អត្ថបទសិក្សា ៧
ចម្រៀងលេខ៥១ យើងប្រគល់ខ្លួនជូនព្រះ!
មេរៀនដែលយើងអាចរៀនពីពួកណាសារីត
«ក្នុងអំឡុងពេលដែលគាត់ជាជនណាសារីត គាត់គឺបរិសុទ្ធចំពោះព្រះយេហូវ៉ា»។—ជប. ៦:៨
ចំណុចផ្ដោត
របៀបដែលគំរូរបស់ពួកណាសារីតអាចជួយយើងឲ្យបម្រើព្រះយេហូវ៉ាដោយមានចិត្តគំនិតលះបង់និងចិត្តក្លាហាន។
១. ក្នុងប្រវត្តិសាស្ត្រ តើពួកអ្នកគោរពប្រណិប័តន៍ព្រះយេហូវ៉ាបានបង្ហាញចិត្តគំនិតបែបណា?
តើអ្នកឲ្យតម្លៃចំពោះចំណងមិត្តភាពរបស់អ្នកជាមួយព្រះយេហូវ៉ាឬទេ? អ្នកច្បាស់ជាឲ្យតម្លៃ។ តាមពិត មិនមែនមានតែអ្នកប៉ុណ្ណោះទេ តាំងពីសម័យបុរាណមនុស្សឥតគណនាមានទស្សនៈដូចអ្នកដែរ។ (ចសព. ១០៤:៣៣, ៣៤) មនុស្សជាច្រើនបានធ្វើការលះបង់ដើម្បីគោរពប្រណិប័តន៍ព្រះយេហូវ៉ា។ នេះជាអ្វីដែលពួកណាសារីតនៅអ៊ីស្រាអែលសម័យបុរាណបានធ្វើ។ តើពួកគេជាអ្នកណា ហើយតើយើងអាចរៀនអ្វីពីគំរូរបស់ពួកគេ?
២. (ក) តើជនណាសារីតជាអ្នកណា? (ជំរឿនបណ្ដាជន ៦:១, ២) (ខ) ហេតុអ្វីជនជាតិអ៊ីស្រាអែលខ្លះសម្រេចចិត្តស្បថធ្វើជាជនណាសារីត?
២ ពាក្យ«ណាសារីត»មកពីពាក្យជាភាសាហេប្រឺដែលមានន័យថា«អ្នកដែលបានត្រូវជ្រើសរើស» «អ្នកដែលបានត្រូវញែកចេញ» ឬ«អ្នកដែលបានប្រគល់ខ្លួន»។ ពួកណាសារីតជាជនជាតិអ៊ីស្រាអែលដ៏ខ្នះខ្នែងដែលបានធ្វើការលះបង់មួយចំនួនដើម្បីបម្រើព្រះយេហូវ៉ាតាមរបៀបដ៏ពិសេស។ ច្បាប់ម៉ូសេបានអនុញ្ញាតឲ្យបុរសឬស្ត្រីធ្វើសម្បថពិសេសមួយចំពោះព្រះយេហូវ៉ា ដោយសម្រេចចិត្តរស់នៅជាជនណាសារីតអស់មួយរយៈពេល។ a (សូមអាន ជំរឿនបណ្ដាជន ៦:១, ២) សម្បថនេះរួមបញ្ចូលការធ្វើតាមការណែនាំដែលជនជាតិអ៊ីស្រាអែលឯទៀតមិនចាំបាច់ធ្វើតាមទេ។ ដូច្នេះ ហេតុអ្វីជនជាតិអ៊ីស្រាអែលណាម្នាក់បានសម្រេចចិត្តធ្វើជាជនណាសារីត? គាត់ទំនងជាធ្វើដូច្នេះ ដោយសារគាត់មានសេចក្ដីស្រឡាញ់ដ៏ជ្រាលជ្រៅចំពោះព្រះយេហូវ៉ា និងមានចិត្តកតញ្ញូដ៏ស្មោះចំពោះពរជាច្រើនពីលោក។—បច. ៦:៥; ១៦:១៧
៣. តើរាស្ត្រព្រះនៅសព្វថ្ងៃនេះស្រដៀងនឹងពួកណាសារីតយ៉ាងដូចម្ដេច?
