1. Ambeela wale, kodi atumiki a Yehova kookala kapanganga n’ni votonyi-eda ira kanomukonda?

 KODI munokonda vinjinji Yehova? Pivyo-okaiki-a. Ndipo iziwani ira kai ekinyu anayo munamukonda. Ambeela wale athu o-owelengeya kokala kamukondanga ngati mwemo nyo munapangela nyo. (Sal. 104:33, 34) Anjinji kookala kavimananga vimo-i viwa vyene ira kalambelenga Yehova. Vi pivyevyo teto Aizaraeli oromoliwa Anaziri kapangaathu. Kodi aliwa kali mbaani, nanga ninafunjede n’ni va isazo iwa?

2. (a) Kodi Anaziri kali mbaani? (Numeri 6:1, 2) (b) Chifukwa n’ni Aizaraeli amo-iwa koopanga lonjezo lokala Anaziri?

² Mawu oyi Mnaziri mbokumela muchiheberi ndipo kanatantauza opatuliwa kapena ovipeleka.” Mawala kanoonga vya Muizaraeli wakama unoyo unavimana vyongo vimo-i nayolinga yoi atumikelenga Yehova mundila yavadela. Chilamulo ya Mose yoolola ira mulombwana kapena mu-iyana apange lonjezo la vadela wa Yehova losakula kala Mnaziri wa thawi imo-iwene. a (Welengani Numeri 6:1, 2.) Muthu unoyo upangile lonjezoli afuneya arela malamulo amo-iwene mo-iyana na Aizaraeli afwae. Ndiye kodi chin’ni yapangi-a ira Muizaraeli apange lonjezoli? Liye oopanga lonjezoli chifukwa yokonda vinjinji Yehova koma teto madaliso anayo ava-iwa liye. — Doto. 6:5; 16:17.

3. Kodi athu a Yehova malambwano kanafwanafwana avi na Anaziri?

³ Unaziri oomala Chilamulo ya Mose ingavolowiwe m’malo na chilamulo ya Kiristu.” (Agal. 6:2; Arom. 10:4) Komave mofwanafwana na Anaziri, athu a Yehova malambwano kanopitiliza  tonyi-eda ira mbofunechecha tumikela na murima wetene, moywiwa wetene, maganiziwa etene koma teto na kopolo diwa detene. (Maliko 12:30) Mofunechecha, ninolonjeza vyevi napelekanga moywi-u wa Yehova. Ira nikwakwaneli-ede lonjezoli, ninafuneya panga chifunilo ya Yehova koma teto vimana vyongo vimo-i. Ninokambilana vyevyo Anaziri kapangaathu ira kakwakwaneli-edenga lonjezo liwa, ninofunjeda teto vyevyo ninapange iyo ira nikwakwaneli-edenga lonjezo li-u. b (Mat. 16:24) Tiyemoni nione visazo vingasi vyene.

MUKALENGA OVIMANA

4. Mogwilizana na Numeri 6:3, 4, kodi Anaziri kalolela viimana vyongo viivi?

⁴ Welengani Numeri 6:3, 4. Anaziri katafuneya ng’wa walwa kapena dja iliyetene yokumela wu mphesa. Aizaraeli amo-i etene koosangalala ng’wa koma teto dja vyongo ngati vyevi chifukwa kavali yolakweya iliyetene. Moi Baibulo linofotokoza ira “vinyo . . . unosangalasa murima wa muthu” ndipo chi mphaso yokumela wa Mulungu. (Sal. 104:14, 15) Koma mofunechecha, Anaziri koolola vimana vyongo ngati vyevi. c

5. Kodi Madián na Marcela koololela iya vyongo viivi nanga chifukwa n’ni?

⁵ Mofwanafwana na Anaziri, ninovimana vyongo vimo-i ira nipangenga vinjinji votumikela Yehova. Isazo vakhanila ngu Madián na Marcela. d Banjali lali lolemela. Madián oo-inda chito yapama vyevyo vyapangi-a ira kakalenga nyumba yoriya. Komave aliwa koofuna panga vinjinji votumikela Yehova. Ira vyevi viwandeye kooganiza iya vyongo vimo-i. Aliwa kaongile ira: “Noowambeela yevi-a vyongo vyevyo nagula iyo. Nooguli-a galimotwi-u ndipo nootamela munyumba ing’onong’ono.” Madián na Marcela koosakula vyevi chifukwa kafuna onjedela utumikiwa, o-okala chifukwa ya vyevyo kafunaathu panga. Aliwa kanosangalala chifukwa ya vyevyo kasakulileathu.

