TLAMACHTILI 7
UIKATL 51 Tijmaktilijtokej toTeotsij tonemilis
¿Tlake techmachtia tlen nazareos kichiuayayaj?
“Uan nochi tonali tlen uejkauas tlen noka mokajtok, moneki mokauas tlatsejtseloltik noixtla” (NÚM. 6:8).
TLEN MOIXTOMAS
Tlen kichijkej nazareos uelis techpaleuis amo ma timajmauikaj uan ma tijkauakaj se keski tlamantli pampa tijnekij tijtekipanosej Jehová.
1. ¿Tlake kichijtokej se keskij toTeotsij itekipanojkauaj pampa kinekij kitekipanosej?
TLAUEL tijpatiita pampa kuali timouika iuaya Jehová, uan amo san ta kiampa tijyolmati. Miakej toTeotsij itekipanojkauaj nojkia kiampa kiyolmatkej (Sal. 104:33, 34). Miakej kikajkej se keski tlamantli pampa kinekiyayaj kitekipanosej Jehová. Kiampa kichijkej nopa nazareos katli itstoyaj ipan Israel. ¿Ajkia eliyayaj nopa nazareos uan tlake techmachtia tlen kichijkej?
2. 1) ¿Ajkia inijuantij eliyayaj nazareos? (Números 6:1, 2). 2) ¿Kenke se keskij israeleuanij kinekiyayaj kitekipanosej Jehová kej nazareos?
2 Nopa tlajtoli nazareo, uala tlen se tlajtoli hebreo tlen kiijtosneki “amo sanse kej sekinok”, “tlaiyokatlalili” o “katli motemaktilijtok”. Kiampa kintokaxtiyayaj se keskij israeleuanij. Uan kinamikiyaya kiampa ma kintokaxtikaj, pampa inijuantij kikauayayaj se keski tlamantli pampa kinekiyayaj kuali kitekipanosej Jehová. Nopa Tlanauatili tlen kimakakej Moisés, kiijtouayaya se tlakatl o se siuatl ueliskia kiiljuis Jehová kitekipanos kej nazareo se keski tonali (xijpoua Números 6:1, 2). a Kema se akajya kiiljuiyaya Jehová kinekiyaya kitekipanos kej nazareo, amo ueliyaya kichiuas se keski tlamantli tlen sekinok israeleuanij kena kichiuayayaj. ¿Kenke se keskij israeleuanij kinekiyayaj kitekipanosej Jehová kej nazareos? Pampa tlauel kiikneliyayaj uan kitlaskamatiliyayaj (Deut. 6:5; 16:17).
3. ¿Tlake tlamantli tlen kichiuayayaj nazareos tojuantij nojkia tijchiuaj?
3 ToTeotsij itekipanojkauaj ayokmo uelis mochiuasej nazareos pampa “tlen Cristo technauatijtok” kipatlak nopa Tlanauatili tlen kimakakej Moisés (Gál. 6:2; Rom. 10:4). Pero sanse kej inijuantij, tojuantij nojkia tijnekij tijtekipanosej Jehová ika nochi toyolo, ika nochi tonemilis, totlalnamikilis uan tochikaualis (Mar. 12:30). Uan ya nopa tikiljuiaj Jehová kema tijmaktiliaj tonemilis. Tlaj tijnekij tijchiuasej tlen tikiljuikej Jehová, moneki tijchiuasej tlen ya kipaktia uan tijkauasej se keski tlamantli. Tikitasej kenijkatsa nopa nazareos kichiuayayaj tlen kiiljuijtoyaj Jehová uan kenijkatsa tlen inijuantij kichijkej techpaleuia nojkia kiampa ma tijchiuakaj (Mat. 16:24). b
