1. Yaunchunia juarkin Jehovan enentaimtin ainiana nusha warinia turin ainia?

 Jehová amikri ajasu asam shiir enentaimtsumeash? Untsuri aents amijiai metek Jehová amikri ajasaru asar shiir enentaimiainiawai (YKan. 104:​33, 34). Yaunchunia aents nazareo armiania nu turawarmiania aitkiasan Jehová wakeramun najanatai tusar warinkisha turuiniawai. Nazareo aentscha ya armia? Ni turawarmiania nuna wari nekaamniaitiaj?

2. a) Ya nazareosha armia? (Wekasarma 6:​1, 2). b) Urukamtai nazareo aja wearmia?

² Nazareo tamaka akantukma, juukma, sumamsa tu tamaiti. Nazareo armiania nuka Jehovan enentaimtustai tusar warinkisha turin armiayi. Yaunchuka aishman turutskesha nuwaksha timianu tsawan nazareo ajasan pujuttajai tusa sumamsamniuyayi (Wekasarma 6:​1, 2 aujsata). a Israel aents nazareo ajakka ni warinia turattajai tiniuit nunaka imiatrusan najanatin armiayi. Urukamtaiya nazareo aja wearmia? Jehovan ti anena asar tura Jehová warinmansha ti yainma asar nazareo aja wearmiayi (Muis. 6:5; 16:17 TNM).

3. Nazareo aintsan iisha wari najaneaj?

³ Jesús tamiania nui Moisés akupkamu chichamka sakarmiayi tuma asamtai nuyainia juarkinkia yaksha nazareo ajaschamniauyayi (Kar. 6:2; Rum. 10:4). Iisha  nazareo armiania aintsan ii enentaijiai, ii iwiakmarijiai tura ii enentaimmiarijiai Jehová enentaimtustasar wakeraji (Ruk. 10:27). Jehovai sumameakur ainis tiniuitji. Aminiak enentaimtustatjame tiniu asar Jehovanu warinkish najanniuitji. Nazareo armiania nu ni chichakman itiurkara umi wearmia nu nekaattaji tura iish aitkiasrik ii chichakmari itiur umikminiaitiaj nu nekaawartai (Mat. 16:24 TNM). b

YUUSNA NAJANATAI TUSAR WARINKISHA TURATIN ENENTAIMSARTAI

4. Wekarsama 6:​3, 4 nui tana aintsan nazareo armia nusha warinia turachartiniuya?

⁴ (Wekasarma 6:​3, 4 aujsata). Nazareo armiania nuka uva sameknasha tura ikiaramuncha yuachartiniuyayi tura aintsan vinoncha umarchartiniuyayi. Anairajnia nunaka yajauchichu asamtai ashi aents yu armiayi. Yuusa chichame tawai vinoka Yuus amakrattsamuiti tura aentsu enentain waramtikniuiti tu tawai (YKan. 104:​14, 15). Nazareo aentska nu yuatin tura umartin kunturmaitkiuisha ninki wakerusar nunaka yuatniun tura umartinniasha iniain armiayi. c

5. Ii yachi Madián ni nuwejai warinia turawarmia?

⁵ Nazareo armiania nu turawarmiania aitkiasrik iisha Yuusna yaimkiatai tusar warinkish najanniuitji. Colombianmaya ii yachi Madián ni nuwe Marcelajai d nankaamasarmiania nuna aujmattsatai. Ninkia jea penker najanamunam puju armiayi tura kuitniasha nukap wainin armiayi. Ni junis tuiniawai: Yuusna nukap yaimkiatai tusar wakera asar kuit nankamsar ajapawaij tusar aujmatsamji tura chikich jea yairmanchiniam pujuttsar wemaji nuyasha ii carrorisha surukmaji tu tuiniawai. Yaksha ainis turatarum tachamaitiat Yuusa chichamen nukap etserkatai tusar ainis turawarmiayi. Ainis turawaru asar yamaikia warasar pujuiniawai.

6. Nukap Kristu aents warinia turuinia? (Nakumkamusha iista).

 ⁶ Kristu aentstikia Yuusna warinmansha nu nukap yaimkiatai tusar warinkish turiniaitji (1 Kur. 9:​3-6). Jehovaka warinkisha turawarat tusar utsutmatsji. Jehovanu najanatai tusar warinkisha iniaiyajnia nuka yajauchichuiti. Chikichkia ni jeen jeamtinian wakeruiniaksha warinmansha nukap takakmastinian wakeruiniaksha yawankesha takustinian wakeruiniaksha nunaka iniaisaruiti. Jehovanun nukap yaimkiatai tusar natsak pujustinian wakeruiniawai nuyasha nuatkarsha uchirtichu pujuiniawai. Nuyasha chikichkia ni shuarin ni amikrin ikiukiar aran Yuusa chichamen etserkatniun yaimiuttsar wenawai. Jehovanu nukap yaimkiattsar wakera asar ainis warinkisha turaji. Niniu yaimkiatai tusar warinkish najaneajnia nuna Jehová ti shiir iiyawai (Isr. 6:10).

