1. Kaa yɛɛ wanaa Chɛhowa chɔm yɛ chɔŋ o sindɔɔ niŋ?

 BAA a che pa chaŋyɛi numnde a Chɛhowa nyɛ sɔvɛ? Ŋ laalaŋ kɛsɛ maa a che ndi isɔvɛ. O cho ko numpilɛ le nɔ yiyaŋ waa nuaa le. Chɔŋ o sindɔɔ niŋ, wanaa bɔɔbɔɔ yiyaŋ niŋ maa num. (Sam 104:​33, 34) Wanaa bɔɔbɔɔ soliŋ niŋ sala le Chɛhowa piɛiyo. Nyɛ pilɛ koŋ kpe Naasiluɛiya o Isɔluɛi niŋ sindɛ tosa ni. Wanaa suu maa vɛɛ nda wa yɛ, nduyɛ yɛɛ naŋ pɛɛku yɛ o tamasi ndaa niŋ?

2. (a) Nɛɛ yaa wa yɛ Naasiluɛiya? (Nɔmbaa 6:​1, 2) (b) Le yɛɛ Isɔluɛiya apum ndaa chua yɛ buŋgɛi le waa Naasiluɛiya?

² Diom maHibuluiyo hoo, “Naasiluɛinɔɔ” sim ni maa, wana cho o yɔŋgaŋ ndo. Diomndo hoo cho le Isɔluɛiyaa ndaa soliŋ sala le Chɛhowa piɛiyo o nɛi teŋgeŋndo choo wa. O sawa Muuse wo bɛŋgu, wana pɔnɔɔ ɔɔ wana lanɔɔ ndoo tiuba mbo chua buŋgɛi teŋgeŋnde o Chɛhowa lo le mbo wa, Naasiluɛinɔ le teleŋ biŋgi. a (Nuawɔ Nɔmbaa 6:​1, 2.) Te Isɔluɛinɔɔ ndoo chua pɛ buŋgɛi waa nuaa, ndoo nɔ mi ndoo tol nɛila chɔmaalaŋ kɔɔli, la Isɔluɛiya a tuaa ndaa tul kɔɔli le laŋ. Mɛɛ yɛɛ ndoo nyindu yɛ Isɔluɛinɔɔ le mbo simnuŋ Naasiluɛinɔɔ? Naapum le mɛɛ ndo nɔ kaala yiŋgoloŋndo le Chɛhowa a balika melaa le salala ndɔlaŋ yɛ.—Ditɔnɔ. 6:5; 16:17.

3. Vɛɛ wanaa Mɛlɛkaa cho yɛ hau maa Naasiluɛiya?

 ³ Mɛɛ “sawa Kiliti wo” miiŋgu o foofo sawa Muuse wo, wanaa Mɛlɛkaa ndaa nɔ lɛ ma simnuŋ Naasiluɛiyaa le. (Kalee. 6:2; Luomaŋ. 10:4) Maa Naasiluɛiya, wanaa Chɛhowaa cho hau hiouwɔɔ lachi a yeemɛi kpeekpeiye nɔɔ le Chɛhowa piɛiyo a kɔl ndaa kpou, yoomu ndaa kpou, vɛlɛ a kpaaya ndaa kpou. (Maki 12:30) Le miŋ peelu buŋgɛi naŋ chua keŋ nde, ŋ nɔ miŋ tosa hɛnaŋ Chɛhowaa, nduyɛ miŋ soliŋ sala le halikpeŋ miŋ piɛi ndu. Te ŋ pɛɛku pɛ a mɛɛ Naasiluɛiya ndaa peelu buŋgaŋ ndaŋ yɛ, keŋ cho naa mala miŋ pɛɛku sɔɔŋ sɔviɔŋ a mɛɛ naŋ peelu buŋgaŋ naŋ yɛ. b (Maa. 16:24) Ŋ tofaŋndɔ tamaseliilaŋ lapum.

