1. Ukexilu webhi wambote wene mulondekesa o abhezi a Jihova tunde ukulu?

 O KWILA eye ubhana valolo ku ukamba we ni Jihova? Se phata! Mu kidi k’eye ngo. Tunde ukulu athu avulu ene mu divwa we mu ukexilu yu. (Jisá. 104:​33, 34) Avulu ene mu xisa ima ku dima ni kubhanga nguzu phala kubheza Jihova. Kiki kyene we kyexile mubhanga o Jinazilé mu izuwa ya akwa Izalayele. Maji ananyi exile o Jinazilé ni ihi itutena kudilonga ku phangu ya?

2. (a) Ananyi exile o Jinazilé? (Dyalwilu 6:​1, 2) (b) Mukonda dyahi sayi akwa Izalayele exile mu sola kubhanga o kikanenu kya kukala Nazilé?

² O kizwelu “Nazilé” kya tundu mu dimi dya Hebalayiku, kyene kilombolola “Muthu a mu Solo,” “a mu Tula ku Mbandu,” mba “wa Dibhakula phala ku bhanga sidivisu ya Katunda”. O kizwelu kiki kijimbulula kyambote o akwa Izalayele exile mu dibhakula ni kuswina kwoso phala kusidivila Jihova mu ukexilu wa katunda. Mu Kitumu kya Mozé, o diyala mba muhatu wexile ni ufolo wa kubhanga kikanenu kya katunda kwa Jihova mu kusola kubhita thembu mu ku musidivila kala Nazilé. a (Tanga Dyalwilu 6:​1, 2.) Kyoso o muthu mukwa Izalayele kya solele kubhanga o kikutu kya kukala Nazilé, mwene wexile mu kayela itendelesu ya tokakale ngo ku Jinazilé o athu amukwa mu kifuxi ka Izalayele kana. Mukonda dyahi phe o mukwa Izalayele weji sola kubhanga o kikanenu kya kusidivila kala Nazilé? Nange o akwa Izalayele exile mu bhanga kiki mukonda dya henda ya yadikota kwa Jihova, ni phala kulondekesa o kisakidilu kya mu mabesá oso exile mu a bhana Jihova.—Mate. 6:5; 16:17.

3. Mu ukexilu webhi o mundu wa Nzambi lelu adifu ni Jinazilé m’ukulu?

³ Kyoso “o Kijila kya Kidistu,” kya bhingana o Kijila kya Moze, o mundu wa Nzambi kexile dingi mu sidivila kala Jinazilé. (Nga.  6:2; Lom. 10:4) Maji kala kyexile mu bhanga o Jinazilé, o mundu wa Nzambi lelu ene mu suluka mu kulondekesa o vondadi ya, ya kumusidivila ni muxima wa woso, ni mwenyu woso, ni kilunji kyoso, ni nguzu yoso. (Mál. 12:30) Mu vondadi yetu, tu bhanga o kikutu kya ku sidivila Jihova kyoso ki tudibhakula kwa Mwene. Phala kukumbidila o kudibhakula kwetu, twa tokala kubhanga o vondadi ya Jihova ni ku kala polondo phala ku xisa ni ku lungulula kabasa kima ku mwenyu wetu, phala kumusidivila. Kyoso ki tuya ni kudilonga kyebhi o Jinazilé kyexile mu kumbidila o kikanenu kya, twanda katula madisá avulu alungu ni kyebhi ki tutena we ku kumbidila o kudibhakula kwetu. b —Mat. 16:24.

