ບົດຄວາມສຶກສາທີ 7
ເພງທີ 51 ເຮົາອຸທິດຕົວໃຫ້ພະເຈົ້າ!
ເຮົາຮຽນຫຍັງຈາກຄົນທີ່ເປັນນາຊີຣີ?
“ຕະຫຼອດໄລຍະທີ່ລາວເປັນນາຊີຣີ ພະເຢໂຫວາຈະຖືວ່າລາວບໍລິສຸດ.”—ຈຊບ. 6:8
ຈຸດສຳຄັນ
ຕົວຢ່າງຂອງຄົນທີ່ເປັນນາຊີຣີສອນເຮົາແນວໃດໃຫ້ກ້າຫານແລະເຕັມໃຈເສຍສະລະເພື່ອພະເຢໂຫວາ.
1. ຕະຫຼອດປະຫວັດສາດ ຜູ້ຮັບໃຊ້ຂອງພະເຢໂຫວາໄດ້ສະແດງຄຸນລັກສະນະທີ່ດີຫຍັງ?
ເຈົ້າຮັກພະເຢໂຫວາບໍ? ແນ່ນອນວ່າເຈົ້າຮັກເພິ່ນ! ບໍ່ແມ່ນແຕ່ເຈົ້າຜູ້ດຽວເທົ່ານັ້ນທີ່ຮັກພະເຢໂຫວາ ຕັ້ງແຕ່ສະໄໝແຕ່ກີ້ຫຼາຍຄົນກໍຮູ້ສຶກຄືກັນກັບເຈົ້າ. (ພສ. 104:33, 34) ຫຼາຍຄົນໄດ້ເສຍສະລະເພື່ອຈະນະມັດສະການພະເຢໂຫວາ. ໜຶ່ງໃນນັ້ນແມ່ນພວກນາຊີຣີ. ເຂົາເຈົ້າແມ່ນໃຜ ແລະເຮົາຮຽນຫຍັງຈາກຕົວຢ່າງຂອງເຂົາເຈົ້າ?
2. (ກ) ພວກນາຊີຣີແມ່ນໃຜ? (ຈົດເຊັນບັນຊີ 6:1, 2) (ຂ) ເປັນຫຍັງຄົນອິດສະຣາເອນບາງຄົນຈຶ່ງເລືອກທີ່ຈະເປັນນາຊີຣີ?
2 ຄຳວ່າ “ນາຊີຣີ” ມາຈາກຄຳພາສາເຮັບເຣີທີ່ແປວ່າ “ຄົນທີ່ຖືກເລືອກອອກມາ” “ຄົນທີ່ແຍກໂຕຢູ່ຕ່າງຫາກ” ຫຼື “ຄົນທີ່ອຸທິດໂຕໄວ້.” ມີການໃຊ້ຄຳວ່ານາຊີຣີເມື່ອເວົ້າເຖິງຄົນອິດສະຣາເອນທີ່ກະຕືລືລົ້ນເຊິ່ງເຕັມໃຈເສຍສະລະຫຼາຍຢ່າງເພື່ອຮັບໃຊ້ພະເຢໂຫວາໃນແບບພິເສດ. ກົດໝາຍຂອງໂມເຊບອກວ່າຜູ້ຊາຍຫຼືຜູ້ຍິງກໍສາບານເປັນນາຊີຣີໄດ້ໄລຍະໜຶ່ງເພື່ອພະເຢໂຫວາ. a (ອ່ານຈົດເຊັນບັນຊີ 6:1, 2) ການສາບານແລະການປະຕິຍານແບບນັ້ນກ່ຽວຂ້ອງກັບການເຮັດຕາມຂໍ້ກຳນົດບາງຢ່າງ ເຊິ່ງບໍ່ແມ່ນສິ່ງທີ່ຄົນອິດສະຣາເອນທຸກຄົນຕ້ອງເຮັດ. ຄັນຊັ້ນເປັນຫຍັງຄົນອິດສະຣາເອນບາງຄົນຈຶ່ງເລືອກທີ່ຈະສາບານເປັນນາຊີຣີ? ຍ້ອນເຂົາເຈົ້າຮັກພະເຢໂຫວາຫຼາຍແລະເຫັນຄ່າສິ່ງດີໆທີ່ເພິ່ນເຮັດເພື່ອເຂົາເຈົ້າ.—ພບຍ. 6:5; 16:17
3. ຜູ້ຮັບໃຊ້ຂອງພະເຢໂຫວາໃນທຸກມື້ນີ້ເປັນຄືກັບພວກນາຊີຣີແນວໃດ?