NƆ KAA SALA SOLIAŊNDO

4. A mɛɛ Nɔmbaa 6:​3, 4 dimi yɛ, salala kuɛɛ Naasiluɛiya ndaa soliŋ yɛ?

⁴ Nuawɔ Nɔmbaa 6:​3, 4. Naasiluɛiya ndaa nɔ ma kol mamuɛi o mamuɛi le. Nduyɛ nyɛ o nyɛ ndaa toosiaa pɛ a kilepiiyaŋ, o wa ma pii ɔɔ ma vesɛi, ndaa nɔ ma de le. Wanaa nda wa tɛɛŋnda wa nyɛm yɛ yiɔɔŋ muŋ tueiyɔɔ yeela kanifuule, i ve suɛi wɔɔŋ le muŋ dioo le. Baabuiyo tɛɛsiaa maa, mi muɛiyaŋ ma tosa “mi wana naŋ kɔl.” Nduyɛ ke fula Mɛlɛka o ba wo ma cho ni. (Sam 104:​14, 15) Mi che bɛɛ mi nyɔɔŋ muŋ tosa mi wana tuei yoomoo yeela, kɛ mi Naasiluɛiya chɛl a kɔllo kpou le muŋ fafaŋndo. c

5. Salala kuɛɛ Madiaŋ nda Masila soliŋ yɛ, nduyɛ le yɛɛ?

⁵ Maa Naasiluɛiya, naa bɛɛ soliŋ sala le Chɛhowa piɛiyo a kɔl naa kpou. Ŋ tofaŋndɔ tamaselii Madiaŋ nda Masila wo. d Mi pɔnɔɔ a lanɔɔ hoo tuɛi yoomu sɔviɔɔ yeela. Madiaŋ wa wali sɔviɔɔ tosaa, nduyɛ a wa o chiɛi kɛndɛ kɛndɔɔ niŋ. A koŋ kpou, ndaa yeema mi ndaa tosa tau o Chɛhowa piɛiyo niŋ. Le kpeleŋ ndaa hoo komallo, ma kɛɛsiaa le yɛlɛmiaalaŋ tosaa. Ma dimi aa: “Miŋ yɛlɛmiaa mɛɛ naŋ soliŋ nyɛsɔlaa kpeku yɛ. Miŋ hiau o chiɛi pɔmbɔɔ niŋ, nduyɛ miŋ pisi nyɛ nyaanaŋ naa.” I ve nda kuee le ma tosa yɛlɛmiaalaŋ ndaŋ te. Kɛ le mɛɛ ndaa yeema tosaa tau o Chɛhowa piɛiyo niŋ yɛ, ma tosalaŋ.

6. Le yɛɛ Kilisiɔŋnda soliŋ yɛ hau sala? (Tofa vɛlɛ fotueiyo.)

 ⁶ Te Kilisiɔŋnda soliŋ pɛ sala o walta Mɛlɛkalaŋ tosaa niŋ hau, ma sɔla nyaaloo tau. (1 Kɔliŋ. 9:​3-6) Chɛhowa beŋ naa le salala waa nuaa solioo le. Nduyɛ nyɛm naŋ soliŋ sala le ndu piɛiyo woŋ cho nyɛm wɔɔŋ te. Le tamaseliiyo, mi apum mal walta sɔvɛlaŋ, a fondaŋ nda cho wo. Mi a bɔɔbɔɔ kɛɛsiaa le kiɔɔ chuauwa keleŋaa violɔɔ, nduyɛ mi apum kɛɛsiaa le ma lo yembu le teleŋ tiŋ. Mi apum kɛɛsiaa vɛlɛ le kɔlaŋ naa yeemɛi cho tau wa, mi che bɛɛ a cho wa landaŋ a wanaa nda kaala wa. Naa a bɔɔbɔɔ soliŋ niŋ salala waa nuaa kanifuule, ŋ yeema miŋ tosa tau o wali Chɛhowaa niŋ. Mɛɛ mɛɛ sala ŋ cho soliŋndo wo o wa, nɔ tiindaŋndo maa Chɛhowa che ndu o sɔvɛ.—Hibu. 6:10.

