1. Kpaɣnɩ ɖooo caanaʋ taa, wɛtʋ kɩbandʋ ndʋ Yehowa sɛyaa lɩzaa nɛ pawɩlɩ?

 TAABALƖYƐ nɖɩ ɖɩwɛ ña nɛ Yehowa mɩ-hɛkʋ taa yɔ, ɖɩmʋ ñɩm ñɛ-ɛsɩndaa? Pɩtʋʋ fɛyɩ se ɖɩmʋ ñɩm ñɛ-ɛsɩndaa! Nɛ pɩtɩkɛ ñe-ɖeke ñɛ-ɛsɩndaa ɖɩmʋ ñɩm. Kpaɣnɩ ɖooo caanaʋ taa, taabalɩyɛ nɖɩ ɖɩɩmʋ ñɩm siŋŋ ɛyaa sakɩyɛ ɛsɩndaa. (Keɣ. 104:​33, 34) Ɛyaa sakɩyɛ la kɩlaŋ se papɩzɩ nɛ pɛsɛɛ Yehowa. Mbʋ caanaʋ taa Izrayɛɛlɩ taa Naziireya mba kaalaba. Mba paakɛnaa? Nɛ ɛbɛ pa-kɩɖaʋ pɩzɩɣ nɛ kɩkpɛlɩkɩ-ɖʋ?

2. (a) Mba Naziireya mba kaakɛnaa? (Kɩgalʋʋ 6:​1, 2) (b) Ɛbɛ yɔɔ Izrayɛɛlɩ mba nabɛyɛ lɩzaɣ se pɛkɛɣ Naziireya mba?

² Tɔm pee «Naziireya tʋ» lɩnɩ Ebree tɔm loyaɣ nakɛyɛ taa nɛ kɔ-tɔbʋʋ lɛ se: «Weyi palɩzɩ-ɩ yɔ,» «Weyi pasɩ-ɩ nɛ hɔɔlʋʋ yɔ» yaa «Weyi pakpaɣaa nɛ paha se ɛla ŋgee tʋmɩyɛ naɖɩyɛ yɔ.» Naziireya mba kɛ Izrayɛɛlɩ mba kpekpeka tɩnaa mba pala kɩlaŋ nɩɩyɩ se pɩsa nɛ patɩŋnɩ ŋgee nʋmɔʋ nakʋyʋ yɔɔ nɛ pɛsɛɛ Yehowa yɔ. Moyizi Paɣtʋ haɣaɣ nʋmɔʋ abalʋ yaa halʋ nɔɔyʋ se eɖuu ŋgee ɖuutu natʋyʋ Yehowa ɛsɩndaa nɛ ɛlɩzɩ se ɛkɛɣ Naziireya tʋ alɩwaatʋ natʋyʋ. a (Kalɩ Kɩgalʋʋ 6:​1, 2.) Alɩwaatʋ ndʋ Izrayɛɛlɩ tʋ nɔɔyʋ ɖuki ɖuutu se ɛkɛɣ Naziireya tʋ yɔ, pɩpɔzʋʋ se ɛɖɔ paɣtʋ natʋyʋ yɔɔ nɛ pɩtɩcɛyɩ se Izrayɛɛlɩ mba lalaa ɩɖɔ tɩ-yɔɔ. Ye mbʋ, ɛbɛ yɔɔ Izrayɛɛlɩ tʋ nɔɔyʋ lɩzɩɣ se ɛpɩsɩɣ Naziireya tʋ? Pɩtʋʋ fɛyɩ se sɔɔlɩm sɔsɔm mbʋ Izrayɛɛlɩ tʋ ɛnʋ ɛwɛnɩ Yehowa yɔɔ nɛ ɛsɩmɩyɛ sɔsɔɖɛ nɖɩ ɛwɛnɩ kʋjɔŋ kɩbaŋ sakɩyɛ weyi Yehowa labɩ-ɩ yɔ ɩ-yɔɔ yɔ, mbʋ seɣtaɣni-i nɛ ɛkpakɩɣ lɩmaɣzɩyɛ nɖɩ.—Wp. 6:5; 16:17.

