1. Muchima muka wamwaza vanasololanga vaka-kulemesa Yehova putu vene kushikulu?

 UNO mwamona usoko wenu naYehova kupwa waulemu tahi? Twafwelela ngwetu mukiko. Kaha kamweshi ukawenuko. Omu mukiko chapwile nakuvatu vavavulu kushikulu. (Samu 104:​33, 34) Vatu vavavulu vanalisuulanga hakufwila kulemesa Yehova. Omu mukiko chapwile nakuli vatu vaze vapwile muIsalele yakushikulu, vaze vavulukilenga ngwavo vaNajili. Uno vatu kana vapwile veya, kaha vyuma muka natulinangula kuli vakiko?

2. (a) VaNajili vapwile veya? (Kulava 6:​1, 2) (b) Vyuma muka vyalingishile vaIsalele vamwe vasakule kupwa vaNajili?

² Lizu “Najili” lyafuma kulizu lyachiHepeleu lize lyalumbununa “Mutu Uze Vasakula,” chipwe “Mutu Uze Alihana,” chipwe “Mutu Uze Alihandula.” Lizu kana lyatalisa kuli vaIsalele vatwima vaze valisuwile kuzachila Yehova mujila yakulipwila. Jishimbi vahanyine Mose jetavishile lunga chipwe pwevo kushika Yehova lushiko lwakulipwila lwakupwa Najili hatando yimwe. a (Tangenu Kulava 6:​1, 2.) Vatu vaze valishikilenga lushiko kana vakavangijilenga jindongi jize kavakavangijilenga vaIsalele vakwavoko. Vyuma muka vyalingishile mutu alishike lushiko lwakupwa kaNajili? Chasoloka nge kuzanga chikuma Yehova nakupwa namuchima wakusakwilila havyuma vyamwaza amulingililile, vikiko vyalingishilenga mutu kana asakule kupwa kaNajili.—Lushi. 6:5; 16:17.

3. Uno vatu jaKalunga makumbi ano valifwana ngachilihi navaNajili?

³ Kulongesa chauNajili chakumine omu Jishimbi vahanyine Mose vajishishile “[ku]lushimbi lwaKulishitu.” (Ngale. 6:2; Loma 10:4) Shikaho, ngana mwavaNajili, navatu jaYehova makumbi  ano vanatwaleho lika kusolola muchima wakufwila kumuzachila namichima yavo yosena, namyono yavo yosena, navishinganyeka vyavo vyosena, nangolo javo josena. (Mako 12:30) Tweji kulisuulanga kulishika lushiko kana hakulihana kuli Yehova. Kuyoya kweseka nalushiko kana chasakiwa kuliluula kuli Yehova nakupwa namuchima wakulisuula. Omu natukekesa omwo vaNajili vayoyelenga kweseka nalushiko lwavo, natulinangula omwo tunahase kuyoya kweseka nalushiko lwetu. b (Mateu 16:24) Tushimutwilenu havyakutalilaho vimwe.

PWENUNGA NAMUCHIMA WAKULISUULA

4. Kweseka namukanda waKulava 6:​3, 4, vaNajili valisuwile kulihenda kuvyuma muka?

⁴ Tangenu Kulava 6:​3, 4. VaNajili kavatelele kunwa wala, chipwe kulya mihako yamivinyo numba yipwa yituta chipwe yaumuko. Vatu vaze vayoyelenga navaNajili valivwishilenga kuwaha kulya vyakulya kana, mwomwo chapwile chakwoloka vakiko kuvilya. Mbimbiliya yavuluka “vinyo vize vyeji kulingisanga muchima wamutu uwahilile,” kupwa wana wakufuma kuli Kalunga. (Samu 104:​14, 15) Chipwe ngocho, vaNajili valisuwile kuhona kulivwisa kuwaha vyuma kana. c

5. Vyuma muka alisuwile kulinga Madián napuwenyi Marcela, kaha mwomwo ika?

⁵ Nayetu tweji kulisuulanga kulemesa Yehova, ngana muze valingilenga vaNajili. Achishinganyekenu hachakutalilaho chaMadián naMarcela. d Ava valunga napwevo, valivwishilenga kuwaha chiyoyelo chamwaza. Madián apwile hamilimo yamwaza yize yavalingishile vatwamenga muzuvo yamwaza. Chipwe ngocho, vafwililile kuzachila chikuma Yehova. Hakusaka mangana vatesemo chuma kana, valumwineko vyuma vimwe mukuyoya chavo. Vambile ngwavo: “Twaputukile kuzachisa jimbongo jajindende. Twalukilile muzuvo yayindende, nakulanjisa nawa minyau yetu.” Numba tuhu Madián napuwenyi Marcela kavatelelele kulisuula mujila kaneyiko, oloze valingile ngocho mwomwo yakufwila kuzata chikuma mulimo wakwambulula. Vapwa vakusuuluka kaha nawa vakuwahilila mwomwo yavyuma vasakwile.

