1. Ino ngumubo nshi ubotu basebenshi bakwe Yehova ngobatondesha kuswabo kale kale?

 SA YEHOVA mulimusuni? Ncakutatoonsha mulimusuni! Alimwi tamubete nweenka. Kuswabo kale kale, bantu baanji balalinyumfwa bweenka mbomulinyumfwa. (Kulu. 104:​33, 34) Baanji bakalyaaba kwaamba ayi basebensele Yehova. Ubo mbocakalinga kubantu bakalinga kwiitwa ayi ba Nasili, muciindi ca bene Isilaeli. Ino bakalinga mbaani alimwi ino nshiinshi nsheenga tweeya kuswa kucakubonenaako cabo?

2. (a) Ino ba Nasili bakalinga mbaani? (Shakubelenga 6:​1, 2) (b) Ino nceebonshi bene Isilaeli bamwi bakalinga kusalawo kuba ba Nasili?

² Liswi lyakwaamba ayi “Munasili” lyakaswa kuliswi lyamu ciEbulu lisansulula muntu wakasalwa, wakapatulwa na wakalyaaba kusebensa ncito ilibetele. Ba Nasili bakalinga mbene Isilaeli basebensa cankusu abo bakalinga kulyaaba kusebensela Yehova munshila ilibetele. Milawo yakwe Mose yakalinga kusuminisha musankwa nabi mwanakashi kushomesha cakulumbila kuli Yehova kwiinda mukusalawo kuba Munasili kwakaciindi. a (Amubelenge Shakubelenga 6:​1, 2.) Na mwine Isilaeli washomesha cakulumbila kuba Munasili, wakalinga kweelete kukonkela milawo imwi bene Isilaeli boonse njebatakalinga kweelete kukonkela. Aboobo ino nceebonshi mwine Isilaeli wakalinga kusalawo kuba Munasili? Kusuna Yehova abuumbi akulumba pashoolwe shiinji nshaakalinga kumupa, nsheshakalinga kupa kwaamba ayi mwine Isilaeli asaleewo kuba Munasili.—Duto. 6:5; 16:17.

3. Ino nshiinshi bantu bakwe Lesa nshobacita munshiku shino shikoshenye aba Nasili nshobakalinga kucita?

³ Bubaambo bwakuba Munasili bwakamana ciindi bantu bakwe Lesa ndyebakacileka kukonkela Milawo yakwe Mose akutalika  kukonkela “mulawo wakwe Klistu.” (Gala. 6:2; Loma. 10:4) Nacibi boobo, bweenka mbocakalinga kuba Nasili, amunshiku shino bantu bakwe Yehova batolelela kutondesha mushimu wakusuna kumusebensela amyoyo yabo yoonse, buumi bwabo boonse, miyeeyo yabo yoonse ankusu shabo shoonse. (Maako 12:30) Tulalyaaba kushomesha cakulumbila kucita boobo na twaaba buumi bwesu kuli Yehova. Kwaamba ayi tutolelele kucita kweelana ambotwakashomesha Yehova, tulyeelete kunoocita kuyanda kwakwe akulyaaba kumusebensela. Ndyetutokwiiya ba Nasili mbobakalinga kukumanisha nshebakashomesha Yehova, tutokwiiya shiiyo shiyandika sheenga shatucafwa kukumanisha nshotwakashomesha cakulumbila kuli Yehova. b—Mate. 16:24.

AMUBE BALIBAMBITE KULYAABA

4. Kweelana a Shakubelenga 6:​3, 4, ino kulyaaba kwa Munasili kwakalinga kweeleshekwa buyani?

⁴ Amubelenge Shakubelenga 6:​3, 4. Ba Nasili tabakalinga kweelete kunwa bwalwa nabi kulya shisepo mbuli minyansa itontola nabi iyumu. Bantu mbobakalinga kukalaabo balyeelete bakalinga kunyumfwa kabotu kulya shakulya isho, alimwi kucita boobo kwakalingabo kabotu mukwiinga shakulya isho shakalingabo kabotu. Baibo ilaamba ayi ‘waini wakusangalasha moyo’ ncipo kuswa kuli Lesa. (Kulu. 104:​14, 15) Nacibi boobo, ba Nasili bakalinga kulyaaba kusalawo kutanwa waini. c

5. Ino nshiinshi ba Madián aba Marcela nshobakalyaaba kucita, alimwi ino nceebonshi?

⁵ Bweenka mbocakalinga kuba Nasili, aswebo tulalyaaba kwaamba ayi tucite shiinji muncito yakwe Yehova. Amuyeeye pacakubonenaako caba Madián aba Marcela. d Beebene aba bakalinga kukala kabotu. Ba Madián bakalinga kusebensa ncito yakufola maali aanji alimwi bakalinga kukala muŋanda ibotu. Nacibi boobo, bakalinga kusuni kucita shiinji muncito yakwe Yehova. Kwaamba ayi bacikoonshe kucita boobo, bakasalawo kwaalulako shimwi. Bakaamba ayi: “Twakacileka kuula shintu abuumbi. Twakalongela muŋanda iniini akuulisha motoka yesu.” Ba Madián aba Marcela bakasalawo kulyaaba kucita shintu ishi mukwiinga bakalinga kusuni kucita shiinji muncito yakwe Yehova. Balalinyumfwa kukwana alimwi balisangalete pashintu nshobakasalawo kucita.

