1. Ɛnɛɛnɛ uce ō ya nyá nɛ ɛjɛɛji ācɛ nōo gē gba Ujehofa ɛ̄gbā a humayi mafu a?

 ƐMA nɛ a lɛ mla Ujehofa a jɛ uwɔ eyī nɛhi? Ii gboo, ó jɛ uwɔ eyi! Ó wɛ awɔ foofu uwɔ nōó jɛ uwɔ eyī a ŋ. Ŋma eko ikee a, ācɛ alɛwa mafu ka ɛma néē lɛ mla Ujehofa a wɛ ɔdā nōo jɛ uwa eyī nɛhi. (Aíjē 104:​33, 34) Ācɛ alɛwa leyi gwu aɔdā ōhī bonu o ya ɛɛ kéē gba Ujehofa ɛ̄gbā. Ɔɔma wɛ ɔdā nōo ya yiili ipu āhɔ̄ ku aatamɔkpa ku ācɛ Isrɛlu ku ikee a. Anyɛ néē wɛ a, ɛlā nyá nɛ̄ alɔ kē lɔfu nwu ŋma ocabɔ ku uwa a?

2. (a) Anyɛ wɛ aatamɔkpa a? (Áluka 6:​1, 2) (b) Ɔdiya nɛ ācɛ Isrɛlu ōhī miya ō je piya aatamɔkpa a?

² Ɛlā néē hi ka “Átámɔ̄kpá” a, ɛyi nu wɛ ka ɔcɛ néē le fu, ɔcɛ néē le tu ɛyɛɛyi, amāŋ ɔcɛ néē le gwɛɛya ohigbu ɛnɛɛnɛ ɛga uklɔ nɛ ó lɛ ō ya a. Aatamɔkpa wɛ ācɛ Isrɛlu nōo leyi gwu aɔdā ōhī bonu, o ya ɛɛ kéē gba Ujehofa ɛ̄gbā ɔwɛ ɛnɛɛnɛ. Íne ku Umosisi a jɛga lɛ ɔcɛnyilɔ amāŋ ɔcɛnya ō cokonu lɛ Ujehofa ō je piya atamɔkpa, eko nōo he ɔcɛ ɔɔma ɔtu nōó géē dɔka ō ya gáā kwu a. a (Jé Áluka 6:​1, 2.) Ɔdaŋ ka ɔcɛ Isrɛlu lɛ okonu ce ō kwu piya atamɔkpa, ɔcɛ ɔɔma géē cɛgbá ō yɛce ukɔ́ amāŋ íne nɛ acɛ Isrɛlu ohile i gáā cɛgbá ō yɛce ŋ ma. Ó lɛ a, ɔdiya nɛ ɔcɛ Isrɛlu gē cokonu lɛ Ujehofa ō je piya atamɔkpa a? Á jé ŋ, ohigbu ihɔtu nɛ ɔcɛ ɔɔma lɛ lɛ Ujehofa, amāŋ ō mafu ka ɔdā nɛ Ujehofa ya lɛ ɔ a jɛ ɔ eyī nɛhi.—Obla. 6:5; 16:17.

3. Ɛgɛnyá nɛ ācɛ ɔlɛ Ɔwɔico icɛ lɛbɛɛka aatamɔkpa a?

 ³ Eko nɛ “íne nɛ̄ Ohɔ́nyɛtá nwū ā” gáā kwɛyi Íne ku Umosisi a, ó tɔɔtɛ lɛ ācɛ ɔlɛ Ɔwɔico ō je piya atamɔkpa gɛ ŋ. (Ugal. 6:2; Uróm 10:4) Amáŋ bɛɛka aatamɔkpa a, icɛ ācɛ ɔlɛ Ujehofa gɔbu yɔ i mafu ka é lɛ ɔtu caca ō gba Ujehofa ɛ̄gbā mla ɛjɛɛji ɔtu ku uwa, ɛjɛɛji odo ku uwa, ɛjɛɛji ɛlá nēē gē gbo, mla ɛjɛɛji ɔfu ku uwa. (Umák. 12:30) Alɔ cokonu ŋma ɔtu ō ya lɛ a duu, eko nɛ alɔ je oyeeyi ku alɔ gwɛɛya lɛ Ujehofa a. Ō ya okonu nɛ alɔ ce lɛ Ujehofa a jila, lɛ ō ya mla ō ya ɔdā nōo wɛ ococɛ ku nu, mla ō leyi gwu aɔdā ōhī bonu o ya ɛɛ ku alɔ gba ɔ ɛ̄gbā. Abɔ alɔ gáā leyi yɛ ɛgɛ nɛ aatamɔkpa a ya ɔdā néē cokonu ku nu a, alɔ abɔ iyi alɔ lɔfu nwu aɛlā ocɛgbá lɛyikwu ɛgɛ nɛ alɔ lɔfu ya ɔdā nɛ alɔ cokonu ku nu lɛ Ujehofa a. b (Umát. 16:24) Alɔ leyi yɛ ocabɔ ōhī.

