1. Ania a nasayaat a kababalin ti ipakpakita dagiti agdaydayaw ken Jehova sipud pay idi un-unana?

 AY-AYATEM kadi unay ni Jehova? Sigurado a kasta! Ket saanka nga agmaymaysa. Sipud idi un-unana, adun a tattao ti mangay-ayat ken Jehova. (Sal. 104:​33, 34) Adu ti nagsakripisio tapno makapagdaydayawda ken Jehova. Kasta la ketdi dagiti Nazareo iti nagkauna nga Israel. Siasinoda, ken ania dagiti masursurotayo kadakuada?

2. (a) Siasino dagiti Nazareo? (Numeros 6:​1, 2) (b) Apay a pinili ti dadduma nga Israelita ti agbalin a Nazareo?

² Ti sao a “Nazareo” ket naggapu iti Hebreo a termino a kayatna a sawen “Daydiay Nailasin,” “Daydiay Naisina,” wenno “Daydiay Naidedikar.” Maibagay daytoy a termino kadagiti naregta nga Israelita a nangaramid kadagiti sakripisio tapno makapagserbida ken Jehova iti espesial a pamay-an. Iti Mosaiko a Linteg, mabalin a pilien ti maysa a lalaki wenno babai ti mangaramid iti espesial a kari ken Jehova nga agbiag kas Nazareo iti sumagmamano a tiempo. a (Basaen ti Numeros 6:​1, 2.) Dayta a kari, wenno serioso a sapata, kaipapananna nga adda surotenda a pagannurotan a saan a masapul a suroten ti dadduma nga Israelita. Apay ngarud a pilien ti maysa nga Israelita ti agbalin a Nazareo? Maigapu la ketdi dayta iti nauneg nga ayatna ken Jehova ken iti naimpusuan a panagyamanna iti adu a bendisionna.—Deut. 6:5; 16:17.

3. Ania dagiti pagpadaan ti ili ti Dios ita kadagiti Nazareo?

³ Idi a ti Mosaiko a Linteg ket sinuktanen “ti linteg ti Kristo,”  awanen ti agbalin a Nazareo. (Gal. 6:2; Roma 10:4) Ngem kas kadagiti Nazareo, agtultuloy nga ipakpakita dagiti agserserbi ken Jehova ita ti nasged a tarigagayda nga agserbi kenkuana iti amin a puso, kararua, panunot, ken pigsada. (Mar. 12:30) Situtulok nga inaramidtayo dayta a kari idi indedikartayo ti biagtayo ken Jehova. Tapno matungpaltayo dayta a kari, masapul nga aramidentayo ti pagayatan ni Jehova ken agsakripisiotayo. Bayat nga us-usigentayo no kasano a tinungpal dagiti Nazareo ti karida, adda dagiti napateg a masursurotayo no kasanotayo met a matungpal ti karitayo. b (Mat. 16:24) Kitaentayo ti dadduma kadagita.

AGBALIN A MANAGSAKRIPISIO

4. Sigun iti Numeros 6:​3, 4, kasano a nasubok ti kinamanagsakripisio dagiti Nazareo?

⁴ Basaen ti Numeros 6:​3, 4. Saan a mabalin nga uminum iti arak dagiti Nazareo ken mangan iti produkto a naggapu iti ubas, kas iti bungana ken pasas. Ngem gagangay nga uminum ken mangan dagiti Israelita iti ubas ken kadagiti produkto a nagtaud iti dayta. Ket husto laeng dayta ta awan met ti pagdaksan ti aniaman kadagita. Iladawan pay ketdi ti Biblia a “ti arak a mangparagsak iti puso ti tao” ket regalo ti Dios. (Sal. 104:​14, 15) Nupay mangparagsak dagita iti biag, situtulok a liniklikan dagita dagiti Nazareo. c

5. Ania dagiti sakripisio nga inaramid da Madián ken Marcela, ken apay?

⁵ Kas kadagiti Nazareo, agsaksakripisiotayo met tapno ad-adda a makapagdaydayawtayo ken Jehova. Kitaentayo ti inaramid da Madián ken Marcela. d Nanam-ay ti biag dagitoy nga agassawa. Dakkel ti sueldo ni Madián isu a kayada ti agrenta iti napintas nga apartment. Ngem kayatda nga ad-adu koma ti maaramidanda iti panagserbida ken Jehova. Tapno maaramidda dayta, adda dagiti inaramidda a panagbalbaliw. “Saankami unay a naggasgasto,” imbagada. “Immakarkami iti basbassit nga apartment ken inlakomi ti luganmi.” Saan nga obligado da Madián ken Marcela a mangaramid kadagita a sakripisio—ngem pinilida nga aramiden dagita tapno mapalawada ti ministerioda. Kontento ken naragsakda kadagiti inaramidda a desision.

