CIIN BWAAL CYA KULONG CYA 7
MUSAMBW A 51 Tudi badilambula kudi Nzambi
Malongweesh matudy mwa kulongel ku mudimw a biin nazir
“I mujilang kudy Yehow mu mafuk mindiy moos ma bu Nazir.”—KUB. 6:8, NWT.
BWAAL BUTAM
Mudy cileejel cya biin Nazir mwa kwiitwambulwiish bwa kukadil Yehow mudimw ni meej ma kwiitwaal ni mucim mukasakan.
1. I lungeny kaay lulengel ludy bahambidil ba Yehow baleej kacy ku kal?
WANGANGATOK ni buseeb buvul bulund bwiibuh ni Yehow eeny? Cya biin ki ciwuloolong! Ni kwiish teng uw kaayeeb. Kutangil teng mu biisang bya kal, baat bavul i balong byaab naak. (Mis. 104:33, 34) Baat bavul i balek myand yivul bwa kuhambidil Yehow. Ki cilongel baat baakadyobw babiikan mu Izaleel wa kal neey biin Nazir. Baat aab baakady bangany ni i malongweesh kaay matudy mwa kuhetel ku cileejel cyaabab?
2. a) Bilondeshel Kubal kwa baat 6:1, 2, Biin Nazir baakady bangany? b) Bwabiny biin Izaleel bakwaabw baakady bakat kwiicih bwa kushaal biin Nazir?
2 Mwaak “Mwiin Nazir” i mwaalukil ku mwaak wa ciin Ebreh umvumvwiij neey, “Muut udyobw basungul,” “Muut udyobw bateek ku butamb,” eecy “Muut udy mwiicih.” Mwaak oow, umvumvwiij bilengel mushind waakady biin Izaleel ba cisumy biibudishomw myand yivul bwa kulongel Yehow mudimw mu mushind a habwaah. May ma Mawej maheeley Moyiz maakady miitabil mwaan-mulum eecy mwaan-mukaj bwa kulongey mucih a habwaah kudy Yehow hakusungul bwa kwiikal mwiin Nazir bwa ciisang kaahand. a (Bal Kubal kwa Baat 6:1, 2.) Haakady mwiin Izaleel ulong mucih bwa kushaal mwiin Nazir, eecy ulong malay ma kushaal mwiin Nazir, waakady ukooyel ku may maakady biin Izaleel bakwaabw kabay bakooyel. Bwabiny mwiin Izaleel waakady usungul bwa kwiicih bwa kushaal mwiin Nazir? Lukat luvul lwaakady naalw mwiin Izaleel kudy Yehow ni dyanyish bwa mabenesh Mindiy ki byaakady bisak mwiin Izaleel bwa kulong nook.—Mmu. 6:5; 16:17.
3. I mushind kaay udy baat ba Yehow leel bafwanakan ni biin Nazir?
3 Haakady “diiy dya Krist” dihing ha “may ma Mawej maheeley Moyiz”, baat ba Mawej kabaakadyoh mwa kwiiy cikwaabw biin Nazir. (Kal. 6:2; Rom 10:4) Nook, teng bu biin Nazir, leeloow baat ba Yehow i bakat kutungunuk ni kumukadil mudimw ni mucim aabab woos, ni muuy aabab woos ni meej maabab moos ni makand maabab moos. (Mark 12:30) Tudy biihang bwa kwiicih bwa kumukadil mudimw hatwiilaalambul kudy Yehow. Bwiitut kukumbaj mucih iitut, bikaam tulong cidy Yehow mukat ni twiibudishomw myand yikwaabw bwa kumukadil mudimw. Hatukookontonon mwaakady biin Nazir bakumbaj mucih aabab, tudy mwa kuhet malongweesh ma buseeb habitaatal mushind utudy mwa kukumbaj mucih iitut. b (Mat. 16:24) Tutalaay bimw bileejel.