៣ ការរៀបចំឲ្យមានពួកណាសារីតបានត្រូវបញ្ចប់ពេលច្បាប់ម៉ូសេបានត្រូវជំនួសដោយ«ច្បាប់គ្រិស្ត»។ (កាឡ. ៦:២; រ៉ូម ១០:៤) ប៉ុន្តែដូចពួកណាសារីត រាស្ត្ររបស់ព្រះយេហូវ៉ានៅសព្វថ្ងៃនេះបន្តបង្ហាញបំណងចិត្តជាខ្លាំងដើម្បីបម្រើលោកឲ្យអស់ពីដួងចិត្ត អស់ពីជីវិត អស់ពីសមត្ថភាពរិះគិត និងអស់ពីកម្លាំងកាយ។ (ម៉ាក. ១២:៣០) យើងសុខចិត្តស្បថធ្វើដូច្នេះពេលយើងប្រគល់ខ្លួនជូនលោក។ ដើម្បីរស់នៅស្របតាមពាក្យសម្បថនេះ យើងត្រូវធ្វើតាមបំណងប្រាថ្នារបស់ព្រះយេហូវ៉ានិងធ្វើការលះបង់ដើម្បីបម្រើលោក។ កាលដែលយើងពិចារណាអំពីរបៀបដែលពួកណាសារីតធ្វើតាមសម្បថរបស់ពួកគេ យើងអាចរៀនមេរៀនដ៏មានតម្លៃអំពីរបៀបដែលយើងអាចធ្វើតាមសម្បថរបស់យើង។ b (ម៉ាថ. ១៦:២៤) សូមយើងពិចារណាឧទាហរណ៍ខ្លះ។
ចូរធ្វើការលះបង់
៤. យោងទៅតាមជំរឿនបណ្ដាជន ៦:៣, ៤ តើពួកណាសារីតបានលះបង់អ្វី?
៤ សូមអាន ជំរឿនបណ្ដាជន ៦:៣, ៤។ ពួកណាសារីតមិនបានត្រូវអនុញ្ញាតឲ្យពិសាស្រានិងបរិភោគអ្វីខ្លះ ដូចជាផ្លែទំពាំងបាយជូរនិងទំពាំងបាយជូរក្រៀមទេ។ មនុស្សជុំវិញពួកគេបរិភោគអាហារទាំងនោះជារឿយៗ ហើយអ្វីៗទាំងនោះក៏មិនខុសដែរ។ តាមពិត គម្ពីររៀបរាប់អំពី«ស្រាទំពាំងបាយជូរដើម្បីធ្វើឲ្យចិត្តមនុស្សសប្បាយរីករាយ»ថាជាអំណោយពីព្រះ។ (ចសព. ១០៤:១៤, ១៥) ទោះជាអ្វីទាំងនេះអាចធ្វើឲ្យជីវិតមនុស្សកាន់តែសប្បាយក្ដី ពួកណាសារីតសុខចិត្តលះបង់ដោយជៀសវាងពីអ្វីទាំងនេះ។ c
៥. តើបងម៉ាដៀននិងបងម៉ាសិឡាបានសម្រេចចិត្តធ្វើការលះបង់អ្វី ហើយហេតុអ្វី?
