1. Sepemanjai sejarah, nama sifat ti manah ke udah diayanka bala penyembah Jehovah?

 KATI nuan amat rinduka Jehovah? Nuan tentu nyaut, ‘Ya!’ Lalu, nuan enda kediri. Kenyau ari kelia, mayuh orang udah ngasaika utai ti sama. (Mas. 104:​33, 34) Mayuh ari sida udah ngaga pengorbanan ngambika ulih nyembah Jehovah. Nya meh utai ke digaga orang Nasir ba jeman orang Israel. Sapa orang Nasir nya? Lalu, nama ulih dipelajarka kitai ari teladan sida?

2. (a) Sapa orang Nasir? (Penyampau 6:​1, 2) (b) Nama kebuah sekeda orang Israel milih deka nyadi orang Nasir?

² Rambai jaku “orang Nasir” datai ari jaku Hebrew ke mai reti dipilih, diseraraka, tauka diserahka kena ngereja pengawa ti spesial. Rambai jaku tu ngambarka orang Israel ti ransing ke udah ngaga sekeda pengorbanan ngambika ulih nyembah Jehovah enggau chara ti spesial. Adat Moses ngemendarka lelaki tauka indu ngaga sumpah ti spesial ngagai Jehovah. Dalam sumpah nya, sida milih deka nyadi orang Nasir pengelama sesiti timpuh. a (Bacha Penyampau 6:​1, 2.) Lebuh sesiku orang ngaga sumpah deka nyadi orang Nasir, iya patut nitihka jalai pengidup ti enda sama baka orang Israel  ke bukai. Nyadi, nama utai ke meransang sida deka nyadi orang Nasir? Nya ketegal sida amat rinduka Jehovah sereta deka ngayanka asai beterima kasihka berekat ti udah diberi Jehovah ngagai sida.​—U-dat. 6:5; 16:17.

3. Nama utai ti sama entara bala nembiak Petara kemayaharitu enggau orang Nasir ba jeman kelia?

³ Lebuh “adat Kristus” nganti Adat Moses, nembiak Petara enda ulih agi nyadi orang Nasir. (Gal. 6:2; Rom. 10:4) Taja pia, baka orang Nasir, nembiak Jehovah kemayaharitu keran deka nyembah Iya enggau pengabis ati, pengidup, runding, enggau pengering sida. (Mrk. 12:30) Lebuh kitai nyerahka diri ngagai Jehovah, kitai udah ngaga semaya deka nyembah Iya siku aja. Ngambika ulih ngamatka semaya nya, kitai patut ngereja peneka Jehovah sereta ngaga sekeda pengorbanan. Lebuh kitai beratika chara orang Nasir ngamatka sumpah sida, kitai mega deka beratika poin ti penting ke ulih nulung kitai ngamatka semaya kitai. b (Mat. 16:24) Aram kitai beratika sekeda chunto.

SANGGUP NGAGA PENGORBANAN

4. Nitihka Penyampau 6:​3, 4, nama pengorbanan ke patut digaga orang Nasir?

⁴ Bacha Penyampau 6:​3, 4. Orang Nasir patut nyeliahka diri ari semua macham ai bisa. Sida mega enda makai buah anggur enggau kismis. Tang, orang Israel ke bukai ulih ngirup ai bisa sereta makai buah anggur enggau kismis. Utai tu enda salah. Bup Kudus madahka, wain nya pemeri ari Petara sereta ‘kena kitai ngelantangka diri.’ (Mas. 104:​14, 15) Nyadi, taja pan semua utai tu ulih mai pengelantang ngagai pengidup sida, tang orang Nasir sanggup ngelengkaka semua utai nya. c

5. Nama pengorbanan ke digaga Madián enggau Marcela, lalu nama kebuah seduai iya ngereja nya?

⁵ Baka orang Nasir, kitai mega ngaga pengorbanan ngambika ulih ngereja mayuh agi ke Jehovah. Peratika teladan Madián enggau Marcela. d Seduai iya bisi pengidup ti nyamai. Madián bisi kereja ti manah, lalu seduai iya diau ba rumah ti selesa. Taja pia, seduai iya deka ngereja mayuh agi ke Jehovah. Kena nyapai juluk ati nya, seduai iya ngaga sekeda ubah. Seduai iya madah: “Kami ngurangka belanja. Kami mega pindah ngagai rumah  ke mit agi, lalu nyual kerita kami.” Kebendar iya, Madián enggau Marcela enda ibuh ngaga pengorbanan tu. Tang seduai iya sanggup ngaga ubah tu ketegal deka ngereja mayuh agi ke Jehovah. Seduai iya berasai puas ati sereta gaga ati ketegal udah ngaga pemutus nya.

