XÓTA NǓKPLƆ́NKPLƆ́N TƆN 7
HAN 51 Mawu wɛ mǐ zé mǐɖée jó ná!
Nǔ ɖěɖěe kpɔ́ndéwú Nazilínu lɛ́ tɔn sixú kplɔ́n mǐ lɛ́ é
‘Hwenu e mɛ ɔ sɔ́ ɖó te ɖɔ émí ná dó wa azɔ̌ nú Jexóva ɔ bǐ ɔ, vo wɛ é sɔ́ éɖée ɖó nú Jexóva.’—KƐ́N. 6:8.
XÓNUSƆ́ÐÓTE
Lěe kpɔ́ndéwú Nazilínu lɛ́ tɔn sixú d’alɔ mǐ, bɔ mǐ ná sɛn Jexóva kpó gbigbɔ mɛɖée sísɔ́ dó sá vɔ̌ tɔn kpó, kpódó akɔ́nkpinkpan kpó gbɔn é.
1. Kpɔ́ndéwú ɖagbe tɛ́ Jexóva sɛntɔ́ lɛ́ ka sɔ́ ɖ’ayǐ sín hwexónu?
VƐ̌ E a vɛ́ xá Jexóva é ka nɔ xɔ akwɛ́ nú we a? Nǔxokpɔ́n ɖ’é mɛ ǎ! Bɔ é ka nyí hwiɖokpó wɛ nǔ nɔ cí mɔ̌ ná ǎ. Sín hwexónu ɔ, mɛ gěgé wɛ nǔ nɔ cí mɔ̌ ná. (Ðɛh. 104:33, 34) Mɛ gěgé sá vɔ̌ vovo lɛ́ bá dó sɛn Jexóva. Nǔ e Nazilínu e nɔ gbɛ ɖo Izlayɛ́li hwexónu tɔn lɛ́ é wa é nɛ́. Mɛ̌ mɛ̌ e yě ka nyí? Étɛ́ kpɔ́ndéwú yětɔn ka sixú kplɔ́n mǐ?
2. (a) Mɛ̌ mɛ̌ e ka nyí Nazilínu lɛ́? (Kɛ́nsísɔ́ 6:1, 2) (b) Aniwú Izlayɛ́li ví ɖé lɛ́ ka nɔ wá gbeta ɔ kɔn, bo ná nyí Nazilínu?
2 Xókwín Ebléegbe tɔn e tínmɛ tɔn nyí “sɔ́,” “sɔ́ ɖó vo” alǒ “ɖe ɖó vo nú azɔ̌ bǔnɔ ɖé” é mɛ wɛ xókwín “Nazilínu” ɔ gosín. Izlayɛ́li ví kanɖódónǔwútɔ́ ɖěɖěe nɔ sá vɔ̌ ɖé lɛ́ ɖo ali bǔnɔ ɖé nu, bo ná dó sɛn Jexóva lɛ́ é wɛ Nazilínu lɛ́ nyí. Mɔyízisɛ́n ɔ ná gbe súnnu ɖé alǒ nyɔ̌nu ɖé ɖɔ é ní d’akpá bǔnɔ ɖé nú Jexóva, gbɔn gbeta ɔ kɔn wíwá bá zán gbɛ Nazilínu ɖɔhun nú hwenu ɖé gblamɛ. a (Xa Kɛ́nsísɔ́ 6:1, 2.) Ényí Izlayɛ́li ví ɖé d’akpá ɖɔ émí ná nyí Nazilínu ɔ, é ɖó ná xwedó sɛ́n ɖé lɛ́, bɔ Izlayɛ́li ví ɖě lɛ́ ka nɔ wa mɔ̌ ǎ. Din ɔ, aniwú Izlayɛ́li ví ɖé ka nɔ wá gbeta ɔ kɔn bá nyí Nazilínu? É cí ɖɔ wǎn ɖaxó e é yí nú Jexóva é, gɔ́ nú nǔ ɖaaɖagbe gěgé e Jexóva nɔ ná ɛ, bɔ é nɔ su nukún tɔn mɛ lɛ́ é wɛ nɔ sísɛ́ ɛ.—Sɛ́n. 6:5; 16:17.
