1. Chilwilwinyi chachiwahi chamwekeshañawu akakudifukula aYehova kufuma tuhu kunyima?

 KOMANA mwalemesha wubwambu wumukweti naYehova? Chakadi nikujina, mwawulemesha! Nawa himudi nkawenuku. Kufuma tuhu kunyima, antu amavulu nankashi atiyaña neyi chimwatiyaña. (Mas. 104:​33, 34) Antu amavula adihanaña nakuleka kwilahu yuma yimu kulonda adifukuleña kudi Yehova. Dichelileña ninana adiña muIsarela wakushankulu ateneneñawu nawu aNaziri. Adiña anyi, nawa yumanyi yitunateli kudizila kuyuma yelileñawu?

2. (a) ANaziri adiñanyi? (Kuchinda 6:​1, 2) (b) Muloñadi aIsarela amakwawu chatondeleleñahu kwikala aNaziri?

² Izu dakwila nawu “kaNaziri” dafuma kwizu dachiHeberu daya mukwila nawu “Muntu Anatondiwu,” “Muntu Wunadaambuli,” hela “Muntu Wunadihani.” ANaziri adiña aIsarela adikita adihanineña kuleka kwilahu yuma yimu kulonda amukalakeleña Yehova munjila yadimena. Nshimbi jaMosi jetejeli iyala hela mumbanda kusanyika kudi Yehova kusanyika kwadimena kwakutondahu kwikala kaNaziri hakapinji. a (Tañenu Kuchinda 6:​1, 2.) Iku kusanyika hela kudikana kwajila mwabombeleli kwovwahila nshimbi jateleleli kubula kwovwahilawu aIsarela ejima. Hanu dinu, muloñadi kaIsarela chatondeleleñayi kusanyika kwikala kaNaziri? Iwu kaIsarela welileña mwenimu hadaha muloña wakumukeña Yehova chikupu nikumwekesha kusakilila hayuma yayiwahi yamwililiwu kudi Nzambi.—Kuhit. 6:5; 16:17.

3. Antu jaNzambi makonu adihanaña ñahi neyi chelileñawu aNaziri?

³ Ntanjikilu yawuNaziri yamanini helili Nshimbi jaMosi ajisinsi kudi “lushimbi lwaKristu.” (Ñal. 6:2; Rom. 10:4) Hela chochu, kufwana aNaziri, antu jaYehova makonu anatwalekihu  kumwekesha iyena dakufwila kumukalakela namuchima wawu wejima, nawumi wawu wejima, nayitoñojoka yawu yejima ninañovu jawu jejima. (Maku 12:30) Twasanyikaña kwila mwenimu chakufuma hamuchima neyi tudihana kudi Yehova nakumukalakela. Hakwila tutwalekihu kwila mutwasanyikili, twatela kwila nkeñelu yaYehova nikuleka kwilahu yuma yimu kulonda tumukalakeleña. Chitukuhanjekaña hayuma yayikwashili aNaziri kutwalekahu kwila mwasanyikiliwu, tukudizilaku yuma yalema yinateli kutukwasha ninetu kutwalekahu kwila mutwasanyikili. b (Mat. 16:24) Tuhanjekenu yuma yimu haniyi yuma.

DIHANENUÑA CHAKUFUMA HAMUCHIMA

4. Kwesekeja naKuchinda 6:​3, 4, muchima wakaNaziri wakudihana wekalileña ñahi mukweseka?

⁴ Tañenu Kuchinda 6:​3, 4. ANaziri hiyanwineña walwa wudi wejima hela yuma yakutuña kufuma kunyivinyu, chidi neyi nyivinyu yituuta hela yoomaku. Antu adikumashaniniwu nawu adiileña iyi yakuda mpinji yejima nawa chakadi kukala kudi kwejima, chineli kwosi nshimbi yayikaanishili kuda iyi yakudaku. Bayibolu yahosha nawu “vinyu yazañaleshaña muchima wamuntu,” hichawaana chafuma kudi Nzambi. (Mas. 104:​14, 15) Ilaña, aNaziri adihanineña chakufuma hamuchima nakuleka yumiyi. c

5. Yumanyi yeliliwu aMadián nawaMarcela hakwila apeleshiku chihandilu chawu, nawa muloñadi?

⁵ Neyi chelileña aNaziri, ninetu twalekaña kwilahu yuma yimu kulonda tudihaneña nakumukalakela Yehova chikupu. Talenu chuma chayimwekeneni aMadián nawaMarcela. Awa akaKristu adisumbula adiña nachihandilu chachiwahi. Manakwetu Madián wazatileña mudimu wayiletesheli ekaleña namali amavulu ayikwashili kushakama mwitala dadiwahi. Hela chochu, akeñeleña kukalakala nankashi mumudimu waYehova. Hakwila ashikiji chikonkwanyi chawu, afuukwilihu kupeleshaku chihandilu chawu. Ahosheli nawu: “Twatachikili kuzatisha mali antesha. Twabuukilili mukaditala kanyanya nawa twalandishili motoka yetu.” AMadián nawaMarcela hiyateleleli kupeleshaku chihandilu chawu muniyi njilaku, ilaña afuukwilihu kwila mwenimu muloña chumichi chayikwashili kutandumuna mudimu wawu wakushimwina. Atiyaña kuwaha nawa akweti muzañalu muloña wachuma chafuukwiliwu.

