka te de bonzaa te naŋ taa ko Jehoova. Taa sagediibu ka Jehoova niŋe paɛŋ neŋ sareka zaa ho naŋ iri ka lɛ na baŋ vɛŋ ka ho puoruu na, ka a eɛ yaga bee ka a eɛ fẽẽ.​—Hib. 6:10.

E SIRI KA HO E HO YOŊ

7. Ananso la wala aŋ da na baŋ e kpeɛŋaa ko neɛ naŋ e Naazariti ka o paale o noɔre na? (Soribu 6:5) (Kaa a foto meŋ.)

⁷ Kanne Soribu 6:5. Noba na naŋ da maŋ e Naazariti na da maŋ pɔŋ ka ba koŋ kyɛ ba zu-koɔloŋ. A eɛ yɛlɛ baŋ da maŋ de wuli ka ba de la ba menne zaa ko Jehoova. Ka a Izerayɛl bie kaŋaŋ e Naazariti kɔɔre, o zu-koɔloŋ na wa eɛ wogri yaga zaa ka neɛ zaa nyɛ. Ka noba mineŋ wuluu gyeremɛ a kyɛ eŋnɛ o faŋa ka o paale noɔre na o naŋ eŋ ko Jehoova na, a na eɛ mɔlɔ koo ka o e neɛ naŋ na e o yoŋ ka o neŋ o taaba yel-eree koŋ yitaa. Kyɛ a posaanaa la ka, a Izerayɛl biiri takoreŋ yɛlɛ wuleeŋ ka noba mine da ba maŋ sonnɔ bee a wulo gyeremɛ korɔ noba naŋ da maŋ e Naazariti na. Daŋyele Eemos saŋa na, a Izerayɛl biiri na mine naŋ da zagre Jehoova puoruu na da maŋ “de la waiŋ ko a Naazariti noba ka ba nyu,” aminekaŋaŋ ba da maŋ boɔrɔŋ ka ba vɛŋ ka ba sãã noɔre na ba naŋ eŋ ko Jehoova ka ba koŋ nyu dãã na. (Eem. 2:12) Saŋa kaŋa a da na maŋ fɛreŋ ka neɛ naŋ e Naazariti na taa nyaa yaga zaa sɛre kyɛ na baŋ paale noɔre na o naŋ eŋ ko Jehoova na, a e neɛ naŋ na e o yoŋ ka o neŋ o taaba yɛlɛ ba yi taa.

8. Sobuo ka Benjamin zemmo yɛlɛ ŋa eŋ bo faŋa?

⁸ Ka teneeŋ gbaŋ e noba naŋ zoro vi, kyɛ Jehoova na baŋ soŋ teŋ ka te taa nyaa a e te yoŋ ka te neŋ te taaba yel-eree koŋ yi taa. Te nyɛ te yɔɔdɔɔ Benjamin naŋ di yuomo pie naŋ be Norway paaloŋ zemmo yɛlɛ. A Ukraine zɔɔre na zuŋ o sakuu deme da eɛ lammo kaŋa a na de wuli ka ba arɛɛ a Ukraine paaloŋ puoriŋ. Ba  da yelka a sakuu biiri yiele yieloŋ kaŋa kyɛ su boma naŋ taa a Ukraine paaloŋ flag. Benjamin naŋ da ba boɔrɔ ka o de o meŋɛ poɔ paaloŋ neŋ o tɔ paaloŋ zɔɔre yɛlɛ poɔŋ na zuŋ, o da ba peɛle zie na baŋ da erɛ a yɛlɛ na, kyɛ o da te arɛɛ tɔɔre zaa lɛ. O wulwulo kaŋa da nyɛ oŋ a da yel yɛlɛ neŋ kɔkɔ kpeɛŋaa koo ka: “Aseŋ ka ho meŋ wa poɔ te poɔŋ pampana. Te kyɛnlɛ boŋ!” Benjamin da de la nyaa a gaa a wulwulo zie a te yelkoo ka: “N ba are paaloŋ bee naaŋ zaa puoriŋ, N ba de N meŋɛ meŋ eŋnɛ naaŋ di yɛlɛ taawae eŋɛŋ. Jehoova Sieree Deme yaga gba be la nempɔgedieŋ ba naŋ zagre ka ba gaa zɔɔre zuŋ.” A wulwulo da woŋ la o yɛlɛ na muni a bare Benjamin oŋ gaa. Kyɛ o class bitaaba mine da piili soorooŋ ananso o naŋ ba de o meŋɛ poɔ ba poɔŋ. Dabeɛ̃ da kpɛ la Benjamin yaga zaa oŋ da le ka o koŋ; kyɛ o da yelee a yɛlɛ na oŋ da yelko o wulwulo na ko o class bitaaba na zaa. A lɛ puoriŋ, Benjamin da yelko la o dɔgreba ka o nyɛɛŋ ka Jehoova la somoo oŋ toɔ̃ yel yɛlɛ a wuli o sagediibu.