3 ເມື່ອ “ກົດໝາຍຂອງພະຄລິດ” ມາແທນກົດໝາຍຂອງໂມເຊ ຜູ້ຮັບໃຊ້ຂອງພະເຢໂຫວາກໍບໍ່ຕ້ອງເປັນນາຊີຣີອີກຕໍ່ໄປ. (ຄລຕ. 6:2; ຣມ. 10:4) ແຕ່ຜູ້ຮັບໃຊ້ຂອງພະເຢໂຫວາໃນທຸກມື້ນີ້ຍັງເປັນຄືກັບພວກນາຊີຣີໄດ້ໂດຍຕັ້ງໃຈວ່າຈະຮັບໃຊ້ພະເຢໂຫວາສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຂົາເຈົ້າ. (ມຣກ. 12:30) ເຮົາສັນຍາວ່າຈະຮັບໃຊ້ພະເຢໂຫວາແບບນີ້ຕອນທີ່ເຮົາອຸທິດໂຕໃຫ້ເພິ່ນເພື່ອເຮົາຈະໃຊ້ຊີວິດຕາມທີ່ສັນຍາໄວ້. ເຮົາຕ້ອງເຮັດຕາມຄວາມຕ້ອງການຂອງພະເຢໂຫວາແລະເຕັມໃຈເສຍສະລະເພື່ອຮັບໃຊ້ເພິ່ນ. ໃຫ້ເຮົາເບິ່ງວ່າພວກນາຊີຣີໃຊ້ຊີວິດຕາມທີ່ສາບານໄວ້ແນວໃດ ແລະເຮົາຈະຮຽນຫຍັງຈາກຕົວຢ່າງຂອງເຂົາເຈົ້າ. b—ມທ. 16:24
ເຕັມໃຈເສຍສະລະ
4. ຕາມທີ່ບອກໄວ້ໃນຈົດເຊັນບັນຊີ 6:3, 4 ພວກນາຊີຣີເສຍສະລະຫຍັງ?
4 ອ່ານຈົດເຊັນບັນຊີ 6:3, 4. ພວກນາຊີຣີບໍ່ກິນເຄື່ອງດື່ມທີ່ເຮັດໃຫ້ມຶນເມົາແລະສິ່ງທີ່ເຮັດຈາກໝາກລະແຊັງ ເຊັ່ນ: ໝາກລະແຊັງສົດແລະໝາກລະແຊັງແຫ້ງ. ຄົນອື່ນກິນສິ່ງເຫຼົ່ານີ້ໄດ້ຍ້ອນບໍ່ຜິດກັບກົດໝາຍຂອງພະເຈົ້າ. ທີ່ຈິງ ຄຳພີໄບເບິນບອກວ່າເຫຼົ້າແວງເປັນຂອງຂວັນຈາກພະເຈົ້າແລະ “ເຫຼົ້າແວງເຮັດໃຫ້ມີຄວາມມ່ວນຊື່ນ.” (ພສ. 104:14, 15) ແຕ່ພວກນາຊີຣີເຕັມໃຈເສຍສະລະທີ່ຈະບໍ່ກິນສິ່ງເຫຼົ່ານີ້. c
ເຈົ້າເຕັມໃຈເສຍສະລະຄືພວກນາຊີຣີບໍ? (ເບິ່ງຂໍ້ 4-6)
5. ມາດຽນກັບມາເຊລາເລືອກທີ່ຈະເຮັດຫຍັງ? ແລະເປັນຫຍັງເຂົາເຈົ້າຈຶ່ງເຮັດແບບນັ້ນ?
5 ເຮົາກໍເປັນຄືກັບພວກນາຊີຣີຄືກັນ. ເຮົາຕ້ອງເສຍສະລະບາງຢ່າງເພື່ອຈະຮັບໃຊ້ພະເຢໂຫວາໄດ້ຫຼາຍຂຶ້ນ. ໃຫ້ເບິ່ງຕົວຢ່າງຂອງມາດຽນກັບມາເຊລາ. d ຜົວເມຍຄູ່ນີ້ມີຊີວິດທີ່ສະດວກສະບາຍຍ້ອນມາດຽນມີວຽກທີ່ດີທີ່ໄດ້ເງິນເດືອນຫຼາຍແລະເຂົາເຈົ້າຢູ່ອາພາດເມັນທີ່ງາມໆແລະແພງ. ແຕ່ເຂົາເຈົ້າຢາກຮັບໃຊ້ພະເຢໂຫວາຫຼາຍຂຶ້ນ ເຂົາເຈົ້າຈຶ່ງປັບປ່ຽນບາງຢ່າງໃນຊີວິດ. ເຂົາເຈົ້າເວົ້າວ່າ: “ເຮົາພະຍາຍາມໃຊ້ເງິນແບບປະຢັດ ຍ້າຍໄປຢູ່ອາພາດເມັນຫ້ອງທີ່ນ້ອຍກວ່າແລະຂາຍລົດໃຫຍ່.” ທີ່ຈິງ ມາດຽນກັບມາເຊລາບໍ່ຕ້ອງເສຍສະລະແບບນີ້ກໍໄດ້. ແຕ່ເຂົາເຈົ້າເລືອກທີ່ຈະເຮັດແບບນັ້ນເພື່ອຈະຮັບໃຊ້ພະເຢໂຫວາໄດ້ຫຼາຍຂຶ້ນ. ເຂົາເຈົ້າມີຄວາມສຸກຫຼາຍທີ່ເຮັດແບບນີ້.
