1. Kɔ’ɔn pɔsɛ diimi sa, Yehowa nɛreba eŋɛ la wani pa’alɛ ti bamam la Yehowa bɔŋa la dela tuulum bɔ’ɔra ba?

 HON la Yehowa bɔŋa la dela tuulum bɔ’ɔra hɔ? Nɔkpe’ene kai ti la dela bala! La me daɣɛ hon ma’a. Diimi sa, la yuun ani nɛreba zo’e zo’e me la bala. (Ym. 104:​33, 34) Nɛreba zo’e zo’e ãregeri bamea mɛ pu’usa Yehowa. Nazardoma n yuun boi diimi Israel tiŋa me yuun eŋɛ la bala. Ba yuun dela nɛrebani ge to wan ta’an zamesɛ la bem ba yele la poan?

2. (a) Bani n yuun de Nazardoma la? (Kanlɛ 6:​1, 2) (b) Beni n sɔi ti Israeldoma la basɛba yuun biŋe nɔɔrɛ dɛna Nazardoma?

² Yelebire la n de “Nazar” la ze’ele la Hebru yetɔɣum poan ti la vuurɛ dɛna “Nɛra Ti Ba Lo’e,” bii “Nɛra N Boi A To’ore,” bii “Nɛra N Kã Amea.” Nazardoma la yuun dela Israel nɛresɛba n yuun boi ba to’ore ban yuun ãregeri bamea se’em tuna bɔ’ɔra Yehowa la zuo. Moses Lɔɔ la yuun bo yɔ’ɔ ti buraa bii pɔka ta’an biŋe nɔɔrɛ la Yehowa dɛna Nazar nɛra ge tuna bɔ’ɔra en saŋa wana mɔpi poan. a (Kaalɛ Kanlɛ 6:​1, 2.) Nɔbiŋere wa yuun dela a dɔla yɛla ase’a ti Israeldoma la yuun ka nara ti ba dɔla. Beni n yi sɔi ti Israel nɛra wan bɔta ti a dɛna Nazar nɛra? La wan ta’an dɛna la nɔŋerɛ la yelesoma zo’e zo’e ti Yehowa eŋɛ bo en la, n wan basɛ ti Israel nɛra eŋɛ bala.—Tɛɛ. 6:5; 16:17.

3. Naayinɛ nɛreba iti la bem zina beere wa ti la wɔ̃na la Nazardoma la?

³ ‘Krista lɔɔ la’ n yuun tee soe Moses Lɔɔ la zuo, Naayinɛ  nɛreba yuun kan ta’an le dɛna Nazardoma. (Ga. 6:2; Arom 10:4) Ge wuu Nazardoma la, Yehowa nɛreba n boi zina beere wa kɔ’ɔn eŋɛ pa’alɛ ti ba boti ba pu’usa Yehowa la ba suure za’a, ba sia za’a, ba puti’irɛ za’a la ba paŋa za’a. (Mr. 12:30) To san kã tomea bo Yehowa, to ni biŋe nɔɔrɛ ti to wan pu’usa la eŋa. La nari ti to ãregera tomea tuna Yehowa n boti se’em ta’an dɔla to kã’a nɔbiŋere la. To san zamesɛ baŋɛ Nazardoma la n yuun eŋɛ se’em ta’an dɔla ba nɔbiŋere la, tomam me wan baŋɛ ton wan eŋɛ se’em dɔla to nɔbiŋere la. b (Mt. 16:24) Basɛ ya ti to geele ya yɛla ase’a bisɛ.