LE TUTU Ō LEYI GWU AƆDĀ ŌHĪ BONU

4. Ɛgɛ nɛ ɔkpá ku Áluka 6:​3, 4 ka a, ɔdi wɛ aɔdā ōhī nɛ aatamɔkpa leyi gwu uwa bonu a?

⁴ Jé Áluka 6:​3, 4. É jɛga lɛ aatamɔkpa kéē gwa ejé olɔfu amāŋ lé ikpɔcí bɛɛka ufayin amāŋ ikpɔci néē hi ka ureyisin a ŋ. Ācɛ Isrɛlu ohile gē gwa ejé olɔfu klla gē lé ikpɔcí ku ufayin mla ureyisin a. Ō ya ɔɔma i kē wɛ ɔdobɔbi ŋ. Ku ɛlā ɔkwɛyi a, Ubáyíbu ka ka ejé wɛ ɛhi ŋma ɛgiyi Ɔwɔico “nōo í cɛ̄ lɛ ɔtū he [ɔcɛ].” (Aíjē 104:​14, 15) Naana nɛ aɔdā nōo ba nyā lɔfu ya ku ɔcɛ kóō jɔɔnyɛ oyeeyi ku nu lɔɔlɔhi a, aatamɔkpa a cɛ ō leyi gwu uwa bonu. c

5. Ɔdi wɛ aɔdā ōhī nɛ u Madián mla u Marcela miya ō leyi gwu uwa bonu a, ɔdi kē ya a?

⁵ Bɛɛka aatamɔkpa a, alɔ abɔyi alɔ leyi gwu aɔdā ōhī bonu o ya ɛɛ ku alɔ ya nwune ipu ɛ̄gbā ō gba ku Ujehofa. Leyi yɛ ocabɔ ku Madián mla u Marcela. d Ɔba mla ɔnyā nōo wɛ Ācɛ O Yɛce Ukraist nyā yɔ i jɔɔnyɛ oyeeyi ku uwa lɔɔlɔhi. Madián lɛ uklɔ néē gē gba ije nwune lɛ ɔ nōo ya kéē lā ipu ɛnɛɛnɛ ɔlɛ. Amáŋ, é dɔka ō ya nwune ipu ɛ̄gbā ō gba ku uwa lɛ Ujehofa. O ya ɛɛ kéē lɛ ɔdā néē miya a ya jila a, é le miya ō lɛ opiyabɔ ōhī ya. É kahinii: “Alɔ gbɔɔ ō tu ɔwɛ nɛ alɔ gē ŋmo ije a waajɛ. Alɔ kwu calɛ gā ɔlɛ nōó nwune bɛɛka ɛ̄nɛ̄ alɔ tɛtɛ lā anu a ŋ, klla kwu umoto ku alɔ i je lá.” Ó wɛ o piii ku Madián mla u Marcela kéē leyi gwu aɔdā nōo ba nyā bonu ŋ, amáŋ é fu ō ya lɛ a ohigbu ka é dɔka ō ya nwune ipu ɛ̄gbā ō gba ku Ujehofa. Ɔdā néē lɛ a jɛ uwa,  é klla gweeye nɛhi ohigbu ōmiya ɔɔma néē ya a.

6. Ɔdiya nɛ Ācɛ O Yɛce Ukraist icɛ gē miya ō leyi gwu aɔdā ōhī bonu a? (Má ifoto a.)