MA TIMOSENTLALIKAJ TIJKAUASEJ SE KESKI TLAMANTLI
4. Kej kiijtoua Números 6: 3, 4, ¿tlake tlamantli amo kikuayayaj yon kiijiyayaj nazareos?
4 (Xijpoua Números 6:3, 4). Nazareos amo ueliyayaj kiijij tlaili, yon ueliyayaj kikuaj uvas yon pasas. Ipan nopa tonali maseualmej momajtoyaj kikuaj nochi ni tlamantli pampa amo kenijki eliyaya tlaj kikuayayaj. Biblia kiijtoua toTeotsij techmakatok tlaili uan kichiua ma tiyolpakikaj (Sal. 104:14, 15). Maske sekinok israeleuanij kena moyolpakiltiyayaj ika nopa tlamantli, nazareos mosentlalijtoyaj ika nochi ininyolo amo kiampa kichiuasej. c
¿Timosentlalijtokej tijkauasej se keski tlamantli kej kichijkej nazareos? (Xikita párrafos 4-6).
5. ¿Tlake kichijkej Madián uan Marcela uan kenke?
5 Sanse kej nazareos, tojuantij nojkia tijkauaj se keski tlamantli pampa tijnekij más tijtekipanosej Jehová. Ma tikitakaj tlen kichijkej Madián uan Marcela. d Inijuantij itstokej Colombia uan achtouia tlapijpiayayaj. Madián kitlaniyaya miak tomi, yeka itstoyaj ipan se yejyektsi kali. Pero inijuantij kinekiyayaj más kitekipanosej Jehová, yeka mosentlalijkej kikauasej se keski tlamantli. Inijuantij kiijtouaj: “Ayokmo tlauel titlakojkojkej, tiakej tiitstotoj ipan se kali tlen amo tlauel ueyi, uan nojkia tijnamakakej tocarro”. Maske Madián uan Marcela amo monekiyaya kikauasej nochi nopa tlamantli, inijuantij kiampa kichijkej pampa kinekiyayaj más tlajtolmoyauasej. Tlauel yolpakij pampa kiampa kichijkej.
6. ¿Kenke katli tijtekipanouaj Jehová ipan ni tonali tijkauaj se keski tlamantli? (Nojkia xikita tlaixkopinkayotl).
6 Nochi Jehová itekipanojkauaj tijkauaj se keski tlamantli pampa tijnekij más kuali tijtekipanosej (1 Cor. 9:3-6). Amo kenijki tlaj tijpiaj se keski tlamantli uan Jehová amo techchiualtia ma tijkauakaj o amo ma tijpiakaj. Se keskij toikniuaj kitlapejpeniaj amo kipiasej se kali, se kuali tekitl o se tlapiali. Sekij mosentlalijtokej amo nima mosenkauasej o tlaj mosenkauaj, mosentlaliaj amo nima kinpiasej ininkoneuaj. Uan sekij kinkauaj ininchampoyouaj uan ininuampoyouaj uan yauij kampa moneki tlajtolmoyauanij. Miakej tijkauaj miak tlamantli pampa tijnekij más kuali tijtekipanosej Jehová. Uelis timotemachisej Jehová tlauel kipatiita tlen tijchiuaj pampa tijnekij tijtekipanosej kej kinamiki (Heb. 6:10).
AMO MA TIMAJMAUIKAJ UAN AMO MA TIJCHIUAKAJ KEJ SEKINOK
7. ¿Kenke kemantika nazareos kimatiyayaj ouij kichiuasej tlen kitenkauilijtoyaj Jehová? (Números 6:5; nojkia xikita tlaixkopinkayotl).
7 (Xijpoua Números 6:5). Nazareos amo moximayayaj pampa kiampa kinextiyayaj kikauayayaj Jehová ma kinyakana. Kema se israelejketl uejkauayaya kitekipanoua Jehová kej nazareo, sekij nima kiitayayaj pampa tlauel moskaltiyaya itsonkal. Tlaj sekinok kuali kiitayayaj tlen kichiuayaya uan kipaleuiyayaj, nopa nazareo amo ouij kimatiyaya, pero kemantika ipan Israel amo kinpatiitayayaj yon amo kintlepanitayayaj nazareos. Se neskayotl, kema itstoya teokamanalojketl Amós, se keskij israeleuanij katli kitlauelkajtoyaj Jehová, kinchiualtijkej nazareos ma kiikaj xokomekaatl. Uelis kiampa kichiuayayaj pampa amo kinekiyayaj nazareos ma kichiuakaj tlen kitenkauilijtoyaj Jehová (Amós 2:12). Kemantika ouij kimatiyayaj amo elisej sanse kej sekinok uan monekiyaya amo majmauisej.