6. Chifukwa n’ni Akiristu malambwano kanololela vimana vyongo vimo-i? (Onani teto ithuzithuzi.)

⁶ Akiristu malambwano kanosangalala chifukwa yololela iya vyongo vimo-i na yolinga yoi kakalenga na thawi injinji yotumikela Yehova. (1Akor. 9:3-6) Kai ira  Yehova unoembekezela ira nivimanenga vyongo vimo-i viwa vyene, koma teto vyongo vyevyo ninalolela iyo vimana vayekiwa kai vyolakweya. Mwaisazo, amo-iwa kanolola iya chito yapama, nyumba ngakale teto viweto vyevyo kavikondaathu. Amo-iwa kanosakula o-othela mombaraanya kapena o-okala na a-ima. Amo-iwa kanosakula dowa wewo unafuneya olaleela anjinji ngakale ira vi vinopangi-a ira kalapelane na abaliwa. Mofunechecha, anjinji a iyo ninololela iya vyongo ngati vyevi chifukwa yofuna muva-a Yehova vyongo vyapama vinjinji. Kamukaikelenga ira Yehova unosangalala vinjinji mwalolelanga vimana vyongo vimo-i, kaya vilukulu kapena ving’onong’ono, na yolinga yoi mumutumikelenga. — Aheb. 6:10.

MUESAESENGA KALA O-IYANA NA AMO-I

7. Chin’ni yapangi-e ira vikale vyorucha wa Mnaziri ira asunge lonjezo lae? (Numeri 6:5) (Onani teto ithuzithuzi.)

⁷ Welengani Numeri 6:5. Anaziri koolonjeza ira katinaza kameta sisiliwa. Inela yali ndila yotonyi-eda ira koovipeleka wa Yehova. Muizaraeli akala Mnaziri wa thawi indendai, sisilae loolapa vinjinji ndipo anthu amo-i koowanda zindikila vyevi. Aizaraeli amo-iwa kaalemekezanga koma teto limbikisa Mnaziriyo, vyookala vyo-orucha ira apitilize kwakwaneli-eda lonjezo lae. Koma pivyovwi-a chisoni ira va thawi imo-i Aizaraeli katalemekeza kapena tandiza Mnaziri. Muthawi ya mneneri Amosi, Aizaraeli a mpatuko ‘koowava-a Anaziri vinyo ira kang’we,’ ndipo mwina koopanga vyevi vofuna apangi-a ira katwe lonjezo liwa lopewa ng’wa vinyo. (Amosi 2:12) Thawi dimo-i Mnaziri afuneya limba murima vinjinji ira akwakwaneli-ede lonjezo lae kalave o-iyana na amo-iwa.

8. Kodi vyevyo vyamuireele Benjamin viulimbikisileni avi?

⁸ Motandiziwa na Yehova, iyo teto ninokoza kala olimba murima kala o-iyana na amo-i, ngakale ira mwachibadwa ninokaana manyazi kapena mantha. Isazo va khanila ngu wa Mboni m’mo-iwa wa chaka 10 wau Norway zina lae Benjamin. Usukulu wae ookala vyoireya vyevyo yolinga iwa yali limbikisa athu awu Ukraine wewo wali kondo. A-ima awu sukuluwo koowandeliwa ira kaimbe nyimbo kangawarile vyowara vyokaana mitundu da mbendera yau Ukraine. Benjamin oosakula kala vandendai na vevo vaireya vyongovyo na yolinga yoi kapangena. Komave mphuzisi m’mo-iwa oomuitana ira: “Zawo uno wuimbena etene ninadedi-a weyo.” Molimba murima Benjamin oodowa wa mphuzisiyo nomuwandela ira: “Kandinapangana vionesero vili vyetene vyandale,  ndipo a Mboni da Yehova kali mundende chifukwa yokoonda vazanao kondo.” Mphuzisiyo oovuruwana vyevyo Benjamin afotokozile liye ndipo oomulola ira kapangenao. Komave afwae a mukalasi koomufuka chifukwa iwa kaapangilenao vyongovyo. Benjamin oowova vinjinji moi a-alile vang’ono ula. Komave molimba murima vinjinji ooweli-eda kalasi yetene ineyo vyevyo amuandele liye mphuzisiyo. Vanduli viwa liye oowandela makolwae ira oowona Yehova amutandizanga ira alimbe murima fotokoza vyevyo unaroromela liye.