6. ເປັນຫຍັງຜູ້ຮັບໃຊ້ຂອງພະເຢໂຫວາໃນທຸກມື້ນີ້ຈຶ່ງເຕັມໃຈເສຍສະລະ? (ເບິ່ງຮູບ)
6 ຜູ້ຮັບໃຊ້ຂອງພະເຢໂຫວາໃນທຸກມື້ນີ້ເຕັມໃຈເສຍສະລະເພື່ອຈະຮັບໃຊ້ພະເຢໂຫວາຫຼາຍຂຶ້ນ ແລະເຂົາເຈົ້າມີຄວາມສຸກທີ່ໄດ້ເຮັດແບບນັ້ນ. (1ກຣ. 9:3-6) ທີ່ຈິງ ພະເຢໂຫວາບໍ່ໄດ້ຮຽກຮ້ອງໃຫ້ເຂົາເຈົ້າເຮັດແບບນັ້ນ ແລະການເຮັດສິ່ງນັ້ນກໍບໍ່ຜິດ. ຕົວຢ່າງເຊັ່ນ: ບາງຄົນຍອມເສຍສະລະບໍ່ເຮັດວຽກທີ່ໂຕເອງມັກ ເສຍສະລະທີ່ຈະບໍ່ມີເຮືອນ ຫຼືເສຍສະລະທີ່ຈະບໍ່ລ້ຽງສັດ. ບາງຄົນຕັ້ງໃຈທີ່ຈະບໍ່ຟ້າວແຕ່ງດອງຫຼືບໍ່ຟ້າວມີລູກຫຼັງຈາກແຕ່ງດອງ. ບາງຄົນໄປຮັບໃຊ້ໃນບ່ອນທີ່ຕ້ອງການຜູ້ປະກາດຫຼາຍກວ່າເຖິງວ່າຈະຕ້ອງຢູ່ໄກຈາກໝູ່ແລະຄອບຄົວ. ພວກເຮົາຫຼາຍຄົນເຕັມໃຈເສຍສະລະທັງໝົດນີ້ຍ້ອນເຮົາຢາກໃຫ້ສິ່ງທີ່ດີທີ່ສຸດກັບພະເຢໂຫວາ. ຂໍໃຫ້ໝັ້ນໃຈວ່າພະເຢໂຫວາເຫັນຄ່າການເສຍສະລະທຸກຢ່າງທີ່ເຈົ້າເຮັດເພື່ອຈະຮັບໃຊ້ເພິ່ນ ບໍ່ວ່າຈະເສຍສະລະໜ້ອຍຫຼືຫຼາຍ.—ຮຣ. 6:10
ຍອມແຕກຕ່າງຈາກຄົນອື່ນ
7. ເປັນຫຍັງຈຶ່ງບໍ່ງ່າຍທີ່ພວກນາຊີຣີຈະເຮັດຕາມຄຳສາບານ? (ຈົດເຊັນບັນຊີ 6:5) (ເບິ່ງຮູບ)
7 ອ່ານຈົດເຊັນບັນຊີ 6:5. ພວກນາຊີຣີສາບານວ່າຈະບໍ່ຕັດຜົມ ເຊິ່ງເປັນການສະແດງວ່າເຂົາເຈົ້າຍອມຢູ່ໃຕ້ອຳນາດຂອງພະເຢໂຫວາແລະເຕັມໃຈເຊື່ອຟັງເພິ່ນທຸກຢ່າງ. ຖ້າຄົນອິດສະຣາເອນເປັນນາຊີຣີດົນ ຜົມຂອງລາວກໍຈະຍາວແລະຄົນອື່ນກໍສັງເກດເຫັນໄດ້ງ່າຍ. ຖ້າຄົນທີ່ຢູ່ອ້ອມຂ້າງສະໜັບສະໜູນລາວໃຫ້ເຮັດຕາມຄຳສາບານກະຄືຊິບໍ່ມີບັນຫາຫຍັງ. ແຕ່ບໍ່ແມ່ນທຸກຄົນທີ່ເປັນແບບນັ້ນ. ມີຫຼາຍເທື່ອທີ່ຄົນອິດສະຣາເອນບໍ່ເຫັນຄ່າຫຼືບໍ່ໄດ້ສະໜັບສະໜູນສິ່ງທີ່ພວກນາຊີຣີເຮັດ. ໃນສະໄໝຂອງຜູ້ພະຍາກອນອາໂມດ ຄົນອິດສະຣາເອນບາງຄົນທີ່ບໍ່ເຊື່ອຟັງພະເຈົ້າໄດ້ພະຍາຍາມ “ເອົາເຫຼົ້າແວງໃຫ້ພວກນາຊີຣີກິນ.” ເປັນໄປໄດ້ວ່າເຂົາເຈົ້າຢາກໃຫ້ພວກນາຊີຣີເຮັດຜິດຄຳສາບານ. (ອມ. 2:12) ດັ່ງນັ້ນ ພວກນາຊີຣີຕ້ອງກ້າຫານຫຼາຍເພື່ອຈະເຮັດຕາມຄຳສາບານແລະຍອມແຕກຕ່າງຈາກຄົນອື່ນ.
