MWAZI G’OKUYIGA 7
OLWIMPO 51 Rhwachihanire Emwa Mungu!
Bichi Rhwakayiga Kugerera Omufano gw’Abanaziri?
“Ali muchesibwa wa Yehova omu siku zage zoshi z’Obunaziri.”—HES. 6:8.
EBIRHWAYIGA
Rhwabona okuntu omufano gw’Abanaziri gwakarhurhabala rhukolere Yehova n’omurhima gwinja n’obushiru.
1. Ingeso zihe zinja abakozi ba Yehova bayerekene kurhenga mira?
K’OZIGIRE Yehova bwenene si? Nechi! Kandi omenye okw’arhali wenyine wemuzigiire. Kurhenga mira, bantu banene baliri bachiyunva okuntu oli wachiyunva. (Zb. 104:33, 34) Banene balichihanire yi bakolera Yehova. Kweri ntyo kw’Abanaziri bamira balijirire. Abanaziri bali bantu banyabachi, na bichi omufano gwabo gwakarhuyigiriza?
2. a) Abanaziri baliri bantu nyabachi? (Hesabu 6:1, 2) b) Bulagurhe Baizraeli baguma balichishogere kujira echilagane ch’Obunaziri?
2 Ezino “Munaziri” lirhengere omu chinwa che Chiebrania “Muntu wachishogerwe,” “Waheberwe eburhambi,” changwa “Wachihanire kukola akasi k’akamaro.” Abanaziri baliri ba Izraeli b’obushiru baliri bayemera bachiyime bintu bilebe yibagala kolera Yehova omu njira eli kwagokwago. Esheriya ya Musa yaliyemerere ok’omulume changwa omukazi akahanire echilagane ch’okukolera Yehova, omu kuchishoga kulama akalamo k’Obunaziri mu mango malebe. a (Osome Hesabu 6:1, 2.) Amango omw’Izraeli akajirire echilagane ch’Obunaziri, hali ebintu arhakachijirire abandi Baizraeli bagendaga bajira. Bobola si, bulagurhe omw’Izraeli akachishogere kujira echilagane ch’Obunaziri? Echaliri chashunika omw’Izraeli oli nk’oyola, bwaliri buzigire bunene aligwerhe ku Yehova n’eshukrani erhengere oku murhima oku migisho minene minja amuhere.—Kum. 6:5; 16:17.
3. Munjira ehe abantu ba Mungu zene bali kuguma n’Abanaziri?
3 Amango “Esheriya ya Kristu ekula” Esheriya ya Musa, abantu ba Mungu barhakachijirire Echilagane ch’Obunaziri. (Gal. 6:2; Ro. 10:4) Aliko, kuguma n’Abanaziri, zene abantu ba Yehova bali bagenderera kuyerekana nyorha nene y’okukolera Yehova n’omurhima gwabo goshi, n’omubiri gwabo goshi, n’obwenge bwabo boshi, n’emisi yabo yoshi. (Mk. 12:30) Rhunajira echilagane ch’okukolera Yehova oku bulonza, akalamo kerhu koshi. Yirhulama kuguma n’echola chilagane, rhukwanene kujira obulonza bwa Yehova n’okujira ebi rhwakachiyima y’irhumukolera. Oku rhuli rhwaganira okuntu Abanaziri balilamire kuguma n’echilagane chabo, rhwakayiga binene oku bilolere okuntu rhwakalama nk’oku rhwalaganyize Yehova. b (Mt. 16:24) Leka rhuganire ku mifano milebe.
