1. Idaunega amo Iehova ena hesiai taudia be dahaka kara namona idia hahedinaraia?

 IEHOVA ida emu hetura karana oi laloa bada, a? Oibe! Bona oi sibona lasi. Idaunega amo taunimanima momo be unai bamona idia mamia danu. (Sal. 104:​33, 34) Momo be Iehova idia hesiai henia totona gau haida idia dadaraia. Idaunegai Israela ai Nasiri taudia be unai bamona idia karaia. Idia be daidia bona edia haheitalai amo dahaka ita dibaia?

2. (a) Nasiri taudia be daidia? (Numera 6:​1, 2) (b) Dahaka dainai Israela taudia haida be Nasiri taudia ai idia lao?

² Heberu gado ai inai hereva, “Nasiri Tauna” ena anina be “Idia Makaia Tauna,” “Hapararaia Tauna,” eiava “Gwauhamatalaia Tauna.” Unai hereva ese ia hahedinaraia Nasiri tauna be mai ura bada ida sibona ena ura gaudia ia dadaraia unai amo Iehova ia hesiai henia diba. Mose ena taravatu ese maoro ia henia tau eiava hahine ta be Iehova dekenai gwauhamata ia karaia, nega sisina lalonai Nasiri tauna ai ia lao totona. a (Numera 6:​1, 2 duahia.) Ta be Nasiri tauna ena gwauhamata ia karaia neganai, do ia badinaia hakaua dalana be Israela taudia amo ia idau. Dahaka dainai Israela tauna be gwauhamata ia karaia Nasiri tauna ai ia lao totona? Reana unai ia karaia badina Iehova ia lalokau henia bada bona Ia henia hahenamo  idauidau dainai ena lalokau karana ia ura hahedinaraia.—Deu. 6:5; 16:17.

3. Edena dala ai hari Dirava ena taunimanima be Nasiri taudia hegeregerena?

³ “Keriso ena taravatu” ese Mose ena taravatu ena gabu ia abia neganai, Nasiri taudia ai lao karana ia doko. (Gal. 6:2; Roma 10:4) To Nasiri taudia bamona, hari Iehova ena taunimanima be mai kudouna, mauri, lalona, bona goada ibounai ida Dirava idia hesiai henia. (Mar. 12:30) Unai ita karaia dalana be mai ura ida gwauhamata ita karaia, unai amo Iehova dekenai sibona ita henia Ia ita hesiai henia totona. Unai gwauhamata ita badinaia totona, sibona iseda ura gaudia ita dadaraia bona Iehova ena ura ita karaia. Nasiri taudia ese edia gwauhamata idia badinaia dalana ita herevalaia lalonai, ita do ia durua iseda gwauhamata ita badinaia totona. b (Mat. 16:24) Mani haheitalai haida ita herevalaia.

GAU HAIDA OI DADARAIA

4. Numera 6:​3, 4 hegeregerena, Nasiri tauna be mai ura ida dahaka gaudia ia dadaraia?

⁴ Numera 6:​3, 4 duahia. Nasiri tauna be alkahol bona vain huahua amo idia karaia gaudia, hegeregere greips bona idia kaukau greips do ia dadaraia. Ia badinai idia noho taudia be unai bamona aniani idia moalelaia, bona unai be kerere lasi. Badina Baibel ia gwau “lalona ia hamoalea wain,” be Dirava ena harihari gauna. (Sal. 104:​14, 15) Ena be Nasiri taudia be unai gaudia idia moalelaia diba to mai ura ida unai idia dadaraia. c

5. Madián bona Marcela be dahaka gaudia idia dadaraia, bona dahaka dainai?

⁵ Nasiri taudia bamona ita danu iseda ura gaudia ita dadaraia diba, Iehova ena hesiai gaukara ita habadaia totona. Madián bona Marcela edia haheitalai mani ita laloa. Unai headava tau bona hahine be taga maurina idia noholaia. Madián be moni gaukara namona ia karaia dainai, ruma namona dekenai idia noho. To, idia ura Iehova ena hesiai gaukara dekenai nega bada idia atoa. Unai tahua gauna idia hagugurua totona, senisi haida idia karaia. Idia gwau: “Emai moni ai gaukaralaia namonamo totona gau momo ai hoia lasi, ruma maragina ta ai hoia bona emai motuka ai hoihoilaia.” Madián bona Marcela be unai abia hidi idia karaia badina idia ura edia hesiai  gaukara idia habadaia. Bona idia karaia abia hidi dainai idia moale.