6. Mwomwo ika vaka-Kulishitu makumbi ano veji kulisuwilanga? (Talenu nawa muvwimbimbi.)

⁶ Makumbi ano, vaka-Kulishitu veji kulisuulanga mukuyoya chavo mangana vapwenga  nalwola lwaluvulu lwakuzata milimo yayivulu muliuka. (Koli. 1, 9:​3-6) Yehova katulweza tulisuule kuseza vyuma vyetuko, kaha nawa vyuma vize tunaseze kavyapwa vyakuhengako. Chakutalilaho, vandumbwetu vamwe veji kulisuulanga kuseza milimo yavo chipwe membo avo. Vavavulu vanalisuula kutwama ujike chipwe kuhona kupwa navana hatando yimwe. Vamwe vanalisuula kuya nakuzachila kuze kuli nakusakiwa kukafwa, numba tuhu kulinga ngocho nachivalingisa vatwame kwakusuku navatu vaze vazanga. Etu vavavulu tweji kulisuulanga kulinga vyuma kana mwomwo yakufwila kuzachila Yehova namuchima wetu wosena. Fwelelelenu ngwenu Yehova amona kulisuula chenu hakusaka kumuzachila kupwa chachilemu chikuma, numba mulisuula muvyuma vyavindende chipwe vyavinene.—Hepe. 6:10.

LISUULENU MUPWENGA MUVATU VAZE VALIHANDULA

7. Ukalu muka pamo amwenenga kaNajili hakusaka kulama lushiko lwenyi? (Kulava 6:5) (Talenu nawa muvwimbimbi.)

⁷ Tangenu Kulava 6:5. VaNajili valishikile lushiko lwakuhona kuteula jikambu. Eyi yapwile hijila yimwe yakusolola kuliluula chavo kuli Yehova. Mutu uze apwile kaNajili halwola lwalusuku, jikambu jenyi jasuwilenga chikuma ngocho vatu vajimwenenga. Nge vatu vaze alijingilikile navo vamukundwijilenga hakupwa kaNajili, kaha kamwenenga ukaluko. Chaluvinda, lwola lumwe muIsalele, vaNajili kavavamwenenga kupwa vavalemu chipwe kuvakundwizako. Mulwola lwakapolofweto Amose, vaIsalele vakulikanga ‘vahanyinenga vaNajili vinyo vanwenga,’ mangana vahokole lushiko lwavo lwakulihenda kuwala. (Amo. 2:12) Shimbu jimwe kaNajili atelelele kupwa wakumika numba atwaleho lika kulama lushiko lwenyi nakupwa mutu uze alihandula.

8. Uno vyuma ahichilemo ndumbwetu wakanyike Benjamin vinamikafwe ngachilihi?

⁸ Nayetu tunahase kupwa vakumika hakutukafwa kuli Yehova mangana tupwenga tuvatu vaze valihandula, numba tuhu twatwama nasonyi. Talenu chakutalilaho chandumbwetu Benjamin wamyaka yakusemuka 10, uze atwama muNorway. Hashikola yenyi hapwile chilika chakukundwiza vatu vamuUkraine mwomwo yajita. Vanyike vavalwezele kwimba mwaso oku vanavwale uvwalo ukwechi ulombo walifuchi lyaUkraine. Oloze hakusaka kulihenda kwazana muchilika kanechi, Benjamin emanyinyine hahasuku nachihela vapwile nakulingila chilika kana. Chipwe ngocho mulongeshi wenyi amumwene, kaha amusanyikile nakumulweza ngwenyi: “Twaya kuno tunalikungulwila hamwe. Tuvosena tuli nakukuvandamina!” Benjamin ahamukile nakuya kuli mulongeshi  wenyi nakumulweza ngwenyi: “Kangwazana muvihande vyalifuchi nachiyuloko, namumauka amapolitikiko. Chaluvinda, Vinjiho jaYehova vavavulu vali mutumenga mwomwo yakukana kwazana mujita.” Uze mulongeshi evwililile vyuma amulwezele Benjamin, nakumulweza aliyile kwenyi. Chipwe ngocho, vakwavo vaka-shikola vaputukile kumuhulisa avalumbunwine ovyo ahonenene kupwa navakiko. Benjamin alizakaminyine chikuma nakusaka kuputuka kulila, oloze ahamukile nakulumbunwina vakwavo vaka-shikola vyuma alwezele uze mulongeshi. Kufumaho, Benjamin alwezele visemi jenyi ngwenyi, amwene omu Yehova amukafwile omike hakuhakwila vyuma afwelelele.