3. Sɔnɔ, ɛzɩma Ɛsɔ sɛyaa nɩɣzɩnɩ Naziireya mba?

 ³ Naziireya mba ɖʋtʋ sɩ tɩnaɣ alɩwaatʋ ndʋ «Krɩstʋ paɣtʋ» lɛɣzɩ Moyizi Paɣtʋ lone taa yɔ. (Gal. 6:2; Roma 10:4) Paa mbʋ yɔ, ɛzɩ Naziireya mba yɔ, sɔnɔ Yehowa sɛyaa woki pɩ-yɔɔ nɛ pawɩlɩɣ se pɔsɔɔlɩ siŋŋ se pɛsɛɛ-ɩ nɛ pa-laŋɩyɛ pilim, pa-kalɩzaɣ pilim, pa-maɣzɩm pilim nɛ po-ɖoŋ pilim. (Mark. 12:30) Alɩwaatʋ ndʋ ɖɩhaɣ ɖa-tɩ Yehowa yɔ, ɖɩwɩlɩɣ se ɖiɖuu ɖuutu faaa se ɖɩsɛɣ-ɩ. Pɩsa nɛ ɖɩɖɔ ɖuutu ndʋ tɩ-yɔɔ lɛ, pɩpɔzʋʋ se ɖɩla Yehowa sɔɔlɩm nɛ ɖɩlaa kɩlaŋ ɛ-sɛtʋ taa. Ðɩɩtazɩɣ ɛzɩma Naziireya mba ɖɔŋaɣ po-ɖuutu yɔɔ yɔ pɩ-taa lɛ, ɖɩkaɣ naʋ ɛzɩma pa-kɩɖaʋ pɩzɩɣ nɛ kɩsɩnɩ-ɖʋ nɛ ɖa ɖɔɖɔ ɖɩɖɔ ɖo-ɖuutu yɔɔ yɔ. b (Mat. 16:24) Iyele nɛ ɖɩna kɩɖaŋ nɩɩyɩ.

TISI FAA NƐ ŊLAA KƖLAŊ

4. Ɛzɩ Kɩgalʋʋ 6:​3, 4 yɔɔdʋʋ yɔ, kɩlaŋ weyi Naziireya mba laɣaɣ?

⁴ Kalɩ Kɩgalʋʋ 6:​3, 4. Pɩɩwɛɛ se Naziireya mba ikizi sʋlʋm mbʋ payɩ pɩkʋʋ ɛyʋ yɔ nɛ mbʋ pakpaɣ viiñi pee nɛ palabɩna yɔ, paa pɩtɩɩkɛ lɛŋ ñɩna yaa kɩwɩla yɔ. Ɛyaa mba paacɔ-wɛ nɛ pata yɔ, ɖoŋ ɖoŋ lɛ pɔtɔkaɣ wondu ndʋ tɩ-tɔɔnasɩ nɛ panɩɣ leleŋ, nɛ pɩɩmʋnɩ mbʋ; mbʋ pʋyɔɔ yɔ pɩtaakɛnɩ kɩwɛɛkɩm se ɛyʋ ɛtɔɔ tɔɔnasɩ nzɩ. Bibl yɔɔdʋʋ se «[vɛɛ lakɩ] nɛ ɛyʋ laŋɩyɛ nɩɣ leleŋ» nɛ kɩkɛnɩ kʋjɔʋ ŋgʋ kɩlɩnɩ Ɛsɔ cɔlɔ yɔ. (Keɣ. 104:​14, 15) Paa wondu ndʋ tiyekaɣ se ɛyʋ ɛnɩɩ leleŋ yɔ, aziireya mba tisi faaa nɛ pɛpɛm-tʋ pa-tɩ. c