3. Nɛ̌ mɛ e ɖo togun Mawu tɔn mɛ égbé lɛ́ é ka cí Nazilínu lɛ́ ɖɔhun gbɔn?
3 Hwenu e “Klísu sín sɛ́n ɔ” ɖyɔ́ Mɔyízi sín sɛ́n ɔ é ɔ, mɛ ɖěɖěe ɖo togun Mawu tɔn mɛ lɛ́ é sɔ́ sixú húzú Nazilínu ǎ. (Ga. 6:2; Hlɔ̌. 10:4) É ɖo mɔ̌ có, Nazilínu lɛ́ ɖɔhun ɔ, mɛ e ɖo togun Jexóva tɔn mɛ lɛ́ é kpo ɖo jlǒ syɛ́nsyɛ́n e yě ɖó bo ná sɛn Jexóva kpó ayi yětɔn bǐ, lǐndɔ̌n yětɔn bǐ, linlin yětɔn bǐ kpó hlɔ̌nhlɔ́n yětɔn bǐ kpó é ɖe xlɛ́ wɛ ɖo égbé. (Mak. 12:30) Mǐ nɔ sɔ́ jlǒ dó d’akpá ɖɔ mǐ ná wa mɔ̌, hwenu e mǐ sɔ́ mǐɖée jó nú Jexóva é. Jlǒ Jexóva tɔn wiwa, gɔ́ nú vɔ̌ vovo lɛ́ sísá bá dó sɛn ɛ wɛ nɔ xlɛ́ ɖɔ mǐ ɖo nǔ wa sɔgbe xá akpá énɛ́ wɛ. Ée mǐ ná ɖo lěe Nazilínu lɛ́ wa nǔ sɔgbe xá akpá e yě dó lɛ́ é gbɔn é gbéjé kpɔ́n wɛ é ɔ, mǐ ná mɔ nǔkplɔ́nmɛ xɔ akwɛ́ gěgé dó lěe mǐ lɔmɔ̌ sixú wa nǔ sɔgbe xá akpá e mǐ dó é gbɔn é wú. b (Mat. 16:24) Mi nú mǐ ní gbéjé kpɔ́ndéwú ɖé lɛ́ kpɔ́n.
NƆ SƆ́ HWIÐÉE DÓ SÁ VƆ̌
4. Sɔgbe xá Kɛ́nsísɔ́ 6:3, 4 ɔ, vɔ̌ tɛ́ Nazilínu lɛ́ ka nɔ sá?
4 Xa Kɛ́nsísɔ́ 6:3, 4. Nazilínu lɛ́ ɖó ná nyi alɔ nú ahan syɛ́nsyɛ́n kpó nǔ ɖěɖěe tɔ́n sín vǐwuntín wú lɛ́ é kpó, ɖi vǐwunkwín kpó vǐwun xúxú kpó bǐ mlɛ́mlɛ́. Hwɛhwɛ wɛ mɛ ɖěɖěe lɛ́ lɛ̌ dó yě lɛ́ é ná nɔ ɖu nǔ mɔ̌hun lɛ́ fɛɛ, bɔ nǔ ɖě ka nylá ɖ’é mɛ ǎ. Biblu tínmɛ ɖɔ nǔníná Mawu tɔn wɛ “vɛ̌ɛn e nɔ dó wǔyá lanmɛ nú mɛ é” nyí. (Ðɛh. 104:14, 15) É ɖo mɔ̌ có, Nazilínu lɛ́ sɔ́ jlǒ dó sɔ́ acɛ e yě ɖó bá ɖu nǔ énɛ́ lɛ́ sín vǐví é dó sá vɔ̌. c
A ka ɖo gbesisɔmɛ bo ná sá vɔ̌ lɛ́ Nazilínu lɛ́ ɖɔhun a? (Kpɔ́n akpáxwé 4-6)
5. Vɔ̌ tɛ́ lɛ́ Madián kpó Marcela kpó ka wá gbeta ɔ kɔn bo sá? Étɛ́wú?
5 Nazilínu lɛ́ ɖɔhun ɔ, mǐ lɔmɔ̌ nɔ sá vɔ̌ vovo lɛ́, bá dó wa nǔ gěgé d’é jí nú Jexóva. Ð’ayi kpɔ́ndéwú Madián kpó Marcela d kpó tɔn wú. Vivogbɛ wɛ asú kpó asi kpó klisánwun énɛ́ nɔ zán. Madián ɖó azɔ̌ ɖagbe ɖé bɔ énɛ́ zɔ́n bɔ yě nɔ nɔ xwé ɖɛkpɛ ɖɛkpɛ ɖé gbe. É ɖo mɔ̌ có, yě ba ná wa nǔ gěgé d’é jí ɖo sinsɛnzɔ́ Jexóva tɔn mɛ. Bo ná dó kpé nǔ e gbé nya wɛ yě ɖe é wú ɔ, yě wá gbeta ɔ kɔn bá bló hǔzúhúzú ɖé lɛ́. Yě ɖɔ: “Mǐ jɛ lěe mǐ nɔ zán akwɛ́ gbɔn é ɖe kpo jí. Mǐ sɛ tɛn yi jɛ xwé kpɛví ɖé gbe, bo sa mɔ̌to mǐtɔn.” É byɔ́ ɖɔ Madián kpó Marcela kpó ní sá vɔ̌ énɛ́ lɛ́ ǎ; yě wá gbeta ɔ kɔn bá wa mɔ̌, ɖó yě ba ná wa nǔ gěgé d’é jí ɖo sinsɛnzɔ́ Jexóva tɔn mɛ wútu wɛ. Gbeta énɛ́ lɛ́ e kɔn yě wá é dó xomɛhunhun nú yě, bo lɛ́ jɛmɛ nú yě.