ນາຊີຣີທີ່ຮັກສາຄຳສາບານກ້າທີ່ຈະແຕກຕ່າງຈາກຄົນອື່ນ (ເບິ່ງຂໍ້ 7)
8. ປະສົບການຂອງເບັນຈາມິນໃຫ້ກຳລັງໃຈເຈົ້າແນວໃດ?
8 ເຖິງວ່າຕາມປົກກະຕິແລ້ວເຮົາເປັນຄົນຂີ້ອາຍ ແຕ່ເຮົາກໍກ້າທີ່ຈະແຕກຕ່າງເມື່ອພະເຢໂຫວາຊ່ວຍເຮົາ. ໃຫ້ເບິ່ງຕົວຢ່າງຂອງເບັນຈາມິນອາຍຸ 10 ປີທີ່ຢູ່ປະເທດນອກແວ. ຍ້ອນມີສົງຄາມຢູ່ປະເທດອູແກຣນ ໂຮງຮຽນຂອງລາວຈຶ່ງຈັດກິດຈະກຳສະໜັບສະໜູນຄົນອູແກຣນ. ນາຍຄູໃຫ້ນັກຮຽນທຸກຄົນນຸ່ງເຄື່ອງທີ່ເປັນສີທຸງຊາດຂອງປະເທດອູແກຣນແລະຮ້ອງເພງສະໜັບສະໜູນອູແກຣນ. ເພື່ອຈະບໍ່ມີສ່ວນຮ່ວມໃນກິດຈະກຳນີ້ ເບັນຈາມິນຈຶ່ງໄປຢືນຢູ່ໄກໆ. ແຕ່ນາຍຄູເຫັນລາວແລະຮ້ອງວ່າ: “ເບັນຈາມິນມານີ້! ພວກເຮົາຖ້າເຈົ້າຢູ່.” ເບັນຈາມິນຍ່າງເຂົ້າໄປຫານາຍຄູແລະເວົ້າວ່າ: “ຫຼານຮັກສາຄວາມເປັນກາງ. ຫຼານບໍ່ເຂົ້າຮ່ວມກິດຈະກຳທີ່ກ່ຽວຂ້ອງກັບການເມືອງ. ທີ່ຈິງ ພະຍານພະເຢໂຫວາຫຼາຍຄົນຕ້ອງຕິດຄຸກຍ້ອນບໍ່ຍອມເຂົ້າຮ່ວມສົງຄາມ.” ນາຍຄູຍອມຮັບເຫດຜົນຂອງເບັນຈາມິນແລະບໍ່ໃຫ້ລາວເຂົ້າຮ່ວມກິດຈະກຳນັ້ນ. ຈາກນັ້ນ ພວກໝູ່ຢູ່ໃນຫ້ອງຖາມເບັນຈາມິນວ່າ ເປັນຫຍັງຈຶ່ງບໍ່ເຂົ້າຮ່ວມ. ເບັນຈາມິນຮູ້ສຶກຢ້ານຈົນເກືອບໄຫ້ ແຕ່ລາວກໍບອກໝູ່ໃນຫ້ອງຄືກັບທີ່ບອກນາຍຄູ. ຫຼັງຈາກນັ້ນ ເບັນຈາມິນບອກພໍ່ກັບແມ່ວ່າ ລາວຮູ້ສຶກວ່າພະເຢໂຫວາຊ່ວຍລາວໃຫ້ປົກປ້ອງຄວາມເຊື່ອໄດ້.
9. ເຮົາຈະເຮັດໃຫ້ພະເຢໂຫວາມີຄວາມສຸກໄດ້ແນວໃດ?