6. Ino nceebonshi Beneklistu munshiku shino balalyaaba? (Amubone acikope.)

⁶ Munshiku shino, bantu bakwe Yehova  balasangalala kulyaaba kwaamba ayi babe aciindi cinene cakumusebensela. (1 Koli. 9:​3-6) Yehova taatulangili kulyaaba kucita shintu ishi; alimwi shintu nshotulyaaba kucileka kucita inga kashilibo kabotu. Kucakubonenaako, bamwi balacileka kusebensa ncito njobasuni, kushiya ŋanda yabo na kushiya cinyama ncobasuni. Baanji bakasalawo kutafwambaana kuba mucikwati na kuba abaana pesule lyakweebanabo. Bamwi bakasalawo kuya mukusebensela kumusena ubulishite nabi kwaamba ayi kucita boobo inga kwasansulula kuba kulaale abuumbi abeshicibusa abamumukwashi wabo. Sobaanji tulalyaaba kucita boobo mukwiinga tulisuni kucita shiinji muncito yakwe Yehova. Amushibe kwaamba ayi Yehova alalumba abuumbi pakulyaaba kuli koonse nkweenga mwaciita kwaamba ayi mumusebensele.—Ebu. 6:10.

AMUBE BALIBAMBITE KUBA BAPUSENEEKO

7. Ino nceebonshi mpashi cimwi ciindi cakalinga ciyumu ku Munasili kutolelela kucita kweelana ambwaakashomesha cakulumbila? (Shakubelenga 6:5) (Amubone acikope.)

⁷ Amubelenge Shakubelenga 6:5. Ba Nasili bakalinga kushomesha ayi teshi bakacese misusu yabo. Kucita boobo kwakalinga kutondesha ayi bakalinga kunyumfwila Yehova cakumaninina. Na mwine Isilaeli waba Munasili kwaciindi cilaamfu, misusu yakalinga kulaampa alimwi cakalinga cuubu bamwi kumushiba. Na bamwi kabalemeka Munasili akumuyuminisha kutolelela kucita kweelana ambwaakashomesha cakulumbila, cakalinga kumubeta cuubu kutolelela kuba upuseneeko. Ano cakabicaako ncakwaamba ayi, pashiindi shimwi bene Isilaeli tabakalinga kulemeka ba Nasili na kubacafwa. Muciindi ca mushinshimi Amosi, bene Isilaeli bakapondoka ‘bakatolelela kupa ba Nasili waini kwaamba ayi banwe,’ mpashi ceebo cakusuna ayi bataciti kweelana anshobakashomesha cakulumbila pamakani akutanwa waini. (Amosi 2:12) Pashiindi shimwi Munasili wakalinga kuyandika kutondesha kutaloonda abuumbi kwaamba ayi atolelele kucita kweelana ambwaakashomesha cakulumbila akuba upuseneeko.

8. Ino nciinshi camuyuminisha kuswa kucakubonenaako cakwe Benjamin?

⁸ Kwiinda mulucafwo lwakwe Yehova, aswebo inga twacikonsha kutondesha kutaloonda akuba bapuseneeko nabi kwaamba ayi tuli muntu wansoni. Amuyeeye pacakubonenaako cakwe Benjamin, Kamboni ucite myaaka 10 ukala ku Norway. Ceebo ca nkoondo yakalinga ku Ukraine, pacikolo mpaakalinga kwiiya bakaba acakucitika cimwi kwaamba ayi batondeshe ayi bali kulubasu lwa cishi ici. Beshicikolo bakabalwiita kwiimba lwiimbo lumwi kabafwete shakufwala shakalinga kucite mibala iimikaninaako cishi ca Ukraine. Benjamin wakasalawo kutaabanamo lubasu mucakucitika ici cakalinga kukumite ku  shacishi. Aboobo wakeemikana palaale ankocakalinga kucitikila. Nacibi boobo, batica bakamubona akumoolobesha ayi: “Kosa kuno. Tutolindila ndiwe!” Cakutaloonda Benjamin wakaya kuli batica akubalwiita ayi: “Nshibete lubasu lwa mfulumeende sha bantu, alimwi nshaabanimo lubasu mushamapolitiki. Alimwi Bakamboni Bakwe Yehova baanji bali mujeele ceebo cakukaka kuya ku nkoondo.” Batica bakakutika Benjamin nshaakaamba alimwi bakamusuminisha kutaabanamo lubasu. Nacibi boobo, beshicikolonyina bakatalika kumwiipusha cakapa kwaamba ayi ataabanimo lubasu. Benjamin wakaloonda abuumbi cakwaamba ayi wakalinga kusuni kutalika kulila; nacibi boobo, cakutaloonda wakalwiita beshicikolonyina boonse sheenka nshaakalinga walwiita batica. Kuswawaawo, Benjamin wakalwiita bashali bakwe, Yehova mbwakamucafwa kulwiitako bamwi nshaashoma.

