1. Anni i makasta nga kukukuan na maddayaw ira kani Jehova namegafu paga tagga?

 TAGIBALORAMMU kari i relasiommu kani Jehova? Siguradu nga wan! Ari laman tu sikaw i kunnatun. Namegafu paga tagga, napakaru nga totolay i kunnatun gapa i natageno da. (Sal. 104:​33, 34) Aru ta nira i nassakrifisio tapenu medayaw si Jehova. Kunnatun i kingngua na Nazareo ira ta Israel tagga. Sinni ira, anna anni i magigiammu tam ta ehemplo da?

2. (a) Sinni i Nazareo ira? (Numeros 6:​1, 2) (b) Ngatta ikaya na karuan nga Israelita i mabbalin tu Nazareo?

² Naggafu i uvovug nga “Nazareo” ta Hebreo nga termino nga kebalinan na “Tadday nga Napili,” “Tadday nga Nesina,” onu “Tadday nga Nededika.” Fustu laman nga maddeskriba yaw nga termino ta matalikarag ira nga Israelita nga nangngua tu nerumu-ruma anna personal ira nga sakrifisio tapenu mapasserbian si Jehova. Ta Mosaiko nga Dob, puede nga itabba na tadday nga lalaki onu babay kani Jehova nga mabbalin yayya tu Nazareo ta unag na piga nga tiempo. a (Bibbigan i Numeros 6:​1, 2.) Nu kuan na tadday nga Israelita yatun nga espesial nga tabba, egga ira i dob nga mawag nga tuttulan na nga ari mabba mawag nga tuttulan na karuan nga Israelita. Ngatta gapa ikaya na nga kuan yatun? Siguradu nga megafu ta dakal nga aya na kani Jehova anna napafutuan nga pappabalo  na ta napakaru nga bendision na ira.—Deut. 6:5; 16:17.

3. Kunnasi nga negitta i totolay na Dios sangawe ta Nazareo ira tagga?

³ Neyemmang i unnug na Nazareo turi ta sinalian na “dob ni Cristo” i Mosaiko nga Dob. (Gal. 6:2; Roma 10:4) Sangawe, ipasingan na totolay ni Jehova nga kakayà da yayya nga passerbian ta interu futu, kararua, nono, anna sikan, kagitta na Nazareo ira. (Mar. 12:30) Sigga-paran nga nangngua ittam tu tabba kani Jehova turi ta naddedika ittam ta nisa. Tapenu makapattolay segun tatun nga tabba, mawag tu kuattam i uray ni Jehova anna massakrifisio ittam. Durante nga gigiammuattam i pinattolay na Nazareo ira segun ta tabba da, makagigiammu ittam gapa nu kunnasi ittam makapattolay segun ta tabba tam. b (Mat. 16:24) Gigiammuattam i karuan nga angngarigan.

SIGGA-PARAN NGA MASSAKRIFISIO

4. Base ta Numeros 6:​3, 4, anni i mawag nga isakrifisio na Nazareo ira?

⁴ Bibbigan i Numeros 6:​3, 4. Mawag nga ibita na Nazareo ira i ngamin nga klase na binarayang anna makan ira nga naggafu ta fun na ubas, kagitta na frutas mismu natun anna pasas. Kanayun nga kuman i totolay ira ta pallevu da tu kunnatun ira nga makan anna awan mabba tu marake tatun. Deskriban gapa na Biblia nga i ‘binarayang ay mamagayayya ta totolay’ anna regalu yatun maggafu ta Dios. (Sal. 104:​14, 15) Ngem sigga-paran nga ibita na Nazareo ira danatun. c

5. Anni ira i nisakrifisio da Madián anna Marcela, anna ngatta?

⁵ Kagitta na Nazareo ira, egga gapa ira i isakrifisio tam tapenu mas makapasserbi ittam kani Jehova. Ikonsidera tam i ekspiriensa ni Madián anna Marcela. d Makasta i pattolay naw nga magatawa. Atannang i sueldu ni Madián yari tu makapaddian ira ta mangina nga apartment. Ngem ikaya da nga mas aru i makua da ta passerbi kani Jehova. Tapenu makua yatun, nappasimple ira. Istoriadda: “Binawasammi i paggastuammi. Nagali kami ta mas baddi nga apartment anna nilaku mi i takemi.” Ari nga obligadu nga kuan ni Madián  anna Marcela yatun ira nga sakrifisio. Ngem pinili da nga kuan yatun tapenu mas aru i makua da ta passerbi kani Jehova. Kontentu ira anna magayayya ta desisiodda ira.

