1. Нава тʹәрихийеда хьзмәткʹаред Йаһоԝа чь ԛимәт дькьрьн?

 ДОСТИЙА мә тʹәви Йаһоԝа тьштәки гәләк ԛимәт ә, ӧса нинә? Бь һʹәзара сала, бь милйона мәрьв жи гәләк ԛимәт кьрьнә әв дости (Зәбур 104:33, 34). Гәләк мәрьва жь алийе хԝәда ԛӧрбан кьрьнә, сәва кӧ Йаһоԝарʹа хьзмәт кьн. Мәсәлә, Нәзиред кӧ ԝәʹде бәреда Исраеледа дьжитьн, ԝана жи ӧса дькьр. Гәло әԝана кʹи бун, у әм чь дькарьн жь мәсәла ԝан һин бьн?

2. а) Нәзир кʹи бун? (Жьмар 6:1, 2) (б) Һьнә Исраелийа чьма сонда Нәзирийе дьхԝарьн?

² Хәбәра «Нәзир» жь хәбәрәкә Ибрани те, йа кӧ те һʹәсабе «Йәки Щӧдәкьри», «Йәки Башԛәкьри», йан «Йәки Тʹәсмилкьри». Нәзира һьнә ԛӧрбан жь алийе хԝәда дькьрьн, сәва кӧ бь щурʹе мәхсус Йаһоԝарʹа хьзмәт кьн. Ль гора Ԛануна Муса, ча жьн ӧса жи мер дькарьбун ль бәр Йаһоԝа сонд бьхԝарана, кӧ сәр ԝәхтәке ча Нәзир бьжитана a (Бьхунә Жьмар 6:1, 2). Жь бо пеканина ве сонде, лазьм бу кӧ ԝана хԝә ль һьнә ԛәйда бьгьртана, йед кӧ бона Исраелийед дьн нибун. Гәло һьнә мәрьва чьрʹа дьхԝәстьн бьбьнә Нәзир? Әʹйан ә мәʹни әв бу, кӧ ԝана Йаһоԝа гәләк һʹәз дькьр у дьхԝәстьн рʹазибуна хԝә бона кʹәрәмед ԝи нишан кьн (Ԛануна Дӧщари 6:5; 16:17).

3. Хьзмәткʹаред Хԝәде чаԝа мина Нәзира нә?

³ Чахе Ԛануна Муса бәтал бу у ԛануна Мәсиһ дәԝса  ԝе гьрт, Нәзирти жи бәтал бу (Галати 6:2; Рʹомайи 10:4). Ле диса жи рʹожа иройин, хьзмәткʹаред Йаһоԝа мина Нәзира дьхԝазьн бь тʹәмамийа дьле хԝә, щанийа хԝә, һʹьше хԝә у ԛәԝата хԝә Ԝирʹа хьзмәт кьн (Маркос 12:30). Чахе әм хԝә тʹәсмили Йаһоԝа дькьн, әм бь рʹәзәдьли сонд дьхԝьн кӧ әме ӧса бькьн. Сәва кӧ әм сонда хԝә биньн сери, әм гәрәке ль гора ԛьрара Йаһоԝа бьжин у һьнә ԛӧрбана бькьн. Ԝәрә әм бьньһерʹьн кӧ Нәзира чаԝа сонда хԝә дьанинә сери, у әм чаԝа дькарьн ль гора сонда хԝә бьжин b (Мәтта 16:24).

ҺАЗЬР БӘ ԚӦРБАНА БЬКИ

4. Ль гора Жьмар 6:3, 4, Нәзира чь ԛӧрбан дькьрьн?

⁴ Бьхунә Жьмар 6:3, 4. Нәзир гәрәке хԝә жь һʹәму щурʹә шәрав у ичке, ӧса жи жь тьрийа у жь һәр тьште кӧ жь тьрийа чекьри бу, хԝә дур бьгьртана. Мәрьвед дьн жь тьштед ӧса шабун дьстандьн, чьмки хԝарьн у вәхԝарьна ван тьшта ԝанрʹа ԛәдәхәкьри нибу. Кʹьтеба Пироз дьбежә, шәрава кӧ «ша дькә дьле инсен» пʹешкʹешәкә жь Хԝәде йә (Зәбур 104:14, 15). Ле бәле, Нәзира бь рʹәзәдьли изьна хԝә дьданә алики, кӧ ԝан тьшта нә бьхԝьн у нә жи вәхԝьн. c

5. Мадйан у Марселайе жь алийе хԝәда чь ԛӧрбан кьрьн, у чьма?

