1. Nkareso musinke zongwa va likida vakareli vaJehova kutunda kwanare dogoro ngesi?

 WA HARA unene Jehova ndi? Tuna sihuguvara asi wa mu hara! Kapisi nyovelike o li zuvhu ngoso. Kutunda kwa nare, vantu wovanzi nawo yimo ava lizuvhu ngoso. (Epis. 104:​33, 34) Vantu wovanzi kwa tura po malizambero yipo va karere Jehova. Ano eyi yiyo va rugene Vanasili mosiruwo sanare soVaisraeli. Wolye Vanasili ntani yisinke natu lirongera ko kosihonena sawo?

2. (a) Wolye va kere Vanasili? (Numeri 6:​1, 2) (b) Morwasinke Vaisraeli vamwe va tokwere kutura po mugano gokukara Vanasili?

² Nkango “Munasili” kwa tunda konkango zoRuhebeli ezi azi tanta asi “Muntu ogu va horowora” ndi “Muntu ogu ga ligava mwene kositumbukira somulyo.” Nkango ezi kwa faturura nawa-nawa Vaisraeli ava va kere noupampi, ava va tulire po malizambero yipo va karere Jehova monkedi zokulikarera. Veta zaMosesa kwa pulisilire mugara ndi mukadi a ture po mugano gokulikarera kwaJehova, yipo a kare Munasili siruwo songandi. a (Resa Numeri 6:​1, 2.) Mugano ndi etumbwidiro olyo, kwa kwaterere mo mavyukiso aga ngava dili kukwama Vaisraeli wopeke. Morwasinke Muisraeli nga tokwere ku kara Munasili? Muisraeli gwangoso nampo kwa tulire po mugano ogo morwa kwa here Jehova unene ntani kwa kere norupandu  koyininke yoyiwa eyi ga rugana Jehova.—Deut. 6:5; 16:17.

3. Ngapi omu vantu vaKarunga womosiruwo setu va lifana noVanasili?

³ Ewapaiko lyokukara Munasili kwa ya hege apa Veta zaMosesa va zi pinganesere po ‘noveta zaKristusa.’ (Gar. 6:2; Rom. 10:4) Ngwendi moomu va yi rugene Vanasili, vantu vaJehova neina kuna kutwikira kulikida eharo lyenene yipo va mu karere nomutjima nagunye, nomwenyo nagunye, nonondunge nadinye ntani nononkondo nadinye. (Mar. 12:30) Ose kutumbwidira Jehova asi ngatu mu karera apa atu ligava kwendi. Kuparuka kuliza netumbwidiro olyo, kwa kwatera mo kurugana mpango zaJehova ntani nokutura po malizambero. Ngomu natu ka konakona omu Vanasili va sikisire mo mugano gwawo, natu ka lirongera ko yirongwa yomulyo omu nose natu sikisa mo mugano gwetu. b (Mat. 16:24) Tu zeni tu ka zogere ko yihonena yimwe.

KARA NEHARO LYOKULIZAMBERA

4. Kuliza naNumeri 6:​3, 4, elizambero musinke ga hepere kutura po Munasili?

⁴ Resa Numeri 6:​3, 4. Vanasili kapi va va pulisilire kunwa marovhu nokulya mandjembere. Vantu wokuhupa ko ngava hafere nondya odo morwa kapi ya kere epuko kudilya. Bibeli kutanta asi vhinyu kuna kara uhwi wokutunda kwaKarunga. Azo kutanta hena asi ‘vhinyu kuhafesa.’ (Epis. 104:​14, 15) Nampili ngomu yininke eyi ngayi ninkisa muntu a hafere eparu, nye Vanasili va hepere kudinyokera po. c

5. Malizambero musinke va tulire po oMadián naMarcela ntani morwasinke?

⁵ Ngwendi moomu va yi rugene Vanasili, nose kutura po malizambero yipo tu ruganene Jehova momunene. Tu zeni tu ka tare sihonena saMadián naMarcela. d Valikwali ava ngava hafere kuparuka nawa. Madián kwa kere noyirugana yoyiwa ntani awo kwa kere nonzugo zongwa. Nye nampili ngoso, awo kwa here kurugana unene mosirugana saJehova. Mokuninka asi va sikise mo sitambo sawo, awo kwa tokwere kutura po malitjindjo gamwe. Awo kwa tanta asi: “Ose kwa tamekere kuruganesa yimaliwa yoyisesu. Ose kwa dirukilire monzugo zonunu ntani kwa randesere etuwa lyetu.”  Madián naMarcela kwa tulire po malitjindjo aga morwa kwa here kurugana unene mosirugana saJehova. Awo ngesi vana hafa morwa matokoro aga va tura po.