6. Apay nga agsaksakripisio dagiti Kristiano ita? (Kitaen met ti ladawan.)

 ⁶ Maragragsakan dagiti Kristiano ita nga agsaksakripisio tapno ad-adu ti tiempoda nga agserbi ken Jehova. (1 Cor. 9:​3-6) Saannatayo nga ob-obligaren ni Jehova a mangaramid kadagita a sakripisio. Ken awan met pagdaksan dagita nga insakripisiotayo. Kas pagarigan, insakripisio ti dadduma dagiti trabaho a kaykayatda, ti balayda, wenno uray ti tarakenda. Adu met ti nagdesision a saan pay laeng nga agasawa wenno agpamilia. Dadduma met ti nangpili nga agserbi iti lugar a dakdakkel ti panagkasapulanna, uray no mayadayoda kadagiti ay-ayatenda iti biag. Adu kadatayo ti situtulok a nangaramid kadagita a panagsakripisio ta kayattayo nga ipaay ken Jehova ti kasayaatantayo. Masiguradom nga ipatpateg unay ni Jehova ti aniaman a sakripisiom, dakkel man wenno bassit, tapno ad-adda a makapagserbika kenkuana.—Heb. 6:10.

SITUTULOK NGA AGBALIN A NAIDUMA

7. Ania dagiti posible a nakaipasanguan dagiti Nazareo tapno matungpalda ti karida? (Numeros 6:5) (Kitaen met ti ladawan.)

⁷ Basaen ti Numeros 6:5. Inkari dagiti Nazareo a saanda nga agpapukis. Ipakita dayta ti naan-anay a panagpasakupda ken Jehova. No nabayagen a Nazareo ti maysa nga Israelita, at-atiddog metten ti buokna isu a nalaklaka a mailasin dayta ti sabsabali. No raraemen isuna ti dadduma ken supsuportaranda ti karina, nalaklaka para iti maysa a Nazareo ti agbalin a naiduma. Ngem makapaladingit ta adda dagiti tiempo iti pakasaritaan ti Israel a saan a naapresiar wenno nasuportaran dagiti Nazareo. Idi tiempo ni propeta Amos, dagiti apostata nga Israelita “intultuloy[da] a pinainum dagiti Nazareo iti arak.” Mabalin a kayatda a saan a matungpal dagitoy a Nazareo ti karida a saan nga uminum iti arak. (Amos 2:12) Isu nga adda dagiti tiempo a talaga a masapul a nakaturtured ti maysa a Nazareo tapno matungpalna ti karina ken agbalin a naiduma.

8. Ania ti nakaparegtaam iti kapadasan ti ubing a ni Benjamin?

⁸ Iti tulong ni Jehova, kayatayo met ti agbalin a naiduma uray no managbabaintayo. Kitaentayo ti kapadasan ti 10 ti tawenna a ni Benjamin a maysa a Saksi idiay Norway. Gapu iti gubat idiay Ukraine, nangangay ti eskuelaanda iti programa tapno suportaranda dagiti umili sadiay. Naibilin kadagiti ubbing nga agkantada ken agbadoda iti kakolkolor ti bandera ti Ukraine. Saan a kayat ni Benjamin ti makipaset iti dayta a nasionalistiko a programa isu nga immadayo. Ngem nakita isuna ti maestrana isu a pinukkawanna: “Umayka ditoy. Sika laengen ti ur-urayenmi!” Situtured nga inasitgan ni Benjamin ti maestrana  ken imbagana: “Neutralak Ma’am. Saanak a makipaspaset kadagiti programa a konektado iti politika. Ti agpayso Ma’am, adun a Saksi ni Jehova ti naibalud gapu ta dida kayat ti makigubat.” Naawatan ti maestrana ti inlawlawag ni Benjamin isu a dinan pinilit a makipaset iti programa. Ngem idi kuan, nagsaludsod dagiti kaklasena no apay a dina kayat ti makipartisipar. Permi ti nerbios ni Benjamin ken makasangsangiten. Ngem situtured nga inulitna iti amin a kaklasena ti imbagana iti maestrana. Kalpasan dayta, imbagana kadagiti nagannakna a nariknana a tinulongan ni Jehova a mangidepensa iti pammatina.