KƆ’ƆN ÃREGERA HOMEA

4. Wuu Kanlɛ 6:​3, 4 n pa’alɛ se’em la, bem n yuun ta’an basɛ ti la kpe’em bo Nazardoma la ti ba ãregera bamea?

⁴ Kaalɛ Kanlɛ 6:​3, 4. Ba yuun ka bo yɔ’ɔ ti Nazardoma la nyuura dakpe’eŋo la tiwɔla se’a ti ba tara ita daam. Israeldoma la basɛba yuun nyuuri dakpe’eŋo ge dita daam tiwɔla mɛ. Yele ana yuun daɣɛ be’em. Yelemɛŋɛrɛ, Baabule la yeti daam dela Naayinɛ bo’olum n ‘basɛ ti asaala suure nyɛɛna.’ (Ym. 104:​14, 15) La boi bim ti yele ana basɛ ti asaala puurɛ n pɛɛra ge Nazardoma la yuun pee puurɛ zaɣesɛ a mɛ. c

5. Madián la Marcela yuun ãregɛ bamea la wani ge bem zuo?

⁵ Wuu Nazardoma la, tomam me ãregeri la tomea ti to tuna zo’e zo’e bɔ’ɔra Yehowa. Geele Madián la Marcela yele la bisɛ. d Ba vom yuun ani la lumta. Madián yuun tari la tuunsonɛ ge ti ba kɛ̃’ɛra yisonɛ poan. Ge ba yuun boti la ba tum zo’e zo’e bo Yehowa. Ba san wan ta’an eŋɛ bala, la yuun dela ba eŋɛ teere. Ba yeti: “To yuun sigese ton tari ligeri da’ara lɔɣɔrɔ se’em mɛ. To yuun nyaa kɛ̃’ɛri la yipika poan ge me koose to loore.” La yuun daɣɛ pɛ̃regerɛ ti Madián la Marcela eŋɛ bala ge bamea n yuun kɔ’ɛ ba puti’irɛ bala, lan wan eŋɛ se’em ti ba ta’an tum zo’e zo’e bo Yehowa. Ba basɛ ti ban tari sɛla la seke ba mɛ ge ti ba puurɛ pee la ban kɔ’ɛ ba puti’irɛ se’em la.

6. Beni n sɔi ti zina beere wa Kristakɔma ãregera bamea? (Bisɛ foote la.)

 ⁶ Zina beere wa, Yehowa nɛreba puurɛ pee mɛ la ban ãregeri bamea tuna zo’e zo’e bɔ’ɔra Yehowa la. (1 Ko. 9:​3-6) Yehowa ka pɛ̃regeri tɔ ti to ãregera tomea; yelese’a ti to dekɛ basɛ la me daɣɛ be’em. Makerɛ, mabiisi basɛba basɛ la ba tuuma la ba yɛa. Mabiisi zo’e zo’e kɔ’ɛ ba puti’irɛ ti ba kan di pɔɣeba bii ele nananawa bii ba dɔɣɛ kɔma. Basɛba me keŋɛ la zɛsɛka n eeri soŋerɛ paa ta soŋɛ, hali la san puɣum dɛna zɛ’an n zaaɛ la ba yɛa. To zo’e zo’e kɔ’ɔn ãregera la tomea se’ere n sɔi la to boti la to tuna la to paŋa za’a bɔ’ɔra Yehowa. Hon ãregeri tuna se’em bɔ’ɔra Yehowa la san zo’e bii la pɔ’ɛ mɛ woo, tara puti’irɛ ti Yehowa puurɛ pee mɛ la hon eŋɛ bala ti ho ta’an pu’usa en la.—Heb. 6:10.

