1. San den sama di e dini Yehofa lobi du tei luku a ten di pasa te doo a ten ya?

 I LOBI Yehofa tuutuu? Eeye, u sabi taki i lobi en. A so omen sama di be e dini Yehofa a fositen be lobi en tu (Ps. 104:33, 34). Den be e du ala san den man fu dini Yehofa. Na aseefi sani ya den Nasireisama fu a ten fu Islayeli be e du. Sama a den Nasireisama? Saw sa leli fu a toli fu den?

2. (a) Sama a den Nasireisama? (Numeri 6:1, 2) (b) Saide son Islayelisama be e libi enke den Nasireisama?

² A wowtu Nasireisama aini Hebrewtongo wani taki ‘wan sama di den poti apaiti’ efuso ‘wan sama di meke wan paamisi’. Den Nasireisama a be Islayelisama di be de kabakaba fu dini Yehofa a wan apaiti fasi. A Weiti fu Mosesi be e soi taki wan man efuso wan uman be sa paamisi Yehofa taki aw libi enke wan Nasireisama fu wan pisiten a. (Leisi Numeri 6:1, 2.) Te wan Islayelisama be taki a be o libi enke wan Nasireisama, da a be mu holi wantu weiti di den taa Islayelisama naabi fu holi. Ma saide son Islayelisama be e libi enke wan Nasireisama? Kande den be e du a sani ya fu di ben lobi Yehofa anga den hii ati. Kande den be e du a sani ya tu fu soi taki den be e teke den sani di Yehofa e du gi den fu bigi.​—Deit. 6:5; 16:17.

3. Fa a foluku fu Gadu aini a ten ya de enke den Nasireisama?

³ A ten di a foluku fu Gadu bigin wooko anga ‘a weiti  fu Kelestesi’ den á be abi fu holi a Weiti fu Mosesi moo. Aa be de fu den libi enke wan Nasireisama moo tu (Gal. 6:2; Rom. 10:4). Ma leti enke den Nasireisama, a foluku fu Yehofa aini a ten ya de kabakaba fu dini en anga den hii ati, den hii libi, ala den fusutan, anga ala den kaakiti (Malik. 12:30). Te u paamisi Yehofa taki wo libi enke fa a wani, we paamisi en taki wo dini en anga u hii ati. Fu man du a sani ya, daw mu libi enke fa Yehofa wani. U mu du ala saw man fu dini en tu. Te wo luku a fasi fa den Nasireisama be e du san den paamisi, a sani ya o yeepi u fu du san u paamisi Yehofa b (Mat. 16:24). Meke u luku wantu toli.

DE KABAKABA FU FIKA SANI A BAKA

4. Enke fa Numeri 6:3, 4 e soi, da san a den sani di wan Nasireisama á be mu du?

⁴ Leisi Numeri 6:3, 4. Den Nasireisama á be mu diingi win. Den á be mu nyan sani enke doloifi anga son sii. Ma den taa Islayelisama sama be e diingi win. Den be e nyan doloifi anga den taa sii tu. Aa be fowtu fu nyan den sani ya. Beibel e soi taki Gadu ‘gi libisama win fu meke den fii bun’ (Ps. 104:14, 15). Winsi fa den sani ya be e meke sama piisii, toku den Nasireisama be de kabakaba fu fika den sani ya. c

5. San Madián anga Marcela be de kabakaba fu du? Saide den du den sani ya?

⁵ Leti enke den Nasireisama, useefi e du ala saw man fu du moo gi Yehofa. Luku a toli fu Madián anga Marcela. d A toowpaa ya be abi wan bun libi. Madián be abi wan bun wooko. Neen meke den be e tan aini wan moin yuu-osu. Ma den be wani du moo gi Yehofa. Neen meke den kengi wantu sani aini den libi. Den taki: ‘Wa be e bai tyaipi sani moo. U foloisi go tan aini wan pikin yuu-osu, neen u seli a wagi fu u.’ Madián anga Marcela á be abi fu du den sani ya. Ma den be wani du moo gi Yehofa, neen meke den be de kabakaba fu du den sani ya. Den be e tifeedi anga san den abi. Den be e piisii taki den du a sani ya.

6. Saide son baala anga sisa aini a ten ya e fika son sani fu du moo gi Yehofa? (Luku a fowtow tu.)

 ⁶ A foluku fu Yehofa aini a ten ya e piisii fu fika son sani a baka, bika den wani du moo gi en (1 Kor. 9:3-6). Yehofa nai dwengi u fu fika son sani fu du moo gi en. Den sani di we fika fu du moo gi en á fowtu tu. Son sama de kabakaba fu fika den osu, efuso a wooko fu den di e pai bun. Son sama e tan wan pisiten sondee fu toow. Taawan fu den e toow ma den nai meke pikin. Son wan fu den e go yeepi a peesi pe moo peleikiman de fanowdu winsi fa den de faawe fu den famii. A omen fu u de kabakaba fu fika son sani fu di u wani du moo gi Yehofa. Winsi a wan pikin sani efuso wan gaan sani u fika fu di u wani du moo gi Yehofa, toku ai teke en fu bigi taki we du ala saw poi fu dini en.​—Heb. 6:10.