9. Mujila muka tweji kwivwisanga Yehova kuwaha kumuchima?

⁹ Hakuwana nge twasakula kuliluula kuli Yehova, ngocho twafwila kulihandula kuvatu vaze vatujingilika. Twasakiwa kupwa vakuhamuka mangana tulisolole kupwa tuVinjiho jaYehova kumilimo chipwe kushikola. Omu kano kaye kali nakuya nakupihilako chikuma, chinahase kutukaluhwila kuyoya kweseka najindongi jamuMbimbiliya nakulwezako vakwetu mujimbu wamwaza. (Chimo. 2, 1:8; 3:13) Shikaho, shimbu yosena anukenunga ngwenu tweji ‘kwivwisanga Yehova kumuchima kuwaha,’ omu tweji kumikanga mangana tulihandule kuli vaze kavamuzachilako.—Vishi. 27:11; Mala. 3:18.

TWALENUHO KUHAKA YEHOVA KULUTWE MUKUYOYA CHENU

10. Uno kukavangiza lundongi lwatwama hali Kulava 6:​6, 7 chapwile ngachilihi cheseko kuli vaNajili?

¹⁰ Tangenu Kulava 6:​6, 7. VaNajili kavapandaminenga kumutu wakufwako. Hakavanga tunahase kushinganyeka ngwetu pamo katwalisuwile muvyuma vyavineneko. Kushikulu kaNajili achiwanyinenga kupwa chachikalu kukavangiza lushimbi kana nge kausoko kenyi nafu. Kweseka nachisemwa chahalwola kana, mutu uze nafwisa asakiwile kupwa kwakamwihi namujimba wamufu. (Yowa. 19:​39, 40; Vili. 9:​36-40) Lushiko ashikile kaNajili lwamulingishile ahone kukavangiza visemwa vimwe. VaNajili vasolwelenga lufwelelo lwakukola hakulama lushiko lwavo namulwola vapwilenga nakumona ukalu. Chikupu vene, Yehova ajikijishile ava vangamba jenyi vakashishi mangana vomike muvyeseko vize navamona.

11. Vyuma muka atela kufwila kulinga muka-Kulishitu kachi nge ali nakusakula vyakulinga vize navikwata hatanga yenyi? (Talenu nawa muvwimbimbi.)

¹¹ Yetu vaka-Kulishitu twamona lushiko lwetu lwakulihana kuli Yehova kupwa lwalulemu. Echi cheji kutulingisanga tushinganyeka  kanawa havyuma natulinga kutalisa kuvyuma vize navikwata hajitanga jetu. Tweji kuzatanga nangolo kweseka naVisoneka, mangana tuzakame kanawa jitanga jetu. Chipwe ngocho, katwahaka kulutwe vyuma vafwila vatu mujitanga jetu kuhambakana vize afwila Yehovako. (Mateu 10:​35-37; Chimo. 1, 5:8) Shimbu jimwe tunahase kulisuula kufwila kutwama mukuunda najitanga jetu mangana twivwise Yehova kuwaha.

12. Vyuma muka vize Alexandru alingile navize kalingileko omu apwile nakulipika naukalu wamutanga?

¹² Achishinganyekenu hachakutalilaho chandumbwetu Alexandru napuwenyi Dorina. Omu ava vapwevo nalunga valinangwile Mbimbiliya hamwaka wamuundu, pwevo alitwaminyinyine kulinangula kaha asakile nalunga lyenyi alinge mwomumwe. Chipwe ngocho, lunga ahanjikile kuli puwenyi nakumulweza mujla yayivwovu ngwenyi mwatwalililaho kulinangula. Oloze Dorina kawahililileko, ngocho amushinyinyikile mangana alitwamine kulinangula. Alexandru ambile ngwenyi, asakile kutachikiza kanawa omwo apwile nakwivwa puwenyi, oloze chuma kana kachapwile chachashi kuli ikiyeko. Shimbu jimwe omu puwenyi Dorina amwambilenga mazu amapi nakumukumbulula mujla yayipi, Alexandru asakilenga kulitwamina kulinangula Mbimbiliya. Chipwe ngocho, Alexandru omikile nakutwalaho lika kuhaka Yehova kulutwe oku nawa ali nakusolwela puwenyi zangi nakumuvumbika. Mukuhita chalwola, chakutalilaho chenyi chakunywile puwenyi aputuke cheka kulinangula Mbimbiliya, kaha kutwala muze ou pwevo etavilile muchano nakumumbapachisa.—Yenu ha jw.org mangana mutale vindiyo yakwamba ngwavo, Alexandru Văcar Napuwenyi Dorina: Zangi Yeji Kutalililanga Chikoki Kaha Nawa Yeji Kutetelanga.