9 ຍ້ອນເຮົາເລືອກທີ່ຈະເຊື່ອຟັງພະເຢໂຫວາ ເຮົາຈຶ່ງແຕກຕ່າງຈາກຄົນໃນໂລກນີ້. ເຮົາຕ້ອງມີຄວາມກ້າເພື່ອຈະບອກຄົນທີ່ຢູ່ບ່ອນເຮັດວຽກຫຼືຢູ່ໂຮງຮຽນວ່າເຮົາເປັນພະຍານພະເຢໂຫວາ. ຄວາມຄິດແລະການກະທຳຂອງຄົນໃນໂລກນີ້ເສື່ອມຊາມລົງເລື້ອຍໆເຮົາອາດຮູ້ສຶກວ່າຍາກຫຼາຍຂຶ້ນທີ່ຈະໃຊ້ຊີວິດຕາມຫຼັກການໃນຄຳພີໄບເບິນແລະປະກາດຂ່າວດີກັບຄົນອື່ນ. (2ຕມ. 1:8; 3:13) ແຕ່ໃຫ້ຈື່ໄວ້ວ່າ ຖ້າເຮົາກ້າທີ່ຈະແຕກຕ່າງຈາກຄົນທີ່ບໍ່ຮັບໃຊ້ພະເຢໂຫວາ ເຮົາຈະເຮັດໃຫ້ເພິ່ນ “ມີຄວາມສຸກ.”—ສພສ. 27:11; ມລກ. 3:18
ໃຫ້ພະເຢໂຫວາສຳຄັນທີ່ສຸດໃນຊີວິດຂອງເຈົ້າ
10. ເປັນຫຍັງການເຮັດຕາມຄຳສັ່ງທີ່ຢູ່ໃນຈົດເຊັນບັນຊີ 6:6, 7 ອາດເປັນເລື່ອງຍາກສຳລັບຄົນທີ່ເປັນນາຊີຣີ?
10 ອ່ານຈົດເຊັນບັນຊີ 6:6, 7. ພວກນາຊີຣີເຂົ້າໄປໃກ້ສົບຄົນຕາຍບໍ່ໄດ້. ເຮົາອາດຮູ້ສຶກວ່າເລື່ອງນີ້ບໍ່ຍາກ. ແຕ່ໃນສະໄໝທີ່ຂຽນຄຳພີໄບເບິນ ເມື່ອມີຄົນໃນຄອບຄົວຂອງຄົນທີ່ເປັນນາຊີຣີຕາຍ ເຂົາເຈົ້າອາດຮູ້ສຶກວ່າມັນຍາກທີ່ຈະເຮັດຕາມຄຳສັ່ງນີ້ ຍ້ອນທຳນຽມໃນສະໄໝນັ້ນຍາດຕິພີ່ນ້ອງຂອງຄົນຕາຍຈະຢູ່ໃກ້ກັບສົບຄົນຕາຍ. (ຢຮ. 19:39, 40; ກຈກ. 9:36-40) ແຕ່ຄົນທີ່ເປັນນາຊີຣີເຮັດແບບນັ້ນບໍ່ໄດ້. ເຖິງວ່າຕອນນັ້ນເຂົາເຈົ້າຈະໂສກເສົ້າເສຍໃຈຫຼາຍ ແຕ່ເຂົາເຈົ້າຕ້ອງສະແດງຄວາມເຊື່ອທີ່ເຂັ້ມແຂງໂດຍຮັກສາຄຳສາບານຂອງໂຕເອງໄວ້ ແລະໝັ້ນໃຈວ່າພະເຢໂຫວາຈະຊ່ວຍເຂົາເຈົ້າໃຫ້ຮັບມືກັບເວລາທີ່ຍາກລຳບາກແບບນີ້ໄດ້.
11. ເມື່ອຕ້ອງຕັດສິນໃຈກ່ຽວກັບເລື່ອງຕ່າງໆໃນຄອບຄົວ ຄລິດສະຕຽນຄວນຄິດເຖິງຫຍັງ? (ເບິ່ງຮູບ)
11 ພວກເຮົາທີ່ເປັນຄລິດສະຕຽນຖືວ່າຄຳສັນຍາຕອນທີ່ອຸທິດໂຕໃຫ້ພະເຢໂຫວາເປັນເລື່ອງທີ່ຈິງຈັງ ແລະມີຜົນຕໍ່ການຕັດສິນໃຈກ່ຽວກັບເລື່ອງຕ່າງໆໃນຄອບຄົວແລະການປະຕິບັດຕໍ່ຄອບຄົວ. ເຮົາເຊື່ອຟັງຄຳສອນໃນຄຳພີໄບເບິນທີ່ໃຫ້ເບິ່ງແຍງຄອບຄົວຢ່າງດີ ແຕ່ເຮົາຈະບໍ່ຍອມໃຫ້ຄວາມຕ້ອງການຂອງຄົນໃນຄອບຄົວສຳຄັນກວ່າສິ່ງທີ່ພະເຢໂຫວາຢາກໃຫ້ເຮົາເຮັດ. (ມທ. 10:35-37; 1ຕມ. 5:8) ບາງເທື່ອ ເຮົາອາດຕ້ອງຕັດສິນໃຈໃນແບບທີ່ເຮັດໃຫ້ຄົນໃນຄອບຄົວບໍ່ມັກ ແຕ່ເຮົາຈະເຮັດໃຫ້ພະເຢໂຫວາພໍໃຈ.
