1. Us fayn tin Jiova in savant dɛn dɔn de du frɔm trade trade te to naw?

 YU RILI valyu yu padi biznɛs wit Jiova? Wan dawt nɔ de se yu valyu am! Ɛn nɔto yu wangren valyu yu padi biznɛs wit Jiova. Frɔm trade trade, bɔku bɔku pipul dɛn bin dɔn fil da sem we de. (Sam 104:​33, 34) Bɔku pipul dɛn dɔn mek sakrifays dɛn fɔ wɔship Jiova. Na dat di Nazarayt dɛn we bin de na Izrɛl trade bin du. Udat na bin di Nazarayt dɛn, ɛn wetin wi go lan frɔm dɛn ɛgzampul?

2. (a) Udat dɛn na bin di Nazarayt dɛn? (Nɔmbaz 6:​1, 2) (b) Wetin mek sɔm Izrɛlayt dɛn bin disayd fɔ mek vaw fɔ liv as Nazarayt?

² Di wɔd “Nazarayt” kɔmɔt frɔm di Ibru wɔd we min “Pɔsin We Dɔn Gi Insɛf fɔ Du Spɛshal Wok.” Di Nazarayt dɛn na bin Izrɛlayt dɛn we bin gɛt zil ɛn we bin disayd nɔ fɔ du sɔm patikyula tin dɛn fɔ mek dɛn go ebul sav Jiova spɛshal we. Di Lɔ we Gɔd Bin Gi Mozis bin alaw man ɔ uman fɔ mek wan spɛshal vaw to Jiova bay we i de disayd fɔ liv as Nazarayt fɔ sɔm tɛm. a (Rid Nɔmbaz 6:​1, 2.) We Izrɛlayt mek vaw fɔ liv as Nazarayt, i go gɛt fɔ fala lɔ dɛn we ɔda Izrɛlayt dɛn nɔ de fala. So wetin mek pɔsin we na Izrɛlayt go disayd fɔ mek vaw fɔ liv as Nazarayt? I go bi se na bikɔs i rili lɛk Jiova ɛn i want fɔ sho se i rili gladi fɔ di bɔku gud tin dɛn we Jiova dɔn du fɔ am.​—Dit. 6:5; 16:17.

3. Aw Gɔd in pipul dɛn tide fiba di Nazarayt dɛn?

³ Di arenjmɛnt fɔ bi Nazarayt bin dɔn di tɛm we “Krays  in lɔ” bin tek di Lɔ we Gɔd Bin Gi Mozis in ples. (Gal. 6:2; Rom. 10:4) Bɔt jɔs lɛk di Nazarayt dɛn, Jiova in pipul dɛn tide de kɔntinyu fɔ sho se dɛn rili want fɔ sav am wit ɔl dɛn at, ɔl dɛn layf, ɔl dɛn maynd, ɛn ɔl dɛn trɛnk. (Mak 12:30) Wi de mek da vaw de wit ɔl wi at we wi gi wisɛf to Jiova. Fɔ liv wi layf akɔdin to da vaw de, wi nid fɔ du wetin Jiova want ɛn mek sakrifays dɛn so dat wi go ebul sav am. As wi de kam tɔk bɔt aw di Nazarayt dɛn bin liv dɛn layf akɔdin to di vaw we dɛn bin mek, wi go lan impɔtant lɛsin dɛn bɔt aw wisɛf go ebul liv wi layf akɔdin to di vaw we wi mek. b (Mat. 16:24) Lɛ wi tɔk bɔt sɔm ɛgzampul dɛn.