6. Morwasinke Vakriste ava tulire po malizambero neina? (Tara hena efano.)

⁶ Vakriste neina kuhafa apa ava tura po malizambero yipo va gwane siruwo sosinzi sokukarera Jehova. (1 Kol. 9:​3-6) Nye Jehova kapi a ndindire ko kwetu tu ture po malizambero gangoso ntani yininke eyi atu sigi kapi ya kara epuko. Pasihonena, vamwe kutokora mokudira kukara nembo lyavene ndi yirugana eyi va hara. Vamwe kwa tokora kukara vadike siruwo sosire ndi mokudira kukara novanona konyima zokukwara. Vamwe kwa tokora kuza oku kuna hepa evatero lyenene nampili ngomu va hepere kusiga vakaume vawo nekoro lyawo. Sinzi setu kutura po malizambero gangoso morwa tuna hara kuruganena Jehova paapa twa hulira. Kara nehuguvaro asi Jehova kuhafera nkenye elizambero eli o tura po yipo o mu karere.—Heb. 6:10.

WA HA HONENA WOPEKE

7. Morwasinke nampo ya karerere udigu koMunasili mokusikisa mo mugano gwendi? (Numeri 6:5) (Tara hena efano.)

⁷ Resa Numeri 6:5. Vanasili kwa tulire po mugano yipo va dire kuteta nohuki dawo. Azo kwa kere nkedi omu ngava yi likida asi awo kwa li gava kwaJehova. Nsene asi Muisraeli kwa kere Munasili siruwo sosire, nohuki dendi ngadi repa ntani wopeke ngava yi dimburura usimbu. Nsene asi wopeke va kwatesere ko mugano gwendi, ayo ngano ya mu karerere ureru a lisige novakwawo. Nye ehudi, poyiruwo yimwe vantu kapi ngava fumadeke Vanasili ndi va va kwatese ko. Posiruwo somuporofete Amosa, Vaisraeli wovarwanesi kwa ninkire Vanasili “va nwe vhinyu” konda nampo mokuvaninkisa va dire kulimburukwa komugano ogu va tulire po gokudira kunwa vhinyu. (Amosa 2:12) Poyiruwo yimwe, Munasili ga hepere kukara nouradi yipo a sikise mo mugano gwendi ntani yipo a dire kuhonena wopeke.

8. Ngapi omu sihonena saBenjamin sina kukorangeda?

⁸ Jehova kuvhura a tu vatere nose yipo tu lisige novantu wopeke nampili yi kare asi ose vantu wowoma. Tu tareni sihonena samunazinyetu Benjamin gonomvhura murongo ogu ga tunga moNorway. Sure zawo kwa kere nosilika yipo va kwatese ko sirongo saUkraine mosiruwo soyita. Vanona kwa va pulire va dimbe rusumo, posiruwo oso awo kuna dwara mudwaro gokufana maruvara gerembe lyosirongo saUkraine. Mokuninka asi Benjamin a dire kulihameka mo mosilika oso, age kwa sikeme ure noku sa karerere silika. Nye mitili ga mu mwene, makura yipo ga mu zigidire asi:  “Wiza, nyove tuna kundindira natuvenye.” Makura Benjamin yipo ga likidire uradi nokuza kwamitili ogo noku ka mu tantera asi: “Ame kapi ani lihameke momaupolitika ntani hena sinzi soNombangi daJehova kuna kara monodorongo morwa kwa nyoka kuza koyita.” Mitili ga tambwire eyi ga mu tanterere Benjamin ntani nokumutantera asi kapisi hepero a lihameke mo, nye nampili ngoso varongwa vakwawo kwa tamekere kumupura konda zeyi ga dililire kulihameka mo. Benjamin hambara a lire morwa ga kere sili nowoma, nye ga kere nouradi wokutantera varongwa vakwawo mbudi zokulifana nezi ga tanterere mitili gwawo. Konyima Benjamin kwa ka tanterere vakurona vendi asi Jehova kuna muvatere yipo a popere epuro lyendi.