៥ ដូចពួកណាសារីត យើងក៏ធ្វើការលះបង់ដើម្បីគោរពប្រណិប័តន៍ព្រះយេហូវ៉ាឲ្យបានពេញលេញជាង។ សូមគិតអំពីគំរូរបស់បងប្រុសម៉ាដៀននិងបងស្រីម៉ាសិឡា។ ប្ដីប្រពន្ធគ្រិស្តសាសនិកនេះមានជីវិតស្រណុកសុខស្រួល។ បងម៉ាដៀនមានការងារល្អ ហើយពួកគាត់រស់នៅក្នុងអាផាតមិនដ៏ស្អាតមួយ។ ប៉ុន្តែ ពួកគាត់ចង់ធ្វើច្រើនជាងក្នុងកិច្ចបម្រើព្រះយេហូវ៉ា។ ដើម្បីសម្រេចគោលដៅនេះ ពួកគាត់បានសម្រេចចិត្តធ្វើការកែប្រែខ្លះ។ ពួកគាត់បាននិយាយថា៖ «យើងបានចាប់ផ្ដើមកាត់បន្ថយការចំណាយរបស់យើង យើងរើទៅអាផាតមិនតូចជាង ហើយលក់ឡានរបស់យើង»។ បងម៉ាដៀននិងបងម៉ាសិឡាមិនចាំបាច់ធ្វើការលះបង់ទាំងនេះទេ។ ប៉ុន្តែពួកគាត់សម្រេចចិត្តធ្វើអ្វីទាំងនេះ ដោយសារនោះអនុញ្ញាតឲ្យពួកគាត់បង្កើនកិច្ចបម្រើ។ ពួកគាត់ស្កប់ចិត្តនិងសប្បាយចំពោះការសម្រេចចិត្តរបស់ពួកគាត់។
៦. ហេតុអ្វីគ្រិស្តសាសនិកនៅសព្វថ្ងៃនេះធ្វើការលះបង់? (សូមមើលរូបភាពផងដែរ)
៦ គ្រិស្តសាសនិកសព្វថ្ងៃនេះសប្បាយចិត្តធ្វើការលះបង់ផ្សេងៗដើម្បីមានពេលច្រើនជាងក្នុងកិច្ចបម្រើព្រះ។ (១កូ. ៩:៣-៦) ព្រះយេហូវ៉ាមិនតម្រូវឲ្យយើងធ្វើដូច្នេះឡើយ ហើយអ្វីៗដែលយើងលះបង់មិនមែនជាអ្វីដែលខុសទេ។ ជាឧទាហរណ៍ បងប្អូនខ្លះសុខចិត្តមិនមានផ្ទះផ្ទាល់ខ្លួន មិនចិញ្ចឹមសត្វ ឬធ្វើការងារដែលខ្លួនចូលចិត្ត។ បងប្អូនជាច្រើនសម្រេចចិត្តមិនឆាប់រៀបការ ឬសម្រេចចិត្តមិនមានកូនភ្លាមៗក្រោយពីរៀបការ។ បងប្អូនឯទៀតសម្រេចចិត្តបម្រើនៅកន្លែងដែលមានសេចក្ដីត្រូវការច្រើនជាង ទោះជានេះមានន័យថាពួកគេត្រូវរស់នៅឆ្ងាយពីមនុស្សជាទីស្រឡាញ់ក្ដី។ យើងជាច្រើននាក់សុខចិត្តធ្វើការលះបង់ទាំងនេះ ដោយសារយើងចង់បម្រើព្រះយេហូវ៉ាឲ្យអស់ពីសមត្ថភាព។ សូមមានទំនុកចិត្តថាព្រះយេហូវ៉ាឲ្យតម្លៃចំពោះការលះបង់ណាក៏ដោយដែលអ្នកធ្វើដើម្បីបម្រើលោក មិនថានោះតូចឬធំក្ដី។—ហេ. ៦:១០
ចូរសុខចិត្តធ្វើខុសពីគេ
៧. តើជនណាសារីតប្រហែលជាមានការពិបាកអ្វីក្នុងការធ្វើតាមពាក្យសម្បថរបស់ខ្លួន? (ជំរឿនបណ្ដាជន ៦:៥) (សូមមើលរូបភាពផងដែរ)
៧ សូមអាន ជំរឿនបណ្ដាជន ៦:៥។ ពួកណាសារីតបានស្បថថាមិនកាត់សក់របស់ពួកគេទេ។ នេះជារបៀបមួយដើម្បីបង្ហាញការចុះចូលទាំងស្រុងចំពោះព្រះយេហូវ៉ា។ បើជនជាតិអ៊ីស្រាអែលណាម្នាក់ជាជនណាសារីតអស់រយៈពេលយូរ សក់របស់គាត់នឹងដុះវែង ហើយអ្នកឯទៀតនឹងងាយកត់សម្គាល់។ បើអ្នកឯទៀតគោរពនិងលើកទឹកចិត្តគាត់ឲ្យធ្វើតាមពាក្យសម្បថរបស់គាត់ ជនណាសារីតងាយស្រួលជាងធ្វើខុសពីគេ។ ប៉ុន្តែ គួរឲ្យស្ដាយណាស់ ក្នុងប្រវត្តិសាស្ត្ររបស់ជនជាតិអ៊ីស្រាអែលមានពេលខ្លះដែលពួកណាសារីតមិនបានត្រូវគេឲ្យតម្លៃឬគាំទ្រទេ។ ក្នុងអំឡុងសម័យរបស់អ្នកប្រកាសទំនាយអេម៉ុស ជនជាតិអ៊ីស្រាអែលដែលក្បត់ជំនឿ«ចេះតែឲ្យស្រាដល់ពួកណាសារីតផឹក» ទំនងជាក្នុងបំណងធ្វើឲ្យពួកគេបំពានពាក្យសម្បថមិនផឹកស្រា។ (អេម. ២:១២) ជួនកាល ជនណាសារីតទំនងជាត្រូវការចិត្តក្លាហានជាខ្លាំងដើម្បីធ្វើតាមពាក្យសម្បថដែលនាំឲ្យពួកគេធ្វើខុសពីគេ។
៨. ហេតុអ្វីបទពិសោធន៍របស់ប្អូនបេនយ៉ាមីនលើកទឹកចិត្តអ្នក?
