1. Abwẹla ọnyịịla oyina anchẹ nya iJihova à tị́ kaa mẹjẹ bwu ụka-ụka onyogo?

 IGU o-riri bala iJihova háng yẹẹyẹẹ? Ịwẹẹ ọdada á juwa ẹ-ẹpwụ nya ẹlẹwẹ ka! Áhụ ụbwọng ọ tị há ka. Bwu ụka-ụka onyogo, ọ kaa la iru nya angịnyị jaabwọ kọ lang wẹ. (Eje. 104:33, 34) Angịnyị lụmẹ-lụmẹ kaa hu ang kịliya chajị nyọka jẹ́-ẹ gbịgba ha iJihova. Ịnyị ọ la ẹ-ẹga nya ala Isirẹlụ ịhyẹ ịlẹ kị kaa wụrụ ịNasịrayịtị lẹ. Owo anyị ị tị́ ri? Ẹlịyẹ ahị tị́ ka jẹ́ bwu ẹga nyaa?

2. (a) Owo anyị à tị́ ri ịNasịrayịtị? (Ọwawa 6:1, 2) (b) Ịyẹ tị́ du ká ala Isirẹlụ ịhyẹ kaa chụ nyọka nwa iro kị ka ri ịNasịrayịtị?

² Omyi ẹla ọlẹ kọ ri “ịNasịrayịtị” kpehe bwu omyi ẹla nya iHiburu ọlẹ ká etu nyamwụ ri “Ọngọlẹ Kị Me Ụchụ,” “Ọngọlẹ Kị Chị Ebwo,” lee “Ọngọlẹ Kị Hu Chajị nya Ụkụrwọ Ọdatị.” Omyi ẹla ọwẹ jẹ́ chabwọ nya ala Isirẹlụ ịlẹ kị kaa chị ịlaa imyi kpẹpwụ chajị nyọka jẹ́-ẹ gbịgba ha iJihova ụ-ụgbẹyị ọdatị yẹẹyẹẹ. Ehile nya iMosisi ya iwe da ha ọlẹng lee ọnyang nyọka nwa iro ta iJihova kọ ka chụ nyọka hịhị lala ịNasịrayịtị pwụ ụka ọhẹ. a (Wa Ọwawa 6:1, 2.) Ụka ká ọla Isirẹlụ ọhẹ á nwa iro ọọwa, ọ ka kpa ehile ịhyẹ ịlẹ ká ala Isirẹlụ ịkịla ka baba nyọka kpa ka. Ịyẹ tị́ tịtị du ká ọla Isirẹlụ kaa chụ nyọka nwa iro nyọka ri iNasịrayịtị? Ọ chịkpẹẹ myị́ ká ọháha okpori-kpori ọlẹ ká ọngọọwa la ẹ-ẹga nya iJihova bala abwọlẹ ká ahị ọwawa nyamwụ myọọ lẹhị kaka ba à ka du.—Ehile. 6:5; 16:17.

3. Ányị anchẹ nya Ohe alẹ à tị́ lala angị ri ịNasịrayịtị?

³ Ọngịnyị ọ-ka ri ịNasịrayịtị wẹ ka cheju ụka ká “ehile nya ịKịrayịsị” wẹ ka tụ Ehile nya iMosisi kịnyaa. (Gal. 6:2; Rom. 10:4) Ma, jaabwọ kọ kaa la ẹ-ẹga nya ịNasịrayịtị, anchẹ nya iJihova  alẹ kaa la olegu nyọka gbịgba ha iJihova la ọkịlẹtụ, olegu, ịrya, bala ọngịrị nyaa wuu. (Mak. 12:30) Ahị kaa nwa iro nyọka gbịgba ha iJihova ụka kahị hu ịlọhị chịgọ họọ. Nyọka jẹ́-ẹ hịhị ba iro ọnwanwa ọọwa jẹ, ahị ka baba nyọka họ irya nya iJihova bala ọ-chị ịlọhị imyi kpẹpwụ nyọka jẹ́-ẹ gbịgba họọ. Jaabwọ kahị wẹẹ ka wụla abwọlẹ ká angị ri ịNasịrayịtị kaa bwu họ iro ọnwanwa nyaa jịra yẹ, ahị ka jẹ́ ẹla o-ju apyobwuna u-uhye nya abwọlẹ kahị ka bwu hịhị ba iro nyahị jẹ ịnyịnyị. b (Mat. 16:24) Ahị kụ ẹhị yẹ ọ-chụ pwokwita ịhyẹ wẹẹ.

