KJOAʼMIYA XI CHOTʼAYA 7
KJOAJNDA 51 Jé Niná tsakʼaitʼalee yaoná
Jmé xi bakóyaná je xi nazareo koan
“Jokjitse nga nazareo koa̱n tsje tíjna ngixko̱n Jeobá” (NÚM. 6:8).
XI TÍNCHJA̱NI
Jmé xi bakóyaná je xi nazareo koan nga nʼiojin koan kʼoa nga ñaki toje Niná kisixále.
1. Jótjíosʼín je choʼndale Niná jokji tífaʼato nó.
NKJÍN chjota xi nʼio chjí be nga miyole mani je Jeobá kʼoa kʼoajin tichjí ʼyatokuin tsanda ji (Sal. 104:33, 34). Nkjín xi ñaki toje Niná síxále, jolani je xi nazareo koan kʼianga tsakatio chjota israelita. ʼYáni xi kui koan kʼoa jmé xi bakóyaná jokisʼin.
2. 1) ʼYáni xi nazareo koan (Números 6:1, 2). 2) Ánni nga nazareo koan kʼani chjota israelita.
2 Je én xi nazareo tso kʼianga én hebreo kui tsoyanile nga toxá tjoejinni jngo chjota kʼianga xá sʼe̱le. Je én jebi bakinle je chjota israelita xi ñaki to xále Niná kisʼin. Je kjoatéxoma xi tsakʼaile kʼoatso nga je kiskoejin jokjitse nga ñaki to xále Niná sʼin jngo chjoón kʼoa tsa jngo xʼin a (tʼexkiai Números 6:1, 2). b Jngo xi nazareo koan tjín jmeni xi tsakʼéchjoale yaole. Kui kʼoakisʼinni nga nʼio tsjoake Jeobá kʼoa kʼoasʼin tsakakónile kjoanda nga kisichikontʼain (Deut. 6:5; 16:17).
3. Jósʼin mangósoán kao xi nazareo koan ngasʼa.
3 Kʼianga tsín tikui kjoatéxoma xi tsakʼaile chjota israelita koanchjénni alikui tiʼya xi nazareo koanni nga̱ kui je kjoatéxomale Cristo jekoanchjén (Gál. 6:2; Rom. 10:4). Tonga kʼoatisʼin nixálee Niná ndʼaibi jokisʼin je chjota xi nazareo koan. Kʼoasʼin nixálee Niná kao ngayeje ni̱ma̱ná, kao ngayeje kjoafaʼaitsjenná kʼoa kao ngayeje nganʼioná (Mar. 12:30). Kʼiaa kʼoaʼmilee je Jeobá nga kʼoasʼin si̱xálee kʼianga bʼaitʼalee yaoná. Kʼianga nitjosoán jmeni xi ʼmilee je Jeobá nitjosonñá josʼin mele kʼoa alikui to yaoná mangínñá. Nga kui chótʼayajiaan jokisʼin chjota xi nazareo koan ngasʼa, koasenkaoná tsanda ñá nga kuitjosonná jmeni xi ʼmilee je Niná nga bʼaitʼalee yaoná (Mat. 16:24). c
ALIKUI TO YAONÁ KJUINÑÁ
4. Tojo tso Números 6:3, 4, jméni xi tsakʼéchjoale yaole je chjota xi nazareo koan.
4 (Tʼexkiai Números 6:3, 4). d Je xi nazareo koan alikui koan nga vino tsakʼi, nga totsee kiskine kʼoa nga pasas kiskine. Ngayeje jebi koan kiskine xi ngikʼa nga̱ tsín chʼaotjín nga kui chinee. Je Biblia kʼoatso nga je vino kui xi báyatsjoa ni̱ma̱ná kʼoa nga jngo kjoatjao xi tsjoáná Niná (Sal. 104:14, 15). Tonga je xi nazareo koan tsakʼéchjoale yaole nga tsínkui tsakʼi. e
A kʼoanʼia jokisʼin je xi nazareo koan (Chótsenlai párrafo 4-6)