Nazareos monekiyaya amo majmauisej pampa amo kichiuayayaj kej sekinok. (Xikita párrafo 7).
8. ¿Tlake tlamantli tlen kipanok Benjamín mitspaktik?
8 Ika itlapaleuil Jehová, uelis amo timajmauisej uan amo tijchiuasej kej sekinok maseualmej. Ma tikitakaj tlen kipanok Benjamín, se toikni tlen Noruega katli kipia matlaktli xiuitl. Kampa momachtia kichijkej se iljuitl kampa kinextiyayaj kipaleuiyayaj Ucrania pampa nopaya mochiuayaya se ueyi tlauilankayotl. Konemej monekiyaya uikasej uan moyoyontisej ika colores tlen kinextiyaya bandera tlen Ucrania. Benjamín mouejkatlalik pampa amo kinekiyaya tlapaleuis ipan nopa iljuitl. Pero se tlamachtijketl kiitak uan kitsajtsilik: “¡Xiuala touaya! ¡Xiisiui, timitschixtokej!”. Benjamín amo majmajki, kinechkauik uan kiiljuik: “Na amo nijchiua iljuitl kampa kinpaleuiaj políticos. Miakej Jehová itlatekipanojkauaj kintsaktokej pampa amo kinekij yasej tlateuitij”. Nopa tlamachtijketl kikuamachilik uan ayokmo tleno kiiljuik. Pero katli ininuaya momachtiyaya kitlajtlaniliyayaj kenke amo uikayaya ininuaya. Benjamín pejki majmaui uan kinekiyaya chokas. Maske kiampa kiyolmatiyaya, ya kiniljuik tlen ya kiiljuijtoya nopa tlamachtijketl. Teipa kiniljuik itatauaj kenijkatsa Jehová kipaleuijtoya ma kiniljui sekinok tlen kineltoka.
9. ¿Kenijkatsa uelis tijyolpakiltisej Jehová?
9 Kema tijneltokaj Jehová, maseualmej kiitaj amo tijchiuaj sanse kej inijuantij. Moneki amo timajmauisej uan tikiniljuisej katli ininuaya titekitij o katli ininuaya timomachtiaj, tielij Jehová itekipanojkauaj. Uan pampa maseualmej más amo kuali monejnemiltisej, uelis más ouij tijmatisej timonejnemiltisej kej Biblia kiijtoua uan titlajtolmoyauasej (2 Tim. 1:8; 3:13). Pero moneki tikilnamikisej Jehová tlauel yolpaki kema amo timajmauij uan amo timonejnemiltiaj kej sekinok maseualmej (Prov. 27:11; Mal. 3:18).
MA TIKACHTOUITLALIKAJ TIJTEKIPANOSEJ JEHOVÁ
10. ¿Kenke nazareos kimatiyayaj ouij kichiuasej tlen kiijtoua Números 6:6, 7?
10 (Xijpoua Números 6:6, 7). Nazareos amo ueliyayaj kinechkauiaj se mijkatsi. Maske timoiljuiaj amo eliyaya ouij, kena kiampa kiyolmatiyayaj tlaj nopa mijkatsi eliyaya se tlen ichampoyouaj. ¿Kenke kiampa kiyolmatiyayaj? Pampa ipan nopa tonali momajtoyaj kinnechkauiaj katli mikiyayaj (Juan 19:39, 40; Hech. 9:36-40). Nazareos amo ueliyayaj kichiuaj ni tlamantli. Maske ouij kimatiyayaj, kema kichiuayayaj tlen kitenkauilijtoyaj Jehová, kinextiyayaj kuali tlaneltokaj. Uan amo itstoyaj ininselti pampa Jehová nochipa kinpaleuiyaya kema monekiyaya.