⁵ Әм жи мина Нәзира, ԛӧрбана дькьн, ԝәки бькарьбьн һе зедә Йаһоԝарʹа хьзмәт кьн. Һәла дина хԝә бьдьнә мәсәла Мадйан у Марселайе d. Жийина ԝан рʹьһʹәт бу, у бь сайа пʹәра кӧ Мадйан жь хәбата хԝә ԛазанщ дькьр, ԝана дькарьбу мала хԝәйә мәзьн у башда бьжитана. Ле ԝана дьхԝәст һе зедә хьзмәт кьн. Ләма жи ԝана сафи кьр, кӧ жийина хԝәда һьнә гӧһастьна бькьн. Әԝана дьбежьн: «Мә хәрщед хԝә кем кьрьн, әм дәрбази маләкә бьчʹук бун у мә әʹрәба хԝә фьрот». Мадйан у Марсела мәщбур нибун жь алийе хԝәда ԝан ԛӧрбана бькьн. Ԝана хԝәха сафи кьр ван гава бавежьн, сәва кӧ бькарьбьн һе зедә Йаһоԝарʹа хьзмәт кьн. Ле әԝана бона сафикьрьнед хԝә ԛә пʹошман нәбунә.

6. Чьма Мәсиһи иро ԛӧрбана дькьн? (Бьньһерʹә ӧса жи шькьл.)

 ⁶ Гәләк Мәсиһи ԛӧрбана дькьн, ԝәки һе зедә хьзмәт кьн (1 Корьнтʹи 9:3-6). Рʹаст ә Йаһоԝа жь мә дәʹԝа накә, кӧ әм ԝан ԛӧрбана бькьн, ле чь кӧ әм дькьн, нәрʹаст нинә. Мәсәлә, һьнә мәрьв жь бо хьзмәтийа хԝә сафи дькьн, кӧ хәбатәкә баш ԛәбул нәкьн, маләкә ӧсада нәжин, кʹижан кӧ бь дьле ԝан ә, йан жи малда һʹәйԝана хԝәй нәкьн. Гәләк жи сафи дькьн кӧ зу нәзәԝьщьн, йан жи дәрберʹа пәй зәԝащерʹа зарʹа нәйньн. Һьнәк жи дәрбази бажар йан ԝәлатед дьн дьбьн, дури мәрьвед хԝәйи незик дьминьн, ԝәки хьзмәт кьн ԝедәре, кʹидәре һʹәԝщәти һәйә. Бәле, гәләк хушк-бьред мә бь рʹәзәдьли ԛӧрбана дькьн, чьмки дьхԝазьн йа һәрә баш бьдьнә Йаһоԝа. Ԛӧрбанед кӧ тӧ дьки, сәва кӧ Йаһоԝарʹа хьзмәт ки, фьрԛи тʹӧнә мәзьн ьн йан бьчʹук ьн, баԝәр бә кӧ Йаһоԝа гәләк ԛимәт дькә (Ибрани 6:10).

БЬ МЕРХАСИ ЖЬ КӘСЕД ДЬН ЩӦДӘ БӘ

7. Чьма дьԛәԝьмә Нәзирарʹа чәтьн бу, кӧ хԝәйе созе хԝә бьн? (Жьмар 6:5) (Бьньһерʹә ӧса жи шькьл.)

⁷ Бьхунә Жьмар 6:5. Нәзира сонд дьхԝар кӧ пʹорʹе хԝә нәбьрʹьн. Ӧса ԝана нишан дькьр, кӧ бь тʹәмами хԝә тʹәсмили Йаһоԝа кьрьнә. Пʹорʹе ԝан мәрьва, йед кӧ гәләк ԝәхт Нәзир бун, чьԛас дьчу дьһа дьреж дьбу, у мәрьвед дьн жи бь чʹәʹве хԝә дьдитьн кӧ әԝана Нәзир ьн. Ле йазьх, жь тʹәрихийа Исраеле те кʹьфше, ԝәки мәрьва щарна Нәзир ԛимәт нәдькьрьн у пьштгьрийа ԝан нәдькьрьн. Мәсәлә, рʹожед Амос пʹехәмбәрда, Исраелийед кӧ жь Йаһоԝа дур кʹәтьбун, шәрав дьданә Нәзира кӧ вәхԝьн, ча те кʹьфше ԝәки әԝана сонда хԝә бьтʹәрʹьбиньн (Амос 2:12). Әʹйан ә кӧ щарна бона Нәзира һеса нибу, ԝәки хԝәйе созе хԝә бьн у жь кәсед дьн щӧдә бьн.