5. Kɩlaŋ weyi Madián nɛ Marcela pakpaɣ lɩmaɣzɩyɛ se palaɣ, nɛ ɛbɛ yɔɔ?

⁵ Ɛzɩ Naziireya mba yɔ, ɖa ɖɔɖɔ ɖɩlaɣ kɩlaŋ se pɩsa nɛ ɖɩsɛɛ Yehowa kiya nɛ pɩkɩlɩ. Iyele nɛ ɖɩna Madián nɛ ɛ-halʋ Marcela d pa-kɩɖaʋ. Pɛkɛ Krɩstʋ mba nɛ nabʋyʋ taatɛɖɩɣ-wɛ tomnaɣ yɔɔ. Madián kaawɛnɩ tʋmɩyɛ kɩbanɖɛ nɖɩ ɖɩha-wɛ waɖɛ nɛ pɛwɛɛ ɖɩɣa kɩbaŋa nakɛyɛ taa yɔ. Paa mbʋ yɔ, paasɔɔlaa se pala tʋma sakɩyɛ Yehowa sɛtʋ taa. Pɩsa nɛ patalɩ pa-kaɖʋwa ŋga lɛ, palɩzaa se pɛlɛɣzɩɣ pe-wezuu caɣʋ. Pɔyɔɔdaa se: «Ðɩtaatasɩɣ yabʋ wondu sakɩyɛ. Ðɩlɩwa nɛ ɖɩkɛɛ ɖɩɣa cikpelaɣ nakɛyɛ taa nɛ ɖɩpɛdɩ ɖɔ-lɔɔɖɩyɛ.» Pɩtaacɛyɩ se Madián nɛ Marcela palaa kɩlaŋ ɛnɩ; ɛlɛ petisaa  nɛ palaa kɩlaŋ ɛnɩ, mbʋ pʋyɔɔ yɔ paasɔɔlaa se pala tʋma sakɩyɛ Yehowa sɛtʋ taa. Pa-taa kaawɛ leleŋ nɛ pɩɩkɛdɩnɩ-wɛ se pakpaɣ lɩmaɣzɩyɛ nɖɩ.

6. Sɔnɔ, ɛbɛ yɔɔ Krɩstʋ mba laɣ kɩlaŋ? (Cɔnɩ ɖɔɖɔ kɩlɛmʋʋ.)

⁶ Sɔnɔ, Krɩstʋ mba hikiɣ taa leleŋ alɩwaatʋ ndʋ palaɣ kɩlaŋ se pɩsa nɛ pehiɣ alɩwaatʋ nɛ pɛsɛɛ Yehowa nɛ pɩkɩlɩ yɔ. (1 Kɔr. 9:​3-6) Yehowa ɛɛpɔzʋʋ-ɖʋ se ɖɩlaa kɩlaŋ ɛnɩ; yaa wondu ndʋ ɖikiziɣ yɔ, pɩtɩwɛɛkɩ pʋyʋ se ɛyʋ ɛwɛɛnɩ-tʋ. Nabɛyɛ kizi tʋma wena paasɔɔlaa yɔ yaa palɩzaa se paamaɣ ɖɩsɩ. Sakɩyɛ kpaɣ lɩmaɣzɩyɛ se pacakɩ ɛɖandʋ alɩwaatʋ natʋyʋ yaa pɔɖɔkʋʋ nesi ɛlɛ paapadɩɣ piya lʋlʋʋ. Lalaa ñalɩzaa se powoki nɛ paɖʋ nesi ɖenɖe pɩpɔzʋʋ tɔm susuyaa sakɩyɛ yɔ, paa pɩpɔzʋʋ se poposini pa-taabalaa nɛ pɔ-hɔʋ taa mba yɔ. Ða-taa sakɩyɛ tisi faaa nɛ palaa kɩlaŋ ɛnɩ, mbʋ pʋyɔɔ yɔ ɖɩsɔɔlaa se ɖɩha Yehowa mbʋ ɖɩwɛna nɛ pɩkpaɖɩ ɖeu yɔ. Ña-taa ɛtɛ se kɩlaŋ weyi payɩ ŋlaɣ se pɩsa nɛ ŋsɛɛ Yehowa yɔ, paa ɩpaɣlaa yaa ɩwɛ ññɩɩ yɔ, ɩmʋ ñɩm siŋŋ ɛ-ɛsɩndaa.—Ebr. 6:10.

TISI FAAA NƐ ŊWƐƐ NDƖ NƐ LALAA

7. Ɛbɛ yɔɔ pɩpɩzaɣ se pɩwɛɛ kaɖɛ Naziireya tʋ nɔɔyʋ se ɛɖɔ e-ɖuutu yɔɔ? (Kɩgalʋʋ 6:5) (Cɔnɩ ɖɔɖɔ kɩlɛmʋʋ.)