IITWAAL BWA KUKADIL MAWEJ MUDIMW
4. Bilondeshel Kubal kwa baat 6:3, 4, i biny byaakady biin Nazir ni bwa kulek?
4 Bal Kubal kwa Baat 6:3, 4. Kabaakadyoh bend biitabil biin Nazir bwa kunw maal ma kabond eecy kudy tumum twa mviny tubish eecy tuum. Baat baakadyobw naabw ha cyaab aacy baakady bakat ha ciibidil byaakudy bya nook ni baakady ni kabingil ka kwiibikatobw, ni cikwaabw kabyaakadyoh bend bibiih bwa kudy byaakudy eeby. Bibl uleeleeb neey: “maal ma mviny masaasanguluj micim ya baat” i cya bukish cya kudy Mawej. (Mis. 104:14, 15) Cikwaabw, ning mwaakady biit eeby mwa kuh muut musangal mu shikacil indiy, biin Nazir bakacil mwa kwiibilek. c
Udy mukatok bwiibuh kwiibudishok myand hakwiitwaal mu mudimw a Yehow, teng bu mulongel biin Nazir eeny? (Tal cikos 4-6)
5. I myand kaay yaakady Madián ni Marcela basungul bwa kwiibudishomw ni bwabiny?
5 Teng bu biin Nazir, twiibuubudishomw myand yikwaabw hakwiitwaal bikasakan mu mudimw a Yehow. Tukontononaay cileejel cya Madián ni Marcela. d Biin maluw biin Krist aab baakady ni makut mavul ni nzubw mulengel. Madián waakady ni mudimw mulengel waakady mumwambulwiish bwa kuhet nzubw mulengel. Ning naak, baakady bakat kwiitwaal bikasakan mu mudimw a Yehow. Bwa kukumbaj kiihacil kaabab aak, bangacil dihangadik dya kuheehej shikacil aabab. Baleeleeb neey: “Tutangil kukeehesh buuny bwa makut matwaakady tutuul. Tuyiil katweel mu nzubw mukeeh ni tut kuhaan mashiny miitut.” Madián ni Marcela kabaakadyoh bend mwa kwiibudishomw myand yivul nook—ki balongel nook bwa kuvudij mudimw aabab a bukajaady. Biyumvumvw bilengel ni musangal bwa mahangadik maakadyobw bangat aam.
6. Bwabingany biin Krist ba leel biibubudishomw myand yikwaabw? (Tal cikwaabw cifwaatul.)
6 Biin Krist ba leel baheehet musangal adyobw biibuubudishomw myand yikwaabw hakwiitwaalobw bikasakan ku mudimw a bukajaady. (1 Kor. 9:3-6) Yehow kiinoh bend wiitulomb bwa kwiibudishomw myand; eecy myand yitudy biibudishomw kayiishoh bend yibiih. Cileejel, bakwaabw i balek mudimw waakadyobw bakat bikasakan, eecy nzubw. Bavul i bangat dihangadik dya kushaal bajik bwa ciisang kaahand eecy dya kulek kulel hadyobw batweel mu maluw. Bakwaabw i bangat dihangadik dya kuy kambulwiish ha cyaab cikaakaamobw bakajaady bavul, ning biby bikaam kuy kuleeh ni baat badyobw bakat. Bavul ba kutudy i biibudishomw myand ya nook, bwaal tudy bakat bwa kwaakish Yehow ciit cilengel citudy naacy. Iikal mutwiishibw neey Yehow ukwangangat ni buseeb buvul bwa myand yoos yiwudy mwiibudishomw ning yiy yiikal yiikeeh eecy yivul hawudy musungul bwa kumukadil mudimw.—Ebr. 6:10.
KAT BWA KWIIKAL MUSHILANGAN NI BAKWAABW
7. Bilondeshel Kubal kwa Baat 6:5, i lutat kaay lwaakady mwiin Nazir uhet haakadyey uneemek mucih indiy? (Tal cikwaabw cifwaatul.)
7 Bal Kubal kwa Baat 6:5. Biin Nazir baakady biicih bwa kulek kutendesh sik. Kulong nook kwaakady kuleej mwaakadyobw bitwaal bwa kukooyel kudy Yehow. Haakady mwiin Izaleel ushaal mwiin Nazir bwa mafuk mavul, sik yindiy yaakady mwa kuleeh bikasakan ni baat bakwaabw baakady mwa kumumanyik biheehel. Haakady baat bakwaabw bamuneemek ni bamukashish ku micim bwa kutungunukey ni kuneemek mucih indiy, byaakady biheehel menmen bwindiy kwiikal mushilangan ni baat bakwaabw. Bya lus, kwaakady biisang bikwaabw byaakady biin Izaleel bakwaabw kabay baneemek eecy banyish biin Nazir. Mu ciisang cya muprofet Amos, biin Izaleel batontolody baakady “banwiish maal, aab baakady biicih bwa kulek kwiiman,” misang yikwaabw bwa kwiibasak bwa kunyangobw mucih aabab a kulek kun maal. (Amos 2:12) Mu biisang aaby, byaakady bikaam bwa mwiin Nazir iikal ni mucim mukasakan bwa kutungunukey ni kuneemek mucih bwa kwiikal mushilangan ni baat bakwaabw.