9. Kodi ninapange avi ira nisangalasenga murima wa Yehova?

⁹ Chifukwa yoi ninosakula panga chifunilo ya Yehova, ninokala o-iyana na athu amuilambwela. Ninafuneya limba murima ira niviiziwi-e ira nili a Mboni da Yehova nakala uchito kapena usukulu. Koma teto vevo vyoireya na makalelo a muilambwela vinatakalaathu, thawi dimo-i vinokoza kala vyorucha ira ni-arelenga makundo a m’Baibulo koma teto wandela amo-i uthenga wapama. (2 Tim. 1:8; 3:13) Komave ninoumbuwela ira ninosangalasa murima wa [Yehova] napitiliza tonyi-eda molimba murima ira nili o-iyana na athu anayo katinamulambela. — Miya. 27:11; Mal. 3:18.

MU-ELENGA YEHOVA VAMALO OWAMBEELA

10. Kodi arela lamulo lava Numeri 6:6, 7 wali wovuta avi wa Anaziri?

¹⁰ Welengani Numeri 6:6, 7. Anaziri katafuneya andamela muthu okhwa. Mwina munokoza ganizanga ira inela kayali khani ilukulu. Koma walevo, vyakala vyorucha wa Mnaziri simbwasimbwa ngati unoyo ukhwileyo ngu balae owandamanana. Vathawiyo, miyambo da malilo dapatikizavo kala vakwikwi na thuthu la muthu ukhwileyo. (Yoh. 19:39, 40; Vyo. 9:36-40) Koma lonjezo lelo Mnaziri apanga liye loopangi-a ira ka-arele miyambo ngati dedi. Ngakale panga vyongo na abalae vathawi yorucha yachisoniyo, Mnaziri ootonyi-eda iroromelo vosungave lonjezo lae. Mo-okaikela, Yehova oolimbikisa atumikae ovipelekala ira kaande vilela mavuto anayo kagumananaathu.

11. Kodi Mkiristu unafuneya kala osimikiza panga n’ni apanganga vyongo na abalae? (Onani teto ithuzithuzi.)

¹¹ Monga Akiristu kaninaona movevuwa lonjezo li-u lovipeleka wa Yehova. Vyevi vinokuza vyosakula koma teto vyoira vi-u va khani dokuza abali-u. Ninoesaesa kwakwaneli-eda  mosamala udindwi-u wa m’Malemba osamalela abali-u, koma kaninalola ira vyofuna vya abali-u vinilepeli-e panga vyevyo Yehova unafuna liye. (Mat. 10:35-37; 1 Tim. 5:8) Thawi dimo-i vyevi vinokoza pangi-a ira nisakule vyongo vyevyo kavinasangalasa abali-u, koma vinosangalasa Yehova.

12. Vevo apanga liye vyongo na mu-iyanae, kodi Alexandru apangile n’ni, nanga kaapangile n’ni?

¹² Kaganizelani vyevyo vyamuireele Alexandru na mu-iyanae Dorina. Banjali langafunjedile Baibulo wa chaka, Dorina oo-iya ndipo afuna ira mamunae teto a-iye funjeda. Koma mwaulemu koma teto modeka liye oomuwandela ira unopitiliza funjeda. Dorina kavyamusangalasile ndipo ooesaesa mukakamiza ira a-iye. Alexandru ooesaesa vwechecha mwemo mu-iyanae mwavwela liye koma kavyali vyokweya wa liye. Thawi dimo-i Dorina amuongelanga mwauwali liye oowona ira mwina bola akede iya funjeda. Komave Alexandru oovilela vo-ela Yehova vamalo oowambeela ndipo oopitiliza konda vinjinji koma teto lemekeza mu-iyanayeyo. Vamapeto viwa isazo yae yapama yootandiza ira Dorina aambeele teto nawili funjeda Baibulo ndipo dowa wa thawi oobadiziwa. — Onani va jw.org vidiyo yoi Alexandru ndi Dorina Vacar: Chikondi N’choleza Mtima Ndiponso N’chokoma Mtima vagawo loi “Mfundo za M’Baibulo Zimasintha Anthu.”