OBE TAYARI KUJIRA EBI WAKACHIYIMA
4. Nk’ok’olwandiko lwa Hesabu 6:3, 4 luderhere, bintu bihe Abanaziri baliri bachiyima?
4 Osome Hesabu 6:3, 4. Abanaziri barhaliyemererwe kunywa amavu n’okulya ebilyo, nk’emizabibu mibishi changwa eyumire. Abantu balibazungulukire balisimire kulya ebilyo bili nk’ebyola na ntachibazo balibwene omu kubilya. Ebiblia ederhere oku “edivayi enashagalusya omurhima g’omuntu” lunali luhembo lurhengere emwa Mungu. (Zb. 104:14, 15) Chiro akaba okw’ebyola bintu byakasimisize abantu omu kalamo kabo, Abanaziri bowe balikwanene kuchilanga kw’ebyola byoshi oku bulonza. c
Oli tayari kuchihana oku bulonza kuguma n’Abanaziri? (Olole echifungo cha 4-6)
5. Bichi Madián na Marcela bowe bonyine balichishogere kujira, na bulagurhe?
5 Kuguma n’Abanaziri, nerhu rhunachiyima bintu bilebe yirhukolera Yehova koshi rhwakagala. Rhuganire oku mufano gwa mwene-werhu Madián na mwali-werhu Marcela. d Oyola mulume n’omukazi b’Abakristu balibagwerhe akalamo kakwirire. Madián aligwerhe akasi kenja banaligwerhe enju ekwirire bwenene. Aliko bali balonzeze bakole binene omu kasi ka Yehova. Yibahikira ogola muhigo, bachishoga kuhindamula bintu bilebe. Baderhere ntya: “Rhwahwanza kulama na furanga zigeke, rhwarhenga omunju yerhu rhwahamira omu kaju kageke, rhwaguza n’omutugari gwerhu.” Intaye walishunikire Madián na Marcela bajire ebyola byoshi, aliko balichishogere kujirantyo bulala balibalonzeze kukola binene omu kasi ka Yehova. Zene bali bachiyunva batoshekere banagwerhe obusime eju y’ezola simikiro.
6. Bulagurhe zene Abakristu bali bachiyima bintu bilebe? (Olole n’efoto.)
6 Abantu ba Yehova zene, bali bachiyunva bagwerhe obusime b’okuchiyima bintu bilebe yibakola binene omu kasi ka Yehova. (1 Ko. 9:3-6) Yehova arharhuhemere mpu rhuchiyime bintu bilebe; n’ebintu rhwakaleka arhali mp’okwenge bili bintu bibi. Omufano, bantu balebe bali baleka oku bulonza ebintu basimire nk’akasi kabo, enju zabo, chiro n’ebirhungano byabo basima. Banene bachishogere kuleka kushaba, n’abandi banashaba aliko eyi barhaburha abana. Abandi bachishogere kuja kukolera ahali obulagirire bw’abahubiri banene, chiro akaba oku bibahemere kuja kulama hale n’abera babo n’abantu b’omu milala yabo. Banene mu rhwabo, rhwalekere bintu binene oku bulonza bulala rhulonzeze kuhereza Yehova ebintu byerhu by’akachiro kanene. Ochizere oku Yehova ali abona byoshi wajirire oku bili byakachiro, bibe binene changwa bigeke omu kumukolera.—Ebr. 6:10.
OBE TAYARI KUYEREKANA OK’ORHALI KUGUMA N’ABANDI
7. Bulagurhe nkabaga byakakomerere Omunaziri kuyeneza echilagane chage? (Hesabu 6:5) (Olole n’efoto.)
7 Osome Hesabu 6:5. Abanaziri balichigashire oku barhakagembesa enviri zabo. Eyola yali njira eyerekene oku bakengere Yehova loshi. Amango Omuizraeli akachishogere kuba munaziri mu mango manene, enviri zage zanaleha n’echola chanarhabala abandi babone ok’oyola ali Munaziri. Ey’abantu bakakengere Omunaziri n’okumuheba omurhima, ebyola byakamurhabere agenderere kulanga echilagane chage, n’echola chakarhabere arhabaga kuguma n’abandi. Aliko, echokugayisa, haly’amango omu ngani y’Abaizraeli, Abanaziri barhaliri bakengwa changwa kuhabwa oburhabale. Omu mango m’omulebi Amosi, Abaizraeli b’ebigamba “baliri bagenderera kuhereza Abanaziri edivayi y’okunywa,” eyi bagwerhe omuhigo g’okulonza bavune echilagane chabo ch’okurhanywa edivayi. (Amo. 2:12) Agandi mango, Abanaziri balikenere obushiru bunene bwenene yibagenderera kukenga echilagane chabo n’okugenderera kurhaba kuguma n’abandi.