NWỤLANỌ NYỌKA CHỊ ỊLỌNG IMYI KPẸPWỤ

4. Jaabwọ ká ụpwụ nya Ọwawa 6:3, 4 ya, ịyẹ ọngọ ri ịNasịrayịtị à tị́ kaa ya kịliya?

⁴ Wa Ọwawa 6:3, 4. Ọngọ ri ịNasịrayịtị kaa yẹ abwọ hi ere ọnyọọngịrị bala ụma nya egbe nya ekeji ịhyẹ. Angịkịla ka nwa ere bala o-ri egbe nya ekeji ịlịnyị i-ijata nyaa myí, ọọwa á tị ri ẹlẹhẹ ka chajị ị́ ri ang ịtịpyọ ka. ỊBayịbụụ dọmwụ ya nyori ere nyị ri āhị bwu ẹga nya Ohe bala o-ri nyị kaa họ ká ọngịnyị ka “chị ọkẹkẹnị.” (Eje. 104:14, 15) Nanana nyori ang ịwẹ du ká ọhịhị ka kpụ ọngịnyị ịpyọ myị́, angị ri ịNasịrayịtị tị myọnụ nyọka yẹ abwọ hyaa. c

5. Ịyẹ Madián bala Marcela à tị́ chụ nyọka ya kịliya? Ịyẹ à tị́ du?

⁵ Lala angị ri ịNasịrayịtị, ahị ịnyịnyị kaa chị ịlọhị imyi kpẹwụ nyọka jẹ́-ẹ gbịgba ha iJihova yẹẹyẹẹ. Kụ ẹhị yẹ oja nya Madián bala Marcela d wẹẹ. Ahụ bala ọrụ ọwẹ la ọhịhị ọkpịpyọ. Madián la ụkụrwọ ọnyịịla ọlẹ kọ du kị jé kụ ẹpwa ọtụka-ọtụka. Ma, ị tị tịtọ nyọka họ ụkụrwọ ha iJihova gụ́ ọọwa. Nyọka họ ịnyị myị́, ị chụ nyọka nwụ ang ịhyẹ họ. Ị yẹkẹẹ: “Ahị dọmwụ nyọka chụ ang ịlẹ kahị kaa kpa okpoko nyahị ra hi. Ahị mwụ ka ẹpwa ọlẹ kọ ri ochiche gụ́ bala o-hu omoto nyahị ra.” Ó ri o-pyii ká Madián bala Marcela ka hu ịlaa kịliya ị-ịwẹ ene ka, ma ị chụ nyọka họ ịnyị chajị nyori ọọwa ya iwe haa nyọka jẹ́-ẹ họ ụkụrwọ nya iJihova gụ́ olene. Eje ọchịchị nyaa ya ọkẹkẹnị haa, ang ọlẹ kị la tị nwaa ịnyịnyị.

6. Ịyẹ tị́ du ká Angịnyị nya ịKịrayịsị alẹ kaa ya ang kịliya? (Yẹ ifoto ịnyịnyị.)

⁶ Angịnyị nya ịKịrayịsị alẹ kaa ye ọkẹkẹnị ẹ-ẹpwụ nya ang ịlẹ kị kaa chị ịlaa imyi  kpẹpwụ chajị nyọka jẹ́-ẹ ye ụka họ ụkụrwọ nya iJihova gụ́ ọọwa. (1 Kọr. 9:3-6) IJihova á da ehile nyori ahị ka họ ịnyị pyii ka, ang ịlẹ kahị tị wẹẹ nyẹẹkpẹ da á ri ang ịtịpyọ ka ịnyịnyị. Ọ-chụ pwokwita, angịhyẹ kaa nyẹẹkpẹ da ụkụrwọ ọlẹ kọ háa yẹẹyẹẹ, lee ẹpwa nyaa. Iru nya angịhyẹ kaa chụ nyọka ye ahụ bala ọ-rwọrụ lẹka lee ọ-ka dọmwụ nya anyị ọmama i-ijata lẹka. Angịkịla kaa chụ nyọka da ụbwọ ẹ-ẹga ká ọbaba ji gụ, nanana nyori ọọwa ka du kị ka rụ lụrụ hi alugbiyegu bala aligu nyaa. Iru nyahị kaa ya ịlọhị kịliya ọlịịwẹ chajị nyori ahị tịtọ nyọka họ ha iJihova jaabwọ ká ọngịrị nyahị la ba. Jẹ́ myị̀myị̀ nyori ịngịngịhyẹ ọlẹ ká ya kịliya ha iJihova chajị nyọka jẹ́-ẹ gbịgba họọ, kori kọ la pyịnyẹng lee ó ri ọtụka riri, ọ kaa myọọ lẹhị yẹẹyẹẹ.—Hib. 6:10.