6. Aniwú klisánwun lɛ́ ka nɔ sá vɔ̌ vovo lɛ́ ɖo égbé? (Kpɔ́n ɖiɖe ɔ lɔmɔ̌.)
6 Égbé ɔ, ényí klisánwun lɛ́ ɖokpó ɖokpó sá vɔ̌ vovo lɛ́, bá mɔ tɛn dó zán hwenu d’é jí dó nǔ Axɔ́súɖuto ɔ tɔn lɛ́ tamɛ ɔ, yě nɔ ɖó awǎjijɛ. (1 Kɔ. 9:3-6) Jexóva nɔ byɔ́ mǐ ɖɔ mǐ ní sá vɔ̌ énɛ́ lɛ́ ǎ, mɔ̌ jɛ́n nǔ e mǐ jó dó lɛ́ é lɔ ma ka nylá ǎ é nɛ́. Ði kpɔ́ndéwú ɔ, mɛɖé lɛ́ nɔ jó azɔ̌ e yě yí wǎn ná é, xwé yětɔn kpó xwégbekanlin e yě yí wǎn ná é kpó dó. Mɛ gěgé wá gbeta ɔ kɔn bo sɔ́ alɔwlíwlí, alǒ vǐ jiji ɖó kɛ́n ɖokpó hwɛ̌. Mɛ ɖěvo lɛ́ wá gbeta ɔ kɔn bo ná wa sinsɛnzɔ́ ɖo fí e hudó sukpɔ́ ɖe é, nú é ná bo tlɛ byɔ́ ɖɔ yě ní yi fí e jɛ zɔ tawun dó mɛvívɛ́ yětɔn lɛ́ é ɔ nɛ́. Mǐ mɛ gěgé nɔ sá vɔ̌ vovo énɛ́ lɛ́, ɖó mǐ ba ná ná nǔ ɖagbe hú gǎn e mǐ ɖó é Jexóva wútu. Kú d’é jí ɖɔ vɔ̌ ɖěbǔ e a ná sá é, ɖaxó abǐ kpɛví, bá mɔ tɛn dó sɛn Jexóva é nɔ xɔ akwɛ́ n’i tawun.—Ebl. 6:10.
ÐO GBESISƆMƐ BÁ GBƆN VO
7. Aniwú é ka sixú ko vɛ́ wǔ nú Nazilínu ɖé ɖɔ é ní ɖe akpá e é dó é? (Kɛ́nsísɔ́ 6:5) (Kpɔ́n ɖiɖe ɔ lɔmɔ̌.)
7 Xa Kɛ́nsísɔ́ 6:5. Nazilínu lɛ́ d’akpá ɖɔ hǎ kún ná jɛ ta émítɔn ó. Zě e yě zé yěɖée jó nú Jexóva bǐ mlɛ́mlɛ́ é xlɛ́ wɛ yě ɖe gbɔn mɔ̌ ɖo ali ɖé nu. Ényí Izlayɛ́li ví ɖé nyí Nazilínu nú hwenu línlín ɔ, ɖa tɔn lɛ́ ná ɖi ga, bɔ é ná bɔ wǔ ɖɔ mɛ ɖěvo lɛ́ ní ɖ’ayi wú. Ényí mɛ ɖěvo e lɛ́ lɛ̌ dó è lɛ́ é nɔ nɔ gǔdo nú jlǒ e é ɖó bo ná kpo ɖo Nazilínu nyí wɛ é ɔ, é ná bɔ wǔ n’i hú gǎn bɔ é ná gbɔn vo ɖo mɛ lɛ́ mɛ. Amɔ̌, é blá wǔ ɖɔ hweɖélɛ́nu ɖo hwenuxó Izlayɛ́li ví lɛ́ tɔn mɛ ɔ, è nɔ ɖó sísí alǒ nɔ gǔdo nú Nazilínu lɛ́ ǎ. Ðo gbeyíɖɔ Amɔ́si hwenu ɔ, Izlayɛ́li ví gǔfɔ́ndómawujítɔ́ lɛ́ “ná vɛ̌ɛn [Nazilínu lɛ́] bɔ yě nu,” bɔ é cí ɖɔ tɛ́n wɛ yě tɛ́n kpɔ́n, bo ná bló bɔ Nazilínu lɛ́ ná gba akpá e yě dó bo ná ɖó wǔ zɔ nú vɛ̌ɛn é ɖɔhun. (Amɔ. 2:12) Hweɖélɛ́nu ɔ, é ná ko byɔ́ akɔ́nkpinkpan tawun ɖo Nazilínu ɖé sí, bónú é ná tɛ́ dó akpá e é dó é wú, bo gbɔn vo nú mɛ ɖěvo lɛ́.