RƐDI FƆ MEK SAKRIFAYS DƐN

4. Akɔdin to Nɔmbaz 6:​3, 4, us sakrifays di Nazarayt dɛn bin de mek?

⁴ Rid Nɔmbaz 6:​3, 4. Nazarayt dɛn bin nid fɔ avɔyd ɔlkayn rɔm ɛn tin dɛn we dɛn mek frɔm grep vayn, lɛk greps ɛn kɔrant. I go bi se pipul dɛn we bin de arawnd dɛn bin de ɛnjɔy fɔ it dɛn fud dɛn de ɔltɛm, bikɔs natin nɔ rɔng wit dɛn. Di Baybul se “wayn we de mek mɔtalman in at gladi” na gift frɔm Gɔd. (Sam 104:​14, 15) Bɔt di Nazarayt dɛn bin gladi fɔ sakrifays dɛn rayt fɔ ɛnjɔy dɛn tin dɛn ya. c

5. Us sakrifays dɛn Madian ɛn Masɛla bin mek? Wetin mek?

⁵ Jɔs lɛk di Nazarayt dɛn, wisɛf kin mek sakrifays dɛn fɔ du mɔ fɔ Jiova. Lɛ wi tɔk bɔt Madian ɛn Masɛla dɛn ɛgzampul. d Dis brɔda ɛn in wɛf bin de liv gud layf. Madian bin gɛt gud wok we bin mek dɛn ebul fɔ liv na fayn os. Bɔt dɛn bin want fɔ du mɔ fɔ sav Jiova. Fɔ mek dɛn go ebul du dat, dɛn bin disayd fɔ mek sɔm ajɔstmɛnt dɛn. Dɛn tɔk se: “Wi bigin fɔ ridyus di we aw wi de spɛn mɔni. Wi go de na wan smɔl os ɛn sɛl wi motoka.” Madian ɛn Masɛla nɔ bin nid fɔ mek dɛn sakrifays dɛn ya, bɔt dɛn bin du dat bikɔs dɛn want fɔ du mɔ fɔ sav Jiova. Dɛn gladi ɛn gɛt satisfay maynd bikɔs ɔf wetin dɛn disayd.

6. Wetin mek Kristian dɛn tide de mek sakrifays dɛn? (Luk bak di pikchɔ.)

 ⁶ Jiova in pipul dɛn tide kin gladi fɔ mek sakrifays dɛn so dat dɛn go gɛt mɔ tɛm fɔ sav am. (1 Kɔr. 9:​3-6) Jiova nɔ tɛl wi se paopa wi fɔ mek dɛn sakrifays dɛn ya, ɛn di tin dɛn we wi de sakrifays nɔto tin dɛn we bad. Fɔ ɛgzampul, sɔm dɔn disayd fɔ lɛf dɛn os, dɛn wok we dɛn rili lɛk, ɔ ɔda tin dɛn. Bɔku dɔn disayd se dɛn go wet fɔs bifo dɛn mared ɔ dɛn nɔ go stat fɔ bɔn pikin dɛn jɔs afta dɛn mared. Ɔda wan dɛn dɔn disayd fɔ go ɛp usay dɛn nid mɔ pipul dɛn, pan ɔl we dat go mek dɛn de fa frɔm dɛn fambul ɔ padi dɛn we dɛn lɛk. Bɔku pan wi rɛdi fɔ mek dɛn sakrifays dɛn de bikɔs wi want fɔ gi Jiova wi bɛst. Mɛmba se Jiova rili valyu ɛni sakrifays we yu disayd fɔ mek fɔ sav am, ilɛk i big ɔ smɔl.​—Ibru. 6:10.

RƐDI FƆ SHO SE YU DIFRƐN

7. Wetin go dɔn mek i nɔ izi fɔ mek pɔsin we na Nazarayt kɔntinyu fɔ du wetin i dɔn vaw? (Nɔmbaz 6:5) (Luk bak di pikchɔ.)

⁷ Rid Nɔmbaz 6:5. Di Nazarayt dɛn bin vaw se dɛn nɔ go kɔt dɛn ia. Dɛn bin du dat fɔ sho se dɛn dɔn gi dɛnsɛf to Jiova wit ɔl dɛn at. If pɔsin we na Izrɛlayt bi Nazarayt fɔ lɔng tɛm, in ia go lɔng ɛn i go izi fɔ lɛ ɔda pipul dɛn notis am. I go izi fɔ mek pɔsin we na Nazarayt du wetin i dɔn vaw if di wan dɛn we de arawnd am de sɔpɔt am. Bɔt i sɔri fɔ no se tɛm dɛn bin de na Izrɛl we pipul dɛn nɔ bin de rɛspɛkt ɔ sɔpɔt Nazarayt dɛn. Insay prɔfɛt Emɔs in tɛm, Izrɛlayt dɛn we na bin apɔstet dɛn bin “kɔntinyu fɔ gi di Nazarayt dɛn wayn fɔ drink.” I go bi se dɛn bin de du dat fɔ mek dɛn go pwɛl di vaw we di Nazarayt dɛn bin mek se dɛn nɔ go drink wayn. (Emɔs 2:12) Sɔntɛnde, di Nazarayt dɛn bin nid fɔ rili gɛt maynd fɔ mek dɛn go kɔntinyu fɔ du wetin dɛn vaw ɛn fɔ mek dɛn go difrɛn frɔm ɔda pipul dɛn.