⁷ Kalɩ Kɩgalʋʋ 6:5. Naziireya mba ɖuu ɖuutu se paahʋŋ pa-ñʋŋ. Palakaɣ mbʋ se pawɩlɩ se poluzi pa-tɩ kiya Yehowa tɛɛ. Ye Izrayɛɛlɩ tʋ nɔɔyʋ ɛkɛ Naziireya tʋ alɩwaatʋ sakɩyɛ yɔ, ɛ-ñɔsɩ ɖɔʋ nɛ pɩwɛɣ kɛlɛʋ se lalaa ɩna se ɛkɛ Naziireya tʋ. Ye ɛyaa lalaa ɩñaŋɩ-ɩ nɛ peseɣtiɣ-i se ɛɖɔ e-ɖuutu yɔɔ yɔ, pɩwɛɣ-ɩ kɛlɛʋ se ɛwɛɛ ndɩ. Ɛlɛ pɩlabɩ pʋtɔdɩyɛ se alɩwaatʋ natʋyʋ, ɛyaa taañaŋ Naziireya mba Izrayɛɛlɩ taa nɛ pataaɖʋʋ-wɛ nesi. Nayʋ Amoosi alɩwaatʋ taa, Izrayɛɛlɩ ñɩma mba papɩsɩ tisuu yebiyaa yɔ, «[pahaɣaɣ] Naziireya mba vɛɛ se pɔñɔɔ,» nɛ pɩtʋʋ fɛyɩ se palakaɣ mbʋ se piyele nɛ Naziireya mba ɩtaapɩzɩ pɔɖɔ ɖuutu ndʋ poɖuwaa se paatukuuni vɛɛ yɔ tɩ-yɔɔ. (Amo. 2:12) Nabʋyʋ taa, pɩɩpɔzaa se Naziireya tʋ ɛwɛɛ abalɩtʋ pʋcɔ nɛ ɛpɩzɩ ɛɖɔ e-ɖuutu yɔɔ nɛ ɛwɛɛ ndɩ nɛ lalaa.

8. Ɛzɩma Benjamin kɩɖaʋ kpazɩ-ŋ ɖoŋ?

⁸ Ða ɖɔɖɔ, Yehowa pɩzɩɣ nɛ ɛsɩnɩ-ɖʋ nɛ ɖɩla abalɩtʋ nɛ ɖɩwɛɛ ndɩ paa ɖɩwɛ fɛyɛ yɔ. Iyele nɛ ɖɩna Benjamin kɩɖaʋ. Ɛwɛ Nɔɔrɩvɛɛjɩ ɛjaɖɛ taa, ɛwɛnɩ pɩnzɩ 10 nɛ ɛkɛ Yehowa Aseɣɖe Tʋ. You ŋgʋ kɩwɛɛ nɛ kɩlakɩ Ukrɛɛnɩ yɔ kɩ-yɔɔ lɛ, e-sukuli labɩ ɖʋtʋ natʋyʋ se kɩɖʋnɩ nesi mba pɛwɛ Ukrɛɛnɩ ɛjaɖɛ taa yɔ. Pɔpɔzɩ piya se sisuu wondu ndʋ tɩwɛnɩ Ukrɛɛnɩ kɩɖaʋ kɛdɛɛka tɔlɩm yɔ nɛ sitee hendu natʋyʋ. Pɩsa nɛ Benjamin ɛtaaɖʋ ɛ-nɔɔ ɛ-ɛjaɖɛ sɔnzɩ nzɩ sɩ-taa lɛ, ɛsɩŋ poliŋ taa nɛ ɛtɩñɔtɩnɩ ɖenɖe palakaɣ-sɩ yɔ. Paa mbʋ yɔ, wɩlɩyʋ nɔɔyʋ na-ɩ nɛ ekoo nɛ  ɛya-ɩ nɛ ɛtɔ se: «Kɔɔ cɩnɛ lɔŋ nɛ ŋkpɛndɩ ɖɔ-yɔɔ. Ña ɖa-tɩŋa ɖɩɖaŋaa!» Benjamin la abalɩtʋ nɛ ɛñɔtɩnɩ wɩlɩyʋ ɛnʋ nɛ eheyi-i se: «Maatɩnɩɣ hɔɔlʋʋ nakʋyʋ yɔɔ, nɛ maaɖʋʋ mɔ-nɔɔ politiki sɔnzɩ nasɩyɩ taa. Halɩ Yehowa Aseɣɖe Tɩnaa sakɩyɛ wɛ salaka taa mbʋ pʋyɔɔ yɔ pekizaa se paawoki you.» Wɩlɩyʋ ɛnʋ ɛnɩɩ Benjamin tɔm taa nɛ eheyi-i se pɩtɩcɛyɩ se ɛla sɔnzɩ nzɩ. Ɛlɛ, Benjamin sukuli ɖaŋ taa sukulibiya lɛɛsɩ paɣzɩ pɔzʋʋ se ɛbɛ yɔɔ eewoki se ɛkpɛndɩ pɔ-yɔɔ. Sɔɔndʋ kaakpa Benjamin kpem nɛ pɩɩkazɩ pazɩ se ɛpaɣzɩ wiluu; paa mbʋ yɔ ɛlabɩ abalɩtʋ nɛ eheyi sukulibiya tɩŋa tɔm ndʋ eeheyi wɩlɩyʋ yɔ. Pʋwayɩ, Benjamin heyi ɛ-lʋlɩyaa se eɖiɣzinaa se Yehowa sɩnɩnɩ-ɩ nɛ ɛlʋ e-tisuu yɔɔ.