9. Ino nshiinshi nsheenga twaciita kwaamba ayi tusangalashe Yehova?

⁹ Ceebo cakwaamba ayi tulasalawo kucita kuyanda kwakwe Lesa, tulaba bapuseneeko abantu bamwi. Tulayandika kutaloonda kwaamba ayi tulwiiteko mbotusebensaabo nabi beshicikolonyineesu ayi tuli womwi wa Bakamboni Bakwe Yehova. Alimwi bantu bamucishi cino ndyebatoya cibicilaako, cinanootubeta ciyumu kukonkela njiisho shamu Baibo akushimikilako bamwi makani abotu. (2 Timo. 1:8; 3:13) Nacibi boobo, lyoonse tunokwiibaluka ayi tulasangalasha Yehova na cakutaloonda katutondesha ayi tulipuseneeko abaabo batamusebenseli.—Tus. 27:11; Mala. 3:18.

AMUBIKE YEHOVA PANEMBO MUBUUMI BWANU

10. Ino nceebonshi cakalinga ciyumu kuba Nasili kukonkela mulawo waambwa pa Shakubelenga 6:​6, 7?

¹⁰ Amubelenge Shakubelenga 6:​6, 7. Munasili taakalinga kusena pafwiifwi amuntu ufwite. Nacibi boobo, muciindi camu Baibo cakalinga ciyumu ku Munasili kukonkela mulawo uyu na wafwitwa shikamukowa ngwaasuni abuumbi. Mu milawo njobakalinga kukonkela paciindi cilya na muntu wafwa, bantu bakalinga kuyandika kuba pafwiifwi amutuntu. (Joni 19:​39, 40; Milimo 9:​36-40) Nacibi boobo, Munasili taakalinga kweelete kukonkela milawo iyo. Nabi kwaamba ayi Munasili wafwitwa wamumukwashi alimwi waba abuumba abuumbi, wakalinga kweelete kutondesha lushomo luyumu kwiinda mukutolelela kucita kweelana ambwaakashomesha cakulumbila. Ncakutatoonsha kwaamba ayi Yehova wakalinga kuyuminisha basebenshi bakwe aba bakalinga kulyaaba, kwaamba ayi bacikoonshe kuliyumya mumapensho ngobakalinga kwiindaamo.

11. Ino nciinshi Mwineklistu ncaelete kuba ushinishite kucita ndyaatosalawo shakucita pamakani akumite mukwashi? (Amubone acikope.)

 ¹¹ Mbuli Beneklistu, tulabona ayi kulyaaba kwesu kuli Yehova ncintu ciyandika abuumbi. Ici cilakuma nshetusala anshotucita pamakani akumite mukwashi. Tulasebensa cankusu kwaamba ayi tucafwe mukwashi wesu kuba anshotoyandika, sombi tulabikila maano kucita shintu Yehova nshaasuni muciindi cakubika panembo shintu bamumukwashi wesu nshobasuni. (Mate. 10:​35-37; 1 Timo. 5:8) Cimwi ciindi inga twasalawo kucita shintu sheenga shabula kusangalasha beshikamukowa besu, sombi sheenga shasangalasha Yehova.

12. Ino nshiinshi ba Alexandru nshobakacita anshobatakwe kucita, bukaalo ndyebwakalinga buyumu mumukwashi wabo?

¹² Amuyeeye pacakubonenaako caba Alexandru aba Dorina bakaabo. Pesule lyakwaamba ayi beebene aba beeya Baibo kwamwaaka womwi, ba Dorina bakacileka kwiiya alimwi bakalinga kusuni ayi abalo ba Alexandru bacileeke kwiiya. Nacibi boobo, cakukalika moyo alimwi munshila yeenga taikalashi bakaabo, bakabalwiita ayi batootolelela kwiiya. Ba Dorina tabakwe kusangalala alimwi bakeelesha kukakatisha beebaabo ayi bacileeke kwiiya. Ba Alexandru bakaamba ayi bakeelesha kunyumfwishisha bakaabo ncobakalinga kucitila boobo, sombi tacakalinga cuubu kuli mbabo. Pashiindi shimwi na ba Dorina babalwiita shibibi akubakumbula cabukali, bakalinga kulinyumfwa ayi mpashi bacilekebo kwiiya Baibo. Nacibi boobo, ba Alexandru bakatolelela kubika Yehova panembo alimwi bakatolelela kutondesha lusuno abuumbi abulemu kubakaabo. Ceebo cakwaamba ayi ba Alexandru bakatondesha cakubonenaako cibotu, bakaabo bakasalawo kutalika alimwi kwiiya Baibo alimwi mukuya kwaciindi bakabombekwa.—Amuye pa jw.org akweebela vidyo icite mutwi waamba ayi Ba Alexandru aba Dorina Văcar: “Lusuno Lulakalika Moyo Akulengesha Nkumbu” palubasu lwaamba ayi “Cancine Cilaalula Buumi.”