⁶ Icɛ, ācɛ ɔlɛ Ujehofa gē gweeye nɛhi ō leyi gwu aɔdā ōhī bonu, o ya ɛɛ kéē lɛ eko nwune ō gba ɔ ɛ̄gbā. (1 Ukɔ́r. 9:​3-6) Ujehofa i leyice ku alɔ géē leyi gwu aɔdā ōhī bonu piii, amāŋ ohigbu ka aɔdā ōhī nɛ alɔ leyi gwu uwa bonu a wɛ ɔdā nōo bɔbi ŋ. Ocabɔ mafu, ācɛ ōhī leyi gwu ō lɛ ɔlɛ ku abɔyi uwa bonu amāŋ ō ya ɛdɔ uklɔ nōo gē he uwa ɔtu ō ya a. Ācɛ alɛwa le miya ku aa i gáā lɛ ɔba amāŋ ɔnyā fiya ŋ, amāŋ ku aa i gáā ma ayi boobu igbihi néē lɛ ɔba amāŋ ɔnyā lɛ ŋ. Ācɛ ɔhá le miya ō yuklɔ ɛga nɛ ɛgbá ku ācɛ o tɔɔna ɛlā Ɔwɔico yɔ fiyɛ a, naana nɛ ɛnyā wɛ ka é géē lā ligbo ŋma ɛgiyi aɔkpa ku uwa mla ācɛ apɔlɛ ku uwa a. Alɛwa ku alɔ le tutu ō leyi gwu aɔdā nōo ba nyā bonu, ohigbu ka alɔ dɔka ō je ofiyɛ duu ku alɔ lɛ Ujehofa. Le jé kpɔcii ka ó jɛ Ujehofa eyī nɛhi ohigbu aɔdā nɛ a miya ō leyi gwu uwa bonu o ya ɛɛ ku a gba ɔ ɛ̄gbā a, ɔdaŋ néē kóō nwune amāŋ le ligii naana.—Uhíb. 6:10.

LE TUTU Ō LƐ IYI UWƆ TU ƐYƐƐYI

7. Ɔdiya nōó lɔfu lɔnɔ tu atamɔkpa ō lɛ okonu nɛ ó ce a tu a? (Áluka 6:5) (Má ifoto a.)

⁷ Jé Áluka 6:5. Aatamɔkpa lɛ okonu ce ku aa i gáā wɛyi ku uwa ŋ. Ɛnyā mafu ka é kwu iyi uwa u taajɛ lɛ Ujehofa duudu. Ɔdaŋ ka ó gboji nɛ ɔcɛ Isrɛlu wɛ atamɔkpa ɛ, inyilɛyi ku nu géē gwa nɛɛnɛhi nōo géē ya kóō tɔɔtɛ lɛ ācɛ ɔhá ō jé fiyaa ka ó wɛ atamɔkpa. Ɔdaŋ ka ācɛ ɔhá lɛ ojilima ce ōmiya nɛ ó ya a, klla gē ta ɔ ɔtu kwu ɔtu kóō lɛ okonu ō ce ku nu a tu, ó géē tɔɔtɛ lɛ atamɔkpa fiyɛ ō lɛ iyi nu tu ɛyɛɛyi. Amáŋ ó wɛ ɔdā okwiye nɛhi, ka ó lɛ eko ipu ɔ̄kā ku ācɛ Isrɛlu néē gē lɛ ojilima ce aatamɔkpa klla gē ta uwa ɔtu kwu ɔtu ŋ. Ɛpleeko ku Emɔsi nōo wɛ ɔcomɛɛbɛ a, ācɛ Isrɛlu nōo cigbihi kwu ɛ̄gbā ō gba ku Ujehofa a, “yá kú aátámɔ̄kpá ā kéē gwá ejé.” Á jé ŋ, é ya lɛ a o ya ɛɛ kéē kwu uwa abɔfu kéē lɛ okonu néē ce ku aa i gáā gwa ejé olɔfu ŋ ma tu ŋ. (Émɔ̄s. 2:12) Ekoohi, aatamɔkpa cɛgbá ō mafu ɔtu ō lɛ o ya ɛɛ kéē lɛ okonu néē ce a tu, mla ō lɛ iyi uwa tu ɛyɛɛyi gwu ācɛ ɔhá ta.