9. Ɛzɩma ɖɩpɩzɩɣ ɖɩla nɛ Yehowa taa la leleŋ?

⁹ Ðɩlɩzaa se ɖɩñaŋ Yehowa, pʋyɔɔ ɛyaa lalaa naɣ se ɖɩwɛ ndɩ. Pɩpɔzʋʋ-ɖʋ abalɩtʋ pʋcɔ nɛ ɖɩlɩzɩ ɖa-tɩ nɛ ɖɩwɩlɩ ɖa-tʋmɩyɛ taa yaa ɖo-sukuli taa se ɖɩkɛ Yehowa Aseɣɖe Tɩnaa. Pɩtasɩ lɛ, ɛjaɖɛ ɖɩnɛ ɖɩ-wɛtʋ nɛ ɖɩ-lakasɩ wɛɛ nɛ pɩtɛzɩɣ wɛɛkʋʋ, pʋyɔɔ lɛ pɩtʋʋ fɛyɩ se pɩkaɣ-ɖʋ labʋ kaɖɛ nɛ pɩkɩlɩ se ɖɩɖɔ Bibl paɣtʋ kila yɔɔ nɛ ɖisusi ɛyaa lalaa tɔm. (2 Tim. 1:8; 3:13) Ɛlɛ, ɖɩtɔzʋʋ paa ɛzɩmtaa se alɩwaatʋ ndʋ ɖɩlakɩ abalɩtʋ nɛ ɖɩwɩlɩ se ɖɩwɛ ndɩ nɛ mba paasɛɣ Yehowa yɔ, ɖiyeki se ‘ɛ-taa ɛla leleŋ.’—Adu. 27:11; Mal. 3:18.

SƖƖ YEHOWA KAJALAƔ ÐEÐE ÑE-WEZUU CAƔƲ TAA

10. Ɛzɩma paɣtʋ ndʋ tɩwɛ Kɩgalʋʋ 6:​6, 7 taa yɔ, tɩ-yɔɔ ɖɔm pɩzaɣ se pɩwɛɛ kaɖɛ Naziireya mba?

¹⁰ Kalɩ Kɩgalʋʋ 6:​6, 7. Naziireya mba taapɩzɩɣ se pɔñɔtɩnɩ sɩɖʋ. Pɩtɩla ŋpɩzɩɣ nɛ ŋmaɣzɩ se pɩtɩkɛ kɩlaʋ sɔsɔʋ nakʋyʋ. Ɛlɛ Bibl alɩwaatʋ taa, pɩɩkɛnɩ kɩlaʋ sɔsɔʋ Naziireya tʋ alɩwaatʋ ndʋ ɛ-hɔʋ taa tʋ nɔɔyʋ sɩkɩ yɔ. Alɩwaatʋ ndʋ tɩ-taa lɛ, sɔnzɩ pɔzaɣ se ɛyaa ɩwɛɛ sɩɖʋ cɔlɔ. (Yoh. 19:​39, 40; Tʋma 9:​36-40) Ɛlɛ Naziireya tʋ taapɩzɩɣ se ɛla sɔnzɩ nzɩ. Halɩ alɩwaatʋ ndʋ Naziireya mba hɔʋ taa tʋ nɔɔyʋ sɩkɩ nɛ pɩpɔzɩ se pɔcɔnɩ wɛtʋ ndʋ ti-ɖeɖe yɔ, pawɩlaɣ se pɛwɛnɩ tisuu sɔsɔm nɛ pɔñɔʋnɩ po-ɖuutu kpam. Pɩtʋʋ fɛyɩ se Yehowa kpazaɣ ɛ-sɛyaa siɣsiɣ tɩnaa mba ɖoŋ se papɩzɩ nɛ palʋbɩnɩ kala wena pakataɣ yɔ.

