AYEGHLE 7
ZA 51 Ma ve Nzame éning dzam!
Za meyeghle bi ne ñong y’éfônane benaziréen ?
« A ne nfufup akal Jehôva melu mese me y’é nazareato nge ki naziréat wèñ » (NLA. 6:8).
É DZAM BIA YE YEN
Aval éfônane be nazareos nge ki benaziréen é ne bia vole naa bi sèhane Jehôva ye n’nem ôsese, y’ayokh.
1. Za mbemba fulu bebo bisèñ Jehôva ba so ba lere atéé ye melu mvus ?
YE WA bira dzing Jehôva ? Kaa bisô, wa bira ñe dzing ! Abuiñ bôt befe baa, ba dzing fe ñe. Atéé ye metam ô mvus, abuiñ bôt baa, be nga wôran fe é dzam wa wôran (Bya 104:33, 34). Abuiñ be nga yebe naa ba dzimle mam mézing naa be kang Jehôva. A ne é dzam benaziréen be y’é tam Israel y’ôkua be nga bobo. Be mbe beza, ye naa, za meyeghle bi ne ñong y’éfônane deba ?
2. (a) Beza be mbe benaziréen ? (Nlang 6:1, 2) (b) Amu dzé Bisraélite bézing be nga top naa ba bo benaziréen ?
2 Éfiè « Naziréen » da so nkobe Hébreu da yili naa, « é môt a ne nvaane afeng akal ésèñ ézing », « é môt a ne nkanan », nge ki « é môt a ne n’vaane. » Éfiè té da tugha lere be Israelitas be mbe ayông, be nga yebe naa ba dzimle mam mézing naa be sèhane Jehôva ngura aval. Atsing Moisés é nga likh fam nge ki minenga naa a bo ngum aval ngiagh ézing akal Jehôva, éé top naa a ning ane moan naziréen tang ngura tam a (A lang Nlang 6:1, 2). Ntopban nge ki ngiagh té, é nga sili naa a tông metsing mézing é Bisraélite bevoo béé nga yiène ki tông. Éde, amu dzé moan Israélite a mbe top naa a bo ngiagh naziréen ? Mura édzing akal Jehôva ye yem mbeng akal biborane Bièñ, ébi bi nga tsini moan Israélite naa a bo aval ngiagh té (Deut. 6:5 ; 16:17).
3. Aval avé ayong Nzame y’ému, da fônane benaziréen ?
3 Ntaan ô nga daghe benaziéen ô nga man, éyong « atsing Christ » é nga tsen Atsing Moisés (Begal. 6:2 ; Bero. 10:4). Ve, aval ane be nazareos nge ki benaziréen be nga bo de, ayong Jehôva ému da k’ôsu ya lere nkôman ô ne ngu’u naa ba sèhane ñe ya n’nem ôse, y’é ñuu ésese beba, ôsiman ôse wôba, ye é ngu’u ése deba (Marc 12:30). Bia yebe naa bia bo ngiagh té éyong bia ve Jehôva éning dèè. A kang ngiagh té da sili naa bi yebe naa bia bo nkômane Jehôva, ye yebe naa bia dzimle mam mézing. Éyong bia ye yeghe aval be nazareos nge ki benaziréen be nga kang é ngiagh deba, bia ye ñong mbemba meyeghle ébe aval bia bebién bi ne kang é ngiagh dèè b (Mat. 16:24). N’yeneghan ayôm bifônan.
TOBE NKOGHANE NAA WA DZIMLE MAM MÉZING
4. Aval ane bia lang de nten Nlang 6:3, 4, za mam benaziréen be nga yebe naa ba dzimle ?
4 A lang Nlang 6:3, 4. Be nazareos nge ki benaziréen béé nga yiène ki ñu meyokh meval mese, nge ki a dzi biôm ane beraisin a bo nkôt nge ki kaa. É bôt be mbe be minfeng, be mbe béé bira ñeghe aval biôm bité, é nga yiène fe, amu déé mbe ki mbia dzam. Bible a kobe adzô « é vin a ve moan môt mevakh a n’nem » ane é das da so ébe Nzame (Bya 104:14, 15). Ve, benaziréen be nga yebe ya n’nem ôse naa baa buane ki aval biôm bité c.