Nazilínu e nɔ tɛ́ dó akpá e é dó é wú é nɔ ɖo gbesisɔmɛ bá gbɔn vo nú mɛ ɖěvo lɛ́ (Kpɔ́n akpáxwé 7)
8. Nɛ̌ nǔ e jɛ dó Benjamin jí é ka dó wǔsyɛ́n lanmɛ nú we gbɔn?
8 Kpó alɔdó Jexóva tɔn kpó ɔ, mǐ lɔmɔ̌ sixú wa nǔ kpó akɔ́nkpinkpan kpó, bo ná gbɔn vo nú mɛ ɖěvo lɛ́, ényí wínnyá ná bo tlɛ nɔ hu mǐ, alǒ mǐ ma nɔ kpɔ jɛ mɛ ɖěvo lɛ́ jí ɖo jɔwámɔ linu ǎ ɔ nɛ́. Ð’ayi kpɔ́ndéwú Benjamin e ɖó xwe wǒ, bo nɔ nɔ Norvège é tɔn wú; Kúnnuɖetɔ́ wɛ é nyí. Ðó ahwan e fun wɛ è ɖe ɖo Ukraine é wú ɔ, wěmaxɔmɛ tɔn bló nǔwiwa ɖé, bo ná dó nɔ gǔdo nú mɛ ɖěɖěe nɔ nɔ Ukraine lɛ́ é. È byɔ́ vǐ lɛ́ ɖɔ yě ní dó awu e ɖó asyá Ukraine tɔn sín sinmɛ lɛ́ é, bo ji han ɖé. Bo ná dó ɖó wǔ zɔ nú nǔwiwa to tɔn énɛ́ ɔ, Benjamin cí zɔ nú fí e bló nǔ ɔ ɖe wɛ è ɖe é. Amɔ̌, mɛ̌si ɖé mɔ ɛ sɛ́dó, bo sú xó ylɔ́ ɛ ɖɔ: “A ɖó ná wá gɔ́ nú mǐ ɖo fí din. Mǐ bǐ wɛ ɖo te kpɔ́n we!” Benjamin kpankɔ́n bo yi mɛ̌si ɔ gɔ́n bo ɖɔ n’i ɖɔ: “Wǔ ɖó zɔ wɛ un ɖe, un nɔ ɖó alɔ ɖo toxóɖiɖɔ sín nǔwiwa lɛ́ mɛ ǎ. Un ná ɖɔ xójɔxó ɔ, Kúnnuɖetɔ́ Jexóva tɔn gěgé ɖo ganxó, ɖó yě gbɛ́ ɖɔ émí kún ná yi ahwan ó wútu.” Mɛ̌si ɔ yí gbe nú nǔ e Benjamin tínmɛ n’i lɛ́ é, bo ɖɔ n’i ɖɔ é sixú gɔn alɔ ɖó ɖo nǔwiwa ɔ mɛ. Amɔ̌, wěmaxɔmɛvígbɛ́ tɔn lɛ́ jɛ kinkanbyɔ́ ɛ jí ɖɔ aniwú é ma ka wá gɔ́ nú yě ǎ é jí. Xɛsi ɖi Benjamin káká bɔ é ɖibla bɛ́ avǐ; é ɖo mɔ̌ có, é kpankɔ́n bo vɔ́ nǔ e é ɖɔ nú mɛ̌si ɔ é ɖɔ nú wěmaxɔmɛvígbɛ́ tɔn lɛ́. Énɛ́ gúdo ɔ, Benjamin ɖɔ nú mɛjitɔ́ tɔn lɛ́ ɖɔ émí mɔ ɖɔ Jexóva d’alɔ émí, bɔ émí jɛ hun dó nǔɖiɖi émítɔn jí.