៨ ដោយមានជំនួយពីព្រះយេហូវ៉ា យើងក៏អាចមានចិត្តក្លាហានធ្វើខុសពីគេដែរ ទោះជាយើងជាមនុស្សអៀនឬខ្វះទំនុកចិត្តក្ដី។ សូមគិតអំពីគំរូរបស់ប្អូនប្រុសបេនយ៉ាមីនដែលមានអាយុ១០ឆ្នាំនិងជាសាក្សីនៅប្រទេសន័រវែស។ សាលារបស់គាត់ប្រារព្ធពិធីមួយដើម្បីគាំទ្រប្រទេសអ៊ុយក្រែនដោយសារសង្គ្រាមនៅប្រទេសនោះ។ សិស្សសាលាបានត្រូវសុំឲ្យច្រៀងចម្រៀងដោយស្លៀកសម្លៀកបំពាក់ដែលមានពណ៌តំណាងជាតិរបស់ប្រទេសអ៊ុយក្រែន។ ដើម្បីជៀសវាងពីពិធីជាតិនិយមនោះ ប្អូនបេនយ៉ាមីនឈរនៅឆ្ងាយពីកន្លែងដែលគេធ្វើពិធីនោះ។ ប៉ុន្តែគ្រូបង្រៀនម្នាក់បានឃើញគាត់ ហើយស្រែកហៅគាត់ថា៖ «ឆាប់មក! ចូលរួមជាមួយយើង។ ទាំងអស់គ្នាកំពុងចាំកូន!»។ ប្អូនបេនយ៉ាមីនមានចិត្តក្លាហានទៅ ជួបគ្រូ ហើយនិយាយថា៖ «ខ្ញុំកាន់ជំហរអព្យាក្រឹត ហើយអត់ចូលរួមក្នុងរឿងនយោបាយទេអ្នកគ្រូ។ មានសាក្សីព្រះយេហូវ៉ាច្រើនជាប់គុក ដោយសារមិនព្រមចូលធ្វើសង្គ្រាម»។ គ្រូបង្រៀនបានស្ដាប់ការពន្យល់របស់គាត់ ហើយបានប្រាប់គាត់ថាគាត់មិនចាំបាច់ចូលរួមពិធីនោះទេ។ ប៉ុន្តែ សិស្សរួមថ្នាក់ឆ្ងល់ថាហេតុអ្វីបេនយ៉ាមីនមិនចូលរួមជាមួយពួកគេ។ ប្អូនបេនយ៉ាមីនភ័យជាខ្លាំងរហូតដល់ចង់យំ តែដោយចិត្តក្លាហាន គាត់បាននិយាយឡើងវិញតាមអ្វីដែលគាត់បានប្រាប់គ្រូទៅសិស្សមួយថ្នាក់។ ក្រោយមក ប្អូនបេនយ៉ាមីនបានប្រាប់ឪពុកម្ដាយរបស់គាត់ថា គាត់មានអារម្មណ៍ថាព្រះយេហូវ៉ាបានជួយគាត់ឲ្យនិយាយការពារជំនឿរបស់គាត់។
៩. តើតាមរបៀបណាយើងអាចធ្វើឲ្យចិត្តព្រះយេហូវ៉ាត្រេកអរ?