6. Muloñadi akaKristu makonu chadihaninañawu nakuleka kwilahu yuma yimu? (Talenu cheñi mwevulu.)

⁶ AkaKristu makonu atiyaña kuwaha kuleka kwilahu yuma yimu kulonda adikiteña chikupu  mumudimu waNzambi. (1 Kor. 9:​3-6) Yehova hatukanjikijaña nindi tudihani nakuleka kwilahu yuma yimuku, nawa bayi neyi yuma yitunaleki kwila yatamaku. Chakutalilahu, amakwawu ashiyaña mudimu wakeñawu hela itala. Amavulu afuukulañahu kubula kwiñila swayi muwulu hela kukwata kuñoji. Amakwawu afuukulañahu kuya nakuzatila kwiluña kudi kukaankila kwawakakushimwina, hela chakwila chumichi chikuletesha ashiyi antaña jawu niamabwambu jawu kwakulehi. Etu amavulu twadihanaña chakufuma hamuchima kuleka kwilahu yuma yimu muloña tunakukeña kumukalakela Yehova chikupu. Ilukenu nenu Yehova walemesha nankashi chimwadihanaña nakuleka kwilahu yuma yimu, chili yanyanya hela yamaneni, kulonda mumukalakelaña.—Heb. 6:10.

FWILENUÑA KWIKALA AMBUKAKU

7. Yumanyi yatela yamuletesheleña kaNaziri chimukalileña kutwalekahu kwila mwasanyikiliyi? (Kuchinda 6:5) (Talenu cheñi mwevulu.)

⁷ Tañenu Kuchinda 6:5. ANaziri asanyikileña nawu hiyatela kutewula nsuki jawuku. Diyi njila yimu mwamwekesheleleñawu nawu adiña nakumwovwahila Yehova chikupu. Neyi kaIsarela ekala kaNaziri hadi mpinji yayilehi, nsuki jindi jaleheleña nawa antu ashikeneneña hohu dakumwiluka. Neyi antu amakwawu amukolesheleña kutwalekahu kwila mwasanyikiliyi, chadi kumupelelaña kaNaziri kwikala wambukaku. Chawushona, mpinji jikwawu mukuhanda kwawaIsarela, aNaziri hiyayilemesheleña hela kuyikwashaku. Mumafuku akaprofwetu Amosi, aIsarela akakusekesha ‘enkeleña aNaziri vinyu nawu anwi,’ hadaha akeñeleña ayikojeji aleki kwila mwasanyikiliwu nawu hiyakunwaña vinyuku. (Amosi 2:12) Mpinji jikwawu kaNaziri wakeñekeleña kwikala wahamuka chikupu hakwila atwalekihu kwila mwasanyikiliyi nakwikala wambukaku..

8. Chuma cheliliyi manakwetu wakansi Benjamin chinayikoleshi ñahi?

⁸ Nawukwashu waYehova, ninetu tunateli kuhamuka nakwikala ambukaku, hela chakwila twekala nansonyi indi kwiji twatiyaña woma swayi. Talenu chuma chamumwekeneni Benjamin, Chinsahu wakuNorway wukweti yaaka 10. Muloña wanjita yamuUkraine, shikola hayañayi ekalili nachidika kulonda amwekeshi nawu anakuhakwilaku antu amuUkraine. Akashikola ayilejeli nawu embi kamina iku anavwali yakuvwala yikweti wulombu wampandela yetuña daUkraine. Benjamin wafuukwilihu kubula kudibomba munichi chidika chakulemesha ituña kuhitila mukwimena hahalehi nakwekalilili ichi chidika. Hela chochu, ntañishi yawu wamumweni nawa wamutambikili nezu datiyakana nindi: “Watela kwinza kunu kutudi. Wejima wetu tunakuhembelela yoweneyi!” Benjamin wahamukili nakuya nakumuleja ntañishi yawu nindi: “Hinadiñijaña munsañu jamatuña nachiyuulu  nimumapumba ansañu jamapolitikiku. Kafwampi, aYinsahu jaYehova amavulu ayikasa mutuleya muloña wakukaana kuya nakuzuña njita.” Ntañishi wetejeli mwahosheliyi Benjamin nawa wamulejeli kubula kuwanikaku kunichi chidika. Hela chochu, akwawu akashikola atachikili kumwihula chaletesheli abuli kuwanika kunichi chidika. Benjamin watiyili woma nankashi chakwila wakeñeleña kudila, ilaña wahamukili nakuleja akwawu ejima mwatañilileñawu mazu wowamu alejeliyi ntañishi yawu. Nkumininaku, Benjamin walejeli anvwali jindi nindi wamweni Yehova chamukwashiliyi kuhakwilaku yuma yakuhwelelayi.