9. Ali tɛ́ nu mǐ ka sixú hɛn xomɛ Jexóva tɔn hun ɖe?
9 Ðó mǐ wá gbeta ɔ kɔn bo ná wa jlǒ Jexóva tɔn wútu ɔ, mǐ nɔ gbɔn vo nú mɛ ɖěɖěe lɛ́ lɛ̌ dó mǐ lɛ́ é. Mǐ ɖó hudó akɔ́nkpinkpan tɔn, bá dó ɖe xlɛ́ ɖo azɔ̌ mǐtɔn jí, alǒ ɖo wěmaxɔmɛ ɖɔ Kúnnuɖetɔ́ Jexóva tɔn wɛ mǐ nyí. Bɔ ɖó lěe gbɛ élɔ́ nɔ lin nǔ gbɔn, bo nɔ lɛ́ wa nǔ gbɔn é fɔ́n bo ɖo nylǎnylá d’é jí wɛ wú ɔ, gbɛ zínzán sɔgbe xá nǔgbódodó Biblu tɔn lɛ́ kpó wɛn ɖagbe ɔ jíjlá mɛ ɖěvo lɛ́ kpó lɔ ná ɖibla fɔ́n bo ná ɖo wǔ vɛ́ d’é jí wɛ. (2 Tim. 1:8; 3:13) Amɔ̌, nɔ flín hwebǐnu ɖɔ ényí mǐ kpankɔ́n, bo gbɔn vo nú mɛ ɖěɖěe ma ɖo Jexóva sɛn wɛ ǎ lɛ́ é ɔ, ‘xomɛ Jexóva tɔn hɛn hun’ wɛ mǐ ɖe mɔ̌ nɛ́.—Nǔx. 27:11; Mal. 3:18.
JEXÓVA NÍ NƆ TƐN NUKƆNTƆN Ɔ MƐ ÐO GBƐZÁN TOWE MƐ
10. Nɛ̌ gbeɖiɖe e ɖo Kɛ́nsísɔ́ 6:6, 7 mɛ é xwixwedó ka sixú ko vɛ́ wǔ nú Nazilínu lɛ́ gbɔn?
10 Xa Kɛ́nsísɔ́ 6:6, 7. Nazilínu lɛ́ sixú sɛkpɔ́ cyɔ ǎ. È dó nukúnmɛ kpɔ́n tlóló ɔ, è sixú mɔ ɖɔ énɛ́ kún nyí nǔ vɛ́ wǔ ɖé ó. Amɔ̌, ɖo hwexónu ɔ, ényí Nazilínu ɖé sín hɛ̌nnumɔ e sɛkpɔ́ ɛ tawun é ɖé kú ɔ, sɛ́n énɛ́ nyinyi ná ko nɔ vɛ́ wǔ n’i tawun. Lěe è nɔ ɖi cyɔ gbɔn hwenɛ́nu é byɔ́ ɖɔ è ní ma nɔ zɔ dó cyɔ ɔ ó. (Jaan 19:39, 40; Mɛ. 9:36-40) Amɔ̌, Nazilínu ɖé sixú xwedó cyɔɖiɖi sín walɔ énɛ́ ǎ. Nazilínu lɛ́ nɔ tɛ́ dó akpá e yě dó é wú, dó ɖe nǔɖiɖi adodwé e yě ɖó é xlɛ́, é ná bo tlɛ nyí hwenu e xwédo yětɔn ɖo aluwɛ syɛ́nsyɛ́n mɛ é ɔ nɛ́. É ɖo wɛn ɖɔ, Jexóva ná hlɔ̌nhlɔ́n mɛsɛntɔ́ tɔn énɛ́ lɛ́ e zé yěɖée jó n’i bǐ mlɛ́mlɛ́ lɛ́ é, bɔ yě ɖí xwi xá wǔvɛ́ e yě mɔ lɛ́ é.
11. Étɛ́ klisánwun ɖé ka ɖó ná kú d’é jí bá wa hwenu e é ɖo gbeta e kunkplá xwédo tɔn lɛ́ é kɔn wá wɛ é? (Kpɔ́n ɖiɖe ɔ lɔmɔ̌.)