6. Dahaka dainai hari Keristani taudia be gau haida idia dadaraia? (Laulau itaia danu.)

⁶ Hari Iehova ena taunimanima be mai moale ida gau haida idia dadaraia, unai amo nega bada idia atoa Iehova idia hesiai henia totona. (1 Kor. 9:​3-6) Iehova be ita ia doria lasi iseda ura gaudia ita dadaraia totona ena be unai gaudia be kerere lasi. Hegeregere, haida be edia moni gaukara namona eiava ruma idia rakatania. Bona momo be abia hidi idia karaia do idia headava haraga lasi eiava idia headava murinai natudia do idia havaraia lasi. Haida be abia hidi idia karaia pablisa momo lasi gabudiai edia hesiai gaukara idia karaia, ena be edia famili bona turadia do idia rakatania. Ita momo be mai ura ida unai bamona ita karaia badina ita ura, Iehova ena hesiai gaukara lalonai nega bada ita atoa. Namona be oi diba Iehova hesiai henia totona, oi karaia abia hidi badadia eiava maragidia ia laloa bada.—Heb. 6:10.

MAI URA IDA MA HAIDA AMO OI IDAU

7. Dahaka dainai Nasiri tauna be ena gwauhamata ia badinaia be mai ena hekwarahi? (Numera 6:5) (Laulau itaia danu.)

⁷ Numera 6:5 duahia. Nasiri tauna be ia gwauhamata ena huina do ia utua lasi. Unai amo ia hahedinaraia Iehova ia badinaia momokani. Israela tauna be nega daudau lalonai Nasiri tauna bamona ia noho neganai, ena huina do ia lata bona haida be unai do idia itaia. Bema ena turadia bona varavara ese ia karaia gwauhamata idia matauraia bona hagoadaia, do ia auka lasi Nasiri tauna bamona ia noho totona. To idaunegai Israela ai, nega haida Nasiri tauna idia matauraia lasi eiava durua lasi. Peroveta tauna Amosa ena nega ai, Israela dekenai aposteit taudia ese ‘Nasiri taudia dekenai wain idia henia noho idia inua totona,’ unai amo wain inua lasi ena gwauhamata do idia makohia. (Amo. 2:12) Nasiri taudia be edia gwauhamata idia badinaia totona idia gini goada be namo, unai amo ma haida amo do idia idau.

8. Edena dala ai Benjamin ena ekspiriens ese oi ia hagoadaia?

⁸ Iehova ena heduru amo ita danu be ma haida amo ita idau diba, ena be ita hemarai, eiava ita gari. Norway ai mauri lagani 10 merona ladana Benjamin, ena haheitalai mani ita laloa. Ukraine ai ia vara tuari dainai ena sikuli ai gau ta idia karaia unai taudia idia durua totona. Stiuden idia hamaoroa Ukraine ena fleg ena kala dabua do idia karaia bona ena bese anena do idia abia. Benjamin ia ura lasi bese abia isi karana lalonai ia vareai, unai dainai  sibona ia hapararaia bona daudau dekenai ia gini. To tisa ta ese ia itaia bona ia boiboi: “Ai ibounai be oi ai naria noho!” Benjamin be mai gari lasi ida tisa dekenai ia lao bona ia gwau: “Lau be gavamani gwau-edeede henia karadia dekenai lau vareai lasi. Bona Iehova ena Witnes taudia momo be tuari lalonai idia vareai lasi dainai, dibura ruma dekenai idia atodia.” Ena tisa ese iena hereva ia abia dae bona ia hamaoroa idia do ia bamoa lasi. To ena klas turadia be ia idia nanadaia dahaka dainai idia ia bamoa lasi. Benjamin be ia gari dikadika bona kahirakahira ia tai, to ena tisa dekenai ia gwauraia herevana be idia dekenai ia herevalaia. Gabeai, Benjamin ese ena tama sina ia hamaoroa, ia mamia Iehova ese ia durua dainai iena abidadama ia gwauraia hedinarai.