TIREGƐ EŊƐ PA’ALƐ TI HO BOI LA HO TO’ORE

7. Bem n yuun ta’an basɛ ti la kpe’em bo Nazar nɛra ti a dɔla eŋa n biŋe nɔɔrɛ se’em la? (Kanlɛ 6:5) (Bisɛ foote la.)

⁷ Kaalɛ Kanlɛ 6:5. Nazardoma la yuun biŋe nɔɔrɛ ti ba kan sie ba zuo. Bala yuun pa’alɛ ti ba kɔ’ɔn nana la Yehowa sɛla woo poan. Israel nɛra san dɛna Nazar ti la yue, a zuo zonto la ni wɔɣɛ mɛ ti nɛra san nyɛ en a ni baŋɛ eŋa n de mina. Nɛreba san bɔ’ɔra en gilema ge kpɛmesa a giila ti a dɔla eŋa n biŋe a nɔɔrɛ se’em la, la kan kpe’em bo en ti a dɛna Nazar nɛra n boi a to’ore. Ge nimbaalega la dela, saŋa ase’a Israeldoma la yuun ka eŋɛ pa’alɛ ti ba puurɛ pee mɛ la Nazardoma la ge me yuun ka soŋera ba. Nɔdɛ’ɛsa Amos saŋa la, a yelege n mea Israeldoma la yuun ‘kɔ’ɔn bɔ’ɔra Nazardoma la daam’ ti ba basɛ ti ba gãlum, ban biŋe nɔɔrɛ ti ba kan nyuura daam la. (Am 2:12) Saŋa ase’a, Nazardoma la yuun nari ti ba tara la sukpe’eŋe ta’an dɔla ban biŋe nɔɔrɛ se’em la ge eŋɛ pa’alɛ ti ba boi la ba to’ore.

8. Benjamin yele la kpemese to giila la wani?

⁸ Yehowa ta’an soŋɛ tomam me ti to dekɛ sukpe’ene eŋɛ pa’alɛ ti to boi la to to’ore hali, dabeem bii valum san tara tɔ. Geele Benjamin n de Sɛɛradaana bɔna Norway ge dɛna yuun pia la yele la bisɛ. Zaberɛ n boi Ukraine tiŋa la zuo, ba sukuu la yuun laɣesɛ mɛ ti ba eŋɛ sɛla ti la pa’alɛ ti ba soŋeri ba mɛ. Ba daa yele kɔma la ti ba yɛ ba lɔɣɔrɔ ti la wɔ̃na la Ukraine flag la ge me yuum yuunɛ bo ba. Benjamin yuun ze’ele la kinkɛleŋa lan wan eŋɛ se’em ti a kan dekɛ amea pa’asɛ  ba poan. Ge a tikiya la yuun nyɛ en mɛ ge nyabegɛ yeti: “Wa’an kalam na pa’asɛ to poan. To za’a guri ho mɛ!” Benjamin yuun dekɛ la sukpe’ene tɔɣɛ pa’alɛ a tikiya la yeti: “Mam ka laɣum pa’asɛ yele ana poan. Mam me ka boti n laɣum pa’asɛ nalɛɣɛrɛ yɛla poan. Ba paɣɛ Yehowa Sɛɛradoma zo’e zo’e mɛ ban ka dekɛ bamea pa’asɛ zaberɛ poan la zuo.” Tikiya la yuun sakɛ Benjamin n yele se’em la mɛ ge yele en ti a da dekɛ amea pa’asɛ bim. Ge a kilaasi tadaandoma la daa sokere en la sɛla n sɔi ti a ka laɣum pa’asɛ ba poan. Benjamin daa gɔɣeri mɛ ti a gee fii la a kaasɛ. Ge a yuun dekɛ la sukpe’ene tɔɣɛ bo a kilaasi tadaandoma la za’a eŋa n yele a tikiya la sɛla la. Pooren, Benjamin yuun yele a dɔɣereba ti eŋa bisɛ ti Yehowa n soŋɛ en ti a ta’an tɔɣɛ a sakerɛ yɛla.  

9. To wan eŋɛ la wani ta’an basɛ ti Yehowa puurɛ pee?

⁹ Tomam n boti to tum Yehowa puti’irɛ n boti sɛla la zuo, to boi la to to’ore. La dela to tara sukpe’ene ta’an basɛ ti to sukuu tadaandoma bii to tuuma tadaandoma baŋɛ ti to dela Yehowa Sɛɛradoma. Ge tingɔŋɔ la halɛ, la ba sareŋɔ n gaam be’ero se’em la ta’an basɛ ti la kpe’em bo to ti to tara Baabule naresum yɛla tuna tuuma ge me tɔɣera yelesoma la bɔ’ɔra nɛreba. (2 Tim. 1:8; 3:13) Kɔ’ɔn tɛ̃ra saŋa woo ti, to san tara sukpe’ene ge bɔna to to’ore, bala wan ‘basɛ ti Yehowa puurɛ pee.’—Mag. 27:11; Ma. 3:18.