ເຈົ້າພ້ອມທີ່ຈະໃຫ້ຄວາມຕ້ອງການຂອງພະເຢໂຫວາເປັນສິ່ງສຳຄັນທີ່ສຸດໃນຊີວິດບໍ ເຖິງຈະຢູ່ໃນສະພາບການທີ່ຍາກທີ່ສຸດ? (ເບິ່ງຂໍ້ 11) f
12. ເຖິງວ່າອາເລັກຊັນດຣູເຈິບັນຫາໃນຄອບຄົວ ແຕ່ລາວເຮັດຫຍັງ ແລະບໍ່ເຮັດຫຍັງ?
12 ໃຫ້ເບິ່ງປະສົບການຂອງອາເລັກຊັນດຣູກັບດໍຣິນາເມຍຂອງລາວ. ຫຼັງຈາກທີ່ເຂົາເຈົ້າສຶກສາຄຳພີໄບເບິນໄດ້ປີໜຶ່ງ ດໍຣິນາກໍເຊົາສຶກສາແລະລາວຢາກໃຫ້ອາເລັກຊັນດຣູເຊົາສຶກສາຄືກັນ. ເຖິງຈະເປັນແບບນັ້ນ ອາເລັກຊັນດຣູກໍຄ່ອຍໆເວົ້າກັບເມຍແບບໃຈເຢັນໆວ່າລາວຈະສຶກສາຕໍ່. ດໍຣິນາບໍ່ພໍໃຈຫຼາຍແລະພະຍາຍາມບັງຄັບໃຫ້ລາວເຊົາສຶກສາ. ອາເລັກຊັນດຣູເວົ້າວ່າ ລາວພະຍາຍາມເຂົ້າໃຈວ່າເປັນຫຍັງເມຍຈຶ່ງຄິດແບບນັ້ນ ແຕ່ມັນກໍບໍ່ງ່າຍ. ບາງເທື່ອເມື່ອດໍຣິນາເວົ້າໃຫ້ລາວແລະເວົ້າບໍ່ດີກັບລາວ ລາວກໍຮູ້ສຶກວ່າຢາກເຊົາສຶກສາ. ເຖິງຈະເປັນແບບນັ້ນ ອາເລັກຊັນດຣູກໍຍັງໃຫ້ພະເຢໂຫວາສຳຄັນທີ່ສຸດໃນຊີວິດ ແລະໃນເວລາດຽວກັນລາວກໍສະແດງຄວາມຮັກແລະໃຫ້ກຽດເມຍ. ໃນທີ່ສຸດ ຕົວຢ່າງທີ່ດີຂອງລາວກໍກະຕຸ້ນເມຍໃຫ້ກັບມາສຶກສາຄຳພີໄບເບິນອີກ ແລະຕໍ່ມາເມຍກໍຮັບບັບເຕມາ.—ເບິ່ງວິດີໂອອາເລັກຊັນດຣູແລະດໍຣິນາ ວາກາຣ໌: “ຄວາມຮັກອົດກັ້ນແລະເມດຕາກະລຸນາ” ໃນບົດຄວາມຊຸດ “ຄວາມຈິງປ່ຽນຊີວິດຄົນ” ໃນເວັບໄຊ jw.org. e
13. ເຮົາຈະສະແດງຄວາມຮັກຕໍ່ພະເຢໂຫວາແລະຕໍ່ຄອບຄົວໄດ້ແນວໃດ?
13 ພະເຢໂຫວາເປັນຜູ້ກໍ່ຕັ້ງຄອບຄົວ ແລະເພິ່ນຢາກໃຫ້ເຮົາມີຄອບຄົວທີ່ມີຄວາມສຸກ. (ອຟຊ. 3:14, 15) ຖ້າເຮົາຢາກມີຄວາມສຸກແທ້ ເຮົາຕ້ອງເຮັດຕາມສິ່ງທີ່ພະເຢໂຫວາຢາກໃຫ້ເຮົາເຮັດ. ໃຫ້ໝັ້ນໃຈວ່າພະເຢໂຫວາເຫັນຄ່າທີ່ເຈົ້າເສຍສະລະເພື່ອຮັບໃຊ້ເພິ່ນເມື່ອເຈົ້າຕ້ອງເບິ່ງແຍງຄອບຄົວ ສະແດງຄວາມຮັກ ແລະໃຫ້ກຽດເຂົາເຈົ້າ.—ຣມ. 12:10
ສະໜັບສະໜູນກັນແລະກັນໃຫ້ມີນ້ຳໃຈເສຍສະລະຄືພວກນາຊີຣີ
14. ເຮົາຄວນເວົ້າໃຫ້ກຳລັງໃຈໃຜເປັນພິເສດ?