13. Ino inga twatondesha buyani lusuno kuli Yehova aku bamumukwashi wesu?

¹³ Yehova ngowakatalika mukwashi alimwi alisuni ayi tunoosangalala mumukwashi. (Efe. 3:​14, 15) Na tulisuni kuba alusangalalo lwancinencine, tulyeelete kunoocita shintu Yehova nshaasuni. Amushibe kwaamba ayi Yehova alalumba pakulyaaba kwanu kwaamba ayi mumusebensele ndyemutolama bamumukwashi wanu akubatondesha lusuno abulemu.—Loma. 12:10.

AMUYUMINISHANYE KWAAMBA AYI MUBE ANGA MBA NASILI

14. Ino mbaani bunene bunene mbotweelete kuyuminisha?

¹⁴ Abo boonse basalawo kusebensela Yehova munshiku shino balyeelete kuba balibambite kulyaaba ceebo calusuno ndobacite pali  nguwe. Cimwi ciindi kucita boobo teshi cuubu. Ino nshiinshi nsheenga twaciita kwaamba ayi tucafweko bamwi kulyaaba kusebensela Yehova? Nkwiinda mukwaamba maswi ayuminisha. (Jobo 16:5) Sa kuli bamwi mulibungano lyanu batokweelesha kukala buumi bwakutalila shiinji kwaamba ayi bacite shiinji muncito yakwe Yehova? Sa mulishiko bacanike batotondesha kutaloonda kwiinda mukuba bapuseneeko abeshicikolonyinaabo, nabi kwaamba ayi teshi cuubu kucita boobo? Sa kuli bashikwiiya Baibo abashominyinaanu mpashi mbocitobeta ciyumu kutolelela kushomeka ceebo cakupikishikwa ku bamumukwashi? Amube bashinishite kucita nsheenga mwacikonsha kwaamba ayi mubayuminishe akubalwiita mbomubasuni ceebo cakutondesha kutaloonda apashintu nshobatoocita muncito yakwe Yehova.—Filimo. 4, 5, 7. 

15. Ino bamwi balacita buyani kwaamba ayi bacafweko baabo bali muncito yaciindi coonse?

¹⁵ Cimwi ciindi inga twacafwako Beneklistunyineesu bali muncito yaciindi coonse. (Tus. 19:17; Ebu. 13:16) Ici ncaakalinga kusunishishi kucita nankashi umwi wacinene ushomeka ukala ku Sri Lanka. Bakamwilikilaawo maali a penshoni ngaakalinga kufola alimwi wakalinga kusuni kucafwa bapainiya bobilo kutolelela kusebensa bupainiya nabi ndyebakalinga kucite lipenshi lyakubula maali. Aboobo wakasalawo kwaamba ayi mweenshi amweenshi anobapako maali amwi akuula tokotaimu. Nankashi uyu wakatondesha cakubonenaako cibotu abuumbi!

16. Ino nshiinshi nsheenga tweeya kuswa kucakubonenaako ba Nasili ncobakatondesha?

¹⁶ Ncakutatoonsha kwaamba ayi inga tweeya shiinji kucakubonenaako cibotu ncobakatondesha abo bakalinga kulyaaba kuba Munasili! Nacibi boobo, kushomesha cakulumbila ba Nasili nkobakalinga kucita, kulatwiisha makani amwi pali Yehova Ishiwesu wakwiculu. Alicishi ayi tulisuni kumusangalasha alimwi ayi tulilibambite kulyaaba kwaamba ayi tukumanishe ncotwakashomesha cakulumbila. Alatutondesha bulemu kwiinda mukutupa coolwe cakusalawo kutondesha mbotumusuni. (Tus. 23:​15, 16; Maako 10:​28-30; 1 Joni 4:19) Bubaambo bwabu Nasili bulatondesha ayi Yehova alabona kulyaaba kwesu alimwi alitusuni ceebo ca nshotumucitila. Aboobo atube bashinishite kutolelela kusebensela Yehova, akulyaaba kucita nsheenga twacikonsha muncito yakwe.