8. Wetin yu lɛk bɔt Bɛnjamin in ɛkspiriɛns?

⁸ Wit Jiova in ɛp, wisɛf go ebul fɔ gɛt maynd fɔ sho se wi difrɛn, ilɛksɛf wi na pɔsin we de shem. Tink bɔt Bɛnjamin we na Jiova Witnɛs we de na Nɔwe, we ol tɛn ia. Bikɔs ɔf di wɔ na Yukren, in skul bin mek wan program fɔ sho se dɛn de sɔpɔt di pipul dɛn na Yukren. Dɛn tɛl di pikin dɛn fɔ wɛr klos we gɛt Yukren dɛn flag kɔlɔ dɛn ɛn fɔ siŋ wan siŋ. Bikɔs Bɛnjamin nɔ bin want fɔ tek pat pan dis program we de sho se dɛn de sɔpɔt wan kɔntri, i bin disayd fɔ tinap fa frɔm usay di program bin de. Bɔt wan ticha bin si  am ɛn tɔk lawd wan se: “Kam jɔyn wi rayt naw. Wi ɔl de wet fɔ yu!” Bɛnjamin bin gɛt maynd fɔ go mit di ticha ɛn tɔk se: “A nyutral ɛn a nɔ de jɔyn ɛni program we gɛt fɔ du wit pɔlitiks. Infakt, bɔku Jiova Witnɛs dɛn de na prizin bikɔs dɛn nɔ gri fɔ go fɛt wɔ.” Di ticha bin lisin to wetin Bɛnjamin tɔk, ɛn i bin tɛl am se i nɔ nid fɔ jɔyn dɛn fɔ di program. Bɔt in klasmet dɛn bigin fɔ aks am wetin mek i nɔ bin jɔyn dɛn. Bɛnjamin bin so fred dat i lɛf smɔl lɛ i bigin fɔ kray; bɔt i bin gɛt maynd fɔ tɛl ɔlman na di klas wetin i bin tɛl di ticha. Afta dat, Bɛnjamin bin tɛl in mama ɛn papa se i bin si se na Jiova ɛp am fɔ tinap fɔ wetin i biliv.

9. Us we wi go ebul mek Jiova gladi?

⁹ Bikɔs wi dɔn disayd fɔ obe Jiova, ɔda pipul dɛn go notis se wi difrɛn frɔm dɛn. Wi nid fɔ gɛt maynd fɔ tɛl ɔda pipul dɛn na wi wokples ɔ skul se wi na Jiova Witnɛs. Ɛn bikɔs pipul dɛn abit dɛn ɛn di we aw dɛn de biev de bad-ɔf mɔ ɛn mɔ, i nɔ go izi fɔ mek wi fala Baybul prinsipul dɛn ɛn prich di gud nyuz to ɔda pipul dɛn. (2 Tim. 1:8; 3:13) Bɔt mɛmba ɔltɛm se wi go “mek [Jiova] gladi” we wi gɛt maynd fɔ sho se wi difrɛn frɔm ɔda pipul dɛn we nɔ de sav am.​—Prɔv. 27:11; Mal. 3:18.