14 ທຸກຄົນທີ່ເລືອກນະມັດສະການພະເຢໂຫວາໃນທຸກມື້ນີ້ເຕັມໃຈເສຍສະລະຍ້ອນເຂົາເຈົ້າຮັກເພິ່ນ ເຖິງວ່າບາງເທື່ອການເຮັດແບບນັ້ນບໍ່ງ່າຍ. ເຮົາຈະໃຫ້ກຳລັງໃຈຄົນທີ່ເຕັມໃຈເສຍສະລະແບບນີ້ໄດ້ແນວໃດ? ເຮົາເຮັດໄດ້ໂດຍເວົ້າໃຫ້ກຳລັງໃຈເຂົາເຈົ້າ. (ໂຢບ 16:5) ໃນປະຊາຄົມຂອງເຈົ້າມີພີ່ນ້ອງຜູ້ໃດບໍທີ່ເລືອກໃຊ້ຊີວິດແບບຮຽບງ່າຍເພື່ອຈະຮັບໃຊ້ພະເຢໂຫວາໄດ້ຫຼາຍຂຶ້ນ? ເຈົ້າຮູ້ຈັກເດັກນ້ອຍຫຼືໄວລຸ້ນຜູ້ໃດບໍທີ່ກ້າແຕກຕ່າງຈາກໝູ່ຢູ່ໂຮງຮຽນເຖິງວ່າການເຮັດແບບນັ້ນບໍ່ງ່າຍເລີຍ? ມີນັກສຶກສາຫຼືພີ່ນ້ອງຜູ້ໃດບໍທີ່ຖືກຄອບຄົວຕໍ່ຕ້ານ ແຕ່ກໍຍັງພະຍາຍາມຮັກສາຄວາມສັດຊື່? ຖ້າເຈົ້າຮູ້ຈັກໃຜທີ່ກຳລັງເຈິເລື່ອງແບບນີ້ ເຈົ້າສາມາດໃຫ້ກຳລັງໃຈແລະຊົມເຊີຍເຂົາເຈົ້າທີ່ກ້າຫານແລະເສຍສະລະເພື່ອພະເຢໂຫວາ.—ຟລມ. 4, 5, 7
15. ພີ່ນ້ອງບາງຄົນຊ່ວຍພີ່ນ້ອງທີ່ຮັບໃຊ້ເຕັມເວລາແນວໃດ?
15 ບາງເທື່ອເຮົາກໍສາມາດຊ່ວຍເຫຼືອພີ່ນ້ອງທີ່ເຮັດວຽກຮັບໃຊ້ເຕັມເວລາໄດ້. (ສພສ. 19:17; ຮຣ. 13:16) ພີ່ນ້ອງຍິງສູງອາຍຸຄົນໜຶ່ງທີ່ຢູ່ປະເທດສີລັງກາຕັ້ງໃຈທີ່ຈະເຮັດແບບນີ້. ລາວໄດ້ເງິນບຳນານຫຼາຍຂຶ້ນ ລາວຈຶ່ງຢາກຊ່ວຍພີ່ນ້ອງຍິງ 2 ຄົນທີ່ເປັນໄພໂອເນຍທີ່ເຈິບັນຫາເສດຖະກິດໃຫ້ຮັບໃຊ້ເຕັມເວລາຕໍ່ໄປໄດ້. ລາວຕັດສິນໃຈເອົາເງິນຈຳນວນໜຶ່ງໃນແຕ່ລະເດືອນໃຫ້ໄພໂອເນຍ 2 ຄົນນີ້ເພື່ອຊ່ວຍຄ່າໂທລະສັບເຂົາເຈົ້າ. ພີ່ນ້ອງຍິງສູງອາຍຸຜູ້ນີ້ມີນ້ຳໃຈຫຼາຍແທ້ໆ!
16. ເຮົາຮຽນຫຍັງຈາກພວກນາຊີຣີ?