8. Тӧ жь сәрһатийа Бенжамин чь һин буйи?

⁸ Әм чьԛас шәрмокә бьн жи, бь аликʹарийа Йаһоԝа әм дькарьн мерхас бьн у жь кәсед дьн щӧдә бьн. Ԝәрә әм дина хԝә бьдьнә сәрһатийа Бенжамин, зарʹәкә 10 сали, йе кӧ ль Норԝәже дьжи. Мәкʹтәба ԝида, бона пьштгьрийа Украинайе бәрнамәкә мәхсус һатә дәрбазкьрьне. Зарʹарʹа һатә готьне, ԝәки әԝана кʹьнщед бь рʹәнгед бәйраԛа Украинайе ль хԝә кьн у стьранәке бежьн. Бенжамин сәва кӧ нәкʹәвә нав ве бәрнама насйоналисти, һʹәвәки дур сәкьни. Ле дәрсдар әԝ дит у бь дәнге  бьльнд кьрә гази: «Дә ԝәрә! Әм гьшк һивийа тә нә!» Бенжамин бь мерхаси незики дәрсдар бу у жерʹа гот: «Әз тʹәви политике у тʹәви тʹӧ шьхӧле ԝе набьм. Иро гәләк Шәʹдед Йаһоԝа кәледа ньн, чьмки әԝана начьнә шәрʹ». Дәрсдар Бенжаминрʹа ԛайил бу у изьн да ԝи, ԝәки әԝ тʹәв нәбә. Ле һьнә һәвалдәрсханед ԝи жь ԝи пьрсин һәла әԝ чьрʹа тʹәви ԝан набә. Бенжамин ӧса бәрхԝә кʹәт, кӧ һьндьк мабу бьгьрийа, ле әԝи диса жи тьштед кӧ дәрсдаррʹа готьбу, бь мерхаси бәр һʹәму һәвалдәрсханед хԝә ԝәкʹьланд. Паше, Бенжамин де-баве хԝәрʹа гьли кьр кӧ әԝи тʹәхмин кьр ԝәки Йаһоԝа али ԝи кьр әԝ баԝәрийа хԝә бьпʹарезә.

9. Әм чаԝа дькарьн дьле Йаһоԝа ша кьн?

⁹ Әм жь мәрьвед дәр-доре хԝә щӧдә дьбьн, чьмки әм гӧрʹа Йаһоԝа дькьн. Мәрʹа мерхаси лазьм ә, ԝәки әм ль щийе хәбате йан мәкʹтәбеда бежьн, кӧ әм Шәʹдед Йаһоԝа нә. Фькьр у кьред мәрьвед кӧ Йаһоԝа нас накьн, чьԛас дьчә дьһа хьраб дьбә, ләма дьбәкә мәрʹа чәтьн бә, ԝәки ль гора принсипед Кʹьтеба Пироз бьжин у мьзгинийе бәла кьн (2 Тимотʹейо 1:8; 3:13). Ле бир нәкьн, гава әм натьрсьн жь ԝан мәрьва щӧдә бьн, йед кӧ Йаһоԝарʹа хьзмәт накьн, дьле Ԝи гәләк ша дьбә (Мәтʹәлок 27:11; Малахи 3:18).

БЬРА ЙАҺОԜА ӘʹМЬРЕ ТӘДА ЛЬ ЩИЙЕ ПЕШЬН БӘ

10. Чьрʹа пеканина дәʹԝакьрьна жь кʹьтеба Жьмар 6:6, 7, бона Нәзира дькарьбу чәтьн буйа?