6. Nama kebuah orang Kristian kemayaharitu ngaga pengorbanan? (Peda mega gambar.)

⁶ Orang Kristian kemayaharitu gaga ati laban ulih ngaga pengorbanan. Ketegal nya, sida ulih ngereja mayuh agi ke Jehovah. (1 Kor. 9:​3-6) Jehovah nadai kala minta kitai ngaga pengorbanan nya. Sekeda utai ke dilengkaka kitai mega enda salah. Ambika chunto, sekeda orang milih enda meli rumah, enda nupi jelu, tauka enda milih kereja ti amat dikedekaka sida. Bisi mega milih enda kawin dulu, tauka enti sida udah kawin pan, sida engka milih enda berumban bisi anak. Ke bukai milih deka nulung ba endur ke begunaka mayuh agi penginjil, taja pan tu reti iya sida patut diau jauh ari bala kaban sereta diri sebilik. Mayuh ari kitai sanggup ngaga pengorbanan ke baka nya laban kitai deka meri Jehovah utai ti pemadu manah. Andal meh, Jehovah beterima kasihka semua pengorbanan ke digaga nuan ngambika ulih nyembah Iya, enda ngira sekalika pengorbanan nya besai tauka mit.​—Heb. 6:10.

ANANG TAKUT ENTI NUAN BEBIDA ARI ORANG BUKAI

7. Nama utai ke ngasuh orang Nasir tusah deka ngamatka sumpah iya? (Penyampau 6:5) (Peda mega gambar.)

⁷ Bacha Penyampau 6:5. Siti ari sumpah ke digaga orang Nasir, iya nya sida enda tau beguntin. Enggau ngereja nya, sida nunjukka diri tunduk ngagai Jehovah enggau pengabis ati. Enti sesiku orang Israel nyadi orang Nasir ba timpuh ti lama, buk iya tentu panjai. Lalu orang bukai senang beratika nya. Iya senang agi nyadi orang Nasir enti orang ke ngelingi iya bebasaka iya, sereta meransang iya terus ngamatka sumpah iya. Taja pia, bisi maya iya ba sejarah orang Israel, orang Nasir enda dipebasa tauka nerima sukung. Maya jeman Nabi Amos, orang Israel ke limpang sereta ngelaban Petara ‘mejal orang Nasir ngirup wain.’ Tu engka ketegal sida dekaka orang Nasir ngelanggar sumpah sida ke patut nyeliahka diri ari ngirup wain. (Amo. 2:12) Nya meh maya iya orang Nasir patut nyadi berani ngambika ulih ngamatka sumpah sida, lalu nyadi bebida ari orang bukai.

8. Nama utai ti meransang nuan ari pengalaman Benjamin?

⁸ Enggau tulung ari Jehovah, kitai enda takut nyadi bebida ari orang bukai, taja pan kitai orang ti pemalu. Peratika pengalaman Benjamin, siku Saksi ke beumur 10 taun  ari Norway. Ketegal perang ke nyadi ba Ukraine, sekula iya ngatur siti acara kena nunjukka sukung sida ngagai orang ba Ukraine. Bala murid diasuh belagu sereta begari ngena warna kebangsaan menua Ukraine. Kena nyeliahka diri ari acara tu, Benjamin bediri jauh ari endur alai acara tu dipejalaika. Tang bisi siku cikgu ke meda iya, lalu ngangau iya enggau inggar: “Datai kitu. Semua kami nganti nuan!” Benjamin enggau berani mansang ngagai cikgu nya lalu madah: “Aku neutral lalu aku enda enggau pengawa ke bisi kaul enggau politik. Kebendar iya, mayuh ari Saksi-Saksi Jehovah dijil laban sida enggai enggau beperang.” Cikgu nya nerima utai ku Benjamin lalu madahka iya enda ibuh enggau acara nya. Taja pia, kaban ke sekelas enggau iya nanya Benjamin nama kebuah iya enda enggau sida. Benjamin amat takut, lalu nyauka nyabak. Tang iya enggau berani ngulang baru utai ke udah disebut iya ngagai cikgu. Pengudah nya, Benjamin madah ngagai apai indai iya, iya ulih ngasaika tulung ari Jehovah kena ngetanka pengarap iya.