5. Jmé xi kisʼin je Madián kao Marcela kʼoa ánni.
5 Tojo kisʼin je chjota xi nazareo koan kʼoati tjín jmeni xi nʼia kʼianga ngisasa nda nixálee Niná. Kataʼyala jme xi kisʼin je Madián kao Marcela. Je ndsʼee jebi ndatjío, nda njele kʼoa naskánakji ndʼiale. Kʼoatso jmeni xi kisʼin kʼianga ngisasa nda kisixále Niná. Itso: “Ngisaa choa tao̱n kinikjeyaijin, tsakatenaníjin carronajin kʼoa ngisaa ʼndí kji ndʼia tsakjasjaijin jñani tsakiyonijin”. Kuinga kʼoakisʼinni je Madián kao Marcela nga ngisasa tse sixále je Jeobá. Kʼoa nʼio tsjoa tjío kon nga kʼoakisʼin.
6. Jméni xi nʼia xi chjotale Cristo maa, kʼoa ánni (kʼoati chótsenlai sén xi faʼaitʼa).
6 Xi chjotale Cristo maa nkjín koya jmeni xi nʼia tojoni nga ngisa nda si̱xálee Niná (1 Cor. 9:3-6). Je Jeobá alikui bʼénená nga si̱katioá je ndʼianá kʼoa tsa xáná nga̱ tsín tsa chʼaojintjín nga kui tjínná. Tonga tjínkʼa ndsʼee xi síkatío jebi tojoni nga ngisa nda síxále Niná. Tjínkʼa xi kʼoasʼin bʼéndajin nga tsín ndi̱to̱n kuixan, kʼoa tjínkʼa xi tsín ndi̱to̱n sʼele xti nga jebixan nga̱ kui xi mele nga ngisasa nda sixále Niná. Tjínkʼa xi ya fi jñani ngisa machjén xi tsoyason ninga kjin kʼoa síkatío xínkjín kao miyole. Nʼio nkjín ndsʼee xi kʼoasʼín nga ngisasa nda síxále Niná. Nʼio chjí be je Jeobá tojmeni xi nʼia tojoni nga ngisasa nda nixálee (Heb. 6:10).
TSÍN KʼOATI SʼIAAN JOSʼÍN XI KJAʼAÍ
7. Ánni nga sakʼoa ñʼai koannile je xi nazareo koan (Números 6:5; kʼoati chótsenlai sén xi faʼaitʼa).
7 (Tʼexkiai Números 6:5). f Kʼianga nazareo koan jngo chjota alikui titsakateni ntsja̱jko̱. Kʼoasʼin tsakakóni nga tíjnanda nga sitjoson jmeni xi kuitsole Jeobá. Nʼiojin koanndo ntsja̱jko̱ je xi tse nga nazareo koan. Tjínkʼa chjota xi tsín jokitsole tonga kʼoati tjínkʼa xi tsín tsabexkón. Tobʼelañá, je chjota xi yátsʼi̱n tsakinyále Niná kʼianga tsakʼejna je profeta Amós xán kitsjoatʼale je chjota xi nazareo koan ánni nga tsín tisitjosonnile Niná (Amós 2:12). Tjínnele nga nʼiojin koan je xi nazareo koan kʼianga kui xi ndatjín kʼoakisʼin.
Je xi nazareo koan nʼiojin koan nga tsín kʼoati kisʼin jokisʼin xi kjaʼaí (Chótsenlai párrafo 7)