11 Ðó mǐ nyí klisánwun wútu ɔ, mǐ nɔ ylɔ́ zě e mǐ zé mǐɖée jó nú Jexóva é sín akpá ɖɔ nǔjɔnǔ. Énɛ́ nɔ kunkplá gbeta e kɔn mǐ nɔ wá lɛ́ é kpó lěe mǐ nɔ wa nǔ gbɔn é kpó ɖo xwédo kpáxwé. Mǐ nɔ w’azɔ̌ syɛ́nsyɛ́n dó sú nǔ e hudó xwédo mǐtɔn lɛ́ é sín do, amɔ̌, mǐ nɔ lɔn gbeɖé bónú nǔ e nɔ jló mɛ e ɖo xwédo mǐtɔn mɛ lɛ́ é nɔ jɛ nukɔn nú nǔ e Jexóva byɔ́ mǐ lɛ́ é gbeɖé ǎ. (Mat. 10:35-37; 1 Tim. 5:8) Hweɖélɛ́nu ɔ, é sixú byɔ́ ɖɔ mǐ ní wá gbeta ɖé lɛ́ kɔn, bá dó hɛn xomɛ Jexóva tɔn hun, bɔ é ka ná nyɔ́ mɛ e ɖo xwédo mǐtɔn mɛ lɛ́ é nukúnmɛ ǎ.
É ná bo tlɛ nyí ɖo hwenu vɛ́ wǔ lɛ́ mɛ ɔ, a ka ɖo gbesisɔmɛ bo ná sɔ́ jlǒ Jexóva tɔn wiwa ɖó tɛn nukɔntɔn ɔ mɛ a? (Kpɔ́n akpáxwé 11) e
12. Alexandru ɖo wǔvɛ́ syɛ́nsyɛ́n ɖé mɛ gbɔn wɛ ɖo xwédo tɔn mɛ có, étɛ́ é ka wa? Étɛ́ é ma ka wa ǎ?
12 Mǐ ní ɖɔ xó dó kpɔ́ndéwú Alexandru kpó asi tɔn Dorina kpó tɔn wú. Ée xwédo ɔ kplɔ́n Biblu nú xwe ɖokpó gúdo é ɔ, Dorina wá gbeta ɔ kɔn bá ɖó te, bo ba ɖɔ Alexandru lɔ ní wa nǔ ɖokpó ɔ. Amɔ̌, Alexandru zán gbe fífá kpó ayiɖote kpó bo ɖɔ n’i ɖɔ émí ná gbɛ kan d’é nu. É nyɔ́ Dorina nukúnmɛ ǎ, bɔ é wa nǔ e wú é kpé é bǐ, bá ɖó nǔkplɔ́nkplɔ́n asú tɔn tɔn te. Alexandru ɖɔ ɖɔ émí dó gǎn, bá mɔ nǔ jɛ lěe nǔ cí n’i é mɛ, amɔ̌, é kún fá bo fá ó. Ényí Dorina ɖɔ nǔyá nú Alexandru, bo lɛ́ kán gbe n’i hweɖélɛ́nu ɔ, Biblu kplɔ́nkplɔ́n jíjódó jɛ́n nɔ jló è. É ɖo mɔ̌ có, Alexandru kpo ɖo Jexóva sɔ́ ɖó tɛn nukɔntɔn ɔ mɛ wɛ, bɔ ɖo hwe ɖokpó ɔ nu ɔ, é kpo ɖo wǎnyíyí e gɔ́ngɔ́n é kpó sísí kpó ɖe xlɛ́ asi tɔn wɛ. Ðo vivɔnu ɔ, kpɔ́ndéwú ɖagbe e é ɖó é sísɛ́ asi tɔn, bɔ é lɛ́ jɛ Biblu kplɔ́n jí, bo wá zunfán nǔgbó ɔ.—Kpɔ́n video Alexandru Văcar kpó Dorina Văcar kpó: “Wǎnyíyí nɔ kú hǔn, é nɔ nyɔ́ xomɛ” ɖo video ɖěbɔdóɖěwú, éé ɖo akpáxwé “Biblu nɔ húzú gbɛzán mɛtɔn” mɛ lɛ́ é mɛ ɖo jw.org jí.
13. Nɛ̌ mǐ ka sixú yí wǎn nú Jexóva kpó mɛ e ɖo xwédo mǐtɔn mɛ lɛ́ é kpó gbɔn?
13 Jexóva wɛ bló tuto xwédo tɔn, bo ba ɖɔ mǐ ní ɖó xwédo awǎjijɛnɔ ɖé. (Efɛ́. 3:14, 15) Ényí mǐ ba ná ɖó awǎjijɛ jɔ awǎjijɛ ɔ, mǐ ɖó ná nɔ bló nǔ lɛ́ lěe Jexóva ba gbɔn é. Vɔ̌ ɖěɖěe a nɔ sá kpó ayi bǐ kpó dó sɛn Jexóva, hwenu e a nɔ ɖo nukún kpé dó xwédo towe wú wɛ, lobo nɔ lɛ́ wa nǔ xá yě kpó wǎnyíyí kpó, kpódó sísí kpán é nɔ su Jexóva nukúnmɛ tawun.—Hlɔ̌. 12:10.