Mwiin Nazir waakady uneemek mucih indiy waakady mukat kwiikal mushilangan ni baat bakwaabw (Tal cikos 7)
8. I biny bikukaakashish mu bwaal bwa Benjamin?
8 Ku dyambulwiish dya Yehow, tut byeet tudy mwa kuhet mucim mukasakan bwa kwiikal bashilangan ni bakwaabw, ning tut biikal baat baakiish baleeb bikasakan. Tukontonoonaay cileejel cya Benjamin, temw a mivw diikumy wa mu cibunj cya Norvege. Balongolweel mu kalaas kaababw bwa kulong bwaal kaahand bwa kut diiivit dya mu Ukraine nyam ku mikon. Balombel baan boos bwa kumbobw musambw a cibunj cya Ukraine haakadyobw bakidish drapoh. Bwa kulek kutweelakaney mu myand eey, Benjamin wangacil dihangadik dya kwimanakan kuleeh ni cyaab cyaakadyobw balongel bwaal oobw. Nook, mulongweesh mukwaabw umutadil ni umubikeen ni diiy dikasakan neey: “Bikaam wiiy kaabaak. Tut boos tudy bakwindil!” Benjamin ufweejel habwiih ni mulongweesh ni mucim mukasakan ni umwambiil neey: “Ciishoh bend natweelakan mu myand ya cidiidy. Cyabiin Baatemw ba Yehow bavul bady mu nzubw a lukan bwaal baleelek bwa kal diivit.” Mulongweesh umvwiil cimwambiil Benjamin ni kumwiitabiley bwa kulek kutweelakan mu myand aay. Ki, balony baababw batangil kumwiihanguj bwabiny kaakady mwiiy bwa kutweelomw. Benjamin ufulwiil mund bikasakan ni utangil kudil; cikwaabw, utangil kwambulwiil balony baabab boos cyaakadyey mwambil mulongweesh. Kuunyim, Benjamin wambiil balel bindiy neey umvwiil mwaakady Yehow mumwambulwiish bwa kuleebeley diitabij dindiy.
9. I mu mushind kaay mutudy mwa kusangej mucim a Yehow?
9 Bu mutudy bangat dihangadik dya kukooyel kudy Yehow, baat ba ha byaab bitudy biitutaatal bashilangan naabw. Bikaam twiikal ni mucim mukasakan bwiitut kwiimanyish ku mudimw eecy ku kalaas neey tudy Baatemw ba Yehow. Ning mudy shikacil a ha bulab ni myand yiloolong baat yend yinyanguk teng kunyanguk, bidy mwa kwiiy kwiitukasakeen misang yikwaabw bwa kwiikal ni kushikat kumvumvwangan ni may matam ma mu Bibl ni bwa kudiil baat bakwaabw musah mulengel. (2 Tim. 1:8; 3:13) Nook, iikal muvuluk neey: “Tusaasangej mucim indiy [wa Yehow]” hatuleeleej mucim mukasakan hakushaal bashilangan ni baat bakiish bamukadil mudimw.—Tus. 27:11; Mal. 3:18.
TEEK YEHOW HA CYAAB CYA KUUHAL MU SHIKACIL IIBUH
10. I mushind kaay waakady kukooyel ku mukenj udy mu Kubal kwa Baat 6:6, 7 mwa kukasakeen biin nazir?
10 Bal Kubal kwa Baat 6:6, 7. Biin Nazir kaabakadyoh bend mwa kufweej habwiih ni cital. Misang yikwaabw udy mwa kulang neey kulong nook kakwaakadyoh bend kwiibabudishomw bwaal bwa buseeb. Mu biisang bifundilobw Bibl, mukenj oow waakady mwa kwiikak mukasakan menmen kudy mwiin Nazir bwa kumukumbaj. Mu bilel byaakadyobw naaby diifuk dyaakadyobw bajiik muut, baakady bafweej habwiih ni cital. (Jah 19:39, 40; Yil. 9:36-40) Mwiin Nazir kaakadyoh bend mwa kulond bilel bya nook. Ning biby biikal neey kwaakady myand ya kuman mu bisak byaabab mu biisang bya kaakunying kavul, Biin Nazir baakady baleej teng diitabij dikasakan hakukooyel ku mucih aabab. Yehow ukashishil biin-biin bahambidil bindiy ba lulamat aab bwa kutaatameen makab mahetelobw.