BASƐ TI YEHOWA DƐNA YIA HO VOM POAN

10. Sodeni poan ti la yuun ta’an kpe’em bo Nazardoma ti ba dɔla nɔɔrɛ la n boi Kanlɛ 6:​6, 7 la?

¹⁰ Kaalɛ Kanlɛ 6:​6, 7. Nazardoma yuun ka lɛni kum. Ho ta’an ti’isa ti wana wa daɣɛ yele. Ge Baabule saŋa la, Nazardoma la yuun bisɛ ti yeledena wa karegɛ mɛ yele yele wuu ba suɔ san ki. Sankaŋa la, nɛreba yuun nari ti ba ze’a lɛm kum la, kuurɛ poan.(Yon 19:​39, 40; Tm. 9:​36-40) Nazardoma n yuun biŋe nɔɔrɛ se’em la zuo ba yuun kan ta’an dɔla malema wa. Hali a yire nɛra san ki, Nazar nɛra wan kelum ze’a kankaŋi tara sakerɛ dɔla a nɔbiŋere la. Yehowa yuun soŋɛ nɛrebana n tari sakerɛ la mɛ ti ba ta’an ŋmibe yeledaaŋɔ ana poan.

11. Kristabia nari ti a kɔ’ɛ puti’irɛ eŋɛ la bem la san dɛna deodoma yɛla? (Bisɛ foote la.)

¹¹ Ton kã tomea bo Yehowa la dela  ninmɔ’ɔrɛ yele bɔ’ɔra tomam Kristakɔma. Wana wa ni basɛ ti to kɔ’ɛ to puti’irɛ soŋa ge eŋɛ sɛla n wan soŋɛ to deodoma. To ni mɔ’ɛ la nini bisa to deodoma ge to ka basɛ ti to deodoma yɛla gana Yehowa n boti to eŋɛ sɛla la. (Mt. 10:​35-37; 1 Tim. 5:8) Saŋa ase’a, la ta’an dɛna la to ãregɛ tomea basɛ ti suma’asum bɔna tomam la to suurɔ tiŋasuka lan wan eŋɛ se’em ti to basɛ ti Yehowa puurɛ pee.

12. Alexandru n yuun maalɛ a deo poan yeledaaŋɔ la, bem ti a yuun eŋɛ ge bem ti a yuun ka eŋɛ?

¹² Geele Alexandru la a pɔɣa Dorina yele la bisɛ. Nɛra la a pɔɣa wa n yuun zamesɛ Baabule la yuunɛ la, Dorina yuun pisegɛ basɛ mɛ ge yuun bɔta ti Alexandru me basɛ. Ge Alexandru yuun doose la yɛm sore poan yele en yeti a kan basɛ. Dorina puurɛ yuun ka pee ge yuun tiregɛ ti a pɛ̃regɛ en ti a basɛ zamesegɔ la. Alexandru yuun boti la a bɔkɛ sɛla n sɔi ti a pɔɣa la ita bala ge la yuun daɣɛ naana. Saŋa ase’a, Dorina ni zɛregera en mɛ ge tãsera en ti la yuun ana en wuu a basɛ Baabule zamesegɔ la. Ge Alexandru yuun kelum tiregera mɛ basɛ ti Yehowa dɛna yia ge me tara nɔŋerɛ la gilema bɔ’ɔra a pɔɣa. Ba’asegɔ poan, a makesonɛ la zuo, a pɔɣa yuun le pɔsɛ zamesa Baabule la mɛ ge nyaa ta muse ko’om.—Bisɛ jw.org vidiyo la zuo n de Alexandru La Dorina Văcar: “Nɔŋerɛ Tari La Sugeri La Itisoŋɔ.”