8. Ɛgɛnyá nɛ ɔ̄kā ku Benjamin nōo wɛ ɛdrɔ a ta uwɔ ɔtu kwu ɔtu lɛ a?

⁸ Mla otabɔ ku Ujehofa, alɔ abɔyi alɔ lɔfu mafu ɔtu ō lɛ klla lɛ iyi alɔ tu ɛyɛɛyi, ɔdaŋ nɛ alɔ kóō wɛ ācɛ o ya uweyi naana. Leyi yɛ ocabɔ ku Benjamin, Ɔcɛ Ocijali Ku Ujehofa nōo wɛ ihayi igwo nōo yɔ Norway a. Ohigbu ɛfú néē yɔ i kpo ipu Ukraine a, inɔkpa ku nu lɛ ōjila éyi miya o ya ɛɛ kéē mafu ka é yɔ i cɛtra ācɛ nōo yɔ Ukraine a. É da ayipɛ inɔkpa ku uwa a kéē gwo ijé éyi abɔ é lɛ ili ku Ukraine wiye a. O ya ɛɛ kóō hii wɛ ipu ōjila ɔɔma ŋ  ma, Benjamin gáā kla ɛga oligbo ŋma ɛga néē yɔ i ya ōjila a. Amáŋ, itica éyi lɛ ɔ má klla dɛgba hi ɔ igwú kahinii: “A géē wa i ba alɔ iyē babanya piii. Ɛjɛɛji alɔ yɔ i gbeyi uwɔ!” Benjamin lɛ ɔtu lɛ gáā ta itica a da ɔ kahinii: “Ń gē lɛ abɔ ipu ɛlā imeli ɔwɛ duuma ŋ. Ku ɛlā ɔkwɛyi a, alɛwa ku Ācɛ Ocijali Ku Ujehofa yɔ inu agba ohigbu ka é ta ku aa i gáā kpo ɛfú ŋ.” Itica a cɛ mla ɛlā nɛ Benjamin le ta ɔ eyī peee a, klla le da ɔ ka ó hii wɛ ipu ōjila ku uwa a gɛ ŋ. Amáŋ, ayipɛ uklasi ku nu gbɔɔ ō da ɔ ɔka ɔdā nōo ya ɛɛ nɛ ó ba uwa iyē ŋ ma. Uweyi gbɔɔ ō ya u Benjamin nɛɛnɛhi nōó hile ligii kóō gbɔɔ ō jikwu, amáŋ ó lɛ ɔtu lɛ lɛ ɔdā ekponu nɛ ó da itica a da ɛjɛɛji ayipɛ uklasi ku nu a. Igbihaajɛ, Benjamin le da ɛ́nɛ́ mla adā nu ka ɔtu ya ɔ ka Ujehofa je otabɔ lɛ ɔ kóō hayi kpaakpa cɛpɔ ɔtu okpoce ku nu a.

9. Ɔwɛ nyá nɛ alɔ lɔfu ya ku ɔtu kóō he Ujehofa a?

⁹ Ohigbu ka alɔ le miya ō lɛyitaajɛ lɛ Ujehofa a, ācɛ ɔhá gē má ku alɔ wɛ ɛyɛɛyi gwu uwa ta. Alɔ cɛgbá ɔtu ō lɛ ō da ācɛ ɔhá ɛga uklɔ amāŋ ipu inɔkpa ku alɔ, ka alɔ wɛ Ācɛ Ocijali Ku Ujehofa. Abɔ uce ō ya mla āhɔ̄ ku ɛcɛ nyā kē yɔ i bɔbi tōōtɔ̄ɔ̄ a, á jé ŋ, ó lɔfu lɔnɔ tu alɔ fiyɛ ō lā oyeeyi ɛgɛ nɛ Ubáyíbu ka a, mla ō da ācɛ ɔhá lɛyikwu ɔkoolɔhi a. (2 Utím. 1:8; 3:13) Amáŋ bla eko doodu ka alɔ gē ya ku “ɔtū kóō he [Ujehofa],” eko duuma nɛ alɔ mafu ɔtu ō lɛ lɛ iyi alɔ tu ɛyɛɛyi gwu ācɛ nōó gē gba ɔ ɛ̄gbā ŋ ma.—Aíit. 27:11; Umál. 3:18.