13. Kodi ninatonyi-ede avi ira ninokonda Yehova koma teto athu a m’banja li-u?

¹³ Yehova ngunoyo aambeeli-ile Banja ndipo unafuna ira nikalenga na Banja losangalala (Aife. 3:14, 15) Ngati ninafuna ira nisangalalenga m’Banja li-u ninafuneya panga vyevyo Yehova unafuna liye. Kamukaikelenga ira Yehova unosangalala na kama lelo munapanga nyo vomulambela koma teto samalela athu a Banja linyu mwachikondi na mwaulemu. — Arom. 12:10.

NILIMBIKISENGA AMO-I IRA KAKALENGA NGATI ANAZIRI

14. Kodi mbaathu aavi simbwasimbwa anayo ninafuneya iyo alimbikisa na vyoonga vi-u?

¹⁴ Malambwano, etene anayo kanasakula ira kalambelenga Yehova kanafuneya kala ofunechecha mutumikela chifukwa yomukonda. Komave thawi dimo-i panga vyevi kai wokhweya. Kodi ninatandize avi amo-i ira kapangenga vyevi? Nialimbikisenga na vyoonga vi-u. (Yobu 16:5) Kodi vikala amo-i mupingo mwinyu anayo ka-iile vyongo vimo-i nayolinga yoi kapangenga vinjinji votumikela Yehova? Kodi munoiziwa achinyamata amo-i anayo kanaesaesa molimba murima ira kakale o-iyana na afwiwa usukulu, ngakale ira  panga vyevi korucha? Kodi vikala ofunjeda Baibulo kapena Akiristu amo-iwa anayo kanaesaesa kalave ororomeleya ngakale ira kanoruni-iwa na abaliwa? Ninafuneya indi-eda chito mpata uliwetene limbikisa Akiristu afwi-u vowayamikela chifukwa yoesaesa kala ovimana koma teto olimba murima. — Afil. 4:5, 7.

15. Kodi amo-i kanatandiza avi athu anayo kanapanga utumiki wathawi detene?

¹⁵ Thawi dimo-i ninokoza tandiza Akiristu afwi-u anayo kanapanga utumiki wathawi detene vowava-a vyongo vyofuneya. (Miya. 19:17; Aheb. 13:16) Vi pivyevyo murongola m’mo-iwa wachikulile unoyo unakala wu Sri Lanka afunechecha liye panga. Kangamuenjedele ndalama dae da peshoni, afuna tandiza arongola amo-i ambiili aisikana anayo kapanga upainiya ira kapitilize mutumikela, ngakale ira muilambo iwa mookala mavuto avyachuma. Eno ooganiza vyoi aava-enga ndalama mwedi uliwetene volivelela mabilu a telefoni. Murongolola ootonyi-eda murima wapama vinjinji!

16. Kodi ninafunjede n’ni vaisazo ya Anaziri?

¹⁶ Onga vyoona, ninokoza funjeda vinjinji va isazo yapama ya Anaziri. Komave lonjezo la Mnaziri linonitandiza teto iziwa vyongo vimo-i vyokuza Babi-u waudimu, Yehova. Liye unoiziwa ira ninofuna na murima wetene musangalasa, koma teto ira ninofunechecha vimana vyongo vimo-i nayolinga yoi nikwakwani-e lonjezo li-u lelo napangile iyo vovipeleka. Liye oonilemekeza voniva-a mwayi woyi nitonyi-ede vaeki-u ira ninomukonda. (Miya. 23:15, 16; Maliko 10:28-30; 1 Yoh. 4:19) Lonjezo la Mnaziri linotonyi-eda ira Yehova unoona koma teto unoyamikela vimana wewo ninapanga iyo ira nimutumikele. Eno tiyemoni nikale osimikiza ira nipitilizeve tumikela Yehova koma teto esaesa panga vyevyo ninawande iyo vomuva-a vyongo vyapama vinjinji.