SOLIŊ SALA LE MA WA TEŊGEŊ

7. Le yɛɛ ndoo wa yɛ lepum simullo le mi Naasiluɛinɔɔ ndoo peelu buŋgɛi nduɛi? (Nɔmbaa 6:5) (Tofa vɛlɛ fotueiyo.)

⁷ Nuawɔ Nɔmbaa 6:5. Mi Naasiluɛiya chua buŋgɛi le kiɔɔ yiinde sendioo. Hei ndii chɔm ni maa a cho a yɔŋgaŋ o Mɛlɛka lo. Te Isɔluɛinɔɔ ndoo wa pɛ Naasiluɛinɔɔ le teleŋ vilɛi, mi yiiŋii nduɛi ndii bandu. Mi keŋ ndii tosa ndi tɛtɛlɛ le mi acheleŋnda sina ndu. Te waŋnda ndaa mel nda pɛ balikaa le mɛɛ nda cho Naasiluɛiya yɛ, mi keŋ ndii dɛɛniaa nda kɔllo. Kɛ teleŋndaŋ lapum, mi waŋnda ndaa pɛɛsa nda. O teleŋ Emɔɔsi wana ndoo suaa le Mɛlɛka wo niŋ, mi Isɔluɛiyaa ndaa simul piɛile tonyaleŋ nda ndaa ‘ke Naasiluɛiya muɛiyaŋ le mi ndaa kol.’ Mi hei ndii tosa, ndaa lo o buŋgɛi ndaa chua le kiɔɔ muɛiyaŋ kolɔɔ ve choo le. (Emɔɔ. 2:12) Le mi Naasiluɛinɔɔ ndoo lo o buŋgɛi o chua ve choo nduyɛ mbo waŋnuŋ teŋgeŋ, teleŋnda bɔɔbɔɔ, kɔl simulaa ndoo yeemaŋ ni.

8. Vɛɛ suɛi yɔŋnaŋii Bɛŋnjamiŋ nde dɛɛniaa yɛ num kɔllo?

⁸ A mala Chɛhowaa, naa bɛɛ tiuba miŋ chɔm kɔl simulaa, nduyɛ miŋ wa teŋgeŋ o yɔŋ bɛɛ miŋ nɔ siɔmbulaŋ. Ŋ tofaŋndɔ tamasi Bɛŋjamiŋ ndo. Poombɔɔ hoo nɔ wɔsilaŋ tɔ, nduyɛ Sei Chɛhowaa o cho o Nɔwei niŋ ni. Mi sukuu ndɔɔ tosa dunyɛi le waŋnda o lɛŋnde Yukileŋndeŋ niŋ tooloo le mɛɛ chɔuwo del loŋ yɛ. Ma dimul nda le ma soli chondei, nduyɛ ma wa a doviaŋ o kola lelɛŋ Yukileŋnda niŋ. Le kiɔɔ balaŋ lueiyo o dunyɛi hei niŋ, mi Bɛŋjamiŋ kɔ simnuŋ landaŋ a fondaŋ nda wa ndi tosaa wo. Mi wana ndɔ pɛɛkaa cha ndu okoŋ mbo veelu ndu choo choo kpeleŋ aa: “A nɔ ma sɔɔŋguu naa ikɛi. Naa kpou cho num chumndo!” Mi Bɛŋjamiŋ chɔm kɔl simulaa, mbo sɔɔŋguu wana ndɔ pɛɛkaa ikɛi, mbo dimi aa: “I cho yuŋyeŋ. Lelaŋ, I wou laba o  sɔɔŋ lemasa niŋ te. Nduyɛ pɛŋ, Seiyaa Chɛhowaa bɔɔbɔɔ cho hau o chiɛila manyumndaŋ niŋ le mɛɛ nda kɛɛ kɔlaŋ o chɔuwo yɛ.” Mi wana ndɔ pɛɛkaa chɛl, nduyɛ o beŋ ndu le mbo tol nda kɔɔli le. Kɛ, mi chaaŋaa nduaa kandu ndu nyuuniaa le sabu o tul nda kɔɔli le wo. Mi siooŋnde bii ndu, nduyɛ ndoo lo niŋ chobe mi ndoo kandu chaŋndo. A koŋ kpou, mbo chɔm kɔl simulaa. Mbo dimul nda nyɛ o dimul wana ndɔ pɛɛkaa wo. Mɛɛ o miiŋgu o bɛɛ, mbo dimul wanaa velu ndu wa maa Chɛhowa mala ndu ni, mbo sim yi o laalaŋ ndɔɔ choo.

