1. Ongaro iṋe ombwa ovakarere va Jehova ndji va raisa momakuruhungi?

 HAPO ove wa suvera Jehova tjinene? Otjingaperi. Nu kaove erike. Okuza koruveze orukuru, ovandu ovengi va suverere Jehova momuano tjingewo. (Eps. 104:​33, 34) Ovandu ovengi va tjita ozongondjero okurikotamena ku Jehova. Nu iho otjiṋa Ovanasirei mu Israel otjikuru tjaave tjiti. Owo va ri ovangendu, nu matu yenene okurihongera ko ye kotjihorera tjawo?

2. (a) Ovanasirei va ri ovangendu? (Numeri 6:​1, 2) (b) Omena raye Ovaisrael tjiva tjaave toorora okurira Ovanasirei?

² Embo ndi “Omunasirei” ra za kembo rOtjiheberi ndi heya “omundu ngwa panguka ku varwe,” “omundu ngwa toororwa,” poo “omundu ngwe riyandja omuini.” Ovanasirei va ri Ovaisrael ovapyuke mbe riyandjerere oveni okukarera Jehova momuano wapeke. Omatwako wa Moses aaye yandjere omurumendu poo omukazendu okutjita oruyano rwapeke ku Jehova mokutoorora okuhupa otjOmunasirei oure woruveze kaaṋi. a (Lesa Numeri 6:​1, 2.) Indu Omuisrael tja tjiti oruyano otjOmunasirei, eye aa sokukongorera omirari Ovaisrael varwe mbyaave ha hepa okukongorera. Nu hapo omena raye Omuisrael tjaa toorora okurira Omunasirei? Omuisrael ngo ngahino aa hingwa i yorusuvero ndwe na rwo ku Jehova, nondangi ku ye mena rozondaya nḓaa munu.—Deut. 6:5; 16:17.

3. Omomuano uṋe ovakarere va Mukuru mu ve ri tjimuna Ovanasirei ndino?

³ Ounasirei wa yanda indu Omatwako wa Moses tji ya pingenwa  i “etwako raKristus.” (Gal. 6:2; Rom. 10:4) Nungwari, tjimuna Ovanasirei, ovakarere va Jehova ndino ve kayenda komurungu okuraisa onḓero yokumukarera nomutima wawo auhe, nomuinyo wawo auhe, nozondunge zawo azehe, nomasa wawo ayehe. (Mar. 12:30) Eṱe tu tjita oruyano rwokumukarera indu tji matu riyandja oveni ku Jehova. Okuhupa otja koruyano ndwo, eṱe matu sokutjita ombango ya Jehova nokutjita ozongondjero zokumukarera. Otja tji matu konḓonona omuano Ovanasirei maave hupu otja koruyano rwawo, eṱe matu yenene okurihongera ko oviṋa ovinanḓengu ohunga nomuano mu matu yenene okuhupa otja koruyano rwetu. b (Mat. 16:24) Ngatu katare kovihorera tjiva.

TJITA OZONGONDJERO

4. Otja ku Numeri 6:​3, 4, ozongondjero zeṋe Ovanasirei nḓu va tjita?

⁴ Lesa Numeri 6:​3, 4. Ovanasirei kaave yandjerwa okunwa omavinu poo okurya omandjembere nga hora poo nga kaha. Ovandu ongondoroka na wo aave ri ovikurya mbi nu katjari otjiṋa otjivi okurya ovikurya mbi. Ombeibela i tja omavinu otjiyandjewa okuza ku Mukuru nu ye “nyandisa omitima vyovandu.” (Eps. 104:​14, 15) Nandarire kutja oviṋa mbi aavi yenene okutjita kutja omundu ma yorokere ehupo, Ovanasirei va toorora okuhinokurya nokunwa oviṋa mbi. c

5. Madián na Marcela va toorora okutjita ozongondjero zeṋe, nu ongwaye?

⁵ Tjimuna Ovanasirei, eṱe wina tu tjita ozongondjero okukarera Jehova okuura. Tara kotjihorera tja Madián na Marcela. d Ovakupasane Ovakriste mba va ri nehupo ewa. Madián wa ri noviungura oviwa nu aave tura mondjuwo ombwa. Posi ya, owo aave vanga okuungura ovingi motjiungura tja Jehova. Okuyenenisa ondando yawo ndjo, owo va tya okutjita omarundurukiro. Owo va tja: “Twa uta okuungurisa ovimariva oviṱiṱi, nu twa tjindira mondjuwo onḓiṱi naatu randisa ohauto yetu.” Madián na Marcela kaave hepa okutjita ozongondjero azehe nḓo. Posi ya, owo va toorora okuzetjita mena rokutja aave vanga okuungura ovingi motjiungura tja Jehova. Owo nai va kowa mu imbi mbi ve na vyo, nu ve nondjoroka mena romikambo mbi va toora.