11. ¿Tlake kinamiki tijchiuasej kema tochampoyouaj kinekisej ma tijchiuakaj se tlamantli tlen kiixpano Jehová? (Nojkia xikita tlaixkopinkayotl).
11 Nochi Cristo itokilijkauaj timosentlalijtokej tijchiuasej tlen tijtenkauilijkej Jehová. Kiampa nesi ika tlen tijtlapejpeniaj tijchiuasej ipan tonemilis uan kema pano se keski tlamantli ika tochampoyouaj. Maske tijchiuaj kampeka kuali timouikasej ininuaya uan tikinpaleuisej, amo kema tijnekij tikixpanosej Jehová san pampa tijnekij tikinyolpakiltisej (Mat. 10:35-37; 1 Tim. 5:8). Uelis kemantika tochampoyouaj kualanisej touaya pampa tijnekisej tijchiuasej tlen Jehová kipaktia.
¿Timosentlalijtokej tikachtouitlalisej Jehová maske kemantika tijmatisej ouij? (Xikita párrafo 11). e
12. ¿Tlake kichijki Alexandru kema isiua kualaniyaya pampa momachtiyaya Biblia?
12 Ma tikitakaj tlen kinpanok Alexandru uan isiua Dorina. Kema ya kinmachtijtoyaj ika Biblia se xiuitl, Dorina ayokmo kinejki momachtis uan kinekiyaya Alexandru nojkia ayokmo ma momachti. Pero ya, ika tlaiknelili, kiiljuik Dorina nojua kinekiyaya momachtis. Dorina amo kipaktik uan kinejki kichiualtis ayokmo ma momachti. Alexandru tlauel ouij kimatki kikuamachilis isiua. Kemantika moiljuiyaya ayokmo momachtis Biblia pampa Dorina kitlaijiljuiyaya. Maske kiampa kipanoyaya, ya nojua kiachtouitlalik kitekipanos Jehová uan nojua kiiknelik uan kitlepanitak isiua. Pampa kiampa kichijki, teipa isiua sampa kinejki momachtis Biblia uan nojkia pejki kitekipanoua Jehová (xikita video Alexandru uan Dorina Văcar: “Katli teiknelia kipia iyolo uan kichiua tlen kuali”, ipan tlaxeloli “Kinpaleuijtok toTeotsij iTlajtol”, ipan jw.org).
13. ¿Kenijkatsa uelis tijnextisej tikikneliaj Jehová uan tochampoyouaj?
13 Jehová kichijki ma tiitstokaj ininuaya tochampoyouaj uan kineki ma tiyolpakikaj (Efes. 3:14, 15). Tlaj tijnekij tiyolpakisej moneki tijchiuasej tlen Jehová techiljuia. Jehová kipatiita pampa tijchiuaj kampeka tijtekipanosej uan nojkia pampa tikinmokuitlauiaj, tikinikneliaj uan tikintlepanitaj tochampoyouaj (Rom. 12:10).
¿TLAKE TECHMACHTIA TLEN NAZAREOS KICHIUAYAYAJ?
14. ¿Ajkia moneki ma tikinyolchikauakaj?