៩ ដោយសារយើងសម្រេចចិត្តចុះចូលតាមបំណងប្រាថ្នារបស់ព្រះយេហូវ៉ា យើងខុសគ្នាស្រឡះពីមនុស្សនៅជុំវិញយើង។ យើងត្រូវការចិត្តក្លាហានដើម្បីប្រាប់អ្នកឯទៀតនៅកន្លែងធ្វើការឬនៅសាលារៀនថាយើងជាសាក្សីព្រះយេហូវ៉ា។ ម្យ៉ាងទៀត កាលដែលចិត្តគំនិតនិងការប្រព្រឹត្តរបស់ពិភពលោកនេះកាន់តែអាក្រក់ទៅៗ យើងទំនងជានឹងកាន់តែពិបាករស់នៅស្របតាមគោលការណ៍គម្ពីរ និងប្រាប់អ្នកឯទៀតអំពីដំណឹងល្អ។ (២ធី. ១:៨; ៣:១៣) ប៉ុន្តែ សូមចាំជានិច្ចថាយើង«ធ្វើឲ្យចិត្ត[ព្រះយេហូវ៉ា]ត្រេកអរ» ពេលយើងខុសស្រឡះពីពួកអ្នកដែលមិនបម្រើលោក។—សុភ. ២៧:១១; ម៉ាឡ. ៣:១៨
ចូរបន្តចាត់ទុកព្រះយេហូវ៉ាថាសំខាន់បំផុតក្នុងជីវិតអ្នក
១០. ហេតុអ្វីការធ្វើតាមតម្រូវការដែលបានត្រូវរៀបរាប់នៅជំរឿនបណ្ដាជន ៦:៦, ៧គឺពិបាកសម្រាប់ពួកណាសារីត?
១០ សូមអាន ជំរឿនបណ្ដាជន ៦:៦, ៧។ ជនណាសារីតមិនអាចទៅជិតសាកសពមនុស្សបានទេ។ នៅសម័យគម្ពីរ តម្រូវការនេះគឺពិបាកណាស់សម្រាប់ពួកណាសារីត ពេលសាច់ញាតិជិតដិតស្លាប់។ ទំនៀមទម្លាប់ពិធីបុណ្យសពនៅសម័យគម្ពីរច្រើនតែតម្រូវឲ្យមនុស្សនៅក្បែរសាកសព។ (យ៉ូន. ១៩:៣៩, ៤០; សកម្ម. ៩:៣៦-៤០) ក៏ប៉ុន្តែ ជនណាសារីតមិនអាចធ្វើតាមទំនៀមទម្លាប់ទាំងនេះបានទេ។ សូម្បីតែនៅពេលដែលក្រុមគ្រួសារកើតទុក្ខជាខ្លាំង ក៏ពួកណាសារីតបង្ហាញជំនឿមុតមាំដោយធ្វើតាមពាក្យសម្បថរបស់ពួកគេ។ ព្រះយេហូវ៉ាច្បាស់ជាបានពង្រឹងកម្លាំងចិត្តអ្នកគោរពប្រណិប័តន៍យ៉ាងស្មោះភក្ដីទាំងនេះរបស់លោក ដើម្បីឲ្យពួកគេស៊ូទ្រាំនឹងការពិបាកដែលពួកគេបានជួបប្រទះ។
១១. តើគ្រិស្តសាសនិកត្រូវតាំងចិត្តធ្វើអ្វីពេលធ្វើការសម្រេចចិត្តអំពីរឿងក្រុមគ្រួសារ? (សូមមើលរូបភាពផងដែរ)
១១ ក្នុងនាមជាគ្រិស្តសាសនិក យើងចាត់ទុកពាក្យសម្បថរបស់យើងក្នុងការប្រគល់ខ្លួនជូនព្រះយេហូវ៉ាថាសំខាន់។ នេះមានឥទ្ធិពលទៅលើការសម្រេចចិត្តនិងការប្រព្រឹត្តរបស់យើងចំពោះរឿងក្រុមគ្រួសារ។ យើងខំប្រឹងបំពេញសេចក្ដីត្រូវការរបស់ក្រុមគ្រួសារយើង ប៉ុន្តែយើងមិនចាត់ទុកបំណង ប្រាថ្នារបស់សមាជិកក្រុមគ្រួសារយើងថាសំខាន់ជាងអ្វីដែលព្រះយេហូវ៉ាតម្រូវពីយើងឡើយ។ (ម៉ាថ. ១០:៣៥-៣៧; ១ធី. ៥:៨) ជួនកាល យើងប្រហែលជាត្រូវធ្វើការសម្រេចចិត្តដែលនាំឲ្យសាច់ញាតិរបស់យើងមិនសប្បាយចិត្ត តែព្រះយេហូវ៉ាពេញចិត្ត។
១២. ពេលបងអេឡិចសេនទ្រូមានបញ្ហាក្នុងក្រុមគ្រួសារ តើគាត់បានធ្វើអ្វី ហើយតើគាត់មិនបានធ្វើអ្វី?