Omunaziri walikengere echilagane chage aliri tayari kurhaba kuguma n’abandi bantu (Olole echifungo cha 7)
8. Gurhe ebi Benjamin agereremo bikuhebere omurhima?
8 Kugerera oburhabale bwa Yehova, rhwakagwarha obushiru n’okurhaba kuguma n’abandi, chiro akaba, rhuli bantu b’eshoni, changwa b’ambohomboho by’akaburhano. Rhuganire oku mufano gwa mwene-werhu Benjamin wa myaka 10 olamire omu chihugo che Norvege. Eju y’evita liri omu Ukraine, amasomo mabo malihamukire eju y’okuyerekana oku bashigikire abantu b’omu Ukraine. Balihemere abana bayimpe olwimpo eyi bayambere emishangi egwerhe erangi lye drapo y’echihugo che Ukraine. Aliko, y’agala kuchilanga kw’echola chihe chikomere, Benjamin ayorha ayimangire hale n’ahantu ebyola byaliri byajirikira. Aliko, mwalimu wage amubona amuhamagala n’omulenge: “Okwanene kuyinja, rhweshi yirhwakulinga!” Benjamin ayegera mwalimu wage n’obushiru amubwira ntya: “Ntaba kulunda lulebe, ntachiheba omu by’epolitike n’omu by’okuhamuka. Aliko, Bahamirizi ba Yehova banene bali omu pirizo eju y’okulahira kulwa evita.” Mwalimu wage ayemera amafasiriyo amuhere, anamubwira okw’arhashibaga ayinja kw’echola chihe. Aliko, abanasoma nabo barhondera kumubaza bulagurhe arhaliyinjire haguma nabo. Benjamin ayubaha bwenene ava arhondera kulaka; aliko oku bushiru av’abwira abanasomanabo byoshi abwiraga mwalimu wage. Buzinda, Benjamin abwira abazere bage oku Yehova amurhabere aderhere obwemere bwage.
9. Gurhe rhwakajira yirhusimisa omurhima gwa Yehova?
9 Bulala rhwachishogere kukenga Yehova, abarhuzungulukire banabona oku rhurhali kuguma nabo. Rhukenere kugwarha obushiru b’okubwira aba rhunakola nabo, n’aba rhunasomanabo oku rhuli Bahamirizi ba Yehova. Kandi, okw’engeso n’olugenzi lw’abantu ba linola gulu libi, bili byagenderera kubiha n’okubiha bwenene, ku rhwanabona oku bikomere bwenene kulama nk’okw’amakanuni ma Yehova maderhere n’okuhubiri emyazi minja oku bandi. (2 Ti. 1:8; 3:13) Rhuyibuke oku “rhunaba eyi rhuli rhwasimisa omurhima gwa [Yehova]” amango moshi rhurhali kuguma n’abantu barhamukolera.—Mez. 27:11; Mal. 3:18.
OHEBE YEHOVA OKU NAFASI Y’OBURHANZI OMU KALAMO KAWE
10. Gurhe oku kulikiza erhegeko liri omu lwandiko lwa Hesabu 6:6, 7 byakageregeze Abanaziri?
10 Osome Hesabu 6:6, 7. Omunaziri arhalikwanene kuyegera omubiri g’omuntu wafire. Nkabaga oku burhanzi wakawaza oku, okurhahika ah’omuntu afire chirhali chintu chikomere. Aliko amango Ebiblia yayandikwaga nkabaga chakabere chigeregezo chikomere bwenene oku Munaziri okufisa omuntu w’omu mulala. Emigenzo y’okuhamba yamw’agola mango, yaliheberemo okuba hofi n’omubiri g’omuntu wafire. (Yoh. 19:39, 40; Mdo. 9:36-40) Aliko, echilagane ch’Obunaziri chirhakamuzigire akulikira eyola migenzo. Chiro n’amango m’ebibazo bikomere by’omu mulala omu mango m’echiliyo, Abanaziri bakayerekene obwemere bukomere omu kugenderera kulanga echilagane chabo. Kweri, Yehova alikomeze abola bantu bemana baliri bamuharamya, balwise ebibazo bili nk’ebyola bikomere.