9. Edena dala ai Iehova ena kudouna ita hamoalea diba?

⁹ Iseda lalona ita hadaia ita ura Iehova ita badinaia dainai, ita be ma haida amo ita idau. Namona be mai gari lasi ida iseda gaukara eiava sikuli turadia ita hamaoroa ita be Iehova ena Witnes taudia. Inai tanobada ai taunimanima edia kara be ia dika ia lao noho, unai dainai do ia auka Baibel ena hakaua herevadia ita badinaia bona ma haida dekenai sivarai namona ita harorolaia. (2 Tim. 1:8; 3:13) To laloatao, mai gari lasi ida inai tanobada taudia amo ita idau neganai, “[Iehova] ena kudouna ita hamoalea”.—Aon. 27:11; Mal. 3:18.

IEHOVA ENA URA OI ATOA GUNA

10. Edena dala ai Numera 6:​6, 7 ai ia noho oda herevana be Nasiri taudia ?

¹⁰ Numera 6:​6, 7 duahia. Nasiri taudia be mase tauna kahirakahira do idia lao lasi. Baibel negadiai, Nasiri tauna dekenai unai be auka, bema iena varavara ta ia mase. Edia kastom dekenai, mase tauanina idia guria totona, taunimanima be ia badinai do idia noho. (Ioa. 19:​39, 40; Kara 9:​36-40) To Nasiri tauna ese unai kastom do ia badinaia lasi. Ena be ena ruma bese taudia be idia lalohisihisi noho, to Nasiri tauna be mai abidadama ida ena gwauhamata do ia badinaia. Momokani, Iehova ese unai abidadama taudia ia hagoadaia unai bamona hekwakwanai idia haheaukalaia totona.

11. Ruma bese lalonai Keristani tauna ese abia hidi ta ia karaia neganai, dahaka gaudia ia laloa be namo? (Laulau itaia danu.)

¹¹ Keristani taudia ese Iehova dekenai idia karaia gwauhamata be mai anina bada. Unai dainai ruma bese lalonai, ita karaia abia hidi  bona iseda kara do ita laloa namonamo. Ita gaukara goada iseda ruma bese edia dabu gaudia ita henia totona, to namo lasi edia ura ita atoa guna dainai Iehova ena ura do ita karaia lasi. (Mat. 10:​35-37; 1 Tim. 5:8) Nega haida ita karaia abia hidi dainai, iseda varavara do idia moale lasi, to ita ura Iehova ita hamoalea.

12. Alexandru be ena ruma bese lalonai ia vara hekwakwanai dainai, dahaka ia karaia bona dahaka ia karaia lasi?

¹² Mani Alexandru bona ena adavana, Dorina, edia ekspiriens ita laloa. Idia ruaosi be lagani ta lalonai Baibel idia stadilaia murinai, Dorina be ena stadi ia hadokoa, bona ia ura Alexandru danu be unai bamona do ia karaia. To, Alexandru ese mai aonega bona gado namo ida ia hamaoroa ena stadi do ia karaia noho. Dorina be ia moale lasi bona ia doria ena stadi ia hadokoa totona. Alexandru ia gwau, ia ura laloparara dahaka dainai ena adavana be unai bamona ia karaia, to unai be ia auka. Nega haida, Dorina ese ia gwauraia dika bona ia hereva auka henia neganai, ia ura ena stadi ia hadokoa. Alexandru be Iehova ena ura ia atoa guna, bona danu ena adavana dekenai lalokau bona hemataurai ia hahedinaraia. Ena haheitalai namona dainai, adavana be Baibel stadi ia hamatamaia lou, bona gabeai bapatiso ia abia.—Iseda websait jw.org ai series henunai “Truth Transforms Lives” ena kahanai, vidio ladana, Alexandru Bona Dorina Văcar: “Lalokau be Ia Haheauka Bona Ia Hebogahisi” itaia.