8. Jméni xi ngisa sasénli jokisʼin je Benjamin.
8 Jé Jeobá koasenkaoná nga nʼiojin koaan nga tsín kʼoati sʼiaan josʼín xi kjaʼaí. Kataʼyala jokoan je Benjamin, jngo ndsʼee xi ya Noruega tsʼe, xi te nóle. Nga kjoajchán koan ya Ucrania kʼoatsakʼinle je xti ya ndʼiaskuela nga kʼoakjoan najño xi katabʼakjá josʼin tsen je bandera ánni nga tsjoánganʼionile je Ucrania, kʼoa kʼoatsakʼinle nga katase. Tokjin tsakasenjna je Benjamin, nga̱ tsín mele kʼoatisʼin jotjíosʼín xti xi ngikʼa, nga tjíose kʼoa nga kʼoakjoan najño xi tsakʼakjá. Tonga nga tsabe je maestrale i kitsole: “Nroai, tojisa tichoyalaijin”. Je Benjamin i kitsole maestrale: “Alikui kjoa política tsjonjian yaona. Tjínkʼa je testigole Jeobá xi ndoyá tjíoʼya nga tsín kjoajchán fijin”. Je maestrale alikui tijo kitsonile. Tonga je xtixínkjín kinchjaale kʼoa kʼoakitsole ánni nga tsín tíseni. Je Benjanmin me kiskiʼndá nga kʼoatjíotsole xti xi ngikʼa. Tonga nʼiojin koan, kʼoati kitsole jokitsole je maestrale. Xijekoanni, je Benjamin kʼoakitsole xijchále josʼin tsakasenkao Jeobá.
9. Jmé xi sʼiaan nga tsjoa kjoáyaa kon Jeobá.
9 Je chjota bená nga testigole Jeobá maa, kʼoa machjén nga nʼiojin koaan ya tʼaxáná kʼoa tsa ya ndʼiaskuela. Kʼianga sa tsʼen sa tsʼen kjima je chjota ngisaa ñʼai koa̱nná nga kʼuínyasoán kʼoa nga si̱tjosoán jotso kjoatéxomale Niná (2 Tim. 1:8; 3:13). Tsjoa sʼe kon je Jeobá nga tsín kʼoati nʼia josʼín je chjota xi tsín je síxále (Prov. 27:11; Mal. 3:18).
JE TÍTJON JEOBÁ KUENTA SʼIAAN
10. Ánni nga tsín choa ñʼai koannile je xi nazareo koan nga kisitjoson jmeni xi tso Números 6:6, 7.
10 (Tʼexkiai Números 6:6, 7). g Je xi nazareo koan alikui koan nga ya kisichrianle tsa ʼya xi kijnakʼien. Kʼiajin nga ñʼai koanle tsa xínkjín xi kʼien. Nga kui nichxin kʼoasʼin tsabeni chjota nga ya bichókatio jñani kijna je ʼndíkʼien (Juan 19:39, 40; Hech. 9:36-40). Je xi nazareo koan alikui koan nga kʼoakisʼin. Kisitjoson nga tsín ya kisichriantʼale xínkjín xi jekʼien kʼoa kʼoasʼin tsakakóni nga nʼio tjío kjoamakjainle. Tonga alikui tokitsjionkon je Jeobá, jé tsakasenkao kʼianga kichokjoajinle.
11. Jósʼiaan tsakui kʼoakuitsoná xíngiaa nga kui kʼoasʼiaan jmeni xi tsín sasénle Jeobá (kʼoati chótsenlai sén xi faʼaitʼa).
11 Xi chjotale Cristo maa nitjosonñá jmeni xi tsakʼinlee Jeobá kʼianga tsakʼaitʼalee yaoná kʼoa yaa bakoñá jonʼia. Binyakaoñá je familianá tsa jme xi machjénle, tonga alikui nitjosonlee tsakui kʼoakuitsoná nga kui kʼoasʼiaan jmeni xi tsín sasénle Jeobá (Mat. 10:35-37; 1 Tim. 5:8). Sakʼoajin kui kjoa kuitjátojiaan nga chjoéjiaan ʼyáni xi tsjoa kjoáyaa kon, a jé Jeobá axo jé xíngiaa.