9. Baka ni kitai ulih ngelantangka ati Jehovah?

⁹ Ketegal kitai milih deka ngasika Jehovah, orang bukai ulih beratika kitai bebida ari sida. Kitai begunaka pemerani kena madah ngagai orang ba endur gawa tauka ba sekula, kitai siku ari Saksi-Saksi Jehovah. Lalu ketegal ulah orang ba dunya tu majak jai-sejai, kitai engka ngasaika tusah agi deka idup nitihka prinsip Bup Kudus, sereta bekunsika Berita Manah ngagai orang bukai. (2 Tim. 1:8; 3:13) Tang seruran ingat, “[Jehovah] deka lantang ati” enti kitai enda takut nyadi bebida ari orang ke enda nyembah Iya.​—J-lam. 27:11; Mal. 3:18.

KENULUKA JEHOVAH BA PENGIDUP NUAN

10. Baka ni pesan ba Penyampau 6:​6, 7 ulih nyadi penguji ke orang Nasir?

¹⁰ Bacha Penyampau 6:​6, 7. Orang Nasir enda tau datai semak ngagai bangkai orang ke udah mati. Nuan engka ngumbai tu ukai pengorbanan ti besai. Tang ba jeman Bup Kudus, tu siti penguji ti besai ke orang Nasir lebuh diri sebilik sida mati. Nitihka adat ba maya nya, orang patut semak enggau bangkai orang ke udah mati. (Jhn. 19:​39, 40; SKR. 9:​36-40) Taja pia, orang Nasir enda ulih nitihka adat nya. Taja pan ba maya nya orang Nasir balat tusah ati ketegal lenyau orang ti dikesayau, tang iya ngayanka pengarap ti tegap  enggau ngamatka sumpah iya. Jehovah tentu udah ngeringka sida ke tetap ati tu ngambika ulih tan napi situasi ti tusah nya.

11. Nama patut digaga orang Kristian lebuh ngaga pemutus ke bisi kaul enggau diri sebilik? (Peda mega gambar.)

¹¹ Kitai ngemeratka semaya ke udah digaga kitai enggau Jehovah lebuh kitai nyerahka diri ngagai Iya. Nama kesan semaya tu ngagai pemutus ke digaga bekaul enggau diri sebilik? Endang amat, kitai patut bebendar gawa kena ngintu utai ke diguna diri sebilik. Tang, kitai enggai sekali-kali ngenuluka pengingin diri sebilik lebih agi ari peneka Jehovah. (Mat. 10:​35-37; 1 Tim. 5:8) Kekadang, pemutus ke digaga kitai enda ngagaka ati kaban belayan, tang pemutus nya deka ngagaka ati Jehovah.

12. Lebuh napi situasi ti mencabar ba ruang bilik, nama utai ke digaga Alexandru? Nama utai ke enda digaga iya?

¹² Peratika pengalaman Alexandru enggau bini iya, Dorina. Pengudah seduai iya belajarka Bup Kudus pengelama setaun, Dorina mutuska deka badu belajar. Iya mega dekaka Alexandru badu belajar. Tang, enggau manah sereta tenang, Alexandru madahka iya deka terus belajar. Dorina enda gaga ati lalu mejal laki iya badu belajar. Alexandru madahka, iya nguji meretika asai ati bini iya, tang nya enda senang ba iya. Bisi maya iya, lebuh Dorina ngutuk iya sereta nyebut utai ti kasar, Alexandru ngasaika deka badu agi belajar. Taja pia, Alexandru terus ngenuluka Jehovah, lalu ba maya ti sama, ngayanka pengerindu sereta basa ngagai bini iya. Ketegal teladan manah Alexandru, bini iya berengkah belajarka Bup Kudus baru, lalu udah nya dibaptisa.—Peda video Alexandru enggau Dorina Văcar: “Pengerindu nya Liat Ati enggau Nelap” ba siri “Pemendar Ngubah Pengidup” ba jw.org.