9. Tunateli kuzañalesha ñahi muchima waYehova?

⁹ Chineli twafuukulañahu kwovwahila chakeñañayi Yehova, twekalaña ambukaku nawantu amakwawu. Twatela kwikala ahamuka hakwila tulejeña antu netu tudi Chinsahu chaYehova kumudimu hela kushikola. Nawa chinakutaminaku yilwilu niyuma yinakwilawu antu mukaayi, hadaha chikutukalilaña nankashi kulondela yishina yamuBayibolu nikulejaku antu nsañu yayiwahi. (2 Tim. 1:8; 3:13) Hela chochu, mpinji yejima anukenuña nenu ‘twazañaleshaña muchima waYehova’ neyi tuhamukaña nakwikala ambukaku nawantu abulaña kumukalakela Yehova.—Yish. 27:11; Mal. 3:18.

TWAMIJENUÑAKU YEHOVA MUCHIHANDILU CHENU

10. Kwovwahila lushimbi lwashimunawu haKuchinda 6:​6, 7 kwashileña ñahi aNaziri mukweseka?

¹⁰ Tañenu Kuchinda 6:​6, 7. ANaziri hiyaswinineña kwakwihi namujimba wamuntu wunafwiku. Hadaha munateli kutoñojoka nenu iku kwadiña kudihana kweneni nankashi wanyi. Hela chochu, kunyima chumichi chatela chamukalilileña nankashi kaNaziri neyi ntaña yindi chikupu diyi wunafwi. Tushidikilu twahachipenji twadiñaku hayina mpinji, twahosheli nawu antu atela kushakama kwakwihi namujimba wamuntu wunafwi. (Yow. 19:​39, 40; Yilw. 9:​36-40) Kusanyika kwasanyikileñayi kaNaziri kwamukañesheleña chikupu kulondela itu tushidikilu. Nihampinji yamweneñawu kukala kwafuminineña kudi amuchisaka chawu neyi kudi ntaña yawu wunafwi, aNaziri amwekesheleña chikuhwelelu chikupu kuhitila mukutwalekahu kwila mwasanyikiliwu. Chakadi nikujina, Yehova wayikolesheleña awa akakudifukula indi adikita hakwila omiki kukala kwejima kwamweneñawu.

11. Chumanyi chatela kwilayi mukaKristu neyi nakumona kukala kunakufumina kudi amuchisaka chindi? (Talenu cheñi mwevulu.)

¹¹ Etu akaKristu, kudihana kwetu kudi Yehova twakulemesha nankashi. Dichuma  chitwatoñojokañahu hampinji yitunakufuukula nikwila yuma yinakundami chisaka chetu. Twazataña nañovu kwakamena chisaka chetu kwesekeja nanyidimu yashimunawu muNsona, ilaña hitwatwamijañaku yuma yakeñaña antu amuchisaka chetu kubadika yakeñañayi Yehovaku. (Mat. 10:​35-37; 1 Tim. 5:8) Mpinji jikwawu, tunateli kufuukula kwila yuma yinateli kubula kuzañalesha antaña jetu ilaña yikumutiyisha Yehova kuwaha.

12. Hampinji yomikileñayi manakwetu Alexandru kukala kweneni kwamweneñayi muchisaka, chumanyi cheliliyi nawa chumanyi chabuliliyi kwila?

¹² Talenu chuma chamwekeni kudi aAlexandru nawañodawu aDorina. Hanyima yakwila awa adisumbula anadizi dehi Bayibolu hadi chaaka chimu, aDorina afuukwilihu kuleka kudiza, nawa akeñeleña anfumwawu aAlexandru niwena aleki. Ilaña, aAlexandru adiwunjikili nakuyileja añodawu mukubabala nawu akutwalekahu kudiza. ADorina atiyili kuwaha wanyi nawa esekeli nañovu yejima nawu akañeshi anfumwawu kutwalekahu kudiza. Manakwetu Alexandru wahosheli nindi welukili chaletesheleña ñodindi eleña yuma muyina njila, ilaña chamupeleleli wanyi. Mpinji jikwawu neyi aDorina asweja kuyikabisha nikuyihosha mazu atama, atiyileña neyi chikuwaha hohu kuleka kudiza Bayibolu. Hela chochu, manakwetu Alexandru watwalekelihu kumutwamijaku Yehova muchihandilu chindi, nawa hampinji yoyimu wamumwekesheleleña ñodindi kukeña chikupu nikumulemesha. Mukuhita kwampinji, yilwilu yindi yayiwahi yamusañumwini ñodindi kutachika cheñi kudiza Bayibolu, nawa nkumininaku ñodindi wapapatisheweli.—Talenu vidiyo ha jw.org yidi namutu nawu Alexandru naDorina Văcar: “Kukeña Kwadiwunjikaña nawa kwatiyilaña Luwi,” muyibaaba yinakuhosha nawu “Truth Transforms Lives.”