A kui títjon xále Niná nikʼéjnaa ningalani sakʼoa ñʼai maná (Chótsenlai párrafo 11) h
12. Jméni xi kisʼin je Alexandru nga tsín tikoanmenile kiskotʼaya je chjoónle.
12 Kataʼyala jokoan je Alexandru kao Dorina, xi chjoónle mani. Kʼianga jejngo nó tjíokotʼaya Biblia chaan tsín tikoanmenile Dorina nga kiskotʼaya, kʼoa kʼoati kitsole je Alexandru nga tsín tikatakotʼayani. Ningalani ngasin nganda kʼoakitsole je Alexandru nga tosi tonda skótʼaya, alikui kisasenle je chjoónle. Je Alexandru kisijinle yaole ánni nga kʼoatsoni Dorina. Sakʼoa kisikʼajenle kon je ndsʼee kʼianga totaon tsabe je Dorina kʼoa nga nʼio tsakjákao. Je ndsʼee tosi tonda je Jeobá títjon kisikʼéjna kʼoa tosi tonda tsakakóle kjoatsjoacha kao kjoaxkóntokon je chjoónle. Nga nda choa̱ tsakʼéjna chaan kiskotʼaya ijngokʼa je chjoónle kʼoa kisʼenngindá (chótsenlai video Alexandru kao Dorina Văcar: “Je kjoatjaocha tsejtaní, kʼoa tjínle kjoanda” ya jw.org jñani “Je xi kixi tjín síkʼantjaiyaa chjota” tso).
13. Jósʼin koakoá nga tsjoachaa je Jeobá kao familianá.
13 Jé Jeobá xi kʼoasʼin koanmele nga familia tjín kʼoa kui xi mele nga ndasʼin kuiyokoaa xíngiaa (Efes. 3:14, 15). Tsa mená nga ndasʼin kuiyoaa machjén nga si̱tjosoán jme xi tsoná Jeobá. Je Jeobá kuenta sʼín ngayeje jmeni xi nʼia nga nixálee, nga tsjoachaa je familianá kʼoa nga bakolee kjoaxkóntokon (Rom. 12:10).
KʼOAINGANʼIONGAÑÁLEE XÍNGIAA NGA KʼOATI SʼIAAN JOKISʼIN XI NAZAREO KOAN
14. ʼYáni xi machjén nga kʼoainganʼiolee.
14 Tojmeni xi nʼia kʼianga je Jeobá tinixálee ninga sakʼoa ñʼai maná kui kʼoanʼiañá nga tsjoachaa. Kui kʼoakʼuínlee je ndsʼee jmeni xi kuinyakao nga tosi tonda katasíxále Jeobá (Job 16:5). Jolani tsa jngo ndsʼee xi ngisasa tse nichxin tísíkʼaya nga tísíxále Jeobá nga tokjimanile josʼin tíjna. Tsa jngo xi sʼa skuela tsoʼba nga nda tífikao yaole, nga tsín kʼoati sʼín josʼín je xtiskuela xínkjín. Tsa jngo ndsʼee kʼoa tsa jngoje̱ xi tosʼa tíkotʼaya Biblia xi kixi fitʼale Niná ninga xínkjín batiochjoa. Kʼoakʼuínlee ngatsʼi ndsʼee jebi nga nʼio nda tjíosʼín nga nʼiojin kjima nga je Jeobá tjíosíxále (Filem. 4, 5, 7).
15. Jmé xi sʼín kʼa je ndsʼee nga binyakao je xi ñaki to xále Niná tjíosʼín.
15 Koaan kuinyakoaa je ndsʼee xi ñaki to xále Niná tjíosʼín (Prov. 19:17; Heb. 13:16). Kʼoakisʼin jngo tichjaa xi jejchínga xi ya naxinandá jña Sri Lanka ʼmi tsʼe. Ninga tsín tisíxáni tojo bichóle tao̱n, kʼoa kʼianga ngisasa tse tsakʼaile, jao tichjaa xi precursora sʼin tjíosíxá xi ñʼai chonle tao̱n tsakasenkao. Jé tsakʼéchjí teléfonole nga xki̱ sá xki̱ sá. Tichjaa jebi nʼio nda kisʼin nga kʼoasʼin kitsjoanganʼio.