KALA POLONDO PHALA KUTA O VONDADI YE KUDIMA

4. Kala kilondekesa Dyalwilu 6:​3, 4, nguzu yebhi ya bhingile kubhanga o Jinazilé phala kukumbidila o kikutu kya?

⁴ Tanga Dyalwilu 6:​3, 4. O Jinazilé katokalele kunwa uholwa woso-woso, katokalele we kudya kima ki tunda ku muxi wa muvidi, kala o ji uva, ki kale ja kukuta mba ja wisu. Maji o akwa Izalayele amukwa exile munwa uholwa ni kudya ji uva ki kale ja kukuta mba ja wisu. O kubhanga o ima yiyi ki kyexile kima kyayibha, mu kidi o Bibidya itumbula o vinyu kala ujitu, utunda kwa Nzambi. Yene yamba we kwila o ‘vinyu isangulukisa o muxima wa muthu.’ (Jisá. 104:​14, 15) Sumbala o kudya ni kunwa kusangulukisa o muthu, o Jinazilé exile polondo phala kudituna o ima yiyi mukonda dya kikutu kya. c

5. Ima yahi ya bhange phange Madián ni muhatu we Marcela, ni mukonda dyahi?

⁵ Kala o Jinazilé, etu we twene mu xisa ima yavulu ku dima phala kubheza kyambote Jihova. Mu kifika tala o phangu ya phange Madián ni muhatu we Marcela. d O dikaza didi dyexile ni jimbote javulu ku mwenyu. Phange Madián wexile ni salu yambote yamukwatekesele kukala ni inzo yafwama. Maji ene amesenene kubhanga dingi mu sidivisu ya kwa Jihova. Phala kubhanga kiki, ene a solo kusosolola ima ku mwenyu wa. Ene ambe: “Kya dyanga, twa solo kwila kitwanda ngastala kitadi kyavulu kala ki twexile mubhanga, twayi mutunga mu inzo yofele, anga twasumbisa o dikalu dyetu.” Phange Madián ni Marcela kabhingile kubhanga o ima yoso yiyi—maji ne kiki, ene a kibhange mukonda amesenene kukalakala dingi mu sidivisu ya Jihova. Kindala ene asanguluka kyavulu mukonda dya kusola kulungulula o mwenyu wa mu ukexilu yu.

6. Mukonda dyahi lelu o jiselevende ja Jihova ene mu lungulula ima yavulu ku mwenyu wa phala kumusidivila? (Tala we ofoto.)

 ⁶ Lelu, o mundu wa Jihova wene musanguluka mu kulungulula ima ku mwenyu phala kukala dingi ni kithangana kya ku musidivila. (1 Ko. 9:​3-6) Jihova kene mu tubhinga phala kubhanga o ima yoso yiyi; ku mbandu yamukwa o ima itwene muxisa kudima kiyayibha we, kana. Mu kifika, amoxi ala polondo phala kuxisa kudima o inzo ya, mba o salu yawabhela kyavulu. Avulu ene musola kukala hanji makudi mba kukamba hanji kuvwala twana ne mwene se a kazala kya. Amukwa ene musola kuya musidivila mu ididi mwa bhindamena dingi aboki, ne mwene se kubhinga kukala dikanga dya makamba mba dya jindandu. Avulu mudyetu twala polondo phala kubhanga o ima mu ukexilu yu mukonda twa mesena kusidivila Jihova ni muxima wetu woso. Ejiya-kyu kwila Jihova ubhana valolo yavulu ku ima yoso i ubhanga, kikale yofele mba yamakota, phala ku musidivila. —Jih. 6:10.