6. Ngatta massassakrifisio i Cristiano ira sangawe? (Innan gapa i letratu.)

⁶ Magayayya i totolay ira ni Jehova sangawe nga massakrifisio tapenu mas aru i tiempo da nga masserbi ta nisa. (1 Cor. 9:​3-6) Ari ittam obligan ni Jehova nga kuan danatun. Awan gapa tu marake ta gannug ira nga nisakrifisio tam. Angngarigan na, pinanawan na karuan i makasta nga trabahu da, i baleda, onu maski i alaga da nga ayam. Aru gapa i naddisidi nga ari labbi nga mangatawa, makitawa, onu makka-ana. Nabboluntariu gapa i karuan nu sitaw mas dakal i pakawagan, maski nu meyarayyu ira ta kokkofun anna kafamilia da. Aru ta nittam i sigga-paran nga massakrifisio megafu ta ikaya tam nga iyawa i kapianattam para kani Jehova. Ari tam nakuan kattaman nga kuruga tagibaloran ni Jehova i maski anni nga isakrifisio tam, dakal man yatun onu baddi.—Heb. 6:10.

MABBALIN TU MAGUTU MASKI NU NERUMA

7. Ngatta awayya na tu narigatan i tadday nga Nazareo nga tuppalan i tabba na? (Numeros 6:5) (Innan gapa i letratu.)

⁷ Bibbigan i Numeros 6:5. Nitabba na Nazareo ira nga ari ira mappagappo tu vu da. Pangipasingan yatun tu nalanna-lanno nga pakimoreda kani Jehova. Nu nabayag ngana nga Nazareo i tadday nga lalaki nga Israelita, magga apaddu ngana i vu na anna mabi laman nga mapansin yatun na tanakuan. Nu irespeto na tanakuan i tadday nga Nazareo anna pagarammadda yayya nga tuttulan i tabba na, mabi laman para nisa nga mabbalin tu neruma. Ngem kaddaraddam ta egga ira i tiempo ta Israel gari nga ari da nga nirespeto anna sinuportan i Nazareo ira. Ta tiempo ni profeta Amos, i apostata ira nga Israelita ay ‘ari nagimmang nga penuman tu binarayang i Nazareo ira.’ Magga kingngua da yatun tapenu ari nga matuppal na Nazareo ira i tabba da nga ari vuluvuga minum tu binarayang. (Amos 2:12) Awayya na tu egga ira i tiempo nga kawagan na tadday nga Nazareo i gutu tapenu makua na i tabba na anna mabbalin tu neruma ta tanakuan.

8. Kunnasi ka napagaram ta ekspiriensa ni Benjamin?

⁸ Ta uffun ni Jehova, megutu tam gapa i mabbalin tu neruma maski paga nu minappasiran ittam. Kunnatun i mafulu-anios nga si Benjamin nga taga-Norway. Megafu ta gerra ta Ukraine, nangorganisa i eskuela da tu programa bilang passuporta ta totolay na Ukraine. Nekiddaw ta ngamin nga abbing nga makkansion habang agga-yosa da i kolor ira nga mangirepresenta ta Ukraine. Tapenu  malillitan i pakipartisipa ta nationalistiko nga programa, naddian si Benjamin ta arayyu. Ngem nasingan yayya na mestra na anna nakkulle nga inagalan na yayya: “Umay ka ngana taw! Ganguri daka paga nga iinnaggan!” Magutu nga minaranni si Benjamin ta mestra na anna kinagi na: “Neutral ngà Ma’am anna ari ngà makisali ta programa ira nga megafu ta pulitika. Aru lagu Ma’am i Saksi ira ni Jehova nga agga-fuku megafu ta ari da kayà i makiggerra.” Nantindian na mestra i kinagi na anna ni-excuse na si Benjamin. Ngem nakkiavu i classmate na ira nu ngatta ari yayya nakisali. Maggudu-gudu si Benjamin anna maggi paga yayya nakatangi, ngem magutu nga niyistoria na ta interu klase i kinagi na ta mestra na. Kabalin na yatun, inistoria ni Benjamin ta magana na nga natageno na nga inuffunan yayya ni Jehova tapenu medefensa i pangurug na.