9. Sobuoŋ teŋ na baŋ vɛŋ ka Jehoova taa popeɛloŋ?

⁹ Te naŋ maŋ erɛ yɛlɛ Jehoova naŋ boɔrɔ na zuŋ, noba naŋ ŋmaa gyeere te maŋ nyɛŋ ka te eɛ te yoŋ. Aseŋ ka te taa nyaa sɛre kyɛ na baŋ yelko te tontoŋ taaba bee te sakuu bi-taaba ka te eɛ Jehoova Sieree Deme. Lɛ na nensaaleba gyogri naŋ maaleŋ sããna yaga zaa a donɛɛ ŋa poɔŋ na zuŋ, ana baŋ maaleŋ eɛ kpeɛŋaa yaga zaa ko te ka te de Baabole sowuli zaa tonɔ neŋ toma a kyɛ manna a duorisoŋ korɔ noba meŋ. (2 Tim. 1:8; 3:13) Kyɛ aseŋ ka ho teɛre baŋ ka, ka teneeŋ wa taa nyaa a e te yoŋ ka te neŋ noba naŋ ba puoro Jehoova yel-ereeŋ ba yitaa, a maŋ vɛŋeŋ ka Jehoova “taa popeɛloŋ.”​—Yeng. 27:11; Maal. 3:18.

DE JEHOOVA DAŊWEƐ HO ZEMMO POƆŊ

10. Ananso la wala ka sowuli naŋ be Soribu 6:6, 7 da na baŋ e kpeɛŋaa ko noba naŋ e Naazariti ka ba tu?

¹⁰ Kanne Soribu 6:6, 7. A da ba seŋ ka noba naŋ da e Naazariti peɛlɛ kũũni. Aminekaŋaŋ ho na teɛreŋ ka a yɛlɛ ŋa yɛŋ koŋ e kpeɛŋaa ko ba ka ba e. Kyɛ ka hooŋ nyɛ, takoreŋ saŋa na a yɛlɛ ŋa da na baŋ eɛ kpeɛŋaa yaga zaa ko noba naŋ e Naazariti na ka ba dɔgrɔ kaŋaŋ wa kpi. Takoreŋ saŋa na, ka ba naŋ wa kono kuori ba da maŋ peɛlɛɛ a kũũ kyɛ kono. (Gyn. 19:39, 40; Tom. 9:36-40) Kyɛ neɛ naŋ e Naazariti da koŋ baŋ e lɛ. Azuŋ ka neɛ naŋ e Naazariti dɔgrɔ kaŋaŋ wa kpi ka o kono, kyɛ o da naŋ maŋ wulee sagediibu naŋ e kpeɛŋaa yaga zaa a tuuro bege naŋ seŋ ka o tu aŋa Naazariti na. Kyɛ Jehoova da maŋ eŋ la o yelmeŋɛ  puorebiiri ŋa faŋa ka ba na toɔ̃ are a yeltuo na zaa baŋ da maŋ tuoro na noɔreŋ.