¹⁰ Бьхунә Жьмар 6:6, 7. Нәзир гәрәке незики тʹӧ щьнйази нәбуна. Аликива дькарә бе кʹьфше, ԝәки әв йәк алийе ԝанда ԛӧрбанәкә мәзьн нибу. Ле гава мәрьве ԝани незик дьмьр, һьнге әԝ йәк бона ԝан дькарьбу гәләк чәтьн буйа. Ԝәʹде бәре, гава кәсәк дьмьр, мәрьвед ԝи ль гора әʹрф-әʹдәта щьнйазе ԝи бона чʹәʹлкьрьне һазьр дькьрьн (Йуһʹәнна 19:39, 40; Кʹаред Шандийа 9:36-40). Ле Нәзира жь бо сонда хԝә нькарьбун әԝ әʹрф-әʹдәт банийана сери. Бәле, ԝәʹде шине жи, Нәзир бь амьни хԝәйе сонда хԝә бун. Бе шьк Йаһоԝа ԛәԝат дьда ԝан, ԝәки әԝана бькарьбьн ԝәʹде чәтьнайед ӧса тәйах кьн.

11. Малбәтеда, гәрәке әм ча Мәсиһи чь бькьн? (Бьньһерʹә ӧса жи шькьл.)

¹¹ Сонда тʹәсмилбуйина мә Йаһоԝарʹа, бона мә гәләк фәрз ә. Әв сонд сәр  сафикьрьн у рʹабун-рʹуньштьна мә малбәтеда жи, һʹӧкӧм дькә. Әм һәмьки щабдарийед хԝәйә малбәте, кӧ ль гора Кʹьтеба Пироз ьн, бь дьл у щан тиньн сери, ле әм тʹӧ щар хԝәстьнед нәфәред хԝә сәр дәʹԝакьрьнед Йаһоԝарʹа нагьрьн (Мәтта 10:35-37; 1 Тимотʹейо 5:8). Ләма жи щарна лазьм ә кӧ әм сафикьрьнед ӧса бькьн, кʹижан кӧ дьбәкә мәрьвед мә хԝәш нәйен, ле дьле Йаһоԝа ша дькьн.

12. Гава малбәта Александрда проблемәк пешда һат, әԝи чь кьр, ле чь нәкьр?

¹² Ԝәрә әм дина хԝә бьдьнә сәрһатийа Александр у жьна ԝи Доринайе. Чахе әв жьн-мер ида саләке Кʹьтеба Пироз һин дьбун, Доринайе сафи кьр һинбуне бьдә сәкьнандьне, у дьхԝәст Александр жи ве йәке бькә. Ле әԝи бь нәрми жьна хԝәрʹа гот, ԝәки әԝ ԝе һинбуне бәрдәԝам кә. Әв йәк ль Доринайе хԝәш нәһат, у әԝе зоре мере хԝә дькьр, ԝәки һинбуне бьдә сәкьнандьне. Александр дьхԝәст жьна хԝә фәʹм бькә кӧ әԝ чьрʹа ӧса дькә, ле әԝ йәк нәһеса бу. Чәнд щара, гава Доринайе әԝ рʹәзил дькьр у сәрт щаба ԝи дьда, һьндьк дьма кӧ Александр һинбуна Кʹьтеба Пироз бьда сәкьнандьне. Ле диса жи, әԝи Йаһоԝа дьда щийе пешьн, һьм жи ԛәдьре жьна хԝә дьгьрт у һʹәзкьрьна хԝә жерʹа дьда кʹьфше. Ԝәхт шунда, Доринайе бь сайа рʹабун-рʹуньштьна ԝийә баш, һинбуна Кʹьтеба Пироз тʹәзәда дәстпекьр, у ахьрийеда һатә ньхӧмандьне.—Сәр jw.org, ве пʹареда «Рʹастийа Хԝәде Жийина Мәрийа Дьгӧһезә», бьньһерʹә видео, Александр у Дорина Векар: «Һʹәзкьрьн Сәбьр Дькә у Ԛәнщ ә».

13. Әм ча дькарьн нишан кьн кӧ әм һьм Йаһоԝа һьм малбәта хԝә һʹәз дькьн?

