1. Hal pĩnd n tãag masã, bõe la a Zeova nin-buiidã maand tɩ yaa sõma wʋsgo?

 YÃMB nonga a Zeova ne y sũur fãa bɩ? Sãmbg kae tɩ yaa woto ye. Neb wʋsg me nong-a lame. Hal pĩnd wẽndẽ n tãag masã, neb wʋsg tagsg yaa wa yãmba. (Yɩɩn. 104:​33, 34) Wʋsg sak n monga b mens bũmb kẽer sẽn na yɩl n tũ a Zeova? Sõmb n da yaa woto ne neb nins b sẽn da boond tɩ Nazireyẽ-rãmb pĩnd wẽndẽ Israyɛllã soolmẽ wã. B ra yaa ãnd dãmba, la yam-bʋg la d tõe n dɩk b mak-sõngã pʋgẽ?

2. a) Nazireyẽ-rãmbã ra yaa ãnd dãmba? (Sõdbo 6:​1, 2) b) Bõe n kɩt tɩ Israyɛll neb kẽer yãk yam n yɩ Nazireyẽ-rãmba?

² Gom-bil ning sẽn yaa “Nazireyẽ” wã yita Ebre wã gom-bil a ye pʋgẽ, tɩ gom-bi-kãng võorã yaa “ned b sẽn bak toore,” “ned b sẽn welg toore,” bɩ “ned b sẽn dɩk n kõ.” Nazireyẽ-rãmbã ra yaa Israyɛll neb sẽn tar yẽesem, sẽn sak n mong b mens bũmb toor-toor a Zeova yĩnga. A Moyiiz Tõogã ra kõta pag bɩ rao sore, t’a tõe n pʋlem a Zeova n yãk yam n yɩ Nazireyẽ wakat takɩ yĩnga. a (Karm-y Sõdb 6:​1, 2.) Ned sã n da pʋlem woto, a ra segd n tũu noy sẽn da pa tɩlɛ tɩ Israyɛll neb a taabã tũ ye. Bõe n da tõe n kɩt tɩ Israyɛll ned yãk yam n lebg Nazireyẽ? Yaa vẽeneg tɩ yaa a sẽn nong a Zeova wʋsgo, la a sũur sẽn noom ne bõn-sõma nins a Zeova sẽn kõ-a wã yĩnga.—Tõo. 6:5; 16:17.

3. Bõe n kɩt t’a Zeova Kaset rãmbã ne Nazireyẽ-rãmbã wõnd taaba?

³ “Kiristã Tõogã” sẽn ledg a Moyiiz Tõogã tɛka, noy nins b sẽn da kõ Nazireyẽ-rãmbã wɛɛngẽ wã me saame.  (Gal. 6:2; Rom. 10:4) La rũndã-rũndã, a Zeova Kaset rãmbã tʋll n tũ-a-la ne b sũurã fãa, ne b sɩɩgã fãa, ne b yamã fãa la ne b pãngã fãa wa Nazireyẽ-rãmbã. (Mark 12:30) Yɩɩ d sẽn dɩk d meng n kõ a Zeova wakat ningã la d yãk yam n na n maan dẽ. Sẽn na yɩl n vɩɩmd tɩ zems ne bũmb ning d sẽn pʋlmã, d segd n sakda a Zeova raabã, la d mongd d mens bũmb kẽer a yĩnga. D na n goma Nazireyẽ-rãmbã sẽn da pidsd b pʋlengã to-to wã yelle. Rẽ tõe n sõng-d lame tɩ d bãng bũmb toor-toor d sẽn tõe n maan n pids tõnd me pʋlengã. b—Mat. 16:24.