KWU UJEHOFA I PIYA ƆDĀ AFLƐYI IPU OYEEYI KU UWƆ

10. Ɛgɛnyá nōo yɛce ukɔ́ nōo yɔ ipu ɔkpá ku Áluka 6:​6, 7 a, lɔfu wɛ ojama lɛ aatamɔkpa a?

¹⁰ Jé Áluka 6:​6, 7. Aatamɔkpa i gē tubla okwū ŋ. Á jé ŋ, a lɔfu gbɛla ka ɛnyā i wɛ ɔdā nɛhi néē leyi gwu ɔ bonu a ŋ. Amáŋ eko néē ta Ubáyíbu a, ɛnyā lɔfu wɛ ojama nɛhi lɛ atamɔkpa eko duuma nɛ ɔmaapu amāŋ ɔcɛ apɔlɛ ku nu duuma gekwu. Ɛpleeko ɔɔma, ó wɛ uculo ku uwa ō tubla okwū a ajaajɛ. (Ujɔ́n. 19:​39, 40; Ācot. 9:​36-40) Amáŋ, ó gáā tɔɔtɛ lɛ atamɔkpa ō yɛce uculo nyā ŋ. Eko néē yɔ i ya ɛlā mla ācɛ apɔlɛ ku uwa ɛpleeko olɔnɔ ɔɔma naana, aatamɔkpa gē mafu ɔtu okpoce olɔfu ŋma lɛ ō lɛ okonu néē ce a tu. Ku ɛlā ɔkwɛyi a, Ujehofa lɛ ɔfu tu aatamɔkpa nōo hayi kpaakpa nyā iye kéē lɔtu āhɔ̄ olɔnɔ ɔɔma a.

11. Ɔdi nɛ Ɔcɛ O Yɛce Ukraist cika ō lɛ ɔtu ku nu ya ekponu ō ya, eko duuma nɛ ó yɔ i ya ōmiya lɛyikwu ɛlā ku apɔlɛ a? (Má ifoto a.)

¹¹ Abɔ alɔ wɛ Ācɛ O Yɛce Ukraist a, alɔ i gē bi okonu nɛ alɔ ce lɛ Ujehofa ku alɔ géē gba ɔ ɛ̄gbā a hija fluflu ŋ. Okonu nɛ alɔ ce nyā gē lɛ  abɔ kwu ōmiya mla uce ō ya ku alɔ lɛyikwu ɛlā nōo lɛ ō ya mla apɔlɛ ku alɔ. Alɔ gē yuklɔ lɔfu lɔfu ō leyi kwu ɛgbá ku ācɛ apɔlɛ ku alɔ, amáŋ alɔ i gē lɛ ɔdā nōo wɛ ɛgbá ku ācɛ apɔlɛ ku alɔ a ta aflɛyi gbɔbu lɛ aku Ujehofa ŋ. (Umát. 10:​35-37; 1 Utím. 5:8) Ekoohi, alɔ lɔfu ya ōmiya nōó gáā he ācɛ apɔlɛ ku alɔ ɔtu ŋ, amáŋ nōo géē cɛ lɛ Ujehofa gweeye.