MI DÓ WǓSYƐ́N LANMƐ NÚ MIÐÉE, BÁ WA NǓ NAZILÍNU LƐ́ ÐƆHUN
14. Mɛ̌ mɛ̌ e mǐ ka ná dó gǎn tawun bo dó wǔsyɛ́n lanmɛ ná gbɔn xó mǐtɔn lɛ́ gblamɛ?
14 É byɔ́ ɖɔ mɛ ɖěɖěe wá gbeta ɔ kɔn bá sɛn Jexóva ɖo égbé lɛ́ é bǐ ní ɖo gbesisɔmɛ bá sá vɔ̌ lɛ́ ɖó wǎn e yě yí nú Jexóva é wútu. Hweɖélɛ́nu ɔ, mɔ̌ wiwa nɔ bɔ wǔ ǎ. Nɛ̌ mǐ ka sixú d’alɔ mǐɖée lɛ́, bá mɔ tɛn dó sá vɔ̌ lɛ́ nú Jexóva gbɔn? Gbɔn wǔsyɛ́n dídó lanmɛ nú mɛ sín xó lɛ́ ɖiɖɔ nú mǐɖée lɛ́ gblamɛ. (Jɔb. 16:5) Mɛɖé lɛ́ ka ɖo agun towe mɛ bo ɖo tíntɛ́nkpɔ́n wɛ, bá zán gbɛ e bɔkun é, bá mɔ tɛn dó ɖ’alɔ ɖo azɔ̌ Axɔ́súɖuto ɔ tɔn lɛ́ mɛ d’é jí wɛ a? A ka tuun mɛ wínnyáwínnyá ɖé lɛ́ bɔ é ɖo fífá dó yě wɛ ǎ có, yě ka ɖo gǎn dó wɛ kpó akɔ́nkpinkpan kpó bá gbɔn vo nú mɛ ɖěvo lɛ́ ɖo wěmaxɔmɛ a? Biblu kplɔ́ntɔ́ gɔ́ nú nǔɖitɔ́ hǎtɔ́ mǐtɔn ɖěɖěe kpo ɖo gbejí nɔ wɛ ɖó gbeklánxámɛ xwédo tɔn wútu lɛ́ é ka lo? Mi nú mǐ ní zán ali e hun nú mǐ lɛ́ é bǐ dó ɖɔ wǔsyɛ́n dó lanmɛ nú mɛ sín xó lɛ́ nú mawusɛntɔ́ hǎtɔ́ mǐtɔn vívɛ́ énɛ́ lɛ́, bo nɔ lɛ́ ɖe nǔsumɛnukúnmɛ mǐtɔn xlɛ́ yě nú mɛɖée sísɔ́ dó sá vɔ̌ yětɔn kpó akɔ́nkpinkpan yětɔn kpó.—File. 4, 5, 7.
15. Nɛ̌ mɛɖé lɛ́ ka nɔ nɔ gǔdo nú mɛ ɖěɖěe ɖo sinsɛnzɔ́ hwebǐnu tɔn mɛ lɛ́ é gbɔn?
15 Hweɖélɛ́nu ɔ, mǐ sixú kpé wú bo d’alɔ tawun tawun ɖé lɛ́ nǔɖitɔ́ hǎtɔ́ mǐtɔn e ɖo sinsɛnzɔ́ hwebǐnu tɔn mɛ lɛ́ é. (Nǔx. 19:17; Ebl. 13:16) Nǔ e nɔví nyɔ̌nu mɛxómɔ gbejínɔtɔ́ e nɔ nɔ Sri Lanka é ɖé jló vɛ́návɛ́ná é nɛ́. È dó akwɛ́ gbɔjɛ gaga hwenu sín akwɛ́ e é nɔ yí é jí n’i, bɔ é ba ná d’alɔ nɔví nyɔ̌nu gběxosín-alijítɔ́ wínnyáwínnyá we bɔ akwɛ́yózo ná ɖo nǔ gba wɛ có yě ná gbɛ kan dó sinsɛnzɔ́ yětɔn nu. Énɛ́ wú ɔ, é wá gbeta ɔ kɔn bo ná nɔ d’alɔ yě ɖo akwɛ́ nabí e yě nɔ zán ɖo kantitɛ kpáxwé sunmɛ sunmɛ é kɔn. Walɔ ɖagbe wɛ nɔví nyɔ̌nu énɛ́ ɖe xlɛ́.
16. Étɛ́ tuto Nazilínu lɛ́ tɔn e è bló ɖo hwexónu é ka kplɔ́n mǐ?