១២ សូមគិតអំពីបទពិសោធន៍របស់បងអេឡិចសេនទ្រូនិងប្រពន្ធរបស់គាត់បងដូរីណា។ ក្រោយពីពួកគាត់រៀនគម្ពីរបានមួយឆ្នាំ បងដូរីណាបានសម្រេចចិត្តឈប់រៀនគម្ពីរ ហើយចង់ឲ្យបងអេឡិចសេនទ្រូឈប់ដែរ។ ប៉ុន្តែ បងអេឡិចសេនទ្រូបានប្រាប់បងដូរីណាដោយចិត្តស្ងប់និងដោយសប្បុរសថា គាត់នឹងបន្តរៀនគម្ពីរ។ បងដូរីណាមិនពេញចិត្តទេ ហើយបានព្យាយាមបង្ខំបងអេឡិចសេនទ្រូឲ្យឈប់រៀន។ បងអេឡិចសេនទ្រូនិយាយថា គាត់ព្យាយាមយល់ថាហេតុអ្វីបានជាបងដូរីណាមានអារម្មណ៍បែបនេះ ប៉ុន្តែនោះពិបាក។ ជួនកាល ពេលបងដូរីណារិះគន់គាត់ ហើយតបឆ្លើយដោយកំហឹង គាត់មានអារម្មណ៍ថាគាត់ចង់ឈប់រៀនគម្ពីរ។ ក៏ប៉ុន្តែ បងអេឡិចសេនទ្រូបន្តចាត់ទុកព្រះយេហូវ៉ាជាបុគ្គលសំខាន់បំផុត ហើយនៅដំណាលគ្នានោះ បង្ហាញសេចក្ដីស្រឡាញ់និងប្រព្រឹត្តដោយការគោរពចំពោះប្រពន្ធរបស់គាត់។ នៅទីបំផុត គំរូដ៏ល្អរបស់គាត់បានជំរុញចិត្តប្រពន្ធឲ្យចាប់ផ្ដើមរៀនគម្ពីរឡើងវិញ ហើយក្រោយមកប្រពន្ធគាត់បានទទួលការជ្រមុជទឹក (សូមមើលវីដេអូដែលមានចំណងជើងថា អេឡិចសេនទ្រូ និងដូរីណា វ៉ាកា: «សេចក្ដីស្រឡាញ់មានចិត្តធ្ងន់ហើយក៏សប្បុរស»នៅគេហទំព័រjw.org/km)។
១៣. តើយើងអាចបង្ហាញសេចក្ដីស្រឡាញ់ចំពោះព្រះយេហូវ៉ានិងក្រុមគ្រួសាររបស់យើងយ៉ាងដូចម្ដេច?
១៣ ព្រះយេហូវ៉ាជាអ្នករៀបចំឲ្យមានក្រុមគ្រួសារ ហើយលោកចង់ឲ្យក្រុមគ្រួសាររបស់យើងមានសុភមង្គល។ (អេភ. ៣:១៤, ១៥) បើយើងចង់មានសុភមង្គលពិតប្រាកដ យើងត្រូវធ្វើអ្វីដែលព្រះយេហូវ៉ាចង់ឲ្យយើងធ្វើ។ សូមជឿជាក់ថាព្រះយេហូវ៉ាឲ្យតម្លៃចំពោះការលះបង់របស់អ្នកដើម្បីគោរពប្រណិប័តន៍លោក កាលដែលអ្នកយកចិត្តទុកដាក់ចំពោះក្រុមគ្រួសារនិងប្រព្រឹត្តទៅលើពួកគេដោយសេចក្ដីស្រឡាញ់និងការគោរព។—រ៉ូម ១២:១០
ចូរលើកទឹកចិត្តគ្នាឲ្យមានទស្សនៈដូចពួកណាសារីត
១៤. តើយើងគួរខំលើកទឹកចិត្តអ្នកណាជាពិសេសដោយពាក្យសម្ដីរបស់យើង?