12. Abɔ ó yɔ i teyi kwu āhɔ̄ ku apɔlɛ nōo lɔnɔ nɛhi a, ɔdi nɛ Alexandru ya a, ɔdi nɛ ó kē ya ŋ ma?

¹² Leyi yɛ ɔ̄kā ku Alexandru mla ɔnyā nu, Dorina. Igbihi nɛ ɔba mla ɔnyā a gbɔɔ ō klɔcɛ ku Ubáyíbu ipu ihayi a, Dorina le miya ka anuɔ i gáā klɔcɛ gɛ ŋ, ó kē dɔka ku Alexandru kóō ya lɛ a duu. Amáŋ Alexandru gbɔtu nɛɛ klla bi ɔwɛ ijeeyi le da ɔ ka anuɔ géē gɔbu mla oklɔcɛ a. Ɛnyā i he u Dorina ɔtu ŋ, ohigbu ɔɔma ó ceyitikwu ō kwu Alexandru abɔfu kóō lɛ abɔ ci oklɔcɛ a. Alexandru ka ka ó jé ɔdā nōo ya ɛɛ nɛ ɔtu gē ya ɔnyā nu lɛ a, amáŋ ó tɔɔtɛ lɛ ɔ ō lɛ abɔ ci oklɔcɛ a ŋ. Eko duuma nɛ u Dorina gē ŋmo ɔ okonu klla gē kɛla lɛ ɔ ipu icɔnu, ɔtu gē ya Alexandru kóō lɛ abɔ ci oklɔcɛ ku Ubáyíbu a. Naana kpɔ a, Alexandru gɔbu ō lɛ Ujehofa ta aflɛyi ipu oyeeyi ku nu, klla gɔbu yɔ i mafu ihɔtu mla ojilima lɛ ɔnyā nu a. Ohigbu ɛnɛɛnɛ ocabɔ ku Alexandru a, Dorina le miya ō gbɔɔ oklɔcɛ ku Ubáyíbu kpɔ, igbihaajɛ ó kē gáā lɛ ubatisim ya.—Má uvidio nyā ipu jw.org nōo kahinii: Alexandru and Dorina Văcar: “Love Is Patient and Kind” mla u series nōo kahinii: “Truth Transforms Lives.”

13. Ɛgɛnyá nɛ alɔ lɔfu mafu ihɔtu lɛ Ujehofa mla ācɛ apɔlɛ ku alɔ a?

¹³ Ujehofa lɛ ōmiya ku apɔlɛ kwaajɛ a, ó kē dɔka ku alɔ lɛ apɔlɛ nōo lɛ eeye. (Āfi. 3:​14, 15) Ɔdaŋ ku alɔ dɔka ō lɛ eeye ɔkwɔɔkwɛyi, alɔ cɛgbá ō ya aɔdā nɛ Ujehofa dɔka ku alɔ ya a. Le jé kpɔcii ka aɔdā ōhī nɛ a leyi gwu uwa bonu o ya ɛɛ ku a gba Ujehofa ɛ̄gbā abɔ a gē teyi kwu ɛgbá ku ācɛ apɔlɛ ku uwɔ, klla gē ya ɛlā mla uwa ɔwɛ ihɔtu mla ojilima a jɛ Ujehofa eyī nɛhi.—Uróm 12:10.

TA ĀCƐ ƆHÁ ƆTU KWU ƆTU KÉĒ LƐBƐƐKA AATAMƆKPA A

14. Anyɛ nɛ alɔ cika ō je ɔtu ō tu kwu ɔtu lɛ uwa piii o bu ipu ɛlā ō ka ku alɔ a?

¹⁴ Ɛjɛɛji ācɛ nōo miya ō gba Ujehofa ɛ̄gbā icɛ a, cika ō le tutu ō leyi gwu aɔdā ōhī bonu ohigbu ihɔtu néē lɛ lɛ Ujehofa a. Ekoohi, ō ya lɛ a i gē tɔɔtɛ ŋ. Ɛgɛnyá nɛ alɔ gáā lɔfu ta ācɛ ɔhá ɔtu kwu ɔtu kéē lɛ ɛdɔ uce ō ya ɛgɛnyā a? Oŋma lɛ ō kɛla nōo géē ta uwa ɔtu kwu ɔtu. (Ujób. 16:5) Ó lɛ ācɛ duuma ipu ujɔ ku uwɔ nōo yɔ i ceyitikwu kéē lɛ oyeeyi ku uwa ya tɔɔtɛ, o ya ɛɛ kéē lɔfu ya nwune ipu ɛ̄gbā ō gba ku Ujehofa? A jé aɛdrɔ duuma nōo yɔ i mafu ɔtu ō lɛ ō lɛ iyi uwa tu ɛyɛɛyi gwu ayipɛ  inɔkpa ku uwa ta, naana nōo ya ɔɔma lɔfu lɔnɔ tu uwa a? Ó lɛ oduuma ku ācɛ nɛ alɔ gē klɔcɛ mla uwa amāŋ ayinɛ alɔ nōo yɔ i nya ō hayi kpaakpa lɛ Ujehofa, ohigbu ka ācɛ apɔlɛ ku uwa yɔ i ya uwa ŋmo? Lɛ ɔtu ku uwɔ ya ekponu ō ya ɔdā duuma nɛ a ya gla ō je ɔtu ō tu kwu ɔtu lɛ ācɛ nōo ba nyā, mla ō da uwa ɛgɛ nɛ ó jɛ uwɔ eyī nɛhi ku ɔtu ō lɛ néē gē mafu, mla ɛjɛɛji ɔdā néē gē ya ohigbu Ujehofa a.—Ufím. 4, 5, 7.