13. Tunateli kumwekesha ñahi netu twamukeña Yehova nichisaka chetu?

¹³ Yehova diyi washiliku ntanjikilu yachisaka, nawa wakeñaña nindi twikaleña namuzañalu muchisaka. (Efwe. 3:​14, 15). Neyi tunakukeña muchisaka chetu mwikaleña muzañalu chikupu, twatela kwilaña yuma kwesekeja nachakeñañayi Yehova. Kuhwelelenu chikupu nenu Yehova walemesha chimwadihanaña chakufuma hamuchima kumukalakela hampinji yimunakwakamena chisaka chenu nikuyimwekeshela kukeña nikalemesha.—Rom. 12:10.

DIKOLESHENUÑA WUMU NAMUKWAWU KWIKALA NEYI ANAZIRI

14. Anyi itwatela kufwilaña nankashi kukolesha namazu etu?

¹⁴ Ejima atondañahu kudifukula kudi Yehova makonu anateli kudihana kuleka kwilahu yuma yimu muloña wakumukeña. Mpinji jikwawu, chinateli kwikala chaswayi wanyi kwila mwenimu.  Tunateli kudikwasha ñahi wumu namukwawu kumwekesha iwu muchima? Kuhitila mukuyikolesha akwetu namazu etu. (Yoba 16:5) Muchipompelu chenu mudihu anakufwila kupeleshaku chihandilu chawu kulonda adikiteña chikupu mumudimu waNzambi? Kudihu atwansi imweluka anakumwekesha kuhamuka nakwikala ambukaku nawakwawu kushikola, hela chakwila chinakuyikalila kwila mwenimu? Kudihu atudizi aBayibolu indi kwiji akwenu akakudifukula anakuzata nañovu kutwalekahu kwikala ashinshika muloña wekañesha damuchisaka dinakumonawu? Tufwileña kuzata hakumina ñovu jetu mpinji yejima kuyikolesha awa akwetu akakudifukula itwakeña, nakuyisakilila hamuchima wawu wakudihana nikuhamuka.—Fwile. 4, 5, 7.

15. Amanakwetu niahela akwashaña ñahi akwawu adi mumudimu wampinji yejima?

¹⁵ Mpinji jikwawu, tunateli kuyikwashaku akwetu akaKristu adi mumudimu wampinji yejima yuma yinakukaankilawu. (Yish. 19:17; Heb. 13:16) Ichi dichuma chafwilileñayi chikupu kwila muhela washinshika wakula dehi washakamaña kuSri Lanka. Watambwili mali amavulu apenshoni nawa wakeñeleña kukwasha ahela ayedi atwansi apayiniya, kulonda atwalekihu mumudimu wawu wakushimwina hela chakwila amweneña kukala kwamali. Dichi wafuukwilihu kuyinkaña hakakweji-hakakweji mali akulandamu tokutayimu yamufoni. Iwu muhela wukweti chilwilu chachiwahi nankashi!

16. Ntanjikilu yawuNaziri wakunyima yatukwashaña kwiluka yumanyi?

¹⁶ Chakadi nikujina, tunateli kudizila yuma yayivulu kuyuma yayiwahi yelileñawu aNaziri akunyima adihanineña chakufuma hamuchima! Hela chochu, iyi ntanjikilu yamwekeshaña cheñi chekalayi Tata yetu wamwiwulu, Yehova. Watukuhwelela nindi twafwilaña chikupu kumutiyisha kuwaha nawa tukweti muchima wakudihana nakuleka kwilahu yuma yimu kulonda tutwalekihu kwila mutwasanyikili. Watulemesha kuhitila mukutwinka kukooleka kwakutondahu kumwekesha netu twamukeña. (Yish. 23:​15, 16; Maku 10:​28-30; 1 Yow. 4:19) Ntanjikilu yawuNaziri yamwekeshaña nawu Yehova wamonaña nikulemesha chitwadihanaña kulonda tumukalakeleña. Dichi, tufwileña kutwalekahu kumukalakela Yehova nawa twileña mwenimu hakumina ñovu jetu.