PUT JIOVA FƆS NA YU LAYF

10. Wetin mek fɔ fala di lɔ we de na Nɔmbaz 6:​6, 7 nɔ go dɔn izi fɔ di Nazarayt dɛn?

¹⁰ Rid Nɔmbaz 6:​6, 7. Nazarayt dɛn nɔ bin de go nia dedebɔdi. Sɔntɛm yu nɔ go tink se dis na bin big sakrifays. Bɔt insay di tɛm we dɛn bin de rayt di Baybul, i nɔ bin izi fɔ lɛ pɔsin we na Nazarayt fala dis lɔ we in fambul day. Insay da tɛm de, di kɔstɔm we dɛn bin gɛt fɔ bɛrin na dat, pipul dɛn fɔ de nia di dedebɔdi. (Jɔn 19:​39, 40; Akt 9:​36-40) Bɔt pɔsin we na Nazarayt nɔ fɔ fala dɛn kɔstɔm dɛn de. Di Nazarayt dɛn bin de sho se dɛn gɛt strɔng fet bay we dɛn bin de du wetin dɛn dɔn vaw, ivin di tɛm dɛn we dɛn at rili pwɛl bikɔs pɔsin we dɛn lɛk dɔn day. Wan dawt nɔ de se Jiova bin de sɔpɔt dɛn in fetful savant dɛn ya fɔ we dɛn bin de bia dɛn tin dɛn de we nɔ bin izi.

11. Wetin pɔsin we na Kristian fɔ mek-ɔp in maynd fɔ du we i de disayd fɔ du tin dɛn we gɛt fɔ du wit in famili? (Luk bak di pikchɔ.)

¹¹ As Kristian dɛn, wi de si di gi we wi  dɔn gi wi layf to Jiova as sɔntin we rili siriɔs. Dis de afɛkt di tin dɛn we wi de disayd ɛn di tin dɛn we wi de du we gɛt fɔ du wit wi famili. Wi de wok tranga wan fɔ kia fɔ di tin dɛn we wi famili nid, bɔt wi nɔ go ɛva put wetin wi famili want bifo di tin dɛn we Jiova want wi fɔ du. (Mat. 10:​35-37; 1 Tim. 5:8) Sɔntɛnde, wi go nid fɔ disayd fɔ du tin dɛn we wi famili nɔ go gladi wit, bɔt we go mek Jiova gladi.

12. We Alɛksandru bin de disayd fɔ du tin dɛn we gɛt fɔ du wit in famili, wetin i bin du ɛn wetin i nɔ bin du?

¹² Tink bɔt Alɛksandru ɛn in wɛf Dɔrina dɛn ɛkspiriɛns. Afta dɛn dɔn stɔdi di Baybul fɔ wan ia, Dɔrina bin disayd fɔ lɛf fɔ stɔdi, ɛn i bin want Alɛksandru insɛf fɔ lɛf fɔ stɔdi. Bɔt, Alɛksandru bin tek tɛm tɛl am se i go kɔntinyu fɔ stɔdi. Dɔrina nɔ bin gladi, ɛn i bin tray fɔ fos am fɔ lɛf fɔ stɔdi. Alɛksandru tɔk se i bin tray fɔ ɔndastand wetin mek in wɛf bin de fil dis we, bɔt i nɔ bin izi fɔ am. Sɔntɛnde, we Dɔrina bin de tɔk bad bɔt am ɛn ansa am ash we, i bin want fɔ lɛf fɔ stɔdi di Baybul. Bɔt stil, Alɛksandru bin kɔntinyu fɔ put Jiova fɔs, ɛn i bin de sho se i rili lɛk ɛn rɛspɛkt in wɛf. Bikɔs ɔf in fayn ɛgzampul, Dɔrina bin disayd fɔ bigin stɔdi di Baybul bak, ɛn leta i bin baptayz.—Luk di vidio na jw.org we gɛt di taytul Alɛksandru ɛn Dɔrina Veka: “Lɔv De Mek Pɔsin Peshɛnt ɛn Du Gud” we de na di siriz “Truth Transforms Lives.”

13. Aw wi go sho se wi lɛk Jiova ɛn wi famili?

¹³ Na Jiova mek famili, ɛn i want wi famili fɔ gladi. (Ɛfi. 3:​14, 15) If wi want fɔ gɛt tru tru gladi-at, wi nid fɔ du wetin Jiova want wi fɔ du. Nɔ ɛva tink se Jiova nɔ valyu di sakrifays dɛn we yu de mek fɔ wɔship am as yu de kia fɔ yu famili ɛn sho se yu lɛk ɛn rɛspɛkt dɛn.​—Rom. 12:10.

