OHUDHERA 7
JHIBO 51 Nohivelela wa Yehova!
Nnahudhera ddi ni anazirewu?
‘Oliye anere okala oweela vamentoni va Yehova malabo aamatene anafuniye okala nazirewu.’ — NÚM. 6:8.
DHITHU NNAAHUDHERIHU
Makalelo yopadduwa ya anazirewu enanihudhihiwa okala ooliba murima ni oleva ethu-sithu wihina nimulabele Yehova.
1. Ethu baani adhaari a Yehova akale yeriliwana?
MWEBARIBARENE we onovaha thima wandana wawo ni Yehova! teto we kuli weeka. Obajha kale yahikalawo athu owinjhiva yavaha thima wandana yanniwana ni Yehova. (Sal. 104:33, 34) Teto owinjhiva yahileva ethu-sithu wihina emulabele Yehova. Siyeyo anazirewu yeriliwana mudhidhi wa amwaana Izarayeli. Anazirewu yaali aani, ki ethu baani nnahudherihu ni yopadduwa yewa?
2. (a) Anazirewu yaali aani? (Números 6:1, 2) (b) Mwahaya bwaddi amwaana Izarayeli amodha yosakula okala anazirewu?
2 Madhu owi “nazirewu” ni Ebarayiku enatapulela, “oosakuliwa,” “avayeka” obe “owivelela.” Anazirewu yaali amwaana Izarayeli yaleva ethu wihina emulabele Yehova mwamakalelo avayekiwa. Nlamulo na Moyizeji noowenya wihina mulobwana obe muhiyana erena mpaganyo wa vayeka ampaganyaga Yehova okala nazirewu muwari mwa mudhidhene. a (Omwileri Números 6:1, 2.) Mwana Izarayeli erana mpaganyo ola wa vayeka wokala nazirewu, ohoowela ohara dhoholela, amwaana Izarayeli amodhaya yahahoweliwa ohara. Mbwenye ethu baani yamuthukulela muthu othoma okala nazirewu? Podi wera yaali mwaha wa odhivela anniyena ni Yehova ni otamalela waye mwaha mareeliho awakeliye. — Deut. 6:5; 16:17.
3. Nlogo na Yehova peeno nnooniha aavi ekalelo emodhave yanna anazirewu?
3 ‘Nlamulo na Kiristu’ nuuhala vamburoni na Nlamulo na Moyizeji, nlogo na Mulugu kannahowela okala anazirewu. (Gal. 6:2; Rom. 10:4) Mbwenye ndala ninga anazirewu, peeno nlogo na Yehova nnodidela wooniha efunelo enlubale yomulabela Yehova ni murima wewa waatene, ni emuthu yewa yaatene, ni mubuwelo wewa watene ni kopolo dhewa dhatedhene.’ (Mar. 12:30) Niivelelaga wa Yehova, iyo nihimpaganya omulabela ni murima wehu waatene, mbwenye wihina naande wakwanihedha mpaganyo ola nnohowela oleva ethu-sithu wihina nimulabele. Vano kabeni noone ethu baani anazirewu yahoweliwa werana wihina yakwanihedhe mpaganyo wewa ni makalelo yotajhiha yewa enanikaviheriwa wakwanihedha mpaganyo wehu nerilihuna wowivelela wa Yehova. b (Mat. 16:24) Kabeni noone dhithu anazirewu yahoweliwa werana.
OKALE MUTHU OOLEVA
4. Mowiwanana ni Números 6:3, 4, anazirewu yathoma oleva ddi?
4 Omwileri Números 6:3, 4. Anazirewu kiyang’wa dhong’wa dholezeliha newene omujha uva obe uva owumma. Amwaana Izarayeli amodha yoomujha uva ni yoog’wa dhong’wa dholezeliha, woona wihina kiyaali yothega werana dhithu ndha. Bibiliya anihina, ‘vinyu anohagalasa murima wa muthu’ ni nvaho wa Mulugu. (Sal. 104:14, 15) Naarive dhigaali ndo anazirewu yahithoma, wiwelela dhoholela ndha. c
We ohuthoma oleva ethu-sithu ndala ninga anazirewu yeriliwana? (Osugwe ddima 4-6)
5. Dhithu baani Madián ni Marcela eleviliwa, ki mwahaya bwaddi?
5 Ndala ninga anazirewu, nihiyowa nnoleva ethu-sithu wihina nimulabele Yehova. Kasugwa yopadduwa ya Madián ni Marcela. d Anamatelana ala yahikanna egumi yapama. Madián ahikanna mabasa apama, ni yakala nyumba yapama. Mbwenye aliwa yofuna wawenjhedhedha mabasa ewa yampareliwa Yehova. Vano wihina yande wakwanihedha yoluba yewa aliwa ojajaliha egumi yewa. Aliwa enowoga yegi: “Iyo obajha ovugula dhithu nagulihu. Iyo otamela nyumba eng’ono ni oguliha karo yehu.” Madián ni Marcela kayahowela wawerana masadduwo ala, mbwenye aliwa yawerilena mwaha yafuna yawenjhedhe mabasa ewa yampareliwa Yehova. Vano aliwa eli oohagalalene mwaha yothoma yeriliwena.