13. To wan eŋɛ la wani tara nɔŋerɛ bɔ’ɔra Yehowa la to deodoma?

¹³ Yehowa n basɛ ti deodoma bɔna ge me bɔta ti ba tara pupeelum. (Ep. 3:​14, 15) To san sirum bɔta ti to tara pupeelum, la nari ti to ita yɛla wuu Yehowa n boti se’em la. Tara suure lua ti Yehowa puurɛ pee mɛ la hon ãregeri homea bisa ho deodoma ge nɔŋɛ ba se’em la.—Arom 12:10.

KPƐMESA TAABA GIILA TA’AN ANA WUU NAZARDOMA LA

14. Bani n nari ti to tiregɛ kpɛmesa ba giila?

¹⁴ Zina beere wa, sɛba n boti ba pu’usa Yehowa soŋa la nari ti ba ãregera bamea ge tara nɔŋerɛ bɔ’ɔra en. Saŋa ase’a la ni kpe’em mɛ ti to eŋɛ bala. Ge to wan eŋɛ la wani ta’an soŋɛ taaba ge ãregera tomea bɔ’ɔra Yehowa? La dela to kpɛmesa taaba giila. (Yob 16:5) Mabiisi boi ho tansugere la poan tiregera ti ba basɛ ti ba vom ana naana, lan wan eŋɛ se’em ti ba ta’an tum zo’e zo’e bo Yehowa? Hon mi bunbilipaalesi ti hali la kpe’em bo ba ge ti ba tara sukpe’ene bɔna ba to’ore sukuu  poan? Hon mi Baabule zamesegɔdoma la mabiisi basɛba ti ba deodoma yaɛ ba ge ti ba kelum tara sakerɛ? Kɔ’ɔn lu ho suure ti ho wan kpɛmesa nɛrebana wa giila ti la pa’alɛ ti ho puurɛ pee mɛ la ban ãregeri bamea ge tara sukpe’ene se’em la.—Flm. 4, 5, 7.

15. Mabiisi basɛba soŋeri sɛba n boi tɛm woo na’am tuuma poan la wani?

¹⁵ Saŋa ase’a, to ta’an ni eŋɛ sɛla soŋɛ mabiisi n tuni tɛm woo na’am tuuma la. (Mag. 19:17; Heb. 13:16) Mabipɔka ayima n kuregɛ bɔna Sri Lanka daa boti a eŋɛ la bala. Ba yuun pa’asɛ la a pension ligeri, ti a bɔta ti a soŋɛ mabipɔɣesa’ara bayi ti ba kelum tuna na’am mɔɔlegɔ tuuma la, bɔŋa la n yuun kpe’em bo ba la zuo. Ŋmarega woo a ni dekɛ la laɣahɔ bo ba ti ba toe soŋɛ bamea. Bisɛ mabipɔka wa n tari putɛsonɛ se’em!

16. To wan ta’an zamesɛ la bem Nazardoma yele la poan?

¹⁶ To wan ta’an sirum zamesɛ yɛla zo’e zo’e Nazardoma la yele la poan. Ge Nazardoma la n yuun biŋe nɔɔrɛ tuna ba tuuma la se’em la pa’alɛ to la to saazuo sɔ Yehowa n ani se’em. A mi ti to boti la to eŋɛ sɛla n wan basɛ ti a puurɛ pee ge me bɔta ti to ãregera tomea vɔna vom sebo n makɛ la ton kã tomea bo en se’em la. A na’asɛ to mɛ ge me bo to yɔ’ɔ ti to ta’an eŋɛ pa’alɛ ti to nɔŋɛ en mɛ. (Mag. 23:​15, 16; Mr. 10:​28-30; 1 Yo. 4:19) Nazardoma n yuun biŋe nɔɔrɛ se’em la pa’alɛ ti Yehowa nyɛ ton ãregeri tomea se’em la mɛ ge ti a puurɛ me pee la ton tuni se’em la. Bala la, basɛ ya ti to kɔ’ɔn lu to suure pu’usa Yehowa la to paŋa za’a.