SAKD-Y N MONGD-Y Y MENS BŨMB KẼERE

4. Sã n yaa ne Sõdb 6:​3, 4, Nazireyẽ-rãmbã ra mongda b mens bõe?

⁴ Karm-y Sõdb 6:​3, 4. Nazireyẽ ra segd n zãaga a meng ne rãam buud fãa, la a ra wãb viyn biisi, tɩ yaa maas wall koeems ye. Tõe tɩ neb nins b sẽn da be ne wã ra nong n yũuda rãam la b rɩt viyn biisi. B sã n da maand woto pa wẽnga, bala bõn-kãensã ra pa gɩdg ye. Sɩd me, Biiblã yeelame tɩ “divẽ sẽn noogd ninsaal sũurã” yaa Wẽnnaam kũuni. (Yɩɩn. 104:​14, 15) Baa bõn-kãensã sẽn da tõe n noog ninsaal sũurã, Nazireyẽ-rãmbã yãka yam n na n mong b mens rẽ. c

5. Bõe la a Mark ne a Marselin mong b mense?

⁵ Tõnd me maanda wa Nazireyẽ-rãmbã, n mongd d mens bũmb kẽer sẽn na yɩl n tʋm a Zeova tʋʋmã wʋsgo. D gom a Mark ne a pag a Marselin d yelle. B yaa kiris-neb sẽn da vɩ naar pʋgẽ. A Mark ra tara tʋʋm-sõngo, hal n da tar zag-neere. La b ra rat n tʋma a Zeova tʋʋmã n paase. Sẽn na yɩl n tõog n maan dẽ, b yãka yam n toeem bũmb kẽere. B yeelame: “D booga d depãens-rãmbã. D yiime n tɩ bao ro-bila, la d koos d mobillã.” Ra pa tɩlɛ t’a Mark ne a Marselin mong b mens bõn-kãens ye. La b yãka yam n maan woto, sẽn na yɩl n tõog n tʋm a Zeova tʋʋmã wʋsgo. B sũur nooma b sẽn yãk yam n maan bõn-kãensa wã.

6. Bõe yĩng tɩ kiris-nebã mongd b mens bũmb kẽer rũndã-rũndã? (Ges-y fotã me.)

 ⁶ Rũndã-rũndã, kiris-nebã mongda b mens bũmb kẽer sẽn na yɩl n tʋm Wẽnnaam tʋʋmã wʋsgo, tɩ kõt-b sũ-noogo. (1 Kor. 9:​3-6) A Zeova pa yeel tɩ yaa tɩlɛ tɩ d mong d mens bõn-kãens ye. Bũmb nins d sẽn mongd d mensã pa wẽns me ye. Wala makre, kẽer sakd n basa tʋʋm b sẽn da nonge, n yi n bas b zaka, wall bũmb a to. Wʋsg yãka yam n nan pa na n kẽ kãadem wall b rog kamb ye. Sãnda yãka yam n na n tɩ sõng zĩig koe-moondb sẽn pa waooge, baa rẽ maaneg sẽn baood tɩ b loog n bas b zo-rãmb la b roagdbã. D sʋka neb wʋsg yãka yam n mong b mens bũmb a woto, b sẽn dat n maan b sẽn tõe fãa a Zeova tʋʋmdã pʋgẽ wã yĩnga. Bas-y y yam tɩ y sã n yãk yam n mong y meng bũmb a Zeova yĩnga, tɩ yaa kãseng tɩ yaa bilfu, a sũur nooma ne rẽ.—Ebre. 6:10.