NWỤLANỌ NYỌKA DATỊ

7. Ịyẹ à tị́ ka du kọ ka lujwo ha ọngọ ri ịNasịrayịtị nyọka kpa ọnụ ọmyịmyị nyamwụ myị́? (Ọwawa 6:5) (Yẹ ifoto ịnyịnyị.)

⁷ Wa Ọwawa 6:5. Angị ri ịNasịrayịtị kaa nwa iro nyọka chị inyi nyaa eku ka. Ọwẹ à ri ụgbẹyị ọlẹ ká ịwa kaa mẹjẹ nyori ị ya ịlaa ju iJihova ụ-ụbwọ wuu lẹlẹ. Kori ká ọla Isirẹlụ ọhẹ á ri ọla ịNasịrayịtị lụka ọtata, inyi nyamwụ ka ludiyo yẹẹyẹẹ du ká angịnyị ka jọ́ọ datị hyaa. Kori ká angịkịla á chị ihi ju eje ọchịchị nya ọngọ ri ịNasịrayịtị bala o-jwoo ọhụ nyọka kpa iro nyamwụ kịnyaa, ọ ka chịkpẹẹ họọ la ọ-ka datị hi angịkịla kịnyaa. Ma ọ tị tolujwo nyori ụka ọhẹ ji ká ala Isirẹlụ á jẹ́ apyobwuna nya angị ri ịNasịrayịtị kpụ ị kaa daa ụbwọ ka. Lụka nya ọlọmwụ Emọsị, ala Isirẹlụ ịlẹ kị jẹkpẹ da iJihova “họ ịnasịrayịtị ịịwa juwa nwa ere,” ọhẹka chajị kị ka bịrị iro ọlẹ kọ chaa ịgọ nya ere ọnwanwa. (Emọ. 2:12) Ụka ọhẹ, ọ kaa baba nya ugbodu ojuju ọlam-ọlam nya ọngọ ri ịNasịrayịtị ọ-ka kịnyaa la ọ-kpa iro nyamwụ kọ ka datị.

8. Ọhụ ojuju oyina a tị́ ye bwu oja nya Benjamin?

⁸ Bwula ụbwọ ọdada nya iJihova, ahị ịnyịnyị ka jẹ́-ẹ la ugbodu ojuju nyọka datị kori kahị dọmwụ kaa ju oyi wẹwẹ. Kụ ẹhị yẹ ọ-chụ pwokwita nya ọọnahị ọ-gu ẹka iwo ọhẹ bwu Norway, ká ẹnyị nyamwụ ri Benjamin wẹẹ. Ube-ụpwụ nyamwụ họ ọhọhọ ọhẹ nyọka chẹkpẹ ju ẹpwụma nya Ukraine ọọlajị nya ẹwụ ọlụwa. Ị byi anjwo nyị mwu eje ọhẹ kị nyị kụrụ ang ịlẹ kị chị ịna nya apwụ nya ẹpwụma nya Ukraine. Chajị nyọka ya ụbwọ ju ọhọhọ ọọwa ka, Benjamin chụ nyọka dayị hwẹẹ hi ẹga kị ka họ ọhọhọ ọọwa. Ma, ọngọmẹjẹ ọhẹ chẹhị kaka yọọ kpụ o be ẹkọ wụrọọ gboo yẹkẹẹ: “Warị ka julahị lẹẹlẹẹ mẹ. Ahị jam dayị gbeng!” Benjamin ka ẹga nya ọngọmẹjẹ ọọwa la ugbodu ojuju kaka byoo yẹkẹẹ: “Ḿ chẹkpẹ ju ụpa ọhẹ datị  ka, ḿ tị kaa ya ụbwọ ju ẹla nya upe ka ịnyịnyị. Iru nya Alibeenu nya iJihova dọmwụ juwa u-ube nya agba ọọlajị nyọlẹ kị kaa pwa la ọ-ka ẹwụ.” Ọngọmẹjẹ ọọwa wo ẹla nya Benjamin lẹ o ba hyoo lẹlẹ. Ma, ala ịkịlasị nyamwụ tị dọmwụ nyọka tọọ wo nya ang odudu kọ ka yẹjulaa ka. Benjamin chuko gbee kọ tụbwọọ ka jida; ma ọ tị jẹ́ ju ugbodu kpụ ọ ma ẹla ọlẹ kọ byi ọngọmẹjẹ nyamwụ ya je ala ịkịlasị wuu. Ụka ohyẹẹkpẹ, Benjamin byi adamwụ bala ịnamwụ nyori iJihova nyị à da ọwa ụbwọ du ká ọwa nyị jẹ́ dẹwụ ju ọmyịmyị nya ọwa wẹ lẹ.

