1. ¿Mbaʼe ehémplo iporãvapa oheja ñandéve umi yma oservi vaʼekue Jehovápe?

 ¿REMOMBAʼÉPA ne amista Jehovándi? Katuete ningo, péro ndahaʼéi nde añónte. Ymaite guive hetaiterei persónama ojapo vaʼekue upéicha (Sal. 104:​33, 34). Oĩ umi heta ojesakrifika vaʼekue Jehová rehehápe, por ehémplo yma Israélpe umi nazareo. Péro ikatu jaikuaase: ¿Mávapa rakaʼe haʼekuéra? ¿Ha mbaʼépa ikatu ñaaprende iñehemplokuéragui?

2. a) ¿Mávapa rakaʼe umi nazareo? (Números 6:​1, 2). b) ¿Mbaʼérepa oĩ vaʼekue umi israelita apytégui odesidíva oservi de nazareo?

² Pe palávra “nazareo” ou peteĩ palávra hebréagui heʼiséva “oñemboykéva térã oñemeʼẽva Ñandejárape”. Upéva opyta porãiterei vaʼekue umi nazaréore, pórke haʼekuéra ojapo peteĩ promésa espesiál oservi hag̃ua Ñandejárape. Okumpli hag̃ua upe promésa tekotevẽtamante kuri ojesakrifika hikuái. Según Moisés léi peteĩ kuña térã peteĩ kuimbaʼe ikatu vaʼekue ojapo koʼãichagua promésa oservi hag̃ua de nazareo peteĩ tiémpore (elee Números 6:​1, 2). a Ojapóvo ko promésa haʼe oñekompromete kuri osegitaha unos kuánto léi umi ótro israelita natekotevẽi vaʼekue osegi. ¿Péro mbaʼére peteĩ israelita odesidíta ojapo upéva? Ohayhuetereígui Jehovápe ha ohechaukaségui ijagradesidoha ovendesi heta haguére chupe (Deut. 6:5; 16:17).

3. ¿Mbaʼéichapa ikatu jasegi umi nazareo ehémplo?

³ Koʼág̃arupi natekotevẽvéima jaservi de nazareo, pórke  nañaimevéima Moisés léi poguýpe, síno “Cristo léi” poguýpe (Gál. 6:2; Rom. 10:4). Upéicharõ jepe lomímonte ikatúiti jasegi umi nazareo ehémplo. ¿Mbaʼérepa jaʼe upéva? Pórke haʼekuéraicha avei, ñande jaservise Jehovápe ñande pyʼaite guive, ha ñande rekove, pensamiénto ha mbaretekue reheve (Mar. 12:30). Ñañemeʼẽrõ guare Jehovápe ñapromete vaʼekue jaservitaha chupe opa árare. Ñakumpli hag̃ua upe promésa tekotevẽmante ñandesakrifikádo ha ñaneñeʼẽrendu Jehovápe. Ñaanalisávo mbaʼéichapa oiko vaʼekue ymave umi nazareo, ñaaprendéta heta mbaʼe ñanepytyvõtava ñakumpli hag̃ua upe promésa jajapo vaʼekue Jehovápe (Mat. 16:24). b

ÑANDESAKRIFIKÁDOKENA

4. Heʼiháicha Números 6:​3, 4, ¿mbaʼéichapa peteĩ nazareo ohechauka vaʼekue isakrifikadoha?

⁴ (Elee Números 6:​3, 4). Umi nazareo ndoʼúi vaʼerã kuri mbaʼeveichagua vevída orekóva alkoól ni ndoʼúi vaʼerã parrál. Péro umi ótro israelita si ikatu vaʼekue hoʼu koʼã mbaʼe, pórke Jehovápe g̃uarã ndaivaíri. La Biblia heʼi voi ‘pe víno ombovyʼaha umi héntepe’ ha haʼeha peteĩ rregálo oúva Ñandejáragui. Upéicharõ jepe umi nazareokuéra ijeheguiete odesidi vaʼekue omboyke koʼã mbaʼe (Sal. 104:​14, 15). Umi nazareo ikatúramo jepe odisfruta koʼã mbaʼe, haʼekuéra ijeheguiete odesidi vaʼekue omboyke umíva. c

5. ¿Mbaʼépa odesidi vaʼekue osakrifika Madián ha Marcela, ha mbaʼérepa?