11. Boŋ aŋ seŋ ka Kristabie zaa e siri ka o e ka onaŋ wa derɛ gbɛre zaa naŋ kyaare o booree yɛlɛ? (Kaa a foto meŋ.)

¹¹ Aŋa Kristabiiri, noɔre na te naŋ eŋ ko Jehoova a de te menne koo na, te maŋ de aŋ nimizeɛ yaga zaa. A nɔ-eŋ ŋa maŋ nyɛ la kpeɛ̃o te gbɛ deree ane te yel-eree a kyaare te booree yɛlɛ. Te maŋ mɔɔrɛɛ te moɔbo zaa ka te kaara te booree deme yelfɛree zaa zieŋ, kyɛ te ba maŋ de te booree deme boɔbo daŋweɛ a gaŋ yɛlɛ Jehoova naŋ boɔrɔ. (Mat. 10:35-37; 1 Tim. 5:8) Azuŋ saŋa kaŋa a na maŋ fɛreŋ ka te de gbɛɛ mine naŋ ba pɛle te booree deme mine poɔ kyɛ na toɔ̃ pɛle Jehoova poɔ.

12. Saŋa na Alexandru naŋ wa tuoro yelkpeɛŋaa kaŋa o booree poɔŋ na, bo yɛlɛ oŋ da e, ka bo yɛlɛ oŋ da ba e?

¹² Te nyɛ te yɔɔdɔɔ Alexandru ane o pɔge Dorina zemmo yɛlɛ. Saŋa na baŋ da wa zanna a Baabole na, yuoni gbuli puoriŋ Dorina da barɛɛ a Baabole zannoo, a da boɔrɔ ka Alexandru meŋ bare. Kyɛ o da yi la nimimaaroŋ soriŋ a yelkoo ka o naŋ na zannɛɛ a Baabole. Dorina poɔ da ba pɛle, azuŋ o da boɔrɔŋ ka o fɛroo ka o bare a zannoo. Alexandru yeleeŋ ka o da mɔɔrɛɛ o moɔbo zaa ka o taa yɛlɛ muni wommo a koo, kyɛ a da ba e mɔlɔ koo. Saŋa kaŋa Dorina da maŋ yelee yɛlɛ naŋ ba soma bee a yel yɛlɛ neŋ suuri koo, lɛ da maŋ vɛŋeŋ oŋ boɔrɔ ka o bare a Baabole zannoo. Kyɛ Alexandru da naŋ moɔ̃ la niŋe a de Jehoova daŋweɛ o zemmo poɔŋ, a kyɛ da naŋ wulo gyeremɛ ane nɔmmo korɔ o pɔge meŋ. A baaraa zaa o ewuli soŋ na da vɛŋɛɛŋ ka o pɔge na meŋ la piili zanna a Baabole, a baaraa zaa o da wa de la suobu.​—Kaa a vidio ŋa jw.org zuŋ, Alexandru Ane Dorina Văcar: ‘Nɔmmo Waa La Kannyiri Ane Nimibaaloŋ’ o be la “Truth Transforms Lives” yelzuri na poɔŋ.

13. Wala teŋ na baŋ e wuli nɔmmo ko Jehoova ane te booree deme?

¹³ Jehoova la maale a booree, o boɔbo meŋ la ka booree deme taa popeɛloŋ. (Efe. 3:14, 15) Ka teneeŋ boɔrɔ ka te taa popeɛloŋ meŋɛmeŋɛ yɛŋ aseŋ ka te erɛ yɛlɛ Jehoova naŋ boɔrɔ. Baŋ ka Jehoova poɔ pɛlɛɛŋ yaga zaa ane yɛlɛ na zaa ho naŋ de iri sareka ka lɛ na vɛŋ ka ho toɔ̃ puoruu kyɛ naŋ kaara ho booree deme zieŋ, a wulo ba gyeremɛ ane nɔmmo na.​—Uro. 12:10.