11. Mwiin Krist i mwiiswiik bwa kulong biny hadyey ulongel biin mu cisak cyaabab myand? (Tal cikwaabw cifwaatul.)
11 Mutudy biin Krist, twangangat ni buseeb buvul mucih utudy balong wa kukadil Yehow mudimw. Kulong nook kudy ni bwenzej ha mahangadik matwangangat ni mu myand yituloolong habitaatal myand ya mu bisak. Tudy ni bwa kutacil bikasakan biin mu bisak biitut bwa kwiibakish biit bidyobw naaby diikeng, ki katwiin mwa kuteek ha cyaab cya kuuhal bikaakaam biin mu cisak hamut ha bidy Yehow wiitulomb. (Mat. 10:35-37; 1 Tim. 5:8) Misang yikwaabw, tudy mwa kwangat mahangadik mady kamay mwa kusangej baan beet ba mu cisak ki miikal masangej Yehow.
k mukat bwa kuteek lukat lwa Yehow ha cyaab cya kuuhal ning mu biisang bikasakan menmen eeny? (Tal cikos 11) e
12. Haakadyey wiitacish bwa kuman bwaal kaahand bwa mu cisak, i biny bilongel Alexandru ni i biny byaakadyey kay mulong?
12 Tukontononaay cyaakady cilongekel Alexandru ni mukaj indiy, Dorina. Kuunyim kwa biin maluw aab baman kulong Bibl mukacy mwa muvw umw, Dorina wangacil dihangadik dya kulek kulong, ni ukacil bwa Alexandru alek byend. Ki umwambiil ni kutukij koos ni bukalang neey: wiiyiiy kutungunuk ni kulong. Dorina kumvwiiloh bend musangal ni uteetel bwa kumulongeesh ku makand bwa alek kulong. Alexandru uleeleeb neey: uteetel bwa kumanyik bwabiny umvwiil mushind aaw, ki kabyaakadyoh bend bihehel bwindiy. Ha ciisang aacy, haakady Dorina uleeb bibiih bwindiy ni umwaalabul ni cinj, umvwiil bu bya kulek kutungunuk ni kulong Bibl. Cikwaabw, Alexandru utungunukil ni kuteek Yehow ha cyaab cya kuuhal, ni ciisang aacy uleejel mwaakadyey mukat mukaj indiy bikasakan ni umuneemek. Bwa cileejel cindiy, mukaj indiy wangacil dihangadik dya kulong Bibl cikwaabw, ni kuunyim wiiyil kuhet baatiisumw.—Tal mu jw.org film wa neey: Alexandru ni Dorina Văcar: “Dinanga didi ne lutulu ne bulenga” ha cyaab cya biin bwaal bilondangan cya neey “Bibl ufuufutul shikacil a baat.”
13. I mushind kaay utudy mwa kuleej neey tudy bakat Yehow ni biin mu cisak ciitut?
13 Yehow i yiy uhangil cisak, ni i mukat bwa biin mu cisak biikal ni musangal. (Ef. 3:14, 15) Tut bakat kwiikal biin-biin ni musangal, bikaam tulong myand mu mushind udy Yehow mukat. Kuvulaminoh bend neey Yehow wangangat ni buseeb buvul kwiikashishomw kwiibuh kwa kumuhambidil hawutaatatacil biin mu cisak ciinun ni hawiibaloolongel myand ni lukat ni kaneemw.—Rom 12:10.
KASHISHANGANAAY BWA KWIIKAL NI MEEJ BU MA BIIN NAZIR
14. I bangany batudy ni bwa kukashish nang-nang ni may miitut?
14 Boos bady basungul leeloow bwa kuhambidil Yehow bikaam biikal biihang bwa kwiibudishomw myand yikwaabw bwaal i bamukat. Misang yikwaabw kulong nook kaakwiinoh bend kuheehel. I mushind kaay utudy mwa kwambulwiishangan bwa twiikal ni meej ma nook? Hatukaakashishangan ni may miitut. (Yoobw 16:5) Mu cisumbw ciinun mudyok biin-kweet biitaatacishok bwa kuheehej shikacil aabab bwa kwiikalobw ni bivul bya kulong mu mudimw a Mawej eeny? Udyok mumanyik baasand baleeleej mucim mukasakan hakwiikal bashilangan ni bakwaabw mu kalaas habitaatal mushind a kulong myand, ning hadyeby bikasakan bwaabab kulong naak eeny? Tudy mwa kuleeb bicy bwa balony ba Bibl ni biin Krist neet bady mwa kwiikal bal diivit bwa kushaal ni lulamat bwa biin mu bisak byaabab biibalwiilwiish? Twiikalaay biiswiik bwa kulong cyoos citudy mwa kulong bwa kukashish biin-kweet biin Krist ni kwiibambil neey tudy biibakat bwa mucim mukasakan udyobw nend ni bwa byoos bidyobw balong bwa Yehow.—File. 4, 5, 7.