11. Bichi Omukristu akwanene kujira amango ali arhola esimikiro zilolere omulala? (Olole n’efoto.)
11 Rhwabo nka Bakristu, rhunabona okw’echilagane cherhu ch’okuchihana emwa Yehova chili ch’akamaro bwenene. Echola chinahuma oku simikiro n’ebijiro byerhu oku bilolere ebibazo by’omulala. Rhunakola bwenene omu kushishikala eby’omulala gwerhu gukenere, rhurhaheba eby’omulala gwerhu gukenere oku fasi y’oburhanzi mpu yirhuleka kujira ebi Yehova arhuhemere. (Mt. 10:35-37; 1 Ti. 5:8) Mango maguma, esimikiro zerhu zirhakasimisa abantu b’omulala gwerhu, aliko zanasimisa Yehova.
Oli tayari kuheba obulonza bwa Yehova oku nafasi y’oburhanzi chiro n’omu bihe bikomere bwenene si? (Olole echifungo che 11) e
12. Amango Alexandru aliri ahurana ebibazo by’omulala bichi alijirire na bichi arhajiraga?
12 Rhuganire oku bi mwene-werhu Alexandru na mukage Dorina bageragamo. Bamalire mwaka muguma eyi bali bayiga Ebiblia, mwali-werhu Dorina achishoga kuleka kuyiyiga, analilonzeze n’eba Alexandru naye abileke. Aliko, Alexandru abwira mukage oku bwirhonzi oku yewe agenderera kuyiga. Dorina arhalisimire, analijirire okw’agalire koshi yamubuza kuyiga. Alexandru aderhere okw’alirhegerere bichi birhumire mukage achiyunva ntyo, aliko birhalimuyorohere. Mango maguma eyi Dorina amuderhaga kubi, n’okumubulira obukenge bwenene aliri ayunva nk’aleke kuyiga Ebiblia. Aliko, Alexandru agenderera kuheba Yehova oku nafasi y’oburhanzi, analigenderere kuyereka mukage obuzigire bunene n’obukenge. Aliko, kugerera omufano gwage gwinja, mukage ashuba kuhwanza kuyiga Ebiblia n’okubuzinda ayinja kubatizwa.—Olole oku site yerhu ya jw.org e video Alexandru na Dorina Văcar: “Obuzigire Bunalembera Buba mu n’Obwinja” oje omu chigabi evideo zenkulikirane “Okuli Yikwahindamula Akalamo k’Abantu.”
13. Nka gurhe rhwakayereka Yehova obuzigire n’abantu b’omulala gwerhu?
13 Yehova yiwalemaga omulala analonzeze rhugwarhe obusime omu mulala. (Efe. 3:14, 15) Akaba rhulonzeze rhugwarhe obusime b’okuli, birhuhemere rhujire obulonza bwa Yehova. Ochizere oku Yehova ali asimiswa n’eby’oli wajira y’omukolera, n’okushishikala omulala gwawe oku buzigire n’obukenge.—Ro. 12:10.
RHUHEBANE OMURHIMA BULI MUGUMA N’OWINDI RHUBE KUGUMA N’ABANAZIRI
14. Bande ahanene rhukwanene kuchihangana kuheba omurhima kugerera ebinwa byerhu?
14 Boshi bachishogere kukolera Yehova zene, bakwanene kushunikwa n’obuzigire yibachiyima bintu bilebe omu kumukolera. Hali amango, birhaba biyorohere okujirantyo. Gurhe rhwakarhabalana buli mango yirhugenderera kukolera Yehova? Rhwakarhabalana omu kuhebana omurhima kugerera ebinwa byerhu. (Yob. 16:5) Ka hali abantu bali omu chibaga chenyu bali bachihangana kuyorohya akalamo kabo yibakola binene omu kasi ka Yehova? Hali eyenyu misole omenyere eli yajira koshi egalire omu kurhayiga engeso zibi z’eyabo misole oku masomo, chiro byakaba bibakomerere kujira ntyo? Gurhe si oku banafunzi be Biblia n’abandi Bahamirizi bali bajira okwabo koshi yibagenderera kubera bemana chiro akaba emilala yabo eli yabapinga? Ochiheberhe h’omuhigo g’okubaheba omurhima, n’oku babwira kangana gurhe ebi bali bajira yibakolera Yehova bili byakuheba omurhima.—Flm. 4, 5, 7.