Y’ô ne nkoghane naa wa dzimle mam mézing aval be nazareos nge ki benaziréen be nga bo de ? (A daghe mebong 4-6)
5. Za mam Madián ye Marcela be nga yebe naa ba dzimle, amu dzé ki ?
5 Ane be nazareos nge ki benaziréen, bia fe, bi ne nkoghane naa bia dzimle mam mézing amu bia kômô bira sèhane Jehôva. N’yeneghan éfônane Madián ba Marcela d. Minlughane mité mi mbe mi bele mbemba éning. Madián a mbe a bele é mbemba ésèñ é nga ve naa be bele môra nda. Ve, be nga kômô bo abuiñ akal ésèñ Jehôva. Naa be dzale nkômane té, be nga dzeng naa ba songhane mam mézing. Ba dzô naa : « Bi nga sum naa bia saghe é biôm bia kus. Bi nga kôre é môra nda bi mbe bi too, naa bia ke tobe moan nda, ye kuane metua wèè. » Béé dzi ki yemle Madián ye Marcela naa be dzimle mam meté, bebién be nga top naa ba bo de nfa ya veme ésèñ deba akal Jehôva. Be mbe mevakh ya mvom akal minkighane be nga ñong.
6. Amu dzé bekristen ba yebe naa ba dzimle mam mézing ému ? (A daghe fe évaghle).
6 Ému bekristen ba yebe naa ba dzimle mam mézing nfa ya bele abuiñ tam akal bisèñ bi y’Ékôan (1 Becor. 9:3-6). Jehôva aa sili ki be naa be dzimle mam meté, é mam ba likh alé, ma méé se ki mbia bemam. Éfônan, bevoo ba likh mbemba ésèñ, nda nge ki faa éyem deba. Abuiñ be nga kikh naa baa tare ki lughan nge ki a bele boan. Éba bevoo ba top naa ba ke sèñ é vôm ba yi abuiñ avole, amben dzam té da yili naa be ke tobe ôyap y’é vôm é mvong bôt dzeba da tobe. Abuiñ y’ébe bia, bia yebe naa bia dzimle mam meté amu naa bia kômô ve Jehôva é dzam da dang bia mbeng. Yemeghane naa, Jehôva a yen môra dzam é mam mesese mia yebe naa mia dzimle, naa mi sèhane ñe, a bo avitsang nge ki abuiñ (Behéb. 6:10).
YEBEGHE NAA WAA BO KI ANE MÔT ASESE
7. Za minzukh moan naziréen a mbe tubane mio nté a dzeng naa a dzale é ngiagh dzèñ ? (Nlang 6:5) A daghe fe évaghle
7 A lang Nlang 6:5. Be nazareos nge ki benaziréen be nga bo ngiagh naa baa keng ki ésii deba. A mbe ngura aval be nga lere naa ba bo Jehôva ésèñ. Nge moan naziréen a mbe nvaane afeng ayap, ésii dèñ é nga ye bira mane kuiñ, ye ve naa, é bo ébubu naa é bôt bevoo be yem naa a ne moan naziréen. Nge é bôt bevoo be nga kang ñe ye saghe ñe naa a kang é ngiagh dèñ, é nga ye bo ébubu akal moan naziréen té naa a taa bo ane é bôt bevoo. Ve, édi é ne éngôngoo é ne naa, nlang ayong Israel, é nga kuiñ naa béé dzi ki yebe benaziréen bézing nge ki a sukh be asi. Metam nkule medzô Amos, é Bisraélite be nga lumane ña ékang « be nga tsini naa ba ve benaziréen meyokh », éyong ézing be nga kômô naa be taa kang é ngiagh deba naa ba kî meyokh (Amos 2:12). Biyong bizing, benaziréen be nga yiène bo édedèè ayokh naa be kang é ngiagh deba ye bo kaa bo mam ane môr asese.