⁵ Umi nazaréoicha ñande avei ikatu jajesakrifika Jehová rehehápe. Upéva ojapo vaʼekue Madián ha Marcela. d Ko matrimónio oiko porã vaʼekue, Madián ogana porã vaʼekue itravahohápe ha upéicha rupi oiko hikuái peteĩ departaménto delúhope. Upéicharõ jepe, haʼekuéra ojapose vaʼekue hetave mbaʼe Jehovápe g̃uarã, ha upévare odesidi okambia heta mbaʼépe. Haʼekuéra heʼi: “Roñepyrũ saʼive rogasta, rova peteĩ departaménto michĩvévape ha rovende la ore áuto”. Avave ndojopýi vaʼekue Madián ha Marcélape ojapo hag̃ua koʼã mbaʼe. Péro haʼekuéra ijeheguiete odesidi ojesakrifika ojapo hag̃ua hetave mbaʼe Jehovápe g̃uarã. Upéicha rupi koʼág̃a oñeñandu porã ha ovyʼa hikuái.

6. ¿Mbaʼérepa Jehová siervokuéra ojesakrifika avei koʼág̃arupi? (Ehecha pe taʼanga).

 ⁶ Ñande avei javyʼaiterei jadesidi jave jajesakrifikataha Jehová rehehápe (1 Cor. 9:​3-6). Jehová ningo ndojopýi avavépe ojapo hag̃ua koʼãichagua sakrifísio, ni ndeʼíri avei oĩ vaiha katuete umi mbaʼe ñamboykéva jaservive hag̃ua chupe. Por ehémplo oĩ ohejáva peteĩ traváho ogustáva chupe, hóga térã hymbaʼi ohayhuetereíva. Oĩ odesidíva ohaʼarõvetaha omenda hag̃ua térã ifamília hag̃ua. Oĩ ohóva oservi peteĩ lugár oĩvehápe nesesida oikótaramo jepe mombyry ihentekuéragui. Enterovete ñande jajapo koʼãichagua sakrifísio ñameʼẽségui Jehovápe pe iporãnguete. Aníkena nderesarái, Jehová omombaʼeterei hína entéro sakrifísio rejapóva hesehápe, tahaʼe michĩ térã tuicháva (Heb. 6:10).

JAJEDESIDÍKENA ÑANEDIFERENTETAHA

7. ¿Mbaʼe ijetuʼúvapa ombohovái rakaʼe umi nazareo okumpli hag̃ua ikompromíso? (Números 6:5). (Ehecha pe taʼanga).

⁷ (Elee Números 6:5). Umi nazareo opromete vaʼekue noikytĩmoʼãiha iñakãrangue, péicha ohechauka vaʼekue hikuái mbaʼeichaite pevépa iñeʼẽrendu Jehovápe. Oimérõ peteĩ nazareo opromete raʼe are oservitaha péicha Jehovápe, la iñakãrangue ipuku rasátama kuri ha umi ótro ohechakuaáta upéva. Peteĩ nazaréope ndaijetuʼumoʼãi kuri oservi hag̃ua upéicha umi oĩva ijerére oapojáramo chupe, péro ñambyasýramo jepe, heta vése Israélpe oĩ vaʼekue umi nomombaʼéiva umi nazaréope. Por ehémplo proféta Amós tiémpope oĩ vaʼekue unos kuánto israelita aña oñehaʼãva ‘hoʼuka víno umi nazaréope’. Ikatu oime ojapo raʼe hikuái upéicha oipotágui umi nazareo ofalla Jehovándi ha nokumplíri la ipromésa (Amós 2:12). Upéicha rupi, sapyʼánte umi nazareo tekotevẽmante ipyʼaguasu okumpli hag̃ua ipromésa ha ohechauka hag̃ua idiferenteha umi ótro israelítagui.

8. ¿Mbaʼépa ñaaprende Benjamín ehémplogui?

⁸ Jehová ñanepytyvõ rupi ñande avei ikatu ñandepyʼaguasu ñanediferénte hag̃ua, oiméramo jepe ñaneotĩ. Ñapensamíntena Benjamín ehémplore, haʼe ningo peteĩ testígo de Jehová orekóva 10 áño oikóva Noruégape. Ijeskuélape ojejapo peteĩ fiésta patriótika ojehechauka hag̃ua ojeapojaha Ucrániape oiko rupi upépe gérra. Upérõ ojejerure umi mitãme omonde hag̃ua ao orekóva Ucrania vandéra kolór, ha opurahéi hag̃ua upe paíspe. Benjamín ndopartisipaséi ko fiésta patriótikape, upévare mombyrymínte voi oñemoĩ chuguikuéra. Upéicharõ  jepe iprofesóra ohecha chupe, ha hatã osapukái: “¡Benjamín ejúna ore rendápe, ápe enterovéva neraʼarõma hína!”. Benjamín pyʼaguasúpe oñemboja iprofesóra rendápe ha heʼi: “Che nañentremetéi koʼãichagua fiésta patriótikape, ha oĩ voi heta testígo de Jehová oĩva kárselpe ndohoséi rupi gerrahápe”. Iprofesóra orrespeta la haʼe opensáva ha heʼi chupe ikatunteha oho upégui. Upéicharõ jepe ikompañerokuéra oporandu chupe mbaʼérepa ndohói raʼe hendapekuéra. Upépe Benjamín hesay pororopa ha haimetéma anga hasẽ, péro pyʼaguasúpe heʼi jey ikompañerokuérape iprofesórape heʼi hagueichaite. Upéi Benjamín omombeʼu ituakuérape mbaʼéichapa haʼe oñandu Jehová oipytyvõ hague chupe odefende hag̃ua ijerovia.