11. Alɩwaatʋ ndʋ Krɩstʋ tʋ nɔɔyʋ cɔŋnɩ hɔʋ taa tɔm natʋyʋ ɖeɖe yɔ, pɩwɛɛ se ɛtɛ ɛ-taa se ɛlakɩ we? (Cɔnɩ ɖɔɖɔ kɩlɛmʋʋ.)

¹¹ Ða Krɩstʋ mba, ɖɩkpakɩɣ ɖuutu ndʋ ɖiɖuu Yehowa ɛsɩndaa nɛ ɖɩha-ɩ ɖa-tɩ yɔ se tɩ-tɔm cɛyaa. Ðuutu ndʋ, tɩwɛnɩ ɖoŋ lɩmaɣza wena ɖɩkpakɩɣ nɛ mbʋ ɖɩlakɩ alɩwaatʋ ndʋ tɔm natʋyʋ  kɔŋ hɔʋ taa yɔ pɩ-yɔɔ. Ðɩñakɩ pana se ɖɩcɔnɩ ɖɔ-hɔʋ kɩcɛyɩm ɖeɖe, ɛlɛ ɖiiyeki mbʋ Yehowa pɔzʋʋ se ɖɩla yɔ nɛ ɖɩsɩɩ mbʋ ɖɔ-hɔʋ taa mba sɔɔlaa se ɖɩla yɔ kajalaɣ ɖeɖe kaaʋ. (Mat. 10:​35-37; 1 Tim. 5:8) Nabʋyʋ taa, pɩpɩzɩɣ nɛ pɩpɔzɩ se ɖɩkpaɣ lɩmaɣza wena akɛdɩɣnɩ Yehowa ɛlɛ aakɛdɩɣnɩ ɖɔ-hɔʋ taa mba yɔ.

12. Alɩwaatʋ ndʋ Alexandru cɔŋnaɣ hɔʋ taa kaɖɛ naɖɩyɛ ɖeɖe yɔ, ɛbɛ ɛlaba nɛ ɛbɛ ɛtɩla?

¹² Iyele nɛ ɖɩna Alexandru nɛ ɛ-halʋ Dorina pa-kɩɖaʋ. Paawɛɛ nɛ pɛkpɛlɩkɩɣ Bibl nɛ pɩla pɩnaɣ kʋɖʋmaɣ lɛ, Dorina kpaɣ lɩmaɣzɩyɛ se ɛɛtasɩɣ kpɛlɩkʋʋ, nɛ ɛɛsɔɔlaa ɖɔɖɔ se Alexandru ɛtaatasɩ kpɛlɩkʋʋ. Ɛlɛ Alexandru heyi-i nɛ nɔɔ kɩbaŋa nɛ lɛɣtʋ se ewoki pɩ-yɔɔ nɛ ɛkpɛlɩkɩɣ. Pɩtaakɛdɩnɩ Dorina nɛ ɛɛñaɣ pana se ɛñɩɣ ɛ-walʋ yɔɔ nɛ eyele kpɛlɩkʋʋ. Alexandru yɔɔdaa se ɛñakaɣ pana se ɛna mbʋ pʋyɔɔ ɛ-halʋ kaawɛnɩ lɩmaɣza ana yɔ, ɛlɛ pɩtaawɛɛ-ɩ kɛlɛʋ. Nabʋyʋ taa, alɩwaatʋ ndʋ Dorina kaɖaɣnɩ-ɩ nɛ ɛtaayɔɔdʋʋnɩ-ɩ nɛ nɔɔ kɩbaŋa yɔ, pɩlakaɣ-ɩ ɛzɩ eyele Bibl kpɛlɩkʋʋ yɔ. Paa mbʋ yɔ, Alexandru wobi pɩ-yɔɔ nɛ ɛsɩɩ Yehowa kajalaɣ ɖeɖe, nɛ alɩwaatʋ kʋɖʋmtʋ ndʋ tɩ-taa lɛ, ɛwɩlɩɣ ɛ-halʋ sɔɔlɩm siŋŋ nɛ ñamtʋ. Pɩtɛmnaa se ɛ-kɩɖaʋ kɩbaŋʋ seɣti ɛ-halʋ nɛ ɛɖaɣnɩ paɣzʋʋ Bibl kpɛlɩkʋʋ, nɛ pʋwayɩ ɛ-halʋ ɛnʋ ɛha ɛ-tɩ nɛ pamɩyɩsɩ-ɩ lɩm.—Cɔnɩ video Alexandru nɛ Dorina Văcar: «Sɔɔlɩm wɛ suuɖu nɛ pɩlakɩ kɩbandʋ.» Kɩwɛ jw.org yɔɔ hɔɔlʋʋ «Toovenim lɛɣzɩɣ ɛyaa wezuu caɣʋ» yɔɔ.