JEHOVÁ UMIRKATIN ITIURCHATAITKIUISHA KAKARARTAI

7. Nazareo atincha urukamtai yupichuchichuya? (Wekasarma 6:5; nakumkamusha iista).

⁷ (Wekasarma 6:5 aujsata). Nazareo armiania nuka ni intiashin tsupikchartiniuyayi. Jehovan arantuinia asar nuna turu wearmiayi. Ni intiashin esarman takaku asarmatai chikich aentska nazareo ajasaruyania nuna nekaawarminiuyayi tura arantukarminiuyayi. Tumaitkiusha nazareo armiania nuna arantichusha iruniarmiayi. Amós tsawantin Israel aents Yuusan umirkatniun iniaisaru armiania nu nazareo aents vinon umarchartiniuyania nuna nekainiaksha umararat tusar utsu wearmiayi (Ams. 2:12). Ainis asamtai nazareo atinkia yupichuchichuyayi.

8. Benjamin turamiania nujaisha wari nekaamniaitiaj?

⁸ Natsamniuitkiursha Jehová yainmakrin iisha Jehovanu najanatai tusar warinkisha turatin jeaji. Noruega nunkanmaya uchi testigo de Jehová diez uwi takaku warinia najanamia nu nekaatai. Unuimiatainiam Ucranian yayainiak uchikia Ucrania banderarin entsarar nampestin armiayi. Nui pachinkiaij tusa ninkia arantak wajas juakmiayi. Tumaitkiusha ni unuiniamuri arantian wainiak wari nuisha wajateam, nakamkur pujaji tu timiayi. Sapijmiatsuk wikia ainis turuiniamunmanka pachinchaitjiai tu timiayi. Tura nuyasha testigos de Jehová ainiana nuna mesetnum pachiniainiachu asarmatai sepunam enkeawaruiti tu timiayi. Ainis tutai unuikiartinkia  iniaisamiayi. Tumaitkiusha ni ainkia amesha urukamtai ii najaneajnia nusha najantsum tu tiarmiayi. Benjaminkia sapijmiak uutmin nekapramiayi tumaitkiusha kakaram ajas unuikiartinian timiania aintsan ni aincha tiarmiayi. Benjamin ni jeen waketki aparin nukurin junis timiayi: Yuus yaintiakui sapijmiatsuk etserkajai tu timiayi.

9. Wari turakria Jehová waramtiksamniaitiaj?

⁹ Jehová umireakrinkia chikich aentscha paant nuna nekaawartatui. Takatnum turutskesha unuimiatainiam kakaram ajasar testigo de Jehovayaitjiai tu titiniaitji. Tsawan nankaamaki weakui aents ti yajauch ajaki weartatui tuma asamtai Yuus umirkatin tura Yuusna aujmattsatin yupichuchichu atatui (2 Ti. 1:8; 3:13). Tumaitkiusha chikich aentsjai metekchaitkiur Jehová waramtiksattaji (Neka. 27:11; Mks. 3:18).

JEHOVANU EMKA NAJANAWARTAI

10. Wekasarma 6:​6, 7 nui tana nuna umiktaj tusar nazareo armiania nusha urukamtai kakartin armia?

¹⁰ (Wekasarma 6:​6, 7 aujsata). Nazareo armiania nuka yaksha jakan penke weamtukchatin armiayi. Ni shuari jakamtai nekaska nu umiktin itiurchat aminiuyayi. Yaunchuka aents jakamtai penuartaj tusar takasartin armiayi (Juaṉ 19:​39, 40; Tur. 9:​36-40). Nazareo armiania nuka ainis itiurchat nankaamainiaksha Jehovan anena asar umikiartiniuyayi. Itiurchat nankaamainiaksha kakararat tusa Jehová yaya wearmiayi.

11. Ii shuar warinmansha yayakrisha imiankaska wari najanatniuitiaj? (Nakumkamusha iista).

¹¹ Iikia Jehovanu ajakur tiniuitiajnia nu tuke umiktasar wakeriniaitji. Tuma asar warinkish najankursha nekaska Jehová umirkatin enentaimniuitji. Tuma asamtai ii shuar warinmansha yayakrisha ni wakeruiniana nu imiankaska najantsuk Jehová wakerana nu najanniuitji (Mat. 10:​35-37; 1 Ti. 5:8). Urutainsha Jehová umirkataj tusar ii shuar tuiniana nuka najanashtatji.