15. Ɛgɛnyá nɛ ācɛ ōhī je otabɔ lɛ ācɛ nōo yɔ ipu uklɔ ō ya lɛ Ujehofa eko doodu ɛ ma?

¹⁵ Ó lɛ ekoohi, nōó lɔfu tɔɔtɛ lɛ alɔ ō je otabɔ nōo cɛgbá a lɛ ayinɛ alɔ nōo yɔ ipu uklɔ ō ya lɛ Ujehofa eko doodu a. (Aíit. 19:17; Uhíb. 13:16) Ɔdā nɛ ɔyinɛ alɔ nɔnya éyi nōo yɔ u Sri Lanka nōo kwu hilokplici ɛ, nōo hayi kpaakpa lɛ Ujehofa a miya ō ya a yɔ abɔɔ a. Eko néē lɛ ule ku uklɔ ku igɔmɛnti nɛ ó ya kwɛyi a je gico a, ó le miya ō je otabɔ lɛ ayinɛ nɔnya ɛpa nōo wɛ ācɛ o gbɔbu ɔna ō ta a, kéē gɔbu ipu uklɔ néē yɔ i ya lɛ Ujehofa a, ohigbu ka é yɔ i lɛ unwalu ku ije. Ohigbu ɛnyā, ó le miya ō lɛ ije taajɛ ɔya doodu nɛ ó géē bi le gba ije ku uwaya néē gwo fu ācɛ ipu uklɔ ku ɔna ō ta a. Ɛnyā wɛ ɛnɛɛnɛ uce ō ya nɛ ɔyinɛ alɔ nɔnya ɔɔma mafu a!

16. Ɔdi nɛ alɔ lɔfu nwu ŋma ɛgiyi aatamɔkpa ku ikee a?

¹⁶ Ó lɛ aafu ŋ, alɔ lɔfu nwu aɛlā alɛwa ŋma ɛnɛɛnɛ ocabɔ nɛ aatamɔkpa le taajɛ a! Amáŋ okonu nɛ aatamɔkpa ce a klla nwu alɔ odee lɛyikwu Adā alɔ Ujehofa nōo yɔ ɔkpanco a. Ó lɔtuce lɔfu lɔfu ku alɔ dɔka ō ya ɔdā nōo he ɔ ɔtu a, ka alɔ klla le tutu ō leyi gwu aɔdā ōhī bonu, o ya ɛɛ ku alɔ lɛ okonu nɛ alɔ ce lɛ ɔ a tu. Ó lɛ ojilima ce alɔ ŋma lɛ ō je ɛnɛɛnɛ ɛga lɛ alɔ ō mafu lɛ ɔ ku alɔ yihɔtu ku nu. (Aíit. 23:​15, 16; Umák. 10:​28-30; 1 Ujɔ́n. 4:19) Ōmiya ku aatamɔkpa a mafu ka Ujehofa gē má aɔdā ōhī nɛ alɔ leyi gwu uwa bonu a, ó klla yihɔtu alɔ nɛhi ohigbu ɔdā nɛ alɔ gē ya lɛ ɔ a. Ɛjɛɛji alɔ kóō lɛ ɔtu ku alɔ ya ekponu ō gɔbu yɔ i gba Ujehofa ɛ̄gbā, mla ō je ofiyɛ duu ku alɔ lɛ ɔ ŋma ɛjɛɛji ɔtu ku alɔ.