6. Mwahaya bwaddi iyo nigaleva ethu-sithu?
6 Peeno adhaari a Yehova enoohagalala oleva ethu-sithu wihina ekanne mudhidhi wowinjhiva womulabela Yehova. (1 Kor. 9:3-6) Yehova kananiwaddihedha oleva ethu-sithu wihina nimulabele, teto dhithu dhimodha addibila eleviliwa kahi dhabure. Motajhiha, amodhaya enowahiya mabasa enathabwa wadhivela, nyumba obe mwanenyama ewa enamudhiveliwa. Amodhaya ehithoma okala addiye muwari mwa mudhidhi wowinjhiva obe anamatelana amodhaya enojheha mudhidhi wowinjhiva wihina ekanne ahima. Teto amodha ehisakula odhowa okavihera murudda winahoweleya anamalaleya, naarive ehoweleyaga okala wolapela ni amudhi ewa vamodha ni akwiwa. Owinjhiva wa iyo nnerana dhithu ndha mwaha nnafuna nawenjhedhedhe mabasa nnamparelihu Yehova. Okanne ebaribari wihina Yehova anovaha thima dhithu dhatedhene oneriwana wihina omulabele, naarive dhigaali dhing’no obe dhinlubale. — Heb. 6:10.
OKALE OOHIYANA
7. Mwahaya bwaddi yomurusa munazirewu wakwanihedha mpaganyo waye? (Números 6:5) (Osugwe fotu.)
7 Omwileri Números 6:5. Anazirewu kayasatha mathithi. Ala yaali makalelo owooniha wihina yoomwiwelela Yehova ni murima wewa wamutene. Vano mwana Izarayeli akala nazirewu muwari mwa mudhidhi wowinjhiva mathithi aye yere othabwa wunnuwa ni yere okala yokweya amodhaya wonelamo wihina oliye aali munazirewu. Vano akala athu amodha yoomuriha munazirewu ni yoomulibiha wihina adhowegeve aakwanihedhaga ele aapaganyiliye, yere okala yokweya oliye wanda okala oohiyana. Mbwenye yowukuliya sowihina, anazirewu kiyarihiwa newene kayakaviheriwa ni amwaana Izarayeli amodha. Mudhidhi wa namavuhulela Amoji, amwaana Izarayeli yaali mapostata ‘yowavaha vinyu anazirewu,’ podi wera yosayela makalelo owathukulela anazirewu ohiiwelela nlamulo na Yehova nohimung’wa vinyu. (Amós 2:12) Anazirewu yohowela okala ooliba murima wihina yakwanihedhe mpaganyo wewa ni okala oohiyana ni athu amodhaya.
Nazirewu aali oororomeleya ni ele apaganyiliye oorumedha okala oohiyana ni athu amodha (Osugwe ddima 7)
8. Yopadduwa ya Benjamin yulibihile aavi?
8 Nnikavihero na Yehova, iyo podi wanda okala ooliba murima ni oohiyana ni athu amodha naarive nigaali athu oomala. Kasugwa yopadduwa ya Benjamin, anna yaka 10 anakala elabo yoNoruwega. Mwaha wa koddo enawaniwa elabo yo Ukraniya, eskola anahudheriye werana muthupo wihina yoonihe wi enowakavihera athu enafwanyeya elabo yo Ukraniya. Vano anaskola aatene yohowela wiba jhibo ni owara guwo dhanna kore na bandera na elabo yo Ukraniya. Wihina Benjamim ahiivolosihe muthupo ole wathithimiha elabo oliye okala wolapela ni mburo ole weriwana muthupoya. Mbwenye profesora dhaala omoona ni omwithana egi: “Odhe wuno ovanene, ninna wujheha!” Benjamin omwaddamela profesora ole ni owoga nuuliba murima egi: “Miyo kaginavolowela muselu dha pulitika. Mwebaribarene Anamoona a Yehova owinjhiva eli mukambura mwaha okoodda odhowa okoddoni.” Profesora ole orumedha ndhe Benjamim aawogiliye ni owoga wi oliye kahowela wivolosiha mmuthuponi ole. Mbwenye akwaye ooskola obajha omukoha mwahaya bwaddi oliye kaakavihera muthupo ole. Benjamin osegedheya ni ohalaga neena wihina abajhe wunla, naarive dhigaali ndo, oliye ohogolowela owoga dhithu dhimodhave amwaddenliye profesora aye. Vasogolova, Benjamin wawaddela makolo aye makalelo Yehova aamukaviheriye obarela nroromelo naye.