6. Omena raye ovakarere va Jehova ndino tji ve tjita ozongondjero? (Wina tara kotjiperendero.)

 ⁶ Ovakarere va Jehova ndino ve nondjoroka okutjita ozongondjero kutja ve yenene okuungura ovingi motjiungura ye. (1 Kor. 9:​3-6) Jehova ka undjire ko kweṱe okutjita ozongondjero nḓa, noviṋa mbi tu isa kavivi. Otjotjihorera, tjiva ve isa ozonganda zawo, poo oviungura mbi ve vanga tjiri. Tjiva ve toorora okurira ovakombe oure woruveze orure, poo tjiva ve tya okuhinokukara novanatje oure woruveze kaaṋi kombunda yorukupo. Tjiva va toorora okukarera koṋa ku ku nouhepe wovazuvarise, nandarire kutja otjiṋa hi matji tjiti kutja ve kare kokure nomaṱunḓu wawo nomapanga. Ovengi vetu tu tjita ozongondjero nḓo, mena rokutja tu vanga okuyandja ku Jehova imbi mbi ri ovisembasemba. Tjiwa kutja Jehova u nonyuṋe tjinene mozongondjero azehe nḓu tjita okumukarera, kutja ozonene poo ozonḓiṱi.—Hebr. 6:10.

RIYANDJERA OKUPANGUKA KU VARWE

7. Ovikwaye mbi mape ya aavi tjiti kutja i rire ouzeu kOmunasirei okuṱiza oruyano rwe? (Numeri 6:5) (Wina tara kotjiperendero.)

⁷ Lesa Numeri 6:5. Ovanasirei va yana okuhinokukonda ozondjise zawo. Imbwo wa ri omuano wokuraisa kutja owo ve riwisa kehi ya Jehova. Omuisrael ngwa ri Omunasirei oure woruveze orure, mape ya varwe aave yenene okumuna ozondjise ze tji za rira ozonde tjinene. Indu varwe ongondoroka na ye tji ve mu tenga nokumutunduuza okukayenda komurungu okuṱiza oruyano rwe, aai rire oupupu kOmunasirei okukayenda komurungu okutjita nao. Posi ya otjihihamise, pe noruveze mekuruhungi rOvaisrael Ovanasirei tjaave ha pewa ondengero poo oruvara. Moruveze rwomuprofete Amos, Ovaisrael mba isa okurikotamena ku Jehova nu mbe mu pirukira aave “yandja omavinu kovanasirei okunwa,” ngahino okutjita kutja ave ha kara nonḓuviro koruyano rwawo rwokuhinokunwa omavinu. (Amos 2:12) Povikando tjiva Ovanasirei aave sokurira ozombanḓe kutja ve ṱize oruyano rwawo nokupanguka ku varwe.

8. Omomuano uṋe otjihorera tja Benjamin mu tje ku tunduuza?

⁸ Nombatero ya Jehova, eṱe wina matu yenene okurira ozombanḓe nokupanguka ku varwe, nandarire kutja tu nohoṋi. Tara kotjihorera tja Benjamin, Omuhongonone wa Jehova wozombura omurongo moNorway. Mena rovita moUkraine, oskole ye ya rongerisa otjitjitwa tjokuyandja oruvara kovandu va Ukraine. Ovanatje aave sokuimbura eimburiro ngunda va zara omuzaro werapi rehi ra Ukraine. Kutja a ha yandja oruvara kotjitjitwa  hi, Benjamin wa kakurama kokure nopoṋa pu mape tjitwa otjitjitwa hi. Posi ya, omiṱiri ye mu muna nu ai mu isana, ai tja: “Indjo, u ye ku kurama pu na eṱe. Eṱe atuhe matu ku undju.” Benjamin nouvanḓe wa ya komiṱiri nu e mu raere kutja: “Ami hi nomunda, nu ami hi kara norupa moviṋa vyopolotika. Nandarire nao, Ovahongonone va Jehova ovengi ve ri monḓorongo mena rokupanḓa okuyenda kovita.” Omiṱiri ya puratena ku Benjamin, nu ye mu raera kutja ke nokuhepa okukara norupa. Posi ya, ovahongwa ovakwao va uta okupura kutja ongwaye tja ha karere norupa. Benjamin wa urumine tjinene nga tja vanga okuuta okurira, posi ya eye nouvanḓe wa raera oklasa aihe oviṋa mbya raera komiṱiri. Kombunda, Benjamin wa karaera ovanene ve kutja wa muna kutja Jehova we mu vatera okurwira ongamburiro ye.