9. Ụgbẹyị oyina ahị tị́ ka jẹ́-ẹ họ ká iJihova ka chị ọkẹkẹnị?

⁹ Chajị nyọlẹ kahị chụ nyọka ju ihi nya iJihova wẹẹ, ahị kaa datị hi angịnyị ịla oye nyahị. Ahị baba nya ugbodu ojuju nyọka ya ịlọhị mẹjẹ lala Alibeenu nya iJihova ọọlụkụrwọ lee ube-ụpwụ. Jaabwọ ká abwẹla bala ọhọhọ nya alodehe tị wẹẹ tịpyọ gụ́ olene, ịnyịnyị ọ ka lujwo gụ́ olene hahị nyọka hịhị ba itiwe nya ehile ịla ịBayịbụụ jẹ bala ọ-ka ya ẹrụ ọnyịịla je angịnyị lẹ. (2 Tim. 1:8; 3:13) Ma kpịtịya ụka myị́ ụka nyori, iJihova kaa “chị ọkẹkẹnị” kori kahị dayị la ugbodu ojuju nyọka datị hi angịlẹ kị kaa gbịgba họọ ka.—Etu 27:11; Mal. 3:18.

HU IJIHOVA JENE Ẹ-ẸPWỤ NYA ỌHỊHỊ NYANG

10. Ányị ọ-ka ba ehile ọla ụpwụ nya Ọwawa 6:6, 7 jẹ à tị́ ka lujwo ha angị ri ịNasịrayịtị myị́?

¹⁰ Wa Ọwawa 6:6, 7. Angị ri ịNasịrayịtị á kaa tụ ju ogu ọhẹ-lọhẹ chwẹẹ ka. Ụka nya ọgbanyẹ, ọ́ ka lala ịya ọkịlaakịla ọtụka ọhẹ nyị à ka myị́. Ma lụka onyogo, ọngọ ri ịNasịrayịtị ka jẹ́ jaabwọ ká ẹlẹwẹ lujwo kaka ba ụka ká ọngọ bọọ i-iyo chii á gbu. Ọhọhọ nya ogu o-ju eji lụka nya ịBayịbụụ kaa baba nya ọngịnyị ọ-ka ji ba ogu ba. (Jọn. 19:39, 40; Ụkụr. 9:36-40) Iro ọlẹ ká ọngọ ri ịNasịrayịtị nwa ka du kọ ka jẹ́-ẹ ba ọhọhọ ịlịịwẹ jẹ kpong-kpong ka. Ụka ká ẹla onyobyi á dọmwụ da ugbiyegu, ká ọngọ ri ịNasịrayịtị á ja bida wẹwẹ, ọ kaa ya ọmyịmyị nyamwụ chehe bwula ọ-kpa iro nyamwụ. Ahị jẹ́ nyori iJihova ka ju anchẹ nyamwụ ịwẹ ọngịrị nyọka bọhụ ẹ-ẹpwụ nya iwe-ahụrụ olujwo ịlịịwẹ.

11. Ẹlịyẹ ọngịnyị nya ịKịrayịsị à tị́ ka cheje nyọka họ pyii ụka ká ẹla nya ugbiyegu á da? (Yẹ ifoto ịnyịnyị.)