9. Kasanotayo a maparagsak ti puso ni Jehova?

⁹ Gapu ta pilpilientayo ti agtulnog ken Jehova, madlaw ti dadduma a naidumatayo kadakuada. Kasapulantayo ti tured tapno maipakaammotayo a maysatayo kadagiti Saksi ni Jehova, iti man trabaho wenno eskuelaantayo. Ket gapu ta dumakdakes ti kababalin ken ugali dagiti tattao iti daytoy a lubong, baka marigatantayo nga agbiag maitunos kadagiti prinsipio ti Biblia ken mangipakaammo iti naimbag a damag iti sabsabali. (2 Tim. 1:8; 3:13) Ngem kanayon koma a laglagipentayo: ‘Maparagsaktayo ti puso’ ni Jehova no saantayo a mabuteng nga agbalin a naiduma kadagiti saan nga agserserbi kenkuana.—Prov. 27:11; Mal. 3:18.

KANAYON A PAGBALINEM NI JEHOVA A KAPATGAN ITI BIAGMO

10. Apay a posible a mabalin a marigatan ti maysa a Nazareo a mangsurot iti bilin a nadakamat iti Numeros 6:​6, 7?

¹⁰ Basaen ti Numeros 6:​6, 7. Saan idi a mabalin nga umasideg dagiti Nazareo iti maysa a bangkay. Baka mapanunotmo a kasla saan met a dakkel a sakripisio dayta. Ngem idi tiempo ti Biblia, narigat para iti maysa a Nazareo a suroten dayta a bilin lalo no kapamiliana ti natay. Kaugalianda idi nga asitgan ti bangkay ti natay. (Juan 19:​39, 40; Ara. 9:​36-40) Ngem gapu iti kari ti maysa a Nazareo, saanna a mabalin a suroten ti kasta a kaugalian. Uray kadagiti naladingit unay a situasion, masapul a tungpalenna latta ti karina tapno maipakitana a natibker ti pammatina. Sigurado a pinabileg ni Jehova dagitoy a matalek nga adipenna tapno maibturanda dagiti kasta a narigat a situasion.

11. Ania ti masapul a determinasion ti maysa a Kristiano no adda dagiti desision nga aramidenna maipapan iti pamiliana? (Kitaen met ti ladawan.)

¹¹ Kas Kristiano, masapul nga itungpaltayo ti karitayo ken Jehova idi nagdedikartayo  ta nakapatpateg dayta. Apektaranna dagiti ar-aramiden ken desisiontayo maipapan iti pamiliatayo. Agpayso met ketdi nga ikagumaantayo nga ibaklay ti Nainkasuratan a responsabilidadtayo iti pamiliatayo. Ngem ti pagayatan ni Jehova ti ipangpangrunatayo, saan a ti kayat dagiti kapamiliatayo. (Mat. 10:​35-37; 1 Tim. 5:8) Ngem no dadduma, tapno maparagsaktayo ni Jehova, baka masapul a mangaramidtayo kadagiti desision a saan a magustuan dagiti kapamiliatayo.

12. Ania ti inaramid ken saan nga inaramid ni Alexandru bayat a naipasango iti narigat a situasion iti pamiliana?

¹² Kitaentayo ti kapadasan ti agassawa a da Alexandru ken Dorina. Makatawen a nagadalda iti Biblia. Ngem idi kuan, nagdesision ni Dorina nga agsardeng nga agadal, ket kayatna nga agsardeng metten ni Alexandru. Ngem nakisarita ni Alexandru ken baketna iti kalmado ken nasayaat a pamay-an nga itultuloyna ti agadal. Nasuron ni Dorina ken impamuspusanna a pasardengen nga agadal ni Alexandru. Imbaga ni Alexandru nga inkagumaanna met a tarusan ti reaksion ni baketna. Ngem saan a nalaka dayta para kenkuana. No dadduma, kritikaren ni Dorina ken nauyong ti sungbatna, isu a kasla kayatna lattan nga isardeng ti agadal iti Biblia. Nupay kasta, inkagumaan ni Alexandru nga iyun-una ni Jehova, bayat nga ipakpakitana met nga ay-ayaten ken raraemenna unay ni baketna. Kamaudiananna, gapu iti nagsayaat nga ulidanna, natignay manen ni baketna nga agadal iti Biblia, agingga a nabautisaran.—Kitaen iti jw.org ti video nga Alexandru ken Dorina Văcar: “Ti Ayat ket Naanus ken Naimbag” iti serye a “Ti Biblia Balbaliwanna ti Biag.”