KALA POLONDO PHALA KU DITUNGULA MWAXAXI KA AKWENU

7. Mukonda dyahi nange kyexile mubhonza phala o Jinazilé kukumbidila o kikanenu kya? (Dyalwilu 6:5) (Tala we ofoto.)

⁷ Tanga Dyalwilu 6:5. O muthu wabhangele o kikutu kya Nazilé katokalele kubhuta o ndemba. Yu wexile ukexilu wa kulondekesa kwila wa dibhakwile kwa Jihova. Se muthu mu Izalayele wexile musidivila kala Nazilé mu thembu yavulu, o ndemba ye yeji lebha we kyavulu. Kyenyiki, kikyeji bhonza phala akwa kumona kwila wa bhangele o kikutu kya Nazilé. Se athu amukwa exile mu muxila ni kumuswinisa kukumbidila o kikanenu kye, kikyeji bhonza phala o Nazilé kukolokota ni kuditungula mwaxaxi ka akwa. Maji, kima kya kuluwala kwijya kwila, sayi ithangana mu izuwa ya akwa Izalayele, o Jinazilé kexile mu axila ne ku akwatekesa. Mu izuwa ya polofeta Amoji, o akwa a Izalayele a lungulukile o kidi exile mubhana vinyu ku Jinazilé phala ku inwa. Ene nange exile mubhanga kiki phala ku atendala n’a bhukumukine o kikutu kyâ, kya kukamba kunwa uholwa. (Amo. 2:12) Sayi ithangana, o Jinazilé a bhingile kuswina kyavulu phala kusuluka mu kukumbidila o kikanenu kya, ni kudituna kubhanga o ima exile mubhanga we akwa.

8. Ihi ya kuswinisa mu musoso wa kamuzangala Benjamin?

⁸ Ni kikwatekesu kya Jihova, etu we tutena kulondekesa kuswina ni kuditungula mwaxaxi ka akwetu, ne mwene se tu akwa jisonyi. Tala o phangu ya Benjamin, Mbangi ya Jihova wala ni dikwinyi dya mivu mu ixi ya Noroega. Mukonda dya ita yamubhita ku Ucrânia, mu xikola ye, a bhangemu kyonge phala kuswinisa o athu a ixi yenyoyo. O ana a abhingi kuta izwatu yala ni jikolo ja dibandela dya ixi ya Ucrânia ni kwimba mwimbu. Phala kadite mu maka ya a jinguvulu,  Benjamin wa solo kukala dikanga dya kididi bhwexile mubhitila o kyonge. Maji, o mulongexi we wamumono yu wamwixana ni dizwi dya swina wixi: “Eye wa tokala kwiza bhabha kindala ni tukale kumoxi. Etwenyoso twa mukukingila!” Ni kuswina kwoso, Benjamin wazukama kwa mulongexi we, yu wa mwambela: “Eme kingene mudita mu maka a jinguvulu, kinganda bhanga we kiki lelu. Mu kidi, jimbangi javulu ja Jihova ala mu kaleya mukonda dya kudituna kuya mu ita.” O mulongexi waxikina o kitambwijilu kya Benjamin ni wamutangela kwila kabhingile kubhanga mbandu mu maka enyo. Maji, o jikoleka je a mateka ku mwibhula se mukonda dyahi mwene waditunu kudibunda kumoxi ni ene. Benjamin wa thandanganyele kyavulu, kate kwakambele ngo weji dila, maji ne kiki, ni kuswina kwoso mwene watangela o jikoleka je joso o ima yazwelele kya kwa mulongexi we. Mu kusuluka, Benjamin watangela o jitata je kwila mu kithangana kenyokyo wexile mudivwa kwila Jihova wexile mu mukwatekesa kuzokela o kixikanu kye.

9. Etu tutena kusangulukisa o muxima wa Jihova mu ukexilu webhi?

⁹ Kuma twa solo kubelesela Jihova, o athu amukwa ene mutena kumona kwila etu kitwadifu ni ene. Twa bhingi kuswina phala kutangela ku athu ku salu mba ku xikola kwila etu tu Jimbangi ja Jihova. Ku mbandu yamukwa, kuma ukexilu ni wendelu wa mundu yu wamuya ni kuyibha dingi, nange kyanda tubhonza dingi kyavulu kubelesela o itumu ya Bibidya ni kubokela akwetu o njimbu yambote. (2 Ti. 1:8; 3:13) Maji, lembalala jinga kwila, etu tusangulukisa o muxima wa Jihova kyoso ki tuswina ni kulondekesa kwila kitwadifu ni yo k’ene mu mubheza.—Jisa. 27:11; Mal. 3:18.