9. Omomuano uṋe mu matu yenene okuyorokisa omutima wa Jehova?

⁹ Mena rokutja tu toorora okukara nonḓuviro ku Jehova, varwe ve yenena okumuna kutja twa panguka ku wo. Eṱe tu hepa ouvanḓe okuraera varwe poviungura poo poskole kutja oweṱe Ovahongonone va Jehova. Nu otja ovikaro novitjitwa vyouye mbwi tji mavi yende amavi ririre ko ovivi, mape ya a rire ouzeu kweṱe okuhupa otja komirari vyOmbeibela nokuraera varwe ombuze ombwa. (2 Tim. 1:8; 3:13) Aruhe zemburuka kutja tu ‘yorokisa omutima’ wa Jehova indu tji tu ri ozombanḓe nu tji matu panguka ku imba mbe he mu karere.—Omiano 27:11; Mal. 3:18.

TWA PO JEHOVA PORUVEZE ORUTENGA MEHUPO ROYE

10. Hapo Ovanasirei atjave muna ouzeu uṋe, mokukongorera eronga ndi ri mu Numeri 6:​6, 7?

¹⁰ Lesa Numeri 6:​6, 7. Ovanasirei kaave sokuya popezu norurova. Ngahino, mape ya o munu kutja katja ri otjiṋa otjizeu okutjita. Rukuru, mape ya ya ri otjiṋa otjinene kOmunasirei, indu omuzamumwe wopopezu tja ṱu. Otja kotuzo tworuveze ndwo, potuingi ovandu kaave sokukara kokure norutu rwomuṱi. (Joh. 19:​39, 40; Oviung. 9:​36-40) Posi ya Omunasirei kaa yenene okukongorera otuzo two, mena roruyano rwe ndwa tjita. Nandarire ngunda ave ri moruhoze orunene pu neṱunḓu rawo, Ovanasirei aave raisa ongamburiro yomasa mokukongorera oruyano rwawo. Tjiri, Jehova wa zeuparisa ovakarere ve ovaṱakame okutuurunga omauzeu omanene otja ingo.

11. Hapo Omukriste ma sokurimanena okutjita ye, indu tji ma twa po ozondando meṱunḓu? (Wina tara kotjiperendero.)

 ¹¹ OtjOvakriste, eṱe tu vara omeriyandjerero wetu ku Jehova pondondo yokombanda. Oyo ye ṱuna kozondando novitjitwa vyetu meṱunḓu. Eṱe tu ungura oukukutu okuparura eṱunḓu retu, posi yokutja katu twa po ozonḓero zouṋepo weṱunḓu retu kombanda yaimbi Jehova mbye undjira kweṱe. (Mat. 10:​35-37; 1 Tim. 5:8) Povikando tjiva, tu hepa okutoora omikambo mbi hi nokutjata keṱunḓu retu, posi ya mbi mavi yorokisa Jehova.

12. Ovikwaye Alexandru mbya tjita, nu ovikwaye mbye ha tjitire indu tja ri kehi yongaro onḓeu meṱunḓu?

¹² Tara kotjihorera tja Alexandru nomukazendu we, Dorina. Kombunda yaindu tji ve rihonga Ombeibela oure wombura, Dorina wa tya okuisa okurihonga, nu aa vanga Alexandru okuisa okurihonga wina. Nungwari, momuano omuwa nomupore, Alexandru wa raera omukazendu we kutja eye ma kayenda komurungu. Dorina ka ri nohange nu wa kondja okuṋiṋikiza omurumendu we okuisa okurihonga. Alexandru wa tja eye aa kondjo okuzuva oumune womukazendu we nawa, posi ya kaa ri otjiṋa otjipupu ku ye. Povikando tjiva, indu Dorina tji me mu kwekurura nokuhungira omambo omakukutu, eye aa vanga okuisa okurihonga Ombeibela. Posi yokutja, Alexandru wa kayenda komurungu okutwa po Jehova poruveze orutenga, na wina okuraisa orusuvero nondengero komukazendu we. Mena rotjihorera tje otjiwa, Dorina wa tya okuuta okurihonga Ombeibela rukwao, nu kombunda wa papitisiwa.—Tarera okavidio nga Alexandru na Dorina Văcar: “Orusuvero ru nomuretima, ru nounyaṋutima” ko jw.org, kehi yorupa ndwi “Ouatjiri u rundurura omiinyo vyovandu.”