9. O nɛi kuɛɛ choo naŋ nɛŋi yɛ Chɛhowa kɔllo?

⁹ Le mɛɛ naŋ kɛɛsiaa le Chɛhowa diikɔŋndo yɛ, mi apum che naa maa ŋ cho teŋgeŋ a nda. Ŋ wa pɛ o wallo niŋ ɔɔ o sukuu, ŋ nɔ miŋ nɔ kɔl simulaa le naapila chɔɔmɔŋndo maa Seiyaa Chɛhowaa naŋ cho ni. Mɛɛ chieeŋndo hiau lachi a wɔuleŋ fau, lende koni naŋ cha ndi lepum ikala le sawala mandaala Baabuiyo tolɔɔ kɔɔli, a waŋnda yooŋgu kɛndɔɔ dimullo ni. (2 Timo. 1:8; 3:13) Loonuŋ teleŋ o teleŋ maa, miŋ tosa mi “[Chɛhowa] naŋ kɔl” te ŋ sim pɛ yi a kɔl simulaa, nduyɛ miŋ wa teŋgeŋ a wanaa chieeŋnda.—Pulɔ. 27:11; Mala. 3:18.

KƐSI CHƐHOWA WANA TASOO O YOOMU NUMNDO NIŊ

10. Vɛɛ nyɛ dimiŋ o Nɔmbaa 6:​6, 7 niŋndo, wa yɛ simullo le Naasiluɛiya?

¹⁰ Nuawɔ Nɔmbaa 6:​6, 7. Naasiluɛiya ndaa sɔɔŋguu wana vilɛi ikɛi kposoŋ te. O tasela ndɔ, ma che ndi maa i kindu tosa le. O sindɔɔ niŋ, simullo pila i wa le Naasiluɛiya ni, taama taama te wanayɛi ndɛi kpɛɛluŋnde ndii vi pɛ. Naamoo i wa ni le waa wana vilɛiyo ikɛi. (Chɔŋ 19:​39, 40; Walta. 9:​36-40) Kɛ Naasiluɛinɔɔ ndoo nɔ mbo tol naamulaŋ ndaŋ kɔɔli le. Te Naasiluɛinɔɔ ndoo lo pɛ o buŋgɛi o chua ve choo a teleŋ biisioo, mi keŋ ndii chɔm maa o nɔ laalaŋ kala kalaa o Chɛhowa niŋ. Nduyɛ mi Chɛhowa ndoo kindi tiindaŋ buɛiyaa nduaa kaalaa haa o simulta waa nuaa bɛŋgu.

11. Te o hiŋ pɛ a kɛɛsiaalaŋ tosaa o yuŋgoo niŋ okɔɔ, yɛɛ Kilisiɔŋnɔɔ nɔ yɛ mbo tosa? (Tofa vɛlɛ fotueiyo.)

¹¹ Naa Kilisiɔŋnda, ŋ chua yɔŋgɔŋ naa o Chɛhowa lo nyɛ sɔvɛ. Mi hei piiliaŋ nyɛ naŋ tosa wo, a kɛɛsiaala naŋ tosa a yuŋgula naalaŋ okɔɔ laŋ. Miŋ tosa wallo tau le yuŋgu naa nyɛm nda hauba woŋ kioo. Kɛ kposoŋ bɛɛ ŋ kɛsi yeemaŋ yuŋgula naalaŋ nyɛ tase mbo hiou nyɛ Chɛhowa yeema naa miŋ tosa wo le. (Maa. 10:​35-37; 1 Timo. 5:8) Lepum,  yuŋgu naa niŋ kɔl a kɛɛsiaala naalaŋ te, kɛ mi Chɛhowa naŋ kɔl a laŋ.