DE KABAKABA FU DE TAA FASI

7. San be sa meke a taanga gi den Nasireisama fu du san den paamisi? (Numeri 6:5) (Luku a fowtow tu.)

⁷ Leisi Numeri 6:5. Den Nasireisama á be mu koti den uwii. A so den be o soi taki den e libi enke fa Yehofa wani. Te wan Nasireisama uwii be langa, a be e moo makiliki gi taa sama fu si taki en a wan Nasireisama. A sani ya be o yeepi den tu fu sabi taki sowan Islayelisama de wan hii pisiten kaba enke wan Nasireisama. Te taawan be e lesipeki den anga te den be e gi den taanga-sikin, a sani ya be e yeepi den fu du san den paamisi. Ma son yuu den Islayelisama á be e lesipeki den. Den á be e holibaka gi den tu. Na a ten fu polofeiti Amos den Islayelisama di be daai baka gi Yehofa ‘be e gi den Nasireisama win fu diingi’. Kande den be e du a sani ya fu meke den Nasireisama booko a paamisi di den be meke anga Yehofa, bika den á be mu diingi win (Amos 2:12). A ten de be musu taanga gi den Nasireisama fu de taa fasi. A be musu taanga gi den fu du san den paamisi Yehofa tu.

8. Fa a toli fu Benjamin e gii taanga-sikin?

⁸ Fu di Yehofa e yeepi u, meke useefi poi de taa fasi tu winsi kande sen e kisi u. Luku a toli fu Benjamin. A baala ya a wan Yehofa Kotoigi di abi tin yali. Ai tan a Noorwegen. Na a ten fu a feti a Ukraini, a sikoo fi en be holi wan sani fu soi fa den e holibaka gi den sama fu a kondee. Den pikin di be wei a kololu fu a faaka fu Ukraini be mu singi wan singi. Ma Benjamin be komoto a pe den be e holi a sani gi a sikoo, bika aa be e holibaka gi  a sani di den be e du. Ma wan yefolow si en neen a bali kai en. A yefolow taigi en taki: ‘I mu kon singi anga u. A yu we wakiti.’ Benjamin teke deki-ati neen a waka go na a yefolow. A taigi en taki: Mi nai teke se. Mi nai mumui anga politiki. A omen Yehofa Kotoigi de a sitaafu-osu nownow, bika den nai mumui anga politiki.’ A Yefolow aliki en. A taigi en taki aa de fu a holibaka gi a sani di den e holi na a sikoo. Ma den pikin fi en kalasi be akisi en saide aa be kon singi anga den. Ná pikin senuwe Benjamin be e senuwe, neen meke pikinmoo wataa lon neen ain. Ma a teke deki-ati neen a taigi den pikin denseefi sani di a be taigi a yefolow. Bakadati, Benjamin taigi en mma anga en dda fa Yehofa yeepi en fu taki fu a biibi fi en.

9. Saw sa du fu meke Yehofa piisii?

⁹ Fu di we aliki Yehofa, meke sama man si taki wi anga den a ná aseefi. Ná pikin deki-ati i mu abi fu taigi den sama a wooko efuso a sikoo taki ya wan Yehofa Kotoigi. Fu di a goontapu e kon moo ogii dei fu dei, meke ai moo taanga giw fu wooko anga den leli fu Beibel. Ai taanga giw tu fu peleiki gi sama (2 Tim. 1:8; 3:13). Ma u mu holi a pakisei taki we ‘meke Yehofa piisii’ te we soi taki wi anga den sama di nai dini en a ná aseefi.​—Odo 27:11; Male. 3:18.

MEKE YEHOFA DE A MOO PELENSIPALI SAMA AINI I LIBI

10. Saide a be sa taanga gi den Nasireisama fu wooko anga a sani di sikiifi a Numeri 6:6, 7?

¹⁰ Leisi Numeri 6:6, 7. Den Nasireisama á be mu go koosube á wan dedesikin. Kande ye si enke a sani ya a ná be wan gaan sani. Ma efu wan koosube sama fu wan Nasireisama be dede, a sani ya be sa taanga gi en. Aini a ten fu Beibel te den be e go beli wan koosube famii fu wan sama, a sama be sa go koosube fu a dedesikin (Yoh. 19:39, 40; Toli 9:36-40). Ma wan Nasireisama á be poi du a sani ya. Winsi a wan koosube sama fu den be dede, toku den be mu du san den paamisi. Ma Yehofa be e yeepi den fu pasa a taanga ten de.