9. Kunnasi tam mapagayayya i futu ni Jehova?

⁹ Megafu ta pinili tam nga tuttulan si Jehova, magga mapansin na tanakuan nga neruma ittam ta nira. Kawagattam i gutu tapenu ikagi ta pattrabahuan onu ta eskuela nga Saksi ittam ni Jehova. Durante nga mas marrake i ugali anna kondukta na totolay ta mundo, magga mas marigatan ittam nga mattolay segun ta prinsipio ira na Biblia anna ilayyagayya i mapia nga dumug. (2 Tim. 1:8; 3:13) Ngem daddammattam nakuan nga ‘mapagayayya tam i futu ni Jehova’ nu mabbalin ittam tu magutu maski nu neruma ittam tari ira ta ari nga massesserbi ta nisa.—Prov. 27:11; Mal. 3:18.

PAGOLLUAN KANAYUN SI JEHOVA TA PATTOLEM

10. Ngatta awayya na nga marigatan i tadday nga Nazareo nga tuttulan i dob ta Numeros 6:​6, 7?

¹⁰ Bibbigan i Numeros 6:​6, 7. Ari puede nga umaranni i Nazareo ira ta natay. Awayya na tu nonopattam nga ari mabba tu dakal nga sakrifisio yaw. Ngem awayya na tu marigatan i tadday nga Nazareo nu kafamilia onu parientes na i natay. Ta tiempo gare na Biblia, ikiddaw na kostumbre ta tarag nga mawag tu aranni i totolay ta baggi na minatay da. (Juan 19:​39, 40; King. 9:​36-40) Ngem nu Nazareo i tadday, ari na nga matuttul yatun nga kostumbre. Maski gafu ta tiempo na fermi nga paddaddam na familia na Nazareo ira, mangipasingan ira tu masikan nga pangurug gukaban na pattuttul ta tabba da. Magga pinasikan ni Jehova yaw ira nga matalo nga aripan na  tapenu makapagattam ira taw nga mariga ira nga situasion.

11. Anni nakuan i determinadu nga kuan na tadday nga Cristiano nu maddesision meyannung ta familia? (Innan gapa i letratu.)

¹¹ Bilang Cristiano, serioso ittam ta tabba na dedikasiottam kani Jehova. Afektan gafu natun i desision anna i kukukuattam ta unag na familia. Mattrabahu ittam tu fermi tapenu meyawa i pakawagan na familia tam. Ngem ari tam nakuan pagolluan i ikaya na kafamilia tam anne ta uray ni Jehova. (Mat. 10:​35-37; 1 Tim. 5:8) Nu karuan, tapenu mapagayayya tam si Jehova, egga i desision nga kuattam nga kontra ta kayà na parientes tam.

12. Ta mariga nga situasion na familia, anni i kingngua ni Alexandru, anna anni i ari na nga kingngua?

¹² Innattam i ekspiriensa ni Alexandru anna i atawa na nga si Dorina. Kabalin na tanga-ragun nga pappa-Bible study da, nadisidi ni Dorina nga magimmang anna ikaya na gapa tu magimmang si Alexandru. Ngem kalmadu anna masippo nga kinagi ni Alexandru nga itulu-tuloy na lapa i paggigiammu. Ari nga nagustuan ni Dorina yatun, yari tu pinurueban na nga fersan si Alexandru nga iyemmang i pappa-Bible study. Kinagi ni Alexandru nga nikaguman na nga alippawatan i mataga-tageno na atawa na, ngem narigatan gapa yayya. Nu mittan, popporyan yayya ni Dorina anna mataki-taki i abbibida na. Yari tu manono na nu karuan nga iyemmang i pappa-Bible study. Ngem pinagollu kanayun ni Alexandru si Jehova. Tulu-tuloy gapa nga iniddu anna nirespeto na i atawa na. Turi kua, megafu ta makasta nga ehemplo na, nappa-Bible study uli si Dorina tapus nappa-baptize balaman.—Innan ta jw.org i video nga Alexandru anna Dorina Văcar: “I Aya ay Pappasensia Anna Pagallo” ta serye nga “Ulian na Kinakurug i Pattolay.”

