1. Чыла жапыште Иегован служитлышыже-влак мом ышташ ямде лийыныт?

 ИЕГОВА дене кыл кучымашдам акледа мо? Мутат уке, акледа, да шукышт тендан гаяк тидым аклат. Акрет годсек тыгай еҥ-влак лийыныт, кӧ Иеговам уло шӱм дене йӧратен (Пс. 103:33, 34). Шукышт, шкем чаманыде, тудлан служитленыт. Нунын коклаште — акрет годсо израильысе назорей-влак. Кӧ нуно лийыныт? Нунын примерышт гыч ме мо́лан тунемын кертына?

2. a) Кӧм назорей маныныт? (Числа 6:1, 2). б) Молан южо израильтян-влак назорей лияш товатленыт?

² «Назорей» мут тыгай еврей мут гыч лектеш, кудыжо «ойырымо» але «пӧлеклыме» манмым ончыкта. Назорей-влак Израиль калык гыч лийыныт да, шкем чаманыде, Иеговалан ойыртемалтшын служитленыт. Моисейын закон дене келшышын, пӧръеҥ але ӱдырамаш икмыняр жап назорей семын илынеже ыле гын, Иеговалан ойыртемалтше товатлыме мутым пуэн кертын a. (Числа 6:1, 2 лудын лекса.) Тиде товатлыме мут, але сӧрымӧ мут, ончыктен: айдеме тыгайым ыштышаш ыле, мом вес израильтян-влак ыштыде илен кертыныт. Молан айдеме назорей лийнеже ыле? Тыгай решенийым лукташ израильтяным, очыни, Иеговам кугу йӧратымаш да пӧлекше-влаклан тауштымаш таратен (Втор. 6:5; 16:17).

3. Тачысе Юмын служитлышыже-влак назорей-влак дене мо дене икгай улыт?

³ Кунам «Христосын законжо» Моисейын законым алмаштен,  назорей семын служитлаш уже огеш кӱл ыле (Гал. 6:2; Рим. 10:4). Иегован служитлышыже-влак тачат назорей семын тудлан уло шӱм, чон, умылымаш да вий дене служитлынешт (Мар. 12:30). Ме тидым ышташ товатлена, кунам Иеговалан ӱшанле лияш сӧрымашым пуэна. Сӧрымӧ мутна тудын эрыкшым шукташ да шкем чаманыде служитлаш ямде улмынам ончыкта. Назорей-влакын примерыштым шымлен, ме шкаланна урокым ужына, кузе сӧрымашна дене келшышын илен кертына (Матф. 16:24) b. Айста икмыняр примерым ончалына.

ИКТАЖ-МО АЛЕ ИКТАЖ-КӦ ДЕЧ ПОСНА ИЛАШ ЯМДЕ ЛИЙЗА

4. Числа 6:3, 4 дене келшышын, назорей-влак мом ышташ огыл ямде лийыныт?

⁴ Числа 6:3, 4 лудын лекса. Назорей-влак нимогай алкогольым йӱшаш огытыл, тыгак виноградым да изюмым кочшаш огытыл ыльыч. Весе-влак тидым кочкын да йӱын кертыныт, да тыште нимогай удаже лийын огыл. Вет йошкар арака — Иегован еҥ-влаклан пуымо пӧлек-влак гыч иктыже. Библийыште возымо дене келшышын, «йошкар арака еҥын шӱмжым йывыртыкта» (Пс. 103:14, 15). Но нине кочкыш ден йӱыш еҥ-влакым веселаҥденыт гынат, назорей-влак тидым кочкаш да йӱаш огыл ямде лийыныт c.

5. Мадиан ден Марсела могай вашталтышым ыштеныт да молан?