EŊNƐ HO TAABA FAŊA KA BA MEŊ TƆGLƆ A NAAZARITI

14. Nembobo la aŋ seŋ ka te maŋ mɔɔrɔ te moɔbo zaa a eŋnɛ ba faŋa neŋ te yelbie?

¹⁴ Neɛzaa naŋ iri ka o puoro Jehoova seŋ ka o e siri ka o de yɛlɛ mine iri sareka kyɛ na toɔ̃ puoruu o naŋ nɔnɔ o zuŋ. Kyɛ saŋa kaŋa, a ba maŋ e mɔlɔ ka te e lɛ. Wala teŋ na baŋ toɔ̃ e a  sonnɔ taa ka lɛ vɛŋ ka te toɔ̃ e lɛ? Teŋ na maŋ yele yɛlɛ a eŋnɛ taa faŋa. (Joob 16:5) Noba mine be la ho lantaapuoruu poɔŋ a mɔɔrɔ ka ba ŋmaa yɛlɛ mine bare ba zemmo poɔŋ ka lɛ na baŋ vɛŋ ka ba toɔ̃ toŋ a puoruu toma yaga bee? Ho baŋɛɛ baapaalba mine naŋ taa nyaa yaga zaa ba sakuu poɔŋ a e ba yoŋ ba yel-eree poɔŋ aneazaa ka a eɛ kpeɛŋaa ko ba ka ba e lɛ bee? Ho baŋ la Baabole zannezanneba mine bee te yɔɔmine bebeŋ ka ba booree deme dɔgrɔba ba sagediibu zuŋ bee? Yɛ vɛŋ ka te maŋ mɔɔrɔ te moɔbo zaa ka te eŋnɛ a noba ŋa taa faŋa, a maŋ vɛŋ ka ba baŋ ka te nɔŋ baŋ yaga zaa ane yɛlɛ na zaa ba naŋ erɛ korɔ Jehoova na.​—Flm. 4, 5, 7.

15. Sobuo ka noba mine sonnɔ bana na naŋ be a wagre zaa puoruu toma poɔŋ na?

¹⁵ Aminekaŋaŋ, te na baŋ toɔ̃ de la sommo naŋ seŋ neŋ ko Kristabiiri naŋ tonɔ a wagre zaa puoruu toma na. (Yeng. 19:17; Hib. 13:16) Te yɔɔpɔge nyaaŋaa kaŋa naŋ puoro Jehoova yelmennoŋ poɔŋ a be Sri Lanka paaloŋ boɔbo da la ka o maŋ erɛ lɛ. Ba da duoree o pension saŋyɔɔ oŋ da boɔrɔ ka o soŋ te yɔɔpɔgeba bayi mine naŋ e baapaalba a tonɔ a paaneɛ toma ka ba naŋ moɔ̃ nimiri tonɔ a naaŋ moɔloo toma, aneazaa ka libi yɛlɛ eɛ kpeɛŋaa ko ba. Azuŋ o da de la gbɛre ka kyuu zaa o na maŋ ko baŋ libiri baŋ na maŋ de yɔɔ sane ba naŋ ŋmɛ a e call a kyuu zaa poɔŋ. A gyogo ŋa te yɔɔpɔge ŋa naŋ wuli na somaŋ yaga zaa!

16. Bo teŋ na baŋ zanne yi a Naazariti yelsɛgraa naŋ da bebe takoreŋ saŋa na?

¹⁶ Te na baŋ zannɛɛ yɛlɛ yaga a yi noba naŋ da maŋ e Naazariti na ewuli soŋ na poɔŋ! Kyɛ a yɛlɛ ŋa meŋ la wuli teŋ yelkaŋa a kyaare Jehoova te Saa naŋ be sazuŋ. O baŋɛɛŋ ka te boɔrɔŋ ka te pɛlɛ o poɔ a e siri meŋ ka te de yɛlɛ mine iri sareka kyɛ na toɔ̃ paale noɔre na te naŋ eŋ koo na. O naŋ ko te apoɔsori ka te de gbɛre ka te na puoruuŋ bee ka te koŋ puoruu na, eɛ emmo yaga zaa o naŋ ko te. (Yeng. 23:15, 16; Mak. 10:28-30; 1 Gyn. 4:19) A Naazariti yelsɛgraa ŋa wuli teŋ ka Jehoova maŋ nyɛrɛɛ sareka zaa te naŋ maŋ iri kyɛ na toɔ̃ puoruu na. Azuŋ, te zaa moɔ̃ nimiri a naŋ kyɛnɛ puoro Jehoova a yi te poɔ zaa a koroo bonzaa te naŋ taa.