13. Ɛzɩma ɖɩpɩzɩɣ nɛ ɖɩwɩlɩ sɔɔlɩm Yehowa nɛ ɖɔ-hɔʋ?

¹³ Yehowa labɩnɩ hɔʋ ɖʋtʋ, nɛ ɛsɔɔlaa se ɖɔ-hɔʋ ɛwɛɛ koboyaɣ taa. (Efɛz. 3:​14, 15) Ye ɖɩsɔɔlaa se ɖɩwɛɛ koboyaɣ taa siŋŋ yɔ, pɩpɔzʋʋ se ɖɩla mbʋ Yehowa pɔzʋʋ-ɖʋ se ɖɩla yɔ. Ña-taa ɛtɛ se kɩlaŋ weyi ŋlaɣ nɛ ŋsɛɣ Yehowa, nɛ alɩwaatʋ kʋɖʋmtʋ ndʋ tɩ-taa lɛ ŋcɔŋnɩ ñɔ-hɔʋ yɔɔ nɛ ŋwɩlɩɣ-kʋ sɔɔlɩm nɛ ñamtʋ yɔ, ɩmʋ ñɩm siŋŋ ɛ-ɛsɩndaa.—Roma 12:10.

SEƔTI LALAA NƐ PACAƔ WEZUU ƐZƖ NAZIIREYA MBA YƆ

14. Kɔzɩ kɔzɩ lɛ, mba pɩwɛɛ se ɖɩtɩŋnɩ ɖɔ-tɔm pee yɔɔ nɛ ɖɩkpazɩ ɖoŋ?

¹⁴ Mba payɩ palɩzɩɣ se pɛsɛɣ Yehowa sɔnɔ yɔ, pɩpɔzʋʋ se sɔɔlɩm eseɣti-wɛ nɛ petisi faaa nɛ palaa kɩlaŋ. Nabʋyʋ taa, pɩ-labʋ fɛyɩ kɛlɛʋ. Ɛzɩma ɖɩpɩzɩɣ nɛ ɖɩsɩnɩ ɖama nɛ ɖɩlaa Yehowa kɩlaŋ? Ðɩpɩzɩɣ nɛ ɖɩla mbʋ ye ɖɩtɩŋɩɣnɩ ɖɔ-tɔm pee yɔɔ nɛ ɖɩkpazɩɣ ɖama ɖoŋ yɔ. (Yɔɔb 16:5) Nabɛyɛ wɛ ñɛ-ɛgbɛyɛ taa nɛ pañakɩ pana se pacaɣ wezuu kɛlɛʋ se pɩsa nɛ pala tʋma sakɩyɛ Yehowa sɛtʋ taa? Ŋsɩm piya evelisi nasɩyɩ se sɩlakɩ abalɩtʋ nɛ sɩwɩlɩɣ se sɩwɛ ndɩ sukuli taa paa pɩwɛ-sɩ kaɖɛ se sɩla mbʋ yɔ? Ŋsɩm Bibl kpɛlɩkɩyaa yaa koobiya nabɛyɛ se pɛwɛɛ nɛ pañakɩ pana se pɔɖɔkɩ pe-siɣsiɣ  wɛtʋ paa pɔ-hɔʋ taa mba ɩkaɖɩɣnɩ-wɛ yɔ? Tɛ ña-taa se ŋlakɩ mbʋ payɩ ŋpɩzɩɣ yɔ nɛ ŋseɣti koobiya kʋsɔɔlaa mba nɛ ŋheyi-wɛ se ɖa-taa wɛ leleŋ siŋŋ nɛ kɩlaŋ weyi palaɣ, abalɩtʋ ndʋ pɛwɛna nɛ mbʋ palakɩ Yehowa sɛtʋ taa yɔ.—Filem. 4, 5, 7.