16. Jmé xi bakóyaná jokisʼin xi nazareo koan.
16 Nda choa̱ tsakatíoná jokisʼin je xi nazareo koan, kʼoa kʼoati tse xi tsoyaná tʼatsʼe Jeobá. Be nga kʼoatjío tokoán nga mená si̱xálee kʼoa nga mená si̱tjosoán jotsakʼinlee kʼianga tsakʼaitʼalee yaoná. Kʼoa kui kjoanda tsjoáná Jeobá nga bakolee jokji tsjoachaa (Prov. 23:15, 16; Mar. 10:28-30; 1 Juan 4:19). Je Jeobá kuenta kisʼin josʼin kisixále je xi nazareo koan ngasʼa. Kʼoati kuenta sʼínná ndʼaibi jokji tibʼenelee yaoná nga tinixálee. Tosi tonda kʼoakji si̱xálee Jeobá jokji kuicho nganʼioná.
JMÉ XI KAMAJINLI
-
Jósʼin tsakakó xi nazareo koan nga nʼiojin koan kʼoa nga tsín to yaole kini.
-
Jósʼin kuinyakoaa xíngiaa ndʼaibi nga kʼoati sʼiaan jokisʼin je chjota xi nazareo koan.
-
Jókisʼin je xi nazareo koan, kʼoa jmé xi bakóyaná tʼatsʼe Jeobá.
KJOAJNDA 124 Kixi kjuítʼale ngantsjai
a Tjínkʼa xi jesoa Jeobá kiskoéjin nga nazareo koan kʼoa nkjín koanni xi toje koanmele nga nazareo koan (chótsenlai je recuadro “ Chjota xi je Jeobá kiskoéjin nga nazareo koan”).
b Números 6:1, 2: “Je Jeobá i kitsosale Moisés: 2 I̱ tʼinlai je chjota israelita: Tsa jngo xʼin kʼoa tsa jngo chjoón xi tsjoátʼale yaole Jeobá nga tsjoá énle nga nazareo koa̱n”.
c Sakʼoa kui ningósonkao jokisʼin xi nazareo koan je xi ñaki to xále Niná sʼín ndʼaibi, tonga i̱ kjoaʼmiya jebi kui jchaa nga koa̱n kʼoasʼiaan ngatsʼiaa tojo kisʼin je chjota xi nazareo koan.
d Números 6:3, 4: “Alikui koa̱n vino skʼuí kʼoa tsa jmesani xi xán tjínle. Alikui koa̱n nga kui vinagre xi vino tjínle skʼuí kʼoa ni kuijinla vinagre xi xán tjínle. Alikui koa̱n kui skʼuí xi totsee tjínle, tsín koa̱n nga totsee ski̱ne kʼoa tsín koa̱n nga pasas ski̱ne. 4 Jokjitse nga nazareo koa̱n, alikui koa̱n kui ski̱ne tojmeni xi ya nroani xka̱totsee, ni kuijinla je totsee xi sʼa xkoén kʼoa nikuijinla xjoa̱le”.
e Je chjota xi nazareo koan alikuikjoan jngo xá tsakʼaile.
f Números 6:5: “Jokjitse nga nazareo koa̱n alikui koa̱n koate ntsja̱jko̱. Tjínnele nga tsje kʼoéjna ngixko̱n Niná kʼianga sindo ntsja̱jko̱ saʼnda nga koa̱njngo nichxin jokjitse nga tsjoátʼale yaole Niná”.
g Números 6:6, 7: “Alikui koa̱n ya sichrian jñani tjín xi kijnakʼien jokjitse nga tsjoátʼale yaole Niná. 7 Ninga je kuiyá nʼaile, na̱le, ndsʼe̱ kʼoa tsa ndichja, alikui koa̱n sijndí yaole, nga̱ je ntsja̱le kui choa̱ xi bakó nga je Niná kitsjoatʼale yaole”.
h XI TÍNCHJA̱NI SÉN XI FAʼAITʼA: Je xi nazareo koan alikui koan nga ya kisichrian kʼianga kijnakʼien xínkjín, kuinga tokjin tíkotsennile kʼianga tífisʼeñe.