13. Kasanotayo a maipakita nga ay-ayatentayo ni Jehova ken ti pamiliatayo?

¹³ Ni Jehova ti nangyurnos iti pamilia, ket kayatna nga agbalin a naragsak ti pamiliatayo. (Efe. 3:​14, 15) Isu a tapno agbalintayo a talaga a naragsak, masapul nga aramidentayo dagiti kayat ni Jehova. Dimo koma pulos pagduaduaan nga ipatpateg ni Jehova dagiti ar-aramidem a sakripisio tapno makapagdaydayawka kenkuana bayat nga ay-aywanam ti pamiliam ken ipakpakitam nga ay-ayatem ken raraemem ida.—Roma 12:10.

AGPIPINNAREGTATAYO A MANGTULAD KADAGITI NAZAREO

14. Siasino dagiti nangnangruna nga ikagumaantayo a paregtaen?

¹⁴ Amin a mangpili nga agserbi ken Jehova ita masapul a situtulok a mangaramidda kadagiti sakripisio gapu iti ayat. No dadduma, saan a nalaka nga aramiden dayta. Kasanotayo a matulongan ti tunggal maysa nga  agsakripisio para ken Jehova? Agsaotayo iti makapabileg. (Job 16:5) Adda kadi kakongregasionmo a mangikagkagumaan a mangpasimple iti biagna tapno ad-adu pay ti maaramidanna para ken Jehova? Adda kadi dagiti agtutubo nga am-ammom a situtured nga agbalin a naiduma idiay eskuelaanda uray no narigat? Adda kadi dagiti mayad-adalan iti Biblia ken kapammatiantayo a marigrigatan nga agtalinaed a matalek gapu ta busbusoren ida dagiti kapamiliada? Mangbiroktayo koma kadagiti gundaway a mangparegta kadagita nga ipatpategtayo a kakabsat. Iyebkastayo nga ap-apresiarentayo ti kinamanagsakripisio ken kinaturedda.—Flm. 4, 5, 7.

15. Ania ti ar-aramiden ti dadduma tapno masuportaranda dagiti adda iti amin-tiempo a serbisio?

¹⁵ No dadduma, baka adda maitulongtayo kadagiti kapammatiantayo nga adda iti amin-tiempo a serbisio. (Prov. 19:17; Heb. 13:16) Kasta ti naimpusuan nga ar-aramiden ti maysa a matalek a nataengan a sister idiay Sri Lanka. Gapu ta nanayonan ti pensionna, kayatna a matulongan ti dua nga agtutubo a payunir a sister tapno maitultuloyda ti ministerioda uray narigat ti biag. Isu a binulan nga ik-ikkanna ida iti espesipiko a gatad para iti babayadanda iti telepono. Nagsayaat la ketdin ti ulidan dayta a sister!

16. Ania ti masursurotayo kadagiti Nazareo idi un-unana?

¹⁶ Nagadu la ketdi ti masursurotayo iti nagsayaat nga ulidan dagiti nagboluntario nga agbalin a Nazareo idi un-unana! Ngem adda met ipakita daytoy nga urnos maipapan iti nailangitan nga Amatayo a ni Jehova. Agtaltalek a naimpusuan a kayattayo a paragsaken isuna ken situtuloktayo nga agsakripisio tapno matungpaltayo ti karitayo idi nagdedikartayo. Padpadayawannatayo ta ipalpalubosna a paneknekan ti tunggal maysa kadatayo nga ay-ayatentayo isuna. (Prov. 23:​15, 16; Mar. 10:​28-30; 1 Juan 4:19) Ti urnos maipapan kadagiti Nazareo ket ebidensia a makitkita ken ipatpateg ni Jehova dagiti sakripisiotayo nga agserbi kenkuana. Sapay koma ta determinadotayo nga itultuloy ti agserbi ken Jehova ken situtulok a mangipaay kenkuana iti kasayaatantayo.