11. San baala anga sisa mu de kabakaba fu du te den mu teke wan bosoloiti di abi fu du anga den famii? (Luku fowtow tu.)

¹¹ Enke Kelesten we si en enke wan  gaan sani fu du saw paamisi Yehofa. Ma a sa taanga giw son yuu te u mu du son sani di abi fu du anga u famii. We du ala saw poi fu yeepi den famii fu u. Ma u nai meke den sani di den famii fu u wani u du tapu u fu du sani enke fa Yehofa wani (Mat. 10:35-37; 1 Tim. 5:8). Son yuu wi abi fu du sani di u famii á lobi fu meke Yehofa piisii.

12. San Alexandru du di a be mu du wan sani di abi fu du anga en osufamii? San aa du?

¹² Luku a toli fu Alexandru anga en uman Dorina. Baka di a toowpaa ya sutudeli Beibel omen yali, Dorina á be wani sutudeli moo. Aa be wani Alexandru sutudeli moo tu. Ma Alexandru soi en a wan lesipeki fasi taki aw sutudeli go doo. Dorina á be lobi a sani di a taigi en. Neen meke a be e du ala san a poi fu tapu en fu aa sutudeli moo. Alexandru be e meke moiti fu fusutan saide Dorina be e du so, ma aa be makiliki gi en. Son yuu te Dorina be e kuutu en, a be e taigi hati sani baka. Te a sani ya be pasa, Alexandru á be e fii fu sutudeli moo. Toku a be e si Yehofa enke a moo pelensipali sama aini en libi. A be e soi en uman taki a lobi en. Fu di Alexsandru be e libi bun anga en uman, meke te fu kaba enseefi bigin sutudeli baka. Bakaten neen a dopu.​—Luku a felon fu Alexandru anga Dorina Văcar a jw.org di den e kai: ‘Lobi abi pasensi anga bun manii’ na a pisi di den e kai ‘Den tuu leli fu Beibel e kengi sama libi’.

13. Faw sa soi Yehofa anga den famii fu u taki u lobi den?

¹³ A Yehofa seeka a osufamii libi, neen meke a wani ala sama abi wan koloku osufamii (Efe. 3:14, 15). Efu u wani abi wan koloku osufamii, u mu du sani enke fa Yehofa wani. Yehofa e teke en fu bigi te a si a moiti di ye meke fu dini en winsi fai mu solugu yu osufamii. Ai si a moiti di ye meke fu soi den sama fi yu osufamii taki i lobi den.​—Rom. 12:10.

U MU E GI USEEFI TAANGA-SIKIN FU LIBI ENKE DEN NASIREISAMA

14. Sama u mu gi taanga-sikin anga den sani di we taki?

¹⁴ Ala sama di e dini Yehofa mu de kabakaba fu fika sani a baka. Den e du a sani ya fu di den lobi en anga den hii ati. Ma a ná ala yuu a makiliki. Faw sa yeepi taawan fu du moo gi Yehofa? U mu e taki sani fu gi den taanga-sikin (Yopu 16:5). Sama de aini i kemeente di wani du moo gi Yehofa? I sabi  wantu yonkuuwan di e meke moiti fu tyai denseefi bun a sikoo, winsi fa ai taanga gi den? I sabi wantu Beibelsutudi efuso wantu baala anga sisa di e meke moiti fu dini Yehofa anga den hii ati winsi fa den famii wani tapu den? U mu du ala saw man fu gi den sama ya taanga-sikin. U mu e gafa den fu den sani di den e du gi Yehofa tu, bika a ná ala yuu ai makiliki gi den.​—Filei. 4, 5, 7.

15. Fa son sama e yeepi den baala anga sisa di e du a fuuten-diniwooko?

¹⁵ Son yuu u sa du son sani fu yeepi den baala anga sisa di e du a fuuten-diniwooko (Odo 19:17; Heb. 13:16). Na a sani ya wan gaandi sisa di e tan a Sri Lanka be wani du. Di den opo a gaansama moni fi en, a be wani yeepi tu yonkuu sisa di be e pionili, bika a be e taanga gi den fu fende ala den sani di den be abi fanowdu. Neen meke ala mun a be e gi den wan moni fu yeepi den. A wan moin manii a sisa ya abi.

16. San a toli fu den Nasireisama e leli i?

¹⁶ U sa leli omen sani fu den Nasireisama. Te we sutudeli a toli fu den, we leli wan sani fu u Dda di de a hemel. A sabi taki u wani a piisii. A sabi tu taki u de kabakaba fu du saw paamisi en. Yehofa giw wan moin gaandi, bika wi abi okasi fu soi en taki u lobi en (Odo 23:15, 16; Malik. 10:28-30; 1 Yoh. 4:19). Meke u du ala saw man fu dini Yehofa. U mu gi en den moo bun sani di wi abi tu.