16 ເຮົາໄດ້ຮຽນຫຼາຍຢ່າງແທ້ໆຈາກຕົວຢ່າງທີ່ດີຂອງພວກນາຊີຣີ! ການຮຽນເລື່ອງຂອງພວກນາຊີຣີຍັງຊ່ວຍເຮົາໃຫ້ເຫັນບາງຢ່າງກ່ຽວກັບພະເຢໂຫວາພໍ່ຂອງເຮົາທີ່ຢູ່ໃນສະຫວັນ. ເພິ່ນຮູ້ວ່າເຮົາຢາກເຮັດໃຫ້ເພິ່ນດີໃຈແລະເຮົາເຕັມໃຈເສຍສະລະເພື່ອຈະໃຊ້ຊີວິດໃຫ້ສົມກັບທີ່ເຮົາອຸທິດໂຕໃຫ້ເພິ່ນ. ພະເຢໂຫວາໃຫ້ກຽດເຮົາໂດຍໃຫ້ເຮົາເລືອກເອງວ່າຈະສະແດງຄວາມຮັກຕໍ່ເພິ່ນ. (ສພສ. 23:15, 16; ມຣກ. 10:28-30; 1ຢຮ. 4:19) ເລື່ອງຂອງພວກນາຊີຣີຍັງເຮັດໃຫ້ເຫັນນຳວ່າພະເຢໂຫວາສັງເກດແລະເຫັນຄ່າທີ່ເຮົາເສຍສະລະເພື່ອຈະຮັບໃຊ້ເພິ່ນ. ດັ່ງນັ້ນ ຂໍໃຫ້ເຮົາຕັ້ງໃຈທີ່ຈະຮັບໃຊ້ພະເຢໂຫວາຕໍ່ໆໄປແລະເຕັມໃຈໃຫ້ສິ່ງທີ່ດີທີ່ສຸດກັບເພິ່ນ.
ເຈົ້າຈະຕອບແນວໃດ?
-
ພວກນາຊີຣີກ້າຫານແລະເສຍສະລະຫຍັງແດ່?
-
ເຮົາຈະສະໜັບສະໜູນກັນແລະກັນແນວໃດໃຫ້ມີນ້ຳໃຈເສຍສະລະຄືພວກນາຊີຣີ?
-
ການເປັນນາຊີຣີສະແດງວ່າພະເຢໂຫວາໝັ້ນໃຈຫຍັງໃນຜູ້ຮັບໃຊ້ຂອງເພິ່ນ?
ເພງທີ 124 ສັດຊື່ຕະຫຼອດໄປ
a ເຖິງວ່າພະເຢໂຫວາເລືອກຄົນອິດສະຣາເອນບາງຄົນໃຫ້ເປັນນາຊີຣີ ແຕ່ສ່ວນຫຼາຍຄົນທີ່ເປັນນາຊີຣີແມ່ນຄົນທີ່ເລືອກເອງວ່າຈະຮັບໃຊ້ພະເຢໂຫວາແບບນັ້ນ.—ເບິ່ງຂອບ “ ນາຊີຣີທີ່ພະເຢໂຫວາເລືອກ”
b ບາງເທື່ອປຶ້ມຕ່າງໆຂອງເຮົາສົມທຽບພວກນາຊີຣີກັບຜູ້ຮັບໃຊ້ເຕັມເວລາ. ແຕ່ໃນບົດຄວາມນີ້ເຮົາຈະເບິ່ງວ່າຜູ້ຮັບໃຊ້ຂອງພະເຢໂຫວາທຸກຄົນຈະສະແດງນ້ຳໃຈເສຍສະລະຄືພວກນາຊີຣີໄດ້ແນວໃດ.
c ເພື່ອຈະຮັກສາຄຳສາບານທີ່ຈະເປັນນາຊີຣີ ເບິ່ງຄືວ່າພວກນາຊີຣີບໍ່ໄດ້ມີຂໍ້ຮຽກຮ້ອງແນວອື່ນທີ່ຕ້ອງເຮັດ ເຊັ່ນ ວຽກມອບໝາຍພິເສດ.
d ເບິ່ງບົດຄວາມ “ເຮົາຕັດສິນໃຈເຮັດໃຫ້ຊີວິດຮຽບງ່າຍ” ທີ່ຢູ່ໃນບົດຄວາມຊຸດ “ປະສົບການຂອງພະຍານພະເຢໂຫວາ” ໃນເວັບໄຊ jw.org. (ພາສາໄທ)
e ພາສາໄທ.
f ຄຳອະທິບາຍຮູບ: ນາຊີຣີຄົນໜຶ່ງຢູ່ເທິງດາດຟ້າ ລາວໂສກເສົ້າຫຼາຍຕອນທີ່ແນມເບິ່ງຂະບວນສົ່ງສະການຄົນໃນຄອບຄົວທີ່ລາວຮັກຫຼາຍ. ເພື່ອຮັກສາຄຳສາບານຕໍ່ພະເຢໂຫວາ ລາວບໍ່ສາມາດຢູ່ໃກ້ຄົນຕາຍໄດ້.