¹³ Малбәта пешьн Йаһоԝа саз кьрьбу, у әԝ дьхԝазә малбәта мә бәхтәԝар бә (Әфәси 3:14, 15). Һәрге әм бь рʹасти дьхԝазьн бәхтәԝар бьн, әм гәрәке ван тьшта бькьн, чь кӧ Йаһоԝа дьхԝазә әм бькьн. Ләма гава тӧ бона малбәта хԝә хәм дьки у һьндава ԝанда бь һʹәзкьрьн у ԛәдьр и, дӧдьли нәбә ԝәки Йаһоԝа ԛимәт дькә ԛӧрбанед тә, кӧ тӧ дьки, ԝәки ԝирʹа хьзмәт ки (Рʹомайи 12:10).

КӘСЕД ДЬН ҺЕЛАН КӘ КӦ ӘԜАНА МИНА НӘЗИРА БЬН

14. Илаһи лазьм ә кӧ әм бь гьлийа кʹе бьшьдиньн?

¹⁴ Һʹәму хьзмәткʹаред Йаһоԝа гәрәке һазьр бьн кӧ жь һʹәзкьрьне ԛӧрбана бькьн. Щарна әв йәк нәһеса йә. Ле  әм чаԝа дькарьн ве йәкеда али һәвдӧ бькьн? Бона ве йәке, лазьм ә кӧ әм бь гьлийа һәвдӧ һелан кьн (Ибо 16:5). Гәло щьвата тәда һьнә хушк-бьра хирәт дькьн, ԝәки жийина хԝә һе һеса кьн, сәва бькарьбьн һе зедә хьзмәт кьн? Тӧ зарʹ у щаһьлед ӧса нас дьки, йед кӧ мәкʹтәбеда бь мерхаси пьштгьрийа рʹастийе дькьн? Йан жи, гәло тӧ һьнә хԝәндәкʹаред Кʹьтеба Пироз йан хушк-бьра нас дьки, йед кӧ Йаһоԝарʹа амьн дьминьн, чахе нәфәред ԝан мьԛабьли ԝан дәртен? Чьԛас жь дәсте тә те, бь готьнед хԝә ԝана бьшьдинә у ԝанрʹа бежә кӧ тӧ чьԛас ԛимәт дьки мерхаси у ԛӧрбанед ԝан кӧ әԝана дькьн (Фьлимон 4, 5, 7).

15. Һьнә кәс чаԝа аликʹарийе дьдьнә хьзмәткʹаред һәртʹьм?

¹⁵ Щарна дьбәкә мәщал чедьбә кӧ әм аликʹарийе бьдьнә хьзмәткʹаред һәртʹьм (Мәтʹәлок 19:17; Ибрани 13:16). Шри Ланкайеда, хушкәкә әʹмьрда мәзьн дьхԝәст ве йәке бькә. Гава пенсийа ԝе зедә бу, әԝе хԝәст али дӧ пешәнгед щаһьл бькә, ԝәки әԝана бькарьбьн нава чәтьнайед економикида хьзмәтийа хԝә Йаһоԝарʹа бәрдәԝам кьн. Ләма әԝе сафи кьр һәр мәһ бона хәрщед тʹеле аликʹарийе бьдә ԝан. Рʹасти жи әв хушк бона кьре хԝә һежайи пʹайа йә!

16. Әм дькарьн жь Нәзирийе чь һин бьн?

¹⁶ Әм дькарьн жь мәсәла ван мәрьва, йед кӧ бь рʹәзәдьли дьбунә Нәзир, гәләк дәрса һин бьн! Ле сонда Нәзирийе, дәрһәԛа Баве мәйи әʹзмана жи һьнә тьшт мә һин дькә. Йаһоԝа баԝәр ә кӧ әм бь дьл у щан дьхԝазьн дьле ԝи ша кьн, у һазьр ьн ԛӧрбана жи бькьн, сәва кӧ хԝәйе сонда хԝә бьн. Әԝ бь дьловани мәщале дьдә мә кӧ әм избат бькьн, ԝәки әм ԝи һʹәз дькьн (Мәтʹәлок 23:15, 16; Маркос 10:28-30; 1 Йуһʹәнна 4:19). Нәзирти дьдә кʹьфше кӧ Йаһоԝа ԛимәт дькә ван ԛӧрбана кӧ әм дькьн, ԝәки жерʹа хьзмәт кьн. Ләма жи ԝәрә чьԛас жь дәсте мә те, әм бона Йаһоԝа бькьн у дьле хԝәда сафи кьн, ԝәки әм тʹӧ щар хьзмәтийа хԝә нәдьнә сәкьнандьне!