¹¹ Lala angịnyị nya ịKịrayịsị, áhị kaa hu iro ọlẹ kahị nwa nyọka hu ịlọhị ju iJihova ụ-ụbwọ nya ẹla nya ayịlọ ka. Ọ kaa gu ẹla ịhyẹ ịlẹ kahị kaa cheje nyaa lee ọ-họ ẹ-ẹpwụ nya ugbiyegu. Ahị kaa maga yẹẹyẹẹ nyọka họ ịbaba nya ugbiyegu nyahị, ma áhị kaa ya iwe da ịbaba nya  ugbiyegu ka jene nya ẹla ọlẹ ká iJihova tịtọ bwu ẹga nyahị ka. (Mat. 10:35-37; 1 Tim. 5:8) Ụka ọhẹ, eje ịlẹ kahị kaa chị nyọka họ ẹla kpụ iJihova ịpyọ ka du ká alugbiyegu nyahị ka chị ọkẹkẹnị balahị ka myị́.

12. Ụka ká ẹla olujwo ji ugbiyegu nya Alexandru, ẹlịyẹ ọ tị họ? Ẹlịyẹ ọ tị́ họ ka?

¹² Wo ẹla ọlẹ kọ họ ẹ-ẹga nya Alexandru bala Dorina ahụ nyamwụ lẹẹ. Nyọlẹ ká ahụ bala ọrụ ọwẹ jẹ́ ịBayịbụụ ẹ-ẹpwụ nya ẹka ookpokpo, Dorina hwabwọ la ịBayịbụụ ọjẹ́jẹ, ọ tị tịtọ ká Alexandru ọrụmwụ ka hwabwọ ịnyịnyị. Ma ọrụmwụ tị byoo kpẹnẹẹ nyori ọwa nyị ja kịnyaa la ang ọjẹ́jẹ. Ẹla ọọwa á há Dorina ka du kọ kaa maga nyọka hwoo abwọ la agbụrụ. Alexandru ya nyori ọwa nyị maga nyọka jẹ́ ang odudu kọ lọọ ịnyị, ma ọ́ tị chịkpẹẹ họọ lụmẹ ka. Ụka ọhẹ kori ká Dorina á kpọọ abyị bala ọ-wọọ ẹla pwaapwaa, ọ kaa lọọ lala o-ri ọwa nyị hwabwọ la ịBayịbụụ ọjẹ́jẹ mẹ. Kpọkpọọkpọ, Alexandru kịnyaa la o-hu iJihova kụ ịlhahị bala ọ-kaa mẹ ọháha jẹ ahụ nyamwụ bala ọ-chị ihi jwọọ ụka myị́ ụka. Ụka ohyẹẹkpẹ, ọgụ-ẹpẹtẹ ọnyịịla nyamwụ gu ahụ nyamwụ gbịlaa nyọka dọmwụ nya ịBayịbụụ ọjẹ́jẹ myị́myị́, gbee kọọ ye ẹlịlẹhị myị.—Ka jw.org ká yẹ ifim ọlẹ kọ ri Alexandru Bala Dorina: ‘Ọháha Kaa La Ugbodu Ojuju Bala ọ-Kpa Ọnahị Họ Ẹla’

13. Ányị ahị tị́ ka bwu mẹ ọháha jẹ ẹ-ẹga nya iJihova bala alugbiyegu nyahị?

¹³ IJihova à ya ugbiyegu yeji lẹ, ọ tị tịtọ kahị ka chị ọkẹkẹnị ẹ-ẹpwụ nya ịnyahị. (Efe. 3:14, 15) Kori kahị tịtọ nyọka chị ọkẹkẹnị aalẹ, ahị ka baba nyọka họ ẹla ọlẹ ká iJihova tịtọ bwu ẹga nyahị. Jẹ́ myị̀myị̀ nyori ịngịngịhyẹ ọlẹ ká wẹẹ ya kịliya chajị nyọka jẹ́-ẹ gbịgba ha iJihova bala ọ-kpahị ju ugbiyegu nyang ẹ-ẹpwụ nya ọháha bala ihi ojuju, kaa myọọ lẹhị yẹẹyẹẹ.—Rom. 12:10.