9. Nnande aavi ohagalasa murima wa Yehova?
9 Athu enowanda woona wihina iyo nili oohiyana mwaha wihina nnomwiwelela Yehova. Iyo nnohowela oliba murima wihina nawaddele athu amodha nakala oskola obe omabasani wihina nili Anamoona a Yehova. Mudhidhi elabo ela enaddameliwa omakuthulo enerege okala ethu yorusa wawiwelela malagano a mBibiliyani ni walaleya athu amodha muthenga dhapama. (2 Tim. 1:8; 3:13) Malabo aamatene kudduwale wi ‘murima wa Yehova onohagalala’ anoonaga nilibaga murima wi nikale oohiyana ni ale yahinamulabela. — Pro. 27:11; Mal. 3:18.
OMPWEHEGE YEHOVA MBURO WOBAJHA MWIGUMINI MWAWO
10. Mwahaya bwaddi kiyaali ethu yokweya anazirewu ohara nlamulo nnafwanyeya va Números 6:6, 7?
10 Omwileri Números 6:6, 7. Anazirewu kayamwaddamela muthu ookwa. Iyo podi wubuwelaga wihina ela yaali ethu yokweya. Mbwenye mwebaribarene ela yaali ethu yorusa akala mmudhi ewa dikwile. Mudhidhi yole muthu akwa, athu yahikanna elemelelo yowaddamela muruthuya. (Juwa. 19:39, 40; Dhowera Dhaarumiwi 9:36-40) Mbwenye anazirewu kayahara elemelo ela. Naarive efwanyiwaga mudhidhi ola worusa mwaha wokweliwa, munazirewu oodidela wakwanihedha mpaganyo waye. Eyo yowoniha wihina oliye ahikanna nroromelo nooliba. Mohanganyedha Yehova owavaha kopolo wihina yande wawanana makathamiho ala.
11. Neragana dhothoma dhinavolowelavo emudhi yehu ethu baani nnahowelihu wubuwela? (Osugwe fotu.)
11 Iyo nnovaha thima vanlubale wivelela wehu wa Yehova. Eyo enovolowelavo dhothoma dhehu nnerihuna veemudhi vehu. Iyo nnowilibihedha vanlubale wihina nisamalele emudhi yehu, mbwenye nnapweha wandana wehu ni Yehova mburo wobajha mwigumini mwehu. (Mat. 10:35-37; 1 Tim. 5:8) Malabo mamodha nnowerana dhothoma dhahinaadhivela amudhi ehu, mbwenye dhinamuhagalasa Yehova.
We ohuthoma opweha efunelo ya Yehova mburo wobajha mwigumini mwawo naarive ofwanyiwaga makathamiho oorusa vanlubale? (Osugwe ddima 11) e
12. Alexandru nufwanyiwa makathamiho vamuralani ethu baani eriliyena, ki ethu baani aheriliyena?
12 Kasugwa yopadduwa ya Alexandru ni mwariye, Dorina. Aabiilene obajha omuhudhera Bibiliya, mbwenye nuuvira yaka modha, Dorina othoma ohiya omuhudhera Bibiliya, teto ofunaga wi mamune Alexandru ahiye omuhudhera Bibiliya. Ni makalelo apama vamodha nupwaseya mamune owoga wihina kahiye omuhudhera Bibiliya. Dorina kaadhiveliwe, teto oosayela makalelo omuhiha mamune omuhudhera Bibiliya. Alexandru anowoga wi oosayela wonelamo ethu yamuthukulela mwadhiye omukooddiha omuhudhera Bibiliya, mbwenye kiyaali ethu yokweya wonelamo. Malabo mamodha Dorina amuruwanaga Alexandru ni awogaga nuuwali nuliye, Alexandru owubuwela ohiya omuhudhera Bibiliya. Naarive dhigaali ndo, Alexandru odidela ompweha Yehova mburo wobajha ni odidela oomuriha ni oomudhivela mwadhiye. Mwaha wa ekalelo yapama ya Alexandru, mwadhiye ohogolowela omuhudhera Bibiliya ofiyedha obaddiziwa. — Osugwe vidiyu enna musolo “Ebaribari enosaddula egumi dhaathu,” epaddi serie “A Verdade Transforma Vidas.”
13. Nnande aavi wooniha wihina nnomudhivela Yehova vamodha ni amudhi ehu?
13 Yehova dipaddusile murala. Teto Oliye anafuna wihina murala wehu okale wohagalala. (Efe. 3:14, 15) Akala nnofuna okanna ohagalala weebaribari nnohowela werana dhithudha ndala ninga Yehova anafuniye. Kuwanganyedhege wihina Yehova anohagalala mwaha wilibihedha wawo wi omulabele ni wasamalelaga emudhi yawo nuudhivela vamodha ni nriho. — Rom. 12:10.