15. Gurhe bantu baguma barhabere balala bali omu kasi k’amango moshi?
15 Mango maguma, nkabaga rhwakaha bene-berhu b’Abakristu bali bakolera Yehova omu kasi k’amango moshi oburhabale bw’ebintu bakenere. (Mez. 19:17; Ebr. 13:16) Ebyola bi mwali-werhu okala ashajire olamire omu chihugo che Sri Lanka alilonzeze ajire. Amango bamuyongezeza efuranga zage ze pansiyo, alonza kurhabala bali-berhu babiri b’abapainiya chiro akaba oku haliri echibula ch’efuranga. Bobola oyola mwali-werhu achishoga kugenda ahana furanga zilebe buli mwezi, omu kurhabala abola bali-berhu balipire etelefone zabo. Oyola mwali-werhu aligwerhe omurhima gwinja!
16. Bichi rhwakayiga kugerera omupango gw’Abanaziri b’omu mango ma mira?
16 Kweri rhwakayiga bintu binene kugerera omufano gwinja gw’okuchihana gw’Abanaziri ba mira! Aliko kandi, ogola mupango gw’Abanaziri gwakarhuyigiriza chintu chilebe oku bilolere Darha w’embingu, Yehova. Amenyere oku rhulonzeze kujira ebi rhwakachiyima oku bulonza yirhulama kuguma n’echilagane cherhu ch’okuchihaana emwage. Yehova anarhuyereka obukenge omu kurhuha orozo l’okuchishoga kumuyereka obuzigire bwerhu. (Mez. 23:15, 16; Mk. 10:28-30; 1 Yo. 4:19) Omupango gw’Abanaziri gurhuyerekere oku Yehova anabona byoshi rhunachiyima, kandi okw’arhuzigiire eju y’ebirhunamukolera. Rhujage rhwahigirira kugenderera kukolera Yehova n’okumuhereza ebinja kulusha omu birhugwerhe.
GURHE WAKASHUBIZA?
-
Mu njira zihe Abanaziri balichihaniremo bowe bonyine n’okuyerekana obushiru?
-
Nka gurhe zene rhwakahebana omurhima buli muguma n’owindi omu kuyerekana omurhima guli kuguma n’ogw’Abanaziri?
-
Bichi omupango gwa Yehova gubishwire oku bilolere obwizere agwerhe oku banamuharamya?
OLWIMPO 124 Bemana Esiku Zoshi
a Chiro akaba oku Yehova alichishogere bantu balebe babe Banaziri, byakashobokana oku banene mubo baliri Baizraeli bachishogaga bonyine kukola nka Banaziri mu mango malebe.—Olole echisanduku “ Abanaziri Bachishogagwa na Yehova.”
b Mango maguma, ebitabu byerhu binahuzanya Abanaziri n’abantu bali bakolera Yehova omu kasi k’amango moshi. Aliko, mu gunola mwazi, rhwachiseza oku njira buli mukozi wachihaanire emwa Yehova akayerekanamo omurhima guli kuguma n’ogw’Abanaziri.
c Ahanene, birhalihemere Omunaziri agwarhe ezindi ngabane, nk’okukola amandi makasi olekere okuyeneza echilagane chage ch’Obunaziri.
d Olole oku jw.org omwazi guderhere “Tuliamua Kufanya Maisha Yetu Ikuwe Mwepesi” (Rhwali Chishogere Kuyorohya Akalamo Kerhu) omu chigabi “Ushuhuda wa Mashahidi wa Yehova.” (Eby’Abahamirizi ba Yehova Bagereremo.)
e AMAFASIRIYO M’EFOTO: Omunaziri akalolere abantu bali baja kuhamba omuntu muzigirwa w’omu mulala gwage ey’ali oku etaje. Omu kugenderera kulanga echilagane chage, arhakajire ah’abali bahamba.