JU ANGỊKỊLA ỌHỤ KỊ KA LALA ANGỊ RI ỊNASỊRAYỊTỊ

14. Owo anyị ahị tị́ ka maga nyọka ju ọhụ la omyi ẹla nyahị?

¹⁴ Angịlẹ wuu kị chụ nyọka gbịgba ha iJihova alẹ baba nyọka hu ịlaa kịliya ọọlajị nya ọháha ọlẹ kị la ẹ-ẹga nyamwụ. Ụka ọhẹ, ọ-họ ịnyị á kaa chịkpẹẹ lụmẹ ka. Ányị ahị tị́ ka da awụlẹ ụbwọ kahị ka la abwẹla ọlịnyị? Bwula o-ya ẹla ọlẹ kọ ka ju angịkịla ọhụ. (Job. 16:5) Angịhyẹ juwa ọọjịra-jịra nyang kị ja maga nyọka hu ọhịhị nyaa hukee chajị kị ka jẹ́-ẹ họ ụkụrwọ nya iJihova gụ́ ọọwa? À jẹ́ anjwo ịhyẹ ịlẹ kị kaa dayị la ugbodu ojuju nyọka datị hi angịkịla uube-ụpwụ, nanana nyori ọ kaa lujwo haa nyọka họ ịnyị? Angịlẹ kahị kaa mẹ ịBayịbụụ jẹ lee aanahị ịlẹ kọ kaa lujwo ha nyọka godayị giri-giri ọọlajị nya ọtụpyịpyị ọla  ugbiyegu tị bẹẹ? Ahị kpa iwe ọnyị myị́ ọnyị ya ẹla ọlẹ kọ ka ju aanahị ịlịkẹjẹ ịwẹ ọhụ, kị jẹ́ nyori ịlaa ọ-ya kịliya bala ugbodu ojuju nyaa nyị myịhị lẹhị.—Filim. 4, 5, 7.

15. Ụgbẹyị oyina angịhyẹ à tị́ bwu da angị kaa kpa ụka nyaa họ ụkụrwọ nya iJihova ụbwọ?

¹⁵ Ụka ọhẹ, ahị ka jẹ́-ẹ da angịlẹ kị kaa kpa ụka nyaa wuu họ ụkụrwọ nya iJihova ụbwọ ụ-ụgbẹyị ọlẹ kọ baba myị́. (Etu 19:17; Hib. 13:16) Irya ọlịnyị à ji ẹpwụ nya ọọnahị ọnyang ọhẹ bwu bwu Sri Lanka kọ chị okwirichi lẹ lẹ. Ị ya okpoko da uri ọlẹ kọ kaa ye nyọlẹ kọ ya ọkụta beji la ụkụrwọ kpá du kọ tịtọ nyọka da ịyẹẹnọ imiiye ịhyẹ kị kaa ya ịlahị nya ụgbẹyị ụbwọ chajị ka hwabwọ la ụkụrwọ ọwẹ, ọọlajị nya okpoko ọ-gamwụ ka. Lẹ ọ dọmwụ nyọka chị okpoko ọhẹ nọ ọya ọnyị myị́ ọnyị nyọka daa ụbwọ nwa uri nya okpoko ọlẹ kị kaa ra ju ifon. Olegu ọlam-ọlam à wẹ ka ọọnahị ọwẹ la lẹ!

16. Ẹlịyẹ ahị tị́ ka jẹ́ bwu obyi omeme nya angị ri ịNasịrayịtị ọlẹ ká Ohe ya yeji lụka onyogo?

¹⁶ Ahị ka jẹ́-ẹ jẹ́ ang lụmẹ-lụmẹ bwu ẹga nya angị ya ụbwọ kpụ ịlaa nyọka ri ịNasịrayịtị lụka onyogo! Ma, obyi omeme ọwẹ tị mẹ ẹlẹhẹ jẹẹhị ịnyịnyị ẹ-ẹga nya iJihova, kọ ri Adahị olepwoohe. Ọ jẹ́ nyori ahị nyị la irya nyọka họ ẹla kpọọ ịpyọ bala o-ri ahị nwụlanọ nyọka hu ang kịliya chajị kahị ka jẹ́-ẹ hịhị ba iro nya ịlọhị o-hu jwọọ ụ-ụbwọ jẹ. Ọ chị ihi juhi bwula ọ-ya iwe da hahị nyọka mẹjẹ ụ-ụgbẹyị ọlẹ kọ háahị nyori ahị la ọháha ẹ-ẹga nyamwụ. (Etu 23:15, 16; Mak. 10:28-30; 1 Jọn. 4:19) Obyi omeme nya angị ri ịNasịrayịtị ọlẹ ká Ohe ya yeji mẹjẹ nyori iJihova jẹ́ apyobwuna nya ịngịngịhyẹ ọlẹ kahị ya kịliya chajị nyọka jẹ́-ẹ gbịgba họọ. Lẹ, ahị ịnyịnyị a cheje nyọka kịnyaa la ọ-gbịgba ha iJihova, juwa ya ang ọlẹ kọ há gụ́ wuu họọ mẹ.