12. Alexandru itiurchatan wainiak itiurkamia?

¹² Alexandru ni nuari Dorinajai nankaamasarmia nuna nekaawartai. Dorina ni aishrijiai chikichik uwi Yuusa chichamen unuimiarmiayi tumaitiat  ninkia Yuusa chichamen unuimiamun iniaisamiayi, aishrish aitkiasan turat tusa wakerimiayi. Tumaitkiusha ni aishrinkia wikia Yuusa chichamenka tuke unuimiatrattajai tu timiayi. Ni aishri ainis takui ninkia nuna nakitramiayi. Ni aishrinkia Yuusa chichamen unuimia asamtai ni nuwenka nankamas itiurchat amajmiayi turam aishrinkia Yuusa chichamen unuimiamun iniaisatniun enentaimmiayi. Ni nuari ainis iniakmameakuisha ninkia Yuusa chichamen unuimiartinian penke iniaisashmiayi tura ni nuwencha ti arantimiayi. Ni ainis iniakmamkui ni nuwenka ataksha Yuusa chichamen unuimiartinian juarkimiayi tura arum testigo de Jehová ajasmiayi. (Internetnum jw.org nui enkemam Yuusa chichame penker nekawaru asar waras pujuiniawai tana nui video Alexandru tura Dorina Văcar: “Anenkratniuka katsuntas nakawiti tura shiir ajawiti” tana nu iista).

13. Jehová anea asar tura ii shuarsha anea asar wari turamniaitiaj?

¹³ Jehová aentsnaka ni shuarijiai warasar pujuarat tusa najanamiayi (Ipi. 3:​14, 15). Warasar pujustai takurkia Jehová tana nu umirkatniuitji. Ni umirkattsar warinkish turajnia nuna ni wainiawai tura aintsan ii shuarsha penker wainiajnia nunasha ninkia nekawai (Rum. 12:10).

NAZAREO ARMIANA NU NAJANAWARMIANIA AITKIASRIK NAJANATAI TUSAR IKIAKANAIRTAI

14. Ya nekassha ikiakartiniaitiaj?

¹⁴ Jehová enentaimtatikia ni anea asar warinkisha najanatniuitji. Nu turatin yupichuchichu aminiaiti. Warinkish Jehovanu turatai tusar ikiakanairtiniaitji (Job 16:5 TNM). Ame pujamna nuisha yaksha Jehovanun nukap najanattsa warinkisha najanu awak? Uchi natsamaru unuimiatainiam pujaksha Jehovan penker umiru nekamek? Yuusa chichamen unuimia asamtai ni shuari kajerainia nekamek? Kakaram ajasar Jehovan umirainia asarmatai tura Jehovanun najanatai tusar warinkish turuinia asarmatai ikiakarartai (Jirm. 4, 5, 7).

15. Yuusnan nukap yaimiainiana nuna yaintai tusar chikichkia warinia turawaruit?

¹⁵ Ii yachi ii umainsha Yuusnan nukap yaimiainia warijiainsha yainminiaitji (Neka. 19:17; Isr. 13:16). Ii umai  uuntmantu Sri Lanka nunkanmaya ainis turamiayi. Ii umainkia nukap kuit iwiarkaram jimiara ni kain precursor atinian iniaisarain tusa kuitjiai yainkiarmiayi. Ii umainkia ni kai jimiar armiania nuna telefononun akikmakarat tusa kuitian su wearmiayi. Ii umai turamiania nuka ti penkeraiti.

16. Nazareo armiania nuna wari nekaamniaitiaj?

¹⁶ Nazareo armiania nu turawarmiania nuna nukap nekaaji. Tumaitkiusha Jehovanusha nekaaji. Ni wakeramu najanatai tusar wakerajnia nuna tura niniu ajasu asar umirkattsar wakerajnia nunasha nekawai. Jehovaka anentainia asar warinkisha turawarat tusa wakerawai (Neka. 23:​15, 16; Mar. 10:​28-30; 1 Juaṉ 4:19). Nazareo armiania nu turuiniamun Jehová itiur enentaimtimia aitkiasan yamaiya juisha niniu yaimkiatai tusar warinkisha najaneajnia nuna ti shiir iiyawai. Tuma asamtai ii jeamu Jehovanu warinmansha yaimkiatai tusar kakarartai.