SAK-Y N YƖ-Y TOORE

7. Bõe n da tõe n kɩt tɩ yɩ toog ne Nazireyẽ t’a pids a pʋlenga? (Sõdbo 6:5) (Ges-y fotã me.)

⁷ Karm-y Sõdb 6:5. Ned sã n da yaa Nazireyẽ, a pa segd n wõrs a zugã ye. Rẽ ra wilgdame t’a sakda a Zeova ne a sũy fãa. Israyɛll ned sã n da lebg Nazireyẽ n kaoose, a zoobdã ra lebgda wogd tɩ ned sã n yãa-a bɩ a miẽ t’a yaa Nazireyẽ. Neb nins sẽn da be ne-a wã sã n teend-a a yam-yãkrã pʋgẽ, pa na n yɩ toog wʋsg ne-a ye. Zu-bʋko, Israyɛll soolmẽ wã, wakat n zĩnd tɩ nebã ra pa nong Nazireyẽ-rãmbã, n da pa teend-b me ye. No-rɛɛs a Amos wakatẽ wã, Israyɛll neb sẽn da yaa wẽn-kɩɩsdb n ‘da kõt Nazireyẽ-rãmbã divẽ n dat tɩ b yũ’ n pa tõog n pids b pʋlengã ye. (Amos 2:12) Ra mi n yaa tɩlɛ tɩ Nazireyẽ paam daood wʋsgo, n tõog n pids a pʋlengã n kell n yɩ toore.

8. Bõe n kengd yãmb raood a Bẽnzame kibarã pʋgẽ?

⁸ Ne a Zeova sõngre, tõnd me tõe n talla raood n kell n yɩ toore, baa d sã n yaa yãn-zoɛt bɩ nin-sĩndga. D gom a Bẽnzame sẽn yaa a Zeova Kaset soab sẽn tar yʋʋm 10 n be Norvɛɛzã yelle. Zabrã sẽn sɩng Ikrɛnnã poore, b lekollẽ wã b maana tigsg n na n wilg tɩ b bee Ikrɛn nebã poorẽ. B kɩtame tɩ karen-biisã yeelg fut sẽn wõnd Ikrɛn darpo wã, la b yeel-b tɩ b yɩɩl yɩɩll sẽn wilgd tɩ b teend-b lame. Sẽn na yɩl n da naag n maan bõn-kãensã, a Bẽnzame lakame n tɩ yas yɩɩga. La a karen-saambã zẽka a koɛɛg n yeel-a yaa: “Wa loog n naag nebã tao-tao. Nebã fãa gũuda foo.” A Bẽnzame talla raood  n kolg karen-saambã n yeel yaa: “M pa kẽesd m toog politik yɛlẽ ye. A Zeova Kaset rãmb wʋsg bee bãens roogẽ, b sẽn zãgs tɩ b kõn kẽng zabr yĩnga.” Karen-saambã saka a Bẽnzame raabã n pa modg-a t’a naag a taabã ye. La a karen-bi-taasã ra sokd-a-la bõe yĩng t’a pa wa naag-ba. A Bẽnzame ra yɛɛsdame hal tɩ ra ket bilf t’a yãbe. Baasgo, a paama raood n togs a karen-bi-taasã bũmb ning a sẽn togs karen-saambã. Rẽ poore, a Bẽnzame yeela a roagdbã t’a yãame t’a Zeova sõng-a lame t’a gom n teel bũmb nins a sẽn tẽedã.

9. Bõe la d tõe n maan n noog a Zeova sũuri?

⁹ D sẽn yãk yam n tũud a Zeova raabã kɩtame tɩ d yaa toor ne neb a taabã. Yɩl n togs neb a taabã lekollẽ wã wall tʋʋmã zĩigẽ tɩ d yaa a Zeova Kaset soab baooda raoodo. Sẽn paase, dũni-kãngã nebã tagsgã la b manesmã sẽn tar sãoong n dabdã, yaa vẽeneg tɩ Biiblã noyã tũub la koɛɛgã mooneg na n lebgda toog n paasdẽ. (2 Tɩm. 1:8; 3:13) La tẽegd-y wakat fãa tɩ d sã n tall raood n kell n yɩ toor ne neb nins sẽn pa tũud a Zeova wã, d noogda a sũuri.—Yel. 27:11; Mal. 3:18.