É moan naziréen a nga kang é ngiagh dèñ, a mbe nkoghane naa aa bo ki mam ane é bôt bevoo (A daghe abong 7)
8. Aval avé éfônane Benjamin da saghe wa ?
8 Y’avole Jehôva, y’ayokh, bia fe, bi ne tebe naa bip naa bi taa bo ane é bôt bevoo, amben bi ne é bôt be ne ôsoan. N’yeneghane éfônan Benjamin, moan Bengaa a bele awôm mimbu ya Norvège. É sikôlô wèñ a nga bo fet ézing nfa ya sukh Ukraine, amu aluman é ne wéñ. Be nga dzô boan naa be yiè za be baghe bitôp bi bele minsin mi y’é bandele Ukraine. Benjamin a nga kômane naa a ye saale fet té, éé tebe ôyôm ôyap ye é vôm dzam té é nga ye boban.Ve, n’yeghle a nga yen ñe ye luè ñe ôyap yôp éé dzô naa : « Za kuane bia abong di. Bia besese bia yane wa ! » Y’ayokh Benjamin a nga yit n’yeghle bebéñ ye dzô ñe naa : « Maa ñong ki ngap, éde maa bo ki mefet ma tsinane politik. Atoo naa, abuiñ Bengaa Jehôva be ne mimbokh amu ba tep naa ba luman. » Ane n’yeghle a nga yebe é dzam Benjamin a nga dzô ñe ye likh naa a taa ésesang té. Ve, é bong besikôlô bevoo be nga sum ñe sili amu dzé éé dzi ki zu kuane be. Benjamin a nga bira yep a n’nem ane a nga ye sum yi, ve y’ayokh, a nga sum naa a dzô bong besikôlô beté é dzam a nga dzô n’yeghle. A kôre ye vèè, Benjamin a nga dzô bebyèñ bèñ naa, a nga wôrane naa Jehôva a nga vole ñe a kame mebun mèñ.
9. Aval avé bi ne ve Jehôva n’nem mbeng ?
9 Amu bia top naa bia bo nkômane Jehôva, biaa bo ki mam ane é bôt be ne bia minfeng. Bia yi ayokh nfa ya lere naa bi ne Bengaa Jehôva ésèñ nge ki a sikôlô. Éde, amu mefulu, y’abo-dulu bôt be ye ntukh émo di, é ne v’a ke abé abé, da ye bia bo ndzukh naa bi kang metsin metsing Jehôva ye kap mbemba fuèñ y’é bôt bevoo (2 Tim. 1:8 ; 3:13). Ve, simghan éyong ésese naa, bia « ve [Jehôva] n’nem mbeng » éyong biaa bo ki mam ane é bôt baa sèhane ki ñe (Mink. 27:11 ; Mal. 3:18).
TELEGHE JEHÔVA ÔSU ÉNING DUÈ
10. Aval avé a béé atsing da so nten Nlang 6:6, 7 éé mbe bo évaghle akal benaziréen ?
10 A lang Nlang 6:6, 7. Be nazareos nge ki benaziréen béé mbe ki yir mbîm bebéñ. Éyong ézing ô ne simane naa, déé se ki mura dzam. Ve, metam me ya Bible, moan naziréen a mbe yen atsing té ndzukh éyong môt y’é nda-bôt dzèñ éñ’a va wu. Amu, metsing ma daghe awu metam meté me mbe méé sili naa, é môt a va dzimle môt awu, a tobe vèè (Jean 19:39, 40 ; Bisè mintôl 9:36-40). É ngiagh dèñ ya bo moan naziréen, é mbe ve naa, môt té a taa dzale aval metum meté. Amben éyong menda mebôt meba me mbe me bele awu, benaziréen be nga lere mebun me ne ngu’u, béé kang é ngiagh deba. Jehôva a nga ve besôsôe bebo bisèñ bèñ ngu’u naa be zôme minzukh be nga tubane mio alé.