SULUKA MU KUTA JIHOVA KUPHOLO KU MWENYU WE

10. Kyebhi o kukayela o kitumu kyotumbule mu divulu dya Dyalwilu 6:​6, 7 kyexile mubhonza phala o Jinazilé?

¹⁰ Tanga Dyalwilu 6:​6, 7. O Jinazilé katokalele kuzukama ku kimbi. Maji, eye nange uxinganeka kwila kiki kikyexile kibhidi kya dikota. Maji mu izuwa yenyoyo, kyeji tena kubhonza kyavulu ku muthu wexile Nazilé kubelesela o kitumu kiki, se o muthu wafwile wexile ndandu ye ya kazola. Mukonda mu ithangana yavulu, mu kizuwa kya kufunda kwa bhingile kwila o athu a kala bhu mbandu ya kimbi. (Nzw. 19:​39, 40; Ika. 9:​36-40) Maji o muthu wexile Nazilé, keji tena kukayela o ima yiyi. Ne mwene kyoso kyexile mu dibhana ni maka ku mwiji mu ithangana yiyi ya malamba, o Jinazilé exile mulondekesa kixikanu kya kolo mu kubhanga yoso phala kukumbidila o kikanenu kya. Se phata Jihova wexile  mubhana nguzu ku jiselevende jiji ja fiyele phala kukolokota mu ibhidi yexile mudibhana-nayu.

11. Mu kudibhana ni maka ku mwiji, ihi yatokala kubhanga o Kidistá? (Tala we ofoto.)

¹¹ Kuma tu Jikidistá, o kudibhakula kwetu kwa Jihova kwala ni valolo yavulu. Kiki kifunyisa o ukexilu wetu wa kusola ni kubhanga o ima mu maka alungu ni mwiji. Etu twene mubhanga yoso phala kukumbidila o itumu ya Bibidya yalungu ni kulanga o mwiji wetu, maji kituxikina kwila o vondadi ya mwiji wetu yene ikala kupholo dya vondadi ya Jihova. (Mat. 10:​35-37; 1 Ti. 5:8) Sayi ithangana, mukonda dya kusola kusangulukisa Jihova, o jindandu jetu a batula o ukamba n’etu.

12. Mu kudibhana ni maka a bhonzo ku mwiji, ihi yabhange Alexandru, ni kima kyahi kakibhange?

¹² Tala o musoso wa Alexandru ni muhatu we Dorina. Kiyadi kya a mateka kudilonga o Bibidya kumoxi. Mu kubhita muvu, Dorina wasolo kweha kudilonga, yu wamesenene kwila Alexandru weha. Maji, ni kilendu kyoso wamutangela kwila weji suluka. Kiki kikyasangulukisa Dorina. Mwene wexile mubhanga yoso phala kumujijidika kweha kudilonga. Alexandru wambe kwila wexile musota kutendela se mukonda dyahi muhatu we wexile mudivwa mu ukexilu yu, maji kyexile mumubhonza. Sayi ithangana, kyoso Dorina kyexile mumutatela ni kumuzwela ima yayibha, mwene wexile mudivwa kwila keji tena kusuluka mu kudilonga o Bibidya. Ne kiki, Alexandru wasuluka mu kuta Jihova kupholo, ni kuzola, ni kulondekesa henda ni kuxila kwa muhatu we. Ku disukilu, o phangu ye yambote yaswinisa muhatu we kuvutuka mu kudilonga o Bibidya. Kupholo dya kwenda amubatizala.—Tala o vidyu Alexandru ni Dorina Văcar: “O Mukwa Henda, Mukwa Mwanyu, wa Batama” mu mbandu ya kibuka kya jividyu ni dyambu “O kidi Kilungulula o Myenyu ya Athu,” mu sayte jw,org.