12. Mɛɛ simullo komal Alexandru o yuŋgu ndɔɔ niŋ, yɛɛ o tosa yɛ, nduyɛ yɛɛ o tosa yɛ le?

¹² Ŋ tofaŋndɔ suɛi yɔŋnaŋii Alexandru nda Dorina laa ndɔ ve. Mɛɛ pɔnɔɔ a lanɔɔ hoo pɛɛku Baabuiyo le wɔsioo opilɛ, mi Dorina kɛɛsiaa le mbo kelu pɛɛkoo, nduyɛ ndoo yeema vɛlɛ mi Alexandru bɛɛ ndoo kelu pɛɛkoo. Kɛ mi Alexandru dɛɛniaa ndu, nduyɛ mbo dimul ndu o nɛi lebɛɛ niŋ maa, o cho hiouwɔɔ lachi a pɛɛkoo. Dorina ndoo niŋ kɔl kposoŋ te. Nduyɛ mbo kindiŋ le ndu kuunaa Baabuiyo pɛɛkoo. Mi Alexandru dimi maa, mbo kindiŋ le sinaa le sabu laa ndɔ wa ndu kuunaa wo, kɛ i ve bɛɛŋ bɛɛŋ le ndu le. Lepum, te Dorina ndoo pɛɛsa ndu pɛ nduyɛ mbo mulul ndu a kɔl tuu, mi ndoo kuɛ le dialloŋ wuoo le pɛɛku ndɔɔ. A koŋ kpou, mi Alexandru hiau lachi a Chɛhowa kɛsioo wana tasoo o yoomu ndɔɔ niŋ. Kɛ mbo hiau lachi a laa ndɔ kaalaa vɛlɛ a ndu bɛɛleŋ kioo. O mɛɛlulaŋ kpɔŋ, mi tamaselii ndɔ kɛndɔɔ tosa, mi laa ndɔ miiŋgu Baabuiyo pɛɛkoo, nduyɛ mbo chua tonyaa.—Tofa vidueiyo hoo o jw.org choo, Alexandru nda Dorina Vacar: “Wana nɔ Kaalaa Wo biunuŋ nduyɛ O Nɔ Kɛndɛi.” O buŋgɛi hei bɛŋgu, “Tonyaa Siŋga Yoomulaŋ.”

13. Vɛɛ naŋ chɔm yɛ kaalaa le Chɛhowa a le yuŋgula naalaŋ?

¹³ Chɛhowa kila yuŋguleŋ ni, nduyɛ o yeema mi wana o wana wa a kɔl kɛndɛ o yuŋgoo niŋ. (Ɛfi. 3:​14, 15) Te ŋ yeema pɛ miŋ wa a kɔl kɛndɛ, ŋ nɔ miŋ tosa sɔɔŋ mɛɛ o hɛnaŋ yɛ. Kɛsiŋ o kɔl maa, o che sala ŋ cho soliŋndo le ndu piɛiyo wo o sɔvɛ. Nduyɛ o cho chɔɔ kindiŋ ŋ cho le yuŋgu numndo mandaa, ma wa nda kaalaa a nda bɛɛleŋ chɔmndo wo.—Luomaŋ. 12:10.