14 Nochi katli tijtekipanouaj Jehová moneki tijnekisej tijkauasej se keski tlamantli pampa tikikneliaj. Pero kemantika ouij tijmatij. ¿Tlake techpaleuis? Tlauel techpaleuis tlaj timoyolchikauaj ika tlen tikijtouaj (Job 16:5). ¿Itstok se toikni ipan motlanechikol katli kineki kikauas se keski tlamantli pampa kineki más kitekipanos Jehová? ¿Tikixmati se toikni telpokatl katli kinextia amo majmaui pampa amo kichiua kej sekinok telpokamej katli ininuaya momachtia? ¿Tikixmati se toikni o se katli momachtia Biblia katli ouij kimati pampa ichampoyouaj amo kinekij ma kitekipano Jehová? Xijchiua kampeka tikinyolchikauas uan xikiniljui tikinpatiita pampa kinextiaj amo majmauij uan kikauaj se keski tlamantli para kitekipanosej Jehová (Filem. 4, 5, 7).
15. ¿Tlake kichiuaj se keskij toikniuaj uan kiampa kinpaleuiaj katli senkistok kitekipanouaj Jehová?
15 Kemantika uelis tikinpaleuisej ika se keski tlamantli toikniuaj katli senkistok kitekipanouaj Jehová (Prov. 19:17; Heb. 13:16). Kiampa kichijki se tosiuaikni katli ya ueyi uan itstok Sri Lanka. Ni tosiuaikni pejki kiselia más tomij pampa achtouia tekitiyaya, yeka kinejki kinpaleuis omej precursoras katli amo kinaxiliyaya inintomij para mopanoltisej. Sejse metstli kiiyokatlaliyaya tomij uan kiampa kinpaleuiyaya ma kiixtlauakaj teléfono. ¡Tlauel kuali tlen kichijki ni tosiuaikni!
16. ¿Tlake techmachtia tlen nazareos kichiuayayaj?
16 ¡Tlauel techpaleuia tlen nazareos kichiuayayaj! Uan nojkia techmachtia se tlamantli tlen toTata Jehová. Ya kimati tijnekij tijyolpakiltisej ika nochi toyolo uan tijnekij tijkauasej se keski tlamantli pampa tijnekij tijchiuasej tlen tikiljuijkej kema tijmaktilijkej tonemilis. Uan nojkia tlauel tiyolpakij pampa techkaua ma tijnextikaj tlauel tikikneliaj (Prov. 23:15, 16; Mar. 10:28-30; 1 Juan 4:19). Tlen nazareos kichiuayayaj technextilia Jehová kiita nochi tlen tijchiuaj pampa tijnekij tijtekipanosej uan tlauel kipatiita. Yeka nojua ma tijtekipanojtokaj Jehová ika nochi toyolo.
¿TLAKE TITLANANKILISKIA?
-
¿Kenijkatsa nazareos kinextijkej amo majmauiyayaj uan kinejkej kikauasej se keski tlamantli?
-
¿Kenijkatsa uelis timoyolchikauasej uan kiampa nojkia tijchiuasej kej nazareos?
-
¿Tlake techmachtia tlen Jehová tlen nazareos kichiuayayaj?
UIKATL 124 Amo ma titetlauelkauakaj
a Maske Jehová kintlapejpeniyaya se keskij kej nazareos, miakej ininselti kitlapejpeniyayaj mochiuasej nazareos (xikita nopa recuadro “ Nazareos katli Jehová kintlapejpenik”).
b Ipan se keski amatlajkuiloli, tikijtojtokej toikniuaj katli senkistok kitekipanouaj Jehová elij kej nazareos, pero ipan ni tlamachtili tikitasej kenijkatsa nochi uelis kichiuasej kej nazareos.
c Yon se tlamantli kinextia tlaj nazareos monekiyaya kichiuasej se tekitl para kichiuasej tlen kitenkauilijtoyaj Jehová.
d Xikita nopa tlamachtili “Elegimos una vida sencilla”, ipan tlaxeloli “Experiencias de los testigos de Jehová” ipan jw.org (ika español).
e TLEN NESI IPAN TLAIXKOPINKAYOTL: Se nazareo amo ueli monechkauia kema miki se tlen ichampoyouaj pampa mosentlalijtok kichiuas tlen kitenkauilik Jehová. Yeka itstok kalpani uan san kiuejkatlachilia kema kiuikaj nopa mijkatsi.