LƲƖƖSD-Y-YÃ A ZEOVA RAABÃ TAOORE

10. Bõe yĩng tɩ noor ning sẽn be Sõdb 6:​6, 7 wã tũub ra tõe n yɩ toog ne Nazireyẽ?

¹⁰ Karm-y Sõdb 6:​6, 7. Nazireyẽ ra pa segd n pẽneg kũum ye. Tõe n wõnda yaa bũmb sẽn pa toog ye. La pĩnd wẽndẽ wã, Nazireyẽ ra tõe n getame tɩ no-kãngã tũub yaa toog wʋsgo. Bũmb nins b sẽn da maand ned sẽn ki yĩngã ra baoodame tɩ b pẽneg-a. (Zã 19:​39, 40; Tʋʋ. 9:​36-40) Ned sã n da yaa Nazireyẽ, a pa tõe n maan bõn-kãensã kẽer ye. Baa a zakã ned sã n maan kaalem, a kelld n tũu bũmb ning a sẽn pʋlmã, n wilg t’a tẽebã tara pãnga. Sɩd-sɩda, a Zeova ra teenda nin-kãensã sẽn maand sɩd ne-a wã, tɩ b tõogd n maood ne zu-loees nins b sẽn segdã.

11. Kiris-ned sã n wa segd n yãk yam a zakã rãmb wɛɛngẽ, bõe la a pa segd n yĩmi? (Ges-y fotã me.)

¹¹ D sẽn yaa kiris-nebã, d pa reemd ne bũmb ning d sẽn pʋlem a Zeova n dɩk d meng n kõ-a wã ye. D sã n wa na n yãk yam d zakã rãmb wɛɛngẽ wall d maan bũmbu, d tẽegda rẽ. D maanda bũmb nins Biiblã sẽn yeel tɩ d segd n maana d zakã rãmb yĩngã ne d sũur fãa, la d  pa na n saag n lʋɩɩs d zakã rãmb raab taoore, n lebs a Zeova raabã poorẽ ye. (Mat. 10:​35-37; 1 Tɩm. 5:8) Wakat ninga d segd n yãka yam sẽn pa noom d zakã rãmba, d sẽn dat n noog a Zeova sũurã yĩnga.

12. Yɛlã sẽn wa n pa nana a Alexandru zakẽ wã, bõe la a maan-yã, la bõe la a pa maane?

¹² D gom a Alexandru ne a pag a Dorina yelle. B sẽn zãms Biiblã yʋʋmd poore, a Dorina yãka yam n bas zãmsgã, n da rat t’a Alexandru me base. La a maaga a yĩng n yeel-a ne bʋgsem t’a na n kell n zãmsa Biiblã. A Dorina sũur da pa noom ne-a, n da maand a sẽn tõe fãa n dat t’a bas Biiblã zãmsgo. A Alexandru yeelame t’a ra modgdame n na n wʋm a pagã manesmã võore, la ra pa nana ne-a ye. Wakat ninga, a Dorina sã n da gomd n sãbsd-a, la a leokd-a ne toolem, a yam la a bas Biiblã zãmsgo. La a Alexandru kell n modgame n lʋɩɩs a Zeova raabã taoore, la a ra wilgdẽ t’a nonga a pagã la a waoogd-a wʋsgo. A mak-sõngã wa n kɩtame t’a pagã le sɩng Biiblã zãmsgo, n wa lebg a Zeova Kaset soaba.—Ges-y jw.org pʋgẽ video ning gom-zug sẽn yaa: A Alexandru ne a Dorina Văcar: “Nonglem maanda sũ-mare, la a maand neere.”

13. Wãn to la d tõe n wilg tɩ d nonga a Zeova la d zakã rãmba?

¹³ Yaa a Zeova n lugl zaka, n dat tɩ d paam sũ-noog d zakã pʋgẽ. (Efɛɛ. 3:​14, 15) D sã n dat n sɩd paam sũ-noogo, d segd n maanda yɛlã wa a Zeova sẽn datã. Bas-y y yam t’a Zeova sũur nooma y sẽn mongd y meng bũmb toor-toor a tũudmã yĩngã, la y get y zakã rãmb yelle, n wilgdẽ tɩ y nong-b lame la y waoogd-bã.—Rom. 12:10.