16 É ɖo wɛn ɖɔ gbigbɔ mɛɖée zé jó tɔn Nazilínu hwexónu tɔn lɛ́ tɔn sixú kplɔ́n nǔ gěgé mǐ. É ɖo mɔ̌ có, tito énɛ́ lɛ́vɔ́ ɖe nǔɖé xlɛ́ dó Tɔ́ mǐtɔn jǐxwé tɔn Jexóva wú. É tuun ɖɔ mǐ ba vɛ́návɛ́ná bo ná wa nǔ dó nyɔ́ nukún tɔn mɛ, bo lɛ́ ɖo gbesisɔmɛ bá sá vɔ̌ lɛ́ dó wa nǔ sɔgbe xá zě e mǐ zé mǐɖée jó n’i é. É hun ali ɔ nú mǐ mɛ ɖokpó ɖokpó bɔ mǐ ná ɖe wǎn e mǐ yí n’i é xlɛ́, dó sɔ́ mǐ su. (Nǔx. 23:15, 16; Mak. 10:28-30; 1 Jaan 4:19) Nazilínu lɛ́ sín tuto e Jexóva bló é xlɛ́ ɖɔ é nɔ ɖ’ayi vɔ̌ e mǐ mɛ ɖokpó ɖokpó nɔ sá dó sɛn ɛ lɛ́ é wú, bɔ é nɔ lɛ́ xɔ akwɛ́ n’i. Énɛ́ wú ɔ, mi nú mǐ ní kán ɖ’é jí bá kpo ɖo Jexóva sɛn wɛ, lobo lɛ́ sɔ́ jlǒ dó ná ɛ nǔ ɖagbe hú gǎn e mǐ ɖó é.
ÉTƐ́ KA NYÍ XÓSIN TOWE?
-
Ali tɛ́ lɛ́ nu Nazilínu lɛ́ ka nɔ sɔ́ yěɖésúnɔ dó sá vɔ̌, lobo nɔ lɛ́ kpankɔ́n ɖe?
-
Nɛ̌ mǐ ka sixú nɔ dó wǔsyɛ́n lanmɛ nú mǐɖée lɛ́ bá cí Nazilínu lɛ́ ɖɔhun, lobo nɔ sá vɔ̌ lɛ́ nú Jexóva gbɔn?
-
Étɛ́ tuto Nazilínu lɛ́ tɔn e è bló é ka ɖe xlɛ́ dó jiɖe e Jexóva ɖó dó mɛsɛntɔ́ tɔn lɛ́ wú é wú?
HAN 124 Nɔ gbejí hwebǐnu
a Nǔgbó wɛ ɖɔ Jexóva sɔ́ mɛɖé lɛ́ bɔ yě ná nyí Nazilínu có, Izlayɛ́li ví gěgé wá gbeta ɔ kɔn bo ná nyí Nazilínu nú hwenu ɖé.—Kpɔ́n gbǎví “ Nazilínu e Jexóva sɔ́ lɛ́ é.”
b Hweɖélɛ́nu ɔ, wěma mǐtɔn lɛ́ nɔ sɔ́ mɛ e ɖo sinsɛnzɔ́ hwebǐnu tɔn mɛ lɛ́ é jlɛ́ dó Nazilínu lɛ́ wú. É ɖo mɔ̌ có, ɖo xóta élɔ́ mɛ ɔ, mǐ ná ɖɔ xó dó lěe mɛsɛntɔ́ Jexóva tɔn e sɔ́ yěɖée jó n’i lɛ́ é bǐ sixú wa nǔ Nazilínu lɛ́ ɖɔhun gbɔn é wú.
c È ná ɖɔ ɔ, é cí ɖɔ Nazilínu ɖé kún sɔ́ ɖó azɔ̌ ɖěvo ɖěbǔ, ɖi azɔ̌ e è ɖe nú mɛ é ɖé bo ná wa dó ɖe akpá tɔn ó ɖɔhun.
d Kpɔ́n xóta “Mǐ wá gbeta ɔ kɔn bá hɛn gbɛzán mǐtɔn bɔkun” ɖo xóta ɖěbɔdóɖěwú “Nǔ e Kúnnuɖetɔ́ Jexóva tɔn lɛ́ mɔ kpɔ́n lɛ́ é” mɛ ɖo jw.org jí.
e ÐIÐE Ɔ SÍN TÍNMƐ: Nazilínu ɖé ɖo xɔ ta, bo ɖo ahwan e sɔ́ hɛ̌nnumɔ tɔn vívɛ́ ɖé xwe ɖiɖi gbé é kpɔ́n wɛ. Bo ná dó ɖe akpá e é dó nú Jexóva é ɔ, é sixú ɖ’alɔ ɖo cyɔ núwiwa ɔ mɛ ǎ.