13. Omomuano uṋe mu matu yenene okuraisa orusuvero ku Jehova na keṱunḓu retu?

¹³ Jehova ongwa uta eṱunḓu nu u vanga kutja tu kare nondjoroka meṱunḓu. (Ef. 3:​14, 15) Indu tji matu vanga okukara nondjoroka, matu hepa okutjita imbi Jehova mbye vanga. Tjiwa kutja Jehova u vara ozongondjero nḓu mo tjiti okumukarera, ngunda amo parura nokuraisa orusuvero nondengero keṱunḓu roye.—Rom. 12:10.

TUNDUUZASANEYE OKURIRA TJIMUNA OVANASIREI

14. Oouṋe mbu matu hepa okuyanḓiparisa?

¹⁴ Avehe mba toorora okurikotamena ku Jehova ndino ve hepa okutjita ozongondjero, mena rorusuvero rwawo ku ye. Povikando tjiva, kaupupu okutjita nao. Omomuano  uṋe mu matu yenene okuvaterasana okuraisa ongaro otja indjo? Omokuyanḓiparisasana mu imbi matu hungire. (Job 16:5) Hapo pe na tjiva mombongo yeṋu mbe kondja okurundurura ehupo rawo kokutja ve yenene okuungura ovingi motjiungura tja Jehova? Hapo mo tjiwa ovanatje mbe rwira ongamburiro yawo nouvanḓe poskole, nandarire kutja ouzeu ku wo okutjita nao? Hapo mo tjiwa ovahongwa vOmbeibela poo ovakambure ovakweṋu mbe muna ouzeu okukayenda komurungu okurira ovaṱakame, mena rokupirukirwa i yomaṱunḓu wawo? Rimanena okutjita otja pu mo yenene okuveyanḓiparisa nokuveraera omuano mu nondangi kouvanḓe vawo, na ku imbi mbi ve tjitira Jehova.—Filem. 4, 5, 7.

15. Omomuano uṋe tjiva mu va vatera imba mbe ungurira Jehova oruveze aruhe?

¹⁵ Povikando tjiva, mape ya atu yenene okuvatera ovakambure ovakwetu mbe ungurira Jehova oruveze aruhe. (Omiano 19:17; Hebr. 13:16) Omukazendu omuṱakame omunene motjiwondo ngwa tura moSri Lanka wa ri nonḓero yokutjita nao. Eye wa wezirwa ovimariva vye vyoukurundu nu aa vanga okuvatera ovakazendu ovakambure vevari omitanda ovakandjira okukayenda komurungu notjiungura tjawo tjokuzuvarisa, nandarire kehi yongorongova onḓeu. Ku nao, eye wa tya okuyandja otjimariva kaaṋi omueze auhe okuvevatera okusuta ozongoze zawo zomondjuwo. Omukazendu omukambure ngo tjiri ondjandje.

16. Matu yenene okurihonga tjike okuza kOvanasirei voruveze orukuru?

¹⁶ Eṱe tjiri matu yenene okurihongera ko ovingi okuza kotjihorera otjiwa tjOvanasirei. Nungwari, oruyano rwOvanasirei wina ru tu honga otjiṋa ohunga na Tate wetu Jehova. Eye u tjiwa kutja eṱe tu vanga okumuyorokisa, nokutja tu nonḓero okutjita ozongondjero kutja tu yenenise oruyano rwetu. Eye u tu pa ondjingonekero yokutoorora omuano mu matu mu raisire orusuvero. (Omiano 23:​15, 16; Mar. 10:​28-30; 1 Joh. 4:19) Oruyano rwOvanasirei ru raisa kutja Jehova u muna ozongondjero nḓu tu tjita nu we tu suvera mena roviṋa mbi tu mu tjitira. Ku nao, ngatu rimanene okukayenda komurungu okukarera Jehova nokumuungurira otja pu matu yenene.