13. Edena dala ai Iehova bona iseda famili dekenai lalokau ita hahedinaraia diba?

¹³ Iehova ese famili ia havaraia, bona ia ura idia moale. (Efe. 3:​14, 15) Bema ita ura ita moale, namona be Iehova ena dala ita badinaia. Namona be oi diba, sibona emu ura oi dadaraia bona Iehova oi hesiai henia lalonai, emu ruma bese oi naria bona idia dekenai lalokau bona hemataurai oi hahedinaraia karana be Iehova ese ia laloa bada.—Roma 12:10.

NASIRI TAUDIA UMUI TOHOTOHOA

14. Iseda hereva amo daidia do ita hagoadaia?

¹⁴ Hari Iehova idia ura tomadiho henia taudia ese mai ura ida gau haida idia dadaraia, badina ia idia lalokau henia. Nega haida unai idia karaia be mai ena hekwarahi. To edena dala ai ta ta do ita durua unai ita karaia totona? Iseda hagoadaia herevadia amo unai ita karaia diba. (Iobu 16:5) Emu kongrigeisen ai, haida be kohu momo lasi mauri idia ura noholaia unai amo edia hesiai gaukara do idia habadaia, a? Eiava matamata taudia haida be sikuli gabunai, edia abidadama dainai ma haida  amo idia idau, ena be ia auka, a? Baibel stiuden bona tadikaka taihu haida be edia famili ese idia dagedage henia dainai, idia gini goada totona idia hekwarahi, a? Namona be oi gaukara goada idia oi hagoadaia, bona idia oi hamaoroa mai gari lasi ida Iehova ena ura idia atoa guna dainai idia oi laloa bada.—File. 4, 5, 7.

15. Edena dala ai haida ese ful-taim hesiai gaukara idia karaia taudia idia durua?

¹⁵ Nega haida, reana gau haida ita karaia ful-taim hesiai gaukara idia karaia tadikaka taihu ita durua totona. (Aon. 19:17; Heb. 13:16) Sri Lanka ai ia noho taihu burukana ta be ia ura unai bamona ia karaia. Ena pensen monina idia habadaia dainai, ia ura painia taihu matamata rua ia durua edia haroro gaukara do idia karaia noho, badina taihu rua be moni dalanai idia dabu. Unai dainai hua ta ta ai, idia ia durua edia telefon bil ia hoia totona. Unai taihu be kara namona ia karaia!

16. Idaunegai Nasiri taudia amo dahaka ita dibaia?

¹⁶ Idaunegai Nasiri taudia ese idia hahedinaraia haheitalai namona amo gau momo ita dibaia! To danu, Nasiri taudia edia gwauhamata amo iseda guba Tamana, Iehova dekenai gau ta ita dibaia. Ia diba ita ura ia ita hamoalea, bona mai ura ida gau haida ita dadaraia iseda gwauhamata ita badinaia totona. Ia ese ita ia matauraia dainai dala ia kehoa abia hidi ita karaia unai amo ia dekenai iseda lalokau ita hahedinaraia totona. (Aon. 23:​15, 16; Mar. 10:​28-30; 1 Ioa. 4:19) Nasiri taudia ese idia badinaia dalana amo ia hahedinaraia Iehova be iseda ura gaudia ita dadaraia karana ia itaia bona ita ia lalokau henia. Unai dainai iseda lalona ita hadaia, mai ura bada ida iseda nega bona goada ita atoa Iehova ita hesiai henia totona.