WAKONGOMEDHE AMODHA WATAJHIHA ANAZIREWU
14. Athu baani nnahowelihu walibiha ni madhu ehu?
14 Aatene yaale enasakula omulabela Yehova peeno enohowela oleva ethu-sithu mwaha wa odhivela enniwana. Malabo mamodha kahi ethu yokweya werana eyo. Mbwenye nnande aavi wakavihera athu amodha oleva ethu-sithu wihina emulabele Yehova? Iyo podi wakavihera wodhela walibiha ni madhu ehu. (Jó 16:5) Mmulogoni mwawo ehikalamo addibila enasayela ojajaliha egumi yewa wihina yande wawenjhedhedha mabasa enampareliwa Yehova? Uhanona azombwe enoniha oliba murima wi ekale oohiyana ni azombwe amodha oskola naarive eyo egaali ethu yorusa? Ohumunona ddibila obe namahudhera a Bibiliya anilibihera okala oororomeleya wa Yehova naarive iiddiwaga ni amudhi aye? Othome werena ele onandiwe wihina walibihe athu yala ni wawaddela wi onowatikina vanlubale mwaha oliba wewa murima ni dhatedhene eneriwana wi emulabele Yehova.— File. 4, 5, 7.
15. Addibila amodha enaakavihera ale enaapara mabasa a mudhidhi wamutene?
15 Malabo mamodha iyo podi wakavihera addibila enaapara mabasa a mudhidhi wamutene. (Pro. 19:17; Heb. 13:16) Siyeyo murogola dhaala anakala elabo yo Sri Lanka, eeriliyena. Oliye nuwenjhedhedhiwa korowa aakeliye mwaha oreformari, othoma wakavihera apiyonera abiili yahanna korowa wihina edhowegeve yaparaga mabasa oopiyonero. Vano, wagulelaga kereditu mweri dhatedhene. Mwebaribarene ela ekalelo yapama murogola ola oonihiliye!
16. Ethu baani nnahudherihu ni anazirewu?
16 Mwebaribarene nnohudhera dhithu dhowinjhiva ni yopadduwa ya Anazirewu! Mbwenye mpaganyo yerana anazirewu winonihudhiha ethu wodhela Baabi ehu Yehova. Oliye ohunona wihina iyo nnofuna omuhagalasa ni nnofuna oleva ethu-sithu wihina nakwanihedhe ele nimpaganyilihu niivelelaga wa Oliye. Yehova anoniriha mwaha onivaha ofuru wosakula omudhivela Oliye. (Pro. 23:15, 16; Mar. 10:28-30; 1 Juwa. 4:19) Mpaganyo wa anazirewu onowoniha wi Yehova anowona ethu-sithu nnalevihu wihina nimulabele ni anonidhivela mwaha wa dhatedhene nnamwerelihu. Kabeni nerena dhatedhene nnandihu wihina nidhowegeve nimulabelaga Yehova, teto malabo aamatene nthome werena ele nnandihu wihina nawenjhedhedhe mabasa nnamparelihu Oliye.
YOWAKULA YAWO SIIVI?
-
Ni makalelo baani anazirewu yaliwa ooliba murima ni yahithoma oleva ethu-sithu?
-
Nnaakongomedhe aavi amodha watajhiha anazirewu ni oleva ethu-sithu?
-
Mpaganyo yerana anazirewu onanihudhiha ddi wodhela Babi ehu Yehova?
JHIBO 124 Nikale oororomeleya
a Naarive agaali Yehova amusakula muthu wi akale nazirewu, amwaana Izarayeli owinjhiva yasakula yekiwa okala nazirewu. — Kasugwa kwaduru “ Anazirewu yaasakuliwe ni Yehova.”
b Malabo mamodha malivuru ehu enowaliganiha anazirewu ni ale enaapara mabasa a mudhidhi wamutene. Mbwenye ohudhera wula nnere opwasedha woona makalelo iyo aatene niivelenle wa Yehova nnafunihu watajhiha anazirewu.
c Enakala ninga anazirewu kiyakanna ethu emodha yahoweliwa wakwanihedha ninga mutholo wewa wahile mpaganyo yeriliwana.
d Omusugwe artigo mu jw.org anna musolo “Nós decidimos simplificar a vida,” epaddi série de artigos “Relatos da Vida de Testemunhas de Jeová.”
e OTAPULELIWA WA FOTU: Munazirewu dhaala agaali vadhulu va nyumba unlaga, aasugwaga amudhaaye ni athu amodhaya edhowaga omukoya mmudhaye akwile. Mwaha wa ele ampaganyiliye wi kaaddamela mburo yole waali mwanokwa.