⁵ Назорей-влак семын меат Иеговалан шукырак служитлашлан илышнам вашталтена. Мадиа́н ден Марсе́лан примерыштым ончалына d. Тиде еш мужыр поян илен. Мадианын шуко оксам налмылан кӧра нуно мотор пачерыште илен кертыныт. Но нуно Иеговалан шукырак ыштынешт ыле, сандене илышыштым вашталташ шонен пыштеныт. «Ме роскотнам эркын иземдаш тӱҥалынна», — ойлат нуно, — «изирак пачерыш илаш кусненна да машинам ужаленна». Мадиан ден Марсела тыгай вашталтышым ыштышаш ыльыч мо? Уке. Но нуно тыге ыштеныт, молан манаш гын, тидлан кӧра служымашлан шукырак жапым пуэн кертыныт. Нине решений-влакым луктын, нуно чынжымак пиалан лийыныт.

6. Молан христиан-влак иктаж-мо але иктаж-кӧ деч посна илаш ямде улыт? (Тыгак сӱретым ончыза.)

 ⁶ Христиан-влак таче Иеговалан шукырак ышташлан шке кумылыштым кокымшо верыш шындат (1 Кор. 9:3—6). Иегова мыланна тидым ышташ огеш кӱштӧ. Тыгак, мо деч тый отказатлалтат, тиде уда огыл. Мутлан, южышт йӧратыме пашам огыт ыште, шке пӧртым але пачерым да эсогыл пӧрт янлыкым огыт нал. Шукышт ик жап мужыраҥаш огыл але йоча деч посна илаш шонен пыштеныт. Весышт уверзе кӱлмӧ верыш каеныт, кеч тиде родышт-влак деч пеш мӱндырнӧ. Ме уло кумылын тыге ыштена, вет Иеговалан эн сайжым пуымына шуэш. Иегова кеч-могай надырдам — кугужымат, изижымат — пеш чот акла, вет те тудлан служитлыме верч тидым ыштеда (Евр. 6:10).

ВЕСЕ-ВЛАК ДЕЧ ОЙЫРТЕМАЛТАШ ЯМДЕ ЛИЙЗА

7. Назорей могай нелылык дене тӱкнен кертын? (Числа 6:5). (Тыгак сӱретым ончыза.)

⁷ Числа 6:5 лудын лекса. Назорей-влак ӱпыштым тӱредаш огыл товатлыме мутым пуэныт. Тыге нуно Иеговам тӱрыснек колыштмым ончыктеныт. Израиль еҥ назорей семын шуко жап служитлен гын, ӱпшӧ кужемын, да тиде чылаштлан койын. Весе-влак тудым пагаленыт да товатлыме мутшым умбакыжат шукташ кумылаҥденыт гын, тунам тудлан назорей семын служитлаш куштылгырак лийын. Чаманаш логалеш, но тыгай жап лийын, кунам Израиль калыкыште назорей-влакым пагален огытыл. Амос пророкын илыме жапыштыже Иеговам колыштдымо израильтян-влак назорей-влаклан йошкар аракам йӱаш темленыт. Тыге нуно назорей-влакым товатлымыштым пудырташ таратеныт (Ам. 2:12). Тугеже, южгунам назорейлан товатлыме мутшо дене келшышын илашлан да весе-влак деч ойыртемалташлан лӱддымӧ лияш кӱлын.

8. Самырык Беньяминын случайже тендам мо шотышто кумылаҥда?

⁸ Ме вожылшо улына гынат, Иегова мыланнат весе-влак деч ойыртемалташ лӱдмашым сеҥаш полша. Теве Норвегий гыч Иегован Таныкше улшо 10 ияш Беньяминын случайже. Тудын школжо ик мероприятийым эртарен. Нуно Украин дене пырля улыт манын ончыктынешт ыле. Сандене украин флаг тӱсан вургемым чиен, йоча-влак мурым мурышаш ыльыч. Тиде патриотический церемонийыште участвоватлаш огыл манын, Беньямин мероприятий эртаралтме вер деч ӧрдыжтырак лияш шонен пыштен. Но туныктышо тудым ужын да кугу йӱкын каласен: «Тол тышке да мемнан дене пырля муро. Ме тыйым чыланат вучена». Беньямин тудын дек лӱдде толын да каласен:  «Тиде политике дене кылдалтын, сандене тыште мый ом участвоватле. Иегован Таныкше-влак сарыш огыт кай, садлан нунын гыч шукышт казаматыште шинчат». Туныктышо Беньяминын аргументше дене келшен да тудлан участвоватлаш огыл разрешенийым пуэн. Но пырля тунемшыже-влак тудым йодышташ тӱҥалыныт, молан тудо нунын дене пырля ынеж муро. Беньямин тунар чот тургыжланен, чуч шорташ тӱҥалын огыл. Туге гынат, мом тудо туныктышылан каласен, тидымак уло класслан лӱдде эше ик гана каласен. Тидын деч вара Беньямин ача-аважлан каласкален пуэн, кузе Иегова ӱшанымашыжым аралаш полшен.