9. ¿Mbaʼéichapa ikatu ñambovyʼa Jehovápe?

⁹ Jajapo rupi Jehová heʼíva, la hénte oĩva ñande jerére ohechakuaa ñanediferenteha chuguikuéra. Upévare ñandepyʼaguasu vaʼerã jaʼe hag̃ua ñande haʼeha testígo de Jehová, tahaʼe ñande traváho, eskuéla térã koléhiope. Jaikuaaháicha umi hénte amás día oho vaive hese oiko lája ha oñekomporta lájape hikuái. Upévare ikatu ijetuʼu ñandéve jasegi hag̃ua la Biblia heʼíva, ha ñaipytyvõ hag̃ua la héntepe predikasiónpe (2 Tim. 1:8; 3:13). Upéicharõ ñanemanduʼa vaʼerã ñambovyʼaha hína Jehovápe ñandepyʼaguasu jave ñanediferénte hag̃ua umi ótrogui (Prov. 27:11; Mal. 3:18).

EMOTENONDÉKENA JEHOVÁPE NDE REKOVÉPE

10. ¿Mbaʼérepa oiméne ijetuʼu raʼe umi nazaréope okumpli hag̃ua pe mandamiénto oĩva Números 6:​6, 7-pe?

¹⁰ (Elee Números 6:​6, 7). Umi nazareo ndaikatúi vaʼekue opoko peteĩ omano vaʼekuére, ikatu ñapensa upéva ndahaʼemoʼãiha kuri chupekuéra g̃uarã la ijetuʼuetereíva. Péro peteĩ nazaréogui omanóramo peteĩ ihénte ijetuʼuetereíta kuri chupe okumpli hag̃ua upe léi. ¿Mbaʼérepa? Pórke ymave oreko vaʼekue hikuái heta kostúmbre tekotevẽtahápe opokómante pe ihénte omano vaʼekuére (Juan 19:​39, 40; Hech. 9:​36-40). Umi nazareo ndaikatúi kuri osegi koʼãichagua kostúmbre. Koʼãichagua situasión ijetuʼuetévape umi nazareo tekotevẽmante ijerovia mbarete okumpli hag̃ua ipromésa, hasy asýramo jepe chupe. Ñaimekuaa segúro Jehová omombarete hague koʼã isiérvope oaguanta hag̃ua koʼã situasión ijetuʼuetéva.

11. ¿Mbaʼépa jajapo vaʼerã jadesidíta jave álgo ñane família rehehápe? (Ehecha pe taʼanga).

 ¹¹ Ñande kristiáno ningo ñakumpli porãse pe promésa jajapo vaʼekue ñañemeʼẽrõ guare Jehovápe. Ha upéva jareko enkuénta umi mbaʼe jadesidívape ha jajapóvape ñane família rehehápe. Ñande ñañehaʼãmbaite ñakumpli ñane rresponsavilida ñane famíliandi la Biblia heʼiháicha, péro siémpre ñamotenonde Jehová oipotáva (Mat. 10:​35-37; 1 Tim. 5:8). Upéicha rupi sapyʼánte ikatu ipochy ñanendive ñane parientekuéra, péro péicha jave jajesakrifikámante japyta porã hag̃ua Jehovándi.

12. ¿Mbaʼépa ojapo raʼe Alexandru ombohováirõ guare peteĩ situasión ijetuʼúva hogapýpe?

¹² Jahechamína la ohasa vaʼekue Alexandru ha hembireko Dorina. Haʼekuéra ningo un áñorupima ostudia hína kuri la Biblia, péro upéi Dorina odesidi ohejataha la ijestúdio ha oipota avei Alexandru oheja. Péro Alexandru oexplika porãnte chupe osegiseha ostudia. Upéva ndogustaiete hembirekópe ha omboliga voi chupe oheja hag̃ua la ijestúdio. Alexandru oñehaʼã oñemoĩ ilugárpe ha ontende chupe, péro ijetuʼu kuri. Sapyʼánte Dorina oñeʼẽ vai hese ha otrata vai voi chupe. Péicha jave Alexandru oñentregaséntema kuri. Upéicharõ jepe haʼe omotenonde Jehovápe ha osegi otrata porã ha orrespeta hembirekópe. Alexandru omoĩ rupi chupe ehémplo porã, tiémpo rire la hembireko oñepyrũ jey ostudia la Biblia. (Ehecha pe vidéo Alexandru ha Dorina Vacar: “Pe oporohayhúva ipasiénsia ha imbaʼeporã”, osẽva pe párte héravape “Mbaʼéichapa pe añetegua okambia chupekuéra”, oĩva jw.org-pe).