11. Za dzam moan kristen a yiène bele nkômane naa a bo éyong a ñong minkighan akal é nda-bôt dzèñ ?
11 Bia bekristen, é ngiagh bia bo naa bia sèhane Jehôva y’é ñuu se dèè, é ne bia édedèè tang nden. Dzam té da name minkighan ye mimboan miè éyong da tsinane menda mebôt mèè. Bia tugha dzale metsing Bible a ve bia, nfa meyem bi bele menda mebôt mèè, ve, biaa ye ki tele nkômane menda mebôt mèè ôsu évang é dzam Jehôva a sili bia (Mat. 10:35-37 ; 1 Tim. 5:8). Biyong bizing bi ne ñong minkighan menda mebôt mèè baa yen ki mbeng, nfa ya ve Jehôva n’nem mbeng.
Ye ô ne nkoghane naa wa tele nkômane Jehôva ôsu, amben éyong ô tele bitéñ bia dang ndzukh ? (A daghe abong 11) e
12. Nté a mbe éé tubane ndzukh é nda-bôt été, za dzam Alexandru a nga bo, za dzam ki éé dzi ki bo ?
12 N’tamane fas éfônan Alexandru ye ngal, Dorina. Niène minlughane mité mi nga yeghe Bible tang ngura mbu, ane Dorina a nga ñong nkighane naa aa tsini ki ayeghe Bible ôsu, a mbe fe éé kômô naa n’nôm ñ’a fe a tele ayeghe. Ya mbemba bifiè y’évuvuèñ, a nga dzô ñe naa a tsini ayeghe ôsu. Dorina a nga wokh dzam té abé, éde a nga kômô ñe yemle naa a tele ayeghe. Alexandru a dzô naa, a nga dzeng naa a wokh é dzam ngal a nga wôran, ve déé mbe ki ñe ébubu. Biyong bizing, éyong Dorina a mbe éé sua ñe ye dzime yalane ñe, a mbe éé kômô lame ayeghe Bible dèñ. Amben aval té, Alexandru a nga tsini naa a tele Jehôva ôsu, éé lere ngal mura édzing ya ngang. Asughlan, é mbemba éfônane dèñ é nga tsini ngal naa a bera sum ayeghe Bible, ôsu ane a nga duban. (A daghe éngengeng Alexandru ye Dorina Vacar : « Édzing é ne ôdzibi ye añep » nlong minlô medzô « Bebela a nga tsen bining bieba », a nden wèè jw.org).
13. Aval avé bi ne lere édzing akal Jehôva ye akal é nda-bôt dzèè ?
13 Jehôva a nga vele nda-bôt, éde, a kômô naa bi bele é nda-bôt da ning a mvom été (Beéph. 3:14, 15). Nge bia kômô bele ña mvom, bia yiène bo mam ane Jehôva a kômô de. Mi taa vaghle bele bisô naa, Jehôva a bira dzing mengu’u mese mia ve, naa mi kang ñe éyong mia baghle é nda-bôt dzenan ye ñong de y’édzing ya ngang (Bero. 12:10).
N’SAGHANE BEVOO Y’ÉBA BEVOO NAA BI BO ANE BENAZIRÉEN
14. Beza bia yiène dang dzeng naa bi saghe ye bifiè bia ?
14 É bôt besese ba top naa ba sèhane Jehôva ému, ba yiène tobe nkoghane naa ba dzimle mam mézing akal édzing be bele akal Nzame. Biyong bizing déé se ki ébubu. Éde, aval avé bi ne volane bevoo y’éba bevoo naa bi yebe naa bia dzimle mam mézing akal Jehôva ? A ne éyong bia saghan ya bifiè bia (Job 16:5). Ye bôt bézing be ne ékôan denan été naa ba kômô ning moan éning nfa ya bele abuiñ tam akal bisèñ bi y’Ékôan ? Ye mia yem bitong bizing bi nga lere ayokh a sikôlô, amben déé mbe ki be ébubu naa be bo de ? Ye mia yem beyeghe Bible nge ki bekristen é ne be bo ndzukh naa be tobe sôsôe, akal é nda-bôt dzeba da tebe be é ngam ayat ? N’dzenghane meval mesese naa bi kobe aval bobedzang beté ya mbemba bifiè, bii dzô be naa bia yem mbeng ba bo akal ésèñ ba bo ya n’nem ôsese ye fe ayokh deba (Philm. 4, 5, 7).