13. Kunnasi tam mepasingan nga ayatattam si Jehova anna i familia tam?

¹³ Si Jehova i nangiyunnug ta familia, yayya nga ikaya na tu magayayya i familia tam. (Efe. 3:​14, 15) Nu ikaya tam i mabbalin tu kurug nga magayayya, mawag tu tuttulattam si Jehova. Ari mu nakuan nga paddudan nga tagibaloran ni Jehova i sakrifisiom ira tapenu medayaw yayya durante nga tangngallan, ayatan, anna irespeto i familiam.—Roma 12:10.

PAGARAMMAN I KATAGGI-TADDAY NGA PARIGAN I NAZAREO IRA

14. Sinni nakuan i pagarammattam ta kakkagiattam?

¹⁴ Aya nakuan i mamaguyu ta ngamin nga maddayaw kani Jehova tapenu sigga-paran nga massakrifisio. Nu karuan, ari tu mabi yatun.  Kunnasi tam moffunan i kataggi-tadday tapenu makapassakrifisio para kani Jehova? Makapagaram nakuan i kakkagiattam. (Job 16:5) Egga kari i kakongregasiommu nga mangikakkaguman nga pasimpleyan i pattoleda tapenu mas makapasserbi kani Jehova? Egga kari i kilalam nga kabataan nga itaddaggan na i pabbalin na tu Saksi maski nu neruma yayya ta eskuela da? Egga kari i Bible study onu kapangngurug mu nga marigatan nga mattalupaddian nga matalo megafu ta pameppersigi na familia? Approbetchattam nakuan i kada oportunidad nga pagaramman danatun nga meddu nga kapangngurug tam. Appresiattam i passakrifisio anna i gutu da.—Flm. 4, 5, 7.

15. Kunnasi nga inuffunan na karuan danuri egga ta full-time?

¹⁵ Nu karuan, awayya tam i mangiyawa tu praktikal nga uffun ta kapangngurug tam ira nga egga ta full-time. (Prov. 19:17; Heb. 13:16) Yatun i kakayà nga kuan na matalo nga bako nga taga-Sri Lanka. Megafu ta minatannang i pension na, ikaya na nga duffunan i dua nga kabataan nga sister tapenu metulu-tuloy da i pappayunir da maski mariga i pattoleda. Yari tu nangiyawa yayya tu espesipiko nga balor na kuartu kada vulan nga pappaga da tu telephone bill da. Anni mabba kasta na ugali natun nga sister!

16. Anni i magigiammu tam ta Nazareo ira tagga?

¹⁶ Siguradu nga aru i magigiammu tam ta ehemplo na Nazareo ira! Ngem egga paga i magigiammu tam taw nga unnug meyannung ta Yama tam ta langi nga si Jehova. Makkomfiansa yayya nga ikaya tam nga mapagayayya yayya anna massakrifisio tapenu makapattolay segun ta tabba na dedikasiottam. Iddan na ittam tu dignidad gukaban na pangipamavulu na nga ipasingattam i pangaya tam ta nisa ta personal ira nga desisiottam. (Prov. 23:​15, 16; Mar. 10:​28-30; 1 Juan 4:19) Ipasingan na unnug na Nazareo nga ammu ni Jehova i sakrifisio ira nga kukukuattam ta passerbi ta nisa anna tagibaloran na danatun. Determinadu ittam nakuan gafu nga tulu-tuloy nga masserbi kani Jehova anna sigga-paran nga iyawa i kapianattam para ta nisa.