13. ¿Mbaʼéichapa ikatu jahechauka jahayhuha Jehovápe ha ñane famíliape?

¹³ Jehová omoñepyrũ vaʼekue pe família ha oipota enterovéva javyʼa ñane famíliape (Efes. 3:​14, 15). Javyʼaséramo añetehápe, jajapo vaʼerã entéro mbaʼe Jehová oipotaháicha. Haʼe ohecha ñañehaʼãmbaiteha jaservi chupe, ñañangareko ñane famíliare mborayhúpe ha jarrespetaha chupekuéra. Aníkena jaduda Jehová ovaloraitereiha koʼã mbaʼe jajapóva (Rom. 12:10).

ÑAÑOMOKYREʼỸKENA JASEGI HAG̃UA UMI NAZAREO EHÉMPLO

14. ¿Mávapepa tekotevẽterei ñamokyreʼỹ umi mbaʼe jaʼéva rupive?

¹⁴ Enterove jadesidíva jaadora Jehovápe, ñaime vaʼerã jajesakrifika hag̃uáicha hesehápe jahayhu rupi chupe. Sapyʼánte ikatu ijetuʼu ñandéve jajapo hag̃ua upéva. ¿Péro  mbaʼéichapa ikatu ñañopytyvõ? Upearã ñañomokyreʼỹ vaʼerã (Job 16:5). ¿Oĩpa hína ne kongregasiónpe peteĩ ermáno oñehaʼãva oiko sensillove itiempove hag̃ua Jehová servísiope? ¿Reikuaápa peteĩ mitãrusu térã mitãkuña pyʼaguasúpe ohechaukáva idiferenteha eskuéla térã koléhiope ijetuʼúramo jepe? ¿Oĩpa peteĩ estudiánte térã peteĩ ermáno oñehaʼãva hína ifiél Jehovápe, ojopýramo jepe chupe ihentekuéra? Jaaprovechákena oimeraẽ oportunida ñamokyreʼỹ hag̃ua ñane ermanokuérape. Upearã ikatu jaʼe chupekuéra mbaʼeichaitépa ñamombaʼe pe sakrifísio ojapóva hikuái pyʼaguasúpe (Filem. 4, 5, 7).

15. ¿Mbaʼéichapa oĩ oipytyvõva umi oservívape de tiémpo kompléto?

¹⁵ Sapyʼánte ikatu ija ñandéve ñaipytyvõ umi oservívape de tiémpo kompléto (Prov. 19:17; Heb. 13:16). Upéva ojapo kuri peteĩ ermána oikóva Sri Lánkape. Káda mes haʼe okovra peteĩ ajúda omeʼẽva chupe pe goviérno. Upéi pe goviérno ohupírõ guare chupe la ihuvilasión, haʼe odesidi oipytyvõtaha mokõi ermána imitãvape osegi hag̃ua ojapo iprekursórado. Upévare káda mes haʼe oapartaʼimi la ipláta ha omeʼẽ umi ermánape ikatu hag̃uáicha opaga hikuái ikuénta de teléfonore. ¡Ajépa iporãite ko ermána ojapóva!

16. ¿Mbaʼépa ikatu ñaaprende umi nazareo yma guarégui?

¹⁶ ¡Ajépa hetaite mbaʼe ikatu ñaaprende umi nazaréogui! Péro ndahaʼéi upévante. Iñehemplokuéra ñanemboʼe avei heta mbaʼe ñande Ru Jehovágui. Haʼe ningo ndodudái ñambovyʼaseha chupe ha jajapotaha oimeraẽ sakrifísio ñakumpli hag̃ua pe promésa jajapo vaʼekue ñañemeʼẽrõ guare chupe. Haʼe omeʼẽ la oportunida káda únope jahechauka hag̃ua mbaʼeichaitépa jahayhu chupe (Prov. 23:​15, 16; Mar. 10:​28-30; 1 Juan 4:19). Umi nazareo ehémplo ohechauka porã ñandéve mbaʼeichaitépa Jehová omombaʼe umi sakrifísio jajapóva jaservívo chupe. Upévare jasegíkena jaservi Jehovápe ñande pyʼaite guive ha ñameʼẽ chupe iporãnguete.