13. Uno tunahase kusolola ngachilihi ngwetu twazanga Yehova najitanga jetu?

¹³ Yehova ikiye ahakileko tanga, kaha asaka etu vatu tupwenga natanga yakuwahilila. (Efwe. 3:​14, 15) Shikaho, twatela kulinga vyuma ngana muze eji kulinganga Yehova, nge tuli nakusaka kupwa vakuwahilila. Fwelelenu ngwenu Yehova amona kulisuula chenu nakufwila chenu kumulemesa kupwa chachilemu, omu muli nakutwalaho lika kuzanga jitanga jenu, nakujizakama nakujivumbika.—Loma 12:10.

LIKOLEZEZENUNGA MWENUMWENU MUPWENGA NGANA MWAVANAJILI

14. Veya twatela kufwila kukolezeza namazu etu?

¹⁴ Makumbi ano, zangi yikiko yatela kukunyula vosena vaze navalisuula kulemesa Yehova. Shimbu jimwe chapwa chachikalu kulinga ngocho.  Tunahase kulikolezeza ngachilihi tuvosena tupwenga ngana mwavaNajili? Hakuzachisa mazu etu. (Yopa 16:5) Kutala muchikungulwilo chenu muliko vamwe vaze vali nakufwila kwashiwisako chiyoyelo chavo mangana vazate chikuma milimo yakushipilitu tahi? Uno kuliko vakweze vakuhamuka nakulihandula kuli vakwavo kushikola numba nge kulinga ngocho chachikalu tahi? Kutala kuliko vilongesa vyaMbimbiliya navandumbwetu vaze vali nakuchiwana kupwa chachikalu kutwalaho lika kulama lufwelelo lwavo mwomwo yakuvafumbukila kutanga yavo tahi? Shikaho, tufwilenu kukolezezanga ava vandumbwetu, nakuvasakwilila hamuchima wavo wakulisuula nakuhamuka.—Fwile. 4, 5, 7.

15. Uno vandumbwetu vamwe vanakafwenga ngachilihi vandumbwetu vaze veji kuzatanga mulimo washimbu yosena?

¹⁵ Lwola lumwe, tunahase kufwila kukafwa vandumbwetu vaze vazata mulimo washimbu yosena. (Vishi. 19:17; Hepe. 13:16) Echi chikiko afwililile kulinga ndumbwetu wakashinakaji wakushishika uze atwama muSri Lanka. Omu atambwile jimbongo jenyi jalitayamende, asakile kukafwa vapayiniya vamapwevo vavali mangana vatwaleho lika kuzata mulimo wavo chamokomoko naukalu wakuhona jimbongo. Ngocho, alitomenenene kuvahanangako jimbongo kakweji hikakweji jakulandanga fundanga yamushinga. Chikupu vene, ou ndumbwetu apwile namuchima wamwaza.

16. Vyuma muka tunahase kulinangula kuli vaNajili?

¹⁶ Shikaho tunahase kulinangula vyuma vyavivulu kuchakutalilaho chamwaza vatusela kuli vaNajili. Chipwe ngocho, kulongesa chauNajili nawa, chasolola vyuma vimwe hali Setu wamwilu Yehova. Atachikiza chikupu ngwenyi twafwila kumwivwisa kuwaha nakulisuula tuyoye kweseka nalushiko twamushikile lwakulihana kuli ikiye. Atuvumbika hakutwitavila tusolole zangi yetu yakumuzanga mujila yakulipwila. (Vishi. 23:​15, 16; Mako 10:​28-30; Yowa. 1, 4:19) Kulongesa chauNajili chasolola nawa nge Yehova eji kumonanga muchima wetu wakulisuula mangana tumuzachile, kaha nawa aumona kupwa waulemu. Shikaho tufwilenu kutwalaho lika kuzachila Yehova namuchima wetu wosena.