13. Kyebhi ki tutena kulondekesa henda kwa Jihova ni ku mwiji wetu?

¹³ Jihova mwene wabhange o mwiji, yu wamesena kwila tukala ni kusanguluka ku mwiji. (Efe. 3:​14, 15) Se twamesena kusanguluka mu kidi, twabhingi kubhanga itubhinga Jihova. Ejiya-kyu kwila, Jihova ubhana valolo yavulu mu nguzu yoso iwene mubhanga phala kumusidivila kyoso ki uya ni kulanga ni kutalatala o mwiji we ni henda ni kuxila.—Lom. 12:10.

TU DISWINISYENU MUDYETU PHALA KUKAYELA O PHANGU YA JINAZILÉ

14. Benge-benge a nanyi utwatokala ku aswinisa bhukaxi ka izwelu yetu?

¹⁴ Oso a sola kubheza Jihova lelu, a bhingi kukala polondo phala kulungulula mba kuxisa ima ku mwenyu wa mukonda dya henda ya kwa mwene. Sayi ithangana kitena kubhonza kubhanga kiki. Kyebhi ki tutena ku dikwatekesa mudyetu  kusuluka mu kulondekesa o ukexilu yu? Mu kuswinisa akwetu bukaxi ka izwelu yetu. (Jobe 16:5) O kwila sayi muthu mu kilunga kye wa musota ku sosolola ima ku mwenyu we phala kukalakala dingi mu sidivisu ya Jihova? O kwila wejiya mizangala ene mulondekesa kuswina mu kuditungula kala jiselevende ja Jihova ku xikola, ne mwene kyene mu abhonza kubhanga kiki? O kwila sayi maxibulu a Bibidya mba jiphange amudibhana ni ibhidi ya kusuluka mu kulondekesa o ufiyele wa mukonda dya izukutisu ya mwiji? Kyenyiki, tubhangyenu yoso itutena, phala kuswinisa o athu ya ni ku atangela kwila, twasanguluka kyavulu mu kuswina kwene mulondekesa ni nguzu yene mubhanga phala kusidivila Jihova.—Filim. 4, 5, 7.

15. Kyebhi amoxi kyene mukwatekesa yo ala musidivisu ya thembu yoso?

¹⁵ Sayi ithangana, tutena kukwatekesa o jiphange ala mu sidivisu ya thembu yoso. (Jisa. 19:17; Jih. 13:16) Kiki kyene kya mesenene kubhanga phange imoxi ya muhatu mwadyakimi kya, wa tungu ku ixi ya Sri Lanka. Ku kitadi kyexile mu mufuta mbeji ni mbeji, a mubandekesaku dingi. Kyenyiki, mwene wa mesenene kukwatekesa mizangala iyadi ya ahatu exile aboki a thembu yoso, phala a kolokote mu sidivisu ya, sumbala ni ibhidi yalungu ni kitadi, yexile mudibhana-nayu o aboki enyo. Mwene wa solo ku afutila o saldo ya mitelembe ya, mbeji ni mbeji. O phang’yetu yiyi ya muhatu, walondekesa ukexilu wambote!

16. Ihi itutena kudilonga ni Jinazilé jokulu?

¹⁶ Se phata kwila tutena kudilonga kyavulu ni phangu ya Jinazilé! Maji o kudibhakula kwa Jinazilé kutulonga kima kyalungu ni Tata yetu ya dyulu, Jihova. Mwene weijya kwila etu twa mesena kumusangulukisa, ni kwila twala polondo phala kubhanga kabasa kima kyabhingi phala kukumbidila o kikanenu kya kudibhakula kwetu. Mwene utujingisa mu kutwehela kusola kulondekesa o henda yetu kwa mwene. (Jisa. 23:​15, 16; Mál. 10:​28-30; 1 Nz. 4:19) O maka alungu ni Jinazilé alondekesa we kwila Jihova umona anga ubhana valolo yavulu mu ima yoso itwene mubhanga phala kumusidivila. Mu kiki, tubhang’yenu yoso itutena phala tusuluke mu kusidivila Jihova.