15. Aval avé bôt bézing be nga vole é bôt ba bo ngura aval ésèñ Ékôan été ?
15 Biyong bizing é ne bia kuiñ naa bi vole bekristen ba bo ngum aval ésèñ Ékôan été (Mink. 19:17 ; Behéb. 13:16). A mbe nkôman sôsôe n’nôm kal dzèè ye Sri Lanka. A ñong é miang ba ve min’nôm éyong be maneya bisèñ bieba, éde a kômô vole bitong bekal bebèñ be ne bempwaghe mefan, nfa ye naa be tsini ésèñ deba amben minzukh mi mono mi ne. Éde, a nga ñong nkighane naa a kee be é tang ba yiène yaane naa be bele nkoo é nda dzeba kada ngoan. Za mbemba fulu kal dzèè té a nga lere !
16. Za ayeghle bi ne ñong ébe ntaane wa tsinane be nazareos nge ki benaziréen be ye metam ô mvus ?
16 Bi ne ñong bura meyeghle y’é mbemba éfônane be nazareos nge ki benaziréen be ye metam ô mvus be nga lere ! Ve, ntaane té wa lere fe dzam afe nfa Ésaa wèè a ne a dzôp été, Jehôva. A yem naa bia kômô ñe ve mevakh ya n’nem ôsese, ye naa, bi ne nkoghane naa bia dzimle mam mézing nfa ya dzale é ngiagh bi nga bo ñe. A ve bia ôlughu, éé likh naa bi lere édzing bi bele akal Dèñ (Mink. 23:15, 16 ; Marc 10:28-30 ; 1 Jean 4:19). Ntaane wa tsinane benaziréen wa lere naa Jehôva a yen ye dzing metunegha mesese bia bo naa bia sèhane ñe. Éde, m’beleghane nkôman ô ne ngu’u nfa y’a tsini naa bia sèhane Jehôva, bii ve ñe é ngap da dang mbeng bining bia ya n’nem ôsese.
WA YE YALANE YA ?
-
Aval avé benaziréen bebién be nga top naa ba de, be nga yebe naa ba dzimle mam mézing, ye bo ayokh ?
-
Aval avé bi ne saghan ému, nfa ya bo ane benaziréen ?
-
Aval avé ntaane wa daghe benaziréen wa lere mebun Jehôva a bele ébe kada mbo ésèñ wèñ ?
ZA 124 Bia baghle élat
a Afang bo naa Jehôva émièn a nga top benaziréen bézing, môra ngap y’été a mbe é Bibsraélite bebién be nga top naa ba bo ngiagh té (A daghe nkaalé « Be nazareos nge ki benaziréen Jehôva a nga top. »)
b Tam ézing, mebakh mèè me nga vaghane benaziréen ye é bôt ba bo ngum aval ésèñ Ékôan été. Ve, ayeghle di été, bia ye bem ôsiman wèè ébe aval besôsôe bebo bisèñ Jehôva besese be ne lere naa be ne benaziréen.
c A ne bo naa moan naziréen éé dzi ki bele meyem mefe, ane ngum aval ésèñ ézing, naa a dzale é ngiagh dèñ.
d A daghe nlô-adzô « Elegimos una vida sencilla nge ki Nous avons décidé de simplifier notre vie » nsama minlô medzô « Experiencias de los testigos de Jehová nge ki Témoignages et anecdotes de Témoins de Jéhovah », a nden wèè jw.org.
e AYILGHA YE FÔRÔ : A tele ndzii y’é nda dzèñ, moan naziréen a yen ane ba kee mbim môt y’é nda bôt dzèñ. Amu a kang é ngiagh a va bo Jehôva, éé se ki ñong ngap ébe awu té.