១៤ អស់អ្នកដែលសម្រេចចិត្តគោរពប្រណិប័តន៍ព្រះយេហូវ៉ានៅសព្វថ្ងៃនេះ ត្រូវសុខចិត្តធ្វើការលះបង់ដែលផុសចេញពីសេចក្ដីស្រឡាញ់ចំពោះលោក។ ជួនកាល នេះមិនងាយស្រួលទេ។ ដូច្នេះ តើយើងអាចជួយគ្នាទៅវិញទៅមកឲ្យមានចិត្តគំនិតបែបនេះយ៉ាងដូចម្ដេច? គឺដោយលើកទឹកចិត្តគ្នាតាមរយៈពាក្យសម្ដីរបស់យើង។ (យ៉ូប ១៦:៥) តើមានអ្នកខ្លះក្នុងក្រុមជំនុំដែលកំពុងខំព្យាយាមធ្វើឲ្យជីវិតរបស់ពួកគេសាមញ្ញ ជាងដើម្បីបម្រើព្រះយេហូវ៉ាច្រើនជាងឬទេ? តើអ្នកស្គាល់ប្អូនៗវ័យក្មេងដែលកំពុងធ្វើខុសពីគេនៅសាលា ទោះជានេះមិនស្រួលសម្រាប់ពួកគេឬ? តើមានសិស្សគម្ពីរឬបងប្អូនរួមជំនឿដែលពិបាករក្សាភាពស្មោះត្រង់ដោយសារការប្រឆាំងពីក្រុមគ្រួសារឬទេ? សូមតាំងចិត្តខំអស់ពីសមត្ថភាពដើម្បីលើកទឹកចិត្តបងប្អូនទាំងនេះ ហើយប្រាប់ពួកគេថាអ្នកកោតស្ងើចចំពោះចិត្តក្លាហានរបស់ពួកគេនិងអ្វីដែលពួកគេកំពុងធ្វើដើម្បីព្រះយេហូវ៉ា។—ភីលេ. ៤, ៥, ៧
១៥. តើអ្នកខ្លះបានគាំទ្រពួកអ្នកដែលបម្រើពេញពេលតាមរបៀបណា?
១៥ ជួនកាល យើងប្រហែលជាអាចស្នើសុំជួយបងប្អូនគ្រិស្តសាសនិកដែលបម្រើពេញពេល។ (សុភ. ១៩:១៧; ហេ. ១៣:១៦) បងស្រីវ័យចាស់ដ៏ស្មោះត្រង់ម្នាក់ដែលរស់នៅប្រទេសស្រីលង្កាមានបំណងចិត្តដ៏ស្មោះបែបនេះ។ កាលដែលប្រាក់ចូលនិវត្តន៍របស់គាត់បានកើនឡើង គាត់ចង់ប្រើលុយនោះដើម្បីជួយប្អូនស្រីវ័យក្មេងពីរនាក់ដែលជាអ្នកត្រួសត្រាយឲ្យបន្តក្នុងកិច្ចបម្រើរបស់ពួកគេទោះជាមានបញ្ហាលុយកាក់ក្ដី។ ដូច្នេះ គាត់បានសម្រេចចិត្តទុកលុយខ្លះមួយឡែករាល់ខែដើម្បីជួយចេញថ្លៃទូរស័ព្ទរបស់ពួកគេ។ បងស្រីនេះពិតជាមានចិត្តគំនិតដ៏ល្អប្រពៃមែន!
១៦. តើយើងអាចរៀនអ្វីពីការរៀបចំឲ្យមានពួកណាសារីតនៅសម័យបុរាណ?