LA Ŋ DƐƐNIAŊ VELLAA VELLE LE WAA MAA NAASILUƐIYA

14. Nɛɛ yaa kpeekpei naŋ nɔ yɛ miŋ kindiŋ le kɔl dɛɛniaa kioo?

¹⁴ Wana o wana yeema pɛ le Chɛhowa piɛiyo a kɔllo kpou, o nɔ mbo soliŋ sala le mɛɛ o nɔ kaalaa le ndu yɛ. Teleŋndaŋ lapum, hei ve bɛɛŋ bɛɛŋ le tosaa le. Vɛɛ naŋ dɛɛniaŋ yɛ vellaa velle le salalaŋ solioo le Chɛhowa? Ŋ tosa hei te ŋ wa pɛ diomnda kɔl dɛɛniaalaŋ demulaŋndo. (Choobu 16:5) Baa kunda numndo nɔ pa wanaa cho tosaa tau o Chɛhowa piɛiyo niŋnda? Baa a sina pa feleŋguaa a cho kɔl simulaa chɔmndo le waa teŋgeŋ a chuaambuaa cheleŋnda o sukuu wa? A sina pa wanaa cho Baabuiyo pɛɛkoo kɛ mi yuŋgula ndalaŋ la wa nda nyɛpalaa tusioo choo wa? Ŋ nɔ miŋ dɛɛniaa  waŋnda haa kɔllo teleŋ o teleŋ. Ŋ nɔ miŋ dimul nda mɛɛ kpɛ naŋ cho a kɔl kɛndɛ le kɔl simulaa nda cho chɔmndo wo yɛ.—Filɛ. 4, 5, 7.

15. Vɛɛ waŋnda apum toolu yɛ wanaa cho o wali lɔɔlɔɔ Mɛlɛkaa niŋnda?

¹⁵ Lepum, miŋ tiuba le wanaa cho o wali lɔɔlɔɔ Mɛlɛkaa niŋnda malaa a nyɛm naŋ nɔ woŋ. (Pulɔ. 19:17; Hibu. 13:16) Hei ndepilɛnɔ yuuwɛi pilɛ o Sili Laŋka niŋ tosa ni. Mɛɛ nda chɔɔlu ndu paawa ndɔɔ hendul lechoo naa o wa paandu wallo wa, ndoo yeema le ndepiliaa ŋiɔɔŋaa wa kɔɔfaleŋ tosaa wa malaa, le ma hiou lachi a wali nda pollo tosaa, mi che bɛɛ ndaa nɔ bahawɛi nyɛsɔlaa. Mbo kɛɛsiaa le nda tooloo a nyɛsɔlaa ipaŋgu o ipaŋgu le waa kaniei wouwo o nyɛm mapuuluŋ ndaŋ niŋ. Nuawɔ se sala kɛndɛ ndepilɛnɔɔ hoo soliŋndo!

16. Yɛɛ naŋ pɛɛku yɛ o buŋgɛi Naasiluɛiya ndaa chua o sindɔɔ niŋnde niŋ?

¹⁶ Ŋ nɔla miŋ pɛɛku tau o tamaselii Naasiluɛiya niŋ. Buŋgɛi ndaa chua ve pɛɛku naa nyɛ sɔvɛ sɔvɛ a Chɛhowa Finya naa o choo choo niŋ okɔɔ. O sina maa ŋ nɔ yeemɛi kpeekpei le ndu kɔllo nɛŋioo, nduyɛ ŋ cho a yɔŋgaŋ le salalaŋ solioo le halikpeŋ miŋ peelu buŋgɛi naŋ chua ve. O chɛl naa le miŋ chɔm mɛɛ kpɛ naŋ kaala ndu yɛ. (Pulɔ. 23:​15, 16; Maki 10:​28-30; 1 Chɔŋ 4:19) Nduyɛ buŋgɛi Naasiluɛiya ndaa chua ve chɔm maa, Chɛhowa che buŋgaŋ naŋ chua woŋ, a kaala naŋ chɔm ndu wo nyɛ sɔvɛ. Lelaŋ, maa ŋ hiounuŋ lachi a yeemɛi nɔɔ le Chɛhowa piɛiyo, nduyɛ miŋ yɔŋguŋ wulee le ndu kioo o naŋ tiuba wo.