13. Baka ni kitai ulih ngayanka pengerindu ngagai Jehovah sereta ngagai diri sebilik?

¹³ Jehovah ngepunka atur ruang bilik, lalu Iya dekaka kitai bisi ruang bilik ti gaga ati. (Eps. 3:​14, 15) Nyadi, enti kitai dekaka pengaga ati ti bendar, kitai patut ngereja utai nitihka chara Jehovah. Andal meh Jehovah beterima kasihka pengorbanan ti digaga nuan ngambika ulih nyembah Iya, lalu ba maya ti sama, nyaga ruang bilik nuan sereta ngintu sida enggau bepengerindu sereta basa.​—Rom. 12:10.

PERANSANG MEH PANGAN DIRI NGAMBIKA ULIH NYADI BAKA ORANG NASIR

14. Sapa kelebih agi begunaka jaku peransang ari kitai?

¹⁴ Semua orang ke nyembah Jehovah patut sedia ngelengkaka sekeda utai. Sida ngereja  nya ketegal sida rinduka Jehovah. Taja pia, utai nya enda selalu senang dikereja. Baka ni kitai ulih nulung pangan diri ngereja nya? Kitai ulih meri jaku peransang ngagai sida. (Jop 16:5) Kati bisi bala menyadi ba raban gempuru nuan ke ngelengkaka sekeda utai ngambika ulih ngereja mayuh agi ke Jehovah? Kati nuan ngelala bala nembiak ke enggau berani nyadi bebida ari orang ba sekula, taja pan nya enda senang ba sida? Lalu, kati bisi pemelajar Bup Kudus sereta bala menyadi ke benung disakal diri sebilik lalu bebendar deka mengkang tetap ati ngagai Jehovah? Enti bisi, bebendar meh meransang sida, lalu muji sida ketegal pemerani sereta pengorbanan ke digaga sida ke Jehovah.​—Plm. 4, 5, 7.

15. Baka ni sekeda menyadi nyukung menyadi ke gawa penuh jam ke Jehovah?

¹⁵ Kekadang, kitai ulih meri tulung ngagai bala menyadi ke gawa penuh jam ke Jehovah. (J-lam. 19:17; Heb. 13:16) Nya meh utai ti keran digaga siku menyadi indu ke tuai, ke diau ba Sri Lanka. Duit pinchin ke diterima iya bisi nambah. Nyadi, iya ngena duit pinchin ti lebih nya nulung dua iku menyadi indu ti biak ngambika seduai iya ulih terus ngerintis, taja pan seduai iya napi penanggul ba duit. Nya alai, ninting bulan, iya nulung seduai iya mayar bil talipun. Menyadi indu ke tuai nya ngayanka sifat ti manah ke patut dipuji!

16. Nama ulih dipelajarka kitai ari orang Nasir ba jeman kelia?

¹⁶ Kitai ulih belajar mayuh ari teladan manah orang Nasir kelia menya. Taja pia, sumpah ke digaga orang Nasir mega ngajar kitai sekeda utai pasal Apai kitai, Jehovah. Iya nemu, kitai keran deka ngelantangka ati Iya. Iya mega nemu, kitai sanggup ngaga pengorbanan ngambika ulih ngamatka semaya kitai. Lalu Iya bebasaka kitai lebuh Iya nejuka kitai milih chara kitai deka ngayanka pengerindu ngagai Iya. (J-lam. 23:​15, 16; Mrk. 10:​28-30; 1 Jhn. 4:19) Atur orang Nasir nunjukka Jehovah beratika pengorbanan ke digaga kitai, lalu Iya menghargai pengorbanan ke digaga kitai ngambika ulih nyembah Iya. Aram meh kitai terus nyembah Jehovah lalu meri utai ti pemadu manah ngagai Iya!