9. Кузе ме Иегован шӱмжым куандарен кертына?

⁹ Ме Юмын эрыкшым шукташ шонен пыштенна, сандене весе-влак деч ойыртемалтына. Школышто да пашаште Иегован Таныкше улына манын ойлашлан мыланна лӱддымылык кӱлеш. Тиде тӱнясе еҥ-влакын шонымышт да ыштымышт пужлат веле, сандене мыланна, очыни, библийысе принцип почеш илаш да поро уверым таныклаш йӧсырак да йӧсырак лиеш (2 Тим. 1:8; 3:13). Но эре шарныза: Иеговалан служитлыдыме еҥ-влак деч ойыртемалташ она лӱд гын, Иегован шӱмжым куандарена (Прит. 27:11; Мал. 3:18).

ТЕК ИЕГОВА ИЛЫШЫШТЫДА ИКЫМШЕ ВЕРЫШТЕ ЛИЕШ

10. Числа 6:6, 7 почеламутлаште возымо кӱштымашым назорей-влаклан шукташ молан йӧсӧ лийын кертын?

¹⁰ Числа 6:6, 7 лудын лекса. Назорей-влак колышо дек лишемын кертын огытыл. Очыни, те шонеда: тидым ышташ йӧсӧ лийын огыл. Но Библий возымо жапыште назорейлан тидым ышташ неле лийын кертын, поснак кунам лишыл родыжо колен. Ту жапысе тойымаш йӱла почеш айдемылан колышо кап воктене лияш кӱлын (Иоан. 19:39, 40; Ап. паш. 9:36—40). Назорей товатлыме мутшылан верч тиде йӱлам шуктен кертын огыл. Эсогыл чот ойгырымо годым назорей-влак пеҥгыде ӱшанымашыштым ончыктеныт да товатлыме мутыштым умбакыжат шуктеныт. Мутат уке, Иегова нине ӱшанле служитлышыже-влакым пеҥгыдемден шоген, да нуно тидлан кӧра тыгай кугу нелылыкым чытен кертыныт.

11. Еш дене кылдалтше решенийым лукмо годым христианлан мом ышташ ямде лияш кӱлеш? (Тыгак сӱретым ончыза.)

¹¹ Ме сайын умылена: Иеговалан пуымо сӧрымаш илышыштына икымше верыште лийшаш. Тиде чот влиятла, могай решенийым ме луктына да кузе шкенам ешыште кучена. Ме еш обязанностьнам шуктена,  но лишылна-влакын кумылыштым Иегован эрыкше деч кӱшкырак она шынде (Матф. 10:35—37; 1 Тим. 5:8). Южгунам Иеговам куандарашлан мыланна тыгай решенийым лукташ логалеш, кудыжо лишыл родына-влаклан огеш келше.

12. Александру ешыште проста огыл ситуаций годым шкем кузе кучен?

¹² Теве Алекса́ндрун да Дори́на ватыжын случайышт. Нуно Библийым ик ий наре шымленыт. Тидын деч вара Дорина Библий шымлымыжым чарнен. Марийжат тидым ыштыже манын, тудын кумылжо лийын. Но Александру, тидым ом ыште манын порын каласен. Дориналан тиде келшен огыл, да тудо марийжылан шымлаш тӱрлӧ семын мешаен. Александру умылаш тыршен, молан ватыже тыге ыштен, но тиде куштылго лийын огыл. Южгунам, кунам Дорина тудым критиковатлен да пӱшкыл ойлен, Александрун Библийым шымлаш чарнымыже шуын. Но Александру Иеговам илышыштыже икымше верыш шынден да тунамак ватыжлан йӧратымыжым да пагалымыжым ончыктен. Александрун сай примерже Доринам Библийым угыч шымлаш кумылаҥден, да, жап эртымеке, тудо тынеш пурен. (jw.org сайтыште «Истина меняет жизнь» рубрике гыч «Александру и Дорина Вэкар. „Любовь долготерпелива и добра“» видеороликым ончыза.)