SÕNG-Y NEB A TAABÃ TƖ B RƖK NAZIREYẼ-RÃMBÃ TOGS-N-TAARE

14. Sẽn yɩɩd fãa, ãnd dãmb raood la d segd n keng ne d no-goama?

¹⁴ Neb nins sẽn yãkd yam n na n tũ a Zeova rũndã-rũndã wã fãa segd n sakd n mongda b mens bũmb toor-toor b sẽn nong-a wã yĩnga. Wakat ninga, rẽ maaneg pa nana ye. Wãn to la d tõe n sõng neb a taabã, tɩ bãmb me sak n mong b mens bũmb toor-toor a Zeova yĩnga? Yaa d sẽn na n kengd b raood ne d no-goama. (Zoob 16:5) Neb bee yãmb tigingã pʋgẽ n modgdẽ n pa gĩt b vɩɩmã ne bũmb wʋsgo, b sẽn dat n tʋm a Zeova tʋʋmã wʋsgã yĩng bɩ? Yãmb mii kom-bɩɩs sẽn tar daood n yaa toor ne b taabã lekollẽ wã baa sẽn pa nana ne-bã bɩ? Yãmb mii Biibl karen-biis wall y  tẽed-n-taas sẽn ket n maand sɩd ne a Zeova, baa ne b zakã rãmb sẽn namsd-b b tẽebã yĩngã bɩ? D tũnugd ne segb buud fãa n gomd goam sẽn kengd raood ne d tẽed-n-ta-kãense, n wilgdẽ tɩ d sũur nooma ne-ba, b sẽn mongd b mens bũmb toor-toor la b tar daoodã.—File. 4, 5, 7.

15. Bõe la kẽer maand n teend neb nins sẽn kẽes b meng zãng a Zeova tʋʋmdã pʋgẽ wã?

¹⁵ Wakat ninga, d tõe n maana bũmb takɩ n sõng d tẽed-n-taas nins sẽn kẽes b mens zãng a Zeova tʋʋmdã pʋgẽ wã. (Yel. 19:17; Ebre. 13:16) Saam-bi-poak a ye sẽn kʋʋl n be Sirlãnka ra tʋll n maana rẽ ne a sũur fãa. B paasa a retrɛtã ligdi, t’a yãk yam n na n sõng pʋg-sadb a yiib sẽn yaa so-pakdba, tɩ b kell n modg ne koɛɛgã moonego, baa ne tẽngã sẽn da tar ligd zu-loeesã. Rẽ n so t’a yãk yam n na n kõt-b ligd takɩ kiuug fãa, telefõnnã b sẽn tar n boond nebã yĩnga. Ad sɩd yaa yam-sõngo!

16. A Zeova sẽn da kɩt tɩ ned tõe n lebg Nazireyẽ wã wilgda tõnd bõe?

¹⁶ Yaa vẽeneg tɩ d tõe n dɩka yam wʋsg pĩnd wẽndẽ Nazireyẽ-rãmbã nengẽ. La d saasẽ Ba a Zeova sẽn da kɩt tɩ neb tõe n lebg Nazireyẽ-rãmbã wilgda tõnd bũmb yẽ mengã zug me. Wilgdame t’a kɩsa sɩd tɩ d rata ne d sũur fãa n noog a sũuri, la tɩ d tʋll n monga d meng bũmb toor-toore, sẽn na yɩl n vɩɩmd tɩ zems ne d sẽn pʋlm-a bũmb ning n dɩk d meng n kõ-a wã. A sẽn kõ-d sor tɩ d tõe n yãk bũmb ning d sẽn na n maan n wilg tɩ d nong-a lame wã, yaa zu-zẽkre. (Yel. 23:​15, 16; Mark 10:​28-30; 1 Zã 4:19) A Zeova sẽn da kɩt tɩ neb tõe n lebg Nazireyẽ-rãmbã wilgdame t’a nee bũmb nins d sẽn mongd d mens a yĩngã, la t’a nanda rẽ. Woto wã, bɩ d kell n wɩng ne a Zeova tũubu, la d sakd n mongd d mens bũmb toor-toor a yĩnga.