15. I mushind kaay udy bamw bambulwiish aab bady mu mudimw a ku diib ni ku diib?
15 Misang yikwaabw, tudy mwa kwambulwiish biin-kweet biin Krist bady mu mudimw a ku diib ni ku diib ni biit bidyobw naaby diikeng. (Tus. 19:17; Ebr. 13:16) I meej ma biin-biin maakady naam mwiin-kweet mwaan-mukaj wa lulamat ukaady muut mukuluuh udy mu cibunj cya Sri Lanka. Uhetel makut ma diifut ditam dya bulekel bwa mudimw indiy ni ukacil bwa kwambulwiish biin-kweet baaseb’ aa njil babidy baan-bakaj bwa kutungunuk ni kulong mudimw a bukajaady ning mwaakadyok lutat lwa myand ya fwalang. Nook wangacil dihangadik dya kwiikal kwiibaatumin kadiikut ka yiniteh suuny woos. Biin-biin, mwiin-kweet mwaan-mukaj oow udy ni meej malengel!
16. I biny bitudy mwa kulongel ku biin Nazir?
16 Biin-biin, tudy mwa kulongel myand yivul ku cileejel cilengel cidy biin bukish biin Nazir biitushiil! Nook, mucih wa biin Nazir wiituloolongweesh bwaal bukwaabw habitaatal Yehow, Taat iitut udy mu diiwul. I mumanyik neey tudy bakat ni mucim aakaabumw bwa kumusangej ni tudy bakat kulong byoos bitudy mwa kulong bwa kwiikal ni shikacil umvumvwangan ni mucih utudy balong bwa kukadil Yehow mudimw. Wiitwangangat ni buseeb hakwiituh dyaakatook bwiitut kumuleej mutudy bamukat. (Tus. 23:15, 16; Mark 10:28-30; 1 Jah 4:19) Mudimw waakady biin Nazir balong, uleeleej neey Yehow utaatal ni wangangat ni buseeb buvul byoos bituloolong mu mudimw indiy. Nook, twiikalaay biiswiik bwa kutungunuk ni kukadil Yehow mudimw, hakwiikal ni lukat lwa kumuh cidy cilengel menmen bwiitut.
WIIYIIY KWAALABUL BICY?
-
Teel mishind yaakady biin Nazir biin bukish biibudishomw myand yikwaabw ni baleej mucim mukasakan.
-
I mushind kaay utudy mwa kukashishangan bwa kwiikal ni meej bu maakady naam biin Nazir?
-
I mushind kaay udy myand yaakady biin Nazir balong yileej mudy Yehow muteekel bahambidil bindiy micim?
MUSAMBW A 124 Bikale anu ne lulamatu
a Nook, Biin Nazir bakeeh baakady biibanoonoh kudy Mawej, bavul baakady biin-biin Biin Izaleel bakacil bwa kwambulwiish bu biin Nazir bwa ciisang kaahand.—Tal kazubw ka neey: “ Biin Nazir banoonoh kudy Yehow.”
b Misang yikwaabw, mu mikand yiitut i bafwanyikij biin Nazir ni aab bakaakal mudimw a ku diib ni ku diib. Ki, mu ciin bwaal eecy, twiiyiiy kwiimanyin ha mushind utudy tut biin mudimw ba Yehow boos bady biilambul kudyey mwa kuleej meej maakady naam biin Nazir.
c Cya kumanyik, kabiin bimweek neey mwiin Nazir waakady ni myand yikwaabw yaakadyobw bamulomb bwa kulong bu mudy kulong mudimw kaahand bwa kuneemek mucih indiy.
d Tal mu sit a jw.org ciin bwaal cya neey “Nous avons décidé de simplifier notre vie” mu kulondangan kwa Biin bwaal bya neey “Malu malonda kudi Bantemu ba Yehowa.”
e DYUMVWIIJ DYA CIFWAATUL: Mwiin Nazir udy hamut a nzubw, wend ni kutal muyaayobw kajiik mwaanaabw a mu cisak. Mucih indiy umukaakaakeesh bwa kwiikaley habwiih ni bayaay kajikangan.