13. Иеговам да ешнам йӧратена манын, кузе ончыктен кертына?

¹³ Иегова ешым ыштен. Еш илыш мыланна куаным кондыжо манын, тудын кумылжо уло (Еф. 3:14, 15, УТ). Чынже денак пиалан лияшлан мыланна, мом Иегова йодеш, тидым ыштыман. Родыда-влак верч тыршыза, нуным йӧратыза да пагалыза (Рим. 12:10). Пеҥгыдын ӱшаныза: Иегова тудым куандараш тыршымыдам пеш чот акла.

ИКТЕ-ВЕСЫЛАН НАЗОРЕЙ ГАЙ ЛИЯШ ПОЛШЫЗА

14. Поснак кӧм кумылаҥдаш кӱлеш?

¹⁴ Кӧ таче Иеговалан служитлаш тӱҥалеш, нуно Иеговам йӧратымылан кӧра шке кумылым огыл, а Иегован кумылжым шукташ ямде улыт. Южгунам тидым ышташ куштылго огыл. Кузе ме весе-влаклан тыге илаш кумылым вияҥдаш полшен кертына? Мутна дене кумылаҥден кертына (Иов 16:5). Погынымаштыда тыгай иза-ака-влак улыт мо, кӧ Иеговалан шукырак ышташлан простан илаш тырша? Паледа мо тыгай самырык-влакым, кудышт школышто весе-влак деч ойыртемалташ огыт лӱд, кеч тидым ышташ южгунам йӧсӧ? А мом каласаш лиеш Библийым шымлыше-влак нерген але иза-ака-влак  нерген, кӧлан еш шыгыремдыме верч Юмылан ӱшанле кодаш куштылго огыл? Кӧ тыгай лӱддымылыкым ончыкта да Иегова верч иктаж-мо деч посна кодаш ямде, нуным моктымо шуэш! Айста йӧн лекме годым нуным кумылаҥдена (Флм. 4, 5, 7).

15. Кузе южышт кечыгут служитлыше-влаклан полшат?

¹⁵ Южгунам ме кечыгут служитлыше иза-ака-влаклан паша дене полшен кертына (Прит. 19:17; Евр. 13:16). Лач тыге Шри-Ланкыште илыше илалше ака ыштен. Тудын пенсийжым кугемденыт, да тудо окса нелылык дене тӱкнышӧ кок самырык пионер акалан полшаш шонен пыштен. Ака-влак служитлымым ынышт кодо манын, тудын кумылжо лийын. Сандене тудо нунылан кажне тылзын оксам пуаш тӱҥалын. Тидлан кӧра ака-влак телефонлан тӱлен кертыныт. Могай сай примерым тиде ака ончыкта!

16. Назорей-влакын товатлыме мутыштым лончылымеке, мом ме пален налынна?

¹⁶ Назорей-влак Иеговалан шкем чаманыде служитленыт. Тиде шотышто нуно мыланна сай примерым ончыктеныт. Тыгак назорей-влакын товатлыме мутышт мыланна Иеговам, кавасе Ачанам, сайрак умылаш полша. Иегова пала: мемнан тудым чынже денак куандарымына шуэш да ме тудлан пуымо сӧрымашнам шукташлан уло вийым пышташ ямде улына. Ме шке решатлен кертына, кузе Юмым йӧратымым ончыкташ тӱҥалына. Тиде мыланна Юмо деч пуымо кугу чап (Прит. 23:15, 16; Мар. 10:28—30; 1 Иоан. 4:19). Иегова ужеш да акла чылажымат, мом ме тудын верч ыштена. Сандене айста, Иеговалан эн сайжым пуэн, умбакыжат служитлаш кумылаҥдыме лийына!