UNA ƐNKƆREJ UNASƐF FƆ BI LƐK DI NAZARAYT DƐN

14. Udat dɛn mɔ wi fɔ tray tranga wan fɔ ɛnkɔrej wit di wɔd dɛn we wi de tɔk?

¹⁴ Ɔl di wan dɛn we dɔn disayd fɔ wɔship Jiova tide nid fɔ rɛdi fɔ mek sakrifays dɛn bikɔs dɛn lɛk Jiova. Sɔntɛnde, i nɔ kin izi fɔ du dat. Aw wi go ebul ɛp wisɛf fɔ mek sakrifays dɛn fɔ Jiova? Na bay we wi de ɛnkɔrej ɔda pipul dɛn wit di wɔd dɛn we wi de tɔk. (Job 16:5) Pipul dɛn de na yu kɔngrigeshɔn we de tray fɔ liv simpul layf so dat dɛn go ebul  du mɔ fɔ Jiova? Yu sabi yɔŋ wan dɛn we gɛt maynd fɔ sho se dɛn difrɛn frɔm dɛn skulmet dɛn, pan ɔl we i nɔ izi fɔ dɛn fɔ du dat? Yu sabi Baybul studɛnt dɛn ɛn wi kɔmpin Kristian dɛn we de tray tranga wan fɔ kɔntinyu fɔ fetful to Jiova, pan ɔl we dɛn famili de agens dɛn? Lɛ wi mekɔp wi maynd fɔ du ɔl wetin wi ebul fɔ ɛnkɔrej dɛn pipul dɛn ya ɛn tɛl dɛn se wi rili gladi fɔ di sakrifays dɛn we dɛn de mek ɛn di maynd we dɛn gɛt fɔ du wetin Jiova want.​—Fay. 4, 5, 7.

15. Aw sɔm brɔda ɛn sista dɛn dɔn ɛp di wan dɛn we de yuz ɔl dɛn tɛm fɔ sav Jiova?

¹⁵ Sɔntɛnde, wi kin ebul fɔ du fayn tin dɛn fɔ wi kɔmpin Kristian dɛn we de yuz ɔl dɛn tɛm fɔ sav Jiova. (Prɔv. 19:17; Ibru. 13:16) Na dis wan fetful sista we dɔn ol ɛn we de na Sri Lanka bin want fɔ du. Dɛn bin ad pan in pɛnshɔn we i bin de gɛt, ɛn i bin want fɔ ɛp tu yɔŋ payɔnia sista dɛn fɔ kɔntinyu fɔ du di prichin wok pan ɔl we dɛn bin gɛt mɔni prɔblɛm. I bin disayd fɔ gi dɛn patikyula amawnt ɛni mɔnt fɔ ɛp dɛn fɔ go de bay tɔp-ɔp. Na fayn tin da sista de de du!

16. Wetin wi go lan frɔm di arenjmɛnt fɔ bi Nazarayt?

¹⁶ Wi go ebul lan bɔku tin frɔm di fayn ɛgzampul we di Nazarayt dɛn bin sɛt! Bɔt, di vaw we di Nazarayt dɛn bin mek de tich wi bak sɔntin bɔt Jiova we na wi Papa we de na ɛvin. I gɛt kɔnfidɛns se wi rili want fɔ mek i gladi ɛn wi rɛdi fɔ mek sakrifays dɛn fɔ sho se wi dɔn gi wi layf to am. I de ɔnɔ wi bay we i de gi wi chans fɔ sho am se wi lɛk am. (Prɔv. 23:​15, 16; Mak 10:​28-30; 1 Jɔn 4:19) Di arenjmɛnt fɔ mek pɔsin bi Nazarayt sho se Jiova de si ɛn valyu di sakrifays dɛn we wi de mek fɔ sav am. So lɛ wi mekɔp wi maynd fɔ kɔntinyu fɔ sav Jiova ɛn rɛdi fɔ gi am wi bɛst.