១៦ យើងពិតជាអាចរៀនច្រើនពីគំរូដ៏ល្អប្រសើររបស់បុគ្គលដែលស្ម័គ្រចិត្តធ្វើជាពួកណាសារីតនៅសម័យបុរាណ។ ប៉ុន្តែ ការរៀបចំនេះក៏បង្រៀនយើងនូវអ្វីមួយអំពីព្រះយេហូវ៉ាដែលជាបិតារបស់យើងនៅស្ថានសួគ៌។ លោកមានទំនុកចិត្តថាយើងចង់ធ្វើឲ្យលោកពេញចិត្ត ហើយថាយើងសុខចិត្តធ្វើការលះបង់ដើម្បីរស់នៅស្របតាមពាក្យសម្បថរបស់យើងក្នុងការប្រគល់ខ្លួនជូនលោក។ លោកផ្ដល់កិត្តិយសដល់យើង ដោយឲ្យឱកាសយើងបង្ហាញសេចក្ដីស្រឡាញ់ចំពោះលោក។ (សុភ. ២៣:១៥, ១៦; ម៉ាក. ១០:២៨-៣០; ១យ៉ូន. ៤:១៩) ការរៀបចំឲ្យមានពួកណាសារីតបង្ហាញថាព្រះយេហូវ៉ាកត់សម្គាល់និងឲ្យតម្លៃចំពោះការលះបង់ដែលយើងធ្វើដើម្បីបម្រើលោក។ យ៉ាងនេះ សូមយើងតាំងចិត្តបន្តបម្រើព្រះយេហូវ៉ា ហើយខំអស់ពីសមត្ថភាពដើម្បីធ្វើដូច្នេះ។
តើអ្នកនឹងឆ្លើយយ៉ាងណា?
-
តើពួកណាសារីតលះបង់ប្រយោជន៍និងបង្ហាញចិត្តក្លាហានយ៉ាងដូចម្ដេច?
-
នៅសព្វថ្ងៃនេះ តើយើងអាចលើកទឹកចិត្តគ្នាទៅវិញទៅមកឲ្យបង្ហាញចិត្តគំនិតដូចពួកណាសារីតយ៉ាងដូចម្ដេច?
-
តើការរៀបចំឲ្យមានពួកណាសារីតបង្ហាញអ្វីអំពីទំនុកចិត្តរបស់ព្រះយេហូវ៉ាទៅលើពួកអ្នកគោរពប្រណិប័តន៍លោក?
ចម្រៀងលេខ១២៤ ចូរមានភក្ដីភាពជានិច្ច
a ទោះជាព្រះយេហូវ៉ាបានជ្រើសរើសបុគ្គលខ្លះឲ្យធ្វើជាជនណាសារីតក្ដី បុគ្គលភាគច្រើនទំនងជាជនជាតិអ៊ីស្រាអែលដែលស្ម័គ្រចិត្តបម្រើលោកបែបនេះ (សូមមើលប្រអប់ដែលមានចំណងជើងថា « ពួកណាសារីតដែលបានត្រូវតែងតាំងដោយព្រះយេហូវ៉ា»)។
b ជួនកាល សៀវភៅរបស់យើងបានប្រដូចពួកណាសារីតទៅនឹងពួកអ្នកដែលនៅក្នុងកិច្ចបម្រើពេញពេល។ ប៉ុន្តែក្នុងអត្ថបទនេះ យើងនឹងផ្ដោតអារម្មណ៍ទៅលើរបៀបដែលអ្នកបម្រើទាំងអស់របស់ព្រះយេហូវ៉ាដែលបានប្រគល់ខ្លួនជូនលោក អាចបង្ហាញចិត្តគំនិតដូចពួកណាសារីត។
c តាមធម្មតា មើលទៅពួកណាសារីតមិនមានភារកិច្ចផ្សេងទៀតទេ ដូចជាពួកគេមិនចាំបាច់បំពេញកិច្ចការណាមួយដើម្បីធ្វើតាមពាក្យសម្បថរបស់ពួកគេ។
d ការពណ៌នាអំពីរូបភាព: ពីដំបូលផ្ទះ ជនណាសារីតម្នាក់មើលគេហែសពរបស់សមាជិកក្រុមគ្រួសារជាទីស្រឡាញ់។ ដើម្បីធ្វើតាមពាក្យសម្បថរបស់គាត់ចំពោះព្រះយេហូវ៉ា គាត់មិនអាចចូលរួមក្នុងពិធីបុណ្យសពនោះទេ។