15. Ɛbɛ nabɛyɛ laba nɛ paɖʋ nesi mba pɛwɛ alɩwaatʋ tɩŋa Ɛsɔ sɛtʋ tʋmɩyɛ taa yɔ?

¹⁵ Nabʋyʋ taa, ɖɩpɩzɩɣ nɛ ɖɩla nabʋyʋ ɖeyi ɖeyi nɛ ɖɩsɩnɩ ɖo-koobiya Krɩstʋ ñɩma mba pɛwɛ alɩwaatʋ tɩŋa Ɛsɔ sɛtʋ tʋmɩyɛ taa yɔ. (Adu. 19:17; Ebr. 13:16) Mbʋ koobu halɩñɩnʋ akpadɩyʋ nɔɔyʋ kaasɔɔlɩ siŋŋ se ɛla. Ɛwɛ Sri Lanka ɛjaɖɛ taa. Ɛmʋ hɛzʋʋ tʋmɩyɛ taa nɛ pɛhɛyɩɣ-ɩ liidiye nɖɩ yɔ, pɔsɔzɩ ɖɩ-yɔɔ, nɛ paa liidiye tɔm kaawɛɛ nɛ pɩlakɩ kaɖɛ yɔ, ɛɛsɔɔlaa se ɛsɩnɩ koobiya halɩñɩma nʋmɔʋ lɩzɩyaa nabɛyɛ 2 nɛ powolo pɛ-Ɛsɔ sɛtʋ tʋmɩyɛ yɔɔ. Ɛɛkpaɣ lɩmaɣzɩyɛ se ɛsɩɣ liidiye naɖɩyɛ nɛ hɔɔlʋʋ paa fenaɣ ŋga nɛ ɛcɛlɩ-wɛ nɛ payaɣnɩ kaŋgalaafu. Koobu halɩñɩnʋ ɛnʋ, ɛɛwɛnɩ wɛtʋ kɩbandʋ kpem.

16. Ɛbɛ ɖɩpɩzɩɣ nɛ ɖɩkpɛlɩkɩ kɩɖaʋ ŋgʋ caanaʋ taa Naziireya mba hawa yɔ kɩ-taa?

¹⁶ Pɩtʋʋ fɛyɩ se ɖɩpɩzɩɣ nɛ ɖɩkpɛlɩkɩ lɔŋ kɩbaŋ kɩɖaʋ ŋgʋ Naziireya mba hawa yɔ kɩ-taa. Paa mbʋ yɔ, ɖʋtʋ ndʋ, tɩkpɛlɩkɩɣ-ɖʋ ɖɔɖɔ lɔŋ nɩɩyɩ ɖa-Caa Yehowa yɔɔ. Ɛ-taa tɛma se ɖɩsɔɔlɩ siŋŋ se ɖɩla nɛ ɛ-taa la leleŋ nɛ ɖɩsɔɔlɩ faaa se ɖɩlaa kɩlaŋ nɛ ɖɩɖɔ ɖuutu ndʋ ɖiɖuwaa nɛ ɖɩha-ɩ ɖa-tɩ yɔ tɩ-yɔɔ. Ɛɖʋ-ɖʋ hɩɖɛ nɛ ɛha-ɖʋ waɖɛ se ɖa-maɣmaɣ ɖɩlɩzɩ se ɖɩwɩlɩɣ-ɩ ɖɔ-sɔɔlɩm. (Adu. 23:​15, 16; Mark. 10:​28-30; 1 Yoh. 4:19) Naziireya mba ɖʋtʋ wɩlɩɣ se Yehowa naɣ kɩlaŋ weyi ɖɩlaɣ se pɩsa nɛ ɖɩsɛɛ-ɩ yɔ, nɛ ɩmʋ ñɩm ɛ-ɛsɩndaa. Ye mbʋ, tɛtɛ nɛ ɖɩtɛ ɖa-taa se ɖiwoki pɩ-yɔɔ nɛ ɖɩsɛɣ Yehowa nɛ ɖɩsɔɔlɩ faaa se ɖɩhaɣ-ɩ mbʋ ɖɩwɛna nɛ pɩkpaɖɩ ɖeu yɔ.