9. Monkedi musinke natu hafesa Jehova?

⁹ Mokumona asi ose kwa tokora kulimburukwa Jehova, vantu kuyidimburura asi ose twa lisiga nawo. Twa hepa uradi yipo tu tantere wopeke asi ose Nombangi daJehova, yikare asi kosure tuna kara ndi koyirugana. Ngomu nkareso zovantu womouzuni ou zina kudonapa unene, ayo nampo ngayi tu karera udigu kusikisa mo nompango domoBibeli ntani nokuzuvhisira wopeke mbudi zongwa. (2 Tim. 1:8; 3:13) Diworoka asi ose kuhafesa Jehova apa atu dili kuhonena vantu ava ava dili kumukarera.—Yis. 27:11; Mara. 3:18.

TURA JEHOVA MUHOWO MEPARU LYOGE

10. Ngapi omu mpango ezi za kara mwaNumeri 6:​6, 7, za hetekere Munasili?

¹⁰ Resa Numeri 6:​6, 7. Vanasili kapi va hepere kukara pepi nosimpu. Kuvhura yi moneke ngwendi eli kapi lya kere elizambero lyenene. Nye mosiruwo sanare, elizambero eli kwa kere udigu koMunasili kulisikisa mo apa gumwe gekoro lyendi ga dogorokere. Yininke eyi ngava kwama nare posiruwo sonomfa, kwa kwaterere mo asi vantu va hepa kukara pepi nosimpu. (Joh. 19:​39, 40; Yirug. 9:​36-40) Nye Munasili kapi ga hepere kukwama nompo odo. Munasili ga hepere kukwaterera komugano gwendi apa ngadi horoka nomfa mekoro. Jehova kwa nkondopekere vakareli vendi ava ngava mu limburukwa yipo va lididimikire maudigu gangoso.

11. Yisinke na tokomena Mukriste nsene kuna kutura po matokoro kuhamena yininke yemekoro? (Tara hena efano.)

¹¹ NgoVakriste, ose kutara mugano ogu twa tura po kwaJehova asi sininke somulyo unene. Ano eyi kukundama matokoro getu ntani nayimwe yemekoro. Ose kurugana paapa twa hulira yipo tu pakere mbili yihepwa yava  vemekoro lyetu. Nye ose kwa hara po unene Jehova kupitakana vekoro lyetu. (Mat. 10:​35-37; 1 Tim. 5:8) Eyi kutanta asi poyiruwo yimwe kuvhura tu ture po matokoro aga naga hafesa Jehova, nye aga nava dira kuhafera vekoro lyetu.

12. Yisinke ga rugene Alexandru apa ga li gwanekerere noudigu mepata ntani yisinke ga dilire kurugana?

¹² Tu zeni tu ka tare sihonena saAlexandru ntani namukadendi Dorina. Apa valikwali ava va lirongere Bibeli ure womvhura, Dorina yipo ga tokwere kuhageka ntani age kwa here mugara gwendi Alexandru nage a hageke kulironga Bibeli. Nye Alexandru kwa mu uyungisire monkedi zongwa zokulitura asi nga twikira kulironga. Dorina kapi ya mu hafesere ntani age kwa twikilire kumusininika yipo a hageke kulironga. Alexandru kwa tanta asi age kwa hetekerere ko kukwata egano konda zeyi mukadendi ga lizuvhilire ngoso nye ayo kapi ya mu karere ureru. Poyiruwo yimwe apa Dorina nga mu uyungire yoyidona, age nga lizuvhu ngwendi a hageke kulironga Bibeli. Nye Alexandru kwa twikilire kutura Jehova muhowo nokuhara mukadendi ntani nokumufumadeka. Ano konyima, sihonena sosiwa samugara gwendi kwa mu tumangedere hena yipo a tameke kulironga Bibeli ntani noku ya gwana ekuho.—Tara ko-jw.org vidiyo zaAlexandru naDorina Văcar zosiparatjangwa asi “Eharo kwa kwata nedidimiko nounambili,” konhi zoruha “Bibeli kurundurura eparu lyovantu.”

13. Ngapi omu natu likida eharo kwaJehova ntani nava vemepata lyetu?

¹³ Jehova yige ga tulisa po mapata ntani ana hara tu kare nomapata goruhafo. (Efe. 3:​14, 15) Nsene tuna hara kukara noruhafo rosili, twa hepa kurugana yininke monkedi omu ana yi harere Jehova. Kara nehuguvaro asi Jehova kuhafera malizambero aga o tura po yipo o mu karere ngomu ono kupakera mbili epata lyoge nokuvatekura neharo ntani nefumadeko.—Rom. 12:10.

LIKORANGEDENI YIPO MU KARE NGWENDI VANASILI

14. Wolye ava natu korangeda po unene?

¹⁴ Navenye ava va tokora kukarera Jehova neina, va hepa kutura po malizambero morwa va mu hara. Poyiruwo yimwe kapisi ureru kuyiruganaoyo. Ngapi omu natu livatera-vatera yipo tu ture po malizambero gangoso? Kuvhura tu yi rugane oyo pokukorangeda wopeke. (Joba 16:5) Koveli vamwe womombungakriste zeni ava vana kuhetekera ko kurerupika eparu lyawo yipo va li hameke mo unene mosirugana saJehova ndi? Wa diva ko vadinkantu vamwe ava ava likida uradi yipo va lisige novanasure vakwawo nampili  ngomu ayi va karere udigu kuyirugana ndi? Wa diva ko varongwa vamwe woBibeli ntani vanavazinyetu ava yina kudigopera kulimburukwa Jehova morwa marwaneso gokutunda kovanekoro ndi? Tu ruganeseni nkenye mpito ezi tuna gwana mokuvakorangeda ntani nokuvapandura kelizambero nouradi ou ava likida.—Fir. 4, 5, 7.

15. Ngapi omu vamwe va vatera ava va kara mosirugana sosiruwo nasinye?

¹⁵ Poyiruwo yimwe, kuvhura tu vatere vanavazinyetu ava va kara mosirugana sosiruwo nasinye. (Yis. 19:17; Heb. 13:16) Ano eyi yiyo ga here kurugana munazinyetu gomukadi gomukurupe ogu ga tunga moSri Lanka. Apa ga gwene yimaliwa yopensiuni, age kwa here kuvatera vanavazinyetu vavali wovakadi, wovazuvhisi wokukarerera yipo va twikire nosirugana sawo sokuzuvhisa nampili ngomu lya digopere eparu. Yipo ga tokwere kuvafutira nkenye kwedi yimaliwa eyi ngava ruganesa koterefona. Munazinyetu ogo kwa likidire nkareso zongwa.

16. Yisinke natu lirongera ko koVanasili?

¹⁶ Ose kuvhura kulirongera ko yoyinzi kosihonena sosiwa esi va tulire po Vanasili. Nye nampili ngoso, ewapaiko eli kuturonga hena yininke yimwe kuhamena Guhyetu gemeguru Jehova. Age ga yi diva nawa-nawa asi tuna hara kumuhafesa ntani nokusikisa mo mugano ogu twa tulire po apa twa li geve kwendi. Age kutufumadeka pokutupa mpito yipo tu likide eharo lyetu kwendi. (Yis. 23:​15, 16; Mar. 10:​28-30; 1 Joh. 4:19) Ewapaiko eli lyokuhamena Vanasili kulikida asi Jehova kumona nokuhafera malizambero aga a tu tura po yipo tu mu karere. Yipo nye, tu tokomeneni kutwikira